মখোয়গী থবকশিংনা মাইপাক্না মহা কুম্ভ পাংথোকপা ঙমখিবদা ঐনা মীয়ামদা কোক নোঞ্জরি: প্রধান মন্ত্রী
মহা কুম্ভ মাইপাকপদা মীওই কয়ানা মতেং পাংখি, সরকারগী থৌমীশিং অমসুং খুন্নাই ঐনা থাগৎপা ফোঙদোকচরি: প্রধান মন্ত্রী
মহা কুম্ভ পাংথোকপদা ঐখোয়না ‘মহা প্রায়াস’ অমা উরে: প্রধান মন্ত্রী
মহা কুম্ভ অসি মীয়াম্না লুচিংবনি, মখোয়না ৱাশক্না পাংথোকপনি আমসুং মখোয়গী কৎথোকপনা ইথিল পীবনি: প্রধান মন্ত্রী
প্রায়াগ্রাজ মহা কুম্ভ অসি লৈবাক অসি মিকপ থোকপগী ৱাখল অমগী মমি তাবা শিংথানিঙাই ওইনা মাইপাকপা অমনি: প্রধান মন্ত্রী
মহা কুম্ভনা অপুনবগী ৱাখল্লোন মপাঙ্গল কনখৎহল্লে: প্রধান মন্ত্রী
মহা কুম্ভদা, খেন্নবা খুদিংমক লৈত্রে; মসি ভারতকী অচৌবা মপাঙ্গলনি, ঐখোয়গী মনুংদা অপুনবগী ৱাখল্লোন চেৎনা মরা তারে হায়বা উৎলি: প্রধান মন্ত্রী
লাইনিং অমসুং চৎনবীগা শম্নবগী ৱাখল্লোন অসি ঙসিগী ভারতকী খ্বাইদগী মমল য়াম্বা লন্নি: প্রধান মন্ত্রী
ইকায়খুম্নরবা স্পিকর সার,
প্রায়াগ্রাজদা পাংথোকখিবা অচৌবা মহা কুম্ভগী মতাংদা ৱারোল অমা থম্নবা ঐ মফম অসিদা লৈরে। হাওস অসিগী খুৎথাংদা, মখোয়গী থবকশিংনা মাইপাক্না মহা কুম্ভ পাংথোকপা ঙমখিবদা ঐনা মশিং থিঙমদ্রবা লৈবাক অসিগী মীয়াম থম্মোয় শেংনা থাগৎপা ফোঙদোকখি। মহা কুম্ভ মাইপাক্না তোঙান তোঙানবা মীওইশিং অমসুং কাংবুনা অপুনবা ওইনা পাংথোকখিবা থবকশিং অদুগীদমক ঐনা ইকায়খুম্নবা উৎচরি।সরকার, খুন্নাই অমসুং কৎথোক্লবা শিন্মীশিংগী থবকশিং থাগৎপা ফোঙদোকচরি। লৈবাক শীনবা থুংবগী ভক্তশিং, মরুওইনা উত্তর প্রদেসকী মীয়াম অমসুং প্রায়াগ্রাজগী মীয়াম, মখোয়গী মমল নাইদ্রবা মতেং অমসুং শরুক য়াবগীদমক ঐনা তৌবীমল খঙবা উৎচরি।
স্পিকর সার,
শেংলবা গঙ্গা মালেমদা পুরক্নবা অহেনবা থবক অমা দরকার ওইবা হায়বা ঐখোয় খুদিংমক্না খঙলে। মহা কুম্ভ শীনবা অচৌবা থবকশিং দরকার ওইরিবা অদু ঐখোয়না উরে। থবক অসি ভাগিরতনা গঙ্গা মালেমদা পুরক্নবা হোৎনখিবা অদুগা মান্নৈ। ঐনা লাল কিলাদা মহাক্না ৱা ঙাংবদা “ সবকা প্রায়াস” গী মরুওইবা ফোঙদোকখি। মহা কুম্ভনা ভারতকী চিং-লেম্বা মালেমগী মফমদা উৎলে। মহা কুম্ভ অসি অপুনবা ৱাশক, ভক্তি অমসুং মীয়ামগী কৎথোকপা, মখোয়গী লাইনিংনা পীবা ইথিল অদু উৎথোকপা অমনি।
ইকায়খুম্নরবা স্পিকর সার,
প্রায়াগ্রাজ মহা কুম্ভ অসি লৈবাক অসি মিকপ থোকপগী ৱাখল অমগী মমি তাবা শিংথানিঙাই ওইনা মাইপাকপা অমনি। মিকপ থোক্লকপা অসিনা লেবাক অসি অনৌবা ৱারেপশিং অমসুং মখোয়গী অনিংবশিং থুংনবা মাইকৈদা পুশিল্লে। লৈবাক অসিগী তৌবা ঙম্বগী মতাংদা মীওই খরনা চিংনবা লৈরম্বা অদু মহা কুম্ভনা মপুংফানা কোকহল্লে।
ইকায়খুম্নরবা স্পিকর সার,
হৌখিবা চহিদা অয়োধ্যাদা রাম মন্দির শঙ্গাখিবা অমসুং চহি অসিগী মহা কুম্ভ অনিগী মরক্ত মান্নরে। থৌদোকশিং অসিনা মথং চহি ১০০০ গীদমক লৈবাক অসিনা থৌরাং তৌবা অমুক হন্না মপাঙ্গল কনখৎহল্লে। লৈবাক অসিগী অপুনবা ৱাখল্লোন্দা লৈবাক অসিগী অচৌবা থৌনাগী মমি তারে। লৈবাক অমগী পুৱারিদা মরুওইবা তাঞ্জাশিং, মীওইবগী পুৱারিগুম, লাক্কদৌরিবা মীরোলশিংগী খুদমশিং ওইরগনি। ভারতকী পুৱারিগী খুমাঙচাউশিনবশিংনা লৈবাক অসি মিকপ থোকহনখি অমসুং অনৌবা মাইকৈ তাকখি, শ্বাদেসি ইহৌ মনুংদা অধ্যাতিক্কী অনৌবা ইনোৎ লাকখি, শ্বামী বিবেকানন্দগী মমিং লৈরবা চিকাগোগী ৱারোল অমসুং ভারতকী নিংতম ইহৌগী মরুওইবা মিকুপশিং, ১৮৫৭ গী লালহৌ, ভগত সিংহনা থৱায় কৎখিবা, নেতাজি সুভাস চন্দ্র বোসকী “দিল্লি চৎলো” অমসুং মহাত্মা গান্ধীগী দান্দি খোঙচৎ লৈখি। প্রায়াগ্রাজগী মহা কুম্ভ অসি মসিগা মান্নবা শিংথানিঙাই ওইরবা মাইপাকপা অমনি, লৈবাক অসি মিকপ থোক্লকপগী খুদমনি।
ইকায়খুম্নরবা স্পিকর সার,
ভারত্ত থা অমগা মখায় রোম পাংথোকখিবা মহা কুম্ভ মনুংদা হরাওবা ঐখোয়না উখ্রে। ভক্ত করোর কয়ানা খুদোংচাবা নত্ত্রগা খুদোংচাদবা থিদনা, অচেৎপা থাজবগা লোয়ননা থোক্লক্তুনা লৈবাক অসিগী অকনবা থৌনা উৎখি। হন্দক ঐনা মাউরিসিয়সতা চৎলুবদা, মফম অদুদা ঐনা মহা কুম্ভ মনুংদা প্রায়াগ্রাজগী ত্রিবেনিদগী শোকপা শেংলবা ঈশিং পুখি। মাউরিসিয়সকী গঙ্গা তালাউদা শেংলবা ঈশিং কৎপদা অঙকপা হরাওবা অমসুং কৎথোকপা উবা ফংখি। মসিদা ভারতকী চৎনবীশিং, নাৎ অমসুং গুনশিং লৌশিনবা, হরাওবা ফোঙদোকপা অমসুং ঙাক-শেনবগী ৱাখল হেনগৎলকপগী মমি তারে।
ইকায়খুম্নরবা স্পিকর সার,
চৎনবীশিং অতৎ-অখম লৈতনা মীরোল কয়া মখা চৎথদুনা লাক্লি অসি ঐশু উরে। অচেৎপা কৎথোকপগা লোয়ননা ভারতকী অনৌবা নহারোলশিংনা মহা কুম্ভ অমসুং অতোপ্পা কুহ্মৈশিং থৱায় য়াওনা শরুক য়ারি। ঙসিগী নহারোলশিংনা চাউথোকচবগা লোয়ননা মখোয়গী চৎনবীশিং, লাইনিং অমসুং থাজবশিং ইল্লি, ভারতকী নাৎ অমসুং চৎনবীশিংগা য়াম্না চেৎনা মরী লৈনবা অদু মমি তারি।
ইকায়খুম্নরবা স্পিকর সার,
খুন্নাই অমনা মদুগী চৎনবীশিংগী চাউথোকচবা মতমদা, মদুনা ফজবা অমসুং পুক্নিং থৌগৎপা মিকুপশিং ওইরকই অমসুং মদু ঐখোয়না মহা কুম্ভদা উবা ফংলে। অসিগুম্বা চাউথোকচবা অসিনা অপুনবগী শক্তম হেনগৎহল্লি অমসুং লৈবাক্কী মরুওইবা পান্দমশিং ফংনবা থাজবা হেনগৎহল্লি। চৎনবীশিং, লাইনিং অমসুং নাৎকা শম্নবা অসি হৌজিক্কী ভারতকী মমল নাইদ্রবা লন্নি, মসিদা লৈবাক অসিগী অপুনবা মপাঙ্গল অমসুং নাৎকী ইনাকখুনবা অদু মমি তারি।
ইকায়খুম্নরবা স্পিকর সার,
মহা কুম্ভনা মমল নাইদ্রবা কান্নবা কয়া ফংহল্লে, অমতা ওইবগী ৱাখল্লোন অসিনা মহা কুম্ভগী শেংলবা খুদোল ওইরে। লনাই মীওইশিংগী নাপলশিং নাথৈদুনা থম্লগা অমসুং “ঐখোয়” অমসুং “ঐ” হায়বা অপুনবগী ৱাখল্লোন অমগা লোয়ননা লৈবাক অসিগী মফম খুদিংমক্তগী অমসুং কাচিন-কোয়া খুদিংমক্তগী মীওইশিং প্রায়াগ্রাজদা তিল্লে। তোঙান তোঙানবা রাজ্যশিংগী মীওইশিং শেংলবা ত্রিবেনিগী শরুক অমা ওইরে, মরৈবাক নুংশিবা অমসুং অপুনবগী ৱাখল্লোন মপাঙ্গল কনখৎহল্লে। তোঙান তোঙানবা লোল ঙাংবা মীওইশিংনা শঙ্গমদা “হর হর গঙ্গে” লাউবা মতমদা, মসিদা “এক ভারত শ্রেস্থা ভারত” গী মমি তারে অমসুং অমতা ওইবগী ৱাখল্লোন হেনগৎহল্লে। অচৌবা অমসুং অপীকপা অনিগী মরক্ত খেন্নবা লৈতবা অদু মহা কুম্ভনা উৎলে। লৈবাক অসিগী মনুংদা লৈরিবা অপুনবা অসি অশুক্কী মতিক মপাঙ্গল কল্লে মদুদি মসিনা তোখাই তানবা হোৎনবা থবকশিং লাকশিনবা ঙম্লে। মসিগী অপুনবা অসি ভারতমচাশিংগী খ্বাইদগী লাইবক ফবনি অমসুং মচেৎ তাবা মায়োক্নরিবা মালেম অমগী শিংথানিঙাই ওইরবা পাঙ্গল অমনি। “খেন্নবশিংগী অপুনবা শক্তম” অসিনা ভারত মশক তাক্লি, মসি প্রায়াগ্রাজ মহা কুম্ভনা খুদম ওইনা উৎলে। খেন্নবগী অপুনবা শক্তম অসি অঙকপা লমচৎ অসি মখা তানা লৈবাক অসিনা ফগৎহনগদবনি।
ইকায়খুম্নরবা স্পিকর সার,
মহা কুম্ভদগী তোঙান তোঙানবা ইথিলশিং ফংখি। লৈবাক অসিদা তুরেল কয়া চেল্লি, তুরেল কয়া খুদোংচাদবা কয়া মায়োক্নরি। মহা কুম্ভনা ইথিল পীদুনা তুরেলশিংগী কুহ্মৈশিং পাংথোকপগী চৎনবীশিং পাকথোক-চাউথোকহনবা দরকার ওইরে, অসিগুম্বা থবকশিংনা হৌজিক্কী মীরোলনা ঈশিংগী মরুওইবা খঙবা, তুরেল লু-নান্না থম্বা হেনগৎহনবা অমসুং তুরেলশিং ঙাক-শেনবদা মতেং পাংগনি।
ইকায়খুম্নরবা স্পিকর সার,
মহা কুম্ভদগী ফংলকপা ইথিলশিং অসিনা লৈবাক অসিগী পান্দমশিং ফংনবা মপাঙ্গল কনবা পাম্বৈ অমা ওইনা থবক তৌগনি হায়না ঐনা চেৎনা থাজৈ। মহা কুম্ভ শীনবদা শরুক য়াখিবা মীওই খুদিংমক ঐনা অমুক হন্না থাগৎপা ফোঙদোকচরি। লৈবাক শীনবা থুংবগী ভক্তশিংদা ঐনা ইকায়খুম্নবা উৎচরি অমসুং হাওসকী মহুৎশীন্দুনা ঐনা য়াইফ-পাউজেল পীজরি।
