ভারত ইমানা য়াইফরে।
ভারত ইমানা য়াইফরে।
ফম্বাক্তা লেংশিনবীরিবা শ্রীমান প্রফুল পতেল, এম.পি. শ্রী বিনোদ সোনকর, এম.পি. ইচল কলাবেন, জিলা পরিশদকী অধ্যক্ষ নিশা ভবরজী, ভাই রাকেশ চৌহানজী, মেদিকেল মালেমগী মরুপশিং, অতোপ্পা মীথুংলেন অমসুং মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং! কেম ছো মজা, সুখ মা, সন্তোশ মা, অনন্দ মা, প্রগতী মা, বিকাস মা... ৱাহ। ঐহাক্না মফমসিদা লাকপা খুদিংদা থৱাই য়াম্না নুংঙাইজৈ। দামন, দিয়ু, দাদ্রা অমসুং নগর হবেলীগী চাউখৎ থৌরাংগী খোঙজেল অসি উবদা থৱাই য়াম্না নুংঙাইজৈ। অশুক য়াম্না পীক্লবা মফম অসিদা মোদর্ন ওইবা মওংদা অমসুং খোঙজেল য়াঙনা চাউখৎপগী মমি অমা ঐখোয়না ভিদিওদা উখ্রিবা অদুমাইনা তৌগনি হায়বসি কনানসু খল্লম্লোই, অদুবু ঐখোয়না ইমিৎনা উরবনি।
মরুপশিং,
লমদম অসিগী মিৎয়েং চঙনিংঙাই ওইবা ৱাফম অমদি, ঐখোয় অসি হান্নগী সিল্বাসা নত্ত্রবনি, ঐখোয়গী সিল্বাসা অসি কোস্মোপোলিতান ওইরবনি। সিল্বাসাদা লৈতবা ভারতকী মীওই কাঙলুপ অমত্তা লৈরম্লোই। ঐখোয়গী হৌরকফমসু নুংশি, অদুগা মোদর্ন হায়বা ৱাফম অসিদসু মান্নবা মিৎয়েং থম্লি। কেন্দ্রনা লৈঙাকপা লমদম অসিগী হৌজিক্কী ওইরিবা ফিভম অসি য়েংলুরবা মতুংদা সরকারনা তোঙান-তোঙানবা থাক্তা থবক কয়া পায়খৎলি। মফমসিদা ক্বালিতী লৈবা ইনফ্রাস্ত্রকচর, লম্বী শোরোক, থোং, স্কুল, ৱাতর সপ্লাইবু হেন্না ফগৎহন্নবা কেন্দ্রনা অকনবা মিৎয়েং চঙদুনা হোৎনরি। খুদোংচাবশিং অসি ফংহন্নবগীদমক্তা ঐখোয়গী সরকারনা মমাংগী চহি 5তা লুপা করোর 5000 হেন্না চাদিং তৌখ্রবনি। মৈগী বিলগা মরী লৈনবা খুদোংচাবা, স্ত্রীত লাইতশিংবু LEDনা লংহনবা, মসিগুম্বা হীরম কয়াদা লমদম অসিদা অহোংবা অমা য়াম্না থুনা লাক্লি। য়ুম্থোং খুদিং চত্তুনা ফত্ত-হৌদী খোম্বা ওইরো, ৱেস্ত প্রোসেসিং চাদা চাম্মা তৌবা ওইরো, কেন্দ্রনা লৈঙাকপা লমদম অসিনা অতোপ্পা রাজ্যশিংদা ইথিল পীরি। অফমসিদা পুরকখিবা অনৌবা ইন্দস্ত্রী পোলিসী অসিনা মফমসিগী ইন্দস্ত্রী চাউখৎহনবা, থবক্কী অনৌবা খুদোংচাবা পীবদা মশক থোক্না তেংবাংলি। ঐহাক্না লমদমসিগী লুপা করোর লিশিং 5কী অনৌবা প্রোজেক্ত কয়া হৌদোকপগী খুদোংচাবা অমসু ঙসি ফংজরে। প্রোজেক্তশিং অসিদি হকশেল, হাউজিং, তুরিজম, এজুকেসন অমসুং দিভেলপমেন্তকা মরী লৈনবা ঙাক্তনি। মসিনা ইজ ওফ লিবিং হেন্না ফগৎহনগনি। ইজ ওফ তুরিজম হেন্না ফগৎহনগনি। ইজ ওফ ত্রান্সপোর্তেসন হেনগৎহনগনি অদুগা ইজ ওফ দুইং বিজনেসসু মশক থোক্না ফগৎলগনি।
মরুপশিং,
ঐহাক্না ঙসি য়াম্না নুংঙাইবা ফাওবগী মরম অমসু লৈ। ঙসি শঙ্গারিবা প্রোজেক্ত কয়া অসিগী মনুংদা ঐহাক্না উরেপ উয়ুং তমখিবা কয়া অমা য়াওরি। ঐখোয়গী লৈবাক অসিদা সরকারগী প্রোজেক্তশিংনা মতম কুইনা পন্দুনা মতম শাংনা লৈরম্মি। করিগুম্বা মতাংদদি, উরেপ উয়ুং তম্বগী নুঙ ফাওবা কায়দুনা তুখিবা য়াওরিবনি, মদু ফাওবদা প্রোজেক্ত লোইদ্রিবনি। অদুবু, ঐখোয়গী সরকারনা মমাংগী চহি 9দা অনৌবা থৌওং হৌদোক্লে, থবক তৌবগী চৎনবী শেমদোক্লে। থবক অয়া হৌরবদি, মদুবু অথুবা মতমদা লোইশিন্নবা ঐখোয়না মপুং ফানা হোৎনৈ। থবক অমা হেক লোইবগা অতোপ্পা অনৌবা থবক অমা হৌই। সিল্বাসাগী ঙসিগী থৌরম অসি মসিগী ময়েক লারবা খুদম্নি। অদুনা, ঐহাক্না পুম্নমকপু থাগৎচরি।
মরুপশিং,
কেন্দ্রগী বি.জে.পি. সরকারনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রগী মখা পোন্না চৎলি। লৈবাক্কী মফম খুদিং চাউখৎপা, লমদম খুদিংনা থাক মান্ননা চাউখৎপা হায়বসিদা ঐখোয়না অকনবা মিৎয়েং চঙলি। অদুবু চাউখৎ থৌরাংবু রাজনিতী অমসুং ভোত বেঙ্ককী মখা পোন্না লৈবাক অসিদা দিকেদ কয়াদা লৌদুনা লাকখিবা অসিদি ঐখোয়গী লাইবক থীবনি। স্কিম অমসুং প্রোজেক্তকী ৱাফম কয়া লাউথোকপদু উরগদি য়াম্না তৌরবোই নিংই। অদুবু তসেংবদি করি তৌনরম্মি, কদাইদগী ভোত য়াম্না লাক্কনি, করম্বা খুন্নাই হরাওহনবা মতমদা ভোত হেন্না ফংগনি, মসিদা লোইনা চৎলম্মি। শঙ্গা লৈজদবা, ৱা ঙাঙবা ঙমজদবশিংদি মীরাইবিখি, চাউখৎপগী মনুংদা চলহনখিদে। মসিনা মরম ওইদুনা ঐখোয়গী ত্রাইবেল, ঙমখৈগী লমদমশিংনা চাউখৎলমদ্রিবনি। ঐখোয়গী ঙামীশিংবু অদুমক থাদোকপীরম্মি। দামন, দিয়ু, দাদ্রা অমসুং নগর হবেলীসু মসিগুম্বা থৌওংগী চৈথেং ফংদুনা লাকখি।
ঐহাক্তি গুজরাত্তা লৈরম্বনিনা মখোয়না তৌবা খুদিংমক উদুনা লাক্লবনি। ঙসি মশাগী কেম্পস ফংলিবা মেদিকেল কোলেজ অসিনা মসিগুম্বা মীচঙ মীখায় নাইবগী থৌওং অসি নিংথীনা থেংনখ্রবনি। নিংতম্বা ফংবদি দিকেদ কয়া হৌখ্রে, অদুবু দামন, দিয়ু, দাদ্রা অমসুং নগর হবেলীদা মেদিকেল কোলেজ অমা ফাওবা লৈত্রিবসু মরুপশিংনা অমুক্তা য়েংবীয়ু। মফমসিগী মশিং থীবা য়াবা নহা খরতনা মেদিকেল তম্বগী খুদোংচাবা ফংই, মদুসু অতোপ্পা মফমদা। অদুগা ত্রাইবেল ইমুং-মনুংগী মচাশিংদি মসিগুম্বা খুদোংচাবা অসিদি শুকফং ফংদ্রে। দিকেদ কয়াদা লৈবাক্কী সরকার পায়দুনা লাকখিবা মখোয়না মফমসিগী নহাশিংগী করিমত্তা খনবীদে। মসিগুম্বা অপীকপা লমদম অসিদগী থোইদোক্না কান্নবা ফংলোই হায়না মখোয়না খল্লম্মি। অদোমগী থৌজালগী মগুন মখোয়না খঙদে। ইং 2014দা অদোম্না ঐহাক্কী ইফমদা মীয়ামগী সেবা তৌনবা খুদোংচাবা পীখিবা মতমদা অদোমগী মতেং পাংগনি হায়বা ৱাখল্লোনগা লোয়ননা ঐহাক্না থবক তৌবা হৌখি, ইশাবু মীয়ামদা কত্থোক্তুনা থবক তৌবা হৌখি। মসিগী মহৈ ওইনা দামন, দিয়ু, দাদ্রা অমসুং নগর হবেলীনা মশাগী অহানবা নেস্নেল একাদমিক মেদিকেল ওর্গনাইজেসন (NAMO) মেদিকেল কোলেজ ফংজখি। হৌজিক্তি, মফমসিগী লোকেলগী নহা 150না চহি খুদিংগী দাক্তর তম্বগী খুদোংচাবা ফংলে। চহি খরগী মতুংদা মফমসিদগী দাক্তর লিশিং অমমুক্তি থোক্লগনি। অশুক য়াম্না পীকপা মফমসিদগী দাক্তর লিশিং অমা থোক্লকপা হায়বসিগী মতাংদা অদোমসু অমুক্তা খন্থবীয়ু। মসিদসু, ঐখোয়গী ত্রাইবেল খুন্নাইগী নহাশিংগী মশিং হেনগৎলক্লি। ত্রাইবেল ইমুংদগী লাকপা ইচানুপী অমনা মেদিকেলগী অহানবা চহিদা তম্লি হায়না ঐহাক্না পাউ অমা মফমসিদা লাক্ত্রিঙৈ মমাংদা থেংনখ্রে। ঐহাক্কী ইমুংগী ৱাদি তোকপীরো, ঐহাক্কী খুঙ্গংদগী মীওই অমত্তনা ঙসি ফাওবদা দাক্তর ওইদ্রি হায়না মহাক্না পাউমীশিংদা হায়খি। দাদ্রা অমসুং নগর হবেলীদা মেদিকেল কোলেজ অমা লৈবসি ইচানুপী অসিনা মহাক্কী লাইবক ফবনি হায়না খল্লিবনি।
মরুপশিং,
থবক তৌনিংবগী ইথিল লৈবা হায়বসিনা মফমসিগী মীয়ামগী শক্তাক্নি। মফমসিগী মেদিকেল মহৈরোইশিংনা কোরোনাগী মতমদা মাঙ থানা থোক্লক্তুনা মীয়ামগী মতেং পাংখিবদু ঐহাক্না ঙসিসু নিংশিংলি। কোরোনাগী মতম অসিদদি ইমুং মনুংগী মীওই ফাওবনা মখোয় মশেলগী সেবা তৌনদবা মতম্নি। অদুবু, মহৈরোইশিং অসিনা মীয়ামগী সেবাগীদমক্তা খুঙ্গংশিংদা চৎখিবনি। অদোম্না ভিলেজ এদোপ্সন প্রোগ্রাম চত্থখিবা অদুগী মতাংদা ঐহাক্না মন কী বাত্তা ৱারী শাখ্রে হায়না ঐহাক্না মহৈরোইশিং অসিগী মফমদা খঙহঞ্জরি। মফমসিগী দাক্তর অমসুং মহৈরোইশিংনা মশাগী থৌদাং পাংথোকখিবা অদুনা মীয়ামদা ইথিল পীখিবনি। ঐহাক্না থবক অসিগী মরী লৈনবা মীপুম খুদিংবু ইকায় খুম্নজরি অমসুং থাগৎচরি।
ইচিল ইনাওশিং,
সিল্বাসাগী অনৌবা মেদিকেল কোলেজ অসিনা মফমসিগী হকশেলগী পথাপ্তা মতেং য়াম্না পাংগনি। মফমসিগী অনকপদা সিভিল হোস্পিতাল অমা লৈরিবা অসিদা প্রেসর কয়াম্না লৈরম্মি হায়বা অদোম্না খঙলে। হৌজিক্তি, ফমুং 300 থাবা অনৌবা হোস্পিতাল অমসু দামন্দা শারি। আয়ুর্বেদগী হোস্পপিতাল অমা শাবগী অয়াবসু সরকারনা পীখ্রে। মসিনা হায়বদি, লাক্কদৌরিবা মতমশিংদা সিল্বাসা অমসুং লমদম অপুনবা অসিগী হকশেলগী পথাপ অসি মপাঙ্গল য়াম্না লৈরগনি হায়বনি।
মরুপশিং,
ঐহাক্না গুজরাতকী মুখ্য মন্ত্রী অমা ওইনা মফমসিদা কয়ারক হন্না লাক্লম্লে হায়বা অদোম্না খঙলিবদুনি। অম্বাজীদগী হৌরগা উমরগাও ফাওবগী পরিং অসিগী স্কুল অমত্তদা সাইন্স তম্বীদবা অদু ঐহাক্না মতমদুদা উবা ফংজখি। সাইন্স তমদ্রবদি, অঙাংশিংনা দাক্তর, ইঞ্জিনিয়র করম্না ওইগনি? মরম অদুনা, ঐহাক্না মফমসিগী স্কুল অমসুং কোলেজশিংদা সাইন্স তম্বীবা হৌদোকহনখি। ঐখোয়গী ত্রাইবেলগী অঙাংশিংনা অচৌবা শিংনবা অমা থেংনৈ, মখোয়না অতোপ্পা লোলদা মহৈ তম্মি। ইংলিশ মেদিয়মদা লাইরিক তাকপনা মরম ওইরগা, খুঙ্গংগী লাইরবা, মাইনোরিতী অমসুং ত্রাইবেল ইমুংগী হৈ-শিংলবা অঙাং ফাওবনা দাক্তর অমসুং ইনিজিনিয়র তম্বা ঙমদে। শিংনবা অসিগী ৱারোইশিন ঐখোয়গী সরকারনা পুরক্লে। হৌজিক্তি ভারতকী লোল, মশাগী মমালোলদা দাক্তর অমসুং ইঞ্জিনিয়র তম্বা য়ারে। থৌওং অসিনা লমদমসিগী অঙাংশিংদা য়াম্না চাউনা মতেং পাংগনি। লাইরবা মমানা মচানা দাক্তর তম্বগী মঙলান মঙফাওনহনবা ঙম্লগনি।
মরুপশিং,
মেদিকেল কোলেজকা লোয়ননা ইঞ্জিনিয়রিং কোলেজ অমসু ঙসি শঙ্গারি। মসিনা মরম ওইরগা, মফমসিগী চাউরাকপা নহা 300না ইঞ্জিনিয়রিং তম্বগী চহি খুদিংগী খুদোংচাবা ফংলগনি। লৈবাক্কী মমিং লৈরবা ইন্সতিত্যুসনশিংনা দামন, দিয়ু, দাদ্রা অমসুং নগর হবেলিদা মখোয়গী ব্রাঞ্চ হাংবা হৌরকপা অসিদা ঐহাক্না নুংঙাইবা ফাওই। দামন্দা NIIFTগী কেম্পসন হাংলে, সিল্বাসাদা গুজরাত নেস্নেল লো য়ুনিভর্সিতীগী কেম্পস লৈরে। দিয়ুদা IIIT বদোদরানা মখোয়গী কেম্পস হাংলে। অদুগা, মসিগী অনৌবা মেদিকেল কোলেজ অসিনা সিল্বাসাগী ফেসিলিতীশিংবু অনৌবা থাক্তা পুরগনি। ঐখোয়গী সরকারনা লমদমসিগী মহৈরোইশিংগী তুংগী অফবা পুন্সি অমা হিংবা ঙমহন্নবগীদমক্তা হোৎনফম খুদিং হোৎনরি হায়না ঐহাক্না লমদমসিগী মহৈরোইশিংদা থাজবা পীরি।
ইচিল ইনাওশিং,
ঐহাক্না সিল্বাসাদা মমাংদা লাকপা মতমদা বিকাসকী পঞ্চধারাগী মতাংদা ৱাফম থম্লমখি। বিকাসকী পঞ্চধারা হায়বদি, অঙাংশিংগী মহৈ-মশিং, নহাশিংগী শেন্থোক লম্বী, অহল লমনশিংগী হিদাক লাংথক, লৌমীশিংগী ইরিগেসন অমসুং মীয়াম পুম্বগী ৱা তাবা হায়বনি। ঐহাক্না ঙসিদি মসিদা ধারা অমগা হাপচিল্লগে। মদুদি, নুপীশিংদা মশাগী ময়ুম ফংবগী থাগৎপা। ঐখোয়গী সরকারনা মমাংগী চহিশিংদা লৈবাক্কী লাইরবা ইমুং করোর 3 হেনবগী পক্কা য়ুম শাবীদুনা পীখি। মফম অসিদসু ঐখোয়গী সরকারনা য়ুম লিশিং 15 হেন্না শাদুনা লাইরবশিংগী মফমদা খুৎশিন্ননবা ৱারেপ লৌরবনি। মসিগী মনুংদগী য়ুম অয়াম্বা শাবা লোইরে। ইমুং 1200 হেনবনা ঙসিসু মশাগী য়ুম ফংলগনি। অদুগা পি.এম. অৱস য়োজনাগী মখাদা য়ুম শাবীরিবশিং অসিদা নুপীশিংবুসু মান্নবা হক ফংহল্লি। হায়বদি, ঐখোয়গী সরকারনা দামন, দিয়ু, দাদ্রা অমসুং নগর হবেলীগী নুপী লিশিং কয়াদা মশাগী ময়ুমগী মপু ওইহনবগী থবক পায়খৎলি হায়বনি। য়ুম, লৌ, গারী, দুকান অমদি লন থুম কয়া লৈবদা নুপাগী মমিংদা ঙাক্তা লৈনৈ হায়বসিদি অদোম্না খঙলে। নুপীগী মইংদা করিমত্তা লৈদে। অদুবু ঐখোয়না য়ুমশিং অসি নুপীশিংগী মমিংদা পীরি। অদুগা য়োজনা অসিগী মখাদা শারিবা য়ুমশিং অসি অমদা লুপা লাক্ষ অমা হেন্না চঙই হায়বা অদোমসু খঙলবনি। অদুনা, য়ুম ফংলিবা নুপী খুদিং অসি লাক্ষপতি ওইরবনি। হৌজিক্তি মখোয়শিং অসি ইচে লাক্ষপতি হায়রগা খঙনরগনি। মখোয়না লুপা লাক্ষ অমা হেনবা য়ুমগী য়ুম্বু ওইরবনি। মশাগী মিংদা য়ুম ফংলিবী মখোয়গুম্বী লাক্ষপতি ইচে-ইচলশিংবু ঐহাক্না থাগৎচরি।
মরুপশিং,
ভারতনা হোৎনবগী মরম ওইনা হন্দক্কী চহি অসিবু মালেমগী মিল্লেতকী চহি হায়না সেলেব্রেসন তৌনরি। মিল্লেত হায়বদি অপৌবা হৱাই চেংৱাই হায়বনি, ঐখোয়গী সরকারনা মসিবু শ্রী অন্না হায়না কৌরি। মফমসিগী লৌমীশিংনা মখোয়গী লোলদা নগলী নত্ত্রগা নচনী হায়না কৌনবা রাগী থারি, মসিসু ঐখোয়গী সরকারনা পুক্নিং থৌগৎলি। রাগীদগী শাবা আতা, কুকিজ, ইদলী লদ্দু ওইরো, মখোয়শিং অসি শিৎপগী চাং য়াম্না ৱাংলে। মসিনা লৌমীশিংদা কান্নবা কয়াসু ফংহল্লে। ঐহাক্না মন কী বাত্তা মসিগী মতাংদা ৱারী শাবনি। অদুগা মথংগী নোংমাইজিং নুমিত্তা মন কী বাতনা 100শুবা তাঙ্কক মপুং ফারগনি হায়বা অদোমসু খঙলে। ভারতকী মীয়ামগী হোৎনজমনশিংবু লৈবাক মীয়াম মাঙদা পুরকপদা মন কী বাতনা অচৌবা থৌদাং লৌদুনা লাক্লি। অদোম্না ঙাইবগুম্না, ঐহাকসু মন কী বাতকী 100শুবা তাঙ্কক অসিবু খৌরাংনা ঙাইরি।
মরুপশিং,
খুদোংচাবা কয়া অসুম্না হেনগৎলক্লিবা মতম অসিদা, ঐহাক্না দামন, দিয়ু, দাদ্রা অমসুং নগর হবেলীবু মতিক লৈবা মফম অমা ওইনা ঐহাক্না উরি। লমদমশিংনা অসিনা তুরিজমগী মশক নাইবা মফম অমা ওইরকপগী মতিক লৈ। ভারতপু মালেমগী তুরিজমগী খ্বাইদগী পাম্নবা পন্থুংফম অমা ওইহন্নবা ঐখোয়না ঙসি থবক কয়া পায়খৎলি, অদুনা মফম অসিগী মরু ওইবসু য়াম্না হেনগৎলে। দামনগী রামসেতু অমসুং নানি দামন মেরিন ওভর্ভ্যু (NaMo) লম্বী হায়না মিংথোন্দুনা সিফ্রন্ত অনি শেমগৎলিবা অসিনা লমদমসিগী তুরিজম চাউখৎহনবদা য়াম্না চাউনা তেংবাংগনি। ৱিকেন্দদা লাকপা তুরিস্তশিংগী পাম্নবা মফম অমা মসিনা ওইরক্লগনি। মফমসিদা লাকপা লমকোয়বশিংগী খুদোংচানবগীদমক্তা সমুদ্র মপানগী লমদমশিংদা অনৌবা তেন্ত সিতী শারি হায়না ঐহাক্না তারি। ঐহাক্না ঙৈহাক লৈরগা নানি দামন মেরিন ওভর্ভ্যু (NaMo) লম্বীদা চৎকদৌরিবনি। মসিগী সিফ্রন্ত অসিনা লৈবাক অমসুং মালেমগী মীয়ামগী পুক্নিং চিংশিনগনি। মসিগা লোয়ননা খনবেল রিভরফ্রন্ত, দুধনি জেত্তী, ইকো রিজোর্ত অমা শারিবশিং অসিনা তুরিজম্বু য়াম্না চাউখৎহল্লগনি। কোস্তেল প্রোমেনেদ, বিচ দিভেলপমেন্তকী প্রোজেক্তশিং অসি লোইরকপা মতমদা লমদম অসিগী ফজবা য়াম্না হেনগৎলগনি। মসিনা থবক্কী খুদোংচাবা কয়া অমা পুদুনা লাক্লগনি।
ইচিল ইনাওশিং,
মীওই খরবু পেলহনবগী থৌওং থাদোক্তুনা ইশাগী নুংঙাইজবা হায়বসিদা লৈবাক অসিনা অনৌবা মিৎয়েং চঙদুনা থবক তৌরি। শোত্থরবশিংবু পুখৎপা হায়বসি মমাংগী চহি 9গী লৈঙাক্কী শক্তাক ওইরবনি। কেন্দ্র সরকারনা লৈবাক্কী লৈজদবা, শোত্থরবা খুন্নাই, লমদম খুদিংদা খুদোংচাবা য়ৌহন্নবা খোঙজেল য়াঙনা থবক তৌরি। স্কিমশিংগী সেচ্যুরেসন ফংলকপা, সরকার মশানা লৈত লাইরশিংগী মনাক্তা চঙশিনবা মতমদা মীচঙ মীখায় নাইবগী মতৌ মাঙখিগনি, শেঞ্জ থুমজা লেপখিগনি, শাগৈ নাতৈগী চৎনবী লোইখিগনি। দামন, দিয়ু, দাদ্রা অমসুং নগর হবেলীদা কেন্দ্র সরকারগী স্কিম কয়ানা অথুবা মতমদা সেচ্যুরেসন পোইন্ত য়ৌরগনি হায়বসিদা ঐহাক্না নুংঙাইবা ফাওই। মসিগী হোৎনজমন কয়া অসিনা অদোমগী মফমদা থাজবা হেনগৎলক্কনি, চাউখৎপা ভারতকী পান্দম ফংবদা লাইগনি। ঐহাক্না চাউখৎ থৌরাংগী থবকশিং অসিগীদমক্তা খ্বাই পুম্নমকপু অমুক্কা হন্না থাগৎচরি।
ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
হন্ন-হন্না থাগৎচরি!
