মহারাস্ত্রাগী রাজ্যপাল, শ্রী আচার্য দেবব্রতজী, মীয়াম্না পাম্নরবা মুখ্য মন্ত্রী, দেবেন্দ্র ফর্নবিসজী, কেন্দ্রগী মন্ত্রীমন্দলদা লৈরিবা ঐহাক্কী মরূপশিং, রামদাস অথৱালেজী, কে.আর. নাইদুজী অমসুং মুরলিধর মোহোলজী, মহারাস্ত্রগী উপ মুখ্য মন্ত্রীশিং, একনাথ শিন্দেজী অমসুং অজিত পৱারজী, অতোপ্পা মন্ত্রীশিং, ভারত্তা লৈবা জপানগী এম্বেসেদর, কীচি ওনোজী, অতোপ্পা শক্নাইরবা মীথুংলেনশিং, ইচিল-ইনাওশিং!
বিজয়াদশমী পাংথোকখ্রে, কোজাগিরি পূর্ণিমা লোইখ্রে, অমসুং হৌজিক, নুমিৎ ১০নিগী মতুংদা, ঐখোয়না দিৱালী পাংথোক্কনি। থৌরমশিং অসিগীদমক্তা ময়াম পুম্নমকপু ঐহাক্না থমোয় শেংনা য়াইফ-পাউজেল পীজরি।
মরুপশিং,
ঙসি অসি মুম্বাইগীদমক মতম শাংনা ঙাইদুনা লৈখিবগী অরোইবা নুমিৎনি। মুম্বাইদা হৌজিক অনিশুবা ইন্তর্নেস্নেল এয়রপোর্ত লৈরে। এয়রপোর্ত অসিনা লমদম অসিবু এসিয়াগী খ্বাইদগী চাউবা কনেক্তিবিতী হব অমা ওইনা লিংখৎপদা মরু ওইবা থৌদাং অমা লৌগনি। ঙসি, মুম্বাইদসু মপুং ফানা অন্দরগ্রাউন্দ মেত্রো লৈরে। মসিনা মুম্বাইদা চৎথোক-চৎশিন তৌবদা লাইথোকহল্লগনি অমসুং মীয়ামগী মতম কনবা ঙম্লগনি। মসিগী অন্দরগ্রাউন্দ মেত্রো অসি চাউখৎলক্লিবা ভারতকী মীৎনা উবা খুদম অমনি। মুম্বাইগুম্বা মী য়াম্না তিনবা সহর অমদা, পুৱারী ওইরবা বিলদিংশিংবু ঙাক-শেন্দুনা লৈহন্দুনা মসিগী অঙকপা মেত্রো অসি লৈনুংদা শাখ্রে। মসিগী শেমগৎ শাগৎপদা শরুক য়াখিবা শিন্মীশিং অমসুং ইঞ্জিনীয়র পুম্নমকপু ঐনা থাগৎপা ফোংদোকচরি।
মরুপশিং,
অনৌবা এয়রপোর্তশিং শেমগৎপা অমসুং উরান স্কিম মাই পাক্লকপগা লোইননা, মীয়ামদা অচৌবা খুদোংচাবশিং ফংহল্লে অমসুং মসিগা লোয়ননা ভারত অসি মালেমগী খ্বাইদগী চাউবা অহুমশুবা দোমেস্তিক এভিএসন মার্কেৎ ওইরক্লি। হৌজিক ঐখোয়গী এয়রলাইনশিং অসি লেপ্পা লৈতনা পাকথোক চাউথোক্লি। অমসুং মালেম শিনবা থুংনা লৈরিবা মীওইশিংনা এয়রক্রাফ মেন্যুফেকচরিং কম্পেনীশিংনা হৌজিক ভারতকী অনৌবা এয়রক্রাফ ১০০০গী ওর্দর লৈরে হায়বা খঙবদা থোইদোক্না অঙকপা ফাওই। অসিগুম্বা শাহৌ অসিনা পাইলোৎশিং, কেবিন ক্রুশিং, ইঞ্জিনীয়রশিং অমসুং গ্রাউন্দ পর্সনেলশিংগীদমক অনৌবা খুদোংচাবশিং লৈহল্লি।
মরুপশিং,
এয়রক্রাফ মশিং হেনগৎলকপগা লোয়ননা, মেনতেনেন্স অমসুং শেমজিনবগী দিমান্দসু হেনগৎলক্লি। মসিগীদমক্তা ঐখোয়না ভারত্তা অনৌবা মেনতেনেন্স, রিপ্যর অমসুং ওভরহোল (এম.আর.ও.)গী খুদোংচাবশিং শেমগৎলি। ঐখোয়গী পান্দমদি ভারত অসি দিকেদ অসিগী লোইশিল্লকপদা মালেমগী এম.আর.ও.গী মরুওইবা মফম অমা ওইনবনি। মসিনা ঐখোয়গী নহারোলশিংগীদমক থবক ফংহন্নবগী মশিং য়াম্লবা খুদোংচাবশিংসু পীরগনি।
মরুপশিং,
ঙসি ভারত অসি মালেমগী খ্বাইদগী নহা ওইরিবা লৈবাক ওইরে। ঐখোয়গী অশেংবা পাঙ্গল অসি ঐখোয়গী নহাশিংদা লৈ। মরম অসিনা ঐখোয়গী সরকারগী পোলিসী খুদিংমক্না নহারোলশিংগীদমক থবক ফংহন্নবগী খুদোংচাবশিং মশিং য়ামহন্নবা মীৎয়েং থম্লি। ইনফ্রাস্ত্রকচরদা অহেনবা ইনবেস্তমেন্ত লৈরকপা মতমদা, থবকশিং শেম্মী। ভাধবনগুম্বা পোর্ত অমা লুপা কোতি ৭৬,০০০গী ইনভেস্তমেন্তগা লোয়ননা শেমগৎলকপা মতমদা থবক ফংহল্লগনি। ললোন-ইতিক হেনগৎলকপা অমসুং লোজিস্তিক্স সেক্তরনা খোঙজেল য়াংখৎলকপা মতমদা, থবক ফংনবগী মশিং থিঙমদ্রবা খুদোংচাবশিং লৈরকই।
ইচিল ইনাওশিং,
নেস্নেল পোলিসী অসি রাজনিতীগী য়ুম্ফম ওইগদবনি হায়বা থাজবা অসিগা লোইননা ঐখোয়না চাউখৎলকখি। ঐখোয়গীদমক্তদি, ইনফ্রাস্ত্রকচরদা থাদরিবা শেনফম খুদিংমক অসি ঐখোয়গী নাগরিকশিংগী খুদোংচাবশিং অমসুং তৌবা ঙম্বশিং হেনগৎহন্নবা পাম্বৈ অমনি। অদুগা নাকল অমরোমদা, লৈবাক অসিদা মতম পুম্নমক্তা মীয়ামগী য়াইফনবগী মথক্তা মশাগী শক্তি অমসুং খুদোংচাবশিংবু মরুওইনা লৌরিবা রাজনিতীগী ঈচেল অমা লৈরি। মখোয় অসি দিবেলপমেন্ত প্রোজেক্তশিংদা অথিংবা পীরিবা, লল্লোন-ইতিক অমসুং স্কেমগী খুত্থাংদা খোংজেল তপথহল্লিবা মীওইশিংনি। চহী কয়াদগী, ঐখোয়গী লৈবাক অসিনা অসিগুম্বা রাজনিতীনা থোকহনবা অমাংবশিং অসি উদুনা লাক্লি।
মরুপশিং,
ঙসি শঙ্গাখিবা মেত্রো লাইন অসিনা মতম অমদা চাউখৎপগী লম্বীদা অপনবা ওইরম্বা মীওইশিংগী থৌওংশিং অদু ঐখোয়দা নিংশিংহল্লি। মুম্বাইগী ইমুং মিলিয়ন কয়াগী নুমিৎ খুদিংগী থেংনরিবা অৱা-অনাশিং অসি অথুবা মতমদা হন্থরক্কনি হায়বগী থাজবগা লোয়ননা উরেপ উয়ুং তম্বগী থৌরম অদুদা শরুক য়াখিবা ঐহাক্না নীংশিংলি। অদুবু তুংদা, অতেনবা মতমগী ওইনা অতোপ্পা সরকার অমা লাকখি অমসুং মখোয়না প্রোজেক্ত পুম্নমক লেপখি। মখোয়না শক্তি ফংখি, অদুবু লৈবাক অসিনা লুপা করোর লিশিং কয়া মাংখি, অমসুং মীয়াম্না চহী কয়া খুদোংচাদবা কয়া মায়োক্নখি। হৌজিক্তি, মসিগী মেত্রো লাইন অসি লোইশিল্লকপগা লোয়ননা, মতম অমদা পুং অনিদগী অনি মখাই ফাওবগী খোঙচৎ অমা হৌজিক্তি মিনিৎ ৩০দগী ৪০ খক্তমক চঙগনি। মিনিত খুদিংমক মরু ওইরিবা মুম্বাইগুম্বা শহর অমদা, মুম্বাইগী মীওইশিংবু চহি অহুম নৎত্রগা মরিগী ওইনা মসিগী ফেসিলিতী অসি ফংহন্দবা অসি অচৌবা শিংনবা অমনি।
মরুপশিং,
হৌখিবা চহি ১১ অসিদা ঐখোয়না মীৎয়েং থম্লিবা অসি নাগরিকশিংগী পুন্সি মহিং লায়থোকহনবা, হিংবদা লাইবা হেনগৎহনবনি। মসিনা মরম ওইদুনা ইনফ্রাস্ত্রকচরগী মওং খুদিংমক্তা, রেল, লম্বী, এয়রপোর্ত, মেত্রো অমসুং ইলেক্ত্রিক বসতা, মমাংদা অমুক্তা ওইখিদ্রিবা মওংদা ইনভেস্তমেন্ত তৌরি। অতল সেতু অমসুং কোস্তেল রোদকুম্বা প্রোজেক্তশিং শাখ্রে।
মরুপশিং,
ঐখোয়না ত্রান্সপোর্তকী পাম্বৈ পুম্নমকপু অমগা অমগা পুনশিন্নবা হোৎনরি। ঐখোয়না হোৎনরিবদি মীশিংনা ত্রান্সপোর্তকী পাম্বৈ অমদগী অমদা ওন্থোকপা মতমদা খুদোংচাদবা লৈহন্দনবা, তংদু লৈতানা চৎথোক-চৎশিন তৌনবা হোৎনবনি। ঙসিদি, লৈবাক অসিনা "ৱান নেসন, ৱান মোবিলিতী"গী মিৎয়েংগী মায়কৈদা চংশিল্লি। মুম্বাই ৱান এপ অসি মসিগী মাইকৈ অসিদা অতোপ্পা খোংথাং অমনি। হৌজিক্তি, মুম্বাইগী মীয়াম্না টিকেৎশিং ফংনবগীদমক অশাংবা মথং-মনাওদা লেংদনা লৈরররোই। মুম্বাই ৱান এপকী খুত্থাংদা, নহাক্না অমুক্তা টিকেৎ অমা লৈদুনা লোকেল ত্রেন, বস, মেত্রো, নৎত্রগা তেক্সিদা চৎপা য়াগনি।
মরুপশিং,
মুম্বাই অসি ভারতকী ফাইনান্সিএল কেপিতেল ওইবতা নত্তনা মসিগী খ্বাইদগী ভাইব্রেন্ত ওইবা শহরশিংগী মরক্তসু অমনি। মসিনা মরম ওইদুনা, তেরোরিস্তশিংনা ২০০৮দা মুম্বাইবু অচৌবা এতেক্কীদমক খনখি। অদুবু মতম অদুদা লৈঙাক পায়রিবা কংগ্রেস সরকারনা খুদোংচাদবা, তেরোরিজমগী মমাংদা খুদোংচাবা পীবগী পাউজেল অমা পীখি। হৌজিক্তি, লৈবাক অসিগী হোম মিনিস্তর ফাওবা ওইরম্লবা কংগ্রেসকী মকোক থোংবা লুচিংবা অমনা ইন্তর্ভিয়ু অমদা অচৌবা ৱাফম অমা ফোঙদোকখ্রে। মহাক্না হায়খি মদুদি ঐখোয়গী আর্মদ ফোর্সেসনা মুম্বাইগী এতেক্কী মতুংদা পাকিস্তান্দা লান্দানবা শেম-শাখি। মতম অদুদা লৈবাক শীনবা থুংনা মসি পাম্মি। অদুবু কংগ্রেসকী লুচিংবা অদুগী মতুং ইন্না, মতমদুগী কংগ্রেস সরকারনা ভারতকী লান্মীশিংবু অতোপ্পা লৈবাক অমগী প্রেসরনা মরম ওইদুনা পাকিস্তান্দা লান্দাবদগী থিংখি। মপানগী প্রেসরগী মখাদা ৱারেপ অদু কনানা লৌখিবগে অমসুং মুম্বাই অমসুং লৈবাক অসিগী পুক্নিং ৱাখল্লোনগা কনানা শান্নখিবগে হায়বদু কংগ্রেসনা ঐখোয়দা তাক্কদবনি। লৈবাক অসিনা খঙনবগী হক লৈ। কংগ্রেসকী অশোনবা অসিনা তেরোরিস্তশিংবু মপাঙ্গল কনখৎহনখি অমসুং নেস্নেল সেক্যুরিতীবু মপাঙ্গল হন্থহনখি।
মরুপশিং,
ঐখোয়গীদমক্তদি, লৈবাক অমসুং মসিগী মীয়ামগী সেক্যুরিতীগী মথক্তা করিগুম্বা অমত্তা লৈতে। ঙসিগী ভারতনা মসিগী চপ চাবা পাউখুম পীরি। ঙসিগী ভারতনা মশাগী লমদমগী মনুংদা লৈবা য়েক্নববু লান্দারক্লি। ওপরেসন সিন্দুরগী মতমদা মালেমনা উখি অমসুং চাউথোকচবা ফাওখি।
মরুপশিং,
লায়রবশিং, নিও মিদল ক্লাস নৎত্রগা মিদল ক্লাস ওইগেরা, মখোয়গী এম্পাৱরমেন্ত অসি ঙসিগী নেস্নেল প্রাইওরিতিনি। ইমুংশিং অসিনা খুদোংচাবা অমসুং ইকায় খুম্নবা ফংলকপা মতমদা, মখোয়গী তৌবা ঙম্বশিং হেনগৎলকই। মপাঙ্গল কনখৎলবা নাগরিকশিংনা লৈবাক অসিবু মপাঙ্গল কনখৎহল্লি। নেক্স জেনরেসন জি.এস.তি.গী রিফোর্মশিং অমসুং মমল হন্থবনা মীয়ামগী পোৎ লৈবগী শক্তি হেনগৎহনখ্রে। কৈথেলগী ফিগরশিং উৎলি মদুদি চহি কয়াগী মমাংগা চংদম্নবদা হন্দক্কী নবরত্রিদা রেকোর্দ কয়া অমা থুগাইখ্রে। মশিং য়াম্লবা মীওইশিংনা স্কুতর, বাইক, টিভি, ফ্রিজরেতর অমসুং ৱাশিং মেছিনশিং লৈরি।
মরুপশিং,
ঐখোয়গী সরকারনা মীয়ামগী পুন্সি ফগৎহন্নবা অমসুং লৈবাক অসিবু মপাঙ্গল কনখৎহন্নবা খোঙথাং খুদিংমক লৌখৎকনি। অদুম ওইনমক ঐহাক্না অদোমদা হায়জবা অমা লৈ: স্বদেশী (লৈবাক্কী পোত্থোকশিং) শিজিনবিয়ু। ইকাই খুম্নবগা লোয়ননা হায়বিয়ু: "মসি স্বদেশীনি!" মসি য়ুমথোং খুদিংমক্তা অমসুং কৈথেল খুদিংমক্তা মন্ত্র ওইহল্লু। নাগরিক খুদিংমক্না ভারতনা শাবা পোৎশক অমসুং খোংউপশিং লৈরবদি, স্বদেশী পোৎলমশিং য়ুমদা পুরক্লবদি, অমসুং খুদোংচাবা পীরকপা মতমদা স্বদেশী পোৎলমশিং খল্লদি, লৈবাক অসিগী শেনফম অসি লৈবাক অসিগী মনুংদা লৈগনি। মসিনা ভারতকী শিন্মীশিংদা থবক পীগনি অমসুং ভারতকী নহারোলশিংদা থবক পীগনি। লৈবাক শীনবা থুংনা স্বদেশী চৎনহনবা মতমদা, ভারতকী শক্তি অসি কয়া য়াম্না হেনগৎলক্কদগে হায়বদু খল্লু!
মরুপশিং,
মহারাস্ত্রনা মতম পুম্নমক্তা লৈবাক অসিগী চাউখৎ থৌরাংগী লমদা মাংজিল থানা চংশিল্লি। এন.দি.এ.গী দবল-ইঞ্জিন সরকারনা মহারাস্ত্রাগী শহর খুদিংমক্কী অমসুং খুঙ্গং খুদিংমক্কী শক্তি হেনগৎহন্নবা লেপ্পা লৈতনা থবক তৌগনি। ঐহাক্না অমুক্কা হন্না অদোম পুম্নমকপু চাউখৎ-থৌরাংগী প্রোজেক্তশিং অসিগীদমক থমোয় শেংনা নুংঙাইবা ফোংদোকচরি অমসুং তুংলমচৎকীদমক য়াইফ পাউজেল পীজরি। হৌজিক, ঐহাক্কা লোয়ননা হায়বিয়ু: ভারত মাতা কী জয়! খুৎ অনিমক থাংগৎলু অমসুং মসিগী মাইপাকপগী থৌরম অসি নুংঙাইবা ফোঙদোকপীয়ু!
মরুপশিং,
মহারাস্ত্রনা মতম পুম্নমক্তা লৈবাক অসিগী চাউখৎ থৌরাংগী লমদা মাংজিল থানা চংশিল্লি। এন.দি.এ.গী দবল-ইঞ্জিন সরকারনা মহারাস্ত্রাগী শহর খুদিংমক্কী অমসুং খুঙ্গং খুদিংমক্কী শক্তি হেনগৎহন্নবা লেপ্পা লৈতনা থবক তৌগনি। ঐহাক্না অমুক্কা হন্না অদোম পুম্নমকপু চাউখৎ-থৌরাংগী প্রোজেক্তশিং অসিগীদমক থমোয় শেংনা নুংঙাইবা ফোংদোকচরি অমসুং তুংলমচৎকীদমক য়াইফ পাউজেল পীজরি। হৌজিক, ঐহাক্কা লোয়ননা হায়বিয়ু: ভারত মাতা কী জয়! খুৎ অনিমক থাংগৎলু অমসুং মসিগী মাইপাকপগী থৌরম অসি নুংঙাইবা ফোঙদোকপীয়ু!
ভারত ইমানা য়াইফরে!
ভারত ইমানা য়াইফরে!
পুম্নমকপু থাগৎচরি।
