লখনৌদা তিনবীরিবা নহা ওইরিবা মরূপ পুম্নমকপু ঐহাক্না খুরুমজরি। ময়াম পুম্নমকপু, লৈবাক অসিগী নহাশিংবু, নেস্নেল য়ুথ দেগী য়াইফ পাউজেল পীজরি।
ঙসিগী নুমীৎ অসি ভারতকী নহা খুদিংমক্কীদমক য়াম্না চাউবা ইন্সপাইরেসনগী নুমীৎনি, অনৌবা ৱারেপ লৌনবা নুমীৎনি, ঙসিগী নুমীৎ অসিদা স্বামী বিবেকানন্দগী মওং মতৌদা ভারতনা অদুগুম্লবা ইনর্জী ফংখি মদুনা ঙসিসু ঐখোয়গী লৈবাক অসিবু ইনর্জেতিক ওইহল্লি। অদুগুম্লবা ইনর্জী অমা মদুনা লেপ্পা লৈতনা ঐখোয়বু ইন্সপাইরেসন পীরি, ঐখোয়বু মাংলোমদা চংশিন্নবা লম্বী উৎপীরি।
মরূপশিং,
স্বামী বিবেকানন্দনা ভারতকী হনাশিংবু মশাগী ফাওরবা হৌখ্রবা অমসুং তুংলমচৎকী অচেৎপা শক্তম অমা ওইনা উরম্মি। বিবেকানন্দ জীনা হায়বীরম্মি মদুদি শক্তি পুম্নমক নহাক্কী মনুংদা লৈরি শক্তি অদু পুথোকউ, নহাক্না পুম্নমক তৌবা ঙম্মি হায়বসিদা থাজবা থম্মু।
ঙসি ইনোবেসন, ইনক্যুবেসন অমসুং স্তার্ত–অপকী অনৌবা ইচেল অসি ভারত্তা কনানা লুচিংলিবগে? নখোয়ননি লুচিংলিবা অসি, ঐখোয়গী লৈবাক্কী নহাশিংনা লুচিংলি। ঙসি ভারতনা মালেমগী স্তার্ত–অপ ইকো সিস্তেমদা মকোকথোংবা লৈবাক অহুমদা লাক্লিবা অসিগী তুংদা হোৎনরিবা অসি কনানো? অদোম ময়াম্নি, অদোমগুম্লবা লৈবাক অসিগী নহাশিংননি। ঙসি ভারত মালেমদা য়ুনিকোর্নশিং পুথোক্লিবা বিলিয়ন দোলর অমা হেনবগী অনৌবা কম্পেনীশিং শেমগৎলিবা অহুমশুবা খ্বাইদগী চাউবা লৈবাক ওইরে। মসিগী তুংদা কনাগী শক্তি লৈরিবগে? অদোম ময়াম্নি, অদোমগুম্লবা লৈবাক অসিগী নহাশিংননি।
মরূপশিং,
২০১৪গী মমাংদা ঐখোয়গী লৈবাক অসিদা চাংচৎতা পেতেন্ত লিশিং মরি লৈরম্মি। হৌজিক্তি মসিগী মশিং অসি হেঙ্গৎতুনা চহীগী ওইনা পেতেন্ত লিশিং ১৫দগী হেল্লে, হায়বদি চাউরাক্না শরুক মরি হেঙ্গৎলে। মসি কনানা হোৎনবদগী ওইরিবনো মসিগী তুংদা লৈরিবসি কনানো? মরূপশিং ঐহাক্না অমুক হন্না হায়রিবা অসিনি অদোম ময়াম্নি, অদোমগুম্লবা নহাহোল মরূপশিংনি, অদোম নহাশিংগী শক্তি অদুনি।
মরূপশিং,
অনৌবা স্তার্ত–অপ লিশিং ২৬ হাংদোকপা অসি মালেম অসিগী লৈবাক অমা হেক্তগী মংলান ওইরম্বা য়াই। মংলান অসি ঙসিদি ভারত্তা অচুম্বা ওইরে। মসিগী তুংদা লৈরিবা অসি ভারতকী নহাশিংগী শক্তিনি, মখোয়গী মংলান্নি। অমসুং মসিদগী হেন্না চাউবা ৱাফমদি ভারতকী নহাশিংনা মখোয়গী মংলানশিং অদু লৈবাক অসিগী দরকার ওইবশিংগা শম্নহল্লি, লৈবাক অসিগী আশাশিং অমসুং এস্পিরেসনশিংগা শম্নরি। লৈবাক অসিগী দিবেলপমেন্তকী থবক ঐহাক্কীনি, ঐহাক্কীদমক্নি অমসুং ঐহাক্না তৌগদবনি। ৱাখল্লোন অসিগা লোয়ননা ভারতকী নহাশিংনা ঙসিদি পুমথন থল্লে।
মরূপশিং,
ঙসিদি লৈবাক অসিগী নহাশিংনা অনৌ–অনৌবা এপশিং শাদুনা মশাগী পুন্সী মহিংসু লায়থোকহল্লে অমসুং লৈবাক মীয়ামদসু মতেং পাংলে। ঙসি লৈবাক অসিগী নহাশিং হেকথোনগী খুত্থাংদা, তেক্নোলোজীগী খুত্থাংদা, লৈবাক অসিগী প্রোব্লেম লিশিং কয়াদা কোক থাদরি, সোলুসন থিরি অমসুং সোলুসন পীরি। ঙসি লৈবাক অসিগী নহাশিং অহোংবা লাক্তুনা থবক্কী মওং মতৌগী মতুং ইন্না অনৌ–অনৌবা ভেঞ্চর হৌদোক্লি, মশামক থবক তৌরি, রিক্স লৌরি, থৌনা উৎথোক্লি অমসুং অতোপশিংদসু থবক পীরি।
ঙসিদি লৈবাক অসিগী নহাশিংনা স্কিম অসি কনানা হৌদোকখিবনো হায়বদু য়েংদ্রে মখোয় মশামক মদুবু লুচিংনবগীদমক মাং থারক্লি। ঐহাক্না হায়রিবা অসি স্বচ্ছ ভারত অভিয়ানি মসিবু লুচিংলিবা অসি ঐখোয়গী নহাশিংনি। ঙসিদি লৈবাক অসিগী নহাশিংনা মখোয়গী মনাক নকপা মফম, য়ুম, লৈকায়, শহর অমসুং সমুদ্র মপালদগী অমোৎ অকায়–প্লাস্তিক লৌথোকপগী থবক্তা মাংজিল থারি।
মরূপশিং,
ঙসি লৈবাক্কী নহাশিংগী মতেংদগী অনৌবা ভারত শেংগৎ শাগৎলি। অদুগুম্লবা অনৌবা ভারত অমা মদুদা ললোন ইতিকসু লাইথোকহনবা অমসুং হিংবসু লাইথোকহনবা। অদুগুম্লবা অনৌবা ভারত অমা মদুদা মীপুম খুদিংমক চপ মান্নবা, মীপুম খুদিংমক মরুওইবা। অদুগুম্লবা অনৌবা ভারত অমা মদুদা তঞ্জাসু লৈবা অমসুং পাইনবগীদমক অতিয়া পুম্বসু লৈবা।
মরূপশিং,
ঙসি ২১শুবা চহীচাগী মতম অসি, ২১শুবা চহীচাগী চহী তরাগী খুজিং অসি ভারতকীদমক য়াম্না লাইবক ফবা অমা পুরদুনা লাক্লি। ঐখোয় লাইবক ফবনি মদুদি ভারতকী মীশিংগী অয়াম্বদি চহী ৩৫গী মখাদা লৈরি। ঐখোয়না তঞ্জা অসিগী কানবা মপুং ফানা লৌগদবগীদমক হৌখিবা চহী খরা অসিদা ভারত্তা মরুওইবা ৱারেপ কয়া অমা লৌখ্রে, নীতি কয়া অমা শেমখ্রে। নহাগী শক্তিবু অচুম্বা মায়কৈদা লৈবাক্কী শক্তি ওইহন্নবা কন্না হোৎনবা অমা ঙসি লৈবাক অসিদা উবা ফংলি। স্কিল দিবেলপমেন্তদগী হৌরগা মুদ্রা লোন ফাওবা মখল খুদিংমক্তা নহাশিংগী মতেং পাংলি। স্তার্ত–অপ ইন্দিয়া ওইগেরা, স্তেন্দ–অপ ইন্দিয়া ওইগেরা, ফিৎ ইন্দিয়া কেম্পেন ওইগেরা নত্রগা খেলো ই্দিয়া ওইগেরা মসি নহাশিং খক্তদা মীৎয়েং থম্লি।
মরূপশিং,
অদোম্না তাবিরমগনি হন্দক্তা ইকুই কুইদ্রিঙৈদা দি.আর.দি.ও.দা দিফেন্স রিসর্সকা মরী লৈনবা য়ং সাইন্তিস্ত লেবোরেতরী মঙা শঙ্গাবগী তঞ্জা অদু ঐহাক্না ফংজখি। লেবোরেতরীশিং অসিদা রিসর্সতগী হৌরগা মেনেজমেন্ত ফাওবা চহী ৩৫গী মখাগী সাইন্তিস্তশিংদা শিন্নখ্রে। অসুক য়াম্না মরু ওইবা লেবোরেতরীশিং অসিগী থৌদাং চহী ৩৫ মখাগী নহাশিংগী খুৎতা শিন্নবা অসি অদোম্না কৈদৌনুংদা তারমখিরোই। অদুবু ঐখোয়গী ৱাখল্লোনদি মসিনি, মসিমক ঐখোয়গী এপ্রোচনি। ঐখোয়না থাক খুদিংদা, সেক্তর খুদিংদা অসিগুম্বা মখলগী এক্সপরিমেন্ত চত্থনবগীদমক লেপ্পা লৈতনা থবক তৌরি।
মরূপশিং,
ঙসিদি জম্মু–কাশ্মিরদা আর্তিকল ৩৭০ লৌথোকখ্রে, রাম জন্ম ভুমিদা চহী কয়াদগী চত্থদুনা লাক্লবা চিন্দা পাউদানবা লোইখ্রে, তলাক অহুমগী মায়োক্তা আইন শেম্লে, সিতিজনশিপ এমেন্দমেন্ত এক্ত ঙসিদি অচুম্বা অমা ওইরে। তেরোরিস্তনা এতেক্ত তৌরকপা মতমদা তুমিন্না ফমদুনা লৈগনি হায়নসু লৈবাক অসিদা খনদুনা লৈরম্মি। হৌজিক্তি অদোম্না সর্জিকেল স্ত্রাইকসু উরে, এয়ার স্ত্রাইকসু উরে।
ময়াম পুম্নমক্না খংবিরিবা অদুনি চহী ২০২২ অসি ঐখোয়গী নিং তম্বগী ৭৫শুবা চহীনি। লৈবাক্কী নিংতম্বদা ঙাওজবশিংনা ইনাক খুনবা ভারতকী মংলান মংবীরমখি অমসুং মখোয়গী নহা ওইবা পুন্সী অদু লৈবাক্কীদমক্তা কত্থোকলমখি। অদুগুম্লবা অথোইবা মীওইশিং অদুগী মংলানশিং অদু মপুং ফাহন্নবগীদমক্তা মখল কয়াগী থবক ঐখোয়না তৌবা তাই। মদুগী মনুংদা থবক অমগীদমক ঐহাক্না ঙসি ময়ামদা অপিল তৌজরি, নহাশিংদা অপিল তৌজরি, অদোমগী খুত্থাংদা লৈবাক পুম্বদা অন্দলোন চত্থগনি হায়বগী আশাদা অপিল তৌজরি। ২০২২ ফাওবদা ঐখোয়না ঙম্লিবা মখৈ লোকেলগী পোত্থোকশিংদমক লৈবিয়ু। অসুম্না তৌদুনা অদোম্না খংনা নত্রগা খংদনা অদোমগী নহা ওইরিবা মরূপ অমগী মতেং পাংগনি। অদোম ইশাগী পান্দমদা মায় পাকপা ওইরসনু, ইশাগী পুন্সীদা মায় পাকপা ওইরসনু, অপাম্বা অসিগা লোয়ননা ঐহাক্কী ৱারোল লোইশিনজরে।
অমুক হন্না নেস্নেল য়ুথ দেদা ময়াম পুম্নমকপু য়াইফ পাউজেল পীজরি অমসুং ভারত ইমাগী অথোইবা মচানুপা স্বামী বিবেকানন্দ জীগী খোংয়াখাদা খুরুমজরি।
হন্না–হন্না থাগৎচরি।
