পাংথোক্লিবা থৌরম অসিগী ফম্পাক্তা লেঙশিল্লিবা গৱাগী রাজ্যপাল শ্রী পি.এস শ্রীধারন পিল্লাই জি, গৱাগী চীফ মিনিস্তর শ্রী প্রমোদ সৱান্ত জি, য়ুনিয়ন মিনিস্তরশিং শ্রী শ্রীপদ নাইক জি, শ্রী জয়তিরাদিত্য সিন্দিয়া জি অমসুং অতোপ্পা শক্নাইরবশিং অমসুং ইবুংঙো অমসুং ইবেম্মাশিং!
অচৌবা অনৌবা এয়রপোর্ত অসিগীদমক গৱাগী মীয়াম অমসুং লৈবাক অসিগী মীয়াম থম্মোয় শেংনা থাগৎচরি। হৌখিবা চহি ৮ অসি ঐনা অদোমগী মরক্তা লৈনবগী খুদোংচাবা অমা ফংলে, ঐখোয়দা অদোম্না উৎখিবা নুংশিবা অমসুং থৌজাল অদু ঐনা চাউখৎ-থৌরাংগী থবকশিংনা লমন শিংলে। মসিগী অনৌবা এয়রপোর্ত অসি তৌবীমল খঙবা উৎনবা খোঙথাং অমনি। ইন্তরনেসনেল এয়রপোর্ত অসি ঐগী নুংশিরবা মরুপ অমসুং গৱাদা পোকখিবা লৈখিদ্রবা মনোহর পরিকর জিগী মমিং থোনবদা ঐ অপেনবা পোক্লে। মনোহর ইন্তরনেসনেল এয়রপোর্ত হায়না মমিং থোন্দুনা, মফম অসিদা লাকপা মীওই খুদিংমক্না পরিকর জিগী মমিং মতম পুম্নমক্তা নিংশিংলগনি।
মরুপশিং,
লৈবাক অসিদা মমাঙগী সরকারশিংনা মীয়ামগী দরকার ওইবশিং শেমগৎপগী মহুৎতা ভোৎ-বেঙ্কনা হেন্না মরুওইনা লৌখি। মরুওইদবা প্রোজেকশিংগীদমক লুপা করোর কয়া চাদিং তৌখি। মরম অদুনা মীয়ামগী দরকার ওইবা ইনফ্রাস্ত্রকচরশিং মীরাইখি। মসিগী গৱাগী ইন্তরনেসনেল এয়রপোর্ত অসি খুদম অমনি। মসি গৱাগী মীয়াম্না খক নত্তনা লৈবাক অসিগী মীয়াম্না মতম কয়াগী মমাঙদগী তাল্লক্লবা দিমান্দ অমনি। এয়রপোর্ত অমনা কোন্নদে। গৱাগী অতোপ্পা এয়রপোর্ত অমা দরকার ওইখি। মসিগী এয়রপোর্ত অসি কেন্দ্রদা অতল বিহারি বাজপায়িগী সরকার লৈবা মতমদা থৌরাং তৌখি। অদুবু অতল জিগী সরকার লৈত্রবা মতুংদা, এয়রপোর্ত অসিগীদমক থবক অমা পায়খৎখিদে। প্রোজেক অসি মতম শাংনা নমশিন্দুনা থমখি। ২০১৪দা গৱাদা দবল ইঞ্জিনগী সরকার লাকখি। ঐখোয়না অমুক হন্না থবক খুদিংমক য়াংনা লোইশিনখি। চহি ৬গী মমাঙদা ঐ মফম অসিদা লাকখি অমসুং উরেপ-উয়ুং তমখি। মতম মতমগী ওইনা কোর্তকী কেসশিং অমসুং লাইচৎনা অপনবশিং থোকহনখি। অদুবু ঙসিদি ফজরবা এয়রপোর্ত অমগী মওংদা লৈরে। হৌজিক এয়রপোর্ত অসিদা চহি অমদা পেসেঞ্জর লাখ ৪০ চৎথোক-চৎশিন তৌনবগী খুদোংচাবা লৈরে। তুংদা মসি করোর ৩.৫ ফাওবা য়ৌরকপা ঙমগনি। মসিগী এয়রপোর্ত অসিনা তুরিজমদা অচৌবা খুদোংচাবা অমা পীরগনি। এয়রপোর্ত অনি লৈবা অসিনা গৱা অসি কার্গোগী মফম অমা ওন্থোক্নবগী ওইথোকপশিং হেনগৎহল্লে। মসিদা উহৈ-ৱাহৈশিং অমসুং ফার্মাগী পোৎথোকশিং মপান্দা থাদোকপশু হেনগৎহল্লগনি।
মরুপশিং,
ঙসিদি মনোহর ইন্তরনেসনেল এয়রপোর্ত অসি ৱাখল্লোন হোংলকপা অমসুং লৈবাক অসিগী ইনফ্রাস্ত্রকচর শেমগৎনবা সরকারগী থৌরাংগী খুদম অমনি। ২০১৪গী মমাঙদা, মথক্তা চৎথোক-চৎশিন তৌবা অসি শেন পায়বা মীওইশিং খক্তগী ওইরম্মী। মীচম মীয়াম অমসুং মিদল ক্লাসশিংশু মথক্তা চৎপা পাম্মী হায়বা মমাঙগী সরকারশিংনা খনখিদে। মরম অদুনা মমাঙগী সরকারশিংনা অসিগুম্বা হিরম অসিদা শেন থাদখিদে। এয়রপোর্তশিং শেমগৎনবা শেন য়াম্না থাদখিদে। মদুগী মহৈ ওইনা, লৈবাক অসিদা মথক্তা চৎনবগী খুদোংচাবা কয়া লৈরবসু, ঐখোয়না নাথৈদুনা থমখি। হৌজিক লৈবাক অসিনা অনৌবা ৱাখল্লোন অমদা থবক তৌরি অমসুং ঐখোয়না মসিগী ফলশিং উবা ফংলে।
মরুপশিং,
নিংতম্বদগী ২০১৪ ফাওবদা লৈবাক অসিদা শুপ্নগী অপীকপা অমসুং অচৌবা এয়রপোর্ত ৭০ খক লৈরমখি।মথক্তা চৎনবগী খুদোংচাবা শুপ্নগী অচৌবা সহরশিং খক্তদা লৈখি। অদুবু ঐখোয়না লৈবাক অসিগী অপীকপা সহরশিংদা নোংথক্তা চৎথোক-চৎশিন তৌনবা থবক পায়খৎলে। মসিগীদমক ঐখোয়না লেভেল অনিদা থবক তৌরে। অহানবা ঐখোয়না লৈবাক অসিদা এয়রপোর্তগী নেতৱার্ক পাকথোক-চাউথোকহল্লে। অনিশুবদা, মীচম মীয়াম এরোপ্লেন অমা তোংনবা খুদোংচাবা পীনবা উরান স্কিম হৌদোক্লে। হায়রিবা থবকশিংনা মমাঙদা অমুক্তা উখিদ্রিবা ফলশিং ফংলে। হৌখিবা চহি ৮দা লৈবাক অসিদা অনৌবা এয়রপোর্ত ৭২ শেমগৎলে হায়না সিন্দিয়া জিনা ঐখোয়দা খঙহল্লে। খন্দুনা য়েংউ, নিংতম্বা ফংলবা মতুংদা, চহি ৭০দা ঐখোয়গী এয়রপোর্ত ৭০ রোম লৈখি!অদুবু ঙসিদি, শুপ্নগী চহি ৭-৮গী মনুংদা অনৌবা এয়রপোর্ত ৭০ হেন্না লৈরে। মসিনা মরম ওইদুনা, হৌজিক লৈবাক অসিদা এয়রপোর্ত মশিং শরুক অনি হেনগৎলে। ২০০০দা লৈবাক অসিদা চহি অমদা মীওই করোর ৬ রোম মথক্তা চৎখি। ২০২০দা কোরোনা মমাঙদা, মশিং অসি কোরোর ১৪ হেনখি। মখোয়গী মরক্তা, মীওই করোর ১ হেন্না উরান স্কিমগী খুদোংচাবা লৌদুনা মথক্তা পাইখি।
মরুপশিং,
হায়রিবা থবকশিং অসিনা মরম ওইদুনা, ঙসিদি মালেমদা ভারতনা অহুমশুবা খ্বাইদগী চাউবা এভিএসনগী কৈথেল ওইরে। উরান স্কিম্না লৈবাক অসিগী মিদল ক্লাসশিংগী মঙলান মঙফাওনরে, মসি য়ুনিভর্সিতিশিংনা থিজিন্নবা হিরম অমা ওইরে। ইকুই কুইদনা, অরাপ্পা মফমদা চৎনবা মিদল ক্লাসনা অহানবদা ত্রেন তিক্কেতশিং ককখি। হৌজিক অনক্নবা মফমশিংদা চৎনবা ফাওবগীদমক অহানবদা মখোয়না প্লেন তিক্কেতশিং কক্লকে। মথক্তা পাইবা অসি মখোয়গী অহানবা থবক ওইরে।
মরুপশিং,
তুরিজম্না লৈবাক অমগী মীয়াম চিংশিনবা ঙম্বগী শক্তি হেনগৎহল্লি হায়না ঐখোয়না তোইনা তারে অমসুং মসি তশেংনা অচুম্বনি। লৈবাক অমগী শক্তি হেনগৎলকপা মতমদা, মালেম্না মদুগী মতাংদা হেন্না খঙবা পাম্মী। লৈবাক অমগী মতাংদা করিগুম্বা খর য়েংনবা, খঙনবা লৈরবদি, তশেংনা মালেম্না মদুদা হেন্না মীৎয়েং চঙলকই। অদোম্না করিগুম্বা পুৱারি হনগৎনা য়েংলবদি, ভারতনা নুংঙাই-য়াইফবা মতমদা, মালেম শীনবা থুংনা ভারতকী মরমদা অঙকপা পোক্নখি। লমকোয়বশিং, ললোনবশিং অমসুং মহৈরোয়শিংনা মালেমগী মফম কয়াদগী লৈবাক অসিদা লাকখি। মদুগী মতুংদা মীনাই ওইদুনা হিংবগী শাংলবা মতম অমা লৈখি। ভারতকী মওং, কলচর, সভেত্য লেংদনা লৈরি, অদুবু ভারতকী মমিদি হোংলে, ভারতকী মীৎয়েং হোংলে। মতম অমদা ভারত্তা চৎনবা ইখৌ লাংবা লৈখিবা মীওইশিংনা তুংদা লাকপা মীরোলশিংনা ভারত কদাইদা লৈবগে হায়বা ফাউবা খঙখিদে।
মরুপশিং,
হৌজিক ২১শুবা চহিচাগী ভারত অসি অনৌবা ভারত অমনি। ঙসিদি, ভারতনা মালেমগী থাক্তা মসিগী অনৌবা শক্তম অমা শেমগৎলি, মালেমগী মীৎয়েং অসি য়াংনা হোংলে। ঙসিদি মালেম্না ভারতকী মরমদা খঙবা পাম্লে। ঙসিদি দিজিতেল প্লেতফোর্মশিংদা, মপান লৈবাক্কী মীওইশিংনা মালেমদা ভারতকী ৱারিশিং পাকশন্না লিরে। হায়রিবা ৱাফমশিং অসি য়েংলগা, লৈবাক অসিদা লাকপা অসি য়াম্না লাইহনবা অসি তঙাইফদবা ওইরে। মরম অদুনা, হৌখিবা চহি ৮ অসিদা, লমকোয়বদা লাইহন্নবা অমসুং লৈবাক অসিগী তুরিজমগী থবক পাকথোক-চাউথোক্নবা ভারতনা পায়খৎপা য়াবা থবকশিং পায়খৎলে। ঐখোয়না ভিসাগী থবকশিং লাইথোকহল্লে অমসুং ভিসা ওন-এরাইভেলগী খুদোংচাবশিং হেনগৎহল্লে। নোংথক্কী লম্বীগা ইরোইন্না, ঐখোয়না দিজিতেল, মোবাইল অমসুং ত্রেনগী খুদোংচাবশিং হেনগৎহন্নবা মীৎয়েং চংলি। ঙসিদা লমকোয়ফম অয়াম্বা রেলৱেজনা শম্নরে। মতমগী অনৌবা ত্রেনশিং হায়বদি তেজাস অমসুং বন্দে ভারত এক্সপ্রেস রেলৱেজগী শরুক অমা ওইরে। ভিস্তাদোম কোচশিংনা লমকোয়বা মীওইশিং নুংঙাইবা হেনগৎহল্লে।
২০১৫দা লৈবাক অসিদা লৈবাক মনুংগী লমকোয়বা মীওই মশিং করোর ১৪ য়ৌখি। হৌখিবা চহিদা মসিগী মশিং করোর ৭০দা হেনগৎলে। কোরোনা মতুংদা, লৈবাক মনুংদা অমসুং মালেম শীনবা থুংনা তুরিজম পাকথোক-চাউথোক্লে। লমকোয়ফমশিংদা তিকা থাবা হৌনবা ৱারেপ লৌখিবগী খুদোংচাবা গৱাশু ফংলে। মরম অদুনা ঐনা প্রমোদ জি অমসুং মহাক্কী কাংবু থাগৎচরি।
মরুপশিং,
থবক ফংবা অমসুং মশানা মশাবু থবক পীজবদা তুরিজম্না লৌরিবা থৌদাং ঐখোয়না খঙলে। মী খুদিংমক তুরিজমদগী শেন তানবা ঙম্মি। মসিনা মী খুদিংমক খুদোংচাবশিং পীরি। মরম অদুনা দবল ইঞ্জিন সরকার অসিনা তুরিজমগীদমক অকনবা থবক পায়খৎলে। ২০১৪দগী গৱাদশু লুপা করোর ১০,০০০ হেনবগী লম্বীশিংগী প্রোজেকশিংগী শেন থাদরে। গৱাদা লম্বী চিনবগী খুদোংচাদবশিং কোকহন্নবা অকনবা থবকশিং পায়খৎলে। কোনকান রেলৱেজ ইলেকত্রিক ফংহনবদগী গৱাশু খুদোংচাবা ফংলে।
মরুপশিং,
লম্বী-থোঙগী থবকশিং অসিগী মথক্তা, হেরিতেচ তুরিজম চাউখৎহন্নবা সরকারনা অকনবা থবকশিং পায়খৎলি। ঐখোয়গী হেরিতেচ শেমজিন্নবা, খুদোংচাবশিং অমসুং লম্বী-থোঙ শেমগৎনবা মীৎয়েং চংলে। গৱাদা পুৱারি ওইরবা এক্বাদা জেল কমপ্লেক্স মিউজম শেমগৎলিবা অসি খুদম অমনি। মতমগী অনৌবা তেক্নোলোজি শীজিন্নদুনা, লৈবাক শীনবা থুংনা লৈরিবা ঐখোয়গী হেরিতেচগী মফমশিং হেন্না পুক্নিং চিংশিন্নবা থবক পায়খৎলে।
মরুপশিং,
অতোপ্পা মরম অমগীদমক, ঙসিশু ঐনা গৱা সরকার থাগৎপা পাম্মী। ফিজিকেল ইনফ্রাস্ত্রকচরগী মথক্তা, গৱা সরকারনা সোসিএল ইনফ্রাস্ত্রকচগীদমক চপ মান্ননা থবক পায়খৎলি। গৱাদা হিংবদা লাইনবা মাইপাক্না ‘শ্বায়মপুর্না গৱা’ কেম্পেন অমা মাইপাক্না চৎথরি অমসুং মীওই অমতা সরকারগী স্কিমশিংগী কান্নবশিং ফংদবা লৈত্রে। মাইকৈ অসিদা শিংথানিঙাই ওইবা থবক পায়খৎলে। চাদা ১০০ থবক পায়খৎপদা ঙসিদা গৱা খুদম অমা ওইরে। সরকার অসিনা অসিগুম্বা অফবা থবকশিং পায়খৎকনি অমসুং মীয়াম হিংবদা লাইহনগনি হায়না ঐনা থাজবা থম্লি। মসিগী চাউরবা এয়রপোর্ত অসিগীদমক ময়াম পুম্নমক থাগৎপদা লোয়ন্না ঐগী ৱারোল লোইশিঞ্জরে।
ময়াম পুম্নমক থম্মোয় শেংনা থাগৎচরি! থাগচৎরি।
