খুরুমজরি!
‘দিফেন্সকী লমদা মরোমদোম লেপচবা ঙম্বা – থবক পাংথোকপগী খোল্লাও’ হায়বা ঙসিগী ৱেবিনারগী থীম অসিনা লৈবাক্কী অনিঙবা-অপাম্ববু তাক্লি। মমাংগী চহি খরদগী দিফেন্স সেক্তরনা মরোমদোম লেপচবা ঙম্বগী থৌওংবু মপাঙ্গল হাপ্নবা মিৎয়েং চঙখিবশিং অসি বজেৎ অসিদা ময়েক শেংনা মমি তারি।
মরুপশিং,
ভারতকী দিফেন্স মেন্যুফেকচরিং অসি মীখা পোল্লিঙৈগী মতম অমসুং নীংতম্বা ফংবগা ইকান কান্নদবা মতমশিংদসু মপাঙ্গল য়াম্না লৈরম্মি। ভারত্তা শাবা খুৎশু-খুৎলায়শিংনা মালেমগী অনিশুবা লাঞ্জাওদা মরু ওইবা থৌদাং য়াখি। মখা তারকপা চহিশিংদা, ঐখোয়গী শক্তি অসিনা হন্থরকখ্রবসু, তৌবা ঙম্বগী মতিক্তদি মতমদুদা অমসুং হৌজিকসু চাং তাদ্রি হায়বা ময়েক শেংলি।
মরুপশিং,
ঙাক-শেলগী খ্বাইদগী মরু ওইবা পান্দমদি ঐখোয়গী ঙাক-শেলগী পথাপ্তা তোপ-তোপ্পা মগুন চেলহনবা অমসুং চুনগদবা মওংদা শেমদোকপনি অমসুং মসিনা ঐখোয়দা য়াম্না তেংবাংগনি। করিগুম্বা লৈবাক ১০গী মরক্তা মান্নবা মখলগী খুৎলায় লৈনবা মতমদা, ঐখোয়গী লান্মীগী নাক্তা তোপ-তোপ্পা হায়বা অমত্তা লৈরোই। অদোমগী ইশাগী লৈবাক্তা খুৎলায় শাবা মতমদতা তোপ-তোপ্পা অমসুং ঙক্নীংঙাই ওইবা থৌওং থোক্কনি।
মরুপশিং,
হন্দক্কী চহিগী বজেৎ অসিদা লৈবাক অসিগী মনুংদা রিসর্চ, দিজাইন অমসুং দিভেলপমেন্ততগী হৌদুনা মেন্যুফেকচরিং তৌবা ফাওবগী মতিক লৈবা ইকোসীস্তেম অমা শেম্বগী ব্লুপ্রিন্ত য়াওরি। দিফেন্স বজেৎকী চাউরাকপা ৭০%দি লৈবাক্কী ইন্দস্ত্রীগীদমক্তা থম্লি। ঙাক-শেল মন্ত্রালয়না হৌজিক ফাওবগী ওইনা দিফেন্স প্লেৎফোর্ম অমসুং ইক্বিপমেন্ত ২০০ হেনবগী পোজিতিব ইন্দিজেনাইজেসন লিস্ত অমা পুথোকখ্রে। ৱাফম অসি লাউথোকখ্রবা তুংদা, লৈবাক মনুংদগী পোত্থোক লৈনবগীদমক্তা লুপা করোর লিশিং ৫৪গী শেনফমগী কন্ত্রেক্তকী খুৎয়েক পীনখ্রে। মসিদা নত্তনা, লুপা করোর লাখ ৪.৫গী শেনফমগী খুৎলায় লৈবগী থৌওংশিংনা তোঙানবা থাক কয়াদা লৈরি। অহুমশুবা লিস্ত অসিসু য়াম্না থুনা থোক্লগনি। মসিনা ঐখোয়না লৈবাক মনুংদা দিফেন্সকী পোত্থোক শাবগী থৌংবু কয়া য়াম্না শৌগৎলি হায়বা তাক্লিবনি।
মরুপশিং,
ঐখোয়না অতোপ্পা লৈবাক্তগী খুৎশু-খুৎলায় লৈবগী থৌওংদা মতম শাংনা চঙমনখিদুনা, খুৎলায় অদু ঐখোয়না ফংবা মতমদদি, হৌজিক্কী ওইরিবা মতমদুগা চুনদবা ওইবগী থৌওং কয়া থোক্লি। মসিগী ৱারোইশিন অসিদি ‘আত্মানির্ভর ভারত’ অমসুং ‘মেক ইন ইন্দিয়া’দা লৈরে। ঐহাক্না লৈবাক্কী আর্ম্দ ফোর্সকী মফমদা ভারতনা দিফেন্স সেক্তরদা মরোমদোম লেপচবা ঙম্নবা হোৎনরিবা অসিগী ৱাখল্লোনবু লুনা খন্দুনা ৱারেপ লৌবীয়ু হায়না থমজনীংই। ঙসি ঐখোয়গী লান্মীগী নাক্তা ভারত্তা শাবা খুৎশু-খুৎলায় লৈবা মতমদা, মখোয়গী মশাদা থাজবা অমসুং চাউথোকচবগী চাংনা খম থেংনা ৱাংলি। ঐহাক্না সরকারগী মনুং চন্দ্রিঙৈ অমসুং পার্তীগী থবক তৌরিঙৈগী মতমদা, পঞ্জাব অসি ঐহাক্কী থবক মফম ওইরম্মি। মতমদুদা, ঐহাক্না ৱাঘা ঙমখৈদা লান্মীশিংগা ৱারী ৱাতাই শাবগী খুদোংচাবা ফংখিবা ঐহাক্না নীংশিংই। মফমদুদা তাবা লান্মী অমনা ৱারী ৱাতাই শারিঙৈ মনুংদা ঐহাক্কী থম্মোইনুংদা য়ৌখিবা ৱাফম অমা ফোংদোকখি। ৱাঘা ঙমখৈদা লৈরিবা ভারতকী গেত অসি ঐখোয়গী য়েক্নবগী গেত্তগী খরা পীকথৈ হায়না মহাক্না তম্লকখি। ঐখোয়গী গেতনা হেন্না চাউফম থোকই, ঐখোয়গী ফিরালনা মখোয়গী ফিরালদগী হেন্না ৱাংনা পাইফম থোকই হায়না মহাক্না মখা তারকখি। মসি ঐখোয়গী লান্মীগী ৱাখল্লোন্নি। অসিগুম্বা ৱাখল্লোনগা লোয়ননা ঐখোয়গী লান্মীশিংনা ঙমখৈদা মথৌ পাংথোকই। ভারত্তা শাবা পোত্থোকশিংগী মতাংদা মখোয়গী তোঙানবা মশাদা থাজবগী মওং অমা চেল্লি। মরম অদুনা, ঐখোয়না ঙাক-শেলগীদমক্তা পুথোকপা পোত্থোকশিংদা, ঐখোয়গী লান্মীশিংগী ৱাখল্লোন খন্দুনা পুথোকপা তাবনি। মসি ঐখোয়না মরোমদোম লেপচবা ঙম্লবা মতুংদা পাংথোকপা ঙমগনি।
মরুপশিং,
মমাংগী মতমদদি, লান অসি তোঙান-তোঙানবা মওংদা শোক্নরম্মি। ঙসিগী লাল্লোংনা অমুক্কা তোঙাল্লে। থাইনগী মতমদদি, লানগী খুৎলায় অনৌবা কয়া থোক্লকপদা চহি কয়া চঙলম্মি, ঙসিগী মতমদদি, মিৎনা কুপ্পদা অনৌবা খুৎশু-খুৎলায় কয়া থোক্নরে, অহোংবা লৈনরে। হৌজিক শিজিন্নরিবা খুৎলায় অমনা মতমগা চুনদবা ওইরকপদা মতম চঙদ্রে। তেক্নোলোজীদা য়ুম্ফম ওইবা খুৎলায়শিং অসিনা মতমগা চুনদবা ওইবা হেল্লি। ঐখোয়গী মতিক লৈবা আই.তি.গী শক্তিবু দিফেন্স সেক্তরদা ঐখোয়না শিজিন্নবা হেল্লিঙৈ, লৈবাক্কী ঙাক-শেলগী মতাংদা ঐখোয়না থাজবসু হেনগৎলক্কনি। খুদম ওইনা, সাইবর সেক্যুরিতীগী ৱাফম খন্নসি। মসিসু লানগী য়াম্না মরু ওইবা খুৎলায় অমা ওইরক্লে। মসিনা দিজিতেল মালেমদা খক্তা অকক্নবা ওইদ্রে অমসুং নেস্নেল সেক্যুরিতীগী হীরম অমসু ওইরক্লে।
মরুপশিং,
দিফেন্স সেক্তরদা মতম পুম্বদা করম্বা মওংগী চাংয়েংনবা লৈ হায়বসি অদোম্না হেন্না খঙনরবনি। মমাংগী মতমদদি, মীরমগী কম্পেনীদগী অয়াম্বা খুৎলায় লৈনরম্মি, মসিগী মতাংদা তোঙানবা মরাল কয়া শীরম্মি। ঐহাক্না মসিদা য়াম্না কুপথনা চঙবা পামদে। অদুবু, হায়রিবা থৌওং অসিদগী পামদবা ৱাফম কয়া থোকখি হায়বসিদি অচুম্বনি। তোঙান-তোঙানবা মেন্যুফেকচররশিংগী মরক্তা চেংয়েংনবা লৈরম্মি, মদুনা মরম ওইরগা অতোপ্পগী পোত্থোকপু ফৈ-ফত্তে হায়নবগী থৌওং লেপ্তনা চত্থখি। মসিনা চমম্নবসু থোকহল্লি, থাজদবসু লৈহল্লি, অদুগা শেঞ্জা থুমজাগী থোঙজাওসু হাংদোকই। করম্বা খুৎলায়না ফৈ নত্ত্রগা ফত্তে, করম্বনা ঐখোয়গা চান্নৈ নত্ত্রগা চান্নদে হায়বা ৱারোল কয়া থোকখি। মসিনা চমম্নবা য়াম্না থোকহল্লি। হায়রিবা থৌওংশিং অসি নীংথিনা খন্নরগা পাংথোকপনি। মসিগীদমক্তা কোর্পোরেৎকী মরক্তা লান থোক্নবগী থৌওংসু শরুক অমনি। হায়রিবা শিংনবা অসিসু আত্মানির্ভর ভারত অভিয়ান্না ৱারোইশিন পীগনি।
মরুপশিং,
ঐখোয়না ৱাখল চেৎনা খন্থদুনা ৱারেপ লৌরগা তুংলমচৎকীদমক্তা চঙশিল্লবদি, করি মহৈ ফংবা ঙমগনি। মসিগী অফবা খুদম অমদি ঐখোয়গী ওর্দিনান্স ফেক্তরীশিংদা উগনি। ঐখোয়গী ঙাক-শেলগী সেক্রেতরীনা মসিগী মতাংদা শন্দোক্না তাকপীখ্রে। মমাংগী চহিশিংদা ঐখোয়না অনৌবা দিফেন্স অন্দর্তেকিং ৭পু ইনকোর্পোরেত তৌখি। মখোয়না মশাগী কারবার মশক থোক্না পাংথোক্লি অমসুং অনৌবা মার্কেত কয়াদা য়ৌশিনবা ঙম্লি। মখোয়না এক্সপোর্তকী ওর্দরসু লৌরি। ঐখোয়না মমাংগী চহি ৫-৬তা দিফেন্স এক্সপোর্তপু শরুক ৬ হেন্না হেনগৎপা ঙমখিবসি য়াম্না নুংঙাইবা ৱাফম অমনি। ঙসিদি, ঐখোয়না লৈবাক ৭৫ হেনবদা ভারত্তা শাবা দিফেন্সকী খুৎলায় কয়া অমসুং সর্ভিস কয়া পীরি। সরকারনা মেক ইন ইন্দিয়াবু পুক্নিং থৌগৎপনা মরম ওইরগা, মমাংগী চহি ৭কী মনুংদা দিফেন্সকী পোত্থোক শানবগীদমক্তা অনৌবা ইন্দস্ত্রীএল লাইসেন্স ৩৫০ হেন্না পীখ্রে। অদুবু, ইং ২০০১দগী ২০১৪ ফাওবগী চহি ১৪গী মনুংদদি, শুপ্নতগী লাইসেন্স ২০০ খক্তমক পীখি।
মরুপশিং,
প্রাইভেৎ সেক্তরশিংনা দি.আর.দি.ও. অমসুং দিফেন্স পি.এস.য়ু.গা মান্নবা থাক্তা লৈনবা হোৎনগদবনি, মসিগীদমক্তা, দিফেন্স আর. এন্দ দি. বজেৎকী ২৫% অসি ইন্দস্ত্রী, স্তার্ত-অপ অমসুং একাদমিয়াগীদমক্তা খাক্লিবনি। বজেৎ অসিদা স্পিসিএল পর্পজ ভেহিকল মোদেলসু শীন-লাঙলি। মসিনা প্রাইভেত সেক্তরগী থৌদাংবু ভেন্দর নত্ত্রগা সপ্লাইয়রদগী হেন্দোক্তুনা পার্ত্নর অমা ওইহল্লগনি। ঐখোয়না স্পেস অমসুং দ্রোন সেক্তরদসু প্রাইভেৎ সেক্তরগীদমক্তা অনৌবা খুদোংচাবা কয়া লৈহল্লে। উত্তর প্রদেশ অমসুং তমিল নাদুদা দিফেন্স কোরিদোর শেম্বা, অমসুং মসিবু পি.এম. গতি শক্তি নেস্নেল মাস্তর প্লানগী মনুং চলহনবগী থৌওংনা লৈবাক্কী দিফেন্স সেক্তরবু তঙাই ফদবা মপাঙ্গল হাপকনি।
মরুপশিং,
ত্রাইএল, তেস্তিং অমসুং সর্তিফিকেসনগী নুং-পান ফাওনা উবা, মতমগী মনুং চনবা, তসেং-তসেংবা অমসুং কাঙলোন চুম্বা পথাপ অসি মতিক লৈবা দিফেন্স ইন্দস্ত্রী অমা ওইরকপদা মথৌ তাবশিংনি। মসিগীদমক্তা, মনীং মখা তম্বা পথাপ অমনা শিংনবা কয়াগী ৱারোইশিন পুরকপদা য়াম্না কান্নবা তেংবাংগনি। মসিদগী, তঙাই ফদবা স্কিল সেৎ পুথোকপদসু মতেং ফংগনি।
মরুপশিং,
লৈবাক্না অদোমগী মফমদা থাজবা য়াম্না থম্লি। ঙসিগী খন্ন-নৈনবা অসিনা দিফেন্স সেক্তরগী আত্মানির্ভরতাদা অনৌবা লম্বী তাক্কনি হায়বগী ঐহাক্না থাজবা থম্মি। ঐহাক্না ঙসি শাংলবা ৱারোল ঙাংনীংদে, অদোম স্তেকহোলদরশিংদগী পাউতাক ফংবা পাম্মি। ঙসিগী থৌরম অসিদি অদোমগীনি। অদোম্না থবক্তা ওন্থোকপা য়াবা ৱারোল পুদুনা লাকপীয়ু, পাউদম্বীয়ু। হৌজিক্তি ঐখোয়না বজেৎ পুথোকখ্রবনি, এপ্রিলদগী অনৌবা বজেৎ হৌরগনি, মসিগীদমক্তা শেম-শানবা ঐখোয়গী নাক্তা থা অমা মপুং ফানা লৈরি। এপ্রিল ১দগী হীরম খুদিংমক থবক্তা ওন্থোকপা হৌবা য়ানবা ঐখোয়না খোঙজেল য়াঙনা হৌজিক থবক তৌবা তাবনি। ঙসিগী থৌরম অসিসু মসিগীদমক্তা পাংথোক্লিবনি। ঐখোয়না বজেৎপু থা অমা মাংজৌননা পুথোক্নবা অনৌবা চৎনবী অমা শেম্লবনি। বজেৎপু থবক্তা ওন্থোক্ত্রিঙৈদা বিভাগ অমসুং স্তেকহোলদর খুদিংনা পব্লিক-প্রাইভেৎ পার্ত্নরশিপশিংবু নীংথিনা শেম শাবগী খুদোংচাবা ফংহনবা হায়বসি হায়রিবা খোঙথাং অসিগী পান্দম্নি। মসি ওইরবদি, মতম মাঙলরোই।থৌওং অসি লৈবাক নীংবগী থৌওংনি হায়না ঐহাক্না মীয়ামদা খঙহঞ্জনীংই। মসিদা করম্বা মতমদা শেন্দোং ফংগনি, কয়া য়াম্না ফংগনি হায়বসি কোন্না খন্নবীয়ু, লৈবাকপু অহানবদা মতৌ করম্না মপাঙ্গল লৈহনগদগে হায়বসি হান্না খন্নবীয়ু। ঐহাক্না পাউজেল পীজরি অমসুং ঐখোয়গী লান্মী, লান্মীগী মশা অহুম্না চাউরবা থাজবগা লোয়ননা হায়রিবা থবকশিং অসিদা মশাগী থৌদাং য়ারি, পুক্নিং থৌগৎলি হায়বসি খঙবদা ঐহাক্না য়াম্না নুংঙাইবা ফাওজৈ। ঐখোয়গী প্রাইভেৎ পার্তীশিংনা অসিগুম্বা খুদোংচাবা অসি মাঙহনগদবা নত্তে। ঐহাক্না অদোমগী মফমদা মসিদা য়াওশনবীনবা অমুক্কা হন্না পাউজেল পীজরি।
ঐহাক্না অদোম খুদিংবু অমুক্কা হন্না য়াইফ মঙ্গোল পীজবগা লোয়ননা অমুক্কা হন্না থাগৎচরি।
