ভোপালগী দেবী অহিল্যাবাই মহিলা শশক্তিকরন মহাসম্মেলন্দা তোঙান তোঙানবা প্রোজেকশিং হৌদোকপদা প্রধান মন্ত্রীনা ফোঙদোকখিবা ৱারোল

মধ্য প্রদেসকী রাজ্যপাল শ্রী মঙ্গুভাই পতেল, ঐখোয়গী চীফ মিনিস্তর শ্রী মোহন যাদব জি, তেক্নোলোজিগী খুৎথাংদা শরুক য়ারিবা য়ুনিয়ন মিনিস্তরশিং, ইন্দোরদগী তোখান সাহু জি, দাতিয়াদগী রাম মোহন নাইদু জি, সাত্নাগী মুরালিদার মোহোল জি, রাজ্য অসিগী দিপুতি চীফ মিনিস্তর জগদিস দেবদা জি, রাজেন্দ্র সুক্লা জি, লোক সভাদা ঐগী মরুপ ভি.দি শর্মা জি, অতোপ্পা মিনিস্তরশিং, মীয়ামগী মীহুৎশিং অমসুং মফম অসিদা তিল্লিবা ঐগী নুংশিরবা ইনাওশিং অমসুং ইচলশিং।

অহানবদা, ঐনা ইমা ভারত্ত কোক নোঞ্জরি। ঙসি, মশিং য়াম্লবা ইমাশিং অমসুং ইচলশিং ঐখোয়দা বর পীনবা লাক্লি। ইচলশিং উবদা ঐ লাইবক য়াম্না ফরে।

ইনাওশিং অমসুং ইচলশিং,

ঙসি লোকমাতা দেবী অহিল্যা হোলকারগী ৩০০শুবা মপোক কুমওন্নি। লৈবাক শেমগৎনবগী থবকশিংদা ভারতমচা করোর ১৪০ ইথিল পীনবা অমসুং শরুক য়ানবা থৌরম অসি খুদোংচাবা অমনি। লৈবাক ঙাকপগী অশেংবা ৱাহন্থোক্তি মীয়ামগী থবক তৌবা অমসুং মখোয়গী পুন্সিগী থাক ৱাংখৎহনবনি হায়না দেবী অহিল্যাবাইনা ফোঙদোকখি। ঙসিগী থৌরম অসিনা মহাক্কী ৱাখল্লোনশিং মাঙলোমদা পুখৎলে। ঙসি, ইন্দোর মেত্রো শঙ্গারে। দাতিয়া অমসুং সাত্না হৌজিক এয়র সর্বিস লৈরে। প্রোজেকশিং অসিনা মধ্য প্রদেসদা খুদোংচাবশিং হেনগৎহল্লগনি, চাউখৎপা য়াংখৎলগনি অমসুং অনৌবা থবকশিং ফংনবা খুদোংচাবশিং পীরে। ঙসি শেংলবা নুমিৎ অসিদা, ঐনা অদোম অমসুং মধ্য প্রদেসকী চাউখৎ থৌরাংগী থবকশিংগীদমক হরাওবা ফোঙদোকচরি।

মরুপশিং,

লোকমাতা দেবী অহিল্যাবাই হোলকারগী মিং তাবদা পুক্নিংদা নুংঙাইবা অমা ফাওহল্লে। মহাক্কী অফবা গুনশিংগী মরমদা ঙাংনবা ৱাহৈশিংনা ৱাৎহৌরগনি। চপ য়ুংনা খল্লবা, অচেৎপা ফিরেপ লৈরবা, খুদোংচাবা কয়া লাক্লবশু, অফবা থবকশিং পাংথোকপা ঙমগনি হায়বসি দেবী অহিল্যাবাইনা খুদম অমনি। চহি ২৫০ গী মমাঙদা, লৈবাক অসিনা মীনাই ওইরিঙৈদা, মতম অদুদা অসিগুম্বা অফবা থবকশিং পাংথোক্তুনা, তুংগী মীরোলশিংনা থবক অদুগী মরমদা ঙাংনবা অসি অরাইবা থবক নত্তে।

মরুপশিং,

লোকমাতা দেবী অহিল্যানা কৈদৌঙৈদা ঈশ্বরগী থবক অমসুং মীয়ামগী থবক তোখাইনা লৌদে। মহাক মতম পুম্নমক্ত সিবলিং অমা লোয়নখি। তিংখঙগী লুহুপ অমা উপ্পগুম্বা খুদোংথিবা মতম অদুদা, মহাক্কী লৈবাক য়াইফনবগীদমক লোকমাতা দেবী অহিল্যাবাইনা অনৌবা মাইকৈ অমা তাকখি। লায়রবশিংগী মনুংদা খ্বাইদগী লায়রবগী ফিবম ফগৎনবা মহাক্না থবক তৌখি। লোকমাতা দেবী অহিল্যাবাই ভারতকী নাৎ অমসুং চৎনবীশিং মপুংফানা য়োকখৎপা অমনি। লৈবাক অসিগী নাৎ, ঐখোয়গী লাইশঙশিং, ঐখোয়গী লাইফমশিং খুৎ থারকপা মতমদা, মখোয় ঙাক-শেন্নবা লোকমাতা দেবী অহিল্যাবাইনা থবক পায়খৎখি, মহাক্না ঐখোয়গী লাইশঙ কয়া অমসুং কাসি বিশ্বনাথ য়াওনা লাইফম কয়া অমুক হন্না শেমগৎখি। লোকমাতা দেবী অহিল্যাবাইনা চাউখৎ থৌরাংগী থবক কয়া পায়খৎখিবা কাসিদা থবক তৌনবগী খুদোংচাবা ঐঙোন্দা পীরে। ঙসি অদোম্না কাসি বিশ্বনাথ মহাদেবদা চৎপা মতমদা, অদোম্না মফম অদুদা লোকমাতা দেবী অহিল্যাবাইগী মীতম উবা ফংগনি।

মরুপশিং,

লায়রবা অমসুং তোল্লবশিং মরুওইনা লৌবা অফবা লৈঙাক্কী নমুনা অমা লোকমাতা দেবী অহিল্যাবাইনা শীজিন্নখি। থবক পীনবা অমসুং ইন্তরপ্রাইজশিং মশিং হেনগৎনবা স্কিম কয়া মহাক্না হৌদোকখি। মহাক্না লৌউ-শিংউ অমসুং উমংগী পোৎথোকশিংদা য়ুম্ফম ওইবা উদ্যোগশিং অমসুং হেন্দিক্রাফশিং য়োকখৎখি। লৌউ-শিংউ য়োকখৎনবা মহাক্না অপীকপা ইথৈ-লৌখোঙশিং শেমখি অমসুং মদু চহি ৩০০গী মমাঙদনি। ঈশিং য়োক্তুনা থম্নবা মহাক্না পুখ্রি কয়া তৌখি অমসুং ঙসি ঐখোয়না য়াম্না তোইনা নোংগী ঈশিং লোকশিন্নবা, নোংগী ঈশিং মরিক অমা ফাওবা লৌশিন্নবা লাওরি। মসি লোকমাতা দেবী অহিল্যাবাইনা চহি ২৫০-৩০০ গী মমাঙদা হায়খ্রবনি। লৌমীশিংগী শেন্থোক হেনগৎনবা লশিং অমসুং স্পাইসশিং থানবা মহাক্না পুক্নিং থৌগৎখি। ঙসি চহি ২৫০-৩০০ গী মতুংদা ফাওবা, মহৈ-মরো মখল কয়া থাবগী মরুওইবা ঐখোয়না লৌমীশিংদা য়াম্না তোইনা হায়রি। ঐখোয়না ফৌ নত্ত্রগা চু খক থাবা য়ারোই, লৈবাক অসিগী দরকার ওইবা খুদিংমক পুথোক্কদবনি। ত্রাইবেলশিং অমসুং নোমেদিকশিংনা লমহাংদা লৌ উনবা থৌরাং অমা মহাক্না শেমখি। ঙসি ভারতকী রাস্ত্রপতি ওইরিবী ত্রাইবেল ইচানুপী অমগী লমজিং মখাদা ঐগী ত্রাইবেল ইনাওশিং অমসুং ইচলশিংগী থবক তৌনবা খুদোংচাবা অমা ঐনা ফংলে। মালেমদা মমিং লৈরবা মহেশ্বারি শারিগীদমক লোকমাতা দেবী অহিল্যাবাইনা অনৌবা উদ্যোগশিং লিংখৎখি অমসুং লোকমাতা দেবী অহিল্যাবাই স্কিলগী লময়ানবা অমনি হায়বা মীওই খর খক্তনা খঙগনি অমসুং মহাক্না ইমুং খর গুজরাতকী জুনাগাধদগী মহেশ্বরদা পুরকখি অমসুং মখোয়গা থবক তৌমিন্নখি, চহি ২০০ গী মমাঙদা মহাক্না মহেশ্বর শারিগী থবক তৌখি, মদুনা ঙসি ফাওবা ইমুং কয়াগী লৈতেং অমা ওইরে অমসুং মসিনা ঐখোয়গী ফিশাবী কয়া কান্নবা পীরে।

মরুপশিং,

খুন্নাইগী অচৌবা অওনবশিংগীদমক লোকমাতা দেবী অহিল্যাবাই মতম পুম্নমক্ত নিংশিংদুনা লৈরগনি। করিগুম্বা ঙসি ঐখোয়না নুপীমচাশিংগী লুহোংবগী চহিগী মতাংদা ৱারি শানরবদি, ঐখোয়গী লৈবাক্কী মীওই খরনা সেকুলারিজম খুদোংথিনিঙাই ওইরে হায়গনি, মসি ঐখোয়গী লাইনিংগী মায়োক্তনি হায়না মখোয়না হায়গনি। লোকমাতা দেবী অহিল্যাবাইগী থবক অসি য়েংউ, ইমাগী থৌনাগী চাউথোকচবা মতম অদুদা মহাক্না নু্পীমচাশিংগী লুহোংবগী চহিগী মতাংদা খনখি। মহাক মশামক চহি য়াম্না নৌনা লুহোংখি, নুপীমচাশিং চাউখৎনবা লম্বী করি ওইগনি হায়বা মহাক খঙখি। মতম চাদনা মপুরোইবা লৈখিদ্রবা নুপীশিং লন-থুম ফংনবা হকশিং ফংগদবনি, অমুক হন্না য়ুম পানবা য়াই হায়না মহাক্না ফোঙদোকখি, মতম অদুদা হায়রিবা ৱাফমশিং আসি ফোঙদোকপদা য়াম্না খুদোংথিবা মতমনি। হায়রিবা খুন্নাইগী অওনবশিং অসিদা লোকমাতা দেবী অহিল্যাবাইনা য়াম্না শৌগৎখি। মালৱাগী লান্মীদা মহাক্না নুপীশিংগী কন্তিঞ্জেন্ত অমা লিংখৎখি। নোংচুপলোমগী মীওইশিংনা মসি খঙখিদে। মখোয়না ঐখোয়দা অঙকপা ফাওখি, ঐখোয়গী ইমাশিং অমসুং ইচলশিংগী হকশিংগী মিংদা মখোয়না ঐখোয় ইকায়বা পীনবা হোৎনখি। চহি ২৫০ গী মমাঙদা ঐখোয়গী লৈবাক্ত লান্মীদা নুপীশিং শরুক য়াখি।  মখোয়না খুঙ্গংশিংদা নারি সুরক্ষা তোলি লিংখৎখি। লোকমাতা দেবী অহিল্যাবাই অসি লৈবাক শেমগৎনবা ঐখোয়গী নুপীশিংগী থৌনাগী মমল নাইদ্রবা থৌদাংগী খুদম অমনি। অসিগুম্বা খুন্নাইদা অচৌবা অহোংবা পুরকখিবা লোকমাতা দেবী অহিল্যাবাইগী মফমদা ঐনা কোক নোঞ্জরি, মহাক্কী খুয়াদা চঙজরি অমসুং ঐখোয় পুম্নমক্ত অদোমগী থৌজাল পীনবা ঐনা খুরুমজরি।

মরুপশিং,

ঐখোয়না কাওবা ঙম্লরোইদবা লোকমাতা দেবী অহিল্যাবাইগী ৱারোল অমা লৈরি। করিগুম্বা ঐনা ৱাফম অদু ৱাহৈশিংনা ফোঙদোক্লবদি, মদুদি হায়রি মদুদি ঐখোয়না মীয়ামগী লমন অমা তোল্লবদি, ঐখোয়না শিংগদবনি। ঙসি ঐখোয়গী সরকারনা লোকমাতা দেবী অহিল্যাবাইগী গুনশিংগী তুং ইন্দুনা থবক তৌরি। নাগরি দেবো ভাভা: মসি ঙসি ঐখোয়গী লৈবাক ঙাকপগী লাইৱানি। নুপীশিংনা মাঙজিল থাদুনা চাউখৎনবা ঐখোয়গী সরকরনা পান্দম থম্লি। সরকারগী স্কিম খুদিংমক্কী ময়াইদা ইমাশিং অমসুং ইচলশিংনা লৈরি। লায়রবশিংগী শাখিবা য়ুম করোর ১৪ গী মনুংদা য়ুম অয়াম্বা ঐখোয়গী ইমাশিং অমসুং ইচলশিংগী মিংদা লৈরে। অহানবা ওইনা ইংখোল অমগী মমিং হায়রিবা নুপীশিং অসিগী মমিংদা লৈরে। অহানবা ওইনা, লৈবাক অসিগী ইচল করোর কয়া য়ুমশিংগী মপুশিং ওইরে।

মরুপশিং,

ঙসি সরকারনা য়ুম খুদিংমক্ত তোতি ঈশিং পীবদগী ঐখোয়গী ইমাশিং অমসুং ইচলশিং য়াম্না নুংঙাইরে। মমাংদা, ইচল করোর কয়া মৈ, গ্যাস অমসুং তোইলেতশিং ফংলমদে। হায়রিবা খুদোংচাবশিং অসি ঐখোয়গী সরকারনা পীরে। মখোয় অসি ঐখোয়গী ইমাশিং অমসুং ইচলশিং ইকায়খুম্নবগী অচম্বা থবক অমনি। মসিনা খুঙ্গংশিংগী লায়রবা ইমাশিং অমসুং ইচলশিংগী পুন্সিদা থেংনবা খুদোংচাদবা কয়া হন্থহল্লে।

মরুপশিং,

মমাংদা, ইমাশিং অমসুং ইচলশিং মখোয়গী অনাবশিং লোৎশিল্লমখি। মীরোল্লিঙৈ মনুংদা মখোয় হোস্পিতালদা চৎখিদে। হোস্পিতালদা চৎপা অসিনা ইমুংদা পোৎলুম অমা ওইগনি হায়না মখোয়না খনখি অমসুং মখোয়না অনাবা খাংখি। মখোয়গী অৱাবশিং অয়ুস্মান ভারত য়োজননা কোকহল্লে। হৌজিক মখোয় হোস্পিতালদা লুপা লাখ ৫ ফাওবা লেম্না লায়েংনবগী খুদোংচাবা ফংলে।

মরুপশিং,

লাইরিক তম্বা অমসুং লায়েংবগা লোয়ননা, নুপীশিংগী অতোপ্পা য়াম্না মরুওইবা অসি শেন তানবনি। করিগুম্বা নুপী অমনা মশাগী শেন্থোক লৈরবদি, ইমুংদা মশাগী ইকায়খুম্ননবা হেনগৎলকই, ইমুংগী ৱারেপশিং লৌবদা মহাক শরুক য়াবা হেনগৎলি। হৌখিবা চহি ১১ অসিদা নুপীশিংগী শেন-থুমগী ফিবম ফগৎনবা ঐখোয়গী সরকারনা লেপ্তনা থবক তৌদুনা লাকলি।২০১৪ গী মমাঙদা, ইচল করোর ৩০ হেন্না মখোয়গী বেঙ্ক একাউন্ত অমা ফাওবা লৈরমখিদে। ঐখোয়গী সরকারনা মখোয়গীদমক জন ধন একাউন্তশিং হাংদোক্লে, হায়রিবা একাউন্তশিং অসিদা হৌজিক তোঙান তোঙানবা স্কিমশিংগী শেনফম সরকারনা থাজিল্লে। হৌজিক মখোয় খুঙ্গং নত্ত্রগা সহরদা লৈবা ওইগেরা, মখোয় মশাগী থবক খর শুজরে, শেন তাল্লে অমসুং মশানা মশাবু থবক পীজরে। মখোয়না মুদ্র স্কিমদগী গরেন্তি য়াওদনা লোন লৌরে। মুদ্র স্কিমগী বেনিফিসরিশিংগী চাদা ৭৫ দি ঐখোয়গী ইমাশিং অমসুং ইচলশিংনি।

মরুপশিং,

ঙসিদি, লৈবাক অসিদা ইচল করোর ১০ রোম সেল্ফ হেল্প গ্রুপশিংদা শরুক য়ারে। অনৌবা শেন্থোক লম্বীশিং ফংনবা সরকারনা ইচলশিং অসিদা মতেং পাংলি, সরকারনা মখোয়দা লুপা লাখ কয়া পীরে। লাখপতি দিদি করোর ৩ শেমগৎনবা ঐখোয়না পান্দম থম্লে। হৌজিক ইচল করোর ১.৫ লাখপতি দিদি ওইরকপদা ঐ অপেনবা ফাওই। হৌজিক খুঙ্গং খুদিংমক্ত বেঙ্ক শখিশিনা মীয়ামগা বেঙ্কশিংগা শম্নহল্লে। ইন্সুরেন্স শখিশিং শেমগৎনবা সরকারনা থবক হৌরে। লৈবাক অসিদা ইন্সুরেন্সকী খুদোংচাবা ফংহনবদা হৌজিক ঐখোয়গী ইচলশিং অমসুং ইচানুপীশিংনা অচৌবা থৌদাং অমা লৌরি।

মরুপশিং,

নুপীশিং তেক্নোলোজিদগী লাপ্না লৈহনবা মতম অমা লৈরমখি। ঙসিদি ঐখোয়গী লৈবাক অদু ওইদ্রে। ঙসিগী সরকার অসিনা ঐখোয়গী ইচানুপীশিং অমসুং ইচলশিং চাউখৎনবা হোৎনরি অমসুং অনৌবা তেক্নোলোজিদা মাঙজিল থানবা খুদোংচাবা পীরে। লৌউ-শিংউদা দ্রোনগী অওনবা অমা লৈরে। ঐখোয়গী খুঙ্গংগী ইচলশিং দ্রোন শীজিন্নবা তম্লে। নমো দ্রোন দিদি কেম্পেন অসিনা খুঙ্গংগী নুপীশিংগী থৌনা হাপ্লে, মখোয়গী শেন্থোক হেনগৎলে অমসুং খুঙ্গংদা মখোয় অনৌবা মশক অমা তাক্লে।

মরুপশিং,

ঙসিদি মশিং য়াম্লবা ঐখোয়গী ইচানুপীশিং সাইন্তিস্তশিং, দোক্তরশিং, ইঞ্জিনিয়ারশিং অমসুং পাইলোতশিং ওইরে। সাইন্স অমসুং মেথস তম্বা নুপীমচাশিং মশিং হেনগৎলক্লি। ঙসি ঐখোয়গী মরুওইবা স্পেস মিসনশিংদা ঐখোয়গী ইমাশিং, ইচলশিং অমসুং ইচানুপীশিং সাইন্তিস্তশিং ওইনা থবক তৌরে। লৈবাক অসিনা চন্দ্রয়ান-৩ মিসনগী চাউথোকচরি। মিসন অসিদা নুপী সাইন্তিস্ত অমসুং ইঞ্জিনিয়ার ১০০ হেন্না শরুক য়াখি। স্তার্দ-অপশিংগী মতম অসিদা ঐখোয়গী ইচানুপীশিংনা অঙকপা থবকশিং পাংথোক্লে। লৈবাক অসিগী স্তার্দ-অপশিংগী চাদা ৪৫ রোমদা ঐখোয়গী নুপীমচাশিংগী মনুংদা য়ামদ্রবদা অমনা দিরেক্তর ওইরে। মশিং অসি লেপ্তনা হেনগৎলক্লি।

মরুপশিং,

থৌশিল শেম্বদা নুপীমচাশিং শরুক য়াবা হেনগৎহনবা হায়বসি ঐখোয়গী থবক্নি। হৌখিবা চহি ১০ দা থবক অসিগীদমক খোঙথাং কয়া পায়খৎলে। ঐখোয়গী সরকারনা অহানবা ওইনা, নুপীনা দিফেন্স মিনিস্তর ওইরে। অহানবা ওইনা লৈবাক অসিদা নুপী অমনা ফাইনান্স মিনিস্তর ওইরে। পঞ্চায়তশিংদগী হৌরগা সংসদ ফাওবদা নুপীশিংগী মশিং হেনগৎলক্লি। হৌজিক নুপী এম.পি ৭৫ লৈরে। ৱাখল্লোন অসিদা নারি শক্তি বন্দন এক্ত লৈরি। আইন অসি চহি কয়া চৎনহন্দনা লৈরকপনি, হৌজিক মসি ঐখোয়গী সরকারনা পাস তৌরে। হৌজিক সংসদ অমসুং লেজিসলেতিপ এশেমব্লিশিংদা নুপীশিংগী সিত খাকপা য়াবা পীরে। সরকার অসিনা থাক খুদিংমক্ত অমসুং হিরম খুদিংমক্ত নুপীশিংদা শক্তি পীরে।

মরুপশিং,

ভারত নাৎ অমসুং চৎনবীশিংগী লৈবাক অমনি। ঐখোয়গী চৎনবীদা সিন্দুর অসি নুপীগী থৌনাগী খুদম  অমনি। রামগী অচানবা মনাই হনুমান জি ফাওবা সিন্দুর নমখি। ঐখোয়না দুর্গা পুজাদা সিন্দুর কৎখি। হৌজিক সিন্দুর অসি ভারতকী থৌনা ফবগী খুদম অমা ওইরে।

মরুপশিং,

পেহালগামদা তেরোরিস্তশিংনা ভারতমচাশিংগী ঈ তাহনবদা নত্তনা, মখোয়না ঐখোয়গী চৎনবীদা খুৎ থাখি। ঐখোয়গী খুন্নাই তোখায় তানবা মখোয়না হোৎনখি। মরুওইনা, তেরোরিস্তশিংনা ভারতকী নুপীশিংগী থৌনা শিংনখি। মসিগী শিংনবা অসিনা তেরোরিস্তশিং অমসুং মখোয়গী মপুশিং শিনবা মরম ওইখি। ওপরেসন সিন্দুর অসি ভারতনা তেরোরিস্তশিংগী মথক্ত চৎথবা খ্বাইদগী চাউবা অমসুং মাইপাকপা ওপরেসন্নি। পাকিস্তান লান্মীনা খন্দবা মওংদা, ঐখোয়গী লান্মীশিংনা তেরোরিস্তশিংনা লৈফম থুগায়খি। তেরোরিস্তশিংগী খুৎথাংদা প্রোক্সি ৱার পাংথোকপা ঙম্লোই হায়বা ওপরেসন সিন্দুরনা নাখৈ শেংনা তাক্লে। হৌজিক ঐখোয়না তেরোরিস্তশিংগী ময়ুমদা চঙদুনা হাৎকনি। হৌজিক ভারতকী মীওই করোর ১৪০ না হায়রি মদুদি -করিগুম্বা নহাক্না নোংমৈ মরু অমা কাপ্লবদি, মতম অদুদা নোংমৈ মরুগী পাউখুম সেল অমনা পীগনি।

মরুপশিং,

ওপরেসন সিন্দুর ঐখোয়গী নুপীশিংগী থৌনাগী খুদম অমশু ওইরে। ওপরেসন অসিদা বি.এস.এফনা লৌখিবা অচৌবা থৌদাং অমা ঐখোয়না খঙলে। জম্মু, পঞ্জাব, রাজস্থান অমসুং গুজরাতকী ঙমখৈশিংদা মশিং য়াম্লবা ঐখোয়গী বি.এস.এফ নুপীশিংনা মাঙজিল থাখি। মখোয়না ঙমখৈ লান্না মতিক চাবা পাউখুম পীখি। কমান্দ অমসুং কন্ত্রোল, য়েক্নবগী পোস্তশিং থুগাইবা য়াওনা বি.এস.এফ নুপীশিংনা অঙকপা থৌনা উৎখি।

মরুপশিং,

ঙসিদি মালেম্না লৈবাক অসিগী ঙাক-শেনগী থবকশিংদা ভারতকী নুপীশিংগী থৌনা উরে। মসিগীদমক, হৌখিবা চহি ১০ অসিদা সরকারনা থবক কয়া পায়খৎতুনা লাকপনি। স্কুলদগী হৌরগা লানফম ময়াইদা, লৈবাক অসিগী নুপীশিংদা অমুক্ত ওইখিদ্রিবা থাজবা লৈবাক অসিনা লৈরে। অহানবা ওইনা, ঐখোয়গী সৈনিক স্কুলশিংদা নুপীমচাশিং তম্বা য়ারে। ২০১৪ গী মমাঙদা, এন.সি.সিদা কেদেদশিংগী চাদা ২৫ খক নুপীমচাশিং ওইরমখি, হৌজিক চাদা ৫০ ওইরে। এন.দি.এদা নুপী কেদেদশিংগী অহানবা বেতচ পাস তৌরকপগী ঙসি অদোমনা পাউচেশিংদা উরে। ঙসিদি নুপীমচাশিং আর্মি, নেভি অমসুং এয়র ফোর্সতা শীজিন্নরে। ঙসিদি, ফাইত্তর প্লেনশিংদগী হৌরগা আই.এন.এস বিক্রান্ততা নুপী ওফিসারশিংনা মখোয়গী থৌনা উৎলে।

মরুপশিং,

ঐখোয়গী নেভিগী থৌনা ফরবা নুপীশিংগী থৌনা ফবগী খুদম অমা হন্দক লৈবাক অসিনা উরে। নেভিগী থৌনা ফরবী নুপী অনিনা সমুদ্রগী খোঙচত্ত নুমিৎ ২৫০ দা পৃথিবী অসি কোইখ্রে। মখোয়না নুংশিৎনা হোনবা হি অমদা কিমি লিশিং কয়াগী খোঙচৎ অমা পাংথোকখি। নুমিৎ ২৫০ সমুদ্রদা লৈবা অদু খন্দুনা য়েংউ, মখোয়না খুদোংচাদবা কয় মাইথিবা পীখি। অচৌবা খুদোংথিবা কয়া লাক্লবশু, মদু ভারতকী নুপীশিংনা থেংনবা ঙম্মী হায়বা মসিনা তাক্লে।

মরুপশিং,

নেক্সালাইতশিং নত্ত্রগা ঙমখৈ লান্না তেরোরিজমগী মথক্ত ওপরেসনশিং পাংথোকপদা, ঙসিদি ঐখোয়গী নুপীশিংনা ভারতকী সেকুরিতিগী চুঙ্গোই ওইরে। ঙসি, দেবী অহিল্যাগী শেংলবা লমদম অসিদগী, ঐনা অমুক হন্না লৈবাক অসিগী নুপীশিংগী থৌনা ইকায়খুম্নবা উৎচরি।

মরুপশিং,

মহাক্কী মতমদা দেবী অহিল্যানা চাউখৎ-থৌরাংগী থবকশিংগা লোয়ননা চৎনবীশিং ঙাক-শেনখি। ঙসিগী ভারতনা চাউখৎপা অমসুং চৎনবী অনিমক মাঙলোমদা পুখৎলে। ঙসিগী থৌরম অসি মতমগী অনৌবা ইনফ্রাস্ত্রকচর কমদৌনা লৈবাক অসিনা য়াংনা শেমগৎপগে হায়বগী খুদম অমনি। হৌজিক মধ্য প্রদেসকী অহানবা মেত্রো লৈরে। ইন্দোর মালেমদা লু-নানবগী মমিং চৎলিবনি। হৌজিক ইন্দোর মসিগী মেত্রোগী মমিং চৎলগনি। ভোপালশু মেত্রো লৈনবা য়াংনা থবক পায়খৎলি। নুমিৎ খরগী মমাঙদা, রাতলাম-নাগদা রুত লেন মরি ওইহন্নবা কেন্দ্র সরকারনা অয়াবা পীখ্রে। মসিনা লমদম অসিদা ত্রেন মশিং হেন্না চেনবা য়াহনগনি, চিনবা হন্থহনগনি। কেন্দ্র সরকারনা ইন্দোর-মানমাদ রেল প্রোজেকশু অয়াবা পীখ্রে।

মরুপশিং,

ঙসি, রাজ্য অসিগী দাতিয়া অমসুং সাত্নাশু এয়র সর্বিস লৈরে। এয়রপোর্ত অনি অসিনা বুন্দেলখন্দ অমসুং বিন্ধ্যা লমদমদা নোংথক্ত চৎথোক-চৎশিনগী থবক ফগৎহনগনি। হৌজিক মা পিতম্বারা, মা সারদা দেবী অমসুং শেংলবা চিত্রকুত ধাম চৎপদা লাইরগনি।

মরুপশিং,

ঙসি, ঐখোয়গী ঙাক-শেন, ঐখোয়গী থৌনা অমসুং ঐখোয়গী নাৎকী থাক খুদিংমক্ত থবক তৌনবা পুৱারিদা ভারতকী মতম য়ৌরক্লে। ঐখোয়না থবক কন্না শুবা হেনগৎহনগদবনি। হিরম অসিদা, ঐখোয়গী নুপীশিংগী থৌনা য়াম্না মরুওই। ঐখোয়না লোকমাতা দেবী অহিল্যা জি, রানি লাক্ষমিবাই, রানি দুর্গাবতি, রানি কমালাপতি, অবান্তিবাই লোধি, রানি চেন্নম্মা, রানি গাইদিনলিয়ু, বেলু নাচিয়ার, সাবিত্রিবাই ফুলেগী ইথিল ফংলে, অসিগুম্বা মমিংশিং অসিনা ঐখোয় চাউথোকহল্লে। লোকমাতা দেবী অহিল্যা জিগী ৩০০ শুবা মপোক কুমওন অসিনা মখা তানা ঐখোয়দা ইথিল পীগনি, চহি কয়াগী মপাঙ্গল কনবা ভারত অমা শেমগৎনবা য়ুম্ফম ঐখোয়না মপাঙ্গল কনখৎহনগনি। ঐনা অমুক হন্না মীয়ামদা ঐগী য়াইফ পাউজেল পীজরি। অদোমগী ফিরাল থাগৎপীয়ু অমসুং ঐগা লোয়ননা লাউমিন্নসি-

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!