লৈবাক্কী তোঙান তোঙানবা মফমশিংদগী কেবারিয়াগী এক্তা নগরদা লাক্লিবা পুলিস ফোর্সকী মরূপশিং, এন.সি.সি.গী নহাশিং, কলাগা মরী লৈনবা আর্তিস্তশিং, লৈবাক্কী তোঙান তোঙানবা মফমদগী রন ফোর য়ুনিতীদা শরুক য়াবিরিবা ইচিল-ইনাওশিং, লৈবাকসিগী স্কুল খুদিংমক্কী মহৈরোয়শিং, অতৈ ইকায়খুম্নরবা মীওইশিং অমসুং লৈবাক মীয়ামশিং,
ঐ এক্তা নগরদা লৈরি অদুবু ঐগী ৱাখলদি মোর্বীগী অৱাবা তারবা মীওইশিংগী মনাক্তা লৈরি। অসিগুম্বা অৱাবা মীকুপ য়ামদনা ঐনা থেংনবনা ওইরম্বা য়াই। নাকল অমদা অৱাবনা থল্লবা থম্মোয়নি অদুগা নাকল অমদনা ইথৌদাংগী খোঙচৎনি। থৌদাংগী খোঙচৎ অসিদা থৌদাং য়াদুনা ময়ামগী মরক্তা তিল্লরি। অদুবু মিনুংসিনা থল্লবা পুক্নিং অসিদি অৱাবা তারবা ইমুংশিংগী মরক্তা লৈরি।
লাইবক থিবা থৌদোক অদুদা থৱায় মাঙখ্রবশিং অদুগী ইমুং মনুংশিংগী অৱাবদা শরুক য়াজরি। অৱা-অনাগী পুংফম অসিদা, অৱাবা তারবা ইমুংশিংগীদমক লৈঙাক্না লেপ্লি। গুজরাত লৈঙাক্না লৈজবা মতিং ফুদোক্তুনা, ঙরাং নুমিদাংৱাইরমদগী তেংবাং অমসুং কনবগী থবক চত্থরি। কেন্দ্র লৈঙাক্কী মায়কৈদগীসু স্তেত লৈঙাক্তা মপুং ফানা মতেং পীরি। মী কনবগী থবক্তা এন.দি.আর.এফ. কাঙবুশিং শীজিন্নরি। লান্মী অমসুং নোংথক লান্মীশিংসু তেংবাং পীবগী থবক্তা মায় ওনশিল্লি। লায়েংশঙদা লায়েং চত্থরিবশিংগী মফমদসু মপুং ফানা তেংবাং পীরি। মীয়ামগী অৱা-অনা হন্থহনবা হায়বসিদা মপুং ফানা মীৎয়েঙ চঙলি। থৌদোক্তুগী পাউ ফংলবা মতুংদা, গুজরাতকী মুখ্যমন্ত্রী শ্রীমান ভুপেন্দ্র ভাই নুমিদাংদুমক্তদা মোর্বীদা চৎখি। ঙরাংদগী হৌনা মহাক্না তেংবাং অমসুং মী কনবগী থবক য়েংশিল্লি। স্তেত লৈঙাক্কী মায়কৈদগী থৌদোক অসিগী মতাঙদা থিজিন্নবা কম্মিতীসু শেমখ্রে। তেংবাং পীবা অমদি মী কনবগী থবকশিংদা অৱাৎপা অমত্তা লৈহল্লোই হায়না ঐনা লৈবাক মীয়ামদা থাজবা পীজরি। ঙসি পাঙথোক্লিবা রাস্ত্রিয় এক্তা দিৱস অসিনসু ঐখোয় পুনশিন্দুনা লাংফমগী পুংফম অসিবু মায়োক্ননা অমদি থৌদাংগী লম্বীদা চৎননবা পুক্নিং থৌগৎলি। লুবদগী লুরবা ফীভমশিংদা সর্দার পতেলগী পুক্নিং লৈতাবা, মহাক্কী শেম শাদুনা লৈবগী উৎখিবা মতৌ তমদুনা ঐখোয়না থবক পায়খৎলি, তুংদসু মসিমক তৌখিগনি।
মরূপশিং,
ইং ২০২২গী রাস্ত্রিয় এক্তা দিৱস অসি য়াম্না মরুওইবা তাঞ্জা অমা ওইনা য়েংলি। চহি অসি ঐখোয়গী নীংতম্বগী চহি ৭৫ মপুং ফাবা চহিনি। ঐখোয়না অনৌবা ফিরেপশিংগা লোয়ননা মাঙদা চঙশিল্লি। ঙসি এক্তা নগরদা তৌরিবা পেরেদ অসিনা পুন্না চৎমিন্নরবা, পুন্না মাঙদা চঙশিনমিন্নরবদি ওইথোক্তবসু ওইথোকই হায়বা ৱাখল্লোনগী থাজবা ঐখোয়দা পীরি। ঙসি মফমসিদা লৈবাক শিনবা থুংবদগী লাক্লিবা আর্তিস্ত খরনা নাৎকী ওইবা থৌরম খরা পাঙথোক্কদবনি। ভারতকী জগোয় পুম্নমকসু উৎকদবনি। অদুবু ঙরাংগী থৌদোক কয়ামুক থম্মোয় শোকখিবগে হায়ববু ঙসি হায়রিবা থৌরমশিং অসি লৌথোকখ্রে। হায়রিবা আর্তিস্তশিং অসিনা মফমসি ফাওবা লাক্তুনা হৌখিবা নুমিৎ খরনিসিদা হোৎনখ্রবসু তাঞ্জা ফংখিদ্রে। মখোয়গী অৱাবা ঐ খঙই, অ্রদুবু ফীভম অনিনা মরম ওইরগা পাঙথোকহনবা ঙমখিদবনি।
মরূপশিং,
অসিগুম্বা লিংজেল মান্নবা, অসিগুম্বা লীচৎ ইমুং, খুন্নাই, খুঙ্গঙ, স্তেত অমদি লৈবাকসিদা থাক খুদিংদা মথৌ তাই। অদুগা হায়রিবা অসি ঙসি ঐখোয়না লৈবাক্কী মফম মফমদগী উবসু ফংলি। ঙসি লৈবাক পুম্বদা রন ফোর য়ুনিতী লিশিং ৭৫ পাঙথোক্লি, মীওই লাখ কয়ানা শরুক য়ারি। লৈবাকসিগী মীওইশিংবু য়োৎকী মী সরদার বল্লভ ভাই পতেলগী ফিদম্নফম ওইরবা মতৌনা পুক্নিং থৌগৎলি। ঙসি লৈবাক্কী মীয়াম্না অমৃৎকালগী ‘থৱায় মঙাবু’ হিঙ্গৎহন্নবগীদমক, লৈবাক্কী অপুনবগী শক্তম অমদি মপাঙ্গল কন্নবগীদমক খোঙফম শেম্লি।
মরূপশিং,
রাস্ত্রিয় এক্তা দিৱসকী তাঞ্জা, কেবারিয়া-এক্তা নগরগী লৈহাও, স্তেচু ওফ য়ুনিতীনা ঐখোয়বু, নীংতম্বগী মতমদুদা ভারত্তা সরদার পতেলগুম্বা মীৎয়েঙ শানবা মীওই লৈরমদ্রবদি করি ওইরমগনি হায়বা ইথিল অসি লেপ্পা লৈতনা ফাওহল্লি। নিংথৌ পানবা লৈবাক মচা মচা চামঙা য়াঙ্খৈ হেনবা অসি পুনশিল্লমদ্রবদি করি ওইরমগনি? ঐখোয়গী নিংথৌ মচা অয়ামবনা কত্থোকপগী ৱাখল চেল্লমদ্রবা, ইমা ভারতীদা থাজবা থম্লমদ্রবদি করি ওইরমগনি? ঙসি ঐখোয়না উরিবা ভারত অসি মঙদা ফাওবা মঙলম্লোই। হায়রিবা লুরবা থবক অসি শুপ্নতগী সরদার পতেলনা মায় পাকহল্লম্বনি।
মরূপশিং,
সরদার সাহবকী মপোক কুমওন অমদি রাস্ত্রিয় এক্তা দিৱস ঐখোয়গীদমক্তদি তারিখখক নত্তে। মসি ভারতকী নাৎকী মতিং উৎলিবা অচৌবা কুমহৈ অমসুনি। লিংজেল মান্নবা হায়বসি ভারতকীদমক্তদি নমফু কৈদৌঙৈদসু ওইখিদে। লিংজেল মান্নবা হায়বসি ভারতকী তোপ তোপ্পা মতিং ওইদুনা লাক্লি। লিংজেল মান্নবগী ৱাখল্লোন ভারতকী পুক্নিং, ঐখোয়গী থম্মোয় লাইয়ুমদা পক্তুনা লৈখিবনা, হায়রিবা ঐখোয়গী মতিং অসি ঐখোয়না হেক হেক খঙদে, করিগুম্বদসু মাঙখিবা য়াওই। অদুবু অদোমসু উবিরিবদুনি, মহৌশাগী ওইবা অমাঙ অতা লৈবাকসিদা থোক্লবা মতমদা, লৈবাক পুম্নবনা লেপমিন্নদুনা লাক্লি। থোক্লিবা লাংফম অদু অৱাংদা নৎত্রগা খাদা, নোংচুপ্তা নৎত্রগা নোংপোক্তা থোকপনি হায়বগী খেন্নবা লৈতে। ভারত পুম্বনা থৌগল, তেংবাং অমসুং মিনুংসিগা লোয়ননা পুন্না লেপমিন্নদুনা লাক্লি।
ঙরাংমক্তদা য়েংবিয়ু, মোর্বীদা লাইবক থিবা থৌদোক থোক্লবা মতুংদা লৈবাক মীয়াম পুম্বনা থৌদোক্তুদা অশি অনা নংলবা মীওইশিংগী শাফনবগীদমক্তা থৌনিখি। লমদমদুগী মীওইশিংনা মখোয়না ঙমজবা তেংবাং পীনবগীদমক থৌদোক থোকফমদা, লায়েংশঙদা থোরকখি। মদু লিংজেল মান্নবগী মতিক্নি। অসিগুম্বা কোরোনগা চাউরবা খুদম অমসু ঐখোয়গী মাঙদা লৈরি। খুবাক খুদুনা থম্মোয়গী ওইবা মরিদা পুন্না লেপমিন্নখিবদগী চেঙ-চাক, হিদাক লাংথক অমসুং ভেক্সিন পীবা ফাওবদা, লৈবাকসিনা ইমুং অমগুম মাঙদা চঙশিনখি। ঙমখৈদা, ঙমখৈ ৱাংমদা, ভারত লান্মীনা থৌনা উৎখিবদা, লৈবাক পুম্বদা চপ মান্নবা ইথিল, চপ মান্নবা ৱাখল ফাওখি। ভারতকী নহাশিংনা ওলিম্পিক্সতা মচু অহুমগী ফিরালগী মিংচৎ হেনগৎহনবদা, লৈবাক পুম্বনা চপ মান্ননা হরাওপা ফোঙদোক্নখি। লৈবাকসিনা ক্রিকেৎ মেচ অমা থোইবদা, লৈবাকসিদা চপ মান্নবা ইহুল ফাওই। ঐখোয়না খেন্নবা মওংদা হরাওবা ফোঙদোকচরবসু, ৱাখল্লোন্দি অমত্তনি। লৈবাক অসিগী লিংজেল মান্নবা, তেংবাংনবা, অমগা অমগা নুংশিনবা অসিনা ভারতনা লৈবাক অমা ওইনা কয়া য়াম্না মরা চেৎপগে হায়বদু উৎলি।
অদুগা মরূপশিং,
ভারতকী লিংজেল মান্নবনা য়েক্নববু মায়থিবা পীবনি। ঙসিগী ৱাফম নত্তনা, চহি চা কয়াগী মমাঙদা, শাংলবা মীনায় নাইথাংগী মতমদসু, ভারতকী লিংজেল মান্নবনা য়েক্নবদা চৈথেং কয়া পীখি। মরম অদুনা, মীনায় নাইথাংগী চহি চা কয়াদুগী মনুংদা ভারত্তা লাকখিবা মপান লৈবাক্কী লম খোপচিনবশিংনা ভারত্তা খেন্নবা ফীভম লৈহন্নবগীদমক তৌবা য়াবা পুম্নমক তৌখি। মখোয়না ভারতপু তোখাই তাহন্নবা, ভারতপু থুগাইনবা কন্না হোৎনখি। অদুবু ঐখোয়না মদুবু মায়োক্নবা ঙমখি, মরমদি লিংজেল মান্নবগী শিদ-হিদাক ঐখোয়দা তুরেলগী ঈচেলগুম হিংদুনা লৈখি। অদুবু মতম অদু য়াম্না শাংখি। মতম অদুদা য়ানশিল্লমবা হুদুনা মাঙহন তাকহল্লম্বশিংগী অৱা চৈনা ঙসিসু লৈবাকসিনা খাঙলি। মদুননি ঐখোয়না পার্তিসন থেংনখিবা, অমদি ভারতকী য়েক্নবনা মদুগী খুদোংচাবা লৌরিবা। মরম অসিনা ঐখোয় ঙসিসু চেকশিনবা মথৌ তাই। মমাঙথক্তা থোকখিবগুম, ভারতনা চাওখৎলকপদা অয়েৎপা পীরিবা শাফমশিং ঙসিসু লৈরি। ঙসিমক্তদা, মখোয়না ঐখোয়বু মচেৎ তাহন্নবা, খাইবুং খাইবুং তাহন্নবা লেপ্তনা হোৎনরি। ঐখোয়বু কাঙলুপকী মিংদা খৎন-চৈননবা তোঙান তোঙানবা ৱারী কয়া শেমগৎলি। ঐখোয়বা লম মচা মচাশিংগী মিংদা থুগাইনবা হোৎনরি। করিগুম্বা মতমদসু ভারতকী লোল অমবু অতোপ্পা লোল অমগী য়েক্নবগুম উহন্নবা কেম্পেনশিং চত্থৈ। পুৱারীগী ৱারীশিংসু ভারত অসি পুল্লমদবা, অমগা অমগা তোঙান তারম্বগী মওথদা পুথোক্তুনা উৎলি।
অদুগা ইচিল ইনাওশিং,
ৱাফম অমখক্তা ঐখোয় পুক্নিং চঙবা মরুওই। লৈবাকসিবু শোন্থহনবা শাফুশিং মতম পুম্নমক্তা অফোংবা য়েক্নবা ওইনা লাক্কনি হায়বা লৈতে। করিগুম্বা মতমদসু হায়রিবা শাফু অসি মীনায় নাইথাংগী ৱাখল পরিংদা ঐখোয়গী নুংদা পক্তুনা লৈবসু য়াওরি। করিগুম্বদসু শাফু অসিনা ঐখোয়গী লনাই ৱাখল্লোন্দা চঙশিল্লকই। করিগুম্বদা মসিনা ঐখোয়বু পেলহন্নবা, করিগুম্বদনা শাগৈ নাতৈগী ওইবা মওংদা, করিগুম্বদনা লৈবাকসিবু মচেৎ তাহল্লিবা কল্লক-মিহৌবা অমদি শেঞ্জা থুমজাগী মওংদা ঐখোয়গী থোঙজিন্দা লেপ্লরি। অদুবু, ঐখোয়না মদু মায়োক্নবা তাই। ঐখোয়না ভারত ইমাগী মচা অমা ওইনা থেংনবা তাই। ঐখোয়না হিন্দুস্তাতী অমা ওইনা থেংনবা তাবনি। ঐখোয় লিংজেল মান্নবা তাই। ঐখোয়না খেন্নবা থম্বগী হু অসিবু লিংজেল মান্নবগী শিদ-হিদাক অসিনা পাউখুম পীবা তাই। মসি অনৌবা ভারতকী পাঙ্গলনি।
মরূপশিং,
ঙসি ‘রাস্ত্রিয় এক্তা দিৱস’কী তানফম অসিদা ঐখোয়গী ইফমদা সরদার সাহেবনা শিন্নবিরম্বা থৌদাংশিং ঐনা অমুক্কা হন্না নীংশিংজরি। মহাক্না ঐখোয়দা লৈবাক অসিগী অপুনবগী শক্তমবু হেন্না মপাঙ্গল কনখৎহন্নবা, লৈবাক অমা ওইনা মপাঙ্গল কনখৎহন্নবা থৌদাং শিন্নবিরম্মী। হায়রিবা অপুনবগী শক্তম অসি লৈবাকসিগী মীপুম খুদিংমক্না মখোয়গী থৌদাং মশক খঙনা য়ারবা মতমদা মপাঙ্গল কনগদৌরিবনি। ঙসি, লৈবাকসিনা ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়রিবা লাইৱা অসি ইন্দুনা হায়রিবা থৌদাং অদু মশক খঙনা চাওখৎ লম্বীদা মাঙদা চঙশিল্লি। ঙসি, লৈবাকসিগী কাচিন কোয়া খুদিংদা, খুঙ্গঙ খুদিংদা, কাঙলুপ খুদিংদা অমদি মীপুম খুদিংদা খেন্নবা লৈতনা চপ মান্নবা খুজিল থৌরাংগী কান্নবা ফংহল্লি। ঙসি, গুজরাতকী সুরত্তা লৈবা মীচম অমনা ভেক্সিন লেম্না ফংবগুম, অরুনাচলগী সিয়াংদসু চপ চানা ফংলি। ঙসি গোরখপুরদা এইম্স লৈবগুম্না বিলাসপুর, ধর্ভঙ্গ, গুৱাহাতী, রাজকোৎ অমসুং লৈবাক্কী অতৈ ময়োল্লমশিংদসু লৈরি। ঙসি, নাকল অমদা তামিল নাদুদা দিফেন্স কোরিদোর শেমগৎলিবগুম উত্তর প্রদেশতসু দিফেন্স কোরিদোর খোঙজেল য়াঙনা শেমগৎলি। ঙসি অৱাং নোংপোক্কী চাকখুম অমদা নৎত্রগা তামিল নাদুদা লৈবা “সমায়াল-অরাই” অমা হেক্তদা থোংলিবা চীঞ্জাকশিং খেন্নজরবসু, ইমা অমদি ইচে-ইচলশিংবু মৈখুদগী মনীং তমহল্লিবা উজ্জ্বালা সিলিন্দরদি মফম খুদিংদা য়ৌরি। ঐখোয়গী খুজিল থৌরাংগী পান্দমদি চপ মান্নৈ – খুন্নাইগী পরিংদা খ্বাইদগী মনিংদা লেপ্লিবা মীওইদু ফাওবা য়ৌদুনা, মহাকপু চাওখৎপগী পরিংগা শম্নহনবদুনি।
মরূপশিং,
লৈবাকসিগী মীওই মিলিয়ন কয়ানা মখোয়গী তঙায় ফদনা চঙদ্রবা য়াদ্রবশিং ফংনবগীদমক মতম কয়া ঙাইরক্লে। হায়রিবা তঙায় ফদনা চঙদ্রবা য়াদ্রবশিং অসি ফংবদা খেন্নবা হন্থরিবমখৈ, অপুনবগী শক্তম মপাঙ্গল কনবা হেনগৎলক্কদৌরিবনি। মরম অসিনা, লৈবাক অসিনা লৈঙাক্কী কান্নবা পুম্নমক মীপুম খুদিংদা য়ৌহন্নবগী পান্দমদা থবক পায়খৎলি। থম্লিবা পান্দমদি স্কীম খুদিংমক্কী কান্নবশিং মীপুম খুদিংদা য়ৌহনবদুনি। মরম অদুনা, হাউজিং ফোর ওল, দিজিতেল কন্নেক্তিভিতী ফোর ওল, ক্লীন কুকিং ফোর ওল, ইলেক্ত্রিসিতী ফোর ওল অসিনচিংবা কেম্পেন কয়া পায়খৎলিবনি। ঙসিদি মীওই ১০০% য়ৌনবগী মিসন অসি মান্নবা খুদোংচাবা ফংহন্নবগী মিসনখক ওইদ্রে। মিসন অসি অপুনবগী পান্দম, পুন্না চাওখৎমিন্নবা অমদি পুন্না হোৎনমিন্নবগী মিসন অমা ওইরবনি। ঙসি, পুন্সিদা তঙায় ফদনা চঙদ্রবা য়াদ্রবশিং ১০০% ফংহনবা অসিনা মীচম মীয়াম্না লৈবাক অসিদা অমদি সংবিধান্দা থাজবা থমহন্নবগী পাম্বৈ অমা ওইরক্লি। মসিনা মীচম মীয়ামবু থাজহন্নবগী পাম্বৈ অমা ওইরক্লি। মসি ভারত মচা পুম্নমক্তা মান্নবা খুদোংচাবা ফংহন্নবা অমদি চপ মান্নবগী ৱাখল্লোন পোকহন্নবা সরদার পতেলনা ভারতকীদমক মঙলমবা মঙলান অদুনি। ঙসি লৈবাক অসিনা মঙলান অদুবু মঙফাওনহল্লি।
মরূপশিং,
হৌখিবা চহি নিপানসিদা, লৈবাক অসিনা চহি কয়া মীরাইবিদুনা থম্লম্লবা খুন্নাইগী কাঙলুপ খুদিংমক্তা মীৎয়েঙ থমদুনা চঙশিল্লক্লি। মরম অদুনা, লৈবাক অসিনা ত্রাইবেল ফুরুপশিংগী চাউথোকচনিংঙাই ওইরবা পুৱারীবু নীংশিংনবগীদমক ‘জঞ্জাতিয় গৌরব দিৱস’ (ত্রাইবেল প্রাইদ দে)গী থৌরম পাঙথোকপগী চৎনবী হৌদোক্লি। নীংতম লালহৌদা মখোয়না লৌখিবা থৌদাংশিং মীয়ামদা খঙহন্নবগীদমক লৈবাকসিগী স্তেত কয়াদা ম্যুজিয়মশিং শাগৎলি। হয়েং ঐ মনগরদা চৎকনি অদুগা মথংদা জম্বুঘোরাদসু চৎকনি। ঐনা লৈবাক মীয়ামদা মনগার ধাম অমসুং জম্বুঘোরাগী পুৱারী খঙজিনবিনবা ৱাফম থমজরি। মীরমগী লম খোপচিনবশিংনা মীওই কয়া হাত্তোকপিখ্রবা মতুংদা ঐখোয়না কমদৌনা নীংতম্বা ফংলকখিবগে হায়বদু ঙসিগী অনৌবা মীরোলনা খঙজিনবা য়াম্না মরু ওই। মদুতদা ঐখোয়না নীংতম্বা অমদি পুন্না লেপমিন্নবগী মমল খঙবা ঙমগদৌরিবনি।
মরূপশিং,
লৈবাকসিদা হায়নবা অমা লৈ:
এক্যং বলং সমাজস্য তভ্দাবে স দুর্বল:। তস্মাত এক্যং প্রশংসন্তি হন্দ রাস্ত্র হিতৈষিণ:।।
মসিনা হায়রিবদি, খুন্নাই অমগী মপাঙ্গল মাগী লিংজেল মান্নবগী মখা পোল্লি হায়বসিনি। মরম অদুনা, মপাঙ্গল কনবা লৈবাক অমগীদমক নীংজবশিংনা হায়রিবা লিংজেল মান্নবগী ৱাখল্লোন অসিবু পাম্না লৌদুনা মদু ফংনবগীদমক থবক তৌই। মরম অদুনা, লৈবাক অসিগী লিংজেল মান্নবা অমদি পুন্না লেপমিন্নবা অসি ঐখোয়গী অপুনবা থৌদাংনি। এক্তা নগর অসি লৈবাক অসিগীতা নত্তনা মালেম পুম্বগী ওইনা হান্না খন্নরুদবা মওংদা ভারতকী ফিদম্নিংঙাই ওইবা ময়োল্লম অমা ওইনা মচিন তুমখৎলক্লি। মীয়ামগী লিংজেল মান্নবা অমদি শরুক য়ামিন্নবগা লোয়ননা চাওখৎলক্লিবা এক্তা নগর ঙসিদি অচৌবা অমদি অথোইবা মফম অমা ওইরক্লি। মালেমগী খ্বাসদগী চাউবা মীতম ওইনা লৈরিবা স্তেচু ওফ য়ুনিতীনা ঐখোয়গী ফিদম ওইরি। তুংদা, এক্তা নগর অসি ভারতকী মমিং লৈরবা ময়োল্লম অমা ওইরকখিগনি। লৈবাকসিদা অকোয়বগী ফীভম ঙাক শেল্লিবা ফিদম ময়োল্লম অমগী মরমদা ঙাঙনরকপা মতমদা, এক্তা নগরনা মাঙজিল থানা পন্নরক্লগনি। মৈ চাদবা এল.ই.দি.শিংনা লংহল্লবা ফিদম ময়োল্লম অমগী মরমদা ঙাঙনরকপা খুদিং এক্তা নগরগী মরমদা ঙাঙনরক্কদৌরিবনি। লৈবাকসিদা নুংশা মঙালনা চলাইবা ক্লীন ত্রান্সপোর্ত সিস্তেমগী মরমদা ঙাঙনরকপদা এক্তা নগরগী মিং হান্না পন্নরক্লগনি। তোঙান তোঙানবা মখলগী শা উচেক য়োকখৎপগী মরমদসু এক্তা নগর মাঙজিল থানা পন্নরক্লগনি। ঙরাং ঐ মিয়াৱাকি উমং অমসুং মেজ লৈকোল শঙ্গানবগী তাঞ্জা ফংখি। এক্তা মোল, এক্তা নর্সরী, খেন্নবশিংগী মরক্তা মান্নবা লিংজেল উৎলিবা বিস্ব বন, এক্তা ফেরী, এক্তা রেলৱে স্তেসন অসিনচিংবা থৌরাংশিং অসি লৈবাকসিগী অপুনবগী শক্তম মপাঙ্গল কনখৎহন্নবা ফিদমশিংনি। হৌজিক্তি এক্তা নগরদা অরংবা থৱানমিচাক অমসু হাপচিল্লক্কদৌরে। ঙসি মসিগী মরমদা ময়ামদা থমজগে। অদোম্না সরদার সাহেব হায়রিবা ৱাহৈ অসি হৌজিক তাবিখ্রে। ঐখোয়না ঐখোয়গী থবক থৌরমশিংদা মহাক্কী ৱাখল্লোন মমি তাহল্লি। নীংতম্লবা মতুংদা লৈবাক অসিবু পুনশিনবদা সরদার সাহেবনা লৌখিবা থৌদাংদা লৈবাকসিগী নিংথৌ অমদি নিংথৌ মচাশিংনসু থৌদাং কয়া য়াখি। চহি চা কয়া লৈঙাক চুপ্লি পায়দুনা লাক্লবা নিংথৌগী ইমুংশিংনা থৌদাং মশক খঙনা লৈবাক্কী অপুনবা শক্তম পুরক্নবগীদমক অনৌবা সিস্তেম অসিদা মখোয়গী মঙম পীথোরকখি। নীংতম্লবা মতুংদা মখোয়না লৌখিবা থৌদাং মতম কুইনা মীরায়দুনা লৈরক্লে। হৌজিক্তি হায়রিবা নিংথৌগী ইমুংশিং অমসুং নিংথৌ পানবা লৈবাক মচা মচাশিংনা কত্থোকখিবশিং অদুবু নীংশিংবা ওইনা এক্তা নগরদা ম্যুজিয়ম অমা শেমগৎলগনি। মসিনা লৈবাক্কী অপুনবগী শক্তমগীদমক কত্থোকপগী চৎনবী অদু অনৌবা মীরোলশিংদা থংথরকপা ঙমগনি, অদুগা মায়কৈ অসিদা গুজরাত লৈঙাক্না অহৌবগী থবক থৌরমশিং মপুং ফানা পায়খৎখিবগীদমক্তসু থাগৎপা ফোঙদোকচরি। সরদার সাহেবকী ফিদম্না ঐখোয় পুম্নমকপু লৈবাক্কী অপুনবগী শক্তমগীদমক লেপ্পা নাইদনা পাঙ্গল হাপ্পিগনি হায়না ঐনা থাজৈ। ঐখোয় পুনশিন্দুনা মপাঙ্গল কনবা ভারত অমগী মঙলান মঙফাওনহনগনি হায়বগী থাজবা অসি থমজবগা লোয়ননা, ঐনা ময়ামগী মফমদা ঐনা ‘সরদার পতেল’ হায়না লাউরকপা মতমদা ‘অমর রহে, অমর রহে’ হায়না খুমবিরক্নবা হায়জরি।
সরদার পতেল – অমর রহে, অমর রহে!
সরদার পতেল – অমর রহে, অমর রহে!
ভারত ইমানা – য়াইফরে!
ভারত ইমানা – য়াইফরে!
ভারত ইমানা – য়াইফরে!
হন্না হন্না থাগৎচরি।
