ভাৰত মাতা কী জয়৷
ভাৰত মাতা কী জয়৷
মঞ্চত উপস্থিত শ্ৰীমান প্ৰফুল্ল পেটেল, সাংসদ শ্ৰী বিনোদ সোণকাৰ, সাংসদ ভগ্নী কালাবেন, জিলা পৰিষদৰ সভানেত্ৰী নিশা ভৱৰ জী, ভাই ৰাকেশ সিং চৌহান জী, চিকিৎসা জগতৰ বন্ধুসকল, অন্যান্য গণ্যমান্য ব্যক্তি আৰু মোৰ মৰমৰ ভাই-ভনীসকল৷ কেম চো মাজা, সুখ মা, সন্তোষ মা, আনন্দ মা, প্ৰগতি মা, বিকাশ মা...ৱাহ। যেতিয়াই ইয়ালৈ আহোঁ তেতিয়াই মোৰ হৃদয় আনন্দৰে ভৰি পৰে। দমন, দিউ, দাদৰা আৰু নগৰ হাভেলীৰ উন্নয়ন যাত্ৰা দেখি মোৰ বহুত আনন্দ লাগিছে। আৰু এতিয়া ভিডিঅ’টো চোৱা কোনোৱেই কল্পনা কৰিব নোৱাৰে যে ইমান সৰু এলেকাত চাৰিফালে কিমান আধুনিক আৰু দ্ৰুত বিকাশ হৈছে, সেইটো আমি ভিডিঅ’টোত বহুত ভালকৈ দেখিছো।
বন্ধুসকল,
এই অঞ্চলৰ এটা ডাঙৰ বৈশিষ্ট্য হ’ল আমাৰ ছিলভাছা এতিয়া আগৰ দৰে নহয়, ই মহানগৰ হৈ পৰিছে। ভাৰতৰ এনে কোনো কোণ নাথাকিব য’ৰ মানুহ ছিলভাছাত নাথাকে। আপুনি নিজৰ শিপা ভাল পায় কিন্তু আধুনিকতাক সমান আত্মীয়তা প্ৰদান কৰে। এই কেন্দ্ৰীয় শাসিত অঞ্চলৰ এই গুণ দেখি কেন্দ্ৰীয় চৰকাৰে বিভিন্ন স্তৰত দ্ৰুতগতিত কাম কৰি আছে। উন্নত মানৰ আন্তঃগাঁথনি, উন্নত ৰাস্তা, দলং, ভাল স্কুল নিৰ্মাণ, ভাল পানী যোগান ইত্যাদি সকলোবোৰৰ ওপৰত কেন্দ্ৰীয় চৰকাৰে যথেষ্ট গুৰুত্ব দিয়ে। বিগত ৫ বছৰত এই সকলোবোৰ সা-সুবিধাৰ বাবে ৫,৫০০ কোটিতকৈ অধিক ধন ব্যয় কৰা হৈছে। বিদ্যুতৰ বিলৰ সৈতে জড়িত ব্যৱস্থা থাকিব লাগে, সকলো ষ্ট্ৰীট লাইট এলইডি হ’ব লাগে, এই অঞ্চলটো দ্ৰুতগতিত সলনি হৈ আছে। ঘৰে ঘৰে আৱৰ্জনা সংগ্ৰহৰ সুবিধাই হওক বা ১০০% আৱৰ্জনা প্ৰক্ৰিয়াকৰণৰ সুবিধাই হওক, এই কেন্দ্ৰীয় শাসিত অঞ্চলে সকলো ৰাজ্যকে অনুপ্ৰাণিত কৰিছে। ইয়ালৈ অনা নতুন ঔদ্যোগিক নীতিয়ে ঔদ্যোগিক উন্নয়ন বৃদ্ধি আৰু নতুন নিয়োগৰ সুযোগ সৃষ্টিৰ ক্ষেত্ৰতো সহায়ক বুলি প্ৰমাণিত হৈছে। আজি পুনৰবাৰ প্ৰায় ৫ হাজাৰ কোটি টকাৰ নতুন প্ৰকল্প উদ্বোধন কৰাৰ সুযোগ পাইছো। এই প্ৰকল্পসমূহ স্বাস্থ্য, গৃহ নিৰ্মাণ, পৰ্যটন, শিক্ষা আৰু নগৰ উন্নয়নৰ সৈতে জড়িত। ইয়াৰ ফলত জীৱন-যাপনৰ সহজতা বৃদ্ধি পাব। ইয়াৰ ফলত পৰ্যটনৰ সহজতা বৃদ্ধি পাব। ইয়াৰ ফলত পৰিবহণৰ সহজতা বৃদ্ধি পাব। আৰু ইয়াৰ ফলত ব্যৱসায়ৰ সহজ পৰিৱেশ বৃদ্ধি পাব।
বন্ধুসকল,
আজি আৰু এটা কথাত মই বহুত সুখী। আজি উদ্বোধন হোৱা বহু প্ৰকল্পৰ আধাৰশিলা স্থাপন কৰাৰ সৌভাগ্য আপোনালোক সকলোৱে মোক দিছিল। আমাৰ দেশৰ চৰকাৰী প্ৰকল্পবোৰ বছৰ বছৰ ধৰি অসম্পূৰ্ণ হৈ আছিল, ফাইল আবদ্ধ হৈ আছিল, ইফালে সিফালে ঘুৰি আছিল। বহু সময়ত আনকি আধাৰশিলাবোৰো পুৰণি হোৱাৰ পিছত ভাগি গৈছিল যদিও প্ৰকল্পবোৰ সম্পূৰ্ণ নহ’ল। কিন্তু বিগত ৯ বছৰত আমি দেশত এক নতুন কৰ্মশৈলী গঢ়ি তুলিছো, নতুন কৰ্ম সংস্কৃতি লৈ আহিছো। এতিয়া যিটো কামৰ বাবে আধাৰশিলা স্থাপন কৰা হৈছে, সেই কামটো ক্ষিপ্ৰতাৰে সম্পূৰ্ণ কৰাৰ বাবে সকলো প্ৰচেষ্টা চলোৱা হৈছে। এটা কাম শেষ কৰাৰ লগে লগে আমি আন এটা কাম আৰম্ভ কৰোঁ। ছিলভাছাৰ এই কাৰ্যসূচী ইয়াৰ প্ৰত্যক্ষ প্ৰমাণ। ইয়াৰ বাবে আপোনালোক সকলোকে আন্তৰিক অভিনন্দন জনাইছো।
বন্ধুসকল,
সবকা সাথ, সবকা বিকাশ, সবকা বিশ্বাস আৰু সবকা প্ৰয়াসৰ মন্ত্ৰৰে কেন্দ্ৰৰ বিজেপি চৰকাৰ চলি আছে। আমি দেশৰ প্ৰতিটো অঞ্চলৰ উন্নয়ন, দেশৰ প্ৰতিটো অঞ্চলৰ বহনক্ষম উন্নয়নৰ ওপৰত বহুত গুৰুত্ব দিছো। কিন্তু দেশৰ দুৰ্ভাগ্য এই যে বহু দশক ধৰি বিকাশক ৰাজনীতি আৰু ভোটবেংকৰ পাল্লাত জোখা হৈছিল৷ আঁচনি আৰু প্ৰকল্পৰ ঘোষণাবোৰলৈ চালে আগতে বহু কথাই হৈছিল। কিন্তু আগতে কেনেকুৱা আছিল, ক’ৰ পৰা কিমান ভোট পোৱা যাব, কোন শ্ৰেণীক সন্তুষ্ট কৰিলে ভোট পাব৷ যিসকলক চুব পৰা নাছিল, যাৰ মাত দুৰ্বল আছিল, তেওঁলোক অভাৱতে থাকি গ’ল, উন্নয়নৰ যাত্ৰাত তেওঁলোক পিছ পৰি ৰ’ল। এই কাৰণেই আমাৰ জনজাতীয় অঞ্চল, আমাৰ সীমান্তৱৰ্তী অঞ্চল উন্নয়নৰ পৰা বঞ্চিত হৈ থাকিল। আমাৰ মাছমৰীয়াসকলক নিজৰ যত্ন ল’বলৈ এৰি দিয়া হ’ল। এই মনোভাৱৰ বাবে দমন, দিউ, দাদৰা আৰু নগৰ হাভেলীয়েও বহুত মূল্য ভৰিবলগীয়া হৈছে।
মই গুজৰাটত আছিলো, আগতে এই লোকসকলক কি কৰিছিল অবিৰতভাৱে চাই আছিলো। আজি নিজাকৈ চৌহদ লাভ কৰা চিকিৎসা মহাবিদ্যালয়খন এই অন্যায়ৰ ডাঙৰ সাক্ষী হৈ পৰিছে। আপোনালোকে ভাবে বন্ধুসকল, স্বাধীনতাৰ দশক পাৰ হৈ গ’ল, কিন্তু দমন, দিউ, দাদৰা আৰু নগৰ হাভেলীত চিকিৎসা মহাবিদ্যালয় নিৰ্মাণ নহ’ল। ইয়াৰ যুৱক-যুৱতীসকল কমেইহে কেনেবাকৈ চিকিৎসা বিজ্ঞান পঢ়াৰ সুযোগ পাব পাৰিছিল, সেয়াও আন ঠাইত। ইয়াতো জনজাতীয় পৰিয়ালৰ পুত্ৰ-কন্যাৰ অংশগ্ৰহণ নগণ্য আছিল। দশক দশক ধৰি দেশত শাসন কৰা সকলে ইয়াত যুৱক-যুৱতীসকলৰ এই ভয়াবহ অন্যায়ক লৈ কেতিয়াও চিন্তিত নাছিল। তেওঁলোকে ভাবিছিল যে এই সৰু কেন্দ্ৰীয় শাসিত অঞ্চলটো উন্নয়ন কৰিলে তেওঁলোকে একো নাপাব। আপোনাৰ এই আশীৰ্বাদৰ মূল্য তেওঁলোকে কেতিয়াও বুজিব পৰা নাছিল। ২০১৪ চনত যেতিয়া আপোনালোকে আমাক আপোনালোকৰ সেৱা কৰাৰ সুযোগ দিছিল, তেতিয়া আমি আপোনালোকৰ সেৱাৰ মনোভাৱেৰে কাম আৰম্ভ কৰিছিলো, নিষ্ঠাৰে কাম আৰম্ভ কৰিছিলো। ইয়াৰ ফলত দমন, দিউ, দাদৰা আৰু নগৰ হাভেলীয়ে প্ৰথম-নেচনেল একাডেমিক মেডিকেল অৰ্গেনাইজেচন (নমো) মেডিকেল কলেজ লাভ কৰে। এতিয়া প্ৰতি বছৰে প্ৰায় ১৫০ জন স্থানীয় যুৱকে ইয়াত চিকিৎসা বিজ্ঞান অধ্যয়নৰ সুযোগ লাভ কৰিছে। কেইবছৰমানৰ ভিতৰতে অতি অদূৰ ভৱিষ্যতে ইয়াৰ পৰা এহেজাৰ পৰ্যন্ত চিকিৎসকৰ সৃষ্টি হ’ব। ইমান সৰু এলেকাৰ এহেজাৰ ডাক্তৰ গড় দিয়াৰ কথাটো এবাৰ আপোনালোকে কল্পনা কৰকছোন। এইবোৰতো আমাৰ জনজাতীয় পৰিয়ালৰ যুৱক-যুৱতীৰ সংখ্যা ক্ৰমাগতভাৱে বৃদ্ধি পাইছে। ইয়ালৈ অহাৰ আগতে মই এটা বাতৰিত এজনী ছোৱালীৰ কথাও পঢ়িছিলো। জনজাতীয় পৰিয়ালৰ পৰা অহা এই ছোৱালীজনীয়ে বৰ্তমান ইয়াত প্ৰথম বৰ্ষৰ চিকিৎসা বিজ্ঞানৰ শিক্ষা গ্ৰহণ কৰি আছে। সেই ছোৱালীজনীয়ে আনকি সাংবাদিকক কৈছিল যে মোৰ পৰিয়ালটো বাদেই, মোৰ গোটেই গাঁওখনত কোনেও কেতিয়াও ডাক্তৰ হ’ব পৰা নাছিল। এতিয়া সেই কন্যাই নিজৰ সৌভাগ্য বুলি গণ্য কৰে যে এই চিকিৎসা মহাবিদ্যালয়খন দাদৰা আৰু নগৰ হাভেলীত প্ৰতিষ্ঠা হৈছে আৰু তেওঁ ইয়াৰ ছাত্ৰী।
বন্ধুসকল,
সেৱা মনোভাৱ ইয়াত মানুহৰ পৰিচয়। মনত আছে, ক’ৰোনাৰ সময়ত ইয়াৰ চিকিৎসা বিজ্ঞানৰ ছাত্ৰ-ছাত্ৰীসকলে আগবাঢ়ি গৈ ৰাইজক সহায় কৰিছিল। আৰু ক’ৰোনাৰ সময়ত পৰিয়ালটোৰ কোনোৱেই ইজনে সিজনক সহায় কৰিব পৰা নাছিল। তেতিয়া ইয়াৰ ছাত্ৰ-ছাত্ৰীসকলে গাঁৱে-ভূঞে সহায় কৰিবলৈ আহিছিল আৰু সেই ছাত্ৰ বন্ধুসকলক ক’ব বিচাৰিছো। মন কী বাতত আপোনালোকে চলোৱা গাঁও দত্তক কাৰ্যসূচীৰ কথাও উল্লেখ কৰিছিলোঁ। ইয়াৰ চিকিৎসক আৰু চিকিৎসা বিজ্ঞানৰ ছাত্ৰ-ছাত্ৰীসকলে যিদৰে নিজৰ কৰ্তব্য পালন কৰিছে সেয়া সকলোৰে বাবে এক বৃহৎ প্ৰেৰণা। ইয়াৰ চিকিৎসা সুবিধাৰ সৈতে জড়িত সকলোকে আজি তেওঁলোকে কৰা কামৰ বাবে প্ৰশংসা কৰিছো।
ভাই-ভনীসকল,
ছিলভাছাৰ এই নতুন চিকিৎসা মহাবিদ্যালয়ে ইয়াৰ স্বাস্থ্য সুবিধাসমূহৰ ওপৰতো ভিৰ কমাব। আপোনালোকেও জানে যে ওচৰৰ অসামৰিক হস্পিতালখনত ইমান ভিৰ আছিল। এতিয়া ইয়াত দমনত আৰু ৩০০ বিছনাযুক্ত নতুন চিকিৎসালয় নিৰ্মাণ কৰা হৈছে। আয়ুৰ্বেদিক চিকিৎসালয় নিৰ্মাণৰ বাবেও অনুমোদন দিছে চৰকাৰে। অৰ্থাৎ আগন্তুক সময়ত ছিলভাছা আৰু এই সমগ্ৰ অঞ্চলটো স্বাস্থ্য সুবিধাৰ ক্ষেত্ৰত অতি শক্তিশালী হোৱাৰ দিশত অগ্ৰসৰ হৈছে।
বন্ধুসকল,
আপোনালোকে মনত ৰাখিব, গুজৰাটৰ মুখ্যমন্ত্ৰী হিচাপেও মই ইয়ালৈ, আপোনালোকৰ মাজলৈ বহুবাৰ আহিছিলো। যেতিয়া চৰকাৰ গঠন কৰিছিলো, তেতিয়া দেখিছিলো যে আম্বাজীৰ পৰা উমৰগাঁওলৈকে জনজাতি বেল্টৰ কোনো বিদ্যালয়তে বিজ্ঞান পঢ়োৱা নহয়। যদি বিজ্ঞানৰ পঢ়া-শুনাই নহয়, তেন্তে ল’ৰা-ছোৱালীবোৰ কেনেকৈ চিকিৎসক আৰু অভিযন্তা হ’ব? সেইবাবেই মই তাতে স্কুল-কলেজত বিজ্ঞান পঢ়া আৰম্ভ কৰিছিলো। আমাৰ জনজাতীয় ল’ৰা-ছোৱালীয়ে আন ভাষাত পঢ়াৰ ক্ষেত্ৰতো ডাঙৰ সমস্যাৰ সন্মুখীন হয়, যিকোনো শিশুৰে হয়৷ ইংৰাজী ভাষাৰ শিক্ষাৰ বাবে গাঁৱৰ বহু প্ৰতিভাৱান পুত্ৰ-কন্যা, দুখীয়া, দলিত, বঞ্চিত, জনজাতীয় পৰিয়াল চিকিৎসক-অভিযন্তা হ’ব পৰা নাছিল। আমাৰ চৰকাৰে এতিয়া এই সমস্যাটোও সমাধান কৰিছে। এতিয়া ভাৰতীয় ভাষাত, নিজৰ ভাষাত চিকিৎসা-অভিযান্ত্ৰিক শাখাত পঢ়াৰ বিকল্প ব্যৱস্থা কৰা হৈছে। এই অঞ্চলৰ শিশুসকলে ইয়াৰ পৰা যথেষ্ট সহায় লাভ কৰাৰ দিশে অগ্ৰসৰ হৈছে। এতিয়া দুখীয়া মাতৃৰ সন্তানেও চিকিৎসক হোৱাৰ সপোন দেখিব পাৰে।
বন্ধুসকল,
আজি চিকিৎসা মহাবিদ্যালয়ৰ সমান্তৰালকৈ ইয়াত অভিযান্ত্ৰিক মহাবিদ্যালয়ো উদ্বোধন কৰা হৈছে। ইয়াৰ লগে লগে ইয়াৰ পৰা প্ৰায় ৩০০ যুৱকে প্ৰতি বছৰে অভিযান্ত্ৰিক শাখাত অধ্যয়নৰ সুযোগ লাভ কৰিব। দেশৰ ডাঙৰ ডাঙৰ শিক্ষানুষ্ঠানসমূহেও দমন, দিউ, দাদৰা আৰু নগৰ হাভেলীত কেম্পাছ খুলিছে বুলিও মই সুখী। দমনত নিফ্টৰ চেটেলাইট কেম্পাছ স্থাপন হৈছে, গুজৰাট ৰাষ্ট্ৰীয় আইন বিশ্ববিদ্যালয় চৌহদ ছিলভাছা, আইআইআইটি বদোদাৰাই ডিউত চৌহদ মুকলি কৰিছে। এই নতুন চিকিৎসা মহাবিদ্যালয়খনে ছিলভাছাৰ সুবিধাসমূহক এক নতুন মাত্ৰা প্ৰদান কৰিব। এই অঞ্চলৰ প্ৰতিজন ছাত্ৰ-ছাত্ৰীক আশ্বাস দিছো যে আমাৰ চৰকাৰে তেওঁলোকৰ উজ্জ্বল ভৱিষ্যতৰ বাবে চেষ্টাৰ কোনো ত্ৰুটি নকৰে৷
ভাই-ভনীসকল,
যোৱাবাৰ যেতিয়া মই ছিলভাছালৈ আহিছিলো, তেতিয়া মই উন্নয়নৰ পাঁচটা ধাৰাৰ কথা কৈছিলোঁ। উন্নয়নৰ পঞ্চধৰা মানে, শিশুৰ শিক্ষা, যুৱক-যুৱতীৰ বাবে উপাৰ্জন, বয়োজ্যেষ্ঠৰ বাবে ঔষধ, কৃষকৰ বাবে জলসিঞ্চন আৰু মানুহৰ শ্ৰৱণ ক্ষমতা। আজি ইয়াত আৰু এটা শিতান যোগ কৰিম। নিজৰ ঘৰ লাভ কৰা মহিলাসকললৈ বহুত অভিনন্দন। যোৱা বছৰবোৰত আমাৰ চৰকাৰে দেশৰ ৩ কোটিতকৈও অধিক দৰিদ্ৰ পৰিয়ালক পকী ঘৰ প্ৰদান কৰিছে। ইয়াতো আমাৰ চৰকাৰে ১৫ হাজাৰৰো অধিক ঘৰ সাজি দুখীয়াক দিয়াৰ সিদ্ধান্ত লৈছে। এই ঘৰবোৰৰ বেছিভাগেই সাজু হৈ আছে। আজিও ইয়াত ১২০০ৰো অধিক পৰিয়ালে নিজাকৈ মালিকানাধীন ঘৰ পাইছে। আৰু আপোনালোকে জানে যে প্ৰধানমন্ত্ৰী আৱাস যোজনাৰ অধীনত দিয়া ঘৰত মহিলাকো সমান অংশ দিয়া হৈছে। অৰ্থাৎ ইয়াত আমাৰ চৰকাৰে দমন, দিউ, দাদৰা আৰু নগৰ হাভেলীৰ হাজাৰ হাজাৰ মহিলাক ঘৰৰ মালিক কৰাৰ কাম কৰিছে। নহলে আমাৰ দেশত কেনেকুৱা হৈছে আমি জানো যে ঘৰৰ মালিক পুৰুষ, খেতিৰ মালিক পুৰুষ, দোকানৰ মালিক পুৰুষ, গাড়ীৰ মালিক পুৰুষ, যদিও আছে স্কুটাৰখনৰ মালিকো পুৰুষ। নাৰীৰ নামত একো নহয়। আমি এই ঘৰবোৰৰ মালিকীস্বত্বৰ অধিকাৰ মহিলাসকলক দিছো। আৰু আপোনালোকে এইটোও জানে যে প্ৰধানমন্ত্ৰী আৱাস যোজনাৰ অধীনত নিৰ্মাণ কৰা প্ৰতিটো ঘৰৰ খৰচ কেইবা লাখ টকা। সেইবাবেই এই ঘৰখন পোৱা এই মহিলাসকলে, লাখ লাখ টকাৰ ঘৰ পালে আৰু সেইবাবেই আমাৰ দৰিদ্ৰ পৰিয়ালৰ এই মাতৃ-ভগ্নীসকল, আমাৰ এই মহিলাসকল লাখপতি দিদী হৈ পৰিল, এতিয়া তেওঁলোকক লাখপতি দিদি নামেৰে পৰিচিত হ’ব। কাৰণ তেওঁলোকে এক লাখতকৈও অধিক মূল্যৰ ঘৰৰ মালিক হৈ পৰিছে। এই সকলো কোটিপতি ভগ্নীক যিমানেই অভিনন্দন জনাও, সিমানেই কম হ’ব৷
বন্ধুসকল,
ভাৰতৰ প্ৰচেষ্টাৰ বাবে আজি সমগ্ৰ বিশ্বই এই বছৰটো আন্তঃৰাষ্ট্ৰীয় বাজৰাৰ বছৰ হিচাপে উদযাপন কৰিছে। আমাৰ চৰকাৰে মিলেট অৰ্থাৎ মোটা শস্যক শ্ৰীঅন্নৰ পৰিচয় দিছে। আমাৰ চৰকাৰে ইয়াত কৃষকসকলে খেতি কৰা বাজৰা, যেনে ৰাগী বা স্থানীয় ভাষাত নাগলী বা নাচনী আদিৰ প্ৰচাৰ কৰিছে। আজি ৰাগীৰ পৰা তৈয়াৰী আটাই হওক, ৰাগীৰ পৰা তৈয়াৰী কুকিজেই হওক, ৰাগীৰ পৰা তৈয়াৰী ইদলীয়েই হওক, লাডুয়েই হওক, এই সকলোবোৰৰ ব্যৱহাৰ বাঢ়িছে আৰু কৃষকসকলো উপকৃত হৈছে। মন কী বাত অনুষ্ঠানত এই কথা প্ৰায়ে উল্লেখ কৰিছো। আৰু আপোনালোকে জানে যে অহা দেওবাৰে মন কী বাতৰ শততম খণ্ড, অৰ্থাৎ ১০০টা খণ্ড সম্পূৰ্ণ হ’ব৷ ভাৰতৰ জনসাধাৰণৰ প্ৰচেষ্টাক উজ্জ্বল কৰি তুলিবলৈ আৰু ভাৰতৰ বিশেষত্বক মহিমামণ্ডিত কৰাৰ বাবে মন কী বাত এক অতি উত্তম মঞ্চত পৰিণত হৈছে। আপোনালোকৰ দৰে ময়ো শততম খণ্ডৰ বাবে, দেওবাৰৰ বাবে বহুত অপেক্ষা কৰি আছো৷
বন্ধুসকল,
এই ক্ৰমবৰ্ধমান সা-সুবিধাৰ মাজতে মই দমন, দিউ, দাদৰা আৰু নগৰ হাভেলীকো ভাৰতৰ উপকূলীয় পৰ্যটনৰ উজ্জ্বল স্থান হিচাপে প্ৰত্যক্ষ কৰিছোঁ। দমন, দিউ, দাদৰা-নগৰ হাভেলী দেশৰ গুৰুত্বপূৰ্ণ পৰ্যটনস্থলী হিচাপে আত্মপ্ৰকাশ কৰাৰ সম্ভাৱনা আছে। আজি আমি যেতিয়া ভাৰতক বিশ্বৰ আটাইতকৈ আকৰ্ষণীয় পৰ্যটন স্থলী হিচাপে গঢ়ি তোলাৰ কাম কৰি আছো, তেতিয়া ইয়াৰ গুৰুত্ব আৰু বাঢ়িছে। দমনত নিৰ্মাণ কৰা ৰামসেতু আৰু নানি দমন মেৰিন অভাৰভিউ (নমো) পথেও ইয়াত পৰ্যটন সম্প্ৰসাৰণত গুৰুত্বপূৰ্ণ ভূমিকা গ্ৰহণ কৰিব। ছুটীৰ দিনত ইয়ালৈ অহা পৰ্যটকৰ বাবে এইখন প্ৰিয় ঠাই হ’ব। মোক কোৱা হৈছে যে পৰ্যটকৰ সুবিধাৰ্থে সমুদ্ৰতীৰ অঞ্চলটো নতুন টেণ্ট চিটী নিৰ্মাণ কৰা হৈছে। কিছু সময়ৰ পাছত মই নিজেই নানি দমন মেৰিন অভাৰভিউ (নমো) পথটো চাবলৈ যাম। এই সমুদ্ৰতীৰে দেশৰ লগতে বিশ্বৰ বিভিন্ন প্ৰান্তৰ পৰা পৰ্যটকক নিশ্চয় আকৰ্ষণ কৰিব। ইয়াৰ লগতে খানভেল ৰিভাৰফ্ৰন্ট, দুধনী জেটি, ইকো ৰিজৰ্ট নিৰ্মাণ, এই সকলোবোৰে ইয়াত পৰ্যটনকো প্ৰসাৰিত কৰিব। যেতিয়া উপকূল প্ৰমেনেড আৰু সমুদ্ৰতীৰ উন্নয়ন প্ৰকল্পসমূহো সম্পূৰ্ণ হ’ব, তেতিয়া এই ঠাইখনৰ আকৰ্ষণ আৰু অধিক বৃদ্ধি পাব। আৰু এই সকলোবোৰৰ পৰা ইয়াত নতুন কৰ্মসংস্থাপনৰ সুযোগ সৃষ্টি হ’ব, স্ব-নিয়োজনৰ সুযোগ সৃষ্টি হ’ব।
ভাই-ভনীসকল,
আজি দেশত তুষ্টিকৰণৰ ওপৰত নহয় সন্তুষ্টিৰ ওপৰত গুৰুত্ব দিয়া হৈছে। অভাৱগ্ৰস্ত লোকক অগ্ৰাধিকাৰ দিয়াটো বিগত ৯ বছৰত সুশাসনৰ চিহ্ন হৈ পৰিছে। দেশৰ প্ৰতিগৰাকী আৰ্ত লোকক, প্ৰতিটো বঞ্চিত শ্ৰেণী আৰু অৱহেলিত অঞ্চলক সুবিধা প্ৰদানৰ বাবে কেন্দ্ৰীয় চৰকাৰে ক্ষীপ্ৰতাৰে কাম কৰি আছে। যেতিয়া আঁচনিৰ পৰিপূৰক হয়, যেতিয়া চৰকাৰে নিজেই ৰাইজৰ দুৱাৰদলিত উপনীত হয়, তেতিয়া বৈষম্যৰ অন্ত পৰে, দুৰ্নীতিৰ অন্ত পৰে, স্বজন তোষণৰ অন্ত পৰে। কেন্দ্ৰীয় চৰকাৰৰ বিভিন্ন আঁচনিৰে দমন, দিউ আৰু দাদৰা নগৰ হাভেলীয়ে ১০০ শতাংশ কাম সম্পূ্ণ কৰিবলৈ সক্ষম হোৱাত মই সুখী হৈছো। আপোনালোক সকলোৰে এনে প্ৰচেষ্টাৰে সমৃদ্ধি আহিব, উন্নত ভাৰতৰ সংকল্প সিদ্ধি হ'ব। আকৌ এবাৰ আপোনালোক সকলোকে উন্নয়নমূলক কামৰ বাবে বহুত বহুত অভিনন্দন জনাইছো।
ভাৰত মাতা কী জয়৷
ভাৰত মাতা কী জয়৷
সকলোকে বহুত বহুত ধন্যবাদ!
