গুজরাতকী রাজ্যপাল, শ্রী আচার্য় দেবব্রতজী, গুজরাতকী মমিং লৈরবা মুখ্য মন্ত্রী শ্রী ভুপেন্দ্র ভাই পতেল, গুজরাত সরকারগী মন্ত্রীশিং, এম.পি.শিং. অমসুং এম.এল.এ.শিং, সুরতকী মেয়র অমসুং জিলা পরিশদকী প্রসিদেন্ত, সর্পঞ্চশিং, লৌউ-শিংউগী লমগী অখং-অহৈশিং, অমসুং ভারতিয় জনতা পার্তী গুজরাত প্রদেশকী প্রসিদেন্ত শ্রী সি.আর. পতিল অমসুং ঐহাক্কী লৌমী ইচিল-ইনাওশিং!
থা খরগী মমাংদা নেচরেল ফার্মিং হায়বা হীরমদা নেস্নেল কনক্লেব অমা গুজরাত্তা পাঙথোকখি। লৈবাক শিনবা থুংবদা লৈরিবা লৌমীশিংনা স্কিম অসিদা শরুক য়াখি। মসি মহৌশাগী লৌউ-পথাপকী মতাংদা লৈবাক অসিদা চত্থরিবা অচৌবা কেম্পেন অসি কয়াম চাউবগে হায়বগী মমি ওইখি। ঙসি অমুক হন্না সুরত্তা পাঙথোক্লিবা মরু ওইবা থৌরম অসিনা গুজরাতনা করম্না অমৃত কালগী লৈবাক অসিগী ফিরেপশিংদা শাহৌ পীবগে হায়বা অসিগী খুদমনি। গ্রাম পঞ্চায়ত খুদিংদা লৈবা লৌমী ৭৫না মহৌশাগী লৌউ পথাপ পাইখৎহনবগী মিসন্দা সুরতনা মাইপাকপা অসিনা লৈবাক পুম্বগী খুদম অমা ওইরি অমসুং মসিগীদমক ঐহাক্না সুরতকী মীয়াম, সুরতকী লৌমীশিং, সরকার অসিগী মরুপশিংদা নুংঙাইবা ফোঙদোকচরি।
নেচরেল ফার্মিং কনক্লেব’ অসিদা ঐহাক্না কেম্পেন অসিগা মরী লৈনবা মীপুম খুদিংদা, লৌমী ইচিল-ইনাওশিংদা য়াইফ পাউজেল পীজরি। ঐহাক্না ঙসি সর্পঞ্চ মরুপশিংনা ইকাই খুম্নবা উৎখ্রবা লৌমীশিংদা থমোয় শেংনা থাগৎপা ফোঙদোকচরি। অমসুং লৌমীশিংগা লোয়ননা সর্পঞ্চশিংনা লৌরিবা থৌদাং অসি য়াম্না থাগৎনীংঙাই ওই। মখোয়না থৌশিল অসি হৌদোকখিবনা ঐখোয়গী সর্পঞ্চ ইচিল-ইনাও পুম্নমকপু চপ মান্ননা থাগৎফম থোকই।
মরুপশিং,
নীংতম্বগী চহি ৭৫ শুরকপগা লোয়ননা লৈবাক্না তুংদা লাক্কদবা মতমশিংদা অচৌবা অহোংবশিং পুরক্নবগী য়ুম্ফম থোনগদবা পান্দম কয়াদা থবক পাইখৎপা হৌখি। অমৃত কাল অসিদা লৈবাক্কী চাউখৎপগী অমসুং খোঙজেলগী হৌরকফম সবকা প্রয়াসকী ৱাখল্লোন অসিনা ওইরি, মসিনা ঐখোয়গী চাউখৎপগী খোঙচৎ অসিবু লমজিংলি। মরু ওইনা লায়রবা অমসুং লৌমীশিংগী ওইনা পাইখৎখিবা থবক অমা হেক্তা ওইরবসু মসি ইরৈবাকচাশিং অমসুং খুঙ্গংগী পঞ্চায়তশিংনা লমজিংখি। ঐহাক্না গুজরাতকী নেচরেল ফার্মিং মিসন অসি কুপ্না য়েংলি। অমসুং মসি খুমাং চাউশিনবা উবদা ঐহাক্না য়াম্না নুংঙাইখি অমসুং মরু ওইনা লৌমী ইচিল-ইনাওশিংনা মসিগী ৱাখল্লোন চেনখি অমসুং থমোয় শেংনা মসি পাইখৎনীংখি, মসিদগী হেন্না ফবা অমা লৈররোই। খুঙ্গংগী কম্মিতীশিং, তলুকা কম্মিতীশিং অমসুং দিস্ত্রিক্ত কম্মিতীশিং সুরতকী গ্রাম পঞ্চায়ত খুদিংমক্তগী লৌমী ৭৫ খন্নবা শেমখি। খুঙ্গংগী থাক্তা তীমশিং শেমখি অমসুং তীম লীদরশিং, নোদেল ওফিসরশিংদা তলুকাগী থৌদাং শিন্নখি। হায়রিবা মতম অসিগী মনুংদা চাং নাইনা ত্রেনিং প্রোগ্রামশিং অমসুং ৱার্কশোপশিং পাঙথোকখি। অমসুং ঙসি অতেনবা মতমগী মনুংদা পঞ্চায়ত ৫৫০দা লৈবা লৌমী লিশিং ৪০ হেনবনা মহৌশাগী লৌউ পথাপতা পাইখৎপগী ফীভম অমা ওইহল্লকপা ঙমখি। হায়বদি অপীকপা মফম অমদা অচৌবা থবক অমা পাঙথোকপা ঙম্লে তাকপনি। মসি অফবা অহৌবা অমনি অমসুং য়াম্না পুক্নিং থৌগৎনীংঙাই ওই অমসুং মসিনা লৌমী খুদিংমক্কী পুক্নিংদা থাজবা পোকহনখি। তুংদা লাক্কদবা মতমশিংদা লৈবাক পুম্বগী লৌমীশিংনা নখোয়দগী, নখোয়গী এক্সপরিয়েন্সশিংদগী খঙবা, তমশিনবা ফংগনি। মহৌশাগী লৌউ-পথাপকী সুরত মোদেল অসিনা লৈবাক পুম্বগী মোদেল অমা ওইরগনি।
ইচিল-ইনাওশিং,
লৈবাক্কী মীয়ামগনা পান্দম অমা ফংনবা অচেৎপা ফিরেপ লৌরবা মতমদা পান্দম অদু ফংনবা চংশিনবদা অপনবা অমত্তা লৈরোই অমদি ঐখোয়না চোকথবসু লৈরোই। জন ভাগীদারিগী শক্তিগা লোয়ননা অচৌবা প্রোজেক্তশিং পাইখৎপা মতমদা লৈবাক অসিমক্কী মীয়াম্না মখোয়বু মাইপাকপা ঙমহল্লি। ঐখোয়গী মাংদা জল জীবন মিসনগী খুদম লৈরি। খুঙ্গং অমদগী খুঙ্গং অমদা অফবা ঈশিং পীনবগীদমক অসিগুম্বা অচৌবা মিসনগী থৌদাং অসি লৈবাক্কী খুঙ্গং কয়াগী মীয়াম্না থৌদাং লৌরি, ৱাতর কম্মিশিং খুঙ্গংশিংদা শেমখি। স্বচ্ছ ভারতকুম্বা অচৌবা কেম্পেনগী মাইপাকপা অসি ঙসি মালেমগী সংস্থানশিংনা থাগৎনরকখি। অমসুং মসিগী মনা ঐখোয়গী খুঙ্গংশিংদা পীফম থোকই। মসিগা মান্নবা মতৌদা, দিজিতেল ইন্দিয়া মিসন্না অখন্ননা মাইপাকপা অসি খুঙ্গংদা অহোংবা পুরকপা অসি অরায়বা নত্তে হায়না ফোঙদোকখিবা মীওইশিংদা পীবা লৈবাক অসিগী পাউখুমনি। খুঙ্গংশিংনা অওনবা পুরকপা খক নত্তনা অহোংবা পুরকপদা মাংজিল থাবা য়াই হায়বা ঐখোয়গী খুঙ্গংশিংনা উৎখি। মহৌশাগী লৌউ পথাপ পাউখৎপদা জন অন্দোলন খোঙজং য়াওরকপনা তুংদা অচৌবা মাইপাকপা পুরকপা ঙমগনি। খোঙজং অসিদা ঙন্না য়াওহৌবা লৌমীশিংনা চাউনা কান্নবা ফংগনি।
মরুপশিং,
ঐখোয়গী পুন্সি, ঐখোয়গী হকশেল, ঐখোয়গী খুন্নাইগী হৌরকফম অসি ঐখোয়গী লৌউ-শিংউগী পথাপ অসিনা ওইরি। ভারত অসি মহৌশা অমসুং চৎনবীগী মতুং ইন্না লৌউ-শিংউদা য়ুম্ফম ওইবা লৈবাক অমা ওইদুনা লাকখি। মরম অসিনা ঐখোয়গী লৌমীশিংনা খুমাং চাউশিল্লকপা, ঐখোয়গী লৌউ-শিংউনা খুমাং চাউশিল্লকপা অমসুং চাউখৎলকপগা লোয়ননা ঐখোয়গী লৈবাকসু খুমাং চাউশিল্লক্কনি। প্রোগ্রাম অসিগী খুত্থাংদা লৈবাক অসিগী লৌমীশিংদা ৱাফম অমা নীংশীংনবা হায়জরি। মহৌশাগী লৌউ পথাপ অসি শেন্মীৎলোন চাউখৎহন্নবা পাম্বৈ অমসু ওইরি অমসুং মরু ওইনা ঐখোয়গী ইমা, ঐখোয়গী ইমা পৃথিবী, ঐখোয়গীদমক, নুমিৎ খুদিংগী ঐখোয়না থৌনিজরিবা ইমা অসিদা ঐখোয়না অয়ুক্তা হৌগৎলকপদা ঙাকপীনবা পৃথিবী ইমাদা হায়জসি, মহাক ঐখোয়গী ইমানি। লাইশোন-তিনশোনগী ওইবা থৌরমসু লৈ। মসি পৃথিবী ইমা শেবা তৌনবা অথোইবা পাম্বৈনি। ঙসি ঐখোয়না মহৌশাগী লৌউ পথাপ পাইখৎপা মতমদা অদোম্না লৌবুক অমসুং মাগী মরী লৈনবা প্রদক্তশিংদগী লৌউ-শিংউ তৌনবা তঙাই ফদবা রিসোর্সশিং লৌরি। শা-শনশিংদগী অদোম্না ‘জীবামৃত” অমসুং “ঘন জীবামৃত” শেম্মি। মসিনা লৌউ-শিংউদা চংবা শেল হন্থহনখি। শেল চংহন্দে। মসিগা লোয়ননা শা-শনশিংনা অহেনবা শেন্থোক লৈহন্নবা লম্বী য়াৎলগনি। মসিগা মান্ননা অদোম্না মহৌশাগী লৌউ পথাপ পাইখৎপা মতমদা পৃথিবী ইমাগী শেবা তৌই, লৈহৌগী ক্বালিতী, মাগী পোত্থোক ঙাকশেল্লি। অদোম্না মহৌশাগী লৌউ-পথাপ পাইখৎপা মতমদা অদোম্না মহৌশা অমসুং অকোইবগী ফীভমগী শেবা তৌই। অদোম্না মহৌশাগী লৌউ-পথাপ পাইখৎপা মতমদা অদোম্না গৌমাতা শেবা তৌবগী খুদোংচাবসু ফংই। হৌজিক সুরত্তা গৌশালা ৪০-৪৫দা মখোয়গী থবক তৌমিন্নদুনা শনগী জীবামৃত পুথোক্নবগী থৌদাং শিন্নরগনি। মসিনা শন কয়াদা কান্নবা পীবগনি হায়বা খল্লু। মসিগা লোয়ননা মহৌশাগী লৌউ পথাও শীজিন্নদুনা পুথোকপা চান্নবা চীঞ্জাকশিং মীওই করোর কয়াদা পীজরিবা অসিনা মখোয়বু তিল হীদাক অমসুং কেমিকেলশিংনা থোকহনবা তমথিরবা লাইনাশিংদগী ঙাকথোকপা ঙমহল্লি। হকচাং ফবগী কান্নবা অসি মীওই করোর কয়াদা ফংহল্লগনি। অদোমগী হকচাং অদু অদোম্না চারিবা চীঞ্জাক মখলগী মখা পোল্লি।
মরুপশিং,
পুন্সি ঙাকশেল্লিবা অসিনা ঐখোয়দা শেবা তৌনবগী মশিং লাকঙমদ্রবা খুদোংচাবশিংসু পীরি। মরম অসিনা মহৌশাগী লৌউ পথাপনা লনাইগী ওইবা নুংঙাইবা ফংহনবা লম্বী য়াৎপা খক নত্তনা মসিনা ‘মীপুম খুদিংমক নুংঙাইহনসি, মীপুম খুদিংমক হকচাং ফহনসি’ হায়বা ৱাখল্লোনসু পোকহল্লি।
মরুপশিং,
ঙসি মালেম পুম্বনা সস্তেনেবল লাইফস্তাইলগী মতাংদা, অফবা অচা-অথকশিংগী মতাংদা ঙাংনরি। মসি ভারতনা চহিচা কয়াদগী লম অসিদা লৌশিং অমসুং এক্সপরিয়েন্স লৈ। মরম অসিনা ঙসি নেচরেল ফার্মিংগুম্বা কেম্পনশিং অসি মাংদা পুনবা ঐখোয়না খুদোংচাবা অমা ফংখি অমসুং পুম্নমকপু কান্নবা পীগদবা লৌউ-শিংউগা মরী লৈনবা মালেমগী ওইথোকপা য়াবশিংগী থবক পাইখৎলি। লৈবাক অসিনা হৌখিবা চহি নিপান অসিদা মাইকৈ অসিদা কন্না থবক পাইখৎলি। ঙসি লৌমীশিংদা রিসোর্সশিং, ফেসিলিতীশিং, সপ্পোর্তশিং ‘পরম্পরাগত কৃশি বিকাস য়োজনা’ অমসুং ‘ইন্দিয়ন ফার্মিং সিস্তেম’ অসিগুম্বা প্রোগ্রামশিংগী খুত্থাংদা পীরি। লৌমী লাখ কয়াদা কান্নবা পীনবা স্কিম অসিগী মখাদা লৈবাক শিনবা থুংবদা ক্লস্তর লিশিং ৩০ শেমখি। ‘পরম্পরাগত কৃশি বিকাস য়োজনা’গী মখঅদা হেক্ত লাখ ১০ কোনশিনগনি। মহৌশাগী লৌউ পথাকী কলচরেল, সোসিএল অমসুং ইকোলোজিকেল ইমপ্লিকেসনশিং অসি য়েংলগা ঐখোয়না মসিবু নমামি গঙ্গা প্রোজেক্তকা মরী লৈনহল্লি। তোখাইবা কেম্পেন অমা ওইনা গঙ্গা তুরেল তোর্বান্দা নেচরেল ফার্মিং কোরিদোর শেমগৎনবা পাইখৎখি। মার্কেৎতা মহৌশাগী লৌউ-পথাপ্না পুথোকপা পোত্থোক্কী তোঙানবা দিমান্দ অমা লাক্লি, মসিগী মমলসু ৱাংই। হৌজিক ঐহাক্না দাহোদতা লাকপা মতমদা ঐখোয়গী আদিৱাসী ইচে-চলশিং য়েংখি অমসুং মখোয়না মহৌশাগী লৌউ পথাপ পাইখৎলি অমসুং মখোয়না মখোয়গী ওর্দর অসি থা অমগী মমাংদা বুক তৌখি। অমসুং মনা-মশিং অসি ঐখোয়না নুমিৎ খুদিংগী য়োল্লি, মখোয় অসি মমল ৱাংনা য়োল্লি। খুদম ওইনা গঙ্গাগী অকোইবদা কিমি মঙা-মঙাদা মহৌশাগী লৌউ-পথাপ পাইখৎনবা কেম্পেন অমা হৌদোকখি। তুরেল ঈশিংদা, থক্নবা ঈশিংদা কেমিকেল তাশিন্দনবা হোৎনরি, চখাওদা কেমিকেল য়াওবা ঈশিং য়ৌহনদনবা হোৎনসি। তুংদা ঐখোয়না তাপীগী নাকল অনিমক্তা, ইমা নর্মদাগী নাকল অনিমক্তা মসিগী এক্সপরিমেন্তশিং তৌবা য়াগনি। অমসুং মসিনা মরম ওইদুনা, মসিদগী আউতপুত অদু মশক তাকপা তাবনা মরম ওবনা মহৌশাগী লৌউ পথাপকী পোত্থোক সর্তিফাই তৌনবা, মসি মশখ খঙদোকপা তাই অমসুং লৌমীশিংনা মসিদগী হেন্না ফংহনবা তাই অদুনা ঐখোয়না মসিবু সর্তিফাইদ তৌনবা থবক পাইখৎলি। মসিবু ওথেন্তিকেৎ তৌনবা ক্বালিতী এস্যুরেন্স সিস্তেমসু থমখি। ঐখোয়গী লৌমীশিংনা সর্তিফাইদ তৌরবা মহৈ-মরোংশিং মমল কানা এক্সপোর্ত তৌরি। ঙসি মালেমগী কৈথেলদা কেমিকেল ফ্রী প্রদক্তশিং অসিদা মীৎয়েং চংনরক্লি। ঐখোয়না মসিগী কান্নবা অসি লৈবাক্কী লৌমী কয়া কয়াদা ফংহনবা তাই।
মরুপশিং,
সরকারগী খোঙথাংশিং অসিগা লোয়ননা হীরম অসিদা লৈরিবা ঐখোয়গী অরিবা লৌশিংগী মাইকৈদা য়েংবা তাই। ভারতকী শাস্ত্রশিংদগী হৌরগা কৌতলিয়া, বরাহমিহিরগুম্বা স্কোলরশিংদা মহৌশাগী লৌউ পথাপকা মরী লৈনবা অচৌবা লৌশিংগী পুকৈ অমা লৈজৈ। ঐখোয়গী ইরক্তা য়াওরিবা আচার্য় দেবব্রতজী, মঙোন্দা হীরম অসিগী লৌশিং য়াম্না লৈ অমসুং মহাক্না মহাক্কী পুন্সিগী মন্ত্র শেমখি, এক্সপরিমেন্ত কয়া তৌদুনা মহাক্না মাইপাকপা ঙমখি অমসুং মাইপাকপা অসিগী কান্নবা গুজরাতকী লৌমশিংনা ফংলি। ঐখোয়না শাস্ত্রশিংদা লোৎতুনা লৈরিবা মহৌশাগী লৌউ পথাপকী লৌশিং লৈ হায়বা উবা ফংখি। ঘাঘা অমসুং ভদ্দরিগুম্বা স্কোলরশিংনা লৌউ পথাপকী মন্ত্রা অসি অরাইবা লোলদা মীয়ামদা ফংহনখি। হায়নবা লৈ, লৌমী খুদিংমক্না মসিগী পাইরৌ অসি খঙলমগনি – ‘গোবর, মৈলা, নীম কী খলী, য়া সে খেদ দুনী ফলী’, হায়বদি করিগুম্বা শনথী অমসুং নীম মপাকশিংনা লৌবুক্তা হাপ্পা মতমদা মহৈ মরোং অদু শরুক অনি হেনগৎলকই। মসিগা মান্ননা অতোপ্পা ৱারী অমসু লৈ, ‘ছোরে খাদ জোদ গহরাই, ফির খেতী কা মজা দিখাই’, হায়বদি লৌবুক্তা হারশিং হাপ্পদা, লৌ উবা মতমদা নুংঙাই অমসুং মাগী শক্তি উবা ফংই। ঐহাক্না মফম অসিদা ফম্লিবা ইন্সতিত্যুসনশিং, এন.জি.ও.শিং অমসুং এক্সপর্তশিংনা অরিবা মতমগী লৌশিংদা অমসুং মতমগা চুনবা দিমান্দশিং অসিগী মতুং ইন্না লৌমীশিংগা করম্না পাউ ফাওদোক্নগনি হায়বা অসিগী মতাংদা রিসর্চ তৌগদবনি। লৌমী ৭৫না পঞ্চায়ত খুদিংদা মহৌশাগী লৌউ পথাপ পাইখৎপা হৌরকপা অসি অথুবদা অথুবদা শরুক কয়া হেনগৎলক্লগনি মরমদি কেমিকেল-ফ্রী নেচরেল প্রদক্তশিংগী দিমান্দ হেনগৎলকপা য়ানা লৈ।
মরুপশিং,
খুঙ্গং খুদিংদা লৌমী ৭৫ খনখিবা কেম্পেন অসিনা করিগুম্বা নখোয়না ৭৫গী পান্দম থম্লবসু খুঙ্গং খুদিংমক্তা লৌমী ৭৫০ থৌরক্কনি হায়না ঐহাক্না থাজৈ অমসুং থবক অসিদা জিলা পুম্বনা য়াওশিল্লবদি মালেমগী বায়রশিংআ নখোয়গী লৈফম থীদুনা নখোয়গী নাক্তা মতম চুপ্পদা লাক্কনি, মসিদা কেমিকেল য়াওদে, মসিদা তিলহীদাক য়াওদে, মসি অচম্বা মহৌশাগী পোত্থোক্নি অদুনা মীয়াম্না মখোয়গী হকচাং ফনা থম্নবগীদমক পৈসা হেন্না পীদুনা পোৎ অদু লৈবা লাক্কনি। সুরতকী সহরদা, মনা-মশিং পুম্নমক নখোয়গী লৌবুক্তগী চৎলিম করিগুম্বা সুরতকী সহরনা নখোয়গী মনা-মশিং অসি মহৌশাগী লৌউ-পথাপনা পুথোকপনি খঙলকপা মতমদা ঐহাক্না থাজবা পীরি মদুদি ঐখোয়গী সুরত মীয়াম্না ইন্দস্ত্রী ওইগনি অমসুং অদোমগী মহৌশাগী লৌউ পথাপ অসিগী উন্ধিয়ু ওইগনি। অমসুং সুরতকী মীয়াম্না বোর্দশিং থেৎকনি, মহৌশাগী লৌউ পথাপকী উন্ধিয়ু। লম অসিদা মার্কেৎ শেম্বা অদোম্না উরে। সুরতকী মশাগী মপাঙ্গল লৈজৈ, মীয়াম্না থোরক্তুনা কেম্পেন অসিগী কান্নবা লৌগনি। নখোয়গা লোয়ননা ৱারী শাবগী খুদোংচাবা অমা ফংজখি, অসিগুম্বা অচৌবা কেম্পেন হৌদোকপা অসিগীদমক ঐহাক্না অমুক হন্না থাগৎপা ফোঙদোকচরি। অমসুং মসিগা লোয়ননা ঐহাক্না পুম্নমকপু থাগৎচরি!
হন্না-হন্না থাগৎচরি!
