মন্ত্রীমন্দলদা ঐহাক্কী মরুপ শ্রী জি. কিশান রেদ্দিজী; অন্ধ্র প্রদেশকী ইন্দস্ত্রী মন্ত্রী, শ্রী তি. জি. ভারতজী; ইন-স্পেসকী চেয়রমেন, শ্রী পৱন গোয়েঙ্কাজী; স্কাইরুৎ তীম; অতৈ মশক নাইবা মীওইশিং; নুপী অমসুং নুপাশিং!
মরুপশিং,
ঙসি লৈবাক অসিনা স্পেস সেক্তরদা মমাংদা অমুক্তা ওইখিদ্রিবা খুদোংচাবা অমা উবা ফংলি। ঙসি ভারতকী স্পেস ইকোসিস্তেমদা প্রাইবেৎ সেক্তরনা অচৌবা খোংজং অমা চংশিল্লি। স্কাইরুৎকী ইনফিনিতী কেম্পস অসিনা ভারতকী অনৌবা ৱাখল্লোন, ইন্নোবেসন অমসুং মরুওইনা নহাশিংগী শক্তি উৎলি। ঐখোয়গী নহাশিংগী ইন্নোবেসন, রিস্ক লৌবা ঙম্বা অমসুং ওন্তপ্রিন্যুওরশিপ অসিনা ঙসি অনৌবা অৱাংবা থাক্তা য়ৌরে। ঙসিগী থৌরম অসি লাক্কদৌরিবা মতমশিংদা ভারতনা মালেমগী সেতেলাইত থাগৎপগী ইকোসিস্তেমদা লুচিংবা অমা ওইনা থোরক্লগনি। ঐহাক্না পৱন কুমার চন্দনা অমসুং নাগা ভারত দাকাবু থম্মোয় শেংনা নুংঙাইবা ফোংদোকচরি। নহা ওইরিবা স্পেস ওন্তপ্রিন্যুওর কয়া অমসুং লৈবাক অসিগী নহা ওইরিবা মীওই খুদিংমক্কীদমক নখোয় অনিমক অসি অচৌবা ইথিল অমনি। অদোম্না ইশাদা থাজবা থমখি, অদোম্না রিস্ক লৌবদা থিংখিদে। অমসুং ঙসিদি লৈবাক পুম্বনা মদুগী মহৈ অদু উবা ফংলি। লৈবাক অসিনা নখোয়গীদমক চাউথোকচরি।
মরুপশিং,
ভারতকী স্পেস খোঙচৎ অসি য়াম্না অকক্নবা রিসোর্সশিংগা লোয়ননা হৌখি। অদুবু ঐখোয়গী অপাম্বা অসি লোইবা নাইখিদে। মতম অমদা ঐখোয়না রোকেতকী শরুকশিং সাইকলদা পুদুনা চৎখি। ঙসিদি ভারতনা উৎলে মদুদি মঙলানগী অৱাংবা অসি রিসোর্সশিংনা নত্তে, ৱারেপনা লেপ্পি। ভারতকী স্পেস খোঙচৎতা চহি তরাগী খুজিং কয়াদগী ইসরোনা অনৌবা শাফু পীরি। ভারতনা মশাগী ওইবা থাজবা, মপাঙ্গল অমসুং ভেল্যুগী মওং মতৌদা তোপ তোপ্পা মশক অমা শেমখ্রে।
মরুপশিং,
ঐখোয়না পুম্নমক্না খঙই মদুদি স্পেস সেক্তর অসি অহোংবা লাক্লিবা মতম অসিদা য়াম্না থুনা চাউখৎলক্লি। মসিনা কম্ম্যুনিকেসন, এগ্রিকলচর, মেরিন মোনিতরিং, অর্বান প্লানিং, ৱেদর প্রিদিক্সন, অমসুং নেসনেল সেক্যুরিতীগী য়ুম্ফম ওইরে। মসিনা মরম ওইদুনা ঐখোয়না ভারতকী স্পেস সেক্তরদা পুৱারী ওইরবা রিফোর্মশিং পায়খৎলে। সরকারনা স্পেস সেক্তরবু প্রাইবেৎ ইন্নোবেসনগীদমক হাংদোকখি অমসুং অনৌবা স্পেস পোলিসী অমা শেমখি। ঐখোয়না ইন্নোবেসনগা লোইননা স্তার্তঅপশিং অমসুং ইন্দস্ত্রীবু শম্ননবা হোৎনখি। ঐখোয়না ইন-স্পেস লিংখৎখি অমসুং ঐখোয়গী স্তার্ত-অপশিংদা ইসরোগী খুদোংচাবশিং অমসুং তেক্নোলোজী ফংহনখি। হৌখিবা চহি 6-7 অসিদা, ভারতনা মসিগী স্পেস সেক্তরবু ওপন, কোওপরেতিব, অমসুং ইন্নোবেসন দ্রিভন ইকোসিস্তেম অমদা ওন্থোকখ্রে। ঙসিগী থৌরম অসিনা ঐখোয়দা মসিগী মতাংদা খরা উৎলি, অমসুং ঐখোয়দা চাউথোকচবা পোকহল্লি।
মরুপশিং,
ভারতকী নহারোলশিংনা মতম পুম্নমক্তা লৈবাক্কী অপাম্ববু অতৈ পুম্নমক্তগী হেন্না মরু ওইহল্লি। মখোয়না খুদোংচাবা খুদিংমক খ্বাইদগী ফবা মওংদা শিজিন্নৈ। সরকারনা স্পেস সেক্তর হাংদোকপা মতমদা, ঐখোয়গী নহারোলশিং, মরু ওইনা জেনরেসন-জেদ নহারোলশিংনা মদুগী মপুং ফানা কান্নবা লৌনবা মাংলোমদা চংশিনখি। ঙসি, ভারতকী স্পেস স্তার্ত-অপ 300 হেনবনা ভারতকী স্পেস খোঙচৎকী তুংলমচৎতা অনৌবা আশা অমা পীরি। অখন্নবা ৱাফম অমদি ঐখোয়গী স্পেস স্তার্তঅপ অয়াম্বনা য়াম্না অপীকপা তীমশিংগা লোয়ননা হৌরকপনি। অমসুং ঐহাক্না হৌখিবা চহি 5-6 অসিদা মখোয় কয়াগা উন্নবগী খুদোংচাবা ফংখি। করিগুম্বা মতমদা মীওই অনি খক্তমক লৈরম্মি, করিগুম্বা মতমদা মীওই মঙা, মখোয়না অপীকপা অশানবা কা অমদা লৈমিন্নরম্মি। তীমশিং অসি অপীকপা, রিসোর্সশিংদি মশিং য়ামদে, অদুবু মখোয়গী এম্বিসনশিংদি য়াম্না ৱাংনা লৈরি। মসি ভারতকী প্রাইবেৎ স্পেস রিভোলুসনবু পোকহনখিবা স্পিরিৎ অদুনি। ঙসিদি, জেনরেসন জেৎকী ইঞ্জিনীয়রশিং, জেনরেসন জেৎকী দিজাইনরশিং, জেনরেসন জেৎকী কোদরশিং, অমসুং জেনরেসন জেৎকী সাইন্তিস্তশিংনা অনৌবা তেক্নোলোজীশিং শেমগৎলি। প্রোপলজন সিস্তেম, কম্পোজিৎ মেতরিএল, রোকেৎ স্তেজ, নৎত্রগা সেতলাইত প্লেৎফোর্ম ওইগেরা, ভারতকী নহাশিংনা চহি খরগী মমাংদা থাজরমদব লমশিংদা থবক তৌরি। ভারতকী প্রাইবেৎ স্পেস তেলেন্তনা মালেম শিনবা থুংনা মশক থোকপা মশক অমা শেমগৎলি। ঙসি ভারতকী স্পেস সেক্তর অসি মালেমগী ইনভেস্তরশিংগীদমক্তা য়াম্না পাম্নবা মফম অমা ওইরক্লি।
মরুপশিং,
ঙসিদি, মালেম শিনবা থুংনা অপীকপা সেতেলাইৎশিংগী দিমান্দ লেপ্তনা হেনগৎলক্লি। থাগৎপগী ফ্রিক্বেন্সী হেনগৎলক্লি, অমসুং অনৌবা কম্পনীশিংনা সেতেলাইত সর্ভিসকী লমদা চঙশিল্লক্লি। অমসুং স্পেসনা হৌজিক্তি মশাবু স্ত্রেতেজিক এসেৎ অমা ওইনা মশক তাক্লে। মরম অদুনা, মালেমগী স্পেস ইকোনোমী অসি লাক্কদৌরিবা চহিশিংদা শরুক কয়া হেনগৎহল্লগনি। মসি ভারতকী নহারোলশিংগীদমক অচৌবা খুদোংচাবা অমনি।
মরুপশিং,
স্পেস সেক্তরদা ভারতনা তৌবা ঙম্বা অসি মালেমগী লৈবাক খরা খক্তদা লৈ। ঐখোয়গী এক্সপর্ত ইঞ্জিনীয়রশিং, অৱাংবা থাক্কী মেন্যুফেকচরিং ইকোসিস্তেম, মালেমগী থাক্কী লোঞ্চ সাইতশিং অমসুং ইন্নোবেসনবু পুক্নিং থৌগৎপা ৱাখল্লোন লৈ। ভারতকী স্পেস কেপাসিতী অসি শেল চংদবা অমসুং থাজবা য়াবা অনিমক ওইরি। মসিনা মরম ওইদুনা মালেম অসিনা ভারতকী মায়কৈদগী য়াম্না চাউনা আশা তৌরি। মালেমগী কম্পনীশিংনা ভারত্তা সেতেলাইত পুথোকপা পাম্মি, ভারত্তগী লোঞ্চ সর্ভিস লৌবা পাম্মি, অমসুং ভারতকা তেক্নোলোজী পার্তনরশিপ তৌবা পাম্মি। মরম অদুনা, ঐখোয়না হৌজিক্কী তাঙ্কক অসিবু খ্বাইদগী ফবা ওইহনগদবনি।
মরুপশিং,
ঙসি ঐখোয়না স্পেস সেক্তরদা উরিবা অহোংবশিং অসি ভারত্তা থোক্লিবা স্তার্ত অপ রিভোলুসনগী শরুক অমনি। হৌখিবা চহি তরা অসিদা তোঙান তোঙানবা সেক্তরশিংদা স্তার্তঅপশিংগী অনৌবা ৱেব অমা থোরক্লে। ফিনতেক, এগ্রীতেক, হেল্থতেক, ক্লাইমেৎতেক, এদুতেক নৎত্রগা দিফেন্স তেক ওইগেরা, ভারতকী নহাশিং, ঐখোয়গী জেনরেসন-জেদ,না হীরম খুদিংমক্তা অনৌবা সোলুসনশিং পুথোক্লি। অমসুং ঙসি, ঐহাক্না মালেমগী জেনরেসন জেদতা থাজবা থম্বা য়াই মদুদি করিগুম্বা মখোয়না অশেংবা ইন্সপিরেশন অমা পাম্লবদি, মখোয়না মদু ভারতকী জেনরেসন জেদতগী ফংগনি। ভারতকী জেন-জেদকী ক্রিএতিভিতি, মখোয়গী পোজিতিব মাইন্দসেৎ অমসুং মখোয়গী কেপাসিতী বিল্দিং অসি মালেম শীনবা থুংনা জেন-জেদকী মোদেল অমা ওইরকপা য়াই। ঙসি ভারত অসি মালেমগী খ্বাইদগী চাউবা অহুমশুবা স্তার্তঅপ ইকোসিস্তেম ওইরে। মতম অমদা স্তার্ত-অপশিং অসি অচৌবা শহর খরা খক্তদা য়ুম্ফম ওইরম্মি। অদুবু ঙসিদি, ভারতকী খ্বাইদগী পীকপা শহর অমসুং খুঙ্গংশিংদগী স্তার্তঅপশিং থোরক্লি। ঙসিদি, লৈবাক অসিদা স্তার্তঅপ লাখ 1.5 হেন্না রেজিস্তর তৌখ্রে, অমসুং কয়া অমদি য়ুনিকোর্ন ওইখ্রে।
মরুপশিং,
ঙসিদি, ভারত অসি এপশিং অমসুং সর্ভিসশিং খক্তদা অকক্নবা ওইদ্রে। জে-জেন্দনা মতেং পাংবদগী ঐখোয়না য়াম্না থুনা দিপ-তেক, মেন্যুফেকচরিং অমসুং হার্দৱায়র ইন্নোবেসনগী মায়কৈদা চংশিল্লি। খুদম ওইনা সেমিকন্দক্তর সেক্তরদা য়েংসি। সরকারনা লৌখৎলিবা পুৱারী ওইরবা খোংথাংশিং অসিনা ভারতকী তেক্নোলোজীগী তুংলমচৎকী য়ুম্ফম অদু মপাঙ্গল কনখৎহল্লি। সেমিকন্দক্তর ফ্যাব্রিকেসন য়ুনিৎশিং, চিপ মেনুফেকচরিং অমসুং দিজাইন হবশিং লৈবাক অসিদা য়াম্না থুনা চাউখৎলক্লি। চিপশিংদগী হৌরগা অপুনবা সিস্তেম ফাওবদা, ভারতনা মপাঙ্গল কনবা ইলেক্ত্রোনিক্স ভেল্যু চেন অমা শেমগৎলি। মসি ঐখোয়গী মশা-মরোমদোম লেপচবগী ৱারেপ অদুগী শরুক অমনি অমসুং মসিনা ভারতপু মালেমগী সপ্লাই চেনগী মপাঙ্গল কনবা অমসুং থাজবা য়াবা য়ুম্বী অমা ওইহল্লগনি।
মরুপশিং,
ঐখোয়গী রিফোর্মশিংগী স্কোপ অসি লেপ্পা লৈতনা পাকথোক চাউথোক্লি। ঐখোয়না স্পেস ইন্নোবেসনবু প্রাইবেৎ সেক্তরদা হাংদোকখিবগুম্না, ঐখোয়না হৌজিক অতোপ্পা য়াম্না মরু ওইবা সেক্তর অমদা খোঙথাং কয়া অমা লৌখৎলি। ঐখোয়না ন্যুক্লিয়র সেক্তর অসিসু হাংদোক্নবা হোৎনরি। ঐখোয়না হীরম অসিদা প্রাইবেৎ সেক্তরগী মপাঙ্গল কনবা থৌদাং লৌনবগী য়ুম্ফমসু শেমগৎলি। মসিনা অপীকপা মোদ্যুলর রিএক্তরশিং, এদভান্স রিএক্তরশিং, অমসুং ন্যুক্লিয়র ইন্নোবেসনদা খুদোংচাবা কয়া অমা পীগনি। রিফোর্ম অসিনা ঐখোয়গী ইনর্জী সেক্যুরিতী অমসুং তেক্নোলোজিকেল লিদরশিপদা অনৌবা পাঙ্গল পীগনি।
মরুপশিং,
তুংলমচৎ অসি করম্না ওইগনি হায়বসি ঙসি পাংথোক্লিবা রিসর্চকী মখা পোল্লি। মরম অসিনা ঐখোয়গী সরকারনা নহারোলশিংদা রিসর্চকী খুদোংচাবা খ্বাইদগী হেন্না পীবদা অকনবা মীৎয়েং চংলি। ঐখোয়না নেস্নেল রিসর্চ ফাউন্দেসন লিংখৎলে, মসিনা নহাশিংবু মোদর্ন রিসর্চতা মতেং পাংই। "ৱান নেসন, ৱান সবস্ক্রিপ্সন"না মহৈরোয় পুম্নমক্কীদমক ইন্তর্নেস্নেল জর্নেলশিং ফংহনবা লায়থোকহল্লে। লুপা করোর লাখ 1গী রিসর্চ, দিবেলপমেন্ত অমসুং ইন্নোবেসন ফন্দ অসিনা লৈবাক শিনবা থুংনা লৈরিবা নহাশিংদা চাউনা মতেং পাংগনি। ঐখোয়না অতল তিঙ্করিং লেব 10,000 হেন্না হৌদোক্লে। মখোয়না মহৈরোয়শিংগী মরক্তা রিসর্চ অমসুং ইন্নোবেসনগী ৱাখল্লোন পুক্নিং থৌগৎলি। ঐখোয়না অথুবা মতমদা অনৌবা অতল তিঙ্করিং লেব 50,000 লিংখৎনবা থবক পায়খৎলি। সরকারনা পায়খৎলিবা থবকশিং অসিনা ভারত্তা অনৌবা ইন্নোবেসনশিংগী য়ুম্ফম শেমগৎলি।
মরুপশিং,
লাক্কদৌরিবা মতম অসি ভারতকীনি, ভারতকী নহারোলশিংগীনি, ভারতকী ইনোভেসনশিংগীনি। থা খরগী মমাংদা, ঐহাক্না স্পেস দেগী থৌরমদা ঐখোয়গী স্পেস এস্পিরেসনশিংগী মতাংদা ৱা ঙাংখি। লাক্কদৌরিবা চহি মঙা অসিদা ভারতনা মাগী লাঞ্চিং কেপাসিতী অসি অনৌবা অৱাংবা থাক্তা পুখৎকনি হায়না ঐখোয়না ৱারেপ লৌখি। ভারতকী স্পেস সেক্তরদগী অনৌবা য়ুনিকর্ন মঙা থোরক্কনি হায়না ঐখোয়না ৱারেপ লৌখি। স্কাইরুৎকী তীমনা মাংলোমদা চংশিল্লিবা খোঙথাংশিং অসি য়েংলগা, ভারতনা মাগী পান্দম পুম্নমক ফংবা ঙমগনি হায়বসি থাজৈ।
মরুপশিং,
ঐহাক্না ভারতকী নহা ওইরিবা, স্তার্তঅপ, সাইন্তিস্ত, ইঞ্জিনীয়র, অমসুং ওন্তপ্রিন্যুওর, অমসুং ঐহাক্কী নহা ওইরিবা মরুপশিং পুম্নমক্তা থাজবা পীজরি অমসুং মসি ঐহাক্কী গরেন্তীনি: সরকারনা অদোমগী খোঙথাং খুদিংদা মতেং পাংগনি। ঐহাক্না অমুক্কা হন্না স্কাইরুৎ তীম পুম্নমক্তা নুংঙাইবা ফোংদোকচরি। ঐহাক্না ভারতকী স্পেস খোঙচৎতা অনৌবা থৌনা পীরিবশিং পুম্নমক্তা য়াইফ-পাউজেল পীজরি। লাকপীয়ু, 21শুবা চহিচা অসি পৃথীবিদা অমসুং স্পেসতা ভারতকী চহিচা ওইহল্লসি। ময়াম পুম্নমকপু হন্না-হন্না থাগৎচরি। ময়ামদা নুংঙাইবা ফোংদোকচরি!
