শ্রী পিয়ুশ গোয়লজী, দোক্তর. এল. মুরুগান জী , শ্রী ইদপ্পাদি কে. পলানিস্বামী, শ্রী নায়নার নাগেন্দ্রন, শ্রী থাংঙম তেন্নারসু, ঐগী তামিলগী ইচিল-ইনাওশিং, ভনক্কম!
মরুপশিং,
তিরুচিগী অঙকপা সহর অসিদা লাকপদা ঐহাক য়াম্না নুংঙাইবা ফাওই।
ঙসিগী প্রোগ্রাম অসি তামিল নাদুগী তুংলমচৎকীদমক য়াম্না মরু ওই। মসি লুপা কোতি লিশিং মঙা চাত্রুক্কী প্রোজেক্তশিংগা মরী লৈনৈ। প্রোজেক্তশিং অসি ক্লিন ইনর্জীগীদমক ইনফ্রাস্ত্রকচর, পেত্রোলিয়মগা মরী লৈনবা মেন্যুফেকচরিং, হাইৱেজ, রেলৱেজ অমসুং খুঙ্গংগী লম্বীশিংনি। মখোয়না ইনর্জী ফংহনবা, কনেক্তিবিতী হেনগৎহনগনি অমসুং তামিল নাদুগী নহারোলশিংগীদমক থবক লিশিং কয়া শেমগৎকনি।
মরুপশিং,
ভারত পেত্রোলিয়মগী সিতী গ্যাস দিস্ত্রিব্যুসন নেটৱার্ককী উরেপ উয়ুং তম্বদা ঐহাক নুংঙাইবা ফাওই। চাউরাক্না লুপা কোতি লিশিং অহুম চাত্রেতকী শেনফম অমা থাদনবগী থবক পায়খৎলি। হায়রিবা নেৎৱার্ক অসিনা তামিল নাদুগী নীলগিরিস অমসুং ইরোরে দিস্ত্রিক্তশিং কোনশিল্লি। মসিনা ইমুং লাখ ৯ অমসুং ললোন-ইতিক্কী ওর্গনাইজেসন চা কয়াদা পাইপকী খুত্থাংদা নেচরেল গ্যাস ফংহল্লগনি। পাইপকী খুত্থাংদা গ্যাস অসি য়ুমদা হকথেংননা চঙলগনি, মসিনা হিংবদা লাইথোকহল্লগনি। থবক লিশিং কয়া হকথেংননা অমসুং নাকোইননা শেমগনি। নেচরেল গ্যাস অসি অকোইবগী ফিভমগা চান্নবা মৈ অমনি অমসুং মসিনা নুংশিৎকী পোলুসন হন্থহনবদা মরু ওইবা থৌদাং অমা লৌই। মসিগী প্রোজেক্ত অসিনা চহি ৮ খক্তদা অকোইবগী মফমদা শাফু পীরগনি হায়না ঐহাক্না খঙলে। মসি মরু ক্রোর ৪ থাবগা মান্নগনি।
মরুপশিং,
ঙসি চেন্নাইদা ইন্দিয়ন ওইল কোরপোরেসনগী লুব ব্লেন্দিং প্লান্ত জাতিদা কত্থোকখ্রে। মসি মালেমগী খ্বাইদগী চাউবা মখলগী ফেসিলিতী অমনি হায়বা খঙবদা অদোম চাউথোকচগনি। মসিগী প্লান্ত অসিনা তামিল নাদু অমসুং মপান্দা লৈবা মরু ওইবা ইন্দস্ত্রী কয়াগী দিমান্দ মপুং ফাহনরি। লুব্রিকেন্তশিংগী লোকেল প্রদক্সন হেঙ্গৎলকপনা ইম্পোর্তসু হন্থহল্লি অমসুং লৈবাক অসিগী শেলসু কনবা ঙমহল্লি।
মরুপশিং,
ঙসি ঐখোয়না কিলোমিতর ৩৭০ শাংবা খুঙ্গংগী লম্বীশিং শঙ্গাখ্রে। মসিগী থবক অসি প্রধান মন্ত্রী গ্রাম সড়ক য়োজনাগী মখাদা পায়খৎলি। লম্বীশিং অসি ফিজিকেল ইনফ্রাস্ত্রকচরগী শরুক অমখক্তমক নত্তে। অনাবশিংনা হেন্না ফবা হেল্থকেয়র ফংহল্লি। মহৈরোয়শিংনা স্কুল অমসুং কোলেজশিংদা নুংঙাইনা চৎপা ঙম্মী। লৌমীশিংনা মহৈ-মরোং য়োন্নবা নৎত্রগা পোৎ-চৈশিং য়োননবা তোঙান-তোঙানবা মফমশিংদা চৎপা য়াই। অপুনবা ওইনা, লম্বী খুদিংমক্না খুঙ্গংগী শেন্মিৎলোনবু খুমাং চাউশিলহল্লি অমসুং ইজ ওফ লিভিং হেনগৎহল্লি।
মরুপশিং,
হৌখিবা চহিদা, ঐহাক গঙ্গাইকোন্দা চোলাপুরমদা অমদি তিরুবথিরাই ফেস্তিবেলগীদমক লাকপা অসিদা নুংঙাইবা ফাওখি। ঐখোয়না নিংথৌ রাজেন্দ্র চোলনা শাগৎলকপা লাইশং অসিগী চহি লিশিং মপুং ফারকপগী থৌরম পাংথোকখি। মসি য়ু.এন.ই.এস.সি.ও.না শকখঙনরবা মফম অমনি অমসুং মালেম পুম্বদগী তুরিস্ত কয়া অমা চিংশিল্লি। ঙসি, ঐখোয়না মফম অসিদা মরুওইবা হাইৱে প্রোজেক্ত অমগী উরেপ উয়ুং তম্লি। হৌজিক লৈরিবা হায়ৱে অসি লাইশঙ অসিগী মনাক্তা য়াম্না নক্না চৎলি, মসিনা লাই খুরুম্বা লাকপা মীওইশিং অমসুং তুরিস্তশিংদা সেফতীগী মতাংদা খন্ননিংঙাই ওইহল্লি। অনৌবা বাইপাস অমা শাবগা লোইননা, হৌজিক্তি অতৈ গারীশিংবু লাইশং অসিদগী লাপথোক্লগনি। মসিনা মীপুম খুদিংমক্কীদমক হেন্না ফবা সেক্যুরিতী অমা লৈহল্লগনি।
মরুপশিং,
মমাং চয়োলদা, মাদুরাইদগী ঐখোয়না অমৃত ভারত প্রোগ্রামগী মখাদা মোদর্নাইজ অমসুং রিদেবেলপ তৌরবা স্তেসন ৮ শঙ্গাখি। ঙসি অনৌবা ত্রেন সর্ভিস কয়া অমা ফ্লেগ ওফ তৌখ্রে। মখোয়না নাগরকোইল, কোইম্বতোর, রামেশ্বরম, তিরুনেলভেলি, মৈলাদুথুরাই, কারাইকুদিগুম্বা মফমশিংবু অতোপ্পা মফমশিংগা শম্নহল্লি। অনৌবা ত্রেন সর্বিসশিং অসিনা তুরিজম হেনগৎহল্লগনি, লোকেল ইকোনোমী হেনগৎহল্লগনি অমসুং নহারোলশিংদা থবক কয়া ফংহল্লগনি। ঐখোয়গী পান্দমদি চাউখৎলবা ভারতকীদমক চাউখৎলবা তামিল নাদু শেমগৎপনি। কেন্দ্র সরকারনা তামিল নাদুগী মীয়ামগী য়াইফনবা মপুং ফানা হোৎনরি। ঐখোয়না রাজ্য অসিগী চাউখৎ-থৌরাংগীদমক নুমিৎ নিনি চুপ্না থবক তৌরি অমসুং ঐখোয়না মখা তানা থবক তৌগনি।
নন্দ্রি
