ঐহাক্কী মন্ত্রী মরূপশিং, শ্রী মনশুখ ভাই মান্দাবিয়া, শ্রী ধর্মেন্দ্রা প্রধান, তোঙান-তোঙানবা রাজ্যশিংগী মুখ্য মন্ত্রীশিং, ইকায়-খুম্ননীংঙাই ওইরবা মীওইশিং অমসুং শক্নাইরবা মীথুংলেনশিং!
নুংশীরবা মরূপশিং,
ঐহাক্না নখোয় পুম্নমকপু মেরিতাইম ইন্দিয়া সম্মিৎ ২০২১দা তরাম্না ওকচরি। মসিগী সম্মিৎ অসিনা সেক্তর অসিগা মরী লৈনবা স্তেকহোলদর কয়াবু অমত্তা ওইনা পুনহল্লে। ঐখোয়না অমত্তা ওইনা পুন্দুনা মেরিতাইমগী শেন্মিৎলোনবু খুমাং চাউশিলহনবদা য়াম্না মাই-পাকপা ঙমগনি হায়বগী থাজবা থম্লি।
মরূপশিং,
ভারত অসি সেক্তর অসিগী মহৌশানা ওইজরবা লুচিংবা অমনি। ঐখোয়গী লৈবাক্কী সমুদ্রগা মরী লৈনবা শীংথানীংঙাই ওইরবা পুৱারী লৈজৈ। ঐখোয়গী সমুদ্র তোর্বানশিংদা খম-থেংনা ৱাংনা চাউখৎখি। ঐখোয়গী হিথাংফমশিং অসিনা চহি লিশিং কয়াদগী লল্লোন-ইতিক্কী মরু ওইবা মফম ওইদুনা লাক্লি। ঐখোয়গী সমুদ্রগী তোর্বান্না ঐখোয়বু মালেমগা শম্নহল্লি।
মরূপশিং,
মসিগী মেরিতাইমগী সম্মিৎ অসিগী খুত্থাংদা ঐহাক্না মালেমবু ভারত্তা লাকপীদুনা ঐখোয়গী চাউখৎপগী খোঙজেলগী শরুক য়াবীয়ু হায়জনীংই। মেরিতাইমগী সেক্তরদা শাহৌ-লৌবা অমসুং মালেমগী মকোক থোংবা ব্লু ইকোনোমী অমা ওইরকপগী মতাংদা ভারতনা য়াম্না লুনা লৌই। ঐখোয়না মরু ওইনা মিৎয়েং চঙলিবা হীরমশিংদিঃ হৌজিক লৈরিবা ইনফ্রাস্ত্রকচরশিংবু হেন্না ফগৎহনবা, চাউখৎপগী অনৌবা থাক্কী ইনফ্রাস্ত্রকচর শেমগৎপা অমসুং শেমদোকপগী খোঙচৎ অসিবু হেন্না খুমাং চাউশিলহনবনি। মসিগী খোঙথাংশিং অসিগী খুত্থাংদগী, ঐখোয়গী আত্মানির্ভর ভারতকী মঙলান অসিবু মপাঙ্গল হাপ্নবা পান্দম থম্লি।
মরূপশিং,
ঐহাক্না হৌজিক লৈরিবা ইনফ্রাস্ত্রকচরশিং অসিগী মতাংদা ৱা ঙাংবা মতমদা ঐহাক্না মখোয়শিংগী মথৌ-তৌবগী থৌওংদা হেন্না ফগৎহনবদা অহেনবা মরু ওইবা পীরি। ঐখোয়না তোঙান-তোঙানবা পোৎলম অমমম ওইনা লৌবগী মহুত্তা, সেক্তর অসিবু অমত্তনি খন্দুনা মিৎয়েং চঙলি।
অমসুং, মসিদা ঐখোয়না হোৎনরিবশিংগী মহৈ উবা ফংলে। ইং ২০১৪দা চহিগী ওইনা চাউরাক্না মিলিয়ন তোন ৮৭০গী মতিক লৈরম্বা ঐখোয়গী মরু ওইবা হিথাংফমশিং অসি হৌজিক্তি চাউরাক্না মিলিয়ন তোন ১৫৫০দা হেনগৎলে। মসিগী মাই-পাকপা হেনগৎলক্লিবা অসিনা ঐখোয়গী হিথাংফমশিংদা তেংবাংবতা নত্তনা, ঐখোয়গী পোত্থোকশিংবু অতৈগা চাংদম্নবা ঙম্বদা হেনগহন্দুনা ঐখোয়গী অপুনবা শেন্মিৎলোন্দসু খুমাং চাউশিনহল্লে। ভারতকী হিথাংফমশিংদা হৌজিক্তি মখাগী অসিগুম্বা খুদোংচাবশিং লৈরেঃ দাইরেক্ত পোর্ত দেলিভরী, দাইরেক্ত পোর্ত এন্ত্রী অমসুং নীংথিনা দেতা লৌননবগীদমক্তা হেন্না ফগৎহল্লবা পোর্ত কম্ম্যুনিতী সীস্তেম (পি.সি.এস.)। ঐখোয়গী হিথাংফমশিংনা লাক্কদবা অমসুং চৎখিগদবা কার্গোশিংগী ঙাইবগী মতম হন্থহল্লে। ঐখোয়না হিথাংফমশিংদা পোত্থোক থম্নবা মফম কয়া শানবগীদমক্তা অমসুং হিথাংফমগী মফমশিংদা ইন্দস্ত্রী কয়াগী পুক্নিং চীংশিন্নবা প্লগ অমসুং প্লেগী ইনফ্রাস্ত্রকচরশিং লৈহন্নবগীদমক্তা শেল য়াম্না থাদরি। সমুদ্রগী ফত্ত-হৌদীশিংবু তুং কোইনা চৎনবা শেংদোকপা অমসুং লৈবাক্কী জহাজশিংবু অমুক্কা হন্না শিজিন্নবা য়ানবা শিনবগী থৌওংশিংগী খুত্থাংদা হিথাংফমশিং অসিনা “অরেমখাক্তগী লন-থুমদা” ওন্থোকপগী থৌওংবুসু পুক্নিং থৌগৎলি। ঐখোয়না হিথাংফমশিংগী সেক্তর অসিদা লন্নাইগী শেল থাদবগী পুক্নিংসু থৌগৎকনি।
মরূপশিং,
থবক-থৌরমশিং নীংথিনা পাংথোকপগা লোয়ননা, অমগা-অমগা শম্নহন্নবা থবক কয়া অমসু হৌজিক পায়খৎলি। ঐখোয়না ঐখোয়গী হিথাংফমশিংবু কোস্তেল ইকোনোমিক জোন, হিথাংফমদা য়ুম্ফম ওইবা স্মার্ত-সিতী অমসুং ইন্দস্ত্রীএল পার্কশিংবু অমত্তা ওইনা পুন্সিল্লি। মসিগী থোউওংশিং অসিনা ইন্দস্ত্রীগী ওইনা শেল-থাদববু মরা চেৎহনগনি অমসুং হিথাংফমশিংগী মনাক্তা মালেমগী থাক্কী পোত্থোক পুথোকপগী থবকশিংসু খুমাং চাউশিলহনগনি।
মরূপশিং,
অনৌবা ইনফ্রাস্ত্রকচর শেমগৎপগী ওইনদি, বঘাবন, পারাদীপ অমসুং কান্দলাগী দীন্দয়াল হিথাংফমদা মালেমগী থাক্কী ইনফ্রাস্ত্রকচর লৈবা মেগা পোর্ত কয়া অমা শেমগৎলি হায়না পাউদম্বদা ঐহাক্না হরাওবা পোকচৈ। মমাংদা অমুক্তা উখিদ্রিবা মওংদা ঈশিং লম্বীদা শেল-থাদবা অসি ঐখোয়গী সরকারনি। লৈবাক মনুংগী ওইবা ঈশিং লম্বীশিং অসি শেল চঙদবা অমসুং অকোয়বগা চুনবা ফ্রৈৎ পুথোক-পুশিন তৌবগী পাম্বৈ অমনি হায়বা খঙলে। ঐখোয়না ইং ২০৩০ ফাওবগী মনুংদা ঈশিং-লম্বী ২৩ মথৌ তৌহন্নবা পান্দম থম্লি। ঐখোয়না পান্দমশিং অসি ইনফ্রাস্ত্রকচরবু হেন্না ফগৎহনবা, ফেয়রৱে শেমগৎপা, নেভিগেস্নেলগী তেংবাংশিং অমসুং রিভর ইনফোর্মেসন সীস্তেম লৈহনবগী খুত্থাংদা ফংগনি। বঙ্গলাদেশ, নেপাল, ভুতান অমসুং ম্যানমারগী মফমশিংগা শম্নহন্নবা ইস্তর্ন ৱাতরৱেজ কন্নেক্তিভিতী ত্রান্সপোর্ত গ্রিদ অসিসু মফমশিং অসিগা লল্লোন-ইতিক অমসুং তেংবাংনবা হেনগৎহন্নবগীদমক্তা মপাঙ্গল হেন্না লৈহল্লগনি।
মরূপশিং,
অনৌবা মেরিতাইম ইনফ্রাস্ত্রকচর অসিনা হিংবদা লাইহনবগী অফবা পাম্বৈ অমা ওইরগনি। রো-রো অমসুং রো-পেক্স প্রোজেক্তশিং অসিসু ঐখোয়না ঐখোয়গী তুরেলশিং শিজিন্নবগী মঙলান অসিগী মশক থোকপা মচঙশিংনি। সমুদ্র অমসুং কংফালদা থবক তৌবা য়ানবগীদমক্তা ঐখোয়না মফম ১৬তা ৱাতরদোমশিং শারি। লৈবাক্কী ঈশিং লম্বী ৫দসু রিভর ক্রুজ তর্মিনেল ইনফ্রাস্ত্রকচর অমসুং জেত্তীশিংসু শেমগৎলিবনি।
মরূপশিং,
ঐখোয়না ইং ২০২৩ ফাওবগী মনুংদা ইনফ্রাস্ত্রকচর শেমগৎপা অমসুং ফগৎহনবগী খুত্থাংদা খনগৎলবা হিথাংফমশিংদা লৈবাক মনুংগী অমসুং মালেমগী ক্রুজ তর্মিনেলশিং শেম্বগী পান্দম থম্লি। ভারতকী চাউরবা সমুদ্র তোর্বান শিনবা থুংবদা লাইৎহাউস ১৮৯ লৈ। ঐখোয়না লাইৎহাউস ৭৮গা থংনবা মফমশিংবু লম-কোয়বগী মফম ওন্থোক্নবা থৌরাং য়াৎলে। মসিগী খোঙথাং অসিগী মরু ওইবা পান্দমদি হৌজিক লৈরিবা লাইৎহাউসশিংবু নীংথিনা শেমগৎপা অমসুং মসিগী অকোয়বগী মফমশিংবু তোপ-তোপ্পা মেরিতাইম তুরিজমগী মফম ওইনা ওন্থোকপনি। কোচী, মুম্বাই, গুজরাৎ অমসুং গোৱাগুম্বা মরু ওইবা রাজ্য অমসুং শহরশিংদা অর্বান ৱাতর ত্রান্সপোর্ত সীস্তেম হৌদোক্নবা খোঙথাং কয়া অমসু পায়খৎলি।
মরূপশিং,
অতোপ্পা সেক্তরগুম্না, মেরিতাইম সেক্তরদসু ঐখোয়না পায়খৎলিবা থবকশিং অসি তোঙানবা থৌওং অমগুম্না পাংথোক্তনবা হোৎনরি। ঐখোয়না মসিগী পাক-চাউবা অসিবু হেনগৎহন্নবগীদমক্তা হন্দক্তসু শিপ্পিং মন্ত্রালয়বু হন্দক্তা হিথাংফম, শিপ্পিং অমসুং ৱাতরৱেগী মন্ত্রালয় হায়না মিং ওনখ্রে। মন্ত্রালয় অসিনা মেরিতাইম শিপ্পিং অমসুং নেভিগেসন, মর্কেন্তাইল মেরিনগী এজুকেসন অমসুং ত্রেনিং, জহাজ শাবা অমসুং শেম্বগী ইন্দস্ত্রী, জহাজ থুগায়বা, ফিশিং ভেসেল ইন্দস্ত্রী অমসুং ফ্লোতিং ক্রাফ ইন্দস্ত্রীশিংগীদমক্তা নীংথিনা মথৌ তৌনবা হোৎনগনি।
মরূপশিং,
পোর্ত শিপ্পিং অমসুং ৱাতরৱেজ মন্ত্রালয়না শেল থাদবা য়াবা প্রোজেক্ত ৪০০গী পরিং অমা শেম্লে। মসিগী প্রোজেক্তশিং অসিদা বিলিয়ন দোল্লর ৩১ নত্ত্রগা লুপা করোর লাখ ২.২৫গী শেনফম থাদবা য়াবগী মতিক লৈ। মসিনা ঐখোয়গী মেরিতাইম সেক্তরবু মপুং ওইনা চাউখৎহন্নবা ঐখোয়না খোঙফম চেৎলিবা অসিবু হেন্না মপাঙ্গল লৈহনগনি।
মরূপশিং,
মেরিতাইম ইন্দিয়া ভিজন ২০৩০সু হৌদোকখ্রে। মসিনা সরকারগী হান্না তৌগদবা থবকশিংবু নীংথিনা তাক্লি। সাগর মন্থনঃ মর্কেন্তাইল মেরিন দোমেন এৱিয়র্নেস সেন্তরসু ঙসি লোঞ্চ তৌখ্রে। হায়রিবা অসি মেরিতাইমগী তেক্ত-কায়দবা হেনগৎপা, মী থিবা অমসুং কনবগী চাং, মেরিন ইনভাইরনমেন্ত ঙাক-শেনবা অমসুং তেক্ত-কায়দবগী থৌওংশিং ফগৎহন্নবা ই-পাউ পীবগী পথাপ অমনি। হিথাংফম্না লুচিংদুনা চাউখৎপা পুরকপগী সাগরমালা প্রোজেক্ত অসি সরকার অসিনা ইং ২০১৬তা হৌদোকখিবনি। খোঙথাং অসিগী শরুক অমা ওইনা, ইং ২০১৫দগী ২০৩৫ ফাওবগী মনুংদা থবক মসিগী মরী লৈনবা পাংথোক্নবগীদমক্তা য়ু.এস. দোল্লর বিলিয়ন ৮২ নত্ত্রগা লুপা করোর লাখ ৬কী শেনফম থাদগবা প্রোজেক্ত ৫৭৪ হেন্না শক খঙদোকখ্রবনি।
মরূপশিং,
ভারত সরকারনা লৈবাক মনুংদা জহাজ শাবা অমসুং শেম্বগী কৈথেল লৈহন্নবা থৌওংদসু মিৎয়েং চঙলি। লৈবাক মনুংদা জহাজ শাববু পুক্নিং থৌগৎনবগীদমক্তা, ঐখোয়না ভারতকী জহাজ শেম-শাফমশিংদা জহাজ শাবগী শেলগী তেংবাং পীবগী পোলিসীগী অয়াবা পীখ্রে। ইং ২০২২ ফাওবদা ভারতকী সমুদ্র তোর্বান পরেং অনিমক্তা জহাজ শেম্বগী ক্লসতরশিং শেমগৎলগনি। লৈবাক্কী জহাজশিংবু অমুক্কা হন্না শিজিন্নবা য়ানবা শিনবগী ইন্দস্ত্রীশিংবু “অরেমখাক্তগী লন-থুমদা” ওন্থোকপগী থৌওং পাংথোকহন্নবা পুক্নিং থৌগৎকনি। ভারতনা রিসাইক্লিং ওফ শিপ্স এক্ত, ২০১৯ চৎনহনখ্রে অমসুং হোং কোং ইন্তর্নেস্নেল কনভেন্সনবুসু য়াখ্রে।
মরূপশিং,
ঐখোয়না পাংথোক্লিবা খ্বাইদগী ফবা থবকশিংবু ঐখোয়না মালেমগা শিজিন্নমিন্নবা পাম্মি। অদুগা, ঐখোয়না মালেমগী খ্বাইদগী ফবা থৌওংশিং শিজিন্নবগী অপাম্বসু ইফোং ফোংনা ফোংদোক্লি। বিমস্তেক অমসুং আই.ও.আর. লৈবাকশিংগা লৈনরিবা লল্লোন-ইতিক অমসুং শেন্মিৎলোনগী মরী অসিবু মখা চত্থরদুনা, ভারতনা ইনফ্রাস্ত্রকচরদা শেল থাদববু হেনগৎহনবা অমসুং ইং ২০২৬ ফাওবগী মনুংদা ঐখোয় মশেলগী মনুংদা য়ানবা পুরক্নবা হোৎননবা থৌরাংসু য়াৎলি। ভারত সরকারনা ইথৎশিংগী ইনফ্রাস্ত্রকচর অমসুং ইকোসীস্তেম চাউখৎহন্নবা অপুনবা থৌওং পাংথোকপগী খোঙথাং অমসু হৌদোকখ্রে। ঐখোয়না মেরিতাইম সেক্তরদা ইনর্জীগী রিন্যুএবল সোর্স শিজিন্নববু খুমাং চাউশিলহনবা পাম্মি। ঐখোয়না লৈবাক শিনবা থুংবগী হিথাংফমশিংদা নুমিৎ অমসুং নুংশিত্তা য়ুম্ফম ওইবা মৈগী পথাপ খিনবগী থবক কন্না চত্থরি। ঐখোয়না ইং ২০৩০ ফাওবগী মনুংদা তাঙ্কক অহুম থোক্তুনা ভারতকী হিথাংফম শিনবা থুংবদা রিন্যুএবল ইনর্জী শিজিন্নবগী চাং অসি ৬০%দগী হেনবগী পান্দম থম্লি।
মরূপশিং,
ভারতকী শাংলবা সমুদ্র তোর্বানশিংনা নখোয়বু ঙাইরি। ভারতকী শুবা-নোম্বা কনবা মীওইশিংনা নখোয়বু ঙাইরি। ঐখোয়গী হিথাংফমশিংদা শেল থাদবীয়ু। ঐখোয়গী মীয়ামদা শেল থাদবীয়ু। ভারতপু নখোয়গী লল্লোন-ইতিক্কী অপাম্বা পন্থুংফম ওইহনবীয়ু। ভারতকী হিথাংফমশিংবু নখোয়গী লল্লোন-ইতিক্কী পাম্বৈ ওইহনবীয়ু। মসিগী খন্ন-নৈনবা অসি য়াম্না পাক-চাউবা অমসুং কান্নবা ওইরসনু।
নখোয়বু থাগৎচরি।
নখোয়বু য়াম্না থাগৎচরি।
