বনক্কম!
পুম্নমকপু তমিল পুত্তান্দুগীদমক্তা য়াইফ পাউজেল পীজরি। ঐহাক্না ঙসি অদোমগী মরক্তা তমিল পুত্তান্দুগী নুংঙাইবা পাংথোকমিন্নবগী তাঞ্জা ফংলিবা অসি অদোম্না ঐহাকপু নুংশিবীবগীনি। পুত্তান্দু অসিদি অরিবদা অনৌবা থীবগী কুহ্মৈনি। অশুক য়াম্না লিরবা তমিল সংস্কৃতী অমসুং চহি খুদিংগী পুত্তন্দুদগী অনৌবা ইথিল লৌদুনা তুংলমচত্তা চঙশিনবগী চৎনবী অসি তসেংনা য়াম্না অখন্নবা অমনি। মসিমক্না তমিলনাদু অমসুং তমিলগী মীওইশিংবু মগুন লৈহল্লিবনি। মরমদুনা, চৎনবী অসিনা মতম পুম্বদা ঐহাক্কী পুক্নিং শুমহৎলি, মসিনসু ঐহাক্না য়াম্না পামজবা অমা ফাওজৈ। ঐহাক্না গুজরাত্তা লৈরিঙৈদা, ঐহাক্না MLA ওইনা কাখিবা মনিনগরগী বিধান সভাগী সিত অদুদা তমিল য়াম্না লৈ, মখোয়না ঐঙোন্দা ভোত পীবিদুনা MLAসু ওইহনখি, মুখ্য মন্ত্রীসু ওইহনখি। অদুগা, মখোয়গা লেনমিন্নখিবা মিৎকুপ খুদিংমক ঐহাক্না ঙসিসু নিংশিংলি। ঐহাক্না তমিলনাদুবু নুংশিবা অদুদগী হেন্না তমিল মীয়াম্না ঐহাকপু নুংশিবীবা অসি ঐহাক্কী লাইবক ফবনি।
মরুপশিং,
নিংতম্বগী চহি 75 মপুং ফারকপা মতমদা, ঐহাক্না লাল কিলাদগী ইশাগী হেরিতেজকী মতাংদা চাউথোকচনা ৱা ঙাঙখি। লিবা হেল্লিবমখৈ, তাইম তেস্তেদ ওইবসু হেল্লিবনি। মরম অদুনা, তমিল কলচর অমসুং তমিলগী মীয়াম অনিমক ৱাখল্লোন অমদা ওমোরনি, গ্লোবেলসু ওই। চেন্নৈদগী কেলিফোর্নিয়া, মদুরাইদগী মেলবর্ন, কোইম্বাতোরদগী কেপ তাউন, সেলমদগী সিঙ্গাপোর, অদোম্না মফম খুদিংদা তমিলগী মীওই থেংনগনি, মখোয়না মখোয়গী চৎনবীসু পুদুনা চৎলি। পোঙ্গল নত্রগা পুথন্দু ওইরো, কুহ্মৈ অসি মালেম শিনবা থুংনা পাংথোকই। তমিল অসি মালেমগী খ্বাইদগী লিরবা লোলনি। ভারত মচা খুদিংনা মসিগীদমক্তা চাউথোকচৈ। তমিল লিতরেচর অসিসু পাক শন্না ইকায় খুম্নৈ। তমিল ইন্দস্ত্রীসু মশক নাইবা থবক কয়া ঐখোয়গী ইফমদা পীখ্রে।
মরুপশিং,
ভারতকী নিংতম ইহৌদসু তমিলগী মীওইশিংগী অচৌবা থৌদাং লৈ। লৈবাক্না নিংতম্বা ফংলবা মতুংদা, লৈবাক শেমগৎ শাগৎপদা তমিল নাদুগী মীওইগী হোৎনজমন্না লৈবাক্কী মফমদা অচৌবা মায় পাকপা কয়া পীখি। সি. রাজাগোপালচারী অমসুং মহাক্কী ফিলোসোফী য়াওদনা মোদর্ন ওইবা ভারতকী ৱারী কনানা শাগনি? কে. কামরাজ অমসুং সোসিএল ৱেলফিয়রগা মরী লৈনবা মহাক্কী থবকশিং ঐখোয়না ঙসি নিংশিংলি। অদুগা দাঃ কলাম খঙদবা নহা লৈরমগদরা? মেদিসিন। লো অমসুং একাদমিক্সকী হীরমদা তমিল মীওইশিংনা শরুক তম্লম্বশিংগী মমল লেপ্পা ঙম্লোই। ঐহাক্না ‘মন কী বাত’ তা তমিল মীয়াম্না পাংথোক্লম্বা থৌদাং কয়াগী মতাংদা য়াম্না তোয়না হায়বনি।
মরুপশিং,
ভারত অসি মালেমগী খ্বাইদগী লিরবা গনতন্ত্রনি – গনতন্ত্রগী মমানি। মসিগী মরুমদা পুৱারী ওইবা ৱাফম কয়া লৈ, খুদম কয়া অমা লৈ। ময়ামসিগী মরক্তা তমিল নাদুগা মরী লৈনবা মরু ওইবা ৱাফমসু লৈরি। তমিল নাদুগী উত্তির মেরুর কৌবা মফম অসি য়াম্না মরু ওই। মফমসিদা চহি 1100দগী 1200গী মমাংদা ইরম্বা ইন্সকৃপসন অমা লৈ, মসিদা ইরিবা ভারতকী গনতন্ত্রগী ভেল্যুশিং অসি ঙসি ফাওবা পাবা য়ারি। মসিগী ইন্সকৃপসন অসিদি মতমদুদা লৈরম্বা ঐখোয়গী গ্রাম সভাগী সংবিধানগুম্বনি। এসেমব্লী মতৌ করম্না পাংথোক্কনি, করি ক্বালিফিকেসন লৈগনি, মেম্বর খনবগী থৌওং অসি করি ওইগনি, মসিদা নত্তনা দিস্ক্বালিফিকেসন হায়বসি করিনো হায়বা ফাওবা লেপ্লি। চহি চা কয়াগী মমাংগী পথাপ অসিদা গনতন্ত্রা হায়বসি করিনো হায়বা য়াম্না কুপ্না তাক্লি।
মরুপশিং,
ভারতপু লৈবাক অমা শেম্বদা তেংবাংবা হীরম কয়া তমিল সংস্কৃতীদা য়াওরি। খুদম ওইনা হায়রবদা, চেন্নৈদগী কিলোমীতর 70 চৎলগা লৈবা কাঞ্চিপুরমগী মনাক্তা লৈবা তিরু মুক্কুদলগী মনাক্তা ঐখোয়গী ভেঙ্কতেশ পেরুমল লাইশঙ লৈরি। চোলা শাগৈগী মতমদা শাখিবা লাইশঙ অসি চাউরাক্না চহি 1100মুক লিরবনি। লাইশঙ অসিগী গ্রানাইত নুংশিংদা মতম অমদা মফম অসিদা ফমুং 15 থাবা হোস্পিতাল লৈরম্মি হায়না ইরি। চহি 1100গী মমাংগী নুংদা হক্তুনা ইরম্বা মরোলশিংদা মেদিকেল প্রোসিজরগী মতাংদা ইরম্মি, দাক্তরশিংনা ফংবা তোলোবকী মতাংদসু ইরম্মি, হর্বেল হিদাকশিংগী মতাংদা ইরম্মি। হায়রিবসি চহি 1100 লিরবনিকো। হেথকেয়রগা মরী লৈনবা ইন্সকৃপসন অসি তমিলনাদুগী, ভারতকী চাউরবা হেরিতেজ অমনি।
মরুপশিং,
ঐহাক্না মতম খরগী মমাংদা তমিল নাদুদা চেস ওলিম্পিয়াদ হৌদোকপা চৎখিবদু ঐহাক নিংশিংলি। ঐহাক্না মফমদুদা তিরুবরুর জিলাগী অরিবা শিব মন্দিরগী মতাংদা পনখি। মসিগী অরিবা চতুরঙ্গা ভল্লবনাথর লাইশঙ অসিগা ছত্রংগা মরী লৈনৈ। মান্নবা ৱাফম অমা ওইনা, চোলা শাগৈগী লৈঙাক মতমদা তমিল নাদুগা অতোপ্পা লৈবাকশিংগা লল্লোন ইতিক তৌনবগী খুদম কয়াসু ঐখোয়না ফংবা ঙম্লে।
ইচিল ইনাওশিং,
ঐখোয়না লৈবাক অমা ওইনা হেরিতেজ অসিবু খুমাং চাউশিলহনবা হায়বসি ঐখোয়গী থৌদাংনি অমসুং মালেমগী মাঙদা চাউথোকচনা পুথোক্কদবনি। মমাংদা করি তৌরম্মি হায়বা অদোম খঙবরা? অদোম্না ঐহাক্কী ইফমদা সেবা তৌবগী খুদোংচাবা পীবিরে। ঐহাক্না য়ুনাইতেদ নেসন্সতা তমিল লোলদা করিগুম্বা অমা হায়খিবদু ঐহাক্না নিংশিংলি। মতমদুদা লৈবাক অমসুং মালেমগী মীওই কয়ানা ঐহাক্কী ইফমদা মেসেজ থারক্তুনা নুংঙাইবা ফোংদোরকখিবনি। ঐহাক্না শ্রীলঙ্কাদা জাফনাদা চৎপগী খুদোংচাবা ফংখি। ঐহাক অসি জাফনাদা চৎপা ভারতকী অহানবা প্রধান মন্ত্রীনি। শ্রী লঙ্কাদা তমিল খুন্নাইনা মখোয়গী য়াইফ য়ুম্বালগীদমক্তা মতেং পাংবীরক্নবা মতম কয়াদগী ঙাইদুনা লৈরি। ঐখোয়গী সরকারনা মখোয়গীসু থবক য়াম্না তৌখি, তমিল মীয়ামগী য়ুম শাবীখি। য়ুম চঙবগী থৌরম মফমদুদা পাংথোকপা মতমদা য়াম্না নুংঙাইবা থৌদোক অমা থোকখি। তমিলগী চৎনবীদা অনৌবা য়ুমদা অহানবা ওইনা চঙদ্রিঙৈ খুদিংদা, শিং থাদুনা শঙ্গোম লোনবগী চৎনবী অমা লৈ। ঐহাক্না মদুদসু শরুক য়াখি অমসুং মদুগী ভিদিও অদু তমিলনাদুদা য়েংনখি অমসুং ঐহাকপু য়াম্না নুংশিবিখী। ঐহাক্কা তমিল মীয়ামগা কয়া য়াম্না নক্নবা মরী লৈ হায়বা অদোম্না থেংখাং খুদিংদা উবা ফংগনি। তমিল লীয়াম্বু মতম পুম্বদা সেবা তৌনিংবগী ঐহাক্কী ৱাখল্লোন অসিনা ঐহাক্তা শক্তি পীবি।
মরুপশিং,
হন্দক্তা হৌদোকখিবা ‘কাশী তমিল শঙ্গমম’ অসি কয়া য়াম্না মায় পাক্লে হায়বা অদোম পুম্নমক্না খঙলবনি। থৌরম অসিদা ঐখোয়না অরিবা। অনৌবা অমসুং চাউখৎপবু অমত্তা ওইনা পুনশিনখি। থৌরমশিং অসিদা তমিল লিতরেচরগী মপাঙ্গলসু ঐখোয়না উখি। কাশীদা তমিল শঙ্গমম পাংথোক্লিঙৈ মনুংদা লুপা লিশিংদা পীবা তমিল লোলদা ইবা লাইরিক কয়া য়াম্না থুনা শিৎনখি। তমিল তম্বীনবা লাইরিকসু য়াম্না পাম্নখি। হিন্দি লোল ঙাঙবা মফম অমসুং হৌজিক্কী ওনলাইনগী য়ুগ অসিদা কাশীদা লৈবা হিন্দি ঙাঙবা মীওইশিংনা তমিল লাইরিকপু অশুক য়াম্না পাম্লিবা, লুপা লিশিং পীবা লাইরিক লৈরিবা অসিনা ঐখোয়গী লৈবাক্কী সংস্কৃতী মরী লৈনবগী হীরমদা খ্বাইদগী চাউবা পাঙ্গলনি।
কাশীগী মীয়ামগী পুন্সি অসি তমিল মীয়াম য়াওদনা মপুং ফাদে হায়বা ঐহাক খঙই, অমসুং ঐহাকসু কাশীগী মীওইনি। অদুগা তমিলগী মীয়ামগী পুন্সিসু কাশী য়াওদ্রদদি মপুং ফারোই। মসিগী মতৌ অসি তমিলনাদুগী মীওই অমনা কাশীদা হেক লাকপা মতমদা উবা ফংই। কাশীগী এম.পি. অমা ওইনা মসিদি ঐহাক্কী য়াম্না লাইবক ফবা ৱাফম্নি। ঐহাক্না শুম উবদা, তমিল ৱাহৈ 50-100 মুক খঙদবা হি হোনবা মীওই অমত্তা কাশীদা লৈতে। মফমসিদা অশুক য়াম্না তোৎন-তিন্নৈ। বনারস হিন্দু য়ুনিভর্সিতীদা সুব্রহ্মনিয়ম ভারতীজীগী মিংদা চেয়র অমা হৌদোকখিবা অসিসু ঐখোয়গী লাইবক ফবনি অমসুং চাউথোকচনিংঙাইনি। সুব্রহ্মনিয়ম ভারতীজীনা কাশীদা মতম য়াম্না শাংনা লেনখি, মফমসিদগী য়াম্না তমজখি। কাশী বিশ্বানাথ মন্দির অসি য়াম্না লিরবা মন্দিরনি, অদুগা মন্দির অসিগী ত্রস্তী অমা ওইনা তমিলনাদুগী মীওই অমা হাপ্পা অসি মহাক্না খ্বাইদগী অহানবনি। মহাকপু য়াম্না নুংশিবীদুনা হাপ্পীখিবনি। মসিগুম্বা নুংশিবা অসিনা এক ভারত-শ্রেস্থ ভারতকী ৱাখল্লোনগী মপাঙ্গল হেনগৎহনগদৌরিবনি।
মরুপশিং,
ঐখোয়না হৌখ্রবা মতমগী খক্তা নত্তনা লাক্কদৌরিবা মতমগী লৌশিং কয়া তমিল লিতরেচরদগী ফংই। অয়াম্বনা চহি লিশিং 2 হেল্লবা পোৎলম কয়া তমিল লিতরেচরদা য়াওই। খুদম ওইনা হায়রবদা, তমিল নাদুদা মখল কয়াগী মিল্লেত শিজিন্নরমি হায়বা ঐখোয়না সঙ্গম লিতরেচরদগী খঙবা ঙম্মি। তমিলগী অরিবা লিতরেচর, ‘অগ্নানুর’দা মিল্লেতকী মতাংদা ইরম্মি। তমিলগী শক্নাইরবী কবি, অবাইয়রনা মসিগী মতাংদা মহাক্কী ফজরবা শৈরেং, মহাও লৈরবা ‘বারাগু অরিসি চোরু’ অসিদা ইরম্মি। ভগ্বান মুরুগন্না নাইবেদ্যা ওইনা করি মথেল খ্বাইদগী য়াম্না পাম্লমবগে হায়না ঙসি হংবা মতমদা ‘তেনুম তিনাই মাবুম’ হায়না পাউখুম ফংগনি। ঙসিদি, ভারতকী লুচিং মখাদা মালেম পুম্বনা ঐখোয়গী চহি লিশিং কয়াগী মিল্লেতকী চৎনবীগা মরী লৈনরক্লি। ঐখোয়গী অনৌবা চহিগী ৱারেপ অসি মিল্লেতকা মরী লৈনহনবা ঐহাক্না পাম্মি। মিল্লেতপু ঐখোয়গী চাকচা-হৈজাগী মনুংদা অমুক্কা হন্না পুশিল্লকপা অমসুং অতোপ্পবু মসিগী মতাংদা পুক্নিং থৌগৎপা হায়বসি ঐহাক্কী অপাম্বনি।
মরুপশিং,
হৌজিক ঙৈহাক লৈরগা তমিল কলাকারশিংগী পরফোর্মেন্স উৎকনি। মসিদি ঐখোয়গী ইনাক খুল্লবা কলা অমসুং সংস্কৃতীগী খুদম্নি। মসিবু মালেম শিনবা থুংবদা য়ৌহনবা অমসুং উহনবা হায়বসি ঐখোয়গী থৌদাংনি। লোয়ননা, কলা মখল অসিবু মতমগী মতুং ইন্না চাউখৎহনবা হায়বসিদা ঐখোয়না মিৎয়েং চঙফম থোকই। ঙসিগী নহাশিংগী চারোন শুরোনগী মরক্তা মমিং চৎপা হেল্লিবমখৈ, মসিবু মথংগী চারোন শুরোন্দা অমুক পীথরম্বা ঙমগনি। মরম অদুনা, নহাশিংদা মসিগী মতাংদা খঙহনবা, মখোয়দা তাকপীবা হায়বসি ঐখোয়গী তঙাই ফদ্রবা থৌদাংনি। ঙসিগী থৌরম অসিগী হীরম অসিগী মতাংদা খুদম অমা ওইবা অসিদা ঐহাক্না নুংঙাইবা ফাওই।
ইচিল ইনাওশিং,
ঐখোয়গী হেরিতেজগী মতাংদা ঐখোয় পুন্না খঙমিন্নবা অমসুং লৈবাক অমদি মালেমগী মফমদা চাউথোকচনা তম্বা হায়বসি নিংতম্বগী অমৃত কাল অসিগী ঐখোয়গী থৌদাংনি। মসিগী হেরিতেজ অসিনা ঐখোয়গী অপুনবগী শক্তম, ‘রাস্ত্রা প্রথম’গী ৱাখল্লোনগী খুদম্নি। ঐখোয়না তমিলগী নাৎ, চৎনবী, লিতরেচর, লোলবু লেপ্তনা খুমাং চাউশিলহনগদবনি। ঐহাক্না ৱাখল্লোন অসিগা লোয়ননা ঐহাক্কী ৱারোল লোইশিঞ্জরি। ঐহাক্না পুম্নমকপু পুত্তন্দুগী অমুক্কা হন্না য়াইফ পাউজেল পীজরি অমসুং ঐহাকপু ঙসিগী থৌরম অসিদা শরুক য়াবগী খুদোংচাবা পীবিবগীদমক্তা অদোম্বু অমুক্কা হন্না থাগৎচরি।
থাগৎচরি।
