য়োর এক্সেলেন্সী, প্রধান মন্ত্রী, দা. নবিনচন্দ্র রামগুলম জী,
শ্রীমতি বীনা রামগুলম জী,
উপ প্রধান মন্ত্রী, পোল বরেঙ্গর জী,
মোরিসিয়সকী ইকাইখুম্নরবা মন্ত্রীশিং,
শক্নাইরবা ইয়াম্বা-ইনাওশিং অমসুং ইচে-ইচলশিং,
ময়াম পুম্নমকপু নমস্কার অমসুং বোঞ্জোর!
খ্বাইদগী অহানবদা, ঐহাক্না প্রধান মন্ত্রীবু মহাক্কী নুংশিরবা অমসুং পুক্নিং থৌগৎনিংঙাই ওইরবা ৱাখল্লোন অদুগীদমক্তা থমোইনুংদগী থাগৎপা ফোংদোক্লি। ঐহাক্না, মোরিসিয়সকী প্রধান মন্ত্রী, সরকার অমসুং লৈবাক মীয়াম্বু মখোয়না হরাও-তয়াম্না ওকপীবগীদমক্ত তৌবীমল খঙবা উৎচরি। ভারতকী প্রধান মন্ত্রী অমগীদমক্তদি মোরিসিয়সকী খোংচৎ অসি মতম পুম্বদা থোইদোক-হেন্দোকপা অমা ওই। মসি দিপ্লোমেতিক ওইবা খোংচৎ খক্তমক নত্তে মসি ইমুং-মনুং উনবগী খোংচৎ অমশুনি। ঐহাক্না মসিগী নক্নবা মরি অসি মোরিসিয়সকী লমদমদা খোং হেক থাবগা অদুমক ফাওই। মসিদা প্রোতোকোলগী অপনবা অমত্তা লৈতে। মোরিসিয়সকী নেস্নেল দেগী অথোইবা মীথুংলেন ওইনা অমুক্কশু হন্না চেবাউ ফংজবা অসিগী য়াম্না লাইবক ফবনি। থৌদোক অসিদা, ঐহাক্না ভারতকী প্রজা করোর ১৪০গী মাইকৈদগী নখোয়দা থমোই শেংনা য়াইফ-পাউজেল পীজরি।
শ্রী প্রধান মন্ত্রী,
মোরিসিয়সকী মীয়াম্না মরিরকশুবা ওইনা নহাকপু মখোয়গী প্রধান মন্ত্রী ওইনা খনবীরে। মমাংগী চহিদা, ভারতকী মীয়াম্না থংন-থংননা অহুম্লকশুবা ওইনা মখোয়গী সেবা ফংনবা হায়দুনা ঐহাকপু খনবীরে। ঐহাক্না তর্ম অসিগী মনুংদা নহাক্কুম্বা সেনিয়র অমসুং এক্সপরিয়েন্স লৈরবা লুচিংবা অমগা থবক তৌমিন্ননবগী তাঞ্জা ফংবা হায়বসি লাইবক্কী নোংদম্নি হায়না লৌই। ঐখোয়না ভারত-মোরিসিয়সপু অৱাংবা থাক অমদা পুখৎনবগী লাইবক ফরবা তাঞ্জা অমা পীনবীরে। ভারত অমসুং মোরিসিয়সকী মরক্তা লৈরিবা পার্তনরশিপ অসি ঐখোয়গী পুৱারিদগী লৈরক্লবা মরি অদু খক্তমক নত্তে। মসি নাকল অনিমক্তা লৈরিবা ভেল্যুশিং, অমনা অমবু থাজবা অমসুং অফবা তুংলমচৎ অমগীদমক্তা চপ মান্নবা ভিজনদা য়ুমফম ওইরগা শেম্বনি। নহাক্কী লুচিং অদুনা ঐখোয়গী মরি অসি মতম চুপ্পা লমজিং-লমতাক্তুনা অমসুং হেন্না চেশিনহন্দুনা লাকখি। মসিগী লুচিং মখাদা, ঐখোয়গী পার্তনরশিপ অসিনা লেপ্তনা চেৎশিল্লকখি অমসুং হিরম খুদিংমক্তা পাকথোক-চাউথোক্তুনা শন্দোরকখি। ভারতনা মোরিসিয়সকী চাউখৎ-থোরাংগী খোংচত্তা থাজবা অমুং য়াম্না মরু ওইবা পার্তনর অমা ওইবদা য়াম্না চাউথোকচৈ। ঐখোয়না অমত্তা ওইনা মোরিসিয়সকী মফম খুদিংদা চাউখৎ-থৌরাংগী ওইবা মরু ওইবা মুৎনাইদ্রবা খুদম-চাংদম অমা থম্লিবা অদুগুম্বা ইনফ্রাস্ত্রকচর প্রোজেক্ত কয়া অমদা পুন্না থবক তৌমিন্নরি। কেপাসিতী বিলদিং অমসুং হ্যুমেন রিসোর্স দেবেলপমেন্ততা খুৎশম্নদুনা থবক তৌমিন্নবগী ফল অদু সরকার অমসুং লনাইগী সেক্তর, অনিমক অসিদা য়াম্না ময়েক উবা ফংলি। শিংননিংঙাই ওইবা মিৎকুপ খুদিংদা, মহৌশানা থোকনবা খুদোংথববু ওইরো নত্রগা কোবিদকী লাইচৎপু ওইরো, ঐখোয়না ইমুং অমগুম্না অমত্তা ওইনা পুন্না লেপমিন্নখি। ঙসিদি ঐখোয়গী পুৱারিগী অমসুং কলচরগী ওইবা মরি অদুনা য়াম্না মপুং ফারবা পার্তনরশিপ অমগী শক্লোন লৌরক্লে।
মরুপশিং,
মোরিসিয়স অসি ঐখোয়গী য়াম্না নক্নবা মেরিতাইম য়ুম্লোন্নবনি অমসুং ভারতকী ওসীন রিজনদা য়াম্না মরু ওইবা পার্তনর অমনি। মমাংদা, ঐহাক্কী মোরিসিয়সকী খোংচত্তা, ঐহাক্না SAGARগী ভিজন সিয়র তৌখি। মসিদা খ্বাইদগী মরু ওইনা রিজনেল দেবেলপমেন্ত, সেক্যুরিতী অমসুং পুন্না নুংঙাই-য়াইফমিন্নবা হায়বা অসিনা খ্বাইদগী মরু ওইবা ৱাফম ওই। ঐখোয়না য়াম্না চেৎনা থাজৈ মদুদি গ্লোবল সাউথকী লৈবাকশিংনা অমত্তা ওইনা চুংশিন্নদুনা অমত্তা ওইবগী খোল্লাও লাওগদবনি। মসিগী ৱাখল্লোন অসিগা লোইননা ঐখোয়না ঐখোয়গী G20 প্রেসিদেন্সীদা গ্লোবল সাউথপু সেন্ত্রেল ফোকস ওইনা খ্বাইদগী মরু ওইবা থমখি। অমসুং ঐখোয়বু অখন্নবা মীথুংলেন অমা ওইনা মোরিসিয়সবু চাবাউ পীখি।
মরুপশিং,
ঐহাক্না মমাংদশু হায়জখ্রে, করিগুম্বা মালেম অসিদা ভারত্তা হক লৈবা লৈবাক অমা লৈরবদি, মদুগী লৈবাক অদুদি মোরিসিয়সনি। ঐখোয়গী মরি অসিদা অরোইবা ঙমখৈ লৈতে। ঐখোয়গী মরি অসিগী আশা অমসুং অনিংবা-অপাম্বদা অরোইবা ঙমখৈ অমত্তা লৈতে। মতুংদশু ঐখোয়না ঐখোয়গী লৈবাক মীয়ামগী নুংঙাই-য়াইফনবগীদমক্তা অমসুং রিজন অসিগী শান্তি অমসুং ঙাক-শেন্নবগীদমক্তা খুৎশম্নদুনা থবক তৌমিন্নগনি। মসিগী ৱাখল্লোন অসিগা লোইননা প্রধান মন্ত্রী, দা. নবিনচন্দ্র রামগুলম অমসুং শ্রীমতি বীনা জীবু অসোই-অঙাম য়াওদনা তেক্ত-কাইদনা হকচাং ফনা লৈনবা, মোরিসিয়সকী প্রজা মীয়ামগী চাউখৎ-থৌরাং খুমাং চাউশিন্নবা অমসুং নুংঙাই-য়াইফনা লৈনবগী অমসুং ভারত অমসুং মোরিসিয়সকী অচেৎপা মরি লৈনবগীদমক্তা ঐখোয় ময়াম পুন্না অমত্তা ওইনা থমোই শেংনা য়াইফ-পাউজেল পীমিন্নসি।
জয় হিন্দ !
বিবে মোরিস !
