ৱাহে গুরু দা খালসা, ৱাহে গুরু দী ফতেহ!
কেন্দ্রগী মন্ত্রীমন্দলগী ঐগী খোঙবুশিং, স্তেতশিংগী মুখ্যমন্ত্রীশিং, ইকায়খুম্নরবা লূপশিংগী চেয়রমেন অমদি প্রেসিদেন্তশিং, দিপ্লোমেৎশিং, লৈবাক পুম্বদগী তিনবিরিবা, মরুওইনা থৌরম অসিগীদমক মফমসিদা লাক্লিবা নুপামচা-নুপামচাশিং, অতৈ অথোইবা মীওইশিং, ইবেম্মা অমদি ইবুংঙোশিং।
ঙসি লৈবাকসিনা অহানবা ‘বীর বাল দিবস’ পাঙধোক্লি। ঐখোয়না মীরোল কয়া নীংশিংদুনা লাক্লিবা নুমিৎ অসি, কত্থোকপগী শক্লোন অসি, ঙসি লৈবাক্কী থাক্তা অমত্তা ওইনা ইকোক নোঞ্জনবগী অনৌবা খোঙহৌ অমা ওইরে। অথৌবশিংগী চয়োল অমদি ঙসিগী বীর বাল দিবস, ঐখোয়গী সিখ চৎনবীগী ইথিলশিংনা থল্লবা অমা ওইরগসু মসিদা অতিয়াগুম্লবা পুক্নিংগী ইহুল কয়াসু য়াওরি। বীর বাল দিবস অসিনা ঐখোয়দা থৌনা ফবা হায়বসিদা চহিগী ৱাফম লৈতে হায়বা নীংশিংহল্লি। বীর বাল দিবসনা ঐখোয়দা গুরু তরানা লৌরম্বা থৌদাংশিং করিনো, লৈবাকসিগী ইকায়খুম্নবা ঙাকচবদা সিখ চৎনবীনা কত্থোক্লম্বশিং করিনো হায়বা নীংশিংহনগনি! বীর বাল দিবসনা ঐখোয়দা ভারত করিনো, ভারতকী শক্তম করিনো হায়বা তাক্কনি! চহি খুদিং হায়রিবা য়াইফরবা বীর বাল দিবসকী থৌরম অসিনা ঐখোয়দা ঐখোয়গী মাঙলমচৎ খঙননবা অমদি তুংলমচৎ শেম্ননবগীদমক পুক্নিং থৌগৎকনি। ভারতকী নহারোলশিংগী মতিং করিনো, ভারতকী নহারোলশিংনা কমদৌনা লৈবাক অসিবু মাঙলমচত্তা কনখিবগে, কমদৌনা ঐখোয়গী নহারোলশিংনা ভারতপু মীওইবা খুন্নাইবা অমম্বা মতমদুদগী পুথোরকখিবগে হায়বা ৱাফমশিংসিগী পাউখুম তুংদা লাক্কদৌরিবা দিকেদ কয়া অমদি চহিচা কয়া ‘বীর বাল দিবস’না তাক্তুনা লৈহৌরগনি।
ঙসিগী থৌরম অসিদা, ঐনা অথৌবা সাহিবজাদাশিংগী খুয়াখাদা ইকোক নোঞ্জরি অমদি মখোয়গী মফমদা ঐগী শ্রদ্ধাঞ্জলি কৎচরি। ঐখোয়না লৈঙাক্না ঙসি দিসেম্বর ২৬পু বীর বাল দিবস হায়না লাউথোকপগী তাঞ্জা ফংজবা অসিদা ঐ ইশাবু লাইবক ফবনি হায়না খল্লি। ঐনা পন্থৌ দামেস গুরু গোবিন্দ সিংহ জীগী খউয়াখাদা ইকোক নোঞ্জরি, অমদি গুরু পুম্নমক্কী খুয়াখাদসু ইকোক নোঞ্জরি। ঐনা মমা ওইবীগী মশক ওইরিবা মাতা গুজ্রিগী মফমদসু ইকোক নোঞ্জরি।
মরূপশিং,
মালেমগী চহি লিশিং কয়াগী পুৱারী অসি তমথিবগী অকি তুজুংলবা তাঙ্কক কয়ানা থল্লি। পুৱারীদগী হৌরগা পাথাং পুথাং নাইনা থংথরকপা ৱারীশিংদা, তমথিবা মায়থোঙ খুদিংগী মমাঙদা লমচৎ ফজবা থৌনা ফবা ফবী অমমমদি অদুমক লৈখি। অদুগা চমকৌর অমদি সিরহিন্দগী লানফমদা থোকখিবা থৌদোকশিং অদু মাঙলমচৎকীসু নত্তে তুংলমচৎকীসু নত্তে হায়বসি চুম্মী। হৌখিবা থৌদোক অসি চহি লিশিং কয়া লিবা ওইদুনা মতমগী খোঙলৈনা মহাক্কী লৈইশিং মমিং শামহনখিবদুমকসু নত্তে। পুম্নমক অসি শুপ্নতগী চহিচা অহুমগী মমাঙদা লমদম অসিগী লৈমায়দা থোকখিবনি। নাকল অমদা লাইনিংগী তমথিবা অমদি অদুগুম্বা তমথিবা অদুদা মুঘল সুল্তানেৎকী কল্লবা ঈরৈ, অদুগা নাকল অমদনা ৱাখল লৌশিং অমদি প্রাইস্চিৎনা থল্লবা, ভারতকী অরিবা মীওইবগী মমল খঙনা হিংবগী চৎনবীদা হিংলিবা ঐখোয়গী গুরুশিং। নাকল অমনা অকি তুজুংবা খম থেংবা থাক্নি অদুগা নাকল অমদনা স্পিরিচুএলিতীগী খম থেংনা ৱাংবা থাক্নি। নাকল অমদনা লাইশিংদা ঙাওবা অদুগা নাকল অমদনা মীপুম খুদিংদা চীংউ লাইবু উবগী মচৎনি। অদুগা পুম্নমকসিগী মরক্তা, নাকল অমদা লান্মী লাখ কয়ানি, অদুগা নাকল অমদনা গুরুগী থৌনা ফরবা সাহিবজেদাশিংনা নাইতোম অকিবা লৈতনা লেপখিবনি। হায়রিবা থৌনা ফরবা সাহিবজাদাশিং অসিনা শিংনবা অমত্তবু কিখিদে, কনাগুম্বা অমত্তগী মফমদা কোক নোনখিদে। জোরাৱর সিংহ সাহব অমদি ফতেহ সিংহ সাহব হিংনা ফক্লাং মনুংদা হাপখি। নাকল অমদা তমখিবা শাজৎকী পল পুম্নমক লানখি, অদুগা নাকল অমদনা খাঙবা কনবা, থৌনা ফবগী পনখৈ পুম্নমক লানন্থোক্তুনা লেপখিবনি। সাহিবজাদা অজিৎ সিংহ অমদি সাহিবজাদা জুঝর সিংহনসু থৌনা ফবগী ফিদম শেম্লমদুনা চহিচা কয়া পুক্নিং থৌগৎলি।
ইচিল ইনাওশিং,
অসিগুম্বা পুৱারীগী তাঙ্কক কয়ানা থল্লবা, মহাক্কী পুৱারী মতৌ অসুম্না ওইরিবা লৈবাক অসি মশানা মশাবু ইকায়খুম্নজবা অমদি মশাদা থাজবগী মতৌনা থনবা মশানা তাবনি। অদুবু লাইবক থিবদি, ঐখোয়দা হন্থনা খলহন্নবগী মচাক ওইহল্লিবা পুৱারীগী মিংদা শেমজিন শাজিনবা ৱারীশিং ঐখোয়দা তাকপি তম্বিদুনা লাকখি। মসি ফনা ওইদুনসু, ঐখোয়গী খুন্নাই, ঐখোয়গী চৎনবীনা অসিগুম্বা অরংবা পুৱারীগী তাঙ্ককশিংবু হিংহন্দুনা থম্লি।
মরূপশিং,
করিগুম্বা ঐখোয় ভারতকী তুংলমচৎপু মায় পাকপগী পন্দোল তম্না পুদুনা চৎপা পাম্লবদি, ঐখোয়না মাংলমচৎপু চিংনবা মীৎয়েঙদা য়েংবগী ৱাখল্লোন্দগী নীংতম্বা হান্না পুরকপা মথৌ তাই। মরম অসিনা নীংতম্বগী অমৃৎকালসিদা লৈবাকসিনা ‘মীনায় নাইথাংগী ৱাখল্লোন্দগী নীংতম্বা’ পুরক্নবগী নীংশা অমা হোল্লিবসি। ‘বীর বাল দিবস’ লৈবাক্কী হায়রিবা ‘ৱাশক মঙা’ অদুগী থৱায় হাপ্লিবা নীংশাগুম্বনি।
মরূপশিং,
অসুক নৌখ্রবা চহি মতাঙসিদা সাহিবজাদাশিংনা কত্থোকখিবা অসি ঐখোয়গী অতোপ্পা অচৌবা পারা অমনি। মতমদু ৱাখলদা খন্দুনা য়েংবিয়ু, ঔরঙ্গজেবকী তমথিবা মতৌ, ভারতপু হোংদোক্নবগী মহাক্কী থৌরাংগী মায়োক্তা গুরু গোবিন্দ সিংহ জীনা চীংজাউগুম লেপখি। অদুবু ঔরঙ্গজেব অমদি মহাক্কী সুল্তানেৎনা জোরাৱর সিংহ সাহব অমদি ফতেহ সিংহ সাহবকুম্বা পীক্লিবা অঙাংশিংদা করিগী অদুক তমথিরিবা? করিগীদমক মরাল লৈজদ্রবা অঙাং অনিবু হিংনা ফক্লাংদা হাপচিনখিবগী মরম করিগী? মসিগী মরমদি ঔরঙ্গজেব অমদি মহাক্কী মীয়াম্না গুরু গোবিন্দ সিংহগী অঙাংশিংগী লাইনিং থাঙ থাদুনা ওন্থোকপা পামখি। খুন্নাই অসিগী, লৈবাক অসিগী অনৌবা মীরোলশিংনা ওৎ নৈবদা তুমিন খাঙদুনা লৈরি, মশাদা থাজবা অমদি তুংলমচৎ মথন্নতা মুৎচখিবগী ফীভম লৈরি। অদুবু ভারতকী মপারী, থৌনা ফরবা নুপামচাশিং অদুনা শিববুসু অকিবা লৈখিদে। মহাকপু ফক্লাংদা হিংনা হাপচিনখি, অদুবু মখোয়না তমথিবা লীচৎকী থৌরাং অদুবুসু মতম চুপ্পগী ওইনা মুত্থৎলমখি। মসি লৈবাক অমা হেক্তগী মতিক লৈবা নহাশিংগী পাঙ্গল অদুনি। নহাশিংনা মখোয়গী থৌনাগা লোয়ননা তমগী খোঙলৈবু মতম চুপ্পগী ওইনা ওন্থোকলমখি। হায়রিবা ফিদম অসিগা লোয়ননা, ঙসি ভারতকী নহারোলশিংনা লৈবাক অসিবু চাওখৎপগী অনৌবা পন্দোল তম্না পুদুনা চৎনবগীদমক চোংথোরক্লি। অসুম্না দিসেম্বর ২৬তা পাঙথোক্লিবা বীর বাল দিবসকী শক্লোনসু মরুওইবা হেনগৎলক্লি।
মরূপশিং,
সিখ গুরুগী চৎনবী অসি শুপ্নতগী লাইনিং অমদি স্পিরিচুএল ওইবা চৎনবীখক নত্তে। মসি এক ভারত শ্রেস্থ ভারতকী ৱাখল্লোনদা মথৌ হাপ্লিবনি। ঐখোয়গী শেংলবা গুরুগ্রন্থ সাহিব্তগী হেনবা করি খুদমবু লৈখিগদগে? মসিদা সিখ গুরুশিংগা লোয়ননা ভারতকী তোঙান তোঙানবা মফমশিংদগী লম্বোইবা ১৫ অমদি শৈরেংবা ১৪গী খোঞ্জেলশিং য়াওরি। মতৌ অসুম্না অদোম্না গুরু গোবিন্দ সিংহগী পুন্সি খোঙচৎসু অদোম্না উবা ফংবিগনি। মহাক ভারতকী পত্নাদা পোকপনি। মহাক্না থবক তৌরম্বা মফমদি অৱাং-নোংচুপ ভারতকী চীংগী মফমশিংদনি। অদুগা মহাক্কী পুন্সি খোঙচৎ মহারাস্ত্রদা লোইশিনখি। গুরুগী খোঙলোয় মঙাসু ভারতকী তোঙান তোঙানবা মফমশিংদগীনি, অমদি খোঙলোয় মঙাগী মনুংদা অমদি গুজরাত, দ্বারিকাদগীনি, ঐগী পোক্নফম লমদমদগীনি। ‘মীওইবদগী হেনবা ৱাখল্লোন, ৱাখল্লোন্দগী হেনবা লৈবাক’, ‘রাস্ত্র প্রথম’ হায়রিবা লাইৱা অসি গুরু গোবিন্দ সিংহ জীগী লেঙদ্রবা ফিরেপ ওইখি। মহাক্না অঙাং ওইরিঙৈ, লৈবাক্কী লাইনিংবু ঙাক্নবগীদমক অচৌবা কত্থোকপা অমা মথৌ তাব্রা হায়বা ৱাহং মাগী মফমদা ফাওরকখি। মহাক্না মাগী মপাবুংদা অদোমদগী হেন্না চাউবা কনানো, অদোম্না কত্থোকপগী থবক অসি তৌবিয়ু হায়না হায়খি। মহাক্না মপা অমা ওইরম্লবা মতমদা, মহাক্না মাগী মচাশিংবু লৈবাক্কী লাইনিংগীদমক কত্থোকপদা চিংনবা লৈখিদে। মহাক্কী মচাশিংবু কত্থোকখিবা মতমদা মহাক্না মাগী খোঙলোয়শিংদা য়েংলদুনা হায়রম্মী, - মরি শিখ্রগা করি তৌরবগে, লিশিং কয়াদি হিংলিদনা। মহাক্না হায়নিংলিবদি মহাক্কী মচা মরি শিখ্রবসু করিবু কায়রিবগে, মহাক্কী খোঙলোয় লিশিং কয়া, লৈবাক মীয়াম লিশিং কয়া ঐগী ইচাগুম্বনি। হায়রিবা লৈবাকপু মাঙদা থম্বগী চৎনবী অসিনা ঐখোয়বু চাউনা পুক্নিং থৌগৎলি। হায়রিবা চৎনবী অসিবু হেন্না মপাঙ্গল কনখৎহন্নবা হোৎনবগী থৌদাং ঐখোয়গী লেঙবান্দা থোঙ্গত্তুনা লৈরবনি।
মরূপশিং,
ভারতকী তুংগী মীরোলশিং কমদৌগনি হায়বসি মখোয়না কনাগী খুদুং ইনবগে হায়বসিগী মখা পোনগনি। ভারতকী তুংগী মীরোলশিংগী ফিদম ওইগদৌরিবা পুম্নমক লৈবাক লৈহাউসিদা লৈরে। ঐখোয়গী লৈবাক অসিগী মমিং থোনবদা মমিং লৌখিবা ভারত হায়রিবা নুপামচা অদু নোংশা অমদি হিংচাবশিং হাৎপদা চোকথবা লৈখিদে হায়নৈ। ঙসিসু লাইনিং অমদি পুক্নিং লুপচবগী মরমদা ৱা ঙাংনরকপদা ঐখোয়না ভক্তরাজ প্রহ্লাদপু নীংশিংই। ঐখোয়না খাঙবা কনবা অমদি অরোনবা ঙাকপগী মতাঙদা ঙাংনরকপদা ধ্রুবপু খুদম ওইনা পন্নৈ। ঐখোয়না অশিবগী লাই য়মরাজপু মহাক্কী লাইনিং পরৈ চেৎপতনা পুক্নিং শুমহৎখিবা নাচিকেতাগী মফমদসু ইকোক নোল্লি। মহাক্না অঙাং ওইরিঙৈদা য়মরাজতা মসি করিনো, অশিবা হায়বসি করিনো হংখিবা নুপামচাদুনা নাচিকেতা। ঐখোয়না বাল রামগী লৌশিং অমদি থৌনা, বসিস্থগী আশ্রমদগী হৌরগা বিস্বামিত্রগী আশ্রম ফাওবদা, মখোয়গর পুন্সিগী খোঙথাং খুদিংদা ফিদমগী মশক উবা ফংই। মমা খুদিংমক্না মখোয়গী মচাশিংদা প্রভু রামগী মচানুপা লব-কুসকী ৱারী লিনরি। ঐখোয়না শ্রী কৃষ্ণবু নীংশিংবা মতমদসু, অহানবদা নুংশিবগী শৈহেক্তা বাসি খোংলিবা কন্হাগী শক্তম ঐখোয়গী পুক্নিংদা লাকই, অমদি মহাক অচৌবা হিংচাবশিংসু হাৎখিবনি। মতমদুদগী হৌরগা হৌজিক মতম ফাওবদা থৌনা ফরবা নুপামচা অমদি নুপীমচাশিংদা ভারতকী চৎনবীগী মমি তারি।
অদুবু মরূপশিং,
ঙসি, ঐনা লৈবাক মীয়াম মাঙদা অচুম্বা ৱাফম অমসু অমুক হন্না ফোঙদোকচগে। সাহিবজাদাশিংনা অসুক চাউনা কত্থোকখিবা অমদি মখোয়গী মপুন্সি কত্থোকখিবা অসি লৈরগসু ঙসিগী মীরোলগী অঙাংশিদা হংলুবা মতমদা মখোয় অয়াম্বনা খঙলোম্লোই। অসুক চাউখ্রবা থৌদোক অমবু কাউথোক্নখিবা হায়বসি মালেমগী লৈবাক অমত্তদা থোক্লম্লোই। ঙসিগী য়াইফরবা নুমিৎ অসিদা, ঐখোয়দা বীর বাল দিবসকী ৱাখল্লোন অসি ঙন্না লাক্লমদরিবা করিগীনো হায়বা ৱাফমদা মখা তানা চঙশিল্লরোই। অদুবু ঐনা হায়জনিংবদি অনৌবা ভারত অসিনা চহি কয়াগী মমাঙদগী শোয়রম্বশিং অদু চুমথোরক্লিবনি হায়বসিনি।
লৈবাক অমগী শক্তম অসি মাগী লীচৎ, মতিক ময়াই অমদি ৱাখল্লোন্না তাকপনি। লৈবাক অমগি মতিক ময়াই হোংলকপা মতমদা লৈবাক্তুগী তুংলমচৎসু থুনা হোংলকপা ঐখোয়না পুৱারীদা উনখ্রে। অমদি হায়রিবা মতিক ময়াই অসি হৌজিক্কী মীরোলনা মমাঙগী ৱাখল্লোনশিং ময়েক শেংনা খঙলক্লবা মতমদা মাঙহন্দনা থম্বা ঙম্মী। নহারোলশিংনা মখোয়গী লমজিং ওইনবগীদমক ফিদমগী শক্লোন অমা মতম পুম্নমক্তা মথৌ তাই। নহারোলশিংনা মতৌ তমজনবা অমদি পুক্নিং থৌগৎনবগীদমক মতিং লৈবা অথৌবা অথৌবশিং মথৌ তাই। মরম অসিননি ঐখোয়না শ্রী রামগী ৱাখল্লোন্দসু থাজরিবা, প্রভু গৌতম বুদ্ধ অমদি প্রভু মহাবিরদগীসু ফিদম লৌরিবা, গুরু নানক জীগী পাউতাকশিং ইল্লিবা, ঐখোয়না মহারানা প্রতাপ অমদি ছত্রপতি বীর সিবাজী মহারাজনচিংবা অথৌবশিংগী মরমদা তম্লিবসি। মরম অসিননি ঐখোয়না চহি চা কয়া লিশিং কয়া লিরবা থৌরম কয়া, কুমহৈ কয়া, কুমওন কয়া ঐখোয়না পাঙথোক্লিবা। ঐখোয়গী ইপা ইপুশিংনা খুন্নাইগী মথৌ তাবা অসিবু খঙলম্মী অমদি ভারতপু মাগী নাৎকা কুমহৈ অমদি লাইনিংগা মরী লৈনবা লৈবাক অমা ওইনা শেমগৎলম্লিবা। হায়রিবা থৌদাং অসিমক তুংগী মীরোলগীদমক ঐখোয়না তৌরমবা তাই। ঐখোয়না অদুগুম্বা ৱাখল্লোনশিংদু হিংহন্দুনা থম্লম্বা মথৌ তাই। ঐখোয়গী ৱাখল্লোনগী ঈচেল অসিবু তৎহন্দনা থম্বা মথৌ তাই।
মরম অসিনা, নীংতম্বগী অমৃৎ মহোৎসব অসিদা লৈবাকসিনা নীংতম লালহৌগী পুৱারীবু অমুক হিংগৎহন্নবা হোৎনরি। ঐখোয়গী নীংতম লান্মীশিংবু, অথৌবীশিংবু, ত্রাইবেল খুন্নাইনা কত্থোকখিবশিংবু লৈবাক মীয়াম শিনবা থুংনা য়ৌহন্নবগীদমক ঐখোয় পুন্না থবক তৌরি। ‘বীর বাল দিবস’নচিংবা লৈখিদবগী কুমওনশিং মায়কৈ অসিদা চঙশিনবদা চাউনা মতেং ওইগনি।
মরূপশিং,
অনৌবা মীরোলবু বীর বাল দিবসকা মরী শম্নহন্নবগীদমক পাঙথোক্লিবা কুইজ অমদি এসে কম্পিতিসন অসিদা নহা লিশিং কয়ানা শরুক য়ারিবসি ঐ নুংঙাই। জম্মু-কাস্মির ওইরবসু, খারোমদা পুদুচেরী ওইরবসু, নোংপোক্তা নগালেন্দ ওইরবসু, নোংচুপ্তা রাজস্থান ওইরবসু, কম্পিতিসন অসিদা অঙাংশিংনা শরুক য়াদবা লৈবাকসিগী মফম অমত্তা লৈত্রে অমদি মখোয়না সাহিবজাদাশিংগী পুন্সিগী মরমদা তমশিন্দুনা এসেশিং ইরি। লৈবাকসিগী তোঙান তোঙানবা স্কুলশিংদসু সাহিবজাদাশিংগা মরী লৈনবা কম্পিতিসন কয়া পাঙথোক্লি। কেরলাগী অঙাংশিংনা, অৱাং-নোংপোক্কী অঙাংশিংনা বীর সাহিবজাদাশিংগী মরমদা মমুৎ তানা খঙলক্কদবা নুমিৎ অদু কুইদ্রে।
মরূপশিং,
ঐখোয় পুন্না বীর বাল দিবসকী পাউজেলবু লৈবাক্কী কাচিন কোয়া থুংনা শন্দোকমিন্নবা তাই। ঐখোয়গী সাহিবজাদাশিংগী পুন্সি, মখোয়গী পুন্সিগী পাউজেল লৈবাক্কী অঙাং খুদিংদা য়ৌহন্নবা; অঙাংশিংনা মখোয়গী মফমদগী ফিদম লৌদুনা লৈবাক্কীদমক কত্থোক্লবা মীশক ওইহন্নবগীদমকসু ঐখোয়না হোৎনবা তাই। ঐখোয়না পুন্না হোৎনমিন্নবা অসিনা চাওখৎপা ভারতকী পান্দম ফংনবা হোৎনবদা অনৌবা ইনোৎ হাপকনি হায়না ঐনা থাজৈ। ঐনা অমুক্কা হন্না অথৌবা সাহিবজাদাশিংগী খুয়াখাদা ইকোক নোঞ্জবগা লোয়ননা হায়রিবা পান্দম অসিদা মীৎয়েঙ থমজদুনা ময়াম পুম্নমকপু থম্মোয়নুংদগী হন্না হন্না থাগৎচরি।
