ঐহাক্না অহানবদা মখোয়গা ৱারী শাদ্রিঙৈদা ৱাফম খরা থমজনীংই মদুগী মতুংদা মখোয়গা শোইদনা ৱারী শাজগে।
মরুপশিং,
নখোয় পুম্নমক্কা উনবগী খুদোংচাবা ফংজবা অসিদা ঐহাক্না নুংঙাইবা ফাওই। নখোয় শুনা উনবা ওইরগদি ঐহাক্না হেন্না নুংঙাইরমগনি, অদুবু নখোয় খরা অমদা মপালদা নখোয়গী কোচিংগীদমক লৈখি। অমরোমদনা ঐহাক্না পার্লিয়ামেন্ত মীফম লৈবনা খরা চিল্লে।
মরুপশিং,
ঙসি জুলাই ২০নি। স্পোর্তসকী লমদা মসি মরু ওইবা নুমিৎ অমসু ওইরি। নখোয় খরনা খঙলমগনি মদুদি ঙসি অসি ইন্তর্নেস্নেল চেস দেনি। বরমিংহমদা কম্মনৱেল্থ গেমস হৌগদৌরিবা জুলাই ২৮ অসিদা তামিল নাদুগী মহাবলিপুরমদা চেস ওলিম্পিয়দ পাঙথোক্কদৌরিবা অসি য়াম্না অখন্নবসু ওইরি। হায়বদি লাক্কদৌরিবা নুমিৎ ১০-১৫ অসিদা ভারতকী শান্নরোয়শিংনা মখোয়গী তেলেন্ত উৎনবা, মালেমবু খুদুম চন্নবা অচৌবা খুদোংচাবা অমা ফংলগনি। ঐহাক্না লৈবাক অসিগী শান্নরোয় খুদিংমক্তা য়াইফ-মঙ্গোল পীজরি।
মরুপশিং,
অচৌবা স্পোর্তসকী অথোই-অহেন তানবদা লৈবাক্কী ওইনা চাউথোকচনীংঙাই ওইবা মীৎকুপ কয়া শান্নোয় কয়ানা পীখি। হন্দকসু শান্নরোয়শিং, নখোয়গী কোচশিংনা য়াম্না থৱায় য়াওরি। মমাংদা কম্মনৱেল্থতা শান্নরুবগী এক্সপরিয়েন্স লৈবশিংনা মখোয়না অমুক হন্না হোৎনবগী খুদোংচাবা অমা পীরি। শান্নরোয় ৬৫না অহানবা ওইনা মসিদা শরুক য়াগদৌরি, মসিনা মখোয়না য়াম্না চাউনা ইথিল পীগনি হায়না ঐহাক্না থাজৈ। নখোয়না করি তৌগনি, করম্না শান্নগনি হায়বা অসিগী নখোয়না এক্সপর্তশিংনি। ঐহাক্না হায়নীংবদি পুক্নিং হকচাং চংনা শান্নৌ, কন্না শান্নৌ, পাঙ্গল পুম্বা পুথোক্তুনা শান্নৌ অমসুং ৱাখল ৱাবা তৌদনা শান্নগদনি। অহানবা অসি কনাগা ৱারী শাগনি?
প্রজেন্তর: অবিনাশ সাবলে মহারাস্ত্রগী এথেলেতিক্সনি।
পি.এম. : অবিনাশ খুরুমজরি!
অবিনাশ সাবলে: জয় হিন্দ সর, ঐহাক অবিনাশ সাবলেনি, ঐহাক্না কম্মনৱেল্থ গেমসতা এথলেতিক্সকী মিতর ৩০০০গী ইভেন্ততা ভারতকী মহুৎ শিনগনি।
পি.এম. : অবিনাশ নহাক অসি আর্মীদা য়াওরম্মি অমসুং সিয়াচিন্দা পোস্তিং তারম্মি হায়না তাজৈ। মহারাস্ত্রগী লাক্তুনা হিমালয়দা দ্যুতী তৌবা, মসিগী মতাংদা অদোমগী অৱা-নুংঙাই অদু হান্না হায়বীয়ু।
অবিনাশ সাবলে: সর ঐহাক মহারাস্ত্রগী বীর জিলাদগীনি। অমসুং ঐহাক্না ২০১২দা ইন্দিয়ন আর্মীদা চংখি। অমসুং মদুগী মতুংদা আর্মীগী দ্যুতী কন্না তৌখি, চহি ৪ নোর্মেল দ্যুতী তৌখি অমসুং মসিদগী কয়া অমা তমশিনবা ফংখি। চহি মরি মখা তানা নোর্মেল দ্যুতী তৌখি, থা ৯ অমদি য়াম্না কনবা ত্রেনিং তৌখি, য়াম্না ৱাখি। ত্রেনিং অসিনা ঐহাকপু য়াম্ন কনখৎহনখি অমসুং মদুদগী ফংখিবা ত্রেনিং অদুনা লম অমা হেক্তদা চৎপা ঙমগনি হায়না ঐহাক্না ফাওখি অমসুং হায়রিবা ত্রেনিং অসিদগী, চহি মরিগী মতুংদা ঐহাক্না আর্মীদগী এথেলেতিক্সতা চংবগী খুদোংচাবা অমা ফংজখি। আর্মীবু ঐহাক্না য়াম্না তৌবীমল খঙবা উৎচরি অমসুং অসিগুম্বা অৱাবা মফমদা ঐহাক্না লৈরুবা অদুনা ঐঙোন্দা ঙসি য়াম্না কান্নবা ফংহল্লি।
পি.এম. : অবিনাশ ঐহাক্না তাজবদা অদোম্না আর্মী য়াওরবা মতুংদা খক্তা স্তীপলচেজ য়াওখি হায়না তাজৈ। সিয়াচেন অমসুং স্তীপলচেজকী মরক্তা মরী লৈনবরা?
অবিনাশ সাবলে: হোয় সর, ঐখোয়গী ত্রেনিংদা হায়বদি স্তীপলচেজকী ইভেন্ত য়াওবা ওবস্তেকল গেমগী ত্রেনিংসু য়াওখি। মসিদা ঐখোয়না হদ্দলশিং অদুগী মথক্তা চোংবা তাই মতুংদা ৱাতর জম্প অদু চোংবা তাই। মসিগী মওংদা আর্মীগী ত্রেনীদা ঐখোয়না ওবস্তেকল কয়া লান্থোকপা তাই। ক্রোলিং তৌবা নত্ত্রগা ফিত ৯গী দিতচ চোংবা তাই। হায়বদি ত্রেনিংদা ওবস্তেকল কয়া লৈখি মসিনা মরম ওইদুনা ঐঙোন্দা অরাইবা ওইখি। আর্মী ত্রেনিং মতুংদা ঐহাক্না স্তীপলগুম্বা ইভেন্তশিং অসি য়াম্না লায়খি।
পি.এম. : অবিনাস নহাক মমাংদা য়াম্না নোইরম্মি হায় অমসুং অতেনবা মতমগী মনুংদা নহাক্কী অরুম্বা হন্থহনখি হায় অমসুং ঙসি ঐহাক্না উবা ফংলে। অদোম য়াম্না ময়াং কাংলে, নখোয়গী পার্তনর নীরজ চোপরাসু য়াম্না তেনবা মতমগী মনুংদা অরুম্বা হন্থহনখি অমসুং মদু করম্না তৌখিবগে হায়বগী মতাংদা অদোমগী এক্সপরিয়েন্স অদু ফোঙদোকপীয়ু অমসুং মসিনা স্পোর্তস খক নত্তনা মীয়ামদসু কান্নবা ওইহৌনবা।
অবিনাশ সাবলে: সর ঐহাক্না আর্মীদা লৈরিঙৈদা দ্যুতী তৌবদা ঐহাক্কী অরুম্বা য়াম্না হেনগৎখি। ঐহাক্না স্পোর্তসতা চংলগে খল্লকপদা ঐহাক্কী য়ুনিৎ অমসুং আর্মীনা ঐহাক্না স্পোর্তস য়াওবদা য়াম্না ইথিল পীখি। অদুনা ঐহাক্না ঐহাক্কী অরুম্বা অসি হন্থহন্নবা খনখি। ঐহাক্কী অরুম্বা অসি কেজি ৭৫রোম ওইরমখি। অরুম্বা হন্থরমদ্রবদি ঙসি মসি য়ৌরিবা অসি ঙমলমগদ্রা? মখোয়না ঐহাকপু য়াম্না শৌগৎপীখি অমসুং ঐহাক্না আর্মীদা লৈরিঙৈদা ত্রেনিংগীদমক তোখাইনা মতম খাইদোকখি। অরুম্বা হন্থনবা হোৎনবদা থা ৩-৪ চংখি।
পি.এম. : অরুম্বা কয়াম হন্থহনখি?
অবিনাশ সাবলে: সর হৌজিক কেজি ৫৩ লৈ অমসুং মতম অদুদা ৭৪ লৈখি হায়বদি কেজি ২০ হন্থহনখি।
পি.এম. : য়াম্না হন্থহল্লি। অবিনাশ ঐহাক্না মশান্নগী মরমদা খ্বাইদগী পাম্বা অসি, ঐহাক্কী থমোয়দা অপেনবা পোকপা অসি থোইরগা লাকপা অমসুং পোরাগা লাকপা অদু নত্তে। কম্পিতিসন তৌবা খুদিংক ফ্রেশ ওই অমসুং নখোয়না শেম শাদুনা লৈবা অসিনি। ইরৈবাকচা খুদিংমক্কী য়াইফ-মঙ্গোল নখোয়দা পীনরি। নখোয়না কন্না হোৎনৌ। হৌজিক কনাগা ৱারী শারসিগে?
প্রজেন্তর: সর অচিন্তা শোউলী বেস্ত বেঙ্গলদগীনি মহাক্না ৱেত লিফতিং শান্নৈ।
পি.এম. : অচিন্তাজী খুরুমজরি।
অচিন্তা শোউলী : খুরুমজরি সর, ঐহাক ৱেস্ত বেঙ্গলদগীনি। ঐহাক হৌজিক ক্লাস ১২ তম্লি।
পি.এম. : অদোমগী মরমদা খরা হায়বীয়ু।
অচিন্তা শোউলী : ৭৩ কেতগোরীদা শান্নৈ সর।
পি.এম. : অচিন্তা নহাক অসি য়াম্না ইং তপ্পি হায়না ময়াম্না হায়নৈ। অমসুং অদোমগী মশান্না অসিদদি পাৱরসু চংই, শক্তিগী মশান্ননি। অদোম্না শক্তি অমদি শান্তি অনি অসি করম্না পুনশিনবগে।
অচিন্তা শোউলী : সর, করিগুম্বা ঐখোয়না য়োগ তৌরবদি ঐখোয়গী ৱাখল ইংথৈ অমসুং ত্রেনিং তৌবা মতমদা মদু পুথোক্নবা হোৎনৈ।
পি.এম. : অচিন্তা অদোম চাং নাইনা য়োগ তৌব্রা?
অচিন্তা শোউলী : হোয় করিগুম্বদা তৌহৌদবা য়াওই অদুবু ঐহাক চাং নাইনা তৌনবদি হোৎনজৈ সর।
পি.এম.- ফরে, ফরে অদোমগী ইমুং-ইমুংদা মীওই কয়া লৈবগে?
অচিন্তা শোউলী : ইমা অসুং ইয়াম্বগা লৈ।
পি.এম. : অমসুং অদোমগী ইমুংদগী মতেং ফংব্রা?
অচিন্তা শোউলী : হোয় সর, ঐহাক্কী ইমুংনা ঐহাকপু মপুং ফানা শৌগৎলি। নুমিৎ খুদিংগী শৌগৎপী সর।
পি.এম. – য়েংঙু অশোক অপন থোকপদা ৱাখল ৱারমগনি মরমদা ৱেথ লিফতিংদা শোকপা হায়বা অসি অচৌবা খুদোংথিনীংঙাই অমা ওই।
অচিন্তা শোউলী : সর ইমাগা ৱারী শাবা মতমদা ইমানা নীংথিনা শান্নৌকো হায়না অদুম হায়বী।
পি.এম. : য়েংঙু, ঐহাক্না পামবদি অদোম্না খুমাং চাউশিনবা, কান্নবা ফংবনি অমসুং অদোম্না য়াম্না খুমাং চাউশিল্লু। ফরে, অদোম্না অশোক-অপন থোকপদগী করম্না ঙাকথোকপগে? মসিগীদমক অদোম্না অখন্ননা শেম-শাবা করি লৈবগে?
অচিন্তা শোউলী : তৌদে সর, অশোকপা হায়বা অসি অদুম থোকই অদুবু সর মদুগী মরমদি ঐখোয়না মদুদা য়াম্না মীৎয়েং চংদে, অশোইবা অমনা অশোকপা নংহল্লি, মদু ঐহাক্না শেমদোক্নবা হোৎনৈ। অসুম্না তপ্না তপ্না অশোক অপন নংবা হন্থরকই।
পি.এম. : অচিন্তানা নহাক সিনেমা য়েংবা য়াম্না পাম্মি হায়না তাই, করিগুম্বা অদোম্না সিনেমা য়েংলবসু ত্রেনিংনা মরম ওইদুনা মতম ফংলমলোই।
অচিন্তা শোউলী: হোয় সর, ঐহাক্না মতম ফংদে, অদুবু করিগুম্বা ঐহাক্না ফ্রী ওইবা মতমদা ঐহাক্না য়েংই সর।
পি.এম. : হায়বদি মেদল লৌরগা হল্লকপদা অদোম্না তৌগদবা থবক অসি সিনেমা য়েংবা ওইগদ্রা?
অচিন্তা শোউলী : নত্তে-নত্তে সর।
পি.এম. : ঐহাক্না অদোমদা য়াইফ-মঙ্গোল পীজরি অমসুং অদোমগী ইমুংনা শৌগৎপীবগীদমক থাগৎপা ফোঙদোকচরি। ঐহাক্না মরু ওইনা অদোমগী ইমা অমসুং ইয়াম্বদা থাগৎপা ফোঙদোকচনীংই। মখোয়না অদোম্না শেম-শাবদা অৱাৎপা অমত্তা লৈহনখি। ঐহাক্না থাজৈ মদুদি কনাগুম্বা অমনা শান্নরোয় ওইরক্লবা মতমদা মহাক অমদি মহাক্কী ইমুং মনুংনা তপস্যা তৌবা তাই। কম্মনৱেল্থতা অদোমগী অঙম্বা থাক্তা পর্ফোরম তৌরম্মু, অদোমগী ইমা লোয়ননা লৈবাক্কী মীয়ামগী থৌজালশিং অদোমদা পীনরি। অচিন্তা ঐহাক্না য়াইফ-মঙ্গোল পীজরি।
অচিন্তা শোউলী : থাগৎচরি, থাগৎচরি সর।
প্রজেন্তর: সর হৌজিক ত্রীসা জোলী অসি কেরেলাদগীনি, বেদমিন্তন শান্নরোয়নি।
ত্রীসা জোলী : গুদ মোর্নিং সর, ঐহাক ত্রীসা জোলীনি। সর ঐহাক্না ২০২০ কম্মনৱেল্থ গেমসতা বেদমিন্তন শান্নখি সর।
পি.এম. : ফরে ত্রীসা অদোম কন্নুর জিলাদগীনি। মফম অদু লৌউ-শিংউ অমসুং ফুতবোলগীদমক মমিং চৎলি। বেদমিন্তন শান্নরিবা অসি অদোম্না কদাইদগী ইথিল ফংখিবগে?
ত্রীসা জোলী: সর ঐহাক্কী ইপানা ঐঙোন্দা ভোলীবোল শান্ননবা ইথিল পীখি অমসুং ঐহাক্কী পোক্নফম লমদমদা ফুতবোল অসি য়াম্না পামনৈ। অদুবু চহি মতাং অদুদা বেদমিন্তন শান্নবনা হেন্না খুদোংচাখি। চহি মঙাদা।
পি.এম. : ত্রীসা অদোমগী পার্তনর গায়ত্রী গোপীচনন্দগা অদোমগা অফবা মরুপনি হায়না তাই লোয়ননা দবল পার্তনরসু ওই। অদোমগী মরুপ ওইবগী মরী অমসুং ফিল্দ পার্তনরগী মরমদা খরা ফোঙদোকপীয়ু।
ত্রীসা জোলী: সর, ঐহাক্কী গায়ত্রীগী মরক্তা অফবা মরী লৈনৈ, ঐখোয়না শান্নমিন্নবা মতমদা য়াম্না চান্নৈ অমসুং পার্তনরশিংগা লোয়ননা অফবা মরী থম্বা অসি য়াম্না মরু ওই হায়না ঐহাক্না খল্লি।
পি.এম. : ত্রীসা অদোম অমদি গায়ত্রীনা কারগা হল্লকপা মতমদা করম্না সেলেব্রেৎ তৌগে হায়না খনবগে?
ত্রীসা জোলী: সর মফম অদুদা চৎলগা মেদল লৌরবদি ঐখোয়না সেলেব্রেৎ তৌগনি। অদুবু সর করম্না সেলেব্রেৎ তৌগদগে হায়বদি খঙদে।
পি.এম. – পি.ভি. সিন্ধুনা মহাক্না হল্লক্লগা আইস ক্রিম চাগনি হায়না খনখি। নহাক্কী ওইনা অফবা অহৌবনি, হৌজিক নহাক্কী মাংদা কেরিয়র লৈরি হৌজিক নহাক্কী মাইপাকপগী খোঙচৎকী অহৌবনি অমসুং মেৎচ খুদিংমক্তা চাদা ১০০ উৎনবা হৌৎনৌ। মেৎচ খুদিংমক মরু ওইনা লৌ। মেৎচ মতুংদা লাকপা ফল অদুগী খনবা তৌদনা অদোম্না খ্বাইদগী ফজবা পর্দোর্মেন্স উৎনবা হোৎনৌ। ঐহাক্না য়াইফ মঙ্গোল পীজরি, অদোমগী তীম পুম্বদা য়াইফ মঙ্গোল পীজরি।
ত্রীসা জোলী: থাগৎচরি সর।
প্রজেন্তর: সর হৌজিল মিস সলীমা তেতে, ঝারখন্দগী হোকী শান্নরোয়নি।
পি.এম. : সলীমাজী খুরুমজরি।
সলীমা তেতে: গুদ মোর্নিং সর।
পি.এম. : সলীমাজী অদোম কমদৌবীরিবগে?
সলীমা তেতে: নুংঙাইরি সর, অদোমদি কমদৌবীরিবগে?
পি.এম. : হৌজিক অদোম কোচিংগীদমক কদাইদা লৈবগে, মপালদা লৈবরা?
সলীমা তেতে: হোয় সর, হৌজিক ঐহাক, ঐখোয়গী অপুনবা তীম ইংলেন্দদা লৈ।
পি.এম. : ফৈ সলীমা, নহাক অমদি নহাক্কী ইপাবুংনা হোক্কীগীদমক অৱা কয়া মায়োক্নরকখি হায়না ঐহাক্না থেংনখি। হৌজিক ফাওবগী অদোমগী খোঙচৎ অসিগী মতাংদা করিগুম্বা খরা হায়বীরম্মু, মসিনা লৈবাক অসিগী শান্নরোয়শিংনসু ইথিল ফংগনি।
সলীমা তেতে: সর ঐহাক খুঙ্গংদগী হৌরকখি, মমাংদা ঐহাক্কী ইপাসু শান্নরম্মি। এস্তাব্লিশ তৌবদা মতম য়াম্না লৌখি। ঐহাক্না ইপাগা লোয়ননা শান্নবা চৎপা মতম খুদিংদা মতুং ইন্নখি। ঐহাক্না সাইকলদা মহাক্কা লোয়ননা চৎতুনা শান্নখি। ঐহাক্না ফমদুনা য়েংখি। ঐহাক্না মদু উবদা শান্ননীংবা পোকখি। ঝারখন্দদগী য়সবন্ত লাক্রাগুম্বা শান্নরোয়শিংনা করম্না শান্নখি হায়বা ঐহাক্না উখি। ঐহাক্না মখোয়গুম্বা অমা ওইনীংখি। তপ্না-তপ্না ঐহাক্না মশান্না অসিগী মরমদা খঙলকখি। নুমিৎ খুদিংগী ৱানা ঐহাক্না ইপাদগী তমজখি। মঙোন্দগী ঐহাক্না অফবা কয়া তমজবা ফংখি।
পি.এম. : সলীমা অদোম্না তোকিও ওলিম্পিক্সতা শান্নখিবা অদুনা মীপুম খুদিংমকপু শুমহৎখি অমসুং অদোমগী তোকিওগী এক্সপরিয়েন্স অদু শিয়র তৌরবদি ময়াম্নসু নুংঙাইগনি হায়না ঐহাক্না খল্লি।
সলীমা তেতে: চুম্মি সর, তোকিও ওলিম্পিক্স চৎত্রিঙৈ মমাংদা ঐখোয়না ৱারী শাখি। কম্মনৱেল্থ লাক্ত্রিঙৈদা ঐহাক্না মদুদা হান্না য়াওরুরে। অদুবু সর অহানবদা অদোম্না ঐখোয়গা তোকিও চৎত্রিঙৈ মমাংদা ৱারী শাবা অদুনা ঐখোয়না ইথিল পীখি। ঐখোয়না য়াম্না নুংঙাইখি, অমদি মদুনা ইথিল পীখি। ঐখোয়না তোকিও ওলিম্পিক্সতা করিগুম্বা খরদি তৌদবা য়াদে হায়না খল্লগা চৎখি। তুর্নামেন্ত অসি চৎপদসু ঐখোয়না চপ মান্নবা ৱাখল্লোন অসিগী চৎকনি। তোকিও ওলিম্পিক্স তৌবা মতমদা কোবিদ লৈখি অদুনা ঐখোয়না অৱাবা য়াম্না মায়োক্নখি, মমাংদদি য়াম্না নীংথিনা শিনখি, তোকিও চৎপদা ঐখোয়না য়াম্না তমশিনবা ফংখি অমসুং ঐখোয় ইশানা কয়া অমা তৌজখি। মমাংগুম্না ঐখোয়বু শৌগৎপীয়ু ঐখোয়না শোইদনা মাইপাক্তুনা হল্লক্কনি। ঐখোয়গী তীমনা নীংথিনা শান্নদুনা তোকিও ওলিম্পিক্সতা ঐখোয়গী মশক তাকখি। সর মদুগুম্বা ঐখোয়না মখা চত্থবা তাই।
পি.এম. : সমীমা অদোম্না য়াম্না চহি নৌনা অচৌবা মালেমগী থাক্কী মেৎচশিং শান্নখি। অমসুং মসিগী এক্সপরিয়েন্স অসিনা তুংদা য়াম্না কান্নরগনি। অদোমগী তুংগী পুন্সিদা য়াম্না কান্নরগনি। অদোমগী খুত্থাংদা ঐহাক্না নুপা অমদি নুপীগী হোক্কী তীমদা য়াইফ পাউজেল পীজরি। শোইদনা মেদল লৌরকপা ওইয়ু।
সলীমা তেতে : থাগৎচরি সর।
প্রজেন্তর: সর্মীলা হরিয়ানাদগী, মহাক পেরা এথেলিতিক্সকী শোতপুৎ শান্নরোয়নি।
সর্মীলা : খুরুমজরি সর।
পি.এম. : খুরুমজরি শর্মিলাজী, অদোম হরিয়ানাদগীনি, মফম অদুদি শান্নখোৎনবগী হৌরকফমনি। অদোম্না চহি ৩৪দা অদোমগী স্পোর্তসকী কেরিয়র হৌখি। অমসুং চহি অনিদা গোল্দ মেদল অনি লৌদুনা উৎখি। অঙকপা অসি করম্না থোকখিবগে হায়বা ঐহাক্না খঙজনীংই? অদোম্না কদাইদগী ইথিল ফংবগে?
সর্মীলা : সর ঐহাক হরিয়ানাগী মহেন্দ্রগর জিলাদা লৈরম্মি মতুংদা রেৱারীদা অমুক লৈরমখি। অমসুং সর, ঐহাক্কী পুন্সিদা অচৌবা চৈথেং ফংখি। অদুবু ঐহাক্না অঙাং ওইরিঙৈদগী শান্নবা পামখি অদুবু খুদোংচাবা ফংখিদে। ঐহাক্কী ইমুং মনুং য়াম্না লৈতা লায়ররে, ঐহাক্কী ইপা ইমা মিৎ উবা ঙমদে, ঐহাক্কী ইনাওনুপী অহুম লৈ, ইনাওনুপা অমা লৈ। ঐহাক য়াম্না চহি নৌনা য়ুম পানখি। অদুবু ঐহাক্কী ইপুরোইবগী মীওৎ-মীনৈ খাংবা তাখি। ঐহাক্কী ইচানুপী অনি লৈ সর, মখোয়সু স্পোর্তস শান্নৈ। ইমা ইচা ঐখোয়দা য়াম্না ওৎপী নৈবীবনা ঐহাক্কী ইপা ইমানা ঐখোয়বু ইপামদা পুদুনা লাকখি। ইপামদা চহি তরুক লৈখি। ঐহাক্না অঙাং ওইরিঙরদগী করিগুম্বা খরা তৌবা পামদুনা লাকখি। অদুবু লম্বী লৈখিদে। অনিরকশুবা ওইনা লুহোংলবা মতুংদা ঐহাক্না স্পোর্তসতা চংলগা লেপখি। ঐখোয়গী মরী-মতা তেকচান্দ ভাই, ফ্লেগ বিয়র্র অসিনা ঐহাকপু য়াম্না সপ্পোর্ত তৌখি। মহাক্না অয়ুক অমসুং নুমিদাংৱাইরমদা নোংমদা পুং নিপান ত্রেনিং তৌখি অমসুং মহাক্না মরম ওইদুনা ঐহাক্না চহি অনিদা নেস্নেলগী থাক্তা গোল্দ মেদল লৌবা ঙমজখি।
পি.এম. : সর্মীলাজী অদোমগী পুন্সিদা থোক্লিবশিং অদু কনাগুম্বা অমা ওইরবদি নীংবা কাইগনি অদুবু অদোমনা থৌনা লৈনা লেপতুনা নীংহন্নবা লৈখিদে। সর্মীলাজী অদোম তশেংনমক প্রজা পুম্নমক্কী রোল মোদেল অমনি অমসুং অদোমগী ইচানুপী অনি লৈ। অদোম্নসু হায়বীখ্রে, মখোয়না স্পোর্তসকী মরমদা খরা খঙই হায়না। অঙাংশিং অদুনা করি পাম্বগে?
সর্মীলা : সর ঐহাক্কী ইচানুপী অহান্না হৌজিক অন্দর ১৪দা জেবলিন শান্নৈ। মহাক অফবা শান্নরোয় অমা শোইদনা ওইরক্কনি। য়ুতোপিয়া হরিয়ানাদা পাঙথোক্কদবা গেমশিংদা অদু শোইদনা খঙলগনি। সর ঐহাক্কী ইচা অতোম্বীনা তেবল তেন্নিস শান্নৈ। ঐহাক্কী ইচাশিং স্পোর্তসতা পুরকপা অসিনা মখোয়গী পুন্সিদা অফবা অমা পাঙথোকপীবনি মরমদি মখোয়না মায়োক্নখিবা অদু মতুংদা অমুক মায়োক্নদবা ওইরসনু।
পি.এম. : ফরে সর্মীলা অদোমগী কোচ তেকচান্দজী অসি পেরালিম্পিয়ন অমনি, মঙোন্দগী অদোম্না য়াম্না তম্বা ফংলমগনি?
সর্মীলা : হোয় সর! মহাক্না ঐহাকপু ইথিল পীখি অমসিং ঐহাকপু পুং মরি প্রেক্তিস তৌখি। স্তেদিয়মদা চৎতবা মতমদা মহাক্না য়ুমদা লাক্তুনা তাকপী। ঐহাক্না চোকথরকপা মতমদা মহাক্না ঐঙোন্দা নীংহন্নবা তৌদনবা পুক্নিং থৌগৎপীখি, কন্না হোৎনবগী মহৈ শোইদনা ফংগনি, কন্না হোৎনবদা মীৎয়েং থম্মু তাকপীখি সর।
পি.এম. : সর্মীলা অদোম্না শান্নবা হৌখিবা চহি অসিদা শান্নবা হৌবা হায়বা অসি মীওই কয়াগীদি য়াম্না অৱাবা ওইগদৌরিবনি। অদোম্না মাইপাক্কে খনবগী অখাং কনবা অদু লৈরবদি পান্দম অমত্তা ওইথোক্তবা লৈতে উৎপীরি। শীংনবা খুদিংমক থৌনা পুথোক্তুনা মায়োক্নবা তাই। অদোমগী হোৎনবা কনবা মতৌ অসিনা লৈবাক পুম্বদা ইথিল পীখি। ঐহাক্না অদোমদা য়াইফ-মঙ্গোল পীজরি অমসুং অদোমগী ইচাশিংগীদমক অদোম্না থম্লিবা মঙলানশিং শোইদনা থুংবা ওইয়ু হায়না ঐহাক্না মঙ্গোল পীজরি। অদোম্না হোৎনরিবা থৌনা লিংজেল অদুগা চপ মান্ননা অদোমগী ইচানুপীশিংনা হোৎনরবদি শোইদনা ঙানথোইগনি। অদোমগী অঙাংশিংদসু ঐহাক্না মঙ্গোল পীজরি।
প্রজেন্তর: হেবলোক্তগী শ্রী দেবিদ বেখম, মহাক অন্দমান অমসুং নিকোবরদগীনি। মহাক সাইক্লিং তৌই।
দেবিদ : খুরুমজরি সর!
পি.এম. : খুরুমজরি দেবিদ! কমদৌবীরি?
দেবিদ : নুংঙাইরি সর!
পি.এম. : দেবিদ অদোমগী মিং অসি য়াম্না অফাওবা ফুতবোল শান্নরোয়গা মান্নৈ। অদুবু অদোম্না সাইক্লিং তৌরি। ময়াম্নসু অদোমদা ফুতবোল শান্নৌ হায়না হায়রমগনি? অদোম্না ফুতবোল প্রোফেস্নেল ওইনা শান্নগে খন্দব্রা? নত্ত্রগা সাইক্লিং অসিনা অদুমক অদোমগী অহানবা চোইস ওইখিব্রা?
দেবিদ : ঐহাক্না প্রোফেস্নেল ওইনা ফুতবোল শান্নবা য়াম্না পামজখি। অদুবু অন্দমান অমসুং নিকোবরদা ফুতবোলগী স্কোপ কয়া লৈতে। মরম অসিনা ঐহাক্না ফুতবোল শান্নবা ঙমখিদে।
পি.এম. : দেবিদ অদোমগী তীমমেত্তা মমিং লৈরবা ফুতবোল শান্নরোয়গী মমিংগা মান্নবা অমগা য়াওই হায়। নখোয় অনিমক ফ্রী তাইমদা ফুতবোল শান্নব্রা?
দেবিদ : ঐখোয়না ফুতবোল শান্নদে সর মরমদি ঐখোয়না ত্রেনিৎদা পুক্নিং চংখি, ঐখোয়গী ত্রেক্তা সাইক্লিং তৌবদা পুক্নিং চংখি। ঐখোয়না মপুং ফানা ত্রেনিং তৌনবা হোৎনখি।
পি.এম. : ফৈ দেবিদ, অদোমগী পুন্সিদা অৱাবা কয়া মায়োক্নখি অদুবু অদোম্না সাইকল থৌবা লেপখিদে অমসুং মসিদা ইথিল য়াম্না তঙাই ফদে। অদোম্না ফংলিবা ইথিল অমসুং থৌনা অসি অঙকপনি, অদোম্না মসি করম্না মায়োক্নখিবগে?
দেবিদ : ঐহাক্কী য়ুমগী মীওইশিংনা ঐঙোন্দা য়াম্না ইথিল পীবিখি, মাংদা চংশিনগদবনি অমসুং মেদল পুদুনা লাক্কদবনি হায়খি অমসুং মসিদগী ঐহাক্না মেদল পুরক্কে হায়না লেপখি।
পি.এম. : দেবিদজী অদোম্না খেলো ইন্দিয়া য়ুথ গেমসতসু গোল্দ মেদল লৌখি। খেলো ইন্দিয়া গেমসনা অদোমদা করম্না মতেং পাংখি? অদোম্না মাইপাক্নবগী লৌখিবা অদোমগী ফিরেপতা কয়াম মপাঙ্গল হাপখিবগে?
দেবিদ : সর ঐহাক্কী অহানবা খোঙচৎতা ঐহাক্না অনিরক নেস্নেল রেকোর্দ থুগাইখি অমসুং অদোম্না মন কী বাত্তা ঐহাক্কী মরমদা ফোঙদোকখিবা অদুদা ঐহাক্না য়াম্না হরাওখি অমসুং অদোমগী মন কী বাতনা ঐঙোন্দা য়াম্না ইথিল পীখি অমসুং নেস্নেল লেবেল য়ৌবা ঙম্নবা ঐহাক্না অহানবা অন্দমান অমসুং নিকোবরগী শান্নরোয় ওইরি অমসুং মসিনা ঐহাক্কী অন্দমানগী তীমদা নুংঙাইবা পোকহনখি, ঐহাক্না ইন্তর্নেস্নেলগী থাক্তা ভারতকী তীমদা য়াওবা ফংবা অসিদা মখোয়না য়াম্না চাউথোকচবা পোকই।
পি.এম. : য়েংঙু দেবিদ অদোম্না অন্দমান অমসুং নিকোবর পল্লকপা অসিদা ঐহাক্না হায়জনীংবদি মসি লৈবাক অসিগী খ্বাইদগী ফজবা শরুক্নি। নিকোবরগী সুনামিনা অদোমগী ইপা লৌখিবা মতমদা অদোম চহি অমা মখাই খক্তা ঙাইখি মদুগী মতুং চহি তরা লৈরগা অদোমগী ইমাসু লৈখিদ্রে। ২০১৮দা ঐহাক্না নিকোবরদা লাকপদা ঐহাক্না সুনামি মেমোরিএল চৎপগী খুদোংচাবা ফংজখি অমসুং মখোয়বু ইকাই খুম্নখি। অসিগুম্বা অৱাবা মরক্তা অদোমবু পুক্নিং থৌগৎখিবগীদমক ঐহাক্না অদোমগী ইমুং মনুংবু থাগৎপা ফোঙদোকচরি। ইরৈবাকচা পুম্নমক্কী থৌজাল অদোমদা পীনরি। য়াইফ মঙ্গোল পীজরি।
দেবিদ : থাগৎচরি সর!
মরুপশিং,
মমাংদা হায়খিবা অদুগুম্না নখোয় পুম্নমক্কা উনবা ফংলবা, নখোয়গা ৱারী শাবা ফংলবদি য়াম্না নুংঙাইরমগনি। অদুবু ঐহাক্নসু হায়খ্রে নখোয় কয়ানা মালেমগী তোঙান-তোঙানবা লৈবাকশিংদা ত্রেনিং তৌরি অমসুং হৌজিক চত্থরিবা পার্লিয়ামেন্তগী সেসন অসিনা মরম ওইদুনা ঐহাকসু য়াম্না চিনখি মরম অসিনা ঐহাক্না মতম কাইথোকপা ঙমখিদে। অদুবু নখোয়না হল্লকপদা নখোয়গা শোইদনা উনগনি অমসুং নখোয়গী মাইপাকপা অদু পুন্না নুংঙাইবা ফোঙদোকমিন্নগনি হায়না থাজবা পীজরি। লৈবাক অসিনা নীরজ চোপ্রাদা চাউনা থাজবা থম্মি।
মরুপশিং,
হৌজিক লৈরিবা মতম অসি ভারতকী স্পোর্তসকী পুৱারীদা য়াম্না মরু ওইবা তাঙ্কক অমনি। ঙসি শান্নরোয়শিংদা থৌনা য়াম্না লৈরে, ত্রেনিংসু ফবা হেনগৎলক্লি অমসুং স্পোর্তসকী মাইকৈদা লৈবাক অসিনা খল্লিবা ৱাখল্লোন অসি চাউখৎলক্লি। নখোয় পুম্নমক্না অনৌবা পনখৈ তম্না চংশিল্লি, অনৌবা পনখৈ য়ৌবা ঙম্লি। নখোয়গী মরুপ কয়ানা ইন্তর্নেস্নেল তুর্নামেন্তশিংদা শীংথানীংঙাই ওইনা পর্ফোর্মেন্স উৎখি। লৈবাক পুম্বনা ঙসি নখোয়দা অমুক্তা উখিদ্রিবা মওংদা থাজবা থম্মি। অমসুং মরুপশিং হন্দক্কী কম্মনৱেল্থ তীম অসি য়াম্না অখন্নৈ। ঐখোয়দা এক্সপরিয়েন্স লোয়ননা অনৌবা ইনর্জী অনিমক্কী ফজরবা অপুনবা অমা উবা ফংলি। তীম অসিদা চহি ১৪ খক্তা ঙাইরিবা অনহাত, চহি ১৬কী সঞ্জনা সুশিল জোশি, শেফালি অমসুং বাবি সহানা, চহি ১৭-১৮গী অঙাংশিং অসিনা ঐখোয়গী লৈবাক অসিবু চাউথোকচহল্লি। নখোয়না স্পোর্তস খক্তা নত্তনা মালেমগী ফম্পাক্তা নখোয়না অনৌবা ভারতকী মশক তাক্লি। ভারতকী কাচিন কোয়া খুদিংদা স্পোর্তস তেলেন্তনা পীকথন্না লৈ।
মরুপশিং,
অদোম্না ইথিলগীদমক মপালদা য়েংবগী মথৌ তাদে। অদোমগী তীমদা মনপ্রিতগুম্বা অদোমগী তীমমেৎশিং উবা মতমদা শোইদনা ইথিল পোকপা হেনগৎকনি। মহাক্কী মখোঙদা শোকখিবনা মরম ওইদুনা মহাক্না রন্নর ওইরম্বদগী শোতপুৎতা অনৌবা রোল অমা লৌখি অমসুং স্পোর্ত্তা নেস্নেল রেকোর্দ থমখি। শান্নরোয় হায়বা অসি তুংহল্লোইদবনি, মাংদা অদুমক চংশিনগদবনি, মহাক্কী পান্দম ফংনবা চংশিনগদবনি। অদুনা অহানবা ওইনা অচৌবা ইন্তর্নেস্নেল এরেনাদা চংলিবা মীওইশিংগী ওইনা এরেনা হোংলবসু মাইপাক্নবগী থৌনা অমসুং অখাংকনবা অদুদি হোংদে। পান্দম অদুদি মচু অহুমগী ফিরাল পাইবা উবা ফংবা, নেস্নেল এনথেম তাবা ফংবনি। মরম অসিনা ঐখোয়না প্রেসর লৈহনগনু, অফবা অমসুং ফজবা গেম অমা ওইহন্দুনা শাফু পীয়ু। শান্নরোয়শিংনা লৈবাক অসিনা নীংতম্বা ফংবগী চহি ৭৫ শুরকপা মতমদা কম্মনৱেল্থ গেমস য়াওবা চৎকদৌরি অমসুং শান্নরোয়শিংনা মখোয়গী খ্বাইদগী ফজবা পর্ফোর্মেন্স উৎতুনা লৈবাক অসিগীদমক খুদোল অমা পীরগনি। লম্বা তৌনরিবা অদু কনানো হায়বগী মথৌ তাদে।
মরুপশিং,
নখোয় পুম্নমক নীংথিনা ত্রেন তৌখি, মালেমগী খ্বাইদগী ফবা ফেসিলিতীশিংগা লোয়ননা ত্রেন তৌখি। ত্রেনিং অদু অমসুং নখোয়গী অখাং কনবগী শক্তি অদু শীজিন্নবগী মতম ওইরে। হৌজিক ফাওবদা নখোয়না ফংলকখিবা অসি য়াম্না ফীদম্নফম ওই অদুবু হৌজিক নখোয়না নৌনা হৌবা, অনৌবা রেকোর্দশিং থম্বা তাই। নখোয়দা ঐহাক্না য়াইফ-মঙ্গোল পীজরি অমদুং ইরৈবাকচাশিংনা নখোয়না চাউনা আশা থম্লি অমদি নখোয়দা মখোয়না থৌজাল পীরি। নখোয় পুম্নমক্না মীথোই-মীহেনবা ওইরকউ। থাগৎচরি অমদুং নখোয়না মাইপাক্তুনা হল্লকপা মতমদা ঐহাক্না নখোয়গা শোইদনা উনগনি, ঐহাক্না মঙ্গোল পীজরি। থাগৎচরি!
