মসিগী অখন্নবা তাঞ্জা অসিদা অদোম্না ঐঙোন্দা ঐগী ৱাখল্লোনশিং ফোংদোক্নবগী খুদোংচাবা পীবীবগীদমক্তা ঐহাক্না অদোমগী মফমদা থাগৎচরি।
ইকাইখুম্নরবা সভাপতি জী,
মসিগী হাউস অসিদা, হীরম কয়াদা খন্ন-নৈনবগী থৌওং পাংথোকই, অমসুং মীপুম খুদিংমক্না য়াম্না মরু ওইবা মওংদা থৌদাং কয়া লৌরি। অৱা-নুংঙাই কয়াদা শরুক য়ামিন্নরকখি। অদুবু অসিগুম্বা তাঞ্জা অমা লাকপা মতমদা, ঐখোয়না পার্তিগী কাঙলোনশিংগী ৱাংমদা অমসুং ঐখোয় পুম্নমক্কী মরক্তা অপুনবা ৱাখল্লোন অমা থোরকই মদুদি ঐখোয়গী মরুপশিংনা হৌজিক অতোপ্পা অখন্নবা মরুওইবা থৌদাং অমগীদমক মাংলোমদা চংশিল্লি। ঙসি নুংঙাইবা ফোংদোক্লিবা ঐহাক্কী মরুপশিং, কনাগুম্বা খরদি হল্লক্নবা ৱাখল্লোনগা লোইননা চৎলি, অদুগা কনাগুম্বা খরদি মফম অসিদা ফংলকপা এক্সপরিয়েন্স অদু খুন্নাইদা পুরক্নবা অমসুং মফম অদুদা অখন্নবা কন্ত্রিব্যুসন অমা পীনবা চৎলি। অমুক হন্না হল্লক্লরোইদবা থাদোক্তুনা চৎলিবা মীওইশিংদা ঐনা হায়জনীংবদি, রাজনিতীদা অরোইবা হায়বা লৈতে। অদোমগী তুংলমচৎনা অদোমগীদমক ঙাইরি, অমসুং অদোমগী এক্সপরিয়েন্স অমসুং কন্ত্রিব্যুসন অসি মতম পুম্নমক্তা নেস্নেল লাইফকী শরুক অমা ওইদুনা লৈগনি।
ইকাইখুম্নরবা সভাপতি জী,
বিদায় পীরক্লিবা মেম্বরশিংগী মরক্তগী খরদি হাউস অসি মীফম পাংথোক্ত্রিঙৈদা থাদোক্কনি, অদুগা খরদি হৌজিক চত্থরিবা মীফম মনুংদা থাদোক্কনি। অদুবু ইকাই খুম্নরবা মেম্বরশিং অসিনা অফবা কন্ত্রিব্যুসনশিং পীরি। ঐহাক্না অখন্ননা ইকাই খুম্নরবা দেবগৌদা জী, ইকাই খুম্নরবা খার্গে জী, ইকাই খুম্নরবা শরদ পৱারজী- অসিগুম্বা অৱাংবা থাক্কী লুচিংবশিং মখোয়গী পুন্সিগী শরুক তঙখাই হেন্না পার্লিয়ামেন্তরীগী থবকশিংদা কত্থোকখি। অসিগুম্লবা অশাংবা এক্সপরিয়েন্সকী মতুং ইন্না, অনৌবা মেম্বর পুম্নমক্না মখোয়-মখোয়দগী তম্বা তাই- হাউস অসিদা মখোয়গী অচেৎপা ৱাখল্লোন, য়ারিবমখৈ শরুক য়ামিন্নবগী মখোয়গী অচেৎপা ফিরেপ, অমসুং খুন্নাইনা মখোয়দা থাজবা পীরিবা থৌদাংশিংদা মখোয়গী মপুং ফানা পুক্নিং চিংশিনবা। মসি ঐখোয়না মকোক থোংবা লুচিংবশিং অসিদগী তম্বা য়াবা অমনি। ঐহাক্না মখোয়গী কন্ত্রিব্যুসনশিংবু য়াম্না থাগৎচরি, মরমদি অসিগুম্বা মতম শাংনা থবক তৌরকপা অসি অচম্বা ৱাফম নত্তে, মসি য়াম্না মরু ওই। মতৌ অসুম্না, ঐখোয়গী দিপুতি চেয়রমেন, হরিভন্সজীসু বিদায় পীরি। হরিভন্সজীনা মতম শাংনা হাউস অসিদা থবক তৌবগী খুদোংচাবা ফংখি। ৱা ঙাংবদা মীনুংশি লৈবা, মহাক্না হাউস অসি লুচিংবদা মীপুম খুদিংমক্কী থাজবা ফংনবা লেপ্পা লৈতনা হোৎনখি। ঐহাক্না উবা ফংখি মদুদি অৱাবা মতমদা, হীরম কয়া অমা মেনেজ তৌনবা দিপুতি চেয়রমেনদা হায়নৈ, অমসুং মসিনা মরম ওইদুনা মহাক্না চাউরবা এক্সপরিয়েন্স অমসুং মীপুম খুদিংমক্কা য়াম্না নক্নবা মরী অমা লৈনৈ। মহাক্কী থৌদাং অসি মশক থোকপা অমনি। ঐহাক্না মসিসু উখি মদুদি হাউস অসি মীফম পাঙথোক্ত্রবা মতমদা, মহাক্না লৈবাক শীনবা থুংনা চৎতুনা নহাশিংগা উনরম্মি, মখোয়বু নেস্নেলগী ফিভমগী মরমদা খঙহল্লম্মি, অমসুং মখোয়দা লৈবাক্কী মায়কৈদা থৌদাং লৌবগী ৱাখল্লোন অমা পোকহল্লম্মি। মহাক্না কলমগী মাস্তর অমা ওইবতা নত্তনা ভারতকী মফম খুদিংদা লেপ্পা লৈতনা থবক তৌদুনা লাকখিবা থবক্না মশক তাকপা মীওই অমসুনি।
ইকাইখুম্নরবা সভাপতি জী,
হাউস অসিনা হ্যুমর অমসুং সেতায়রবু য়াম্না তোইনা উবা ফংবা মতম অমা লৈরম্মি। হৌজিক্কী মতমদা, মসি তপ্না-তপ্না হন্থরকপা য়াই, মরমদি ২৪x৭ মেদিয়াগী মতম অসিদা মীপুম খুদিংমক্না চেকশিন্না লৈ। অদুবু ঐখোয়গী অথাৱালে জীদি মতম পুম্নমক্তা এভরগ্রীননি। অথাৱালেজীনা থাদোক্লবসু, মহাক্না মখতানা হ্যুমর অমসুং সাতায়রগী মগুন কয়া অমা মরাং কাইনা পীখিগনি হায়না ঐনা থাজবা থম্লি।
ইকাইখুম্নরবা সভাপতি জী,
চহি অনি খুদিংগী, ঐখোয়গী মরক্তগী অচৌবা কাঙলুপ অমা থাদোকখি। অদুবু হায়রিবা সিস্তেম অসিনা লাক্লিবা অনৌবা কাংলুপ অসিনা চহি মরি নৎত্রগা মসিদগী হেন্না মফম অসিদা লৈরিবা মীওইশিংগী এক্সপরিয়েন্স অদুদগী তঙাইফদনা কান্নবা ফংগনি। অসুম্না, হাউস অসিগী লিগেসি অসি প্রোসেস অমা ওইনা মখা চত্থরি, অমসুং মসি অচৌবা খুদোংচাবা অমনি। ঐহাক্না থাজবা থম্লি মদুদি হায়রিবা মতম অসিদা থাদোক্ত্রিবা মীওইশিং অসিনা মখোয়গী এক্সপরিয়েন্স অদু অনৌবা ইকাই খুম্নরবা মেম্বরশিংগা শরুক য়ামিন্নগনি। মখোয়না মখোয়গী কন্ত্রিব্যুসনশিং অদুগা লোইননা হাউস অসি হেন্না মঙাল লৈহল্লগনি।
ইকাইখুম্নরবা সভাপতি জী,
ঐখোয়না খঙই মদুদি পুন্সিদা, নৎত্রগা মীয়ামগী পুন্সিদা, করিগুম্বা মরুওইবা ৱারেপ অমা লৌবা তারবদি, ইমুং মনুংনা পুন্না লৈমিন্নদুনা ৱারেপ লৌই। অদুম ওইনমক, মখোয়না অদুমক হায়নরি, “ঐখোয়না অতোপ্পা মীওই অমবু হংসি, অনিশুবা ৱাখল্লোন অমা লৌসি, অহল ওইরবা মীওই অমগা তান্নসি।” করিগুম্বা মীওই অমনা নাবা তারবদি, মীয়াম্না হায়নৈ, “ঐখোয়না অতোপ্পা দোক্তর অমগী ৱাখল্লোন লৌরসি।” সেকেন্দ ওপিনিয়নশিং অসি য়াম্না মরু ওই। ঐহাক্না থাজৈ মদুদি ঐখোয়গী পার্লিয়ামেন্তরী সিস্তেম অসিদা, অনিশুবা ৱাখল্লোন অসিগী শক্তি অসি য়াম্না মরু ওই। হাউস অমদা লৌখিবা ৱারেপ অমনা অতোপ্পা হাউস অমদা অনিশুবা ৱাখল্লোনগীদমক চৎলি। করিগুম্বা মফমসিদা থোক্লবদি, মফমদুদা চৎকনি; করিগুম্বা মফমদুদা থোক্লবদি, মফম অসিদা লাক্কনি। মসিগী অনিশুবা ৱাখল্লোন অসিনা খন্ন-নৈনবা অমসুং ৱারেপ লৌবগী থৌওং পুম্নমক্তা অনৌবা মগুন অমা পীদুনা মসিবু হেন্না মপাঙ্গল কনখৎহল্লি। অসুম্না, হাউস অনিমক্কী ইকাই খুম্নরবা মেম্বরশিংনা অনৌবা ৱাখল্লোনা নত্রগা মিৎবেং অমগীদমক তরাম্না ওকই। অনিশুবা ৱাখল্লোন অসি ঐখোয়গী দেমোক্রেসীগী মরুওইবা কন্ত্রিব্যুসন অমনি। ঙসি বিদায় পীরক্লিবা মেম্বরশিং অসিনা মসিগী লেগেসি অসিদা মখোয়গী থৌদাং লৌখি, অমসুং মসিগীদমক্তা ঐহাক্না মখোয়গী মফমদা তৌবীমল খঙবা উৎচরি।
ইকাইখুম্নরবা সভাপতি জী,
চৎথরক্লিবা ইকাই খুম্নরবা মীহুৎশিংনা অনৌবা পার্লিয়ামেন্ত বিলদিং অদুগা লোইননা অরিবা বিলদিং অদুদা মীফম পাংথোক্নবগী তোপ তোপ্পা খুদোংচাবা অমা ফংখি। মখোয়না বিলদিং অনিমক্তা নেস্নেল ৱেলফেয়রদা মতেং পাংখি। মখোয়না থবক তৌরিঙৈ মনুংদা, মখোয়না অনৌবা য়ুম শাবগী থৌরম অদু উখি অমসুং ৱারেপ লৌবগী থৌওং অদুদা শরুক য়াখি। মসি মখোয়গী পুন্সিদা অখন্নবা নিংশিংবা অমা ওইনা লৈহৌরগনি।
ইকাইখুম্নরবা সভাপতি জী,
ঐহাক্না থাজৈ মদুদি হাউস অসিনা মশামক অসি অচৌবা ওপন য়ুনিভর্সিতী অমনি। মফম অসিদা, মেম্বরশিংনা নেস্নেল লাইফকী মখল কয়াগী মওং-মতৌগা মরী লৈনহল্লি। মওং অমদা, মসি এজুকেসন অমসুং ইনিসিয়েসন অনিমকনি। চহি তরুক অসিদি ৱারেপ লৌবদা শরুক য়াদুনা লৈবাক্কী পুন্সি শেমগৎপদা মরুওইবা ওইবতা নত্তনা ইশাগী পুন্সি শেমগৎপদা মমল য়াম্লবা খুদোংচাবা অমনি। ইকাই খুম্নরবা মেম্বরশিং লাকপা মতমদা, মখোয়না মখোয়গী ৱাখল্লোন অমসুং তৌবা ঙম্বশিং পুরকই। মখোয়না থাদোকখিবা মতমদা, হাবরিবশিং মখোয়না থেংনরকপা এক্সপরিবেন্স য়াম্না মগুন লৈহল্লবা অমসুং শরুক য়াম্না হেনগৎহল্লি। চৎখ্রবা মতুংদা, ফোর্মেল স্ত্রকচরশিংগী মনুংদা নৎত্রগা মসিগী মপান্দা ওইরবসু, নেস্নেল লাইফতা মখোয়গী কন্ত্রিব্যুসন মখা চত্থরি। মখোয়গী মমল য়াম্লবা থৌদাং অসি মতম পুম্নমক্তা লৈহৌরগনি, অমসুং মখোয়গী এক্সপরিয়েন্স অসি লৈবাক শেমগৎপদা মতম পুম্নমক্তা কান্নগনি। ইকাই খুম্নরবা মীহুৎ পুম্নমক্তা ঐহাক্না য়াইফ-পাউজেল পীজরি। অমুক্কা হন্না, ঐহাক্না ইকাই খুম্নরবা মেম্বর পুম্নমক্কী থৌদাংশিংগীদমক নুংঙাইবা ফোংদোকচরি অমসুং থাগৎচরি।
হন্না হন্না থাগৎচরি
