“ঐখোয়না ঐখোয়গী হেল্থকেয়র সিস্তেমদা পুম্নমক শুপচিল্লবা পরিং অমদা চঙশিল্লি। ঙসিদি ঐখোয়গী মীৎয়েঙসি হকশেলখক্তদা নত্তনা নুংঙাই য়াইফনা লৈবদসু থম্লি”
“হেল্থ এন্দ ৱেলনেস সেন্তর লাখ ১.৫গী থবক খোঙলৈ থুনা চঙশিল্লি। হৌজিক ফাওবদা সেন্তর ৮৫০০০ হেনবনা চাং নাইনা চত্থবা চেকঅপ, তিকা থাবা অমদি তেস্ত তৌবগী খুদোংচাবা পীরি”
“কোৱিনগুম্বা ফম্বাকশিংনা দিজিতেল হেল্থ সোলুসনগী মতাঙদা মালেমগী মফমদা ভারতকী মফম কল্লি”
“অয়ুস্মান ভারত দিজিতেল হেল্থ মিসন্না কঞ্জ্যুমর অমসুং হেল্থকেয়র প্রোভাইদরশিংগী মরক্তা অরায়বা ইন্তরফেস অমা পীরি। মসিগা লোয়ননা, লৈবাকসিদা লায়েং ফংবা অমদি পীবগী থবক য়াম্না লায়থোকহল্লগনি”
“রিমোত হেল্থকেয়র অমসুং তেলিমেদিসিন্না ভারতকী ময়োল্লম অমসুং খুঙ্গঙগী মরক্তা হকশেলগী খুদোংচাবা ফংবগী চাং খেন্নরমবদু হন্থহল্লগনি”
“ঐখোয়গীদমক্তা লোয়ন-লোয়ননা মালেমগীদমক্তা হেন্না ফবা অয়ুসকী পাম্বৈ কমদৌনা শেমগৎকদগে হায়বসি ঐখোয় পুম্নমক্কী মফমদা লৈরে”

খুরুমজরি!

মন্ত্রী মন্দলগী ঐগী খোঙলোয়শিং, লৈবাক পুম্বগী মীয়াম অমদি লনাই সেক্তরগী হেল্থকেয়রকা মরী লৈনবা প্রোফেসনেল পুম্নমক, পেরামেদিকেল, নর্সিং, হেল্থ মেনেজমেন্ত, তেক্নোলোজী অমসুং রিছর্চকী লমদা লৈবিরিবা মীওইশিং, ইচল ইচে, ইচিল ইনাও পুম্নমক‍।

অহানবমক্তদা অদোম পুম্নমকপু মালেমগী খ্বাসদগী চাউবা তিকা থাবগী থবক মায় পাক্না পাঙথোকপগীদমক লৈবাকসিগী মীওই করোর ১৩০গী মায়কৈদগী নুংঙাইবা ফোঙদোকচরি‍। ভারতকী হেল্থকেয়র সিস্তেম কয়া য়াম্না মতিং লৈবগে, কমদৌনা মিসনদা মায় ওনশিনবগে হায়বসি অদোম্না মালেম পুম্বগী মাঙদা উৎলে‍।

মরূপশিং,

বজেৎ অসিনা হৌখিবা চহি ৭সিদা হেল্থকেয়র সিস্তেমদা অওনবা অমদি অহোংবা পুরকপগী লম্বী হেন্না খুমাঙ চাওশিনহল্লি অমদি বজেৎকী লমদা খঙ-হৈরবা মীওইশিংনা ইহান হানবা নুমিত্তগী হৌরগা ঐখোয়গী বজেৎ অমদি থৌওংশিং অসি মখা শমথরকপগী মমিং শোয়দনা উবিরমগনি‍। ঐখোয়না হেল্থকেয়র সিস্তেমদা পুম্নমক শুপচিল্লবা পরিং অমদা চৎলি‍। ঙসি ঐখোয়গী মীৎয়েঙ হকশেলদসু থম্লি অদুগা নুংঙাই-য়াইফনা লৈবা হায়বসিদসু চপ চানা মায় ওনশিল্লি‍। ঐখোয়না লায়না পোকহল্লক্নবগী মচাকশিং লৈহন্দনবা, নুংঙাই-য়াইফনা লৈনবগীদমক্তা খুন্নাইবু পুক্নিং থৌগৎপা অমদি লায়েংবা মতমদা পুম্নমক কোনশিন্নবা মীৎয়েঙ চঙলি‍। মরম অসিনা স্বচ্ছ ভারত অভিয়ান ওইরবসু, ফিত ইন্দিয়া মিসন, পোসন মিসন, মিসন ইন্দ্রধনুস, অয়ুস্মান ভারত নৎত্রগা জল জীবন মিসন ওইরবসু অসিগুম্বা থৌরাং পুম্নমক ঐখোয়না মীয়ামদা হেক য়ারিবমখৈ য়ৌহনগদবনি‍।

মরূপশিং,

ঐখোয়না হকশেলগী সেক্তরদা পুম্নমক কোনশিনবা, পুম্নমক শুপচিনবগী ৱাফম পুথোরকপা মতমদা, মরুওইবা মচাক অহুমগী ৱাফম থম্লি‍। অহানবদা, মতমগী মেদিকেল সাইন্সকা মরী লৈনবা মচাক মথুম অমসুং হ্যুমেন রিসোর্সশিংনি‍। অনিসুবদা, অয়ুসনচিংবা ভারতকী মহৌশাগী লায়েং পথাপশিংগী মরমদা থিজিন হুমজিনবগী থৌওং য়োকখৎপা মখোয়বু হেল্থকেয়র সিস্তেমদা ইচঙ থৌনা শীজিন্নবনি‍। অহুমসুবদা, মতমগা চুনবা অমদি তুংলমচৎকী ওইবা তেক্নোলোজীশিং শীজিন্নদুনা লৈবাকসিগী মীপুম খুদিংদা, মফম খুদিংদা অহোঙবা মমলদা হকশেলগী খুদোংচাবা পীবনি‍। মসিগীদমক্তা ঐখোয়না হকশেলগী সেক্তরগী বজেৎতা কা হেন্না মীৎয়েঙ চঙলি‍।

মরূপশিং,

ঐখোয়না অচৌবা ময়োল্লমখক্তদা তাশিন্দুনা লৈতবা হকশেলগী মচাক মথুমশিং ভারত্তা শেমগৎপা পাম্মি, অমদি হীরম অসিদা লেপ্পা লৈতনা, মরুওইনা কোরানাগী মতুংদা মালেমগী মীয়াম মাঙদা ৱাফম কয়া হৌদোক্লিবা, অদোম্না উবিরমগনি অদুগা ঐনা ৱন আর্থ ৱন হেল্থ হায়বা ৱাখল পরিংসিদা হিন্দুস্তান্দসু ৱন ইন্দিয়া ৱন হেল্থ হায়বা মিসনগী মখাদা অরাপ্পা মফমশিংদসু মান্নবা থাক্কী হকশেলগী খুদোংচাবশিং ফংহনগদবনি হায়বসিদা থবক চঙশিল্লি‍। মরুওইবা হকশেলগী খুদোংচাবশিং ব্লোক্কী থাক্তা, দিস্ত্রিক্তকী থাক্তা লৈহন্নবা, খুঙ্গঙ নক্না লৈহন্নবা ঐখোয়না হোৎনরি‍। হায়রিবা মচাক মথুমশিং অসি শেন্নদুনা থমবা অমদি মতম মতমগী মতুং ইন্না অনৌবা শিন্দোকপসু মরুওই‍। মসিগীদমক্তা লনাই সেক্তরশিং অমসুং অতৈ সেক্তরশিংসু ইচঙ থৌনা মাঙদা থোরকপা মথৌ তাগনি‍।

মরূপশিং,

অফবা খুজিল থৌরাংগা লোয়ননা মখোয়দুবু মওং চুম্না থবক ওইনা পায়খৎপসু য়াম্না মরুওই‍। মসিগীদমক্তা গ্রাউন্দদা থবক ওইনা পায়খৎলিবা মীওইশিংদুদা হেন্না মীৎয়েঙ চঙবা মথৌ তাগনি‍। মসিগীদমক্তা ঐখোয়না বজেৎ অসিদা অঙ্গনৱাদি লাখ ২বু সক্সম অঙ্গনৱাদিগী থাক্তা পুখত্তুনা মখোয়বু হেন্না মপাঙ্গল কনখৎহন্নবা থৌরাং য়াৎলি‍। হায়রিবা ৱাফমসি পোসন ২.০দসু চৎনগনি‍।

মরূপশিং,

প্রাইমারী হেল্থকেয়র নেতৱর্ক মপাঙ্গল কনখৎহন্নবা, হেল্থ এন্দ ৱেলনেস সেন্তর লাখ ১.৫গী থবক খোঙলৈ থুনা চঙশিল্লি‍ হায়না প্রধান মন্ত্রীনা পাউদমখি‍। হৌজিক ফাওবদা সেন্তর ৮৫০০০ হেনবনা চাং নাইনা চত্থবা চেকঅপ, তিকা থাবা অমদি তেস্ত তৌবগী খুদোংচাবা পীরি‍‍। বজেৎ অসিদা হায়রিবা সেন্তরশিং অসিদা মেন্তেল হেল্থকেয়রগী খুদোংচাবসু হাপচিলনলে‍। মসিবু মীয়ামদা হেক য়ারিবমখৈ য়ৌহন্নবা অমদি ৱাখল তাহন্নবগীদমক্তা ঐখোয় পুম্নমক অমত্তা ওইনা পুন্দুনা, অদোমসু য়াওনা হেন্না কন্না হোৎনমিন্নবা মথৌ তাই‍।

মরূপশিং,

হেন্না ফবা হকশেলগী মচাক মথুশিং অসিনা খুদোংচাবা হেনগৎহনবতা নত্তনা হকশেলগী সর্ভিসকী দিমান্দসু হেনগৎহল্লি‍। অদুগা মসিনা থবক পীবা হেনগৎহন্নবগী অচৌবা পাম্বৈ অমসু ওইরি‍। হৌখিবা চহিশিংদা হকশেলগী সর্ভিসশিংগী দিমান্দ অসুম অসুম হেনগৎলকপগী মতুং ইন্না ঐখোয়নসু হৈশিংলবা হকশেলগী প্রোফেসনেলশিং শেমগৎনবা থৌরাং পায়খৎলি‍। মরম অসিনা মমাঙ চহিগা চাঙদম্নবদা হকশেলগী মহৈ মশিং অমদি হেল্থকেয়রগা মরী লৈনবা হ্যুমেন রিসোর্স শেমগৎপগী মতাঙদা বজেৎ অসিদা মশক থোক্না হেনগৎহল্লে‍। মেদিকেল এজেকেসনগা মরী লৈনবা অওনবা অমদি মেদিকেল কলেজশিং লিংখৎপগা মরী লৈননা ঐখোয়না পায়খৎলিবা থৌরাংশিং অদোম পুম্নমক্না থোইদোক হেন্দোক্না খঙবিরিবদুনি‍। হায়রিবা অওনবশিং অসি তেক্নোলোজীগী মতেং লৌদুনা কমদৌনা মাঙদা পুখৎলক্কদগে, মেদিকেল এজুকেসনগী মতিং কমদৌনা হেনগৎহনগদগে অমদি মসিবু হেন্না মপুং ফাবা অমদি পু-থাংবা ঙমবা কমদৌনা ওইহনগদগে হায়বসিদা অকনবা খোঙথাঙ খরা অকক্নবা মতম অমা থমদুনা মাঙদা চঙশিনবা মথৌ তাই‍।

মরূপশিং,

হে্থকেয়রগা মরী লৈনবা ঐখোয়গী পান্দম, বাইওতেক্নোলোজীগা মরী লৈনবা থিজিন হুমজিনবগী থবক, হিদাক অমসুং মেদিকেলগী খুৎশু খুৎলায়শিংগী লমদা ইশানা ইরোমদোম লেপচবা ঙমদনা ফংবা ঙম্লোই‍। কোরোনাগী মতমদা ৱাফমসি ঐখোয়না থেংনখ্রবনি‍। জেনেরিক, বল্ক দ্রগ্স, ভেক্সিন অমসুং বাইও-সিমিলারগী লমদা লৈরিবা চাউখৎপগী মঙম অসিবু ঐখোয়না লোকশিনগদবনি‍। মরম অইনা ঐখোয়না মেদিকেলগী খুৎশু খুৎলায় অমসুং হিদাক লাংথক পুথোকপগী মতাঙদা পি.এল.আই. স্কিম হৌদোকখিবনি‍।

মরূপশিং,

কোরোনা ভেক্সিনেসন্দা কোৱিনগুমবা ফম্বাক্কী খুত্থাঙদা ঐখোয়গী দিজিতেল তেক্নোলোজীগী মতিং মালেম পুম্বনা খঙখ্রে‍। অয়ুস্মান ভারত দিজিতেল মিসন্না কঞ্জ্যুমর অমসুং হেল্থকেয়র প্রোভাইদরগী মরক্তা অরায়বা ইন্তরফেস অমা পীরি‍। মসিনা লৈবাকসিদা লায়েং ফংবা অমদি পীবদা য়াম্না লায়থোকহল্লগনি‍। মসিদসু নত্তনা, মসিনা ভারতকী মতিং লৈবা অমদি অহোঙবা মমলগী হেল্থকেয়র সিস্তেমবু মালেমদা লায়না ফংহনবা ঙমহল্লগনি‍। মসিনা মেদিকেল তুরিজম হেনগৎহনগনি অমদি লৈবাক মীয়ামগী শেন্থোক লৈহন্নবগী খুদোংচাবসু হেনগৎহল্লগনি‍।চহি অসিগী বজেত্তা মিসন অসিবু হেন্না মপাঙ্গল হাপ্ননবা অয়ুস্মান ভারত দিজিতেল মিসনগী মমিং লৌরগা ওপন প্লেতফোর্ম অমগী ৱাফম মাঙদা লাক্লি‍। অসিগুম্বা মখলগী অনৌবা খোঙথাঙশিংগী মফম অমদি ইতিলগী মরমদা ঐখোয়না লূম্না লৌদুনা নৈনবা মথৌ তাই‍।

মরূপশিং,

কোরোনাগী মতমদা রিমোত হেল্থকেয়র, তেলিমেদিসিন, তেলিকন্সল্তেসন্না চাউরাক্না অনাবা মীওই করোর অনি মখায়গী পাম্বৈ ওইখি‍। ভারতকী ময়োল্লম অমসুং খুঙ্গঙগী মফমশিংদা হকশেলগী খুদোংচাবা ফংবগী চাং খেন্নরিবসি হন্থহন্নবা হায়রিবা তেক্নোলোজী অসি য়াম্না কান্নরক্কনি খল্লি‍। হৌজিক্তি ঐখোয়না লৈবাকসিগী খুঙ্গঙ খুদিংদা ফাইবর নেতৱর্ক য়ৌহল্লি, ৫জি তেক্নোলোজীসু হৌজিক্তি থুনা লাক্লগনি‍। ৫জি তেক্নোলোজী শীজিন্নদুনা রিমোত হেল্থকেয়রবু থবক ওইনা পায়খৎনবা ঐখোয়গী লনাই সেক্তরনা মখোয়গী থৌদাং হেনগৎহনবা চঙই‍। ঐখোয়গী খুঙ্গঙদা দিস্পেন্সরী কয়া লৈরিবা, অয়ুসকী সেন্তরশিং লৈরিবশিং অসিবু ঐখোয়গী ময়োল্লমদা লৈরিবা অচৌবা লায়েংশঙশিংগা কমদৌনা মরী শম্নহনগদগে, রিমোত হেল্থকেয়র অমসুং তেলিমেদিসিন অমদি কেলি কন্সল্তেসন কমদৌনা হেনগৎহনগদগে হায়বসিদসু অদোমগী ৱাফমশিং ঐখোয়না তাগদবগী ঙাইরি‍। দ্রোন তেক্নোলোজীবু হেল্থকেয়রদা হেক য়ারিবমখৈ শীজিন্ননবা হকশেলগী সেক্তরগা মরী লৈনবা ঐখোয়গী লনাই কম্পেনীশিংসু মাঙদা থোরকপা মথৌ তাই‍।

মরূপশিং,

অয়ুসকী কান্নবা ঙসি মালেম পুম্বনা য়ানরে‍। ঐখোয়গী চাওথোকচনিংঙাই ওইবা ৱাফম অমদি দব্লিউ.ঐচ.ও.না ভারত্তা মাগী অমত্তা ঙায়রবা গ্লোবেল সেন্তর ওফ ত্রেদিসনেল মেদিসিন লিংখৎনবা থৌরাং পায়খৎলি‍। হৌজিক ঐখোয়গীদমক্তা লোয়ন-লোয়ননা মালেমগীদমক্তা হেন্না ফবা অয়ুসকী পাম্বৈ কমদৌনা শেমগৎকদগে হায়বসি ঐখোয় পুম্নমক্কী মফমদা লৈরে‍। কোরোনাগী লাংফম অসিদা হেল্থকেয়র অমসুং ফার্মাগী মরমদা ভারতনা উৎখিবা মতিং মালেম্না খঙখ্রে‍। মরম অসিনা ৱেবিনার অসিদা মতম অমা থাদুনা এক্সন প্লান পুথোরক্লগদি য়াম্না কান্নবা ওইগনি হায়না ঐনা খল্লি‍। অদুগা, মরুওইনা লনাই সেক্তরগী মরূপশিংগী মফমদা, থমজনিংবা ৱাফম অমনা, ঙসি ঐখোয়গী অঙাঙশিংনা মহৈ মশিং তম্নবগীদমক, মরুওইনা মেদিকেল এজুকেসনগীদমক মালেমগী লৈবাক মচা মচা কয়াদা চৎনরি‍। মফমদুদা লোলগী খুদোংচাদবসু লৈরবসু চৎনরি‍। লৈবাকসিদগী য়াম্লবা শেনফম কয়া মপান্দা চৎলি‍। ঐখোয়গী লনাই সেক্তরশিংনা পাক চাউনা হীরম অসিদা চঙশিল্লকপা য়ারোইদরা? ঐখোয়গী স্তেত লৈঙাকশিংনা অসিগুম্বা থবকশিংগীদমক মখোয়গী লম পীননবগী থৌরাং য়াৎপা য়ারোইদরা? মরমদি দোক্তর অয়ামবা মফমসিদগী শেমগৎনবা, পেরামিদিকশিং শেমগৎননবা‍। মসিদসু নত্তনা ঐখোয়না মালেমগী লৈরিবা দিমান্দবুসু পীবা ঙমগনি‍। ঐখোয়গী দোক্তরশিংনা হৌখিবা চহি ৪০-৫০সিদা মালেম পুম্বগী মাঙদা ভারতকী মিংচৎ থমদুনা লাক্লি‍। ভারতকী দোক্তরশিংনা মফম অমদা হেক্তা চৎখিবদা, মখোয়না লৈবাক অদুগী থম্মোয়বু খুদুম চল্লি‍। ভারতকী দোক্তরশিংগী হৈশিংববু মালেমগী মীপুম খুদিংমক্না থাগৎনরি‍। মসিনা তাক্লিবদি ঐখোয়গী ব্রান্দিং তৌখ্রে হায়বনি‍। হৌজিক ঐখোয় মতিক চাবা মীওইশৎং শেমগৎপদা খুমাঙ চাউশিনহনবা তাবনি‍। মতৌ অসুম্না মালেমগী খ্বাইদগী চাউবা হেল্থ ইন্সুরেন্স স্কিম ঐখোয়দা লৈ, ঐদি মসিবু হেল্থ ইন্সুরেন্স স্কিম্নি হায়দে অদুগা অয়ুস্মান ভারত অসিদা শোয়দ্রবা ইনকম্নি‍। ভারত লৈঙাক্না ইন্সুরেন্স লৌরি মদুদি অদোমগী লায়েংশঙ চাউনা শেমগৎলবা অদুগা লায়রবা মীওইশিং মফমদুদা লাক্লবা, অদু ওইরগদি মখোয়গী লায়েংমল ভারত লৈঙাক্না পীগদৌরিবনি‍। অদোম্না লায়েংমলনা মরম ওইরগা অনাবা লাক্লোই হায়বগী ফীভমদু হৌজিক্তি লৈত্রে‍। ঐখোয়গী লনাই সেক্তরগী মীওইশিংনা তিয়র ২ অমসুং তিয়র ৩ ময়োল্লমশিংদা মচাক মথুম শেমগৎনবা থোরক্লোইদরা‍। অয়ুস্মান ভারতকী স্কিমগী মখাদা অনাবশিংগীদমক অখন্নবা খুদোংচাবশিং শেমগৎপিয়ু, অদোমদা ইনকমগী খুদোংচাদবা অমত্তা লৈহল্লোই‍। অদোম্না শেল থাদরিবদুগী শেন্দোং ফংগনি মরমদি য়োজনা ময়াম অমা লৈরি‍। অদুগা হায়রিবা থবকসিদা পব্লিক প্রাইভেত পার্ত্নরসিপ তৌদুনা ঐখোয়গী লৈবাকসিগী হকশেলগী সেক্তরবু হেন্না মপাঙ্গল কনখৎহনবা য়াই অমদি ঐখোয়গী অয়ুর্বেদনা চাউরবা মফম অমা কল্লিবসি অদোমসু উবিরম্লগনি‍। মরুওইনা কোরোনাগী লাংফম মতমদা ঐখোয়গী হর্বল পোত্থোকশিংনা লৌখিবা থৌদাংনা ঙসিদা মালেমগী মফম কয়াদা পোত্থোকশিং অসি থাদোকপগী চাং হেনগৎলক্লি, হায়বদি মীয়ামগী পুক্নিং চিংশিনবা হেনগৎলক্লি‍। ঐখোয় পুম্নমক হোৎনমিন্নদুনা য়োজনাশিং অসিবু মাঙদা পুখৎপা মথৌ তাই‍। পুক্নিংদা লৌথুপ লৌকোয় লৈতনা লুচিংবগী শক্লোন লৌননবা, ভারতপু শেম শানবগীদমক্তা অদোম থোকপিরকউ, বজেৎকী মশিংখক্তনা করিসু তৌবা ঙমগদবা নত্তে‍। ঐখোয়না বজেৎপু থা অমা মাঙদা পুখৎলক্লি, করিগী তৌরিবনো? মরমদি ঐখোয়না ফেব্রুৱারী অমসুং মার্চ থাদা বজেত্তা য়াওরিবা ৱাফম পুম্নমক্কী খুজিল থৌরাংশিং শেম শানবগী খুদোংচাবা ফংনবা অমদি এপ্রিল ১দগী ঐখোয়গী অনৌবা বজেৎপু থবক ওইনা পাঙথোকপা য়াননবা অমদি তেল্লবা মতমদা ঐখোয় হেক ঙম্লিবমখৈ মাঙদা চঙশিনবা ঙম্নবনি‍। ঐনা ময়াম পুম্নমক্কী মফমদা পুকচেল শেংনা হায়জরি মদুদি ঙসি খন্নরিবা অসিবু থৱায় হাপ্পিয়ু অমদি ঐ লৈঙাক্কী মায়কৈদগী ৱা পংঙাঙদা ঙাঙবদা থাজবা থমদে‍। ঐদি অদোমদগী চঙ চঙ লাউবা ৱাফম তানিংই, মরমদি থবক ওইনা পায়খৎপদা করিগুম্বা ৱাফম মচা অমত্তং চিত্থহৌবদা থা মঙা তরুক্তি ফাইল চত্থোক চৎশিন তৌদুনা লৈ‍। খন্ন-নৈনরিবা অসিদগী অসিগুম্বা অশোয়বসি হেন য়ারিবমখৈ হন্থহনসি‍। য়াম্না লায়বা মওংদা থৌরাংশিং অসি পায়খৎনবা, ঐখোয়না থবক ওইনা পায়খৎপা ঙমগদবা মওংদা ঐখোয়গী ওফিসরশিংনা ঐখোয়গী সিস্তেম অসিনা অদোমগী মফমদগী অফবা লমজিং ফংহনবিয়ু‍। ঙসি মালেমগী লাংফম অসিনা হেল্থ কন্সিক্বেন্সবু য়াম্না অচৌবা ৱাফম অমা ওইহল্লিবসিদা ঐখোয় পুক্নিং হেন্না চঙশিনবা ঐনা পাম্মি‍।

ঐনা ময়াম পুম্নমক্কী মফমদা য়াইফ-পাউজেল পীজরি!

থাগৎচরি‍!

Explore More
৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল

Popular Speeches

৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল
Indian Air Force’s Made-in-India Samar-II to shield India’s skies against threats from enemies

Media Coverage

Indian Air Force’s Made-in-India Samar-II to shield India’s skies against threats from enemies
NM on the go

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 25 ফেব্রুৱারি, 2024
February 25, 2024

New India Rejoices as PM Modi Inaugurates the Stunning Sudarshan Setu