ভারত ইমানা য়াইফরে- ভারত ইমানা য়াইফরে- ভারত ইমানা য়াইফরে, গুজরাতকী মীয়াম্না য়বা মুখ্য মন্ত্রী মৃদু অমসুং মক্কম শ্রী ভুপেন্দ্র ভাই পতেল, অদোম্না মমাংগী মীখলদা ভোৎ য়াম্না পীবিদুনা নবসারীমক্কী এম.পি. ওইহনবীরিবা অমসুং নবসারীগী মিংবু লৈবাক অসিদা মশেক-মঙাল থোকহল্লিবা ঐহাক্কী পার্লিয়ামেন্তকী সেনিয়র মরুপ, শ্রী সি.আর.পাতিল, কেন্দ্রগী কেবিনেত্তা ঐহাক্কী খোঙলোই ওইরিবী ইচল দর্শনজী, ভারতকী সরকারগী মন্ত্রী পুম্নমক, এম.পি. অমসুং এম.এল.এ.শিং, রাজ্য সরকারগী মন্ত্রী পুম্নমক অমসুং মফমসিদা মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং!
ঙসি গুজরাতকী গৌরব অভিয়ান অসিদা ঐহাক্না য়াম্না চাউথোকচবা ফাওজরি। ঐহাক্না মুখ্য মন্ত্রী ওইনা চহি কয়া মীয়ামগীদমক্তা থবক তৌরম্মি। অদুবু, ত্রাইবেলগী লমদম অমদা অসুক য়াম্না চাউবা থৌরম অমা পাংথোকপসি ঐহাক্কী মতমদদি ফংখিদে। ঙসি ঐহাক্না য়াওজবা ফংবা অসিনা ঐহাক্না চাউথোকচরিবনি। অদুগা ঐহাক্না গুজরাত থাদোক্লবা মতুংদা গুজরাতকী সেবাগীদমক্তা থোক্লকপা মীওই খুদিংনা মশাগী থৌদাং নীংথিনা পাংথোকপা অসিনসু ঐহাক্না ঙসি চাউথোকচরিবনি। ঙসিদি, শ্রী ভুপেন্দ্র ভাই পতেল অমসুং শ্রী সি.আর. পতেলগী পুংবানা থৱাই য়াওবগা লোয়ননা মীয়ামদা অনৌবা থাজবা অমসু পীরি। মদুনা মরম ওইরগা, ঙসি ঐহাক্না মীওই লাখ ৫ হেনবনা ঐহাক্কী মাঙদা তিনবা উবা ফংলিবনি। ঐহাক্কী মতমদা পাংথোকপা ঙমহৌদবশিংবু ঐহাক্কী মরুপশিংনা পাংথোকপা অসিদা ঐহাক্না চাউথোকচৈ। মসিদা নত্তে, অদোম্বু মীয়াম্না নুংশিবসু নোংম-নোংমগী হেনগৎলি। মসিনসু ঐহাক্না চাউথোকচরিবনি। ঐহাক্না নবসারীগী শেংলবা লমদম অসিদগী উনাই ইমা লাইশঙবুসু কোক নোন্দুনা খুরুমজরি। ত্রাইবেলশিংগী পাঙ্গল অমসুং ৱারেপকী লমদম অসিদা ঐহাক্না গুজরাত গৌরব অভিয়ান য়াওবা ফংলিবা অসিদসু ঐহাক্না চাউথোকচরি। মমাংগী দিকেদ অনিদা খোঙজেল থুবা অমসুং হীরম খুদিংমক মনুং চনবা চাউখৎ-থৌরাং লৈখিবা অমসুং মসিদগী অনৌবা অপাম্বা কয়া থোক্লকখিবসি গুজরাতকী চাউথোকচনীংঙাই ওইবা ৱাফম অমনি। দবল ইঞ্জিন সরকার অসিনা চৎনবী অসিবু তুংলমচত্তা থম্মোই শেংনা পুদুনা চৎলি। ঐহাক্না ঙসি লুপা করোর লিশিং ৩গী প্রোজেক্তশিং শঙ্গাবা, উরেপ উয়ুং তম্বা অমসুং ভুমী পুজনগী তৌবগী খুদোংচাবা ফংলি। ঐহাক্না ভুপেন্দ্র ভাইজী অমসুং রাজ্য সরকারগী লমন তোন্সিল্লে। য়াইফরবা থৌরম অসিদা শরুক য়ানবা ঐহাক্কী ইফমদা পাউজেল পীবিরকপগী অদোম্বু ঐহাক্না ইকায় খুম্নজরি। প্রোজেক্তশিং অসিনা সুরত, নভসারী, বলসার অমসুং খা গুজরাতকী তাপী জিলাদা লৈবা মীওইশিংগী পুন্সি মহিং হেন্না ফগৎহল্লগনি। মৈ, ঈশিং, শোরোক, হকশেল, এজুকেসন অমসুং মখল খুদিংগী কন্নেক্তিবিতীগী প্রোজেক্তশিং অসিনা মরু ওইনা ত্রাইবেলগী লমদমদা লাকপা মতমদা মখোয়বু খুদোংচাবা কয়া অমসুং থবক্কী অনৌবা খুদোংচাবা কয়াগা মরী লৈনহনগনি। অসিগুম্বা চাউখৎপগী স্কিম কয়া অসিগীদমক্তা ঐহাক্না লমদম অসিগী ইচিল ইনাও অমসুং গুজরাত অপুনববু থাগৎচরি।
ইচিল ইনাওশিং,
চহি ৮গী মমাংদা অদোম্না ঐহাক্কী ইফমদা য়াইফ থৌজাল কয়াগা লোয়ননা থাজবা থম্বীদুনা লৈবাক্কী সেবা তৌবগী থৌদাং পাংথোক্নবা ঐহাকপু দিল্লীদা থাবীখিবনি। মমাংগী চহি ৮দা ঐখোয়না মীয়ামগী অনৌবা কাংলুপ অমসুং লমদম কয়াবু চাউখৎ-থৌরাং অমসুং অনীংবা অপাম্বা কয়াগা মরী লৈনহনখি। লাইরবা, শোত্থরবা, মীরাইবীরবা, ত্রাইবেল, নুপী অমসুং অৱাবা নংগনবা মীওইশিংনা নোংমগী তঙাই ফদবশিং খক ফংনবা মখোয়গী মপুন্সি পুম্বা লেনখিবগী মতম অমা লৈরম্মি। মমাংগী মতমদা, মখোয়গী চাউখৎ-থৌরাংদা সরকারনা মিৎয়েং অমত্তা চঙবীরমদে। নীংতম্বা মতুংদা মতম শাংনা পাল্লম্বা সরকারনা চাউখৎ-থৌরাংদা মিৎয়েং অমত্তা চঙলমদে। চাউখৎপগী তঙাই সেক্তর, মীওই কাংলুপকী চাউখৎ-থৌরাংগী করিমত্তা খনবীরমদে, মসি করিগীনো হায়বদা মখোয়না হোৎনবা তনবদগীনি। অফবা শোরোক্কী খ্বাইদগী তঙাই ফদবা কদাইদা লৈ, খুঙ্গংদা লৈ, ত্রাইবেলগী মফমশিংদা লৈ। মমাংগী চহি ৮গী মনুংদা পক্কা য়ুম ফংখিবা, মৈ ফংখিবা, অমাংশঙ শাবীখিবা অমসুং গ্যাস কন্নেক্সন ফংখিবা মীওইশিংগী অচৌবা শরুক্তি ঐহাক্কী ত্রাইবেল, দলিত অমসুং শোত্থরবা ইচিল ইনাওশিংনি। থক্নবা অফবা ঈশিংগী তঙাই ফদবা কনাদা লৈ, ঐখোয়গী খুঙ্গং, ত্রাইবেল, লাইরবশিংগী মনাক্তা লৈ। অদুগা ভেক্সিন কাপ্পগী মতাংদসু শহরগী মফমদদি অদুমক থুনা ফংগনি। মনুং হঞ্জিনবা খুঙ্গং, লাইরবা অমসুং ত্রাইবেলগী মনাক্তা ভেক্সিন য়ৌরকপদদি চহি কয়া অমা চঙলমগনি। তি.ভি., পাউচেনচিংবশিংদা পংহাইদা হায়নরমগনি অদুবু তসেংবা ফংবদি অমত্তা ফংলম্লোই। অদুবু, গুজরাতকী ইচিল ইনাওশিংনা পাউখুম অমুক্তা পীবীয়ু। অদোম তীকা কাপ্লবা নত্ত্রো? লেম্না তীকা কাপ্লবা নত্ত্রো? মনুং হঞ্জিনবা জংগলশিংগীদমক্তা খনবা হায়বসি ঐখোয়গী সংস্কারদা য়াওই।
মরূপশিং,
বেঙ্কিংগী খুদোংচাবা খ্বাইদগী ফংদবা মীওই কাঙলুপসু খুঙ্গং অমসুং ত্রাইবেল মীওইশিংনি। মমাংগী চহি ৮দা, সবকা সাথ, সবকা বিকাসকী মন্ত্রা ইন্দুনা ঐখোয়গী সরকারনা লাইরবশিংগী য়াইফ য়ুম্বাল অমসুং মখোয়দা তঙাই ফদবা খুদোংচাবশিং ফংহন্নবা খ্বাইদগী অহেনবা মিৎয়েং চঙখি।
মরূপশিং,
ঐখোয়গী সরকারনা ১০০%গী চাংদা লাইরবশিংগী মপাঙ্গল হাপ্নবগীদমক্তা খোঙথাং পায়খৎপা হৌখ্রবনি। লাইরবা, ত্রাইবেল অমত্তনা স্কিম অমত্তগী খুদোংচাবা নাথোক্তনবা, মখোয়গীদমক্তা শেম শাখিবা স্কিমশিংগী কান্নবা মখোয়দা শোইদনা ফংহন্নবা ঐখোয়গী সরকারনা খোঙজেল লৈনা থবক পায়খৎলি।
মরূপশিং,
ঐহাক্না মফমশিংদা য়ৌরকপদা খরা থেংখ্রে। মরমদি, ঐহাক্না লমদমসিগী ত্রাইবেল মীওইশিংগা ৱারী শান্নবা অমসুং মখোয়গী হরাও নুংঙাইগী ৱারী তাবদা মতম খরা চঙখিবননি। সরকারগী স্কিমশিংগী বেনিফিশরীশিংনা করি কান্নবা ফংলে হায়বা খঙনবা ঐহাক্না হোৎনরম্বনি। মীয়ামগা অসুম্না পাউ ফাওনবা মতমদা, চাউখৎ-থৌরাংগী খুদোংচাবা কয়া হেনগৎলি। গুজরাতকী দবল ইঞ্জিন সরকারনা মীয়াম্বু চাম্মদা চাম্মগী চাংদা মপাঙ্গল হাপ্নবা কন্না হোৎনরি। মসিগীদমক্তা ঐহাক্না ভুপেন্দ্র ভাই অমসুং সি.আর. পাতিলজীবু থাগৎচরি।
ঐহাক্না মফমসিদা মতম কুইরবগী তুংদা লাক্লিবনি, অদুনা থাইনগী মতম কয়া অমা নীংশিংবা হায়বা মহৌশানি। ঐহাক্কা অদোমগগী মরী অসি চহি কয়াগী ওইরমগনি? মতমদুদদি, চত্থোক চৎশিন তৌবগী পাম্বৈসু চাউখৎপা নত্তে। মফমসিদা লাকপদা বস তোংদুনা, পোৎলুম কয়া পুদুনা লাক্লম্বনি। মফমসিগী ইমুং কয়া অমগী মরক্তা ঐহাক্না চহি কয়া লৈরম্মি। চাক লাম্বগী তাঞ্জা অমত্তা অদোম্না ফংহনখিদে। অসিগুম্বা মীনুংশি অমসুং থৌজালনা ঐহাক্কী পাঙ্গল ওইরিবনি। ত্রাইবেল ইচিল ইনাওশিংগী মরক্তা থবক তৌবগী খুদোংচাবা ঐহাক্না ফংজখিবনি। মসিদগী হেন্দোক্তুনা ঐহাক্না মখোয়গী মফমদগী তমজনীংঙাই ওইবা কয়া অমসু তমজখি। অফবা মতৌ, লু-নানবা অমসুং লিচৎ-শাজৎ, ঐখোয়না দাংদা নত্ত্রগা ত্রাইবেলশিংগী অতোপ্পা মফমদা চৎলুবা খুদিংদা, অয়ুক ওইরো, নুংথিল ওইরো, মীপুম খুদিংনা লাইন্দা লোইনা চৎলি। অমনা অমগী তুংদা লোইনা চৎনৈ। মখোয়না ৱাখল য়াম্না তানা পুন্সি হিংই। ঙসিদি, ত্রাইবেল খুন্নাই অসি খুন্নাইগীদমক্তা হিংমিন্নবা, থৌগল ফজবা, অকোয়বগী ফিভম ইকায় খুম্ননা চৎপা খুন্নাই অমা ওইরে।
মতম অমদা গুজরাত্তা ঈশিং য়াম্না ৱারম্মি, খুঙ্গং অমত্তদা ঈশিং তেঙ্কী লৈরমদে, হেন্দ পম্প খিল্লবসু, মদুগী ঈশিংনা থা ১২গী মনুংদা অদুম কংই। অদুবু, মফমসিদা মুখ্য মন্ত্রী অমা লাকখি। লমদমসিগী য়াইফ য়ুম্বালগী থৌদাং লৌখি। মহাক্না গুজরাতকী জাম্নগরদা ঈশিং তেঙ্কী শাখি, মদুগী শঙ্গাবসু মহাক্না পাংথোকখি। মসিগী মতাংদা পাউচেগী হেদলাইন্দা পাউ য়াম্না ফোঙখি। অসিগুম্বা মতম কয়া অমা গুজরাতনা উখ্রে। মতমদুগা হৌজিক্কী মতমগা খেন্নরে। লুপা করোর লিশিং ৩গী প্রোজেক্ত লাকপা হায়বসি মতমদুদা খল্লুবা নত্তে। ঐহাক্না ঙসি ত্রাইবেলগী চাউখৎ-থৌরাংগীদমক্তা লুপা করোর ৩গী প্রোজেক্ত শঙ্গাবা অসিদা য়াম্না চাউথোচবা ফাওরি। অদুগা চৎনবী অমা ওইনা, মফমসিদা থবক অমা হেক্তা হৌবা মতমদা মীওই খরবা ৱা ঙাঙবা হেক্তা হৌই। মীখল লাক্লে, অদুনা থবক তৌরিবনি হায়নৈ। ঐহাক্না সরকারগী মনুংদা লৈরকপা চাউরাক্না চহি ২২-২৩ শুরে। চাউখৎ-থৌরাংগী থবক পায়খত্তবা চয়োল অমত্তা লৈখিদ্রি। করিগুম্বা লৈরবদি পুথোকপীরকউ, মসি ঐহাক্কী চেলেঞ্জনি। অদুবু, অরানবা থিবা মীওই য়াম্না লৈ, মীখল লাকপগী থবক তৌরিবনি হায়রিবসি মখোয় ঙাক্তনি। ঐহাক্না হায়রিবসি হায়দবা য়াদবদগী হায়রিবনি। ঐখোয়না ইং ২০১৮দা মফমসিদা লাক্তুনা ৱাতর সপ্লাইগী অচৌবা থৌরাং পুরকপদা ইং ২০১৯দা মীখল লৈবনা তৌরিবনি হায়না কনানা হায়নখি। ঙসিদি, মখোয়গী ৱারোলশিংনা অরানবা ওইরকপদা ঐহাক্না চাউথোকচৈ। ঙসিদি, ঐখোয়না থক্নবা ঈশিং ফংহল্লে। অসিগুম্বা অফবা থবক্কী মখোয়না তসেংবা মগুন খঙদে। ঐখোয়না হোৎনরিবা অসিদি মীখলদা মায় পাক্নবা নত্তে। ঐখোয়দি লৈবাক্কী অফবা তৌনবগীদমক্তা লৈবনি। মীখলদি মীয়াম্না মায় পাকহনবনি। মীয়ামগী থৌজালদগী ঐখোয়না ঙসি মফমসিদা লৈরিবনি। এয়র এস্তোল প্রোজেক্ত অসিদি ইঞ্জিনিয়রিংগী মালেমদা য়াম্না শীংথানীংঙাই ওইবা থৌওং অমনি। মতাং অসিদা ঐহাক্না ইঞ্জিনিয়রিংগী কোলেজশিংগী মহৈরোইদা করিগুম্বা ৱাফম খরা থমজনীংই। দাঙ্কীদা ঐখোয়না নর্মদাগী ঈশিং চিংখৎলিবা, অদুগা মফম অসিদসু ঐখোয়না ঈশিং চিংখৎপগী থৌওং অসি ইঞ্জিনিয়রিং মহৈরোইশিংনা লাক্তুনা নীংথিনা য়েংহন্নীংই। প্রোফেসরশিংসু লাক্তুনা য়েংহন্নীংই। চিংগী অনেম-অৱাংগী লম্মিৎ তুম্মিৎ অসিদা অসিদা ঈশিং পুরক্লিবা, ঈশিংগী প্রেসর নীংথিনা হোৎলিবা, পাইপ তিংবগী মওং-মতৌ অসি য়াম্না চাউবা থৌওং অমনি। ঐহাক্না ধরমপুরগী তোঙানবা মফম কয়াদা লৈরম্মি। সাপুতারাদসু লৈরম্মি। নোং য়াম্না তাই, অদুবু ঈশিংদি অমত্তা লৈহৌদে, ঈশিং পুম্নমক লোইনা চেন্থখি। অসিগুম্বা ফিভম অসি ঐখোয়না মতম পুম্বদা থেংনদুনা লাকখি। মদুদগী ঐখোয়না অহানবা ওইনা ৱারেপ লৌখিবনি। অৱাংবা চিংদা লৈবা ওইরো, মফম অমা হেক্তদা লৈবা ওইরো, ঐখোয়গী ত্রাইবেল ইচিল ইনাও ওইরো, জংগলদা লৈবা ইচিল ইনাওশিং ওইরো, মখোয় খুদিংনা ঈশিং ফংবগী হক লৈ হায়না ঐখোয়না ৱারেপখি। মসিগীদমক্তা ঐখোয়না অচৌবা খোঙথাং পায়খৎখিবনি।
ঐখোয়না উরেপ উয়ুং তম্বা থবকশিংগী শঙ্গাবসু ঐখোয়না পাংথোক্কনি হায়না ঐখোয়না হায়দুনা লাকপনি। ঙসিগী শঙ্গাবগী লাইবক ফবসু ঐহাক্না ফংজবা অসিদা ঐহাক্না চাউথোকচৈ। ঐখোয়না মীয়ামগীদমক্তা হিংবা, মীয়ামগীদমক্তা অৱাবা খাঙবা হায়বসিদা ঐখোয়না খোঙফম চেৎলি। রাজনিতীগী অনেম অৱাংদা ঐখোয়না মতম মাংহন্দে। ঐখোয়না সরকারগী মনুংদা লৈববু মীয়ামগী সেবা তৌবা ফংবগী খুদোংচাবনি হায়না লৌই। ঐখোয়না মীয়ামগী অফবতা খল্লি। কোরোনাগী ইরাং মালেম শিনবা থুংবদা লাকখি। অদুবু ভেক্সিন অসুক য়াম্না কাপ্পা ঙম্বা লৈবাক অমখক্তনি, মদুদি হিন্দুস্তান্নি। দোজ করোর ২০০ কাপখিবনি। ঙসিদি, সান্দলপোর, খেরগাম, রুম্লা, মান্দবীদা ঈশিং ফংলে, মসিনা মীয়ামগী পাঙ্গলসু হেনগৎহল্লে। অদুগা ঙসি প্রোজেক্ত কয়া অমগী উরেপ উয়ুংসু তম্লে। মীওই লাখ ১১ হেনবগী খুদোংচাদবা কয়া কোক্লগনি, মসিগুম্বা থবক্নি ঐখোয়না পাংথোক্লিবা। ঐখোয়গী জেসিংপুরা ওইরো, নারনপুরা ওইরো, সোনগর ওইরো, ঐখোয়না ঈশিং য়ৌহনবগী স্কিম চলায়রিবা, ভুমী পুজন তৌরিবা অসিদি মফমসিগী মীওই লাখ ১৪গী পুন্সিদা ঈশিং মতিক চানা ফংহন্নবনি, ঈশিংগী মপু ওইহন্নবনি। মরুপশিং, জল জীবন মিসনগী মখাদা গুজরাত্তা পাংথোক্লিবা অসি অদোম খঙলমগনি, চহি ২০গী মীওই অমসুং চহি ২৫গী মীওইশিংন্দি খঙদবসু য়াই। মখোয়গী মথকশিংনদি খঙগনি। ঐখোয়গী ইপা-ইপুনা করম্বা মতম মাইয়োক্নখি। ঐখোয়গী অহল-লমনশিংনা থেংনখিবা খুদোংচাদবশিংবু ঐখোয়গী হৌরক্লিবা চারোন-শুরোনশিংনা থেংনহন্দনবা ঐখোয়না খোঙফম চেৎলি। মরম অদুনা, স্কিমশিং অসিনা অশেংবা ঈশিং, মীপুম খুদিংগী মগুন লৈবা এজুকেসন ফংবগুম্বা তঙাই ফদবা খুদোংচাবশিং শোইদনা ফংহল্লিবনি। লমদম অমদা সাইন্স স্কুল অমা ফাওবা লৈরমদবা মতমগা য়েংনরুবা মতমদা হৌজিক্কী মতমদদি অনৌবা মেদিকেল কোলেজ অমসুং য়ুনিভর্সিতী লৈরক্লি। ইনফ্রাস্ত্রকচর, এজুকেসন, ব্যুজিনেস, কন্নেক্তিবিতীগা মরী লৈনবা স্কিমশিংনা মরম ওইরগা মনুং হঞ্জিনবা মফমশিংগী পুন্সি মহিংদা অহোংবা কয়া লাক্লিবনি। মেদিকেল অমসুং ইঞ্জিনিয়রিং ফাওবা য়াওনা তেক্নিকেল কোর্স কয়াবু মমালোন্দা তম্বীবনা ও.বি.সি. অমসুং ত্রাইবেল অঙাংশিংগী খুদোংচাবা কয়া হাংদোক্কনি। ঙসিদি, ত্রাইবেল লমদমশিংদা য়ুনিভর্সিতী শারি। গোবিন্দগুরু, বির্সা মুন্দাগী মিংদা য়ুনিভর্সিতী কয়া শারি। মরূপশিং, চাউখৎসি হায়রবদি, মনুং হঞ্জিনবা জংগলসু য়ৌশিনবা তাবনি। মসিগী থবকসি ঐখোয়না পাংথোক্লিবনি। মীওই লাখ কয়াগী পুন্সিদা অহোংবা পুরক্নবা পায়খৎপা থবকশিংনি। শোরোক ওইরো, য়ুম্থোং খুদিংদা ওপ্তিকেল ফাইবর য়ৌহনবা ওইরো, নবসারী অমসুং দাং জিলানা মসিগী খুদোংচাবা খ্বাইদগী হেন্না ফংগনি। ঐহাক্না দাং অমসুং খা গুজরাতপু নেচরেল ফার্মিংদা মায় ওন্সিনবগীদমক্তা থাগৎচনীংই। ঙসিদি, নবসারীদা লুপা করোর ৫০০ হেনবগী হোস্পিতাল অমসুং মেদিকেল কোলেজতগী মীওই লাখ ১০ হেনবনা কান্নবা ফংগনি। ত্রাইবেল ইচিল ইনাওশিংগী অঙাংশিংনা দাক্তর ওইনবা নত্ত্রগা ইঞ্জিনিয়র ওইনবা ইংলিশ তম্বগী মথৌ তাদ্রে। মমালোলদা তমহন্দুনা ঐখোয়না মখোয়বু দাক্তর, ইঞ্জিনিয়র ওইহনগনি। মরুপশিং, ঐহাক্না গুজরাত্তা লৈরিঙৈদা বন বন্ধু কলয়ান য়োজনা হৌদোক্লম্বনি। হৌজিক, ঐখোয়গী ভুপেন্দ্র ভাইগী লুচিং মখাদা স্কিম অসিগী মরিশুবা তাঙ্কক্কী থবক পায়খৎলি। অদুগা লুপা করোর লিশিং ১৪না চাউখৎ-থৌরাংবু কদাই ফাওবা য়ৌহনবা ঙম্বগে হায়বসিগী খুদম মসিনা ওইরি। ঐহাক্না মফমসিদা বাদী প্রোজেক্ত হৌদোকখিবা ঙসিসু নীংশিংলি। ঐখোয়গী মমাংগী রাস্ত্রপতি শ্রী অবদুল কলামজীনা প্রোজেক্ত অসি য়েংবা লাকপনি। মশাগী মপোক নুমিৎকী থৌরম পাংথোক্তনা বাদীগী লমদমদা নুমিৎ চুপ্পা অমা লৈরম্বনি। বাদী প্রোজেক্ত অসি করিনো হায়বা খঙলবা তুংদা মহাক্না ঐহাক্কী নাক্তা লাক্লগা “মোদীজী, অদোম্না খুঙ্গংগী মীয়ামগী পুন্সিদা অহোংবা পুরকপগী তসেংবা থবক পাংথোক্লি” হায়না হায়খিবনি। বাদী প্রোজেক্তনা ঐখোয়গী ত্রাইবেলশিংগী একর তংখাইগী লম, অকুৎপা লম, অপীকপা লম ওইরবসু, করিমত্তা থানদবা লমশিংদা মখোয়না কন্না থবক শুরি। মসিদা মখোয়না কাজু থারি। মরুপশিং, চাউখৎপা অসি হীরম খুদিংগী ওইগদবনি, হীরম খুদিং থেংগদবনি, পুম্নমক্কী ওইগদবনি অমসুং লম খুদিংদা য়ৌগদবনি। ঐখোয়না মাইকৈ অসিদা থবক পায়খৎলি। অসিগুম্বা থবক কয়া অমা ঙসিদি গুজরাতকী লমদমদা পায়খৎলি। অদুগা অদোম মশিং য়াম্বনা লেংবীরক্তুনা থৌজাল পীবীবা অসিনা ঐহাক্কী ইফমদা অহেনবা থবক তৌবগী পাঙ্গল হাপ্পীরে। মসিগী পাঙ্গল অসিনা গুজরাতপু তুং লমচত্তা পুগদৌরিবনি, হিন্দুস্তানবু চাউখৎহনগদৌরিবনি। ঐহাক্না অদোমগী থৌজালগীদমক্তা পুম্নমকপু অমুক্কা হন্না থাগৎচরি। অসিগুম্বা কান্নবা থবক কয়া অকক্নবা মতমগী মনুংদা পায়খৎপগীদমক্তা ঐহাক্না রাজ্য সরকারবুসু অমুক্কা হন্না থাগৎচরি। ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে।
