ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
होर भई ऊने आलियो ! केमे हाल-चाल त्वाडा? ठीक-ठाक हो? मां चिंतपूर्णी, ते गुरू नानक देव जी, दे वंशजां दी, इश तरती नूँ, मेरा प्रणाम।
মরুপশিং.
গুরু নানকজীবু নীংশিংজরি, গুরুশিংবু নীংশিংজরি, মা চিন্তপুর্নীগী খুয়া খাদা পুনেমজরি, ধন্তেরস অমসুং তীপাৱলীগী মমাংদা হিমাচলদা লুপা করোর লিশিং কয়াগী খুদোল অমা পীজরি। ঙসি হিমাচলগী উনাদা দিৱালী মতম য়ৌদ্রিঙৈদা য়ৌরক্লে। মফম অসিদা দেবী স্বরুপা, ঐখোয়গী ইমা অমদি ইচে-ইচলশিংনা মশিং য়াম্না থোরক্তুনা ঐখোয়বু থৌজালবীবা লাক্লি। নখোয়গী থৌজাল অসি ঐখোয় পুম্নমক্কী অচৌবা থাজবনি, মসি য়াম্না চৌবা পাঙ্গলনি।
ইচিল-ইনাওশিং,
ঐহাক্না মফম অসিদা মতম শাংনা লৈরম্বনা ঐহাক্না উনাদা লাকপা খুদিংদা হৌখিবা মতমশিং অদু ঐহাক্কী মীৎমাংদা উরকই। ঐহাক্না মা চিন্তপুর্নী দেবীদা ইকোক নোন্না খুরুমজবা অমসুং থৌনবা ফংজবগী খুদোংচাবা কয়ারক ফংজবা অসি ঐহাক্কী লাইবক ফবনি। কনানা মফম অসিগী চু অমসুং গন্দয়ালীগী মহাও কাওবা ঙমগনি।
মরুপশিং,
হিমাচলদা লৈরিঙৈ মতমদা ঐহাক্না দেবভুমি অসিদা মহৌশানা ফজরবা থৌজাল অমা পীরি হাবনা মতম চুপ্পদা খন্দুনা লাকখি। তুরেলশিং, ঈশিং চাইবীশিং, লৈহাও চেনবা লমদম, লৌবুক, চীং, তুরিজম অসি শক্তি অদুক্কী মতিক লৈ অদুবু শীংনবা খরা উবনা ঐহাক্না মতম অদুদা নুংঙাইতবা পোকখি। ঐহাক্কী ৱাখল্দা নীংঙমদবগী ৱাখলনা থনখি। ঐহাক্না মতম অদুদা খনখি, হিমাচলদা কন্নেক্তিবিতী ফগৎলকপা নুমিৎতা, হিমাচলদা ইন্দস্ত্রীশিং হেনগৎলকপা নুমিৎতা, হিমাচলগী অঙাংশিংনা মখোয়গী মমা-মপাশিং, খুঙ্গংশিং, মরুপশিং থাদোক্তুনা চৎত্রবা নুমিৎ অদুদা হিমাচলদা নুমিৎ অদুদা অওনবা লাক্কনি।
অমসুং য়েংঙু ঙসি ঐহাক্না মফম অসিদা লাকপা অসিদা কন্নেক্তিবিতী, এজুকেসন ইন্সতিত্যুসনশিং অমসুং ইন্দস্ত্রিএলাইজেসনগা মরী লৈনবা থৌরম পাঙথোক্লি, ঐহাক্না চাউনা শেবা তৌনবা খুদোল অমা পুরক্লি। ঙসি লৈবাক অসিগী অনিশুবা বল্ক দ্রগ পার্ক্কী থবক মফম অসিদা উনাদা হৌররি। হৌজিক মীয়াম্না খন্থবীয়ু হিমাচলদা খুদোংচাদবা কয়ানা থল্লি, হিমাচল অসি নেচরেল দাইভর্সিতীশিংনা থল্লি অমসুং করিগুম্বা ভারত্তা বল্ক দ্রগ পার্ক অহুম অমসুং হিমাচলদা মসিগী মনুংদা অমা শারবদি মসিদগী হেন্না চাউবা খুদোল লৈখিগদ্রা? মসিদগী হেন্না চাউবা ৱারেপ লৈখিগদ্রা? মসি হিমাচলগীদমক ঐখোবদা ফাওরিবা মীনুংশি অমসুং ঐখোয়না কত্থোকপগী মহৈনি।
মীকুপ খরগী মমাংদা ঐহাক্না অম্ব-অন্দৌরাদগী দিল্লী ফাওবগী লৈবাক অসিগী মরিশুবা ভন্দে ভারত ত্রেন লমথাবগী খুদোংচাবা ফংজখি। খন্থদুনা য়েংবীয়ু, লৈবাক অসিগী মরিশুবা ভন্দে ভারত ত্রেন, ভারত অসি য়াম্না চাউই, অচৌবা সহর কয়া লৈ অদুবু মরিশুবা ত্রেন অসি হিমাচলদা পীরি। অমসং মরুপশিং ঐহাক্না খঙই মদুদি ঙসি অদোম্না ইমুং কয়া থেংনরবদি, লৈবাক্কী কাচিন কোয়াদগী থেংনরবদি মখোয়গী থমোয়না এয়রপোর্ত্তা চৎনীংবা পোক্কনি অমসুং এয়রপ্লেন য়েংনীংগনি, মদুদা ফমনীংগনি। অদুবু করিগুম্বা হিমাচলগুম্বা চীংদা লৈবা মীওইশিংদা হংবা তারবদি মমাংগী মীরোলশিংনা ত্রেন অমত্তা উরমখিরোই অমসুং মসিদা তোংবসু ফংদ্রি। অসিগুম্বা ফীভম অসিদা নীংতম্বা ফংলকপা চহি ৭৫শুরবা মতুংদা ফাওবা লৈরমখি। ঙসি হিমাচলদা ত্রেন খক্তা নত্তনা ভারতকী খ্বাইদগী নৌবা ত্রেন চেলহনখি অমসুং মসি মফম অসিদা মখা চত্থখিগনি।
ঙসি হিমাচলগী মশাগী আই.আই.আই.তি.গী পর্মিনেন্ত বিল্দিংসু শঙ্গাখ্রে। প্রোজেক্তশিং অসিনা দবল ইঞ্জিন সরকারনা হিমাচলবু উবা পাম্বা থাক অদু তাক্লি। প্রোজেক্তশিং অসিনা মরু ওইনা অনৌবা মীরোলশিং, হিমাচলগী হৌরক্লিবা মীরোলশিংগী মঙলানশিংবু অনৌবা পনখৈ য়ৌহল্লগনি। উনা, হিমাচল প্রদেশোউ প্রোজেক্তশিং অসিগীদমক নুংঙাইবা ফোঙদোকচরি।
মরুপশিং,
ঐখোয় পুম্নম্না তঙাই ফদবা অমসুং থাজবা অমসুং অনীংবশিংগী মরক্তা খেন্নবা অমা লৈ হায়বা খঙই। হিমাচলগী মমাংগী সরকারশিং অমসুং দিল্লীদা লৈরিবশিংনা নখোয়গী তঙাই ফদবশিং থুংহন্নবা মীৎয়েং চংখিদে অমসুং মখোয়না নখোয়গী থাজবা অমসুং অনীংবশিং খঙনবা হোৎনখি, মখোয়গী মরমদা খনখিদে। ঐহাক্কী হিমাচলনা মসিনা মরম ওইদুনা অচৌবা অমাং অমা মায়োক্নবা তাখি, মফম অসিগী হৌরক্লিবা মীরোল, ইমা, ইচে-ইচলশিংনা মসিগী চৈথেং নংখি।
অদুবু হৌজিক্তি মতম অসিদা হোংলে। ঐখোয়গী সরকারনা মীয়ামগী তঙাই ফদবশিং থুংহনবা খক্তা নত্তনা মীয়ামগী থাজবা অমসুং অনীংবশিং থুংহন্নবা মপুং ফাবা শক্তিগা লোয়ননা থবক তৌরি। মসিনা ঐঙোন্দা হিমাচলনা করি ফীভমদা লৈরমখিবগে নীংশিহল্লি, মফম অমত্তদা চাউখৎপগী মমি তারমখিদে। মফম খুদিংমক্তা থাজবা মাংবা, নীংঙমদবানা থনখি। মখোয়না চাউখৎ থৌরাংগী অৱাৎপশিং অসি মেনশিন্নবগী মতাংদা খনখিদে, নাথৈদুনা থমখি। ঐখোয়না অৱাৎপশিং মেনখৎখি অমসুং হৌজিক হিমাচলদা অনৌবা বিল্দিং কয়া শাগৎলি।
মরুপশিং,
মমাংগী চহিচা ফাওবদা মালেমগী লৈবাক কয়া অমসুং গুজরাতকুম্বা রাজ্য খরনা মাগী প্রজাশিংদা অমাংশঙশিং, খুঙ্গংগী লম্বীশিং অমসুং মোদর্ন হেল্থক্যেরগুম্বা তঙাই ফদবা খুদোংচাবশিং ফংহনখি। ভারত্তা অদুম ওইনমক মমাংগী সরকারনা মীচম প্রজাশিংদা তঙাই ফবশিং অসি ফংহনবা ফাওবা অৱাবা ওইখি। মসিগী চৈথেং চীংগী মফমশিংনা খ্বাইদগী চাউনা ফংখি। মফম অসিদা লৈরিঙৈদা ঐহাক্না মীরোলবী নুপীশিং অমসুং ইচে ইচলশিংনা লম্বী থোংগী ফীভম ফত্তবনা মরম ওইরগা লায়েংশঙদা চৎপদা অৱাবা কয়া মায়োক্নখি, অহল কয়ানা লায়েংশঙ য়ৌবা নংদনা অরোইবা য়াহিপ তানখি।
ইচিল-ইনাওশিং,
চীংশিংদা লৈরিবা মীওইশিংনা রেল কন্নেক্তিবিতী লৈতবনা মরম ওইদুনা মখোয় অসি মালেমদগী তোখাইতাবগী ৱাখল্লোন পোকখি। লোক, তুরেলনা মরাং কাইনা চেল্লিবা মফমদা থবক্নবা ঈশিংগীদমক মীয়াম্না অৱাবা মায়োক্নখি, তোতিগী ঈশিং ফংনবা হোৎনবদা মীওইশিং অসিনা অচৌবা শীংনবা কয়া মায়োক্নখি।
চহি কয়া মরম অসিদা সরকার পাইরম্বা মীওইশিংনা হিমাচলগী মীয়ামগী অৱাবা উখিদে। হৌজিক ঙসিদি অনৌবা ভারতনা অরিবা শীংনবশিং অসি কোকহন্নবা খোঙজেল য়াংনা হোৎনরি। মমাংগী চহিচাদা য়ৌগদবা খুদোংচাবশিং অদু মফম অসিগী মীয়ামদা হৌজিক খক্তা য়ৌরি।
অদুবু ঐখোয়না মসিদা লেপকদ্রা? হায়বীয়ু মরুপশিং, মাংদা চংশিনগদগ্রা চংশিল্লোইদ্রা? অমসং খোঙজেল য়াংনা খুমাং চাউশিনগদগ্রা চাউশিল্লোইদ্রা? কনানা থবক অসি তৌগনি? ঐহাক অমদি নখোয়না পুন্না তৌগনি। ঐখোয়না ২০শুবা চহিগী খুদোংচাবশিং পীগনি অমসুং ২১শুবা চহিচাগী মোদর্নিতীনা ঐহাক্কী হিমাচলবু শম্নহনগনি।
মরম অসিনা মমাংদা অমুক্তা ওইখিদ্রিবা মওংদা ঙসি হিমালচদা চাউখৎ থৌরাংগী থবক পাইখৎলি। ঙসি খুঙ্গংগী লম্বীশিং অসি খোঙজেল শরুক অনি য়াংনা শারি অমসুং ব্রোদবেন্দ কন্নেক্তিবিতী অসি গ্রাম পঞ্চায়তশিংদা য়ৌহল্লি। ঐখোয়গী সরকারনা ২১শুবা চহিচাগী ভারতকী অনীংবা অপাম্বশিং থুংহল্লি। ঙসি হিমাচলদা অমাংশঙ লিশিং কয়া শাখ্রে নাকল অমরোমদনা খুঙ্গং খুদিংমক্তা ইলেক্ত্রিসিতী সিস্তেম ফগৎহনখি। ঙসি হিমাচলদা মনুং হঞ্জিবা মফমশিংদা তঙাই ফবদা পোৎলমশিং য়ৌহন্নবা দ্রোনশিং শীজিন্নরি অমরোমদনা ভন্দে বারতগুম্বা ত্রেনশিং অসিনা খোঙজেল য়াংনা দিল্লী য়ৌহল্লি।
ঙসি নাকল অমরোমদা হিমাচলদা তোতি ঈশিং ফংহন্নবগী কেম্পেন চত্থরি অমরোমদনা সরকারগী সর্ভিস পুম্নমক কম্মন সর্ভিস সেন্তরগী খুত্থাংদা খুঙ্গং অমদগী খুঙ্গং অমদা য়ৌহল্লি। ঐখোয়না মীয়ামদা ২০শুবা চহিচাগী তঙাই ফদবশিং থুংহনবা খক্তা নত্তনা হিমাচলগী থোংজিন্দা ২১শুবা চহিচাগী মোর্দন ফেসিলিতীশিংসু দেলিভর তৌরি।
মরুপশিং,
হৌজিক হরোলীদা অচৌবা বল্ক দ্রগ পার্ক অমগী উরেপ-উয়ুং তমখি। জয়রামজীনা হায়খি, নুমিৎ খরগী মমাংদা নালাগর-বদ্দীদা মেদিকেল দিভাইস পার্ক্কী থবকসু হৌখ্রে। প্রোজেক্ত অনি অসিনা লৈবাক অসিদা অমদি মালেমদা হিমাচলগী মিং অসি ঙান্থোইহল্লগনি। হৌজিক দবল ইঞ্জিন সরকারনা বল্ক দ্রগ পার্ক অসিদা লুপা করোর ২০০০ থাদরি। হিমাচলগুম্বা অপীকপা রাজ্যদা প্রোজেক্ত অমগী লুপা করোর লিশিং অনি থাদরি তুংদা লাক্কদৌরিবা মতমশিংদা লুপা করোর লিশিং ১০ থাদরগনি। থাদরিবা করোর লিশিং খরা অসিনা হিমাচলগী উনাদা অওনবা পুরক্লগনি। মসিনা থবক্কী খুদোংচাবা পীরগনি অমসুং মীওই কয়াদা মশানা মশাদা থবক পীজনবগী খুদোংচাবশিং পীরগনি।
মরুপশিং,
মালেম পুম্বনা কোরোনাগী মনুংদা হিমাচলগী হীদাক-লাংথক্কী শক্তি উবা ফংখি। হিমাচলনা ভারতপু মালেমগী মকোক থোংবা ফার্মাস্যুতিজেক মেন্যুফেকচর্দ ওইহনবদা লৌবা থৌদাং মখা তানা হেনগৎলক্লি। হৌজিক ফাওবদা ঐখোয়না হীদাক-লাংথক্কী রো মেতরিএলশিংগীদমক মীরৈবাকশিংগী মীপাল তাংলি। হৌজিক হিমাচলদা রো মেতরিএলশিং ফংলবা মতমদা ফার্মাস্যুতিকেল ইন্দস্ত্রী অসি খুমাং চাউশিনগনি অমসুং হীদাক-লাংথকশিং অসি হেন্না মমল হোংদোরক্লগনি।
ঙসি সরকারনা আয়ুশ্মান ভারত স্কিমগী মীৎয়েং মখাদা জন ঔশাধি কেন্দ্রগী খুত্থাংদা লৈতা লায়রবশিংদা লুপা লাখ ৫ ফাওবগী লেম্না লায়েং ফংহল্লি। বল্ক দ্রগ পার্ক অসিনা মীয়ামদা ক্বালিতী লৈবা অমসুং অহোংবা মেদিকেল ক্যের পীনবা সরকারগী কেম্পেন হেন্না মপাঙ্গল কনখৎহল্লগনি।
মরুপশিং,
হিমাচলগী মীয়াম্না এগ্রিকলচর নত্ত্রগা ইন্দস্ত্রী ওইরবসু অফবা কন্নেক্তিবিতী লৈত্রবদি চাউখৎ খোঙচৎকী খোঙজেলদা শাহৌ পীবা ঙমলোই হায়বা অসি উবা ফংখ্রে। চহি ৪০গী মমাংদা অয়াবা পীখিবা অমসুং হৌজিক পাল্লিবা সরকার অসিনা থৱায় য়াওনা হোৎনদ্রিবা ফাওবা চহি ৪০ অসিদা খুমাং চাউশিনবগী মমি অমত্তা তারমখিদবা নানগল দাম-তলৱারা রেলৱে লাইন অসি খুদম অমনি। দবল-ইঞ্জিন সরকারনা হিমাচল প্রদেশ শিনবা থুংবদা রেলৱে কন্নেক্তিবিতী ফগৎহন্নবা হোৎনখি। অদুবু চহি কয়াগী মতুংদা লোইশিল্লদ্রবা অদু উবা ফংবা হৌরকখি। ঐখোয়না কেন্দ্রদা সরকার শেম্লবা মতুংদা রেলৱে লাইন অসিগী থবক খোঙজেল য়াংনা পাইখৎখি। করিগুম্বা মমাংদা থবক অসি পাইখৎলম্বা তারবদি উনাগী মীয়াম্না মসিদগী কয়া য়াম্না কানবা ফংলমগনি খন্থদুনা য়েংবীয়ু।
মরুপশিং,
দবল ইঞ্জিন সরকারনা হিমাচলদা রেলৱে সর্ভিস পাকথোক চাউথোক্নবা অমসুং মতমগা চুনবা ওইহন্নবা লেপ্পা লৈতনা হোৎন্দুনা লাকখি। ঙসি হিমাচলদা অনৌবা রেল প্রোজেক্ত অহুমগী থবক পাইখৎলি। ঙসি লৈবাক অসিবু লমদম অসিদা শাবা ভন্দে ভারত ত্রেনশিংনা শম্নহল্লি। লৈবাক অসিগী মাংজিল থারিবা রাজ্যশিংদা হিমাচলসু অমা ওইরি। ভন্দে ভারত এক্সপ্রেসনা নৈনাদেবী, মসিদা লৈরিবা চিন্তপুর্নী, জ্বালাদেবী, কাঙ্গরাদেবীগুম্বা ঐখোয়গী শেংলবা লাইফমকেনশিংদা লায়না চৎপা য়াহল্লগনি। গুরু নানক দেবজীগী চাদা নৌদা লৈরিবা উনাগুম্বা শেংলবা সহর অসিদা মসি মঙোন্দা পীবা দবল গিফনি।
ভন্দে ভারত ত্রেন অসিনা করতারপুর কোরিদোরগী খুত্থাংদা ঐখোয়গী সরকারনা তৌখিবা সর্ভিস অসি হেনগৎহল্লগনি। ভন্দে ভারত এক্সপ্রেসনা মা বৈস্নো দেবীগী দর্শনগীদমক চেনখি হৌজিক্না শক্তিপীথশিংদা মোদর্ন সর্ভিস ফংহল্লি। অতোপ্পা মফমশিংদা থবক তৌরিবা মরুপশিংদসু ভন্দে ভারত এক্সপ্রেসনা কান্নবা ফংহল্লগনি।
মরুপশিং,
হিমাচলদা হায়র এজুকেসন ইন্সতিত্যুসনশিং লৈহনবা হায়বা অসি হিমাচলগী নহারোলশিংনা মখোয়গী মহৈ মশিংগীদমক মঙজবা মঙলান ওইদুনা লাকখি। নহারোলশিংগী অনীংবশিং অসিদা মীৎয়েং চংখি। মমাংদা লৈরম্বা চৎনবী অদু ঐখোয়না শেমদোক্লি। পনবা, লেপ্পা, কাউথোকপা হায়বা অসি ঐখোয়গী মওং নত্তে। ঐখোয়না ৱারেপ লৌই, ফিরেপ লৌই, মদু থুংহল্লি অমসুং মহৈ য়ালহল্লি। মতম শাংনা হিমাচলদা লৈরিবা নহারোলশিংদা মমিং লৈবা হায়র এজুকেসনগী ইন্সতিত্যুসন ফংহনদনা লাক্লিবা অসিগী মরম করিনো? নহারোলশিংনা করিগীদমক মেদিসিন, ইঞ্জিনীয়রিং, বিজিনেস মেনেজমেন্ত, ফার্মাসী ফাওবা তম্নবগী য়ুমলোন্নরিবা রাজ্যশিংদা চৎপা তারিনো?
মরুপশিং,
মমাংগী সরকারনা মসিদা মীৎয়েং অমত্তা চংখিদে মরমদি মখোয়না হিমাচলগী মপাঙ্গলদা য়েংখিদে মখোয়না পার্লিয়ামেন্তগী সীত মশিং খক্তা উখি। মরম অসিনা হিমাচলনা আই.আই.তি., আই.আই.আই.তি., আই.আই.এম. অমসুং এম্স ফংনবা দবক ইঞ্জিন সরকার ঙাইবা তাবনি। ঙসি উনাগী আই.আই.আই.তি.গী পর্মিনেন্ত বিল্দিং অসিনা মহৈরোয়শিংদা হেন্না খুদোংচাহল্লগনি। হিমাচলগী ইচানুপা অমসুং ইচানুপীশিংনা মফম অসিদগী তম্বা লোইরগা থোরকপদা মসিনা হিমাচলগী দিজিতেল রিভোল্যুসনগী মপাঙ্গল ওইরগনি।
অমসুং নখোয়না আই.আই.আই.তি. বিল্দিং অসিগী উরেপ-উয়ুং তম্নবা ঐঙোন্দা খুদোংচাবা পীবিখি। ঐহাক্না উরেপ-উয়ুং তমখি অমসুং ঙসি মসিবু শঙ্গানবগী খুদোংচাবসু ঐঙোন্দা পীবিরি। মসি নুংঙাইবা অমনি। ঐখোয়না উরেপ-উয়ুং তমগনি ঐখোয়না মদুবু শঙ্গাগনি। অমসুং মসি দবল ইঞ্জিন সরকারনা থবক তৌবগী মওংনি। ঐখোয়গী সরকারনা লৌবা ফিরেপ অমা হেক্তদা মদু থুংহল্লি হায়না তাক্লি। ঐহাক্না লাইচৎনা মরম ওইদুনা অৱাবা কয়া মায়োক্নরবসু মতম চানা প্রোজেক্ত অসিবু লোইশিনবদা শরুক য়াখিবা মীয়াম্বু থাগৎপা ফোঙদোকচরি।
মরুপশিং,
নহারোলশিংগী স্কিল অমসুং তৌবা ঙম্বা অদু উৎথোকহনবা হায়বসি ঐখোয়গী খ্বাইদগী মরুওইবনি মরম অসিনা লৈবাক পুম্বদা স্কিল অমসুং ইনোবেসন ইন্সতিত্যুসনগী মথৌ তাই। মসি হিমাচল প্রদেশকী শুপ্নগী অহৌবনি। হিমাচলগী নহারোলশিনা আর্মীদা থবক তৌদুনা অমসুং লৈবাক অসিগী ঙাকশেলদা অনৌবা মায়োলশিং পীরি। হৌজিক্তি তোঙান তোঙানবা মখলগী স্কিলশিংনা আর্মীদসু মখোয়বু অৱাংবা মফম অমা কনবদা মতেং পাংলগনি। হিমাচল চাউখৎহন্নবগীদমক দবল ইঞ্জিন সরকারনা মতম চুপ্পদা নখোয়গীদমক লেপকনি।
মরুপশিং,
মংলানশিং অমসুং ৱারেপশিং অসি য়াম্না মতিক ময়াই লৈবা মতমদা মদুগা চাং মান্না খোঙথাংশিং লৌখৎলি। হায়রিবা হোৎনরিবশিং অসি দবল-ইঞ্জিন সরকারগী মোদেল লৈবা মফম খুদিংমক্তা উবা ফংই। মরম অসিনা হিমাচলগী মীয়াম্না অরিবা চৎনবীশিং হোংদোক্নবা ৱারেপ লৌখি। নখোয়না ৱারেপ লৌরব্রা? নখোয়না ৱারেপ লৌরব্রা? হৌজিক দবল ইঞ্জিন সরকার অসিনা অনৌবা পুৱারী অমা শেমলগনি অমসুং অনৌবা চৎনবী অমগা লোয়ননা থোরক্লগনি।
হিমাচল প্রদেশকী চাউখৎ-থৌরাংগী গোল্দন পেরিয়দ অসি আজাদী কা অমৃত মহোৎসবকী মনুংদা হৌরগনি হায়না ঐহাক্না থাজবা থম্মি। মসিগী গোল্দন পেরিয়দ অসিনা নখোয়না চহি দিকেদ কয়া ঙাইরক্লবা চাউখৎ থৌরাংগী অনৌবা পনখৈ অমদা পুরগনি। ঐহাক্না প্রোজেক্তশিং অসিগীদমক অমুক হন্না নুংঙাইবা ফোঙদোকচরি। ঐহাক্না য়াইফ মঙ্গোল পীজরি। অমসুং লাক্কদৌরিবা মরু ওইবা কুহ্মৈশীংগীদমক ঐহাক্না য়াইফ পাউজেলসু পীজরি।
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
থাগৎচরি!
