হৌখিবা থা ২দা তরুকশুবা ভন্দে ভারত লমথাখ্রে
“ঙসি রাজস্থান্না মাগী অহানবা ভন্দে ভারত এক্সপ্রেস ফংলে। মসিনা কন্নেক্তিবিতীদা চাউনা হেনগৎহল্লগনি অমসুং তুরিজমদা শাহৌ পীরগনি”
“ভন্দে ভারতনা ‘ভারতনা অহানবা মতম চুপ্পদা অহানবা’ হায়বা ৱাখল্লোন মঙফাওনবা ঙমহল্লি”
“ভন্দে ভারত ত্রেন অসি চাউখৎপা, মোদর্নিতী, তংদু লৈতাবা অমসুং মরোমদোম লেপচবা ঙম্বগা পাঙ্খক ওইরক্লি”
“লাইবক থীবদি রেলৱেগুম্বা প্রজাশিংগী মরু ওইবা অমসুং তঙাই ফবা লম অসিবু রাজনিতী তৌফম ওন্থোকখি”
“রাজস্থানগী রেলৱে বজেৎ অসি ২০১৪দা করোর ৭০০ ওইরম্বদগী চহি অসিদা করোর ৯৫০০ হেন্না ওইহন্দুনা ২০১৪দগী শরুক ১৪ হেনগৎহনখি”
“ভারত গৌরব সির্কিৎ ত্রেনশিংনা লেপ্পা লৈতনা এক ভারত – শ্রেস্থ ভারতকী ৱাখল্লোন মপাঙ্গল কনখৎহল্লি”
“রেলৱেগুম্বা কন্নেক্তিবিতীগী ইনফ্রাস্ত্রকচর মপাঙ্গল কল্লবা মতমদা লৈবাক্না মপাঙ্গল কল্লি। মসিনা লৈবাক্কী মীচম প্রজাদা কান্নবা পী, লৈবাক্কী লায়রবা অমদি মিদল ক্লাস্তা কান্নবা পী”

নমস্কার, রাজস্থানগী রাজ্যপাল কলরাজ মিশ্রাজী, রাজস্থানগী মুখ্য মন্ত্রী, ঐহাক্কী মরুপ শ্রীমান অশোক গেহলোতজী, রেল মন্ত্রী শ্রী অশ্বিনী বৈশ্নবজী, রাজস্থান সরকারগী মন্ত্রীশিং, বিধান সভা অমসুং বিধান পরিশদকী ওপোজিসনগী লুচিংবা, ফম্বাক অসিদা লেংশিনবীরিবা এম.এল.এ. অমসুং এম.পি., অতোপ্পা মীথুংলেন অমসুং ঐহাক্কী রাজস্থানগী নুংশিরবা ইচিল ইনাওশিং!

ইমা ভারতীবু নিংজবা রাজস্থানগী লমদম অসিনা ঙসিদি অহানবা বন্দে ভারত ত্রেন ফংজরে। দিল্লী কেন্ত-অজমের বন্দে ভারত এক্সপ্রেস অসিনা জয়পুর-দিল্লী চত্থোক চৎশিন তৌবদা হেন্না লাইথোকহল্লগনি। ত্রেন অসিনা রাজস্থানগী তুরিজম ইন্দস্ত্রীবুসু য়াম্না তেংবাংগনি। তীর্থরাজ পুস্কর ওইরো, নত্ত্রগা অজমের শরিফ ওইরো, লাইনিংবগী মসিগুম্লবা মশক নাইরবা মফমশিংদা য়ৌবদা হৌজিক অমুক্কা হেন্না লাইরগনি।

ইচিল ইনাওশিং,

মমাংগী থা অনিগী মনুংদা ঐহাক্না অশংবা ফিরাল হায়হনবগী লাইবক ফবা ফংজবা মসিনা তরুকশুবা বন্দে ভারত এক্সপ্রেস ওইরগনি। মুম্বাই শোলাপুর বন্দে ভারত এক্সপ্রেস, মুম্বাই-শির্দী বন্দে ভারত এক্সপ্রেস, রানি কমলাপতী-হজরত নিজামুদ্দিন বন্দে ভারত এক্সপ্রেস, সেকনদ্রবাদ-তিরুপতি বন্দে ভারত এক্সপ্রেস, চেন্নৈ কোইম্বাতোর বন্দে ভারত এক্সপ্রেস অমসুং ঙসিনা জয়পুর-দিল্লী বন্দে ভারত এক্সপ্রেস চেনবা হৌরগনি। মসিগী মোদর্ন ওইরবা ত্রেন অসি হেক হৌদোকখিবদগী, চাউরাকপা মীওই লাখ 60মুক্না মসিদা তোংদুনা চৎনখ্রবনি। খোঙজেল য়াঙবা হায়বসিনা বন্দে ভারতকী খ্বাইদগী মশক থোকপা মওং-মতৌনি, মসিনা মীয়ামগী মতম য়াম্না কল্লিবনি। স্তদী অমনা হায়বগী মতুং ইন্না, বন্দে ভারতকী খোঙচৎ অমদা তোংদুনা চৎপা মতমদা মীয়াম্না ত্রিপ অমদা চাউরাক্না পুং লিশিং অনিগা মখায় কনবা ঙম্মি হায়না তাক্লি। ত্রিপ অমদগী কনবা ঙম্লিবা অশুক য়াম্বা মতম অসি মখোয়না অতোপ্পা থবকশিং তৌনবা ফংলিবনি। নিংথীনা মেন্যুফেকচরিং তৌবগী মতিক্তগী সেফতীগী গেরেন্তী, য়াঙলবা খোঙজেলদগী ফজরবা দিজাইনগী মওং মতৌ অসিনা বন্দে ভারতপু অথোইবা ত্রেন অমা ওইহল্লি। মসিগুম্বা মওং মতৌশিং অসি উরুবদগী লৈবাক অসিনা ঙসিদি বন্দে ভারতপু য়াম্না থাগৎনরি। বন্দে ভারতনা অনৌবা কয়া অমা হৌদোকখ্রে। বন্দে ভারত অসিদা ভারত্তা শাবা অহানবা সেমি হাই স্পীদ ত্রেন্নি। বন্দে ভারত অসিদি কম্পেক্ত অমসুং ইফিসিএন্ত অশুক য়াম্না ওইবা অহানবা ত্রেন অমনি। লৈবাক অসিনা শাজবা সেফতী সীস্তেম, কবচ শিজিন্নবা অহানবা ত্রেন অমনি। বন্দে ভারত অসিদি অতোপ্পা অহেনবা ইঞ্জিন য়াওদনা সহয়াদ্রী ঘাত কাবা ঙম্বা ভারতকী ত্রেনগী পুৱারীগী অহানবা ত্রেন্নি। বন্দে ভারত এক্সপ্রেস অসি অহানবা, মতম পুম্বদা অহানবা হায়রিবা ভারতকী ৱাখল্লোন অসিগী খুদম অমনি। বন্দে ভারত ত্রেন অসিনা ঙসিদি চাউখৎপা, মোদর্নিতী, তংদু লৈতাবা অমসুং মরোমদোম লেপচবা ঙম্বা হায়বসিগা অমত্তা ওইবসিদা ঐহাক্না নুংঙাইবা ফাওই। ঙসিগী বন্দে ভারতকী খোঙচৎ অসিনা ঐখোয়বু চাউখৎপা ভারতকী খোঙচত্তা পুদুনা চৎকনি। ঐহাক্না বন্দে ভারত ত্রেন অসিগীদমক্তা রাজস্থানগী মীয়াম্বু থাগৎচরি।

মরুপশিং,

মীচম মীয়ামগী পুন্সিগী চাউরবা শরুক অমা ওইরিবা ত্রেনগুম্বা তঙাই ফদবা খুদোংচাবশিং অসিবু রাজনিতীগী হীরম ওইহনখিবা অসিদা ঐহাক্না নুংঙাইতবা ফাওই। নিংতম্বা ফংলবা মতুংদা ভারতনা রেলগী নেতৱর্ক অচৌবা অমা ফংখিবনি। অদুবু রেলবু মতমগা চুনহনবগা থবক অসিদা রাজনিতী য়াম্না তৌদুনা লাকখি। রাজনিতীগী খুদোংচাবা য়েংদুনা রেল মন্ত্রী কনা ওইগনি, কনা ওইরোই হায়না ৱারেপ লৌদুনা লাকখি। রাজনিতীগী খুদোংচাবগী মখা পোন্না বজেত্তা ত্রেন মখল কয়া লাউথোকখি, মখোয়শিং অদু কৈদৌনুংদা চেনখিদ্রবনি। রেলৱেগী থবক লৌবদা রাজনিতী তৌনরম্মি, শেঞ্জা থুমজা কয়া তৌনরম্মি। লাইরবশিংদগী মরল মুল্লবা মতুংদা মখোয়বু রেলৱেদা থবক পীবগী ফিভম ফাওবা লৈরম্লবনি। মী লৈতবা লেভেল ক্রোসিং ফাওবা করিমত্তা য়েংশিন্দনা থম্বীরম্লবনি। রেলৱেগী লু-নানবা, তেক্ত-কায়দবা, রেলৱে প্লেতফোর্ম লু-নান্না থম্বগী থবকশিংবু থওইদনা অদুমক লৈখ্রবনি। ফিভম পুম্নমক অসি ইং 2014দগী অহোংবা লাকপা হৌখি। মীয়াম্না তংদু লৈতাবা সরকার অমা শেমখিবদগী, মীয়াম্না য়াবা সরকার অমা শেমখিবদগী, সরকারগী মিংদা কারবার তৌবগী থবক লোইখ্রবা মতমদা, রেলৱেসু নিংশা হোন্দোকচবা ঙমখিবনি অদুগা অনৌবা অৱাংবা থাক য়ৌনবা থৌবা হৌখিবনি। ভারত মচা খুদিংনা ঙসিগী রেলৱেগী মওং মতৌশিং উবদা চাউথোকচবা ফাওজরবনি। 

ইচিল ইনাওশিং,

রাজস্থান মীয়াম্না ঐখোয়গী মফমদা মতম পুম্বদা থৌজাল কয়া পীবিদুনা লাকখি। থৌনা ফবশিংগী লমদম অসিবু ঐখোয়গী সরকারনা হৌজিক্তি খুদোংচাবা অমসুং ওইথোকপা য়াবা কয়াগী লমদম ওইহল্লবনি। রাজস্থান অসি লৈবাক্কী তুরিজমগী খ্বাইদগী মকোক থোংবা পন্থুংফমশিংগী মরক্তা অমা ওইরিবনি। রাজস্থান্দা লাক্লিবা তুরিস্তশিংগী মতম য়াম্না কনবা অমসুং খ্বাইদগী ফবা খুদোংচাবা ফংহনবা হায়বসি য়াম্না মরু ওইবনি। মসিদা কন্নেক্তিবিতীনা অচৌবা থৌদাং য়াগনি। কেন্দ্র সরকারনা মমাংগী চহি খরসিদা রাজস্থানগী কন্নেক্তিবিতীগীদমক্তা পায়খৎখিবা থবকশিং অসি মশক থোকপা থবক ঙাক্তনি হায়বদা হায়মনবা থোক্লোই। ঐহাক্না ফেব্রুৱারী থাদা দিল্লী-মুম্বাই এক্সপ্রেসৱেগী দিল্লী-দৌসা-লালসোত শরুক শঙ্গাবগীদমক্তা দৌসাদা লাকপগী খুদোংচাবা ফংজখি। মসিগী এক্সপ্রেসৱে অসিনা দৌসা খক্তা নত্তনা অলৱর, ভারতপুর, স্বাই মাধোপুর, দোঙ্ক, বুন্দি অমসুং কোতা জিলাগী মীওইশিংদসু কান্নবা য়াম্না ফংগনি। কেন্দ্র সরকারনা রাজস্থানগী ঙমখৈগী মফমশিংদা চাউরাক্না কিলোমীতর 1400গী শোরোক শেম্বগী থবক পায়খৎলি। রাজস্থান্দা কিলোমীতর লিশিং অমগী শোরোক শাবগী ৱাহৌদোক অমসু হৌজিক লৈরবনি।

মরুপশিং,

ঐখোয়গী সরকারনা শোরোক খক্তা নত্তনা রেলগী কন্নেক্তিবিতীদসু অহেনবা মিৎয়েং চঙলি। তরঙ্গা হিলদগী অম্বাজী ফাওদুনা আবুরোদ ফাওবা রেলগী অনৌবা লম্বী শেম্বগী থবকসু হৌখ্রবনি। মসিগী রেল লাইন অসি চহি 100 হেনবদগী অপাম্বা লৈদুনা লাক্লবনি, মসিবু বি.জে.পি. সরকারনা মপুং ফাহল্লবনি। উদয়পুরদগী অহমেদবাদ ফাওবগী রেল লাইনসু ব্রোদ গেজ ওন্থোকপগী থবক লোইখ্রে। মসিনা মেৱারগী লমদম, গুজরাত য়াওনা লৈবাক্কী অতোপ্পা শরুকশিংগা অচৌবা লাইন অমনা কন্নেক্ত তৌরগনি। মমাংগী চহি 9 অসিদা রাজস্থানগী রেল নেতৱর্ক্কী চাউরাকপা 75% ইলেক্তিফিকেসন তৌখ্রে। ঐখোয়গী অশ্বিনীজীনসু হৌজিক্তা মরিক চুম্বা তাকপীখ্রে, ইং 2014গী মমাংগী বজেতকা চাংদম্নবা মতমদা, রাজস্থানগী রেল বজেত্তা চাউরাক্না শরুক 14 হেনগৎলে। মতমদুদা ফংলম্বা অমসুং হৌজিক ফংলিবা অসিদা শরুক 14 খেন্নরে হায়বনি। মতমদুদা, মফমসিগী বজেত অসি চাউরাক্না লুপা করোর 900 ওইরম্মি, হৌজিক্তি বজেত অসি লুপা করোর লিশিং 9দগী হেল্লে। তাল্লক অসিদা রেল লাইনবু দবল ওইহনবগী থবকশু শরুক অনি হেল্লে। রেল লাইন পাকথোক চাউথোকপগী থবক কয়া হৌখিবা চহিশিংদা পাংথোকখিবা অসিনা রাজস্থানগী ত্রাইবেল মীয়ামদা কান্নবা য়াম্না পীরে। দঙ্গর্পুর, উদয়পুর, চিতোরগর, পালী অমসুং সিরোহী জিলাদা রেলগী খুদোংচাবা ফংলে। রেল লাইনগা লোয়ননা রাজস্থানগী রেলৱে স্তেসনশিংদসু অহোংবা য়াম্না লাক্লে। রাজস্থানগী রেলৱে স্তেসন দর্জন কয়াসু অমৃত ভারত স্তেসন য়োজনাগী মখাদা নৌনা শেমগৎপা হৌরবনি।

মরুপশিং,

তুরিস্তশিংগী কান্নবা হায়বা ৱাফম্বু নিংথীনা খন্নদুনা, সরকারনা তোঙান-তোঙানবা সর্কিত ত্রেনসু হৌদোক্লে। ঐখোয়গী ভারত গৌরব সর্কিত ত্রেন অসিনা হৌজিক ফাওবদা ত্রিপ 70দগী হেন্না চৎখ্রে। ত্রেনশিং অসিদা পেসেঞ্জর লিশিং 15দগী হেন্না তোংই। অয়োধ্যা, কাশী, নত্ত্রগা খা থংবা মফমশিং য়েংবা ওইরো, দ্বার্কাজীগী দর্শন ওইরো, সিখ খুন্নাইগী গুরুশিংগী দর্শন ওইরো, মসিগুম্বা মফম কয়া অসিগীদমক্তা ঐখোয়না ঙসি ভারত গৌরব সর্কিত ত্রেন চলায়রি। মসিদা তোংবা পেসেঞ্জরশিংনা অফবা ফীদবেক পীবগী মতৌ কয়া অমা ঐখোয়না হৌজিক্কান সোসিএল মীদিয়াদা উরি। মসিনা ত্রেনশিং অসিগী পুক্নিং থৌগৎলি। মসিগী ত্রেনশিং অসিনা এক ভারত, শ্রেস্থ ভারতকী ৱাখল্লোনবু মতম পুম্বদা মপাঙ্গল লৈহল্লি।

মরুপশিং,

ইন্দিয়ন রেলৱেনা মমাংগী চহি খরসিদা করিগুম্বা অমা হোৎনখি। মসিনা রাজস্থানগী লোকেলগী পোত্থোকশিংবু লৈবাক শিনবা থুংবদা য়ৌহনবদা তেংবাংখি। মসিদি ৱান স্তেসন ৱান প্রদক্ত ইনিসিএতিব হায়বসিনি। ইন্দিয়ন রেলৱেনা চাউরাক্না ৱান স্তেসন ৱান প্রদক্ত স্তোল 70 খিনখি। স্তোলশিং অসিদা জয়পুরগী রজাই, সাঙ্গানেরী ব্লোক প্রিন্ত নম্বা চাদর, অতরগুলাপ্তগী শেম্বা পোত্থোক কয়া য়াম্না শিৎলি। মসিনা রাজস্থানগী অপীকপা লৌমী, খুৎ শা হৈবা মীওই, হেন্দিক্রাফশিংবু কৈথেলদা য়ৌহনবগী পাম্বৈ অমা ওইখি। মসিদি চাউখৎ থৌরাংগীদমক্তা সবকা প্রয়াস হায়বা থৌওংগী খুদম অমনি। রেলগুম্বা কন্নেক্তিবিতীগী ইনফ্রাস্ত্রকচরগী মপাঙ্গল হেনগৎলকপা মতমদা, লৈবাক অসিগী মপাঙ্গলসু হেনগৎলক্কনি। মসিনা লৈবাক্কী মীচম মীয়ামদসু য়াম্না তেংবাংগনি। লাইরবা অমসুং মিদ্দল ক্লাসকী মীওইশিংদশু মান্ননা তেংবাংগনি। মোদর্ন ঐবা বন্দে ভারত ত্রেন অসিনা রাজস্থানগী চাউখৎ থৌরাংগী খোঙজেল হাপকনি হায়বগী ঐহাক্না থাজবা থম্লি। অদুগা, ঐহাক্না গেহলোতজীবুসু য়াম্না অখন্ননা থাগৎচনিংই। রাজনিতীগী শিংনবা কয়া অমা মহাক্না হৌজিক মাইয়োক্নরিবনি। মদু ওইরবসু, মহাক্না চাউখৎ থৌরাংগী থবক অসিগীদমক্তা মতম কাইথোক্তুনা লাকপীবা, রেলগী থৌরম অসিদা শরুক য়াবীরিবনি। মসিগীদমক্তা ঐহাক্না মহাকপু থাগৎচরি। ঐহাক্না মহাক্কী মফমদা ইকায় খুম্নবগা লোয়ননা হায়জনিংবদি অদোমগী খুৎ অনিমক্না লদ্দু পায়রিবনি হায়বসিনি। অদোমগী রেল মন্ত্রী অসি রাজস্থান্দগীনি অমসুং রেলৱে বোর্দকী চেয়রমেন্সু রাজস্থান্দগীনি। নিংতম্বা হেক ফংবগা পাংথোকফম থোকপা থবকশিং অদু হৌজিক ফাওবদা পাংথোক্ত্রবসু, অদোম্না ঐহাকপু অদুক্কী মতিক থাজবনা ঙসি অদোম্না ঐহাক্কী মাঙদা মদুগী ৱাফম থম্বীরি। অদোমগী থাজবা অসিমক্না ঐখোয়গী মরুপ ওইবগী পাঙ্গলনি, অদুগা অদোম্না ঐহাক্কী ইফমদা মরুপ অমা ওইনা থাজবা থম্লিবা অসিগীদমক্তা ঐহাক্না অদোম্বু থাগৎচরি। অদোম পুম্নমকপু ঐহাক্না অমুক্কা হন্না থাগৎচরি।

 

Explore More
৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল

Popular Speeches

৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল
PM Modi shares two takeaways for youth from Sachin Tendulkar's recent Kashmir trip: 'Precious jewel of incredible India'

Media Coverage

PM Modi shares two takeaways for youth from Sachin Tendulkar's recent Kashmir trip: 'Precious jewel of incredible India'
NM on the go

Nm on the go

Always be the first to hear from the PM. Get the App Now!
...
Robust 8.4% GDP growth in Q3 2023-24 shows the strength of Indian economy and its potential: Prime Minister
February 29, 2024

The Prime Minister, Shri Narendra Modi said that robust 8.4% GDP growth in Q3 2023-24 shows the strength of Indian economy and its potential. He also reiterated that our efforts will continue to bring fast economic growth which shall help 140 crore Indians lead a better life and create a Viksit Bharat.

The Prime Minister posted on X;

“Robust 8.4% GDP growth in Q3 2023-24 shows the strength of Indian economy and its potential. Our efforts will continue to bring fast economic growth which shall help 140 crore Indians lead a better life and create a Viksit Bharat!”