খুরুমজরি,
কেন্দ্রগী মন্ত্রীমন্দলদা ঐহাক্কী খোংলোই পীয়ুশ গোয়ল জী, মনসুখ মান্দবিয়া জী, অশ্বিনী বৈশ্নব জী, সর্বনন্দ সোনোৱাল জী, পুরুশোত্তম রুপালা জী, জি কিশন রেদ্দী জী, পশুপতি কুমার পারস জী, জীতেন্দ্র সিংহ জী, সোম প্রকাশ জী, লৈবাক পুম্বদগী পুনবীরিবা স্তার্ত অপকী ওইবা শক্নাইরবশিং, ঐখোয়গী নহা ওইরিবা মরূপলোইশিং, অতোপ্পা শক্নাইরবশিং অমদি ইচিল-ইনাও অমসুং ইচল-ইচেশিং,
ঐখোয় পুম্নমক্না ভারতকী স্তার্ত-অপ্সকী মায় পাকপা অদু উরে অমদি স্তেকহোল্দর্স খরগী প্রজেন্তেসনসু উরে। ময়াম পুম্নমক থোইদোক হেন্দোকপা থবক তৌবীরি। ২০২২গী চহি অসি ভারতকী স্তার্ত অপ ইকোসিস্তেমগীদমক হেন্না নৌবা ওইথোকপশিং পুদুনা লাক্লি। নিং তম্বগী ৭৫শুবা চহি অসিদা স্তার্ত-অপ ইন্দিয়া ইন্নোভেসন চয়োলগী থৌরম অসি হেন্না মরু ওই। ভারতনা মশাগী নিং তম্বগী চহি ১০০ মপুং ফারকপদা চিং লেম্বা ভারত ওইহনবদা অদোমগী থৌদাং অদু য়াম্না চাওই।
লৈবাক্কী স্তার্ত-অপ্স পুম্নমকপু, নহা ওইরিবা ইনোভেতিব পুম্নমকপু হন্না-হন্না নুংঙাইবা ফোংদোকচরি, মখোয়না স্তার্ত-অপ্সকী মালেমদা ভারতকী ফিরালবু হেন্না অৱাংবা থাক্তা পুখৎলি। স্তার্ত-অপ্সকী কলচর অসি লৈবাক্কী মনুং হুঞ্জিনবা মফমশিংদা য়ৌহন্নবগীদমক জনুৱাগী ১৬পু হৌজিক নেস্নেল স্তার্ত অপ নুমিৎ হায়না পাংথোক্নবা ৱারেপসু লৌখ্রে।
মরূপশিং,
স্তার্ত-অপ ইন্দিয়া ইনোভেসন ৱীক, হৌখিবা চহিগী মায় পাকপশিং অদু সেলেব্রেৎ তৌনবসুনি অমদি তুংগী লালোংদা খন্ন-নৈননবসুনি। দিকেদ অসি ভারতকী তেকেদসু হায়নরি। দিকেদ অসিদা ইনোভেসন, ওন্ত্রেপ্রিনরশিপ অমসুং স্তার্ত-অপ ইকোসিস্তেমবু হেন্না চেৎশিলহন্নবগীদমক সরকারনা চাউনা অহোংবা পুরক্লিবা অসিগী মরুওইবা শক্লোন অহুম লৈরি –
অহানবদা, ওন্ত্রেপ্রিনরশিপ্পু, ইনোভেসনবু সরকারগী প্রোসেসশিংগী লাংদগী, ব্যুরিওক্রেতিক সিলোশিংদগী নান্থোকহনবা। অনিশুবদা, ইনোভেসনবু প্রমোৎ তৌনবগীদমক ইন্সতিত্যুস্নেল মেকানিজম শেমগৎপা। অমসুং অহুমশুবদা, নহা ওইরিবা ইনোভেতরশিং, নহা ওইরিবা ইন্তরপ্রাইজকী হেন্দহোল্দিংসু তৌবনি। স্তার্ত অপ ইন্দিয়া, স্তেন্দ অপ ইন্দিয়াগুম্বা প্রোগ্রাম অসি অসিগুম্বা হোৎনবশিংগী শরুকনি। এঞ্জল তেক্সকী সমস্যাশিংবু লোইশিনবা অমদি তেক্স ফাইলিংবু লাইথোকহনবা ওইগেরা, এক্সেস তু ক্রিদিৎপু লাইথোকহনবা ওইগেরা, লুপা করোর লিশিং কয়াগী সরকারগী ওইবা ফন্দিংগী মেনেজমেন্ত ওইগেরা, খুদোংচাবশিং অসি ঐখোয়গী কমিৎমেন্ত অদু উৎলি। স্তার্ত অপ ইন্দিয়াগী মখাদা স্তার্ত-অপ্সপু লেবর ৯ অমদি এনভাইরনমেন্ত লো ৩গা মরী লৈনবা কমপ্লাইন্সশিংবু সেল্ফ-সর্তিফাই তৌবগী খুদোংচাবা অদু পীরি।
দোকুমেন্তশিংগী সেল্ফ-এত্তেসতেসনদগী সরকারগী ওইবা প্রোসেসশিংবু লাইথোকহন্নবা থৌরাং হৌদোকখিবা অদু ঙসি লিশিং ২৫দগী হেনবা কমপ্লাইন্সশিংবু লোইশিন্নবা তাঙ্কক অদু ফাওবা য়ৌরে। স্তার্ত অপ্স, সরকারনা মশাগী প্রদক্তশিং নত্রগা সর্বিসশিং লাইনা পীবা ঙম্নবগীদমক গবর্নমেন্ত ই-মার্কেৎপ্লেস প্লেৎফোর্মদা স্তার্তঅপ রনৱেসু য়াম্না কানবা ওইরি।
মরূপশিং,
লৈবাক অমা হেক্তবু চাওখৎপা পুরক্নবগীদমক নহাগী তৌবা ঙম্বা অমদি হৈ-শিংবদা থাজবা থম্বা হায়বসি য়াম্না মরু ওই৷ নহাগী তৌবা ঙম্ববু মশক খঙদোক্তুনা, ঙসিদি ভারতনা পোলিসীশিং শেম্লি অমদি ৱারেপশিং চৎনহল্লি৷ ভারত্তা য়ুনিভর্সিতী ১,০০০ হেন্না, স্তেন্দ-এলোন ইন্সতিত্যুসন ১১,০০০, কোলেজ ৪২,০০০ অমদি স্কুল লাখ কয়া লৈরি৷ মসি ভারতকী ওইনা অচৌবা পাঙ্গলনি৷
ঐখোয়না হোৎনরিবা খুদিংমক অসি মহৈরোশিংবু অঙাং ওইরিঙৈদগী হৌনা অনৌবা থৌওং পাংথোকপদা পুক্নিং চিংশিনবগী থৌওং শীন্দুনা লৈবাক অসিদা ইন্নোবেসনবু ইন্সতিত্যুসন অমগুম ওইহন্নবনি। অতল তিঙ্করিং লেব ৯০০০ হেনবনা অঙাংশিংদা মখোয়গী স্কুলশিংদা অনৌবা থৌওং পাংথোকপা অমসুং অনৌবা ৱাখল্লোন্দা মখা তানা থবক পাংথোকপগী খুদোংচাবা পীরি। ঐখোয়গী নহানা মখোয়গী ইন্নোবেতিব ওইবা ৱাখল্লোনশিংদা থবক তৌনবা অতল ইন্নোবেসন মিসননা নহাগীদমক অনৌবা প্লেতফোর্মশিং থম্লি৷ মসিগীসু মথক্তা, লৈবাক পুম্বদা লৈরিবা স্কুলশিং অমদি কোলেজ লিশিং কয়াগী নেতৱার্ক অসিনা ফিল্দ খুদিংমক্তা ইন্নোবেসন য়োকখৎলি৷
সরকারগী তোঙান তোঙানবা দিপার্তমেন্তশিং অমদি মন্ত্রালয়শিংনা মতৌ করম্না নহাগা অমদি স্তার্ত-অপশিংগা খুৎশম্নদুনা চৎমিন্নবগে অমদি মখোয়গী অনৌবা ৱাখল্লোনশিংদা মতৌ করম্না থৌনা হাপ্পগে হায়বদুসু অদোম্না শোইদনা খঙলম্লগনি৷ দ্রোনগী অনৌবা কাঙলোন ওইরো নত্ত্রগা স্পেসকী অনৌবা পোলিসী ওইরো, সরকারনা মিৎয়েং চঙলিবা অসিদি নহা কয়া অমদা য়ারিবমখৈ ইন্নোভেসন তৌনবা খুদোংচাবা পীবনি।
ঐখোয়গী সরকারনা আই.পি.আর. রেজিস্ত্রেসনগা মরী লৈনবা কাঙলোন অমসু লায়থোকহল্লে। ঙসিদি লৈবাক অসিদা কেন্দ্র অমদি রাজ্য সরকারশিংনা খুৎশম্নদুনা ইনকুবেতর চা কয়া সপোর্ত তৌরি৷ ঙসিদি, আই.ক্রেতকুম্বা ইন্সতিত্যুসনশিংনা লৈবাক অসিদা ইন্নোবেতিব ইকোসিস্তেম ফগৎহনবদা য়াম্না মরু ওইবা থৌদাং অমা লৌরি৷
অদুগা মরুপশিং,
সরকারনা হোৎনরিবশিংগী মহৈশিং অসি ঐখোয়না উবা ঙম্মী৷ ইং ২০১৩-১৪গী মনুংদা পেতেন্ত ৪০০গী অয়াবা পীখি অমসুং মমাংগী চহিমক্তদা পেতেন্ত লিশিং ২৮ হেনবগী অয়াবসু পীখি। ইং ২০১৩-১৪দা চাউরাক্না ত্রেদমার্ক ৭০০০০ হেনবা রেজিস্তর তৌখি অমসুং ইং ২০২০-২১দনা ত্রেদমার্ক লাখ ২.৫ হেনবসু রেজিস্তর তৌখি। ইং ২০১৩-১৪দা কোপীরাইত ৪০০০ খক্তগী অয়াবা পীখিবা মতমদা মমাংগী চহিগী অপুনবা মশিংনা ১৬০০০ হেনখি। ইন্নোবেসনগী মতাংদা ভারত্তা চৎথিবা কেম্পেন্দ অসিনা মরম ওইদুনা গ্লোবেল ইন্নোবেসন ইন্দেক্সতা লৈরিবা ভারতকী রেঙ্কিং অসি অদুক্কী মতিক ফগৎলে৷ ২০১৫দা, রেঙ্কিং অসিদা ভারতনা ৮১শুবা মফম কল্লমখি৷ হৌজিক্তি ইন্নোবেসন ইন্দেক্স অসিদা ভারতনা ৪৬শুবা মফম কল্লি; মসি ৫০দগী হায়থরকখিবনি৷
মরুপশিং,
ঙসিদি ভারতকী স্তার্ত-অপ ইকোসিস্তেমনা মালেম অসিদা ৱেবশিং শেম্লি৷ ঙসিদি ভারতকী স্তার্ত-অপশিংনা তোঙান তোঙানবা লৈবাক ৫৫দা থবক তৌরিবা অসি চাওথোকচরোইদবা কনা লৈরিবগে? মসিদা মীপুম খুদিংমক চাওথোকচবা ফাওগনি৷ ঙসিদগী চহি য়াংখৈগী মমাংদা লৈবাক অসিদা স্তার্তঅপ ৫০০ ফাওবা লৈরমখিদে, অদুবু ঙসিদি মশিং অসি ৬০,০০০তা হেনগৎখ্রে৷ অদোমদা ইন্নোবেসনগী শক্তি লৈ, অদোমদা অনৌবা ৱাখল্লোনশিং লৈ, অদোমদা নহাগী শক্তি মপুং ফানা লৈ অমদি অদোম্না করবার তৌবগী লম্বী অদু হোংদোক্লি৷
মরুপশিং,
ওল্তরপ্রিনরশিপতগী এমপৱারমেন্তদা লৈক্লিবা অসিনা ঐখোয়গী দিবেলপমেন্তদা লৈরিবা রিজনেল অমদি জেন্দর খেৎনবগী ইসুশিং অসি থেংনরি৷ ঙল্লিঙৈ মতমদা, অচৌবা বিজিনেসশিং অচৌবা শহরশিং অমদি মেত্রোশিং খক্তদা মাই পাক্না তৌনরমখি; ঙসিদি লৈবাক অসিগী রাজ্য খুদিংমক্তা য়ামদ্রবদা স্তার্ত-অপ অমমম থমদুনা জিলা ৬২৫ হেনবদা শন্দোক্লি৷ ঙসিগী স্তার্ত-অপশিংগী তংখায়মুক্তি তাইয়র-২ অমদি তাইয়র-৩ শহরশিংদগী লাকপনি৷ অচম্বা অমদি লাইরবা ইমুংশিংদগী লাক্লিবা নহাগী ৱাখল্লোনশিংবু বিজিনেসতা ওন্থোক্লি৷ ঙসিদি হায়রিবা স্তার্ত-অপশিং অসিদা নহা লাখ কয়ানা থবক ফংলি৷
মরুপশিং,
ভারতকী নহানা স্তার্ত-অপশিং শেম্বগী খোংজেল অমদি স্কেল অসি অসিগুম্লবা মালেম শিনবা থুংনা শন্দোক্লিবা লাইনা-লাইচৎকী মতম অসিদা ভারত মচাশিংগী অখাং-কনবা অমদি ফিরেৎ-চেৎপগী খুদম অমনি৷ মমাংগী মতমদা, কম্পেনী খরা খক্তনা খ্বাইদগী ফরবা মতমশিং ফাওবদা অচৌবা ওইরকপা ঙম্লম্মী৷ অদুবু, হৌখিবা চহি খক্তদা ঐখোয়গী লৈবাক অসিদা য়ুনিকোর্ন ৪২ থোক্লকখি৷ লুপা কোতি লশিং কয়াগী মমল ওইরিবা কম্পেনীশিং অসি মশা-মরোম লেপচবা ঙম্বা, মশানা মশাদা থাজবা থমজবা হায়বসি ভারতকী হোলমার্কনি৷ ঙসিদি ভারতনা য়ুনিকোর্নগী চহি-চা অমা শেম্ননবা খোংজেল য়াংনা চংশিল্লক্লি৷
দাইবর্সিতী অসিগী ওইনদি ঐখোয়গী য়ুনিকোর্নশিং অমদি স্তার্ত-অপশিং অসিনা মেসেঞ্জরশিং ওই৷ অচম্বা দেলিভরী সর্ভিসশিংদগী হৌদুনা পেমেন্ত সোলুসনশিং অমদি কেব সর্ভিসশিং ফাওবদা, অদোমগী স্কোপ অসি য়াম্না চাওই৷ অদোম্না ভারত্তা লৈরিবা তোঙান তোঙানবা মার্কেৎশিং অমদি তোঙান তোঙানবা কল্চরশিংদা থবক পাংথোক্লিবনা অদোমদা এক্সপরিয়েন্স অদুক্কী মতিক লৈরে৷ ভারতকীদমক ঐখোয়না ইন্নোবেৎ তৌশি, ভারত্তগী ইন্নোবেৎ তৌশি—হায়রিবা মন্ত্র অসি নিংশিংশি!
মরুপশিং,
নিং-খম তম্বগী য়াইফরবা মতম অসিদা ঐখোয় পুম্নমক শেম-শাদুনা লৈবগী মতম য়ৌরে৷ ‘সবকা প্রয়াস(কল্লেক্তিব ইফর্তশিং)’কা লোইননা পান্দমশিং অসিদা চংশিন্নবগী মতম য়ৌরে৷ পি.এম. গতিশক্তি নেস্নেল মাস্তর প্লানগী মতাংদা কাংলুপ অমনা মরু ওইবা সজেসনশিং পীরকখিবা অসিদা ঐ নুংঙাইবা ফাওই৷ গতিশক্তি প্রোজেক্তশিংদা ফংলিবা অহেনবা স্পেস অসি ই.ভি. চার্জিং ইনফ্রাস্ত্রকচর শেমগৎপদা শিজিন্নবা য়াগনি৷ মাস্তর প্লান অসিগী মখাদা, ত্রান্সপোর্ত, পৱার, তেলিকোম য়াওনা ইনফ্রাস্ত্রকচর গ্রিদ পুম্নমক অসি প্লেতফোর্ম অমা খক্তদা পুরক্লি৷ মল্তিমোদেল অমদি মল্তিপর্পোস এসেতশিং শেম্বগী কেম্পেন্দ অসিদা অদোম্না শরুক য়ারকপা অসি য়াম্না মরু ওই৷
হন্দক্তা ইকুই কুইদ্রিঙৈদা অনৌবা দ্রোন পোলিসী চৎনখিবা অদুগী মখা চৎথরকপা ওইনা লৈবাক অসিগী অমদি মপান লৈবাকশিংগী ইনবেস্তর কয়া অমনা দ্রোন স্তার্ত-অপশিংদা শেল থাদরি৷ দ্রোন কেম্পেনীশিংনা আর্মী, নেভী অমদি এয়র ফোর্সতগী লুপা কোতি ৫০০গী মমল ওইগদবা ওর্দরশিং ফংখ্রে৷
মরুপশিং,
ঐখোয়গী শহরবু খোংজেল য়াংনা চাওখৎহনবা হায়বসিসু অচৌবা ফোকস এরিয়া অমসু ওইরি৷ ঙসিদি, ঐখোয়গী হৌজিক লৈরিবা শহরশিং অমদি অনৌবা শহরশিং অসি শেমগৎপগী থবক পাক-শন্না চৎথরি৷ আর্বান প্লানিংদা তৌগদবা কয়া অমা লৈরি৷ লিন্মীশিংগী হেন্না ফবা এরেঞ্জমেন্তশিং শিল-লাংলিবা অসিগুম্লবা ‘ৱাল্ক-তু-ৱার্ক’ কন্সেপ্তশিং অমদি ইন্তিগ্রেতেদ ইন্দস্ত্রীএল ইস্তেতশিং অসি ঐখোয়না শেমগদবনি৷ ঐনা সি.ও.পি.-২৬ সম্মিততা চৎখিবা মতমদা, ঐনা মিসন লাইফকী মরমদা ফোংদোকখিবা অমদি লাইফকী মতাংদা ঐগী ওইনা ৱাখল্লোন্দি লাইফ হায়বসি লাইফস্তাইল ফোর এনবাইরোনমেন্তস(লাইফ) হায়বনি হায়বসি অদোম শোইদনা খঙলম্লগনি৷ তেক্নোলোজী শিজিন্নদুনা অসিগুম্বা পোৎশিং অসি শিজিন্নবগী মতাংদা মীয়াম্বু ঐখোয়না খঙহনবগী মথৌ তাই হায়বসি ঐগী থাজবনি৷ খুদম ওইনা হায়রবদা. পি-৩ ইহৌ, হায়বদি প্রো-প্লানেত –পিপল অসি ঙসিদি য়াম্না মরু ওইরে!
মরুপশিং,
স্মার্ত মোবিলিতীনা শহরশিংদা লৈরিবা পুন্সি মরেল অসিসু লাইথোকহনগনি অমদি কার্বোন ইমিসনদা ঐখোয়না থম্লিবা তার্গেৎশিং অদু ফংহনবদা মতেং পাংগনি৷
মরুপশিং,
মালেমগী খ্বাইদগী চাওবা মিলিনিএল মার্কেৎ ওইনা ভারতনা লেপ্পা-লৈতনা মহাক্কী আইদেন্তিতী মশক থোকহল্লি৷ মিলিনিএলশিং অসিনা মখোয়গী ইমুং-মানুংশিং চাওখৎহনবদা অমদি লৈবাক অসিবু মশা-মরোমদোম লেপচবা ঙমহন্নবগী কোনরস্তোন ওইরি৷ রুরেল ইকোনোমীদগী হৌরগা ইন্দস্ত্রী ৪.০ ফাওবদা ঐখোয়গী তঙাই ফদবশিং অমদি ঐখোয়গী তৌবা-ঙম্বা অসি লোইবা-খম্বা নাইদ্রি৷ ফ্যুচর তেক্নোলোজীগা মরী লৈননা রিসর্স অমদি দিবেলপমেন্তদা শেল থাদবা অসিনা ঙসিদি সরকার অসিগী প্রাইয়োরিতী ওইরি৷
মরুপশিং,
২১শুবা চহি-চা অসিগী চহি খুজিং অসিদা অদোম্না নিংশিংদুনা থমগদবা অহেনবা অমগা লৈরি৷ লৈবাক অসিদা অনৌবা মার্কেৎ অমা হাংদোরক্লি৷ হৌজিক্তি ঐখোয়না দিজিতেল লাইফস্তাইলদা চংশিনখ্রে৷ ঐখোয়গী লৈবাক মীয়ামগী তংখায়মুক খক্তমক ওনলাইন লৈরি৷ লাইরবা অমদি খুঙ্গংশিংদা দিজিতেল এসেস পীনবা সরকার অসিনা হোৎনবগী খোংজেল, স্কেল অমদি মমল অসিগা লোইননা, ভারত্তা অতেনবা মতম অমদা ইন্তরনেত শিজিন্নবা মীওই কোতি ১০০রোম লৈরক্লগনি৷
মনুং হঞ্জিনবা মফমশিংদা লাস্ত-মাইল দেলিভরীনা লৈহল্লিবা অসিগুম্না, মসিনা রুরেল মার্কেৎ অমা অমদি রুরেল তেলেন্তগী অচৌবা পুল অমা শেম্লি৷ মসিনা মরম ওইদুনা ভারতকী স্তার্ত-অপশিংনা খুঙ্গংশিংদা চংশিন্নবা ঐনা হায়জরিবনি৷ মসি খুদোংচাবা অমনি অমদি চেলেঞ্জ অমসু ওইরি৷ মোবাইল ইন্তরনেতপু ওইরবসু, ব্রোদবেন্দ কন্নেক্তিবিতী নত্রগা ফিজিকেল কন্নেক্তিবিতীবু ওইরবসু, ঙসিদি খুঙ্গংশিংগী অশা হেনগৎলক্লি৷ রুরেল অমদি সেমি-আর্বান এরিয়াশিংসু এক্সপান্সনগী অনৌবা ৱেব অমদা য়েংলক্লি৷
ৱাখল্লোন অসিবু স্তার্ত-অপ কল্চরনা দেমোক্রেতাইজ তৌখিবা অদুগুম্না, মসিনা নুপী অমদি লোকেল বিজিনেসশিংবু থৌনা হাপখ্রে৷ অচারশিং অমদি পাপাদুমদগী হৌদুনা হেন্দিক্রাফতশিং ফাওবদা, লোকেল প্রদক্ত কয়া অমগী স্কোপ অসি ঙসিদি পাক-শন্না শন্দোকখ্রে৷ এৱার্নেস হেনগৎলকপনা মরম ওইদুনা, মীয়াম্না লোকেলশিংগী খোল্লাউ ওইরক্লি৷ অদুগা হৌজিক্তা, জয়পুরগী ঐখোয়গী মরুপ কার্থিকনা লোকেলবু গ্লোবেল ওইহন্নবগী মতাংদা ৱারি শাখি অমদি ভর্চুএল তুরিজমগী মতাংদসু পনখি৷ নিং-খা তম্বগী চহি ৭৫ শুরকপা অসিদা, ইতিহাসকী লৈমাইশিংদগী নিং-খা তম্বগা মরী লৈনবা থৌদোক-ৱাথোকশিং অমদি মোনুমেন্তশিংগী ভর্চুএল ক্রেতিব ৱার্ক্কী মতাংদা স্কুলশিং অমদি কোলেজশিংগী অঙাংশিংগী মরক্তা মখোয় মখোয়গী জিলাশিং অমদি শহরশিংদা কম্পিতিসন অমা শিন্নবা ঐনা অদোমদা তকশিঞ্জরি৷
মরুপশিং,
কোবিদ লোকদাউনগী মতমদা, লোকেল লেবেলদা শেমখিবা অপিকপা ইন্নোবেতিব মোদেলশিং অসিনা মীয়ামগী পুন্সি লাইথোকহনখিবগে হায়বসি ঐখোয়না উরে৷ স্তার্ত-অপশিং অসিদা অপিকপা লোকেল বিজিনেসশিংগা খুৎশম্নদুনা চৎমিন্নবগী অচৌবা খুদোংচাবা অমা লৈ৷ স্তার্ত-অপশিং অসিনা লোকেল বিজিনেসশিং অসিবু শক্তি পীবা ঙম্মী অমদি হায়রিবা বিজিনেসশিং অসি ইফিসিয়েন্ত ওইহনবা ঙম্মী৷ অপিকপা বিজিনেসশিং অসিনা লৈবাক অসি চাওখৎহনবগী য়াংলেন-শরু ওইরিবনি অমদি স্তার্ত-অপশিং অসিনা অনৌবা গেম-চেঞ্জর ওইরিবনি৷
মরুপশিং,
লৌউ-শিংউ, হকশেল, মহৈ-মশিং তম্বা, তুরিজম য়াওনা সেক্তর কয়া অমদা সরকার অমদি স্তার্ত-অপশিংগী মরক্তা পার্তনরশিপ শেম্বগী মতাংদা সজেসন কয়া অমা মফম অসিদা লাকখ্রে৷ঐখোয়গী লমদম অসিদা লৈরিবা দুকান ফম্লিবা মীইওশিংনা মখোয়গী কেপাসিতীগী ৫০-৬০% শিজিন্ননবা হোৎনবদা য়াম-ৱানা হোৎনৈ হায়না হায়নবা সজেসন অমা লৈরিবা অসিগুম্না দুকান ফম্লিবা মীওইশিংনা মখোয়গী করম্বা পোৎলমশিং লোইখ্রবগে অমদি করম্বা পোৎলমশিংবু লৈগদগে হায়বদু খঙবা ঙম্নবগীদমক মখোয়দা দিজিতেল সোলুসন অমা ফংহনখি৷
মরুপশিং,
নহাগী সজেসন খুদিংমক, ৱাখল্লোন খুদিংমক, ইন্নোবেসন খুদিংমক্না সরকারদগী সপোর্ত মপুং ফানা ফংহনগনি হায়না ঐনা অদোমদা থাজবা পীরি৷ লৈবাক অসিু মনিং-মখা তম্বা চহি ১০০দা পুরক্কদৌরিবা মথংগী চহি ২৫ অসি য়াম্না মরু ওই মরুপশিং অমদি অদোমগী ওইনসু য়াম্না মরু ওই৷ মতম অসি ইন্নোবেসন হায়বদি ৱাখল্লোনশিং, ইন্দস্ত্রী অমদি ইনবেস্তমেন্তগী অনৌবা ইরা অমনি৷ অদোমনা পাংথোক্লিবা অসি ভারতকীদমক্নি৷ অদোমগী এন্তরপ্রাইস অসি ভারতকীদমক্নি৷ অদোমগী লন-থুম তানশিল্লিবা অসি ভারতকীদমক্নি অমদি থবক ফংহল্লিবা অসিসু ভারতকীদমক্নি৷
নহাগী ইনর্জী অসিবু লৈবাক অসিগী ইনর্জীদা ওন্থোক্নবা ঐনা মপুং-ফানা হোৎনরি৷ অনৌবা ৱাখল্লোন খনবা অনৌবা মীরোন অমা লাকপনা অদোমগী সজেসনশিং অমদি ৱাখল্লোনশিং অদু খঙদোক্নবা হোৎনবা হায়বসি য়াম্না মরু ওইরে৷
অফবতা ওইরসনু হায়না ঐনা অদোমদা য়াইফ-মঙ্গোল পীজরি৷ মকর সঙ্ক্রান্তিগী শেংলবা কুহ্মৈগী এতমোস্ফেয়র মাংজৌননা লৈরে৷ অদুবু অদোমবুসু কোরোনাদগী চেকশিন্না লৈবিয়ু৷
অদুক্কী মতিক থাগৎচরি৷
