ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে, বেদব্যাস অঞসুং ঐখোয়গী বাইসাগী মহারানী লক্ষ্মীবাইগী পোক্নফম বুন্দেলখন্দ, মফম অসিদা লাকপগী খুদোংচাবা ফংজবদা নুংঙাইবা পোকই। খুরুমজরি!
উত্তর প্রদেশকী মমিং লৈরবা মুখ্য মন্ত্রী, য়োগী আদিত্যনাথজী, য়ু.পি.গী. উপ মুখ্য মন্ত্রী শহরী কেশব পরসাদ মোর্য়জী, মুখ্য মন্ত্রী শ্রী ব্রজেশ পাথকজী, কেন্দ্রগী মন্ত্রী-মন্দলগী ঐহাক্কী মরুপ শ্রী ভানুপ্রতাপ সিংহজী, য়ু.পি. সরকারগী মন্ত্রীশিং, এম.পি.শিং. এম.এল.এ.শিং, অতোপ্পা মীয়ামগী মীহুৎশিং অমসুং বুন্দেলখন্দগী ইচিল-ইনাওশিং,
য়ু.পি.গী মীয়াম, বুন্দেলখন্দগী ইচিল-ইনাও পুম্নমক, মতমগা চুনবা বুন্দেলখন্দ এক্সপ্রেসৱে অসিগীদমক নুংঙাইবা ফোঙদোকচরি। এক্সপ্রেসৱে অসি বুন্দেলখন্দগী মতিক-ময়াই লৈরবা চৎনবী অসিদা কত্থোক্লি। লমদম অসিনা ভারত ভক্তিগী ৱাখল্লোন্না ঈ-তোংদা চেল্লিবা, মশীং থীঙমদ্রবা লান্মী কয়া পুথোকখি, লৈবাক অসিগী মচানুপা অমসুং মচানুপীশিংগী থৌনানা অমসুং চোকথবা নাইদনা হোৎনবনা লৈবাক অসিগী মিংচৎপু লংনা ঙালহল্লি, ঙসি উত্তর প্রদেশকী এম.পি.না বুন্দেলখন্দগী লমদমদা এক্সপ্রেসৱে অসি খুদোল ওইনা পীখি। উত্তর প্রদেশকী মীয়ামগী মীহুৎ অমা ওইবা অসিদা ঐহাক্না নুংঙাইবা ফাওই।
ইচিল-ইনাওশিং,
দিকেদ কয়াদগী ঐহাক্না উত্তর প্রদেশতা লাকখি। য়ু.পি.গী থৌজালশিংগা লোয়ননা নখোয় পুম্নমক্না হৌখিবা চহি নিপান অসিদা লৈবাক্কী প্রধান সেবক ওইনা থবক তৌবগী থৌদাং পীখি। অদুবু ঐহাক্না মতম চুপ্পদা উদুনা লাকখিবা মদুদি করিগুম্বা উত্তর প্রদেশতা মরু ওইবা হীরম অনি হাপচিনবা তারবদি, করিগুম্বা অৱাৎপা মেনখৎলবনি, উত্তর প্রদেশনা শীংনবশিং মায়োক য়ানবগী অচৌবা থৌনাগা লোয়না লেপ্পা ঙমগনি। অহানবা সমস্য অসি মফম অসিগী লো অমসুং ওর্দর ফত্তবগী ফীভমনি। ঐহাক্না মমাংদা ৱা ঙাংবা মতমদা ফীভম অদু করম্না তৌরমখি হায়বা নখোয়না খঙই, অমসুং অনিশুবা হীরম অসিনা হীরম পুম্নমক্তা কন্নেক্তিবিতী ফত্তবা অসিনি। ঙসি উত্তর প্রদেশকী মীয়াম্না পুন্না য়োগী আদিত্যনাথকী লমজিং মখাদা উত্তর প্রদেশকী অপুনবা শক্তমদা অহোংবা পুরকখি। য়োগীজীনা লুচিংবা সরকারগী মখাদা লো অমসুং ওর্দর ফগৎলকখি অমসুং কন্নেক্তিবিতী খোঙজেল য়াংনা খুমাং চাউশিনখি। নীংতম্বা ফংলবা মতুং দিকেদ তরেৎ অসিদা ঙসি য়ু,পি.দা মতমগা চুনবা চত্থোক-চৎশিনগী পাম্বৈগীদমক থবক কয়া পাইখৎলি। ঐহাক্না হংনীংবদি মসি উবা ফংব্রা নত্ত্রগা ফংদব্রা হায়বা অসিনি? বুন্দেলখন্দ এক্সপ্রেসৱে অসিদা চিত্রকুৎতগী দিল্লী য়ৌবদা চঙবা মতম অসি পুং 3-4 ফাওবা হন্থরে, অদুবু মসিনা পীবা কান্নবদি মসিদগী হেন্না লৈরি। এক্সপ্রেসৱে অসিনা গারীশিংবু য়াঙনা থৌবা য়াহনবদা নত্তনা মসিনা বুন্দেলখন্দ অপুনবগী ওইনা ইন্দস্ত্রী চাউখৎপদসু খোঙজেল য়াঙখৎহল্লগনি। এক্সপ্রেসৱে অসিগী নাকল অনিমক্তা ইন্দস্ত্রীশিং লিংখৎলগনি, মফম অসিদা স্তোরেজ ফেসিলিতীশিং, কোল্দ স্তোরেজ ফেসিলিতীশিং শেমগৎলগনি। বুন্দেলখন্দ এক্সপ্রেসৱেনা মরম ওইদুনা মফম অসিদা এগ্রো-বেজ ইন্দস্ত্রীশং লিংখৎপদা য়াম্না লায়বা ওইরে, মসিনা অনৌবা মার্কেৎশিংগী লৌউ-শিংউগী পোত্থোক পুথোক-পুশিন তৌবদা লায়থোকহল্লগনি। মসিনা বুন্দেলখন্দদা শারিবা দিফেন্স কোরিদোরদা চাধনা মতেং পাংলগনি। হায়বদি এক্সপ্রেসৱে অসিনা বুন্দেলখন্দগী কাচিন-কোয়া খুদিংমক চাউখৎ-থৌরাং, ইশানা ইশাবু থবক পীজবা অমসুং অনৌবা খুদোংচাবশিং ফংহল্লগনি।
মরুপশিং,
চত্থোক-চৎশিন তৌবগী মতমগা চুনবা পাম্বৈশিংদা অহানবা হক অসি অচৌবা সহরশিংগীনি হায়না থাজনবা মতম অমা লৈরমখি। মুম্বাই, চেন্নাই, কোলকাতা, বেঙ্গলোর, হায়দরাবাদ, দিল্লী ওইরবসু মখোয়না খুদোংচাবা খুদিংমক ফংই। অদুবু হৌজিক্তি সরকার অসিদা অহোংবা লাক্লে, মোদতসু অহোংবা লাক্লে অমসুং মসি মোদীননি, মসি য়োগীননি, হৌজিক্তি অরিবা ৱাখল্লোন অদু তুং ওইনরম্লগা ঐখোয়না অনৌবা পাম্বৈগা লোয়ননা মাংদা চংশিল্লি। ইং কুমজা ২০১৭তগী হৌদুনা উত্তর প্রদেশতা কন্নেক্তিবিতীগী থবক পাইখৎপা হৌখি, অচৌবা সহরগুম্না অপীকপা সহরশিংদা চপ মান্ননা খুদোংচাবা পীখি। বুন্দেলখন্দা এক্সপ্রেসৱেনা চিত্রাকুত, বান্দা, মহোবা, হমীরপুর, জালৌন, ঔরৈয়া অমসুং ইদাৱা, ফাওদুনা চৎলি। পুর্বঞ্চল এক্সপ্রেসৱেনা লখনৌ লোয়ননা বারানকী, অমেথী, সুলতানপুর, অয়োধ্যা, অম্বেদকরনগর, আজমগর, মউ অমসুং গাজীপুর ফাওদুনা চৎলি। গোরখপুর লিঙ্ক এক্সপ্রেসৱেনা অম্বেদকরনগর, সন্ত কবীরনগর অমসুং আজমগর ফাওনহল্লি। গঙ্গা এক্সপ্রেসৱেনা মেরথ, হাপুর, বুলন্দশহর, অমরোহা, সমভল, বদায়ু শাহজহানপুর, হরদোই, উন্নাৱ, রায়বরেলী, প্রতাপগর অমসুং প্রয়াগরাজ ফাওনহল্লি। শক্তি কয়া শেমগৎলি। উত্তর প্রদেশকী কাচিন-কোয়া খুদিংমক্না অনৌবা মঙলানশিং অমসুং অনৌবা ফিরেপশিংগা লোয়ননা মাংদা চংশিন্নবা শেম-শাদুনা লৈরিবা অমসুং মসি দবকা সাথ, সবকা বিকাসনি। কনাগুম্বা অমত্তা শোত্থনা লৈহল্লোই, ঐখোয়না পুন্না মাংদা চংশিনগনি, দবল-ইঞ্জিন সরকারনা অনৌবা থৌনাগা লোয়ননা মাইকৈ অসিদা চংশিল্লি। য়ু.পি.গী অপীকপা জিলাশিং এয়র সর্ভিসনা ফাওনহল্লি, মসিগীদমক থবক খোঙজেল য়াংনা পাইখৎলি। হৌখিবা মতম খরা অসিদা প্রয়াগরাজ, গাজিয়াবাদতা অনৌবা এয়রপোর্ত তর্মিনেলশিং শাখি, কুশিনগরদা অনৌবা এয়রপোর্ত জেৱর, নোইদাদা অঅতোপ্পা ইন্তরনেস্নেল এয়রপোর্ত শেমগৎলি। তুংদা খোঙথাংশিং অসিনা য়ু.পি.গী সহর কয়া এয়র রুত লৈহল্লগনি। অসিগুম্বা ফেসিলিতীশিং অসিদগী তুরিজম ইন্দস্ত্রী মপাঙ্গল কনখৎলকখি। অমসুং ঐহাক্না মফম অসিদা ঙসি স্তেজ অসিদা কাদ্রিঙৈ মমাংদা বুন্দেলখন্দ এক্সপ্রেসৱেগী প্রজেন্তেসন য়েংখি, মোদ্যুল ইন্সতোল তৌখিবা অদু য়েংখি, অমসুং এক্সপ্রেস অসিগী নাকলদা ফোর্ত কয়া লৈ। ঝান্সিদা ফোর্ত অমা খক্তা লৈবা অসিগা মান্নদবা মওংদা ফোর্ত কয়া লৈ। মপালগী লৈবাকশিংনা খঙলি মদুদি য়ুরোপকী লৈবাক কয়াদা ফোর্তশিং য়েংনবা অচীবা তুরিজম ইন্দস্ত্রী লৈ, মালেমদগী মীপুম খুদিংমক্না অরিবা ফোর্তশিং য়েংনবা মীওই কয়া লাকই। ঙসি বুন্দেলখন্দ এক্সপ্রেৱে অসিনা শারবা মতুংদা ঐহাক্না য়োগীজীগী সরকারদা ফোর্তসশিং অসি য়েংনবগীদমক অচৌবা সর্কিত তুরিজম শেমগৎনবা হায়জগনি, মালেমদগী লমকোইবা কয়ানা মফম অসিদা ফোর্ত য়েংনবা লাক্কনি। মসি খক্তা নত্তনা ঙসি ঐহাক্না য়োগীজীদা ৱাফম অমগা হায়জনীংই মদুদি হন্দক্তি উত্তর প্রদেশকী নহারোলশিংগীদমক নীংথম থানা লাকপাদা ফোর্ত অসি কান্নবগী কম্পিতিসন অমা পাঙথোকউ। মরুপশিং এক্সপ্রেৱে অসিনা থবক মখল কয়াগী খুদোংচাবশিং পীগনি।
মরুপশিং,
ঙসি দবল ইঞ্জিন সরকারগী মখাদা য়ু.পি. অসি মতমগা চুনবা মওংদা শেমগৎলি, মসি মমাংদা অমুক্তা তৌখিদ্রি। য়ু.পি.দা সারিয়ু কেনেল প্রোজেক্ত লোইশিনবদা চহি ৪০ চঙখি, য়ু.পি.দা গোরাখপুর ফর্তিলাইজর প্লান্ত চহি ৩০ থোঙ লোনখি, য়ু.পি.দা আর্জুন দাম প্রোজেক্তনা লোইশিনবদা চহি ১২ চঙখি, য়ু.পি.দা নেম বোর্দ অমখক্তগা লোইননা তাদুনা লৈরম্বা অমেথি রাইফল ফেক্তরী লৈরম্মি, য়ু.পি.দা রাই বরেলি রেল কোচ ফেক্তরীনা কোচশিংবু মচু শংবগী থবক খক্তমক তৌদুনা চলাইদুনা লৈরম্মি, হায়রিবা য়ু.পি. অসিদা হৌজিক্তি ইনফ্রাস্ত্রকচরগী ওইবা থবকশিং নীংথিনা পাইখৎপনা অতোপ্পা অফবা রাজ্য কয়াদগী ফাওবা হেনগৎলক্লে। হৌজিক্তি য়ু.পি.গী মশক অসি লৈবাক পুম্বগী ওইনা অহোংবা লাক্লে। অদোম্না মসিদা চাউথোকচবা পোকপরা নত্ত্রগা পোক্তবরা? ঙসি য়ু.পি.গী মমিং অসি ঙানথোইরি, অদোম্না চাউথোকচবা পোকপরা নত্ত্রগা পোক্তবরা? হৌজিক মালেম পুম্বনা য়ু.পি.দা অচৌবা ৱাখল্লোনগা লোয়ননা য়েংলি, মসি নুংঙাইবরা নত্ত্রগা নুংঙাইতবরা?
অমসুং মরুপশিং,
মসি হায়ৱে নত্ত্রগা এয়রৱে খক্তগী ৱাফম নত্তে। এজুকেসনগী লমদা, মেন্যুফেকচরিংগী লমদা, লৌউ-শিংউগী লমদা, য়ু.পি.না লম খুদিংমক্তা খুমাং চাউশিল্লি। মমাংগী সরকারনা পাল্লম্বা চহি অদু নীংশিংঙু, মমাংগী সরকারগী মতমদা চহি অমদা য়ু.পি.দা রেল লাইন দব্লিং তৌবা অসি চাংচৎ ওইনা কিমি ৫০ তৌখি। কয়াম তৌখি? কিলোমিতর কয়া তৌখি? – য়াইখৈ। অহানবদা ঐখোয় লাক্ত্রিঙৈ মমাংদা কিমি ৫০ দব্লিং তৌখি। য়েংঙু হৌজিক্তি য়ু.পি.গী নহারোলশিংনা মখোয়গী তুংলমচৎ শেম্লিবা অসি, ঙসি চাংচৎ ওইনা কিমি ২০০গী থবক পাইখৎলি। রেল লাইন কিমি ২০০ দব্লিং তৌরি। ২০১৪গী মমাংদা য়ু.পি.দা কম্মন সর্ভিস সেন্তর ১১,০০০ খক্তা লৈরমখি। মশিং অসি খঙজিনবীয়ু, কয়া হায়বা? লিশিং ১১। ঙসিদি য়ু.পি.দা কম্মন সর্ভিস সেন্তর লাখ অমগা লিশিং ৩০ লৈরে। অদোম্না মশিং অসি নীংশিংগদ্রা? মতম অমদা য়ু.পি.দা মেদিকেল কোলেজ ১২ খক্তা লৈরমখি। মশিং অসি নীংশিংবীয়ু, মেদিকেল কোলেজ কয়া হায়বা? হৌনা হায়বীয়ু, কয়া হায়বা? মেদিকেল কোলেজ ১২। ঙসিদি য়ু.পি.দা মেদিকেল কোলেজ ৩৫ হেন্না লৈরে অমসুং অনৌবা মেদিকেল কোলেজ ১৪গী থবক পাইখৎৱলি। হায়বদি ৫০ শুরে।
ইচিল-ইনাওশিং,
লৈবাক অসিনা ঙসি চাউখৎপগী খোঙজেল চেল্লিবা ঈচেল অসিগী মনুংদা মগুন অনিখক লৈরি। অহানবদুনা ৱাখল্লোন্নি অমসুং অতোপ্পা অদুনা ইকাইখুম্নবনি। ঐখোয়না লৈবাক অসিগী হৌজিক হৌজিক্কী অনৌবা খুদোংচাবা কয়া অমা শেম্বদা নত্তনা লৈবাক অসিগী তুংগীসু শেমগৎলি। পি.এম. গতি শক্তি নেস্নেল মাস্তর প্লানগী খুত্থঅংদা ঐখোয়না ২১শুবা চহিচাগী ইনফ্রাস্ত্রকচর শেমগৎলি।
অমসুং মরুপশিং,
ঐখোয়না চাউখৎ-থৌরাংগীদমক সর্ভিস তৌবা অসিদা তাইম লিমিৎ কাইহন্দে। উত্তর প্রদেশতা তাইম লিমিত কাইহন্দনা থবক লোইশিনখিবগী খুদম কয়া লৈ। ঐখোয়গী সরকারনা কাশীগী বিশ্বানাথ ধাম নৌনা শেমগৎ-শাগৎনবগী থবক পাইখৎখি অমসুং ঐখোয়গী সরকারনা মদু মতম চানা লোইশিনখি। ঐখোয়গী সরকারনা গোরখপুর এম্সকী উরেপ-উয়ুং তমখি অমসুং মসি সরকার অসিনা শঙ্গাখি। দিল্লী-মীরুত এক্সপ্রেসৱে অমসুং বুন্দেলখন্দ এক্সপ্রেসৱেদা ফেসিলিতীশিং অপগ্রেদ তৌবা অমসুং নৌনা শেমগৎ-শাগৎপগী প্রোজেক্তশিং অসিনা মসিগী খুদম ওইরি মরমদি হৌজিক পাল্লিবা সরকার অসিনা মসিগী উরেপ উয়ুং তমখি অমসুং প্রোজেক্তশিং অসি লোইশিন্দুনা জাতিদা খুৎশিন্নখি। অমসুং কোরোনাগী শীংনবশিং লৈজরবসু ঐখোয়না মতম চানা লোইশিনখি। অসিগুম্বা থবক অসি তৌবনা ইরৈবাকচা খুদিংমক্না মখোয়না থাদখিবা ভোৎ অদু ইকাই খুম্নবীরে অমসুং থবক ওইনা ওন্থোক্লে হায়না ফাওই। ঐহাক্না য়োগীজী অমসুং মহাক্কী তীমবু মসিগীদমক থাগৎপা ফোঙদোকচরি।
মরুপশিং,
ঐহাক্না লম্বী, হোস্পিতাল, ফেক্তরী শঙ্গাবা মতমদা ঐহাক্না থমোয়দা ৱাফম অম ফাওখি মদুদি সরকার অসি শেম্নবা ভোৎ পীখিবা ভোতরশিংবু ইকাই খুম্নবা অমসুং লৈবাক অসিগী ভোতর পুম্নমক্তা খুদোংচাবা ফংহনবা হায়বা অসিনি।
মরুপশিং,
ঙসি মালেম পুম্বনা ভারত্তা অচৌবা থাজবগা লোয়ননা য়েংলি। ঐখোয়গী নীংতম্বগী চহি ৭৫ শুবা চহি পালন তৌরিবা অসিদা মথংগী চহি ২৫দা অনৌবা পনখৈ য়ৌবা ঙম্নবা রোদমেপ অমা ভারতনা শেম্লি। অমসুং ঙসি ঐহাক্না বুন্দেলখন্দগী লমদম অসিদা লাকচবা ফংবদা ঐহাক্না ঝান্সিগী রানী লক্ষ্মীভাইগী লমদম অসিদা লাকচবদা। মফম অসিদগী, অথৌবশিংগী লমদম অসিদগী ঐহাক্না ভারতকী খুঙ্গং লাখ তরুক হেনবগী মীয়ামদা থমোয় শেংনা ইকাই খুম্নবা উৎচরি। ঙসি ঐখোয়না আজাদী কা অমৃত মহোৎসব পালন তৌরি। মসিগীদমক চহি কয়া, ঐখোয়গী ইপা-উপুশিংনা লান্থেংনখি, কত্থোকখি, মীওৎ মীনাই খাংখি, মথংগী থাগী ১৫, হায়বদি ওগস্ত ১৫ ফাওবদা থৌরম কয়া পাঙথোকপা হায়বা অসি ঐখোয়গী থৌদাংনি। অমৃত কাল পালন তৌনবা প্রোগ্রামশিং শিনসি। অথৌবশিং নীংশিংসি, মখোয়না কত্থোকখিবা অদু নীংশিংসি, মখোয়না শোক্নখিবা লানশিং নীংশিংসি, অনৌবা ফিরেপকী এতমোস্ফিয়র অমা খুঙ্গং খুদিংদা লৈহল্লসি।
মরুপশিং,
ভারতকী হৌজিক অমসুং অফবা তুংলমচৎকী অনীংবা অপাম্বগা মরী লৈনদবা থবক ভারত্তা পাইখৎলোই। ঐখোয়না ৱারেপ অমা হেক্তা লৌশনবা অমসুং থৌশিল অমা শেম্বা মতমদা খ্বাইদগী চাওনা খনগদবা ৱাখলদি মসিনা লৈবাক অদুগী চাউখৎ খোঙথাংদা খোঙজেল য়াঙহনগদবনি হায়বসিনি। লৈবাক অদুবু শোকহল্লিবা খুদিংমক অদুনা লৈবাক অদুগী চাউখৎপদা অয়েৎপা পী হায়বা ৱাখল্লোন অসি ঐখোয়না মসিবু লাপনা থমগদবনি। ‘অমৃত কাল’ অসি অতাংবা খুদোংচাবা অমনি অমসুং ঐখোয়না লৈবাক্কী চাউখৎ-থৌরাংগীদমক খুদোংচাবা অসি মাংহল্লোইদবনি।
মরুপশিং,
অনৌবা ভারতকী মাংদা শীংনবা অমা লৈরি, হৌজিক মীৎয়েং চংহৌদবা তারবদি মসিনা নহারোলশিংদা চাউনা অমাংবা থোক্কনি। অদোমগী ঙসি অসি লান্না লমজিংখিগনি অমসুং অদোমগী হয়েং অদু অমম্বনা কুপখিগনি। মরুপশিং, মরম অসিনা ঐখোয়না হৌজিক মীকপ থোকপা মতম ওইরে। হৌজিক মতম অসিদা ঐখোয়গী লৈবদা লেম্না রেৱরী য়েন্দুনা ভোৎ খোমবগী কলচর অমা লাক্লি। মসিগী রিৱরী কলচর অসি লৈবাক অমা চাউখৎপদা য়াম্না খুদোংথিনিংঙাই ওইবা অমনি। হায়রিবা রিৱরী কলচর অসিদগী লৈবাক অসিগী মীয়াম্না চেকশিনবীগদবনি। রেৱারি কলচরগা লোয়ননা মখোয়না নখোয়গীদমক অনৌবা এক্সপ্রেসৱেশিং, অনৌবা এয়রপোর্তশিং নত্ত্রগা দিফেন্স কোরিদোরশিং কৈদৌনুংদা শেমগৎপা ঙমলোই। রেৱারি কলচরগী মীওইশিংনা মখোয়না মীচম প্রজাশিংদা রিৱরীশিং য়েন্দুনা ভোৎ লৈগনি হায়না খল্লি। ৱাখল্লোন অসি অমত্তা ওইনা মাইথিবা পীনবা অমসুং লৈবাক্কী রাজনিতীশিংদগী রিৱরী কলচর মত্থৎনবা হোৎনরসি।
মরুপশিং,
রিৱরী কলচরদগী নাথৈদুনা ঐখোয়না লম্বীশিং শেমদুনা লৈবাক অসিদা অনৌবা রেল রুতশিং শেমদুনা মীয়ামগী অনীংবশিং থুংহন্নবা হোৎনরি। ঐখোয়না হৌজিক পক্কা য়ুমশিং, রেলৱে লাইনশিং, লম্বী অমসুং ইনফ্রাস্ত্রকচর, ঈথৈ লৌখোঙ, ইলেক্ত্রিসিতী প্রোজেক্তশিং অসিগুম্বা এমেনিতীশিং পীনবা প্রোজেক্তশিংদা মীৎয়েং চংলি। দবল-ইঞ্জিন সরকারশিংনা রিৱরীগী অরাইবা পাম্বৈশিং শীজিন্নদে অমসুং কন্না হোৎনদুনা মথৌ তাবা থুংহন্নবা হোৎনরি।
মরুপশিং,
ঙসি ঐহাক্না ৱাফম অমগা হায়জনীংই। খল মাননা চাউখৎ-থৌরাং পুরকপা, নাথৈদুনা থমলুরবা অমসুং অপীকপা সহরশিংদা চাউখৎ-থৌরাং য়ৌরকপদা মসিনা সোসিএল জস্তিস পুরকপা ঙম্মি। মোদর্ন ইনফ্রাস্ত্রকচরনা নোংপোক থংবা ভারত অমসুং বুন্দেলখন্দ য়ৌরকপা অসি সোসিএল জস্তিস পুরকপগা পাংখক ওই। মতেং য়াওদনা মশা মথন্তদা হুন্দোক্তুনা থমলুরবা শোত্থরবা জিলাশিংনা হৌজিক্তি চাউখৎ-থৌরাং উবা ফংলি, মসিসু সোসিএল জস্তিস পুরকপনি। লায়রবশিংগী তোইলেৎশিং, খুঙ্গংশিংবু লম্বীশিং শেমদুনা ফাওনহনবা অমসুং তোতি ঈশিং ফংহনবা অসি সোসিএল জস্তিস পুরকপনি।
ইচিল-ইনাওশিং,
সরকার অসিনা বুন্দেলখন্দগী অতোপ্পা শীংনবা অমসু কোকহন্নবা থবক মখা তানা পাইখৎলি। সরকার অসিনা য়ুমথোং খুদিংদা তোতি ঈশিং ফংহন্নবা জল জীবন মিসন পাইখৎলি। ঐখোয়গী ইমা, ইচে-ইচলশিংনা মসিগী চাউনা কান্নবা ফংলি অমসুং মখোয়গী পুন্সিদা অৱাবা কয়া কোকহনবা ঙম্লে। ঐখোয়না বুন্দেলখন্দদা তুরেল ঈশিং য়ৌহন্নবা লেপ্পা লৈতনা হোৎনরি। রতৌলী দাম, ভবানী দাম, মঝগাপ-চিল্লি স্প্রিঙ্কলর ইরিগেসন প্রোজেক্ত অসিগুম্বা খোঙথাংশিং অসিনা বুন্দেলখন্দ তুরেলশিংগী ঈশিংবু লমদম অসিগী মীয়ামদা য়ৌহনবগী মশিং হেনগৎলি। কেন-বেতৱা লিঙ্ক প্রোজেক্ত অসিদা লুপা করোর লিশিং কয়া কাইথরি। মসিনা লমদম অসিগী মিয়ামগী পুন্সিদা অহোংবা পুরক্কনি।
মরুপশিং,
ঐহাক্না বুন্দেলখন্দগী মরুপশিংদা ৱাফম অমগা হায়জনীংই। নীংতম্বা ফংখিবগী চহি ৭৫ শুরকপা অসিদা লৈবাক অসিনা অমৃত সরোভর শানবা ৱারেপ লৌখি। বুন্দেলখন্দগী জিলা খুদিংদা অমৃত সরোভর ৭৫ শাগনি। মসি ঈশিং তাংবগী অৱাবা অসিগীদমক অফবা থবক অমনি। মসিনা তুংগী মীরোলশিংদা কান্নবা পীগনি। ঙসি ঐহাক্না অফবা থবক অসিদা য়াওশিনবীনবা মশিং য়াম্লবা মীয়াম্না থোরক্নবা হায়জরি। অমৃত সরোবর ৭৫ শানবা কেম্পেন অসি খুঙ্গং অমদগী খুঙ্গং অমদা চৎতুনা হৌদোকপীয়ু।
ইচিল-ইনাওশিং,
বুন্দেলখন্দগী চাউখৎ-থৌরাংদা কোতেক ইন্দস্ত্রীশিংনা অচৌবা শক্তি পীরি। কোতেজকী চৎনবী অসিদা ঐখোয়গী সরকারনা আত্মনির্ভর ভারত ওইনবা মীৎয়েং চংখি। ভারত্তা কোতেজকী চৎনবী অসিদা মেক ইন ইন্দিয়ানা শাহৌ পীরগনি। ঙসি ঐহাক্না অপীকপা খোঙথাংনা অচৌবা শাফু করম্না পীবগে হায়বগী খুদম অমা পীজগে।
মরুপশিং,
ভারতনা মালেমগী অতোপ্পা লৈবাকশিংদা চহি খুদিংগী লুপা করোর কয়াগী শান্নপোৎশিং লৈ। অঙাংশিংগী শান্নপোৎ মচাশিং অসি ফাওবা মপালদগী পুরকই। শান্নপোৎ শাবা হায়বা অসি ভারতকী ফেমিলী অমসুং ত্রেদিস্নেল ইন্দস্ত্রী অমা ওইদুনা লাকখি, মসিনা ফেমিলি বিজিনেস ওইরমখি। মসি য়েংলগা ঐহাক্না ভারত্তা লৈরিবা তোই ইন্দস্ত্রীদা অমুক হন্না থবক অসি পাইখৎপা হৌনবা অপীল তৌখি। মীয়ামদা ভারত্তা শাবা শান্নপোৎ লৈনবা অপীলসু তৌখি। ঐখোয়না অতেনবা মতমগী মনুংদা সরকারনা তৌবা য়াবা খুদিংমক তৌখি। মসিগী ফল ওইনা ঙসি ভারত মচা খুদিংমক্না চাউথোকচাবা পোক্লি, মসি ঐহাক্কী লৈবাক্কী মীয়াম্না করম্না থবক অসি মাইপাকহনবগে হায়বগী খুদম অমনি। মসিগী মহৈ ওইনা ঙসি মপালদগী পুশিল্লকপা শান্নপোৎশিংগী মশিংদা চাউনা হনবা ঙমলে। ঐহাক্না ইরৈবাকচা খুদিংমক্তা তৌবীমল খংবা উৎচরি। মসি খক নত্তনা হৌজিক ভারত্তগী মপালদা শান্নপোৎ মশিং য়াম্না থাদোকপা ঙম্লে। মসিদগী কনানা কান্নবা ফংবগে? ঐখোয়গী শান্নপোৎ শারিবশিং অসি অয়াম্বনা লায়রবা ইমুংশিং, দলিত ইমুংশিং, শোত্থরবা ইমুংশিং, আদিৱাসীগী ইমুংশিং ওই। ঐখোয়গী নু্পীশিংনা থবক অসিদা য়াওশিল্লি। মীয়ামশিং অসিনা ইন্দস্ত্রী অসিদগী কান্নবা ফংলি। ঝান্সি চিত্রাকুত, বুন্দেলখন্দদা শান্নপোৎশিংগী ফজরবা ত্রেদিসন অমা লৈজৈ। দবল ইঞ্জিন সরকার অসিনা মসিবুসু চাউখৎহল্লি।
মরুপশিং,
বুন্দেলখন্দগী অথৌবশিংনা, লমদম অসিগী লান্মীশিংনা শান্নবুংদা লমফম অসিগী মাইপাকপগী ফিরাল পাইহনখি। খ্বাইদগী ৱাংবা স্পোর্তসকী লমদা ইকাই খুম্নবগী মনা অসিবু লমদম অসিগী মপারী মেজর ধ্যানচন্দগী মমিং লৌদুনা থোনখি। মেরথতা ধ্যান চন্দজীনা মতম কয়া লেনখি, মফম অসিদা মহাক্কী মমিংদা স্পোর্তস য়ুনিভর্সিতী শাগৎলি। মতম খরগী মমাংদা ঐখোয়গী ঝান্সিগী ইচানুপী, সাইলি সিংহনা শীংথানীংঙাই ওইবা থবক অমা পাঙথোকপা ঙমখি। ঐখোয়গী বুন্দেলখন্দগী ইচানুপী অসিনা অন্দর-২০ ৱর্ল্দ এথলেতিক্স চেম্পিয়নশিপ্সতা লমদম অসিগী মীংচৎ পুরক্তুনা সিলভর মেদল লৌরকখি। বুন্দেলখন্দদা নহা ওইরিবা তেলেন্ত লৈবা শান্নরোয় কয়া লৈ। নহারোলশিংনা খুদোংচাবা কয়াগা লোয়ননা মাংদা চংশিল্লি। লমদম অসিদগী মাইগ্রেৎ তৌবা লেপহন্নবা সরকারনা মফম অসিদা মতমগা চুনবা ইনফ্রাস্ত্রকচর শেমগৎনবা মাইকৈদা থবক পাইখৎলি। য়ু.পি.না গুদ গভর্নান্সকী অনৌবা মশক অসি মপাঙ্গল কনখৎহন্নবা হোৎনরি, য়াইফ-মঙ্গোল অসিগা লোয়ননা ঐহাক্না বুন্দেলখন্দ এক্সপ্রেসৱে অসিগীদমক ময়ামদা অমুক্কা হন্না থাগৎপা ফোঙদোকচরি। আজাদী কা অমৃত মহোৎসব অসি মথং থাগী ওগস্ত ১৫ ফাওবা নীংথিনা পালন তৌনবা হায়না ভারতকী য়ুমথোং খুদিংদা, খুঙ্গং খুদিংদা হায়জরি। ময়ামদা ঐহাক্না য়াইফ মঙ্গোল পীজরি, হন্না হন্না থাগৎচরি। হৌনা হায়বীয়ু ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে, হন্না-হন্না থাগৎচরি।
