খুরুমজরি!
জিতো কন্নেক্তকী মীফম অসি নীংতমবগী ৭৫শুবা চহিগী অমৃৎ মহোৎসব মতমসিদা পাঙথোক্লি। মতম অসিদগী লৈবাকসিনা নীংতমবগী অমৃৎ কালদা খোঙ থাংজিল্লি। লাক্কদৌরিবা চহি ২৫ অসি লৈবাকসিগী ওইনা সনা ফুদোংবা ভারত অমা ওইহন্নবগী খোঙফম ওইগদৌরিবনি। মরম অসিনা অদোম্না থমবিরিবা থীম অসিমকসু য়াম্না মরুওইবা অমা ওইরি। তুগেদর, তুৱার্দ্স, তুমুরো ! ঐনা হায়জনিংবদি ৱাফমসিমক্নি পুম্নমক্না হোৎনমিন্নবগী ৱাখল্লোন্দা নীংতমবগী অমৃৎ কালসিদা খোঙজেল য়াঙহনগদবা লাইৱাদুনি। লাক্কদৌরিবা চহি ৩সিদা অদোমগী হোৎনবগী ৱাখল্লোনবু চাওখৎপগী মায়কৈদা চঙশিন্নবা, খুন্নাইগী মমৈদা লৈরিবা মীওই অদুগীসু শরুক থুংবা হায়বা ৱাখল্লোন অসিবু মপাঙ্গল কনহল্লিবা অদোমগী মীফম অসি মখা তানা পাঙথোকপা ঙমবা ওইসনু হায়না ঐনা য়াইফ-পাউজেল পীজরি। মীফম অসিদা মাঙলমচৎ অমসুং তুংলমচত্তা লৈরিবা মীৎয়েঙ, শিংনবশিং থেংননবা পাম্বৈ থিগদৌরিবনি। ময়াম পুম্নমক্কী মফমদা নুংঙাইবা ফোঙদোকচরি, য়াইফ-পাউজেল পীজরি।
মরূপশিং,
ঐনা ময়ামগী মরক্তা তিন্ননবা তাঞ্জা কয়া ফংখ্রবসু হন্দক্কী অসিদসু ময়ামগা হকথেংননা উনবা ফংলম্লবদি হেন্না নুংঙাইরমগদবনি, অদুবু ভর্চুএল ওইরবসু ময়ামগা উনবা ফংলে।
মরূপশিং,
ঙরাং ঐ য়ুরোপকী লৈবাক কয়া কোয়না চৎলুরবা মতুংদা অমদি ভারতকী খোঙফম অমসুং হোৎনরিবশিং লোয়ননা নীংতমবগী অমৃৎ কালসিদা ভারত্তা লৈরিবা খুদোংচাবশিংগা মরী লৈননা মীওই কয়া অমগা মচা খায়না খন্ন-নৈনরুরবা মতুংদা হল্লকপনি। ভারতকী মফমদা থম্লিবা আশা অমসুং থাজবশিং অসিদা ময়াম মরক্তা মীরমদা চৎপা, মীরমদা লৈবা মীওইশিংনা শোয়দনা ফাওবিরমগনি। মালেমগী মফম অমদা লৈরবসু নৎত্রগা ভারতকী কাচিন অমদা লৈরবসু ভারত মচা খুদিংমক ঙসিদি চাওথোকচবা ফাওরি। ঐখোয় ইশানা ইশাবু থাজবগী চাংসু মসিনা হেনগৎহল্লি, অনৌবা থৌনা পীরি। ঙসি ভারতকী চাওখৎপগী ফিরেপ মালেমসিনা মখোয়গী পান্দম তান্নবগী পাম্বৈ অমা ওইনরি। মালেমগী ইং-তপ্পা, মালেমগী নুংঙাই-য়াইফবা, মালেমগী শিংনবগা মরী লৈনবা পাম্বৈশিং ওইরবসু নৎত্রগা মালেমগী সপ্লাই চেন মপাঙ্গল কনখৎহনবা ওইরবসু মালেমসিনা হৌজিক্তি ভারতকী মায়কৈদা মীৎয়েঙ থমবা হৌনরক্লি অমসুং চাউনা থাজবগা লোয়ননা য়েংনরক্লি।
মরূপশিং,
মালেমসিদা লৈঙাক্লোনগা মরী লৈনবা মীওইশিং ওইরবসু, চৎন-পথাপ শেমবগা মরী লৈনবা মীওই ওইরবসু নৎত্রগা অদোমগুম্বা অওনবা খুন্নাই অমা পুরক্নবগীদমক লেপ্লিবা মীওইশিং ওইরবসু নৎত্রগা লল্লোন ইতিক্কী লমদা থবক তৌরিবা মীওইশিং ওইরবসু, খঙ-হৈরিবা লম, চঙশিল্লবা হীরম অমা হেক্তা ওইরবসু, ৱাখল্লোন্দা ফনা খেন্নবা লৈরবসু অনৌবা ভারতকী মঙলান্না পুম্নমকপু শম্নহল্লি। ঙসিদি ভারতনা ওইথোকপা য়াবা অমসুং মতিংগী ৱাংমা লান্দুনা মালেমগী য়াইফনবগীদমক পান্দমগা লোয়ননা থবক পাঙথোক্তুনা মাঙদা চঙশিল্লি হায়না মীপুম খুদিংনা খঙনরে।
মরূপশিং,
অসিগুম্বা খন্ন-নৈনবা মীফম অমদা অদোমগী মফমদা ঐনা পুকচেল শেংনা, পুক্নিংদা অমকপা লৈতনা অমদি অচমবা মতৌদা ৱাফম খরা হায়খি। অদোমগা লোয়ননা ময়াম অমা খন্ন-নৈনখি। হৌখিবা চহি ৮সিদা হায়রিবা লম্বীসিদা চত্তুনা লৈরিবা ফীভমদা অহোংবা লাক্লিবশিং ঐখোয়গী নুংতিগী পুন্সিদা থেংনরি। ঙসি লৈবাকসিনা তেলেন্ত, ত্রেদ অমসুং তেক্নোলোজীবু হেক য়ারিবমখৈ য়োকখৎলি। ঙসি লৈবাকসিনা নুমিৎ খুদিংগী, ভারত মচা খুদিংমক, মরুওইনা নহাশিংনদি য়াম্না চাউথোকচগদবা মওং অমদা ঙসি লৈবাকসিদা নুমিৎ খুদিংগী স্তার্ত অপ দজন কয়া লিংখৎলক্লি, চয়োল খুদিং য়ুনিকোর্ন অমম থোরক্লি। ঙসি লৈবাকসিনা কম্প্লাইএন্স লিশিং কয়া মুত্থত্তুনা, পুন্সিবু হেন্না লায়থোকহন্দুনা, হিংনবগী লম্বীসু লায়থোকহন্দুনা, লল্লোন ইতিক তৌবসু লায়থোকহন্দুনা খোঙথাঙ অমগী মথংদা অমা পায়খত্তুনা ভারত মচাশিংবু চাওথোকচবা ফাওহল্লি। ঙসি ভারতকী তেক্সকী থৌওং ফেসলেস ওইরে, ত্রান্সপেরেন্ত ওইরে, ওনলাইন ওইরে, ৱন নেসন ৱন তেক্স লৈরে। হায়রিবা মঙলান অসিবু ঐখোয়না মঙফাওনহল্লি। ঙসি লৈবাকসিদা মেনুফেকচরিংবু য়োকখৎনবগীদমক লুপা করোর লাখ কয়াগী প্রদক্সন লিঙ্ক ইন্সেন্তিব স্কিম নীংথিনা চৎনরি।
মরূপশিং,
লৈঙাক্কী থৌওংশিংদা কমদৌনা মনুং মপান ফাওনা উবা ঙমবা ফীভম লাক্লিবা হায়বগী অথোইবা খুদম অমা হায়রগদি ঐখোয়গী লৈঙাক্না পোত্থোকশিং লৈবগী মওং অসিনি। গোভর্নমেন্ত ই-মার্কেতপ্লেস হায়বদি জি.ই.এম. পোর্তেল চৎনবা হৌরকপদগী লৈবগী থবক পুম্নমক ফম্বাক অমদা মীয়াম খঙনা তৌরি। হৌজিক্তি অরাপ্পা খুঙ্গঙগী মীওইশিংনা, অপীকপা দুকান্দারশিংনা অমদি সেল্ফ হেল্প গ্রুপশিংনা মশামক্না অতোপ্পগী মতেং য়াওদনা লৈঙাক্তা হকথেংননা মখোয়গী পোত্থোক য়োনবা য়ারে। মফমসিদা তিনবিরিবা ময়ামগী মরক্তা মখোয়গী দি.এন.এ.দা লল্লোন ইতিক চুদুনা লৈখ্রবা মীওইশিং য়াওরি। করিগুম্বা অমা নৎত্রগা অমা লল্লোনবগী ৱাখল খন্দুনা লৈবা হায়বসি অদোমগী ৱাখলদা, মতৌদা য়াওদুনা লৈরবনি। ঐনা জিতোগী মীপুম খুদিংদা হায়জনিংবদি, মালেমগী মফম কয়াদা চাইথোক্তুনা লৈরিবা ময়ামগী মফমদা হায়জনিংবদি ভারত লৈঙাক্কী জি.ই.এম. পোর্তেল অসিবু অমুক্তং ওইরবসু নৈনদুনা য়েংবিয়ু। অমুক্তং চঙদুনা য়েংবিয়ু অদুগা অদোমগী লমদা লৈঙাক্না মথৌ তাগদবা পোৎলমশিং লৈরবদি লৈঙাক্তা লৈহন্নবগীদমক য়াম্না লায়না চঙবা য়ারে। অদোম্না মীওই কয়াগী মতেং অমা পাংবা ঙমগনি। লৈঙাক্না য়াম্না ফবা ফম্বাক অমা শেম্লে। ঙসি জি.ই.এম. পোর্তেলদা সেল্লর লাখ ৪০ হেন্না য়াওরে। মশাগী পোত্থোক য়োন্নিংবা মীওই লাখ ৪০না রেজিস্তর তৌরকখ্রে। অদুগা ঐনা নুংঙাইরিবা ৱাফমদি মখোয় ময়ামগী মনুংদা অয়ামবা শরুক্তি এম.এস.এম.ই., অপীকপা লল্লোনবা অমসুং ইন্দস্ত্রী, অমসুং ঐখোয়গী নুপী সেল্ফ হেল্প গ্রুপকী ইচল ইচেশিংনি। অদুগা অদোম্না খঙবদা নুংঙাইগদবা ৱাফম অমদি হায়রিবা সেল্লর ময়ামসিগী মনুংদা লাখ ১০দি শুপ্নতগী হৌখিবা থা মঙাসিদা য়াওরকখিবনি। অনৌবা থৌরাং অসিদা মীয়াম্না কয়া য়াম্না থাজবা থম্লিবগে হায়বা মসিনা উৎলি। লৈঙাক্তা করিগুম্বা খরা তৌনবগী থৌনা লৈরবদি, অমদি মীয়ামগী ঙাক্লৌ লৈরবদি, পুন্না হোৎনমিন্নবগী ৱাখল্লোন মপাঙ্গল কল্লবদি অহোংবা পুরকপদা কনানসু থিংবা ঙমদে, অহোংবা পুরকপা ঙম্মি হায়বা মসিনা উৎলি। অদুগা হায়রিবা অওনবা অদু ঙসি ঐখোয়না উরি, ঐখোয়না থেংনরি।
মরূপশিং,
তুংলমচৎকী ঐখোয়গী লম্বী অমসুং পন্থুং অনিমক ময়েক শেংলে। আত্মনিরভর ভারতনা ঐখোয়গী লম্বীসু ওইরি অমদি ঐখোয়গী পান্দমসু ওইরি অমদি মসি লৈঙাক্কী ৱাফম নত্তে ভারত মচা করোর ১৩০গীনি। হৌখিবা চহিশিংদা মসিগীদমক ঐখোয়না মথৌ তাবা খোঙথাঙ খুদিংমক লৌখৎখি, চুনবা ফীভম পুরক্নবগীদমক লেপ্পা লৈতনা হোৎনখি। লৈবাকসিদা লাক্লিবা অফবা ফীভম অসিবু মওং চুম্না শীজিন্নদুনা পান্দমশিং ফংনবগী থৌদাং হৌজিক্তি অদোমগুমবা ঐগী মরূপশিংদা লৈরে, জিতোগী লূপ্লোয়শিংদা লৈরে। অদোমদি মফম অমদা চৎলবসু, মী অমগবু উনরবসু অদোমগী নোংমগী তঙ্খায় অমদি তুংদা লাক্কদৌরিবশিংগী মতাঙদা খন্নবগী ৱাখল্লোন লৈনবা মীওইশিংনি। অদোমদি হৌখ্রবা থৌদোকশিংদা পন্দুনা লৈগদবা মীওইশিং নত্তে। অদোমদি তুংলমচৎকী মায়কৈদা য়েংবা মীওইশিংনি অমসুং ঐনা অদোমগুমবা ময়ামগী মরক্তা চাওরকপনা অদোমগী মওং মতৌ কমদৌবগে হায়বা খঙই, অমদি মরম অসিনা ঐনা অদোমগী মফমদা হায়জরি মদুদি অদোমগী, মরুওইনা ঐগী জেন ফুরূপকী ওন্ত্রপ্রিন্যুর, ইনোভেতরশিংগী থৌদাং য়াম্না চাওই। নীংতমবগী কুমহৈ অসিদা জেন ইন্তরনেস্নেল ত্রেদ ওর্গনাইজেসনদা লূপ অমা ওইনা অমসুং লুপ্লোয় পুম্নমক্কী মফমদা লৈবাকসিনা থাজবা য়াম্না থম্লি। মহৈ মশিং, হকশেল অমসুং য়াইফ-থৌরাংগী লূপ মচা মচা ওইরবসু জেন ফুরূপ্না বেস্ত ইন্সতিত্যুসন, বেস্ত প্রাক্তিস অমসুং বেস্ত সর্ভিসপু মতম পুম্নমক্তা পুক্নিং থৌগত্তুনা লাক্লি অমদি ঙসিসু খুন্নাইসিনা অদোমগী মফমদা চাউনা থাজবা থম্লি অদুগা ঐগী ওইনদি অদোম্না লমদমসিগী ইন্দস্ত্রীশিংদা মতিং হাপ্লক্কনি হায়না অখন্ননা থাজবা থমজরি। ভোকেল ফোর লোকেল লাইৱাগা লোয়ননা মাঙদা চঙশিন্দুনা অদোম পুম্নমক্না এক্সপোর্তকী অনৌবা পন্থুংসু থিবিয়ু অমসুং অদোমগী লমদা লৈরিবা লমদমসিগী এন্তরপ্রাইজশিংবুসু য়োকখৎপিয়ু। লমদমসিগী ইন্দস্ত্রীশিংবু মতিং লৈহন্নবা অমদি অকোয়বগী ঈশিং নুংশিৎকী ফীভমদা হেক য়ারিবমখৈ চৈথেং হন্থহন্নবগীদমক ঐখোয়না জিরো দিফেক্ত, জিরো ইফেক্ত হায়রিবা পরিংসিদা থবক তৌবা তাই। অদুগা ঙসি তিনবিরিবা জিতোগী লুপ্লোয়শিংদা ঐনা অপীকপা হোমৱর্ক অমা পীবা পাম্মি, অদোম্না তৌবিরক্কনি হায়বসিমদি ঐনা থাজৈ, অদুবু হায়রক্তবসু য়াই অদুবু তৌবদি তৌবিয়ু। অদোম তৌরোইদরানে! খুৎ থাঙ্গৎপিদুনা হায়বিয়ু তৌরোইদরনে! ফরে ইমুংগী মী পুম্নমক ফম্মিন্নরগা অয়ুক্তগী মথঙগী অয়ুক ফাওবা অদোমগী পুন্সিদা মপান লমগী পোৎলম কয়া শীজিন্নবগে হায়বা লিস্ত অমা শেমবিয়ু। চাকখুমদা, নুংতিগী পুন্সিদা করম করমবা পোৎলমশিং মপান লৈবাক্তগী লাকপনো হায়বা য়েংবিয়ু অদুগা ভারতকী পোৎলম্না মহুৎ শিল্লবসু য়াবা করি করি লৈবগে হায়বদু তিক মার্ক তৌবিয়ু অদুগা ইমুং পুল্লগা ঐখোয়না পোৎলম ১৫০০গী লিস্ত শেম্লে অদুগা মসিদগী পোৎলম ৫০০দি থা অসিগী মনুংদা মপান লমগী পোৎলম শীজিন্নবা তোক্লসি হায়বা ফিরেপ লৌবিয়ু। মথংগী থাদা ২০০ অমগা খন্দোকপিয়ু, মথংদা ১০০। পোৎলম ২০, ২৫ ৫০দি মপান্দগী পুশিল্লকপা মথৌ তাগনি হায়না খনবা য়াওরক্কনি, মদু ফাওবদি কম্প্রোমাইজ তৌরসি হায়না খল্লক্কনি। অদুবু মরূপশিং ঙসি ঐখোয়না নীংতমবগী অমৃৎ মহোৎসব পাঙথোক্লবসু মীরমগী পোৎলমশিংগী মখা পোন্না হিংলি হায়বসি ঐখোয়না খঙজদে। ইস্ত ইন্দিয়া কম্পেনীসু অসুম্না চঙলকখিবনি, করিমত্তা খঙহৌবা নত্তে অদুনা ঐনা হন্না হন্না জিতোগী লুপ্লোয় পুম্নমক্কী মফমদা হায়জনিংবদি, অদোম করিমত্তা তৌদ্রবসু তোকপিয়ু, ঐনা হায়রিবসি য়ানিংদ্রগসু তোকপিয়ু, অদুবু চে অমদা লিস্ত অমদি শোয়দনা শেমবিয়ু। ইমুংগী মীওই খুদিংসু ফম্মিন্নবিয়ু, অদোমসু খঙলমদবা য়াই, অদোমগী ইমুংদা শীজিন্নরিবা পোৎলমশিং অদু মীরমদগী লাকপনি হায়বসি, অদুগা অদোম্না মীরমদগী পুশিল্লক্নবগী হায়বসু হায়রম্লোই অদুবু অদোম্নদি শীজিন্নরি। মরম অসিনা ঐনা হন্না হন্না ভোকেল ফোর লোকেল, ঐখোয়গী লৈবাক্কী মীওইশিংদা থবক পীনবা, ঐখোয়গী মীয়ামদা খুদোংচাবা পীনবা ৱাফম হেক হেক হায়রিবা। করিগুমবা ঐখোয়না ঐখোয়গী পোত্থোক্তা চাউথোকচবা ফাওরবদি মালেম অসিনসু ঐখোয়গী পোৎলমশিংগীদমক চাউথোকচবা ফাওগদৌরিবনি। মসিদা শেল থানসি মরূপশিং।
মরূপশিং,
ঐনা অদোমগী মফমদা ৱাফম অমগা থমজনিংই, আর্থকীদমক্তনি। জেনিজমগী মীওই অমনা আর্থ হায়বসি তাদে অমদি মসিগী মরমদা ৱাখল খন্দে। অদুবু ঐ অতোপ্পা আর্থ অমগী ৱা হায়গে। ঐনা হায়রিবা আর্থ অসিগী ৱাফম হৌদোরকপসিদা ই হায়বদি এনভাইরনমেন্তকী মতাঙদা চঙশিল্লিবা থবক থৌওংশিংদা অদোম্না পুক্নিং থৌগৎপিয়ু। মথঙ চহিগী ওগস্ত ১৫ ফাওবদা দিস্ত্রিক্ত খুদিংদা য়ামদ্রবদা অমৃৎ সরোবর ৭৫ শেমগৎনবা হোৎনরিবা অসিদা অদোম্না করমবা ঙাক্লৌ পীবা ঙমবগে হায়বসিদা অদোম্না শোয়দনা নৈনবিয়ু। ইনা এনভাইরনমেন্ত হায়খিবগুম এ হায়বদি এগ্রিকলচরবু হেন্না কান্নবা ওইহন্নবা মহৌশাগী লৌউ-পথাপ, জিরো কোস্ত বজেতিংগী লৌউ-পথাপ, ফার্মিং তেক্নোলোজী অমসুং ফুদ প্রোসেসিং হেক্তরদা ঐগী জিতোগী নহাশিংনা মাঙদা থোরক্তুনা স্তার্তঅপ হৌদোক্তুনা শেল থাদবিয়ু। মথংদা আর হায়বদি রিসাইক্লিংদা, সর্কুলর ইকনমীদা মতিং হাপ্পিয়ু, রিয়ুজ, রিদ্যুস অমসুং রিসাইকলগী থবক পায়খৎপিয়ু। তি হায়বদি তেক্নোলোজীবু হেক য়ারিবমখৈ মীয়ামদা য়ৌহনসি। অদোম্না দ্রোন তেক্নোলোজীগুম্বা অতৈ মতমগা চুনবা তেক্নোলোজীশিংবু মীয়াম্না কমদৌনা শীজিন্নহনগদগে হায়বসিদা খনবা য়াই। ঐচ হায়বদি হেল্থকেয়র, লৈবাকসিগী দিস্ত্রিক্ত খুদিংদা মেদিকেল কলেজকী খুদোংচাবা লৈহন্নবা লৈঙাক্না অচৌবা থৌরাং অমা ঙসি পায়খৎলি। অদোমগী লূপ্না মসিদা কমদৌনা চৈঙাক পীবা য়াবগে হায়বসিদা শোয়দনা খন্থবিয়ু। অয়ুসকী লমদা রিছর্চ অমসুং দেভেলপমেন্তকী থবক থৌওংশিং য়োকখৎনবগীদমক অদোমগী মফমদগী থৌদাং য়াম্না চাউনা লাক্কনি হায়না লৈবাকসিনা থাজবা থম্লি। মীফম অসিদগী নীংতমবগী অমৃৎ কালগীদমক ৱাফম কয়া থোরক্কনি, অথোইবা পাম্বৈ কয়া থোরক্কনি হায়না ঐনা থাজৈ। অদুগা অদোম্না মতম পুম্নমক্তা নীংশিংবিগদবদি, অদোমগী মমিংদসু “জিতো” হায়বা ৱাহৈসি য়াওরবনি। অদোম্না অদোমগী পান্দম ফংবা ঙমবা ওইবিয়ু, অদোমগী পন্থুং য়ৌবা ঙমবা ওইবিয়ু, মায় পাকপতা ওইবিয়ু হায়না থৌনিজবগা লোয়ননা চৎলি। হায়রিবা ৱাখল্লোনসিগা লোয়ননা অমুক্কা হন্না ময়ামগী মফমদা য়াইফ পাউজেল পীজরি!
জয় জিনেন্দ্র ! থাগৎচরি !
