মহারাস্ত্রগী রাজ্যপাল শ্রী ভগৎ সিংহ কোসিয়ারী জী, মহারাস্ত্রগী মুখ্য মন্ত্রী শ্রী উধব থাকরে জী, মহারাস্ত্রগী ওপোজিসনগী লুচিংবা শ্রী দেবেন্দ্র ফদনাবিস জী, মুমবাই সমাচারগী এম.দি. শ্রী ঐচ.এন. কামা জী, শ্রী মাহরবান কামা জী, মরূপ ইদিতর নিলেস দাবে জী, পাউচে অসিগা লোয়নরিবা মরুপশিং, ইচিল ইনাউ পুম্নমক!
অহানবমক্তদা নিলেসভাইনা ফোঙদোকখিবা ৱাফমদুদা য়ানিংদবা ফোঙদোক্তুনা হৌজগে, মহাক্না ঐবু ভারতকী লাইবক লেপকদৌরিবনি হায়বিখি, অদুবু ভারতকী মরাইবক লেপকদৌরিবদি মীয়াম্ননি, লৈবাক মীয়াম করোর ১৩০সিননি, ঐদি পাউখোল্লোইনি।
ঐনা ঙসি মফমসিদা লাক্লমদ্রবদি কয়াগী মতিক মাঙজরমগদবা হায়বা ঐগী ৱাখলদা লাকখি, মরমদি মফমসিদগী অসুম য়েংখিবদা অয়ামবনা ঐনা খঙবা মায়থোঙ ঙাক্তা উরি। মশিং য়াম্লবা মীয়ামসিগা উনবা ফংজবসিদগী হেন্না নুংঙাইবা অতৈ করি লৈরমগদগে। মফমসিদগী ময়ামবু ইখুৎ থাঙ্গত্তুনা ইকায়খুম্নবা উৎচরি।
মুমবাই সমাচারবু পাবিরিবা মীওই পুম্নমক, পাউমী অমসুং মুমবাই সমাচারদা থবক তৌরিবা মীওইশিং ঙসিগী চহি ২০০ মপুং ফারকপগী কুমওন থৌরমসিদা নুংঙাইবা ফোঙদোকচরি। হৌখিবা চহি চানিসিদা মীরোল কয়াগী পুন্সিগী হীরম কয়াগী খোঞ্জেল মুম্বাই সমাচারনা ওইদুনা লাক্লি। মুম্বাই সমাচারনা নীংতম ইহৌগী খোঞ্জেলসু ওইদুনা লাকখি অমদি নীংতম্লবা চহি ৭৫গী পরিংসু চহি কাঙলুপ খুদিংমক্কী অপাবশিংদা পীদুনা লাক্লি। লোলদি গুজরাতি ওইজরবসু পীরিবা ইথিলদি লৈবাক পুমবগীনি। মীরম মচাশিংগী ইথিল মখাদা ময়োল্লম অসিনা বোমমে ওনখিবা মতমদসু পাউচে অসিনা লমদমসিগী মীয়ামগা লৈনরিবা মরী থাদোকখিদে, মাগী মরা তাখিবা অদু থদৎখিদে। মতমদুদা মুম্বাইকার ময়ামগী পাউচে ওইখি অমদি ঙসিসু অদুমক ওইরি মুম্বাই সমাচার। মুম্বাই সমাচারগী অহানবা ইদিতর মহের ভাইগী ৱারেংশিং মতমদুদা মীয়াম্না য়াম্না পাম্নখি। পাউচে অসিদা ফোঙলিবা পাউশিং চিংননিংঙাই লৈত্রবা ঙাক্তনি। মহাত্মা গান্ধী অমসুং সরদার পতেলসু মুম্বাই সমাচারদা তত্তনা চৎলম্মি। ঙসি মফমসিদা ফোঙদোক্লিবা পোস্তেল স্তাম্প, লাইরিক মখুম, উৎলিবা দোকুমেন্তরীশিং অসিগী খুত্থাঙদা অদোমগী শিংথানিংঙাই ওইরবা খোঙচৎ অসিবু লৈবাকসিদা অমদি মালেমগী মফমদা শন্দোকখ্রগনি।
মরূপশিং,
ঙসিগী মতমসিদা পাউচে অমনা চহি ২০০ লেপ্তনা ফোঙলক্লি হায়বসি তাবদা য়াম্না ঙক্নিংঙাই ওইরমগনি। অদোমসু য়েংবিয়ু, পাউচে অসি হৌরকপা মতমদা তিভিদি লায়রদনা রেদিও ফাওবা পুথোরক্ত্রি। হৌখিবা চহি ২সিদা ঐখোয়না চহি ১০০গী মমাঙদা শন্দোরকখিবা স্পেনিস ফ্লুগী মতাঙদা খন্নবা কয়া থেংনখ্রে। অদুবু পাউচে অসিদি হায়রিবা মালেমগী লাইচৎ অদুদগীসু চহি ১০০গী মমাঙদা ফোঙবা হৌরক্লবনি। খোঙলৈ থুনা হোংলক্লিবা মতমসিদা অসিগুম্বা ৱাফম অমা মাঙদা থোরকপা মতমদা মুম্বাই সমাচারনা চহি ২০০ মপুং ফারকপগী কুমওন থৌরম অসি হেন্না মরু ওইরক্লি। অদুগা মুম্বাই সমাচারগী চহি ২০০ মপুং ফারকপগী কুমওন থৌরম অমদি ভারতনা নীংখা তম্লকপা চহি ৭৫ ফারকপগগী কুমওন থৌরম অনিমক চহি অসিদা তামিন্নরিবা অসিসু নুংঙাইবা তাঞ্জা অমনি। মরম অসিনা ঙসিগী থৌরম অসিদা ঐখোয়না ভারতকী জর্নেলিজমগী অৱাংবা থাক, লৈবাক নীংবগা মরী লৈনবা জর্নেলিজমবু নীংশিংবতা নত্তনা থৌরম অসিনা অজাদি কা অমৃত মহোৎসবপুসু মপুং ফাহল্লি। অদোম্না লোয়নদুনা চৎলিবা ফিরেপ অমসুং চৎনবী অসিনা লৈবাক মীয়ামদা কত্থোকপগা লোয়ননা পাউজেল মখা তানা পীখিগনি হায়না ঐনা থাজৈ।
মরূপশিং,
মুম্বাই সমাচার অসি ঈ-পাউগী মেদিয়ম অমা ওইবতা নত্তনা লৈবাকসিগী লন অমসু ওইরবনি। মুম্বাই সমাচার ভারতকী ৱাখল্লোনগী ফোঙদোক্লিবা শক্লোন অমনি। ভারতনা অকনবা শাফু কয়াগী মায়োক্তা কমদৌনা লেপ্তুনা লাকখিবগে হায়বা ঐখোয়না উখ্রে, মসিগী মমি অমসু মুম্বাই সমাচারদা ঐখোয়না উরি। মতমগী মতুং ইন্না হোংলকপা খুদিং ভারতসু হোংলক্লি, অদুবু মাগী নুংগী ওইবা প্রিন্সিপলদি হেন্না কনশিল্লক্লি। চয়োল অমদা অমুরক, চয়োল অমদা অনিরক, অদুদগী নুংতিগী অদুগা হৌজিক্না দিজিতেল ওইনা পাউচে অসিনা মতমগী হোংলক্লিবা শিংনবা পুম্নমক থেংনদুনা লাক্লি। মরাদা চেৎনা কোনশিন্দুনা, নুংগী ওইবা মমল মাঙহন্দনা অহোংববু থাগোন্নরকপগী চপ চারবা খুদম মুম্বাই সমাচারনা ওইরি।
মরূপশিং,
মুম্বাই সমাচার হৌরকপা মতমদা মীখা পোনবগী অমম্বা নোংলৈনা লুমশিন্দুনা লৈখিবা মতম্নি। অসিগুম্বা মতমসিদা গুজরাতকুম্বা ভারতকী লোল অমদা ফোঙলিবা পাউচে অমনা হিংদুনা লৈবা হায়বসি অরায়বা নত্তে। মুম্বাই সমাচারনা মতমদুদা অতোপ্পা লোলদা ফোঙবা পাউচে হৌদোক্লমবনি অমদি মায়সু পাকখি। লোকমান্য তিলক জীনা কেসরী অমসুং মারাথাগী চয়োলগী ওইনা ফোঙবা পাউচেশিংদা নীংতম ঈহৌগী মথৌ হাপ্লম্মি। সুব্রমনিয়ম ভারতীগী শৈরেংশিংনা মীরম লৈঙাক্কী মায়োক্তা লান্দারকখি।
মরূপশিং,
গুজরাতকী পাউমীশিংসু নীংতম লানদা চাউনা ইথিল পীখি। ফর্দুনজীনা গুজরাতকী ঈ-পাউগী লমদা মপাঙ্গল কল্লবা পন্দুপ অমা লাকখি। গান্ধীজীনা মহাক্কী অহানবা পাউচে ইন্দিয়ন ওপিনিয়ন খা অফ্রিকাদগী ফোঙবা হৌখি, মদুবু ফোঙলিবনা জুনাগরদগী মমীং লৈরবা মনসুখ লাল নজরনা ওইখি। মসিগী মতুংদা ইকায়খুম্নরবা বাপুনা অহানবা ওইনা গুজরাতকী পাউচে নবজীবনগী ইদিতরগী থৌদাং ইন্দুলাল য়াগিক্না শীন্নরম্লবা মতুংদা লৌখি। মতম অমদা এ.দি. গোরৱালাগী ৱাখল্লোনশিং দিল্লীগী ফম পায়রিবশিংগী মরক্তা য়াম্না পাম্নবা ওইরম্মি। ইমর্জেন্সীগী মতমদা সেন্সরসিপকী অথিংবা লাকপা মতমদা সাক্লোস্তাইলনা নম্লম্মি। নীংতম লান্দা ওইরবসু নৎত্রগা মীয়ামগী লৈঙাক মপুং ফানা লৈহনবদবু ওইরবসু, ঈ-পাউগী পাম্বৈনা মরুওইবা থৌদাং য়াদুনা লাক্লি। মসিদসু গুজরাতকী ঈ-পাউচেশিংগী থৌদাং য়াম্না চাউনা য়াওরি
মরূপশিং,
নীংতমবগী অমৃৎকাল অসিদা ভারতকী লোলশিংগী মরুওইবা থৌদাং লৈগনি। ঐখোয়না শীজিন্নরিবা, ঐখোয়না ৱাখল খল্লিবা লোল অসিগী খুত্থাঙদা ঐখোয়না লৈবাকসিগী ক্রিএতিবিতীবু হেন্না মশক থোকহনবা পাম্মি। হায়রিবা ৱাখল্লোনসিগা লোয়ননা অনৌবা লৈবাক্কী মহৈ মশিং তমবগী খুজিল থৌরাংদা মেদিকেল, সাইন্স অমসুং তেক্নোলোজীগী লমদা ওইরবসু মহৈ মশিং তমবা মতমদা লম লমদুগী লোলদা তমহন্নবা পুক্নিং থৌগৎলি। হায়রিবা ৱাখল্লোন অসিগা লোয়ননা মালেমগী খ্বাইদগী ফবা মচাকশিংবু ভারতকী লোলশিংদা পুথোক্নবা হোৎনবদা পুক্নিং থৌগৎলি।
মরূপশিং,
লোল কয়াগী পাউ-চেশিংনা, ভারতকী লোলশিংগী সাহিত্যনা নীংতম ঈহৌদা মরুওইবা থৌদাং লৌখি। মীচম মীয়ামদা মখোয়গী ৱাফমশিং য়ৌহন্নবগীদমক ইকায়খুম্নরবা বাপুনসু পাউ-চেবু মরুওইবা থৌওং অমা ওইনা শীজিন্নখি। অদুগা নেতাজী সুভাসচন্দ্রনা রেদিওগী পাম্বৈবু শীজিন্নখি।
মরূপশিং,
ঙসি অতোপ্পা ৱাফম অমগী মতাঙদা করিগুম্বা খরসু হায়নিংই। পাউচে অসিবু ফর্দুনজী মুজর্বান্না হৌদোকপিরমবনি হায়বা অদোমসু খঙই অদুগা মসিদা খুদোংচাদবা মায়োক্নরকপা মতমদা কামা শাগৈনা থৌদাং য়ারকখিবনি। হায়রিবা শাগৈসিনা মপাঙ্গল কনখৎহন্দুনা পাউচে অসিবু অনৌবা পন্দোল অমদা থাঙ্গৎলকখি।
মরূপশিং,
ভারতকী চহি লিশিং কয়াগী পুৱারীনা ঐখোয়দা ৱাফম কয়া অমা তম্বিরি। মফমসিদা লাকখিবা খুদিংমক, অপীকপা ওইরবসু অচৌবা ওইরবসু, মপাঙ্গল শোনবা ওইরবসু নৎত্রগা অকনবা ওইরবসু পুম্নমকপু ইমা ভারতীনা মহাক্কী মতমবাক্তা চাউখৎচনবগী খুদোংচাবা মপুং ফানা পীবিরি অদুগা মসিগী খুদম অমা হায়রগদি পার্সি কাঙলুপতগী হেনবা করিবু লৈরিবগে। ভারত্তা লাকখিবা খুদিংমক্না ঙসি লৈবাক অসিবু হীরম খুদিংমক্তা মপাঙ্গল কনখৎহন্নবা হোৎনরি। নীংতম ঈহৌদগী হৌরগা ভারতপু নৌনা শেমগৎপা ফাওবদা পার্সি ইচিল ইনাওশিংনা অচৌবা থৌদাং লৌদুনা লাকখি। মশিংদা হায়রুরগদি ভারতকী খ্বাইদগী পীকপা কাঙলুপশিংগী মরক্তা অমনি, মওং অমদা অপীকপা ফুরুপ অমনি, অদুবু মখোয়গী থৌদাং অমসুং থৌগলদা য়েংলুরগদি য়াম্না চাউই। ভারতকী ইন্দস্ত্রীশিং, লৈঙাক্লোন, খুন্নাই থৌগল, ৱায়েল পথাপ, শান্ন-খোৎনবা অমদি ঈ-পাউ, লান্মীদা ওইরবসু হীরম খুদিংদা পার্সি ফুরুপকী খোঙ্গুল তারি। মরূপশিং, ভারতকী হায়রিবা চৎনবী, মমল অসিনা ঐখোয়বু মপাঙ্গল কনহল্লিবনি।
মরূপশিং,
মীয়ামগী লৈঙাক্তা মীয়ামগী মীহুৎ ওইরবসু, রাজনিতী লুপ ওইরবসু, পার্লিয়ামেন্ত ওইরবসু নৎত্রগা ৱায়েল চুপ্লি পায়রিবা কাঙবু ওইরবসু, কাঙলুপ খুদিংমক্কী মশা মশাগী থৌদাং লৈরি। হায়রিবা থৌদাংশিং অসি য়াম্না মরুওই। গুজরাত্তা পাউরৌ অমা লৈ – জেনু কাম তেনু থায়; বিজা করে তো গোতা খায়। হায়বদি মশা মশাগী থবকশিং তৌনগদবনি হায়বনি। লৈঙাক্লোন ওইরবসু, মিদিয়া ওইরবসু নৎত্রগা অতোপ্পা হীরমদা লৈরিবা মীওই পুম্নমক্তা হায়রিবা পাউরৌ অসি মরুওই। পাউচেশিংগী, মীদিয়াগী থৌদাংদি মীয়ামদা ঈ-পাউ য়ৌহনবনি, মীয়ামদা ৱাখল তাহনবনি, খুন্নাইগী অমদি লৈঙাক্কী অশোয়বা অৱাৎপশিং মীয়াম মাঙদা পুথোকপনি। মীদিয়ানা ক্রিতিসিজমগী হক লৈবগুম্না অফবা ফজবা পাউশিংসু মীয়ামদা পুথোকপগী থৌদাং লৈ। হৌখিবা চহিশিংদা মীদিয়ানা লৈবাক্কী য়াইফনবগা মরী লৈনবা, খুন্নাইগী য়াইফবগা মরী লৈনবা থৌরাংশিং মীয়ামদা পাক শন্না খঙহন্দুনা লাক্লি। স্বচ্চ ভারত অভিয়ান্না লৈবাকসিগী খুঙ্গশিংদা অমদি লায়রবশিংগী পুন্সিগী ফীভম ফগৎহল্লবসিদা মীদিয়াগী মীওইশিংগী থৌদাংসু চাউনা য়াওরিবনি। ঙসি ভারতনা দিজিতেল পেমেন্তকী লমদা মালেমদা মাঙজিল থাদুনা চৎলিবসিদা মীয়ামদা পাক শন্নবা খঙহন্নবা হোৎনবদা মীদিয়ানা চাউনা মতেং পাংখি। দিজিতেল লোনগী লমদা মালেমগী অপুনবা লল্লোন ইতিক্কী ৪০% ভারত্তা লৈ হায়বা ৱাফমসিদা অদোম শোয়দনা হরাওগনি। হৌখিবা চহি ২সিদা কোরোনাগী মতমদা ঐখোয়গী পাউমী ইচিল ইনাওশিংনা লৈবাক্কী য়াইফনবগীদমক লৌখিবা থৌদাং ঐখোয়না মতম পুম্নমক্তা নীংশিংদুনা লৈহৌরগনি। ভারতকী মীদিয়াগী মরুওইবা থৌদাংনা ভারতপু চহি চাম্মসিদা থোকখিবা খ্বাইদগী চাউবা লাংফম অসিবু থেংনবদা চাউনা মতেং পাংখি। নীংতমবগী অমৃৎকালদা লৈবাকসিগী মীদিয়ানা মখোয়গী মরুওইবা থৌদাংবু হেন্না খুমাঙ চাওশিলহল্লক্কনি হায়না ঐনা থাজৈ। লৈবাক অসি য়েৎনবা অমদি খন্নবগী পাম্বৈনা মাঙদা চঙশিনবগী চৎনবী লৈবা লৈবাক অমনি। চহি লিশিং কয়া ঐখোয়না অফবা মওংদা য়েৎনবা, অফবা মওংদা নৈনবা, মওং চুম্না য়েৎনবনা খুন্নাইগী শরুক অমা ওইদুনা লাকখি। ঐখোয়না অরুবা খুন্নাইগী ৱাফমশিংদা অরোৎপা লৈতনা খন্ন-নৈনদুনা লাক্লি। মসি ভারতকী চৎনবী ওইদুনা লাকখি অমদি মসিবু মপাঙ্গল কনখৎহনবা তাই।
মরূপশিং,
ঙসি ঐনা মুম্বাই সমাচারগী মেনেজরশিং, পাউমীশিংগী মফমদা অখন্ননা হায়জনিংবদি অদোমগী মফমদা লৈরিবা চহি ২০০গী অর্কাইব অদুদা ভারতকী পুৱারীগী মশিং য়াম্লবা পন্দুপ কয়াগী ৱাফমশিং য়াওরি, মখোয়শিং অদুবু লৈবাক মীয়ামগী মাঙদা পুথোকপা য়াম্না মরুওই। ঐনা হায়জনিংবদি, মুম্বাই সমাচারনা মখোয়গী ঈ-পাউগী ললশিং অদুবু তোঙান তোঙানবা লোলশিংদা লাইরিক ওইনা লৈবাক মীয়ামদা পুথোকপিরক্নবা হোৎনবিয়ু। অদোম্না মহাত্মা গান্ধীগী মরমদা ইখিবা পাউ, স্বামি বিবেকানন্দ জীগী মরমদা ইখিবা পাউ, ভারতকী শেন্মিৎলোনগী অকা-অকুমগী মরমদা ইখিবা পাউশিং অদু হৌজিক্তি অচমবা পাউ অমমম ওইদ্রবনি। মখোয়শিং অসি ভারতকী মরাইবক লেপখিবা পন্দুপশিং অদুনি। মরম অসিনা তুংগী মীরোলশিংবু পুক্নিং থৌগৎকদবা অচৌবা পাম্বৈ, অচৌবা লন অমা কামা সাহব অদোমগী নাক্তা লৈরি অমদি লৈবাকসিনা ঙাইদুনা লৈরি। তুংগী পাউচেগী অচৌবা পারা অমসু অদোমগী পাউচেগী পুৱারীদা য়াওদুনা লৈরিবনি। হায়রিবা অসিদা অদোম্না শোয়দনা হোৎনবিয়ু। অদুগা ঙসাই ঐনা হায়খিবগুম চহি ২০০সিদা অকা-অকুম থেংনদুনা লাক্লমগনি অমদি চহি ২০০ মওং চুম্না লাকখিবা অসিমকসু অচৌবা পাঙ্গল অমনি। ঙসিগী মরুওইরবা তাঞ্জা অসিদা ময়াম্না ঐগী ইফমদা পাউকৎ পীবিরক্তুনা ময়ামগী মরক্তা তিঞ্জনবগী তাঞ্জা ফংলিবা, অসুক চাউখ্রবা ফুরুপ অসিগা উনজবা ফংলিবা অসি লাইবক ফবনি। অদুগা মমাঙদা মফমসিদা মুম্বাইদা সাহিত্যগী থৌরম অমদা শরুক য়াবা লাকখি, ঐখোয়গী সুরজ ভাই দলালনা কৌবিরকপা ওইরমগনি। নুমিৎ অদুদা ঐনা হায়খি মদুদি মুম্বাই অমসুং মহারাস্ত্রনা গুজরাতি লোলগী পোক্নফম্নি। অমুক্কা হন্না ময়াম পুম্নমক্কী মফমদা মুম্বাই সমাচারগী চহি ২০০ মপুং ফারকপসিদা য়াইফ-পাউজেল পীজরি। কামা শাগৈনা লৈবাক্কী থৌগল য়াম্না চাউনা তৌরি, ইমুং মনুং পুম্নমক থাগৎপদা মতিক চারবা ঙাক্তনি। অদুগা মুম্বাই সমাচারবু পাবিরিবা পুম্নমকপুসু থম্মোয়নুংদগী থাগৎচবা ফোঙদোকচরি। কামা সাহবনা হায়বিখিবা অদু শুপ্নতগী ৱাহৈখক্তা নত্তে, চহি ২০০ চুপ্না, মীরোল কয়া থংথরক্তুনা ইমুং অমদা পাউচে অমা পুথোক্তুনা লাক্লিবসি তশেংনমক পাউচে অসিগী অচৌবা পাঙ্গল অমনি। অদুগা হায়রিবা পাঙ্গল অসিবু হাপ্লিবা ময়াম পুম্নমক্কী মফমদা, গুজরাতিশিংগী মফমদা নুংঙাইবা ফোঙদোকচরি। ঐ মমিংদি পল্লরোই, মপান লৈবাক অমগী ৱাফম্নি, হায়রিবা লৈবাক্তুগী ময়োল্লম অমদা খ্বাইদগী মশিং য়াম্না সর্কুলেসন তৌরিবা পাউচে অসি গুজরাতিনি। মসিনা তাকপদি গুজরাতি মচাশিং অসি করমবা পোৎলমদা করি খুদোংচাবা করমবা পাঙ্গল লৈবগে হায়বদু লায়না খঙবা ঙম্মি হায়বসিনি। ফরে হরাও মিনোক্না থল্লবা য়াচংবগী তাঞ্জাসিগা লোয়ননা হন্না হন্না থাগৎচবা ফোঙদোকচরি।
