খুরুমজরি,
গুজরাতকী রাজ্যপাল, শ্রী অচার্য় দেবব্রতজী, গৃহ অমসুং কো-ওপরেসন মন্ত্রী, শ্রী অমিৎ ভাই শাহ, কেন্দ্রগী লৌউ-শিংউ অমসুং লৌমীশিংগী য়াইফ য়ুম্বাল মন্ত্রী, নরেন্দ্র সিংহ তোমারজী, গুজরাতকী মুখ্য মন্ত্রী, ভুপেন্দ্র ভাই পতেলজী, উত্তর প্রদেশকী মুখ্য মন্ত্রী, য়োগী অদিত্যনাথজী, অতোপ্পা মীথুংলেন, লৈবাক্কী মফম খুদিংদগী মশিং য়াম্না মফমসিদা তিল্লিবা ঐহাক্কী লৌমী মরুপ, ইচিল-ইনাওশিং, লৈবাক্কী লৌউ-শিংউ সেক্তর অমসুং লৌমীশিংগীদমক্তা ঙসিগী নুমিৎ অসি য়াম্না মরু ওইবা অমসুং অখন্নবনি। ঐহাক্না লৈবাক্কী লৌমী খুদিংদা নেচরেল ফার্মিংগী মতাংদা পাংথোকপা লৈবাক্কী কনক্লেবতা শোইদনা শরুক য়ানবা হন্না হন্না হায়খিবনি। অদুগা, লৌউ-শিংউ মন্ত্রী তোমারজীনা হায়খিবগুম্না লৈবাক্কী লৌমী চাউরাকপা করোর ৮না তেক্নোলোজীগী খুত্থাংদা লৈবাক্কী মফম খুদিংদগী ঐখোয়গী নাক্তা হৌজিক শম্নদুনা লৈরে। ঐহাক্না লৌমী মরুপ, ইচিল-ইনাও, ইচে-ইচলগী মফমদা নোলুকচরি, ইকায় খুম্নবা উৎচরি। ঐহাক্না অচার্য় দেবব্রতজীগী মফমদসু থম্মোই শেংনা ইকায় খুম্নবা ফোংদোকচরি। ঐহাক্না মহৈরোই অমগুম্না মহাক্না হায়খিবা ৱাফমশিং মুন্না তারম্মিবনি। ঐহাক ইশামক্তি লৌউবা নত্তে, অদুবু মসিগী মতাংদা য়াম্না লায়না খঙবদি ঙম্মি। নেচরেল ফার্মিংগীদমক্তা করি মথৌ তাই, করি তৌফম থোকই হায়বা মহাক্না য়াম্না অরায়বা মওংদা হায়বীখি অমসুং মহাক্কী পাউতাকশিংদা ঐহাক্না চেৎনা থাজবা থম্বা মরম্না ঙসিগী নুমিৎ অসি কাইথোক্তুনা মহাক্কী ৱারোল তানবা ঐহাক্না ফম্লিবনি। মহাক্না ফংখ্রবা মাই পাকপশিংগী মখা পোন্না, মসিগী থৌওং অসি মাই পাক্না পাংথোক্কনি হায়বা ঐহাক্না থাজৈ। ঐখোয়গী লৌমীশিংনসু অসিগুম্বা কান্নবা ৱাফমশিংবু কৈদৌনুংদা কাওরোই অমসুং হন্থনা কৈদৌনুংদা লৌরোই।
মরুপশিং,
মসিগী কনক্লেব অসিনা গুজরাত্তা পাংথোক্লম্বা য়াই, অদুবু মসিগী ইথিল, মসিনা কোনবা অসিদি ভারত পুম্বগীনি, ভারতকী লৌমী খুদিংগীনি। লৌউ-শিংউগী শিজিন্নফম কয়া অমা লৈবা ওইরো, ফুদ প্রোসেসিং তৌবা ওইরো, নেচরেল ফার্মিং ওইরো, মসিনা ২১শুবা চহি-চাগী ভারতকী লৌউ-শিংউবু নৌনা ইনোৎ হাপ্পদা মতেং য়াম্না পাংগনি। কনক্লেব অসিগী মনুংদা, লুপা করোর লিশিং কয়া থাবগী ৱাফম কয়া খন্নখি অমসুং মখা তাবা চাউখৎপা খরসু ফংলে।মসিগী মনুংদা ইথানোল, ওর্গানিক ফার্মিং অমসুং ফুদ প্রোসেসিংগী মতাংদা পুক্নিং চঙবগী মতৌ কয়া উবা ফংখি, ওইথোকপা য়াবা থৌওং কয়াগী য়ুম্ফমসু থোনখি। ঐখোয়না গুজরাত্তা নেচরেল ফার্মিং অমসুং মতমগী তেক্নোলোজী পুন্না শিজিন্নবগী চাংয়েং তৌখিবশিং অসিনা লৈবাক পুম্বদা অনৌবা মাইকৈ অমা তাকপা ঙম্বসিদা ঐহাক্না য়াম্না নুংঙাইবা ফাওই। গুজরাতকী রাজ্যপালনা নেচরেল ফার্মিংগী মতাংদা অরায়বা ৱাহৈ শিজিন্নদুনা মসিগী কান্নবা কয়াগী মতাংদা নীংথিনা তাকপীখিবগীদমক্তা ঐহাক্না মহাকপু অমুক হন্না থাগৎচরি।
মরুপশিং,
হৌজিক্কী নিংতম্বগী অমৃত মহোৎসবকী মতমসিদা, ঐখোয়না মমাংগী থৌওংশিংদগী তমজদুনা অনৌবা লম্বী য়াৎপগী থৌওং পাংথোকপগী মতম ওইরে। নিংতম্বা ফংলবা মতুংগী দিকেদশিংদা, লৈবাক্না লৌউ-শিংউ পাংথোকপা অমসুং হীরম অসিদা চাউখৎখিবগী মওংশিং ঐখোয়না য়াম্না কুপ্না উখ্রে। হৌজিক, ঐখোয়গী নিংতম্বা ফংবগী চহি ১০০ ফাওবগী খোঙচৎনি, লাক্কদৌরিবা চহি ২৫ অসিদি ঐখোয়গী লৌউ-শিংউববু অনৌবা তঙাই ফদবা, শিংনবশিংগী মতুং ইন্না চুননবা হোৎনগদবনি। হৌখিবা চহি ৬-৭ অসিদা লৌমীশিংগী শেন্থোক হেনগৎহন্নবগীদমক্তা মরুদগী হৌদুনা কৈথেল ফাওবগী হীরমদা খোঙথাং মথং মথং পায়খৎখ্রবনি। লৈবাক লৈহাও চাংয়েং তৌবদগী হৌদুনা অনৌবা মরু চাম্ম-চাম্মা চাংয়েং তৌখিবা, পি.এম. কিসান সম্মান নিধীদগীনা পোত্থোক পুথোকপগী অচঙবা শেলগী শরুক ১.৫ হেন্দুনা এম.এস.পি. লেপ্পা, মপাঙ্গল লৈবা ইরিগেসন্দগী কিসান রেল ফাওবগী খোংথাং কয়া অমা লৌখৎখি। অদুগা, শ্রীমান তোমার সিংহনা মহাক্কী ৱাফমদসু পনবীখ্রিবদুনি। লৌউবগা লোয়ননা য়েন-ঙানু লোইবা, খোই য়োকপা, ঙা য়োকপা অমসুং ইনর্জী, বাইওফুএলগুম্বা অতোপ্পা মখলগী থৌওং কয়াগা লৌমীশিংগা মরী লৈনহল্লি। খুঙ্গংশিংদা পোত্থোক পৈফম, কোল্দ স্তোরেজ অমসুগ ফুদ প্রোসেসিংগী মপাঙ্গল লৈহন্নবা লুপা করোর কয়া থাদরি। মসিগী খোংথাংশিং অসিনা লৌমীশিংদা তেংবাংলি, লৌমীশিংদা মখোয়গী অপাম্বা পাম্বৈ খনবগী খুদোংচাবা পীরি। অদু ওইরবসু, ঐখোয়গী মাংদা চাউরবা ৱাহং অমদি লৈরি। লৈহাও ফৎলক্ত্রবা মতমদা ঐখোয়না করি তৌগনি? অইং-অশানা তেংবাংলক্তবা অমসুং ঈশিং লৈরক্তবা মতমদা ঐখোয়না করি তৌগনি? ঙসিদি, মালেম শিনবা থুংবনা অসিগুম্বা শিংনবশিং থেংনরি। কেমিকেল অমসুং ফর্তিলাইজরশিংনা গ্রীন রিভোল্যুসনগী লমদা মরু ওইবা থৌদাং য়াখি হায়বসি অচুম্বনি। মসিগী মহুৎ শিনবা য়াবা অতোপ্পা পাম্বৈশিং শিজিন্ননবা হোৎনবগী তঙাই ফদবা লৈ হায়বসিসি অচুম্বনি । লৌউবদা শিজিন্নবা তিলহাৎ হিদাক অমসুং কেমিকেলগী হার কয়া অমা ঐখোয়না শেল য়াম্না তিংদুনা মীরমদগী লৈবগী মথৌ তারি। ঐখোয়না মীরম লৈবাক্তগী লুপা করোর কয়া-কয়া থীদুনা হায়রিবশিং অসি লৈবগী মথৌ তারি। মসিনা মরম ওইদুনা লৌউবদা চঙবা শেলসু হেনগৎলে, লৌমীশিংগী চাদিংসু হেনগৎলে অমসুং লাইরবী চাকখুম চলায়বসু য়াম্না তাঙখৎলক্লি। অসিগুম্বা শিংনবশিং অসিগা লৌমী অমসুং লৈবাক মীয়াম খুদিংগী হকশেলগসু মরী লৈনৈ। মরম অদুনা, ঐখোয়না চেকশিন্না লৈবগী মথৌ তারে, পুম্নকশিং অসিগী মতাংদা নীংথিনা খঙবগী মথৌসু তারে।
মরুপশিং,
গুজরাতীদা পাউরৌ অমা লৈ, য়ুম্থোং খুদিংদা হায়নৈ, “পানি আৱে তে পহেলা পাল বান্ধে”। ঈশিংগীদমক্তা দাম হান্না শাও হায়বসি মীয়াম্না হায়নবা ৱাফম্নি। মসিনা হায়বদি, লাইয়েংবদগীদি হান্ননা চেকশিনহৌবনা হেন্না ফবা হেল্লি হায়বনি। লৌউ-শিংউদা থেংনরিবা অসিগুম্বা থৌওংশিং অসিনা কা হেন্না ফৎচিল্লক্ত্রিঙৈদা মসিগী মতাংদা অচৌবা খোঙথাং পায়খৎপগী হৌজিক অসি চপ চাবা মতম্নি। ঐখোয়না ঐখোয়গী লৌউ-শিংউববু কেমিস্ত্রীগী লেব মপান্দগী পুথোরক্তুনা মহৌশাগী লেবকা শম্নহনগদবনি। ঐহাক্না মহৌশাগী লেবোরেতরীগী মতাংদা হায়রিবা অসি সাইন্সতা মপুং ওইনা য়ুম্ফম ওইবনি। মসি কমদৌনা ওইথোক্কনি? মসিগী মতাংদসু অচার্য়জীনা য়াম্না নীংথিনা তাকপীখ্রে। ঐখোয়না অতেনবা ফিল্ম অমসু য়েংখ্রে। মহাক্কী লাইরিক পারবা মতুংদু, য়ুত্যুবতা চঙদুনা মহাক্কী মমিং থিবদা মহাক্কী ৱারোল কয়া অমসু ফংগনি হায়না মহাক্না হায়বীখ্রিবা অদুনি। মেন্যুর, হার, ৱোবিদা লৈরিবা মপাঙ্গল খুদিংমক মহৌশাদা ফংবা ঙাক্তনি। লৈবাক লৈহাও ফহল্লিবা বেক্তরিয়াগী চাং হেন্না লৈবাক্তা য়াওহন্নবা ঐখোয়না হোৎনবা তাবনি। ঐখোয়গী শনশিংনা অসিগুম্বা থৌওং অসিদা অচৌবা থৌদাং য়াই হায়না অখঙ-অহৈ কয়ানা হায়রি। অখঙ-অহৈনা হায়বগী মতুং ইন্না, শনয়ুং ওইরো, শন্থী ওইরো, মসিদগী ঐখোয়না ঐখোয়গী লৌরোকশিংসু ঙাক-শেনবা অমসুং ইনর্জী পীনবগী থৌওং কয়া অমা ঐখোয়না শেম-শাবা য়াই হায়রি। মরুদগী হৌদুনা লৈহাও ফাওবগী ফহন্নবা পাম্বৈ অসি ঐখোয়গী মহৌশাদগী ফংবা য়াই। অসিগুম্বা লৌউবগী থৌওং অসিদা হারগীদমক্তা চাদিং তৌদ্রবসু য়ারে, তিলহাৎ হিদাক শিজিন্নদ্রবসু য়ারে। মসিদা ইরিগেসনগী মথৌ তাবসু য়াম্না হন্থৈ অমসুং ঈশিং কংবগী শিংবসু লৈররোই। ইরিগেসনগী খুদোংচাবা য়াম্না লৈতবা মফম ওইরো, নত্ত্রগা ঈশিং য়াম্না লৈবা লৌফম ওইরো, নেচরেল ফার্মিং তৌদুনা লৌমী অমনা চহি অমদা লৌরোক কয়া অমা থাবা য়াহল্লি। মসিদা নত্তনা, লবুক্তগী থোক্লকপা ফৌ, গেহু অমসুং হৱাইগী অরেমখাক অমসুং চরুখোকশিং অসিসু থৌওং অসিদা নীংথিজনা শিজিন্নবা য়াগনি। মসিনা তাকপদি, শেল য়াম্না চঙদবা অমসুং কান্নবা য়াম্না হেনবা হায়বনি। মসিনি নেচরেল ফার্মিং হায়রিবসি।
মরুপশিং,
মালেম অসিনা মোদর্ন ওইরকপা হেনবগা লোয়ননা, মসিনা ‘বেক তু বেসিক’তা হঞ্জিনবসু হেল্লি।
মসিগী ‘বেক তু বেসিক’ হায়বরিবসি করিনো? মসিনা হায়বদি ইশাগী হৌরকফমগা পুনবা হায়বনি। ৱাফম অসিদি, অদোম লৌমী মরুপশিংদগী হেন্না কনানা খঙগনি? ঐখোয়না মরাশিংদা ঈশিং হেন্না চাইরিবা মখৈ, পাম্বীনা চাউখৎপা হেনগদৌরিবনি। ভারত্তি লৌউবনা মপুং ওইবা লৈবাক্নি। ঐখোয়গী খুন্নাই অসি লৌউবদা য়ুম্ফম ওইরগা শেম্বনি, মসিদগী চৎনবী ঙাক-শেনবনি, কুমহৈ কয়া অমা মসিগীদমক্তা শেম্বনি। লৈবাক অসিগী লৌমী খুদিংমক মরী লৈনবনি, শম্নবনি। অদোমগী মফমশিংদা, লৌউবনা ইথিল পীদবা কুমহৈ, চাকচা-হৈজা, পুন্সি মহিং অমসুং চৎনবী লৈবা থেংনবরা? ঐখোয়গী পুন্সিরোল অমসুং চাউখৎপগী খোঙচৎনা লৌউ-শিংউবগা লোয়ননা অসুক য়াম্না চাউখৎলিবা অসিনা মরম ওইবনা, থৌওং অসিগী মরী লৈনবা লৌশিং অমসুং বিগ্যান কয়াম্না চাউখৎলগনি? থৌওং অসি কয়া য়াম্না সাইন্তিফিক ওইরমগনি? মরম অদুনা, ইচিল-ইনাও অমসুং মরুপশিং, মালেম্না ঙসি ওর্গানিক ফার্মিংগী ৱারী শারিবা, নেচরেল ফার্মিংগী ৱারী শারিবা অমসুং বেক তু বেসিক্কী ৱারী শারিবা অসিদা, মসি পুম্নমক্কী মরা অসি ভারত্তা য়াম্না চেৎনা লৈবগী মওং উবা ফংলি।
মরুপশিং,
ঙসি, মফমসিদা, লৌউবগী মতাংদা কুপথনা রিসর্চ তৌখ্রবা অখঙ-অহৈ কয়া অমা লৈরি। ঐখোয়গী লমদমগী রিগবেদ অমসুং অথর্ব বেদদগী হৌরগা পুরান ফাওবা, কৃষি পরাসর অমসুং কশ্যপী কৃষি শুক্তগুম্বা অরীবা ৱারোলশিং, খারোমগী তমিলনাদুগী শাধু তিরুভল্লুরজীদগী হৌরগা লৌউবগা শৈরেং ইবা অৱাংগী ঘঘা ফাওবনা লৌউবগী মতাংদা য়াম্না কুপথনা থিজিল্লম্মি হায়বা অদোম্নসু খঙলমগনি। অদুগা মন্ত্রা অমসু লৈঃ
গোহিতঃ খেত্রগামী চ,
কালজো বিজ-ততপরঃ
বিতন্দ্রঃ সর্ব সশ্যাদয়ঃ
কৃষকো না অবসিদতী।।
মসিনা হায়বদি,
গোঘন অমসুং পশুধনহী কান্নবা খঙবশিং, মতম অমসুং অইং-অশাগী মরমদা খঙবশিং, মরুগী মরমদা খঙবশিং অমসুং হোৎনবদা তন্দবা, অসিগুম্বা লৌমীনা কৈদৌনুংদা মথৱাই ৱাদে, লাইরনা কৈদৌনুংদা লৈতে। মসি নেচরেল ফার্মিংগী মতাংদা শৈথাবা মন্ত্রনি অমসুং মসিনা নেচরেল ফার্মিংগী মপাঙ্গলসু তাক্লি। মসিদা পল্লিবা হীরম খুদিংমক মহৌশাগী মওংদা লোইনা ফংই। মতৌ অসুম্না, লৈহাও ফবা করম্না হেনগৎহনগনি, করম্বা লৌরোক্তা করম্বা মতমদা ঈশিং চাইগনি, ঈশিং করম্না কনগনি হায়বা পাউতাক কয়া অমা পীবিরম্লি। য়াম্না কান্নবা অতোপ্পা মন্ত্রা অমসু লৈঃ
নেরুত্যার্থ হি ধানয়ানা জল ভাদ্রে বিমোচয়েত।
মুল মাত্রন্তু সংস্থাপ্ত্য কারয়েজজ-মোক্সনম।।
মসিনা হায়বদি, লৌরোকশিংবু লাইনাদগী ঙাকথোক্তুনা মপুং মরৈ ফাহন্নবগীদমক্তা ভাদোগী থাদা ঈশিং লৈথোক্কদবনি হায়বনি। মরা থুম্বা ফাওবগী চাংতমক লবুক্তা ঈশিং লৈহনগদবনি। মতৌ অসুম্না, কবি ঘাঘনসু অসুম্না ইবীরম্মিঃ
গেহু বাহে, চনা দলায়ে।
ঘান গাহে, মক্কা নিরায়ে।
উখ কসায়ে।
মসিনা হায়বদি, গেহুবু নীংথিনা ঙাক-শেনবা, চনাবু লুনা তৌবা, ফৌবুনা ঈশিং তোয়না চাইবা, মক্কাবু মখোঙ তোইনা শোম্বা অমসুং চুবু ঈশিং চাইবনা, মখোয়গী লৌরোক ফগনি। চহি লিশিং কয়াগী মমাংগী তমিলনাদুগী শাধু তিরভল্লুরনা লৌউবগা মরী লৈনবা অসুক য়াম্না কান্নবা পাউতাক পীরমবসি অদোমগী ৱাখলনা লাম্বা ফংবরনে। মহাক্না অসুম্না হায়রম্মিঃ
তিরি পুরি কশ্বা উপকিন,
ফিরিথেবরুম বেন্দাত সালপ পদুম।
মসিগী ৱাহন্থোক্তি, করিগুম্বা লম্না কঙলবা, লৈবাক্কী চাংবু খুদুপ অমগী চাংদা হন্থহনবা মতমদা হার অমত্তা য়াওদনা লৌরোক্না নীংথিনা হৌগনি হায়বনি।
মরুপশিং,
লৌউবগা মরী লৈনবা অরিবা লৌশিং অসি ঐখোয়না তম্বগী মথৌ তাবতা নত্তনা, মসিবু মহৌজিক্কী মতমগা চুননবা শিন-লাঙবগী মথৌসু তাই। হীরম অসিগী মতাংদা, ঐখোয়না নীংথিনা থিজিন হুমজিনবা তাই, অরিবা লৌশিংবু মতমগা চুনবা সাইন্তিফিক ওইবা মওংদা শেমদোকপা তাই। মসিগী মতাংদা, ঐখোয়গী আই.সি.এ.আর.গুম্বা ইন্সতিত্যুৎ, কৃষি বিগ্যান কেন্দ্র, এগ্রি য়ুনিভর্সিতীশিংনা অচৌবা থৌদাং য়াবা য়াই। লৌশিংশিং অসিবু রিসর্চ পেপর নত্ত্রগা থিওরী খক্তদা থমদুনা লৈগদবা নত্তে, মসিবু ঐখোয়না প্রেক্তিকেলদা ওন্থোক্কদবনি। লেব তু লেন্দ হায়রিবা ৱাফম অসিগী লম্বীদা ঐখোয়না চৎকদবনি। ঐখোয়গী ইন্সতিত্যুসনশিংনা মসিগী থবক অসি হৌদোকপা য়াগনি। নেচরেল ফার্মিং অসিবু লৈবাক্কী লৌমী অয়াম্বদা য়ৌহন্সি হায়না অদোম্না ৱারেপ লৌগদবনি। থৌওং অসি মাই পাকহনবা য়াই হায়না অদোম্না পুম্নমক্তা উৎপা মতমদা, মীওই খুদিংনা মসিগা মরী শোইদনা লৈনরক্কনি।
মরুপশিং,
ঐখোয়না থাইনগী লৌশিংবু নৌহৌননা তম্বগী মথৌ তাবতা নত্তনা হৌজিক্কী মতমগা চান্নহন্নবা ময়া থৌহনবগী মথৌসু তারে। লবুক্তা মৈ থাবা মতমদা লবুক্কী লৈহাও মাংথরকই হায়বসি অখঙ-অহৈশিংনা হায়রবনি। লৈখোমশিং অসি মৈ থাবা মতমদা চেক ওল্লকপগী থৌওং ঐখোয়না উরে। অসিগুম্বা চেকশিং অসি য়ুম শাবা য়াবমখৈ কল্লি। অদুবু, লৌরোক্কী লেমহৌবশিংবু মৈ থাদোকপগী হৈনবী অসি চৎনবী ওইবগুম তৌরে। মতৌ অসিগুম্না, কেমিকেল য়াওদ্রগদি, মহৈ মরোং ফজনা লোকপা ঙম্লোই হায়বা অরানবা ৱাখল্লোন অমসু লৈরে। অদুবু, অশেংবা ৱাফমদি, মসিগা ওন্ন-তৈনবনি। মমাংদা কেমিকেল অমত্তা লৈরমদে, অদুবু লৌরোক্তি অদুমক ফজদুনা লাক্নখিবনি। মীওইবা খুন্নাই চাউখৎপগী পুৱারীনা মসিগী শাখিনি। শিংনবা কয়া থেংনরবসু, লৌউ-শিংউগী য়ুগ অসিদা মীওইবা খুন্নাইনা য়াম্না থুনা মাই পাক্লি, মাং থানা চৎলি। মসিগী মরমদি, মহৌশাগী ওইবা মওংদা লৌউ-শিংউ তৌবা মতমদা, মীওইবনা লৌশিং কয়া তমদুনা লাকপগীনি। ঙসিগী ইন্দস্ত্রীগী মতম অসিদা, ঐখোয়গী নাক্তা তেক্নোলোজীগী তেংবাং অমসুং পাঙ্গল লৈরে, খুদোংচাবা কয়া লৈরে, অইং-অশাগী মতাংদা মাংজৌননা খঙলে। হৌজিক্তি, ঐখোয় লৌমীশিংনা পুল্লগা অনৌবা পুৱারী শেম্বা য়ারে। মালেম্না গ্লোবেল ৱার্মিংগী মতাংদা নুংশা থিনরিবা মতমসিদা, ভারতনা মসিগী ৱারোইশিন পুরক্নবগীদমক্তা, ঐখোয়গী নাৎকী চৎনবীগী খুত্থাংদা উপাই পীবা য়াই। ঐখোয়না পুন্না করিগুম্বা অমা তৌবা য়াই।
ইচিল ইনাওশিং,
নেচরেল ফার্মিং অসিদগী খ্বাইদগী হেন্না কান্নবা ফংগদবশিংদি লৈবাক্কী লৌমীগী অপুনবগী ৮০%নি। মখোয়শিং অসিদি হেক্ত্যার ২দগী তাবা লমখক লৈজবা অপীকপা লৌমীশিংনি। অসিগুম্বা লৌমী অয়াম্বনা কেমিকেল য়াওবা হারশিংদা শেল য়াম্না থাদনৈ। করিগুম্বা মখোয়না নেচরেল ফার্মিংদা মাই ওনশিল্লবদি, মখোয়গী ফিভম য়াম্না ফগৎলক্কনি।
ইচিল ইনাওশিং,
নেচরেল ফার্মিংগী মতাংদা গান্ধীজীনা হায়বীরম্বা “করিগুম্বা শিজিন্নরবদি, কান্নবা শোইদনা ফংগনি” হায়বা ৱাফম অসি য়াম্না চুনৈ। লৌ খোইবা কাওবা অসি ইশাবু কাওবগা চপ মান্নৈ হায়না মহাক্না হায়বীরম্মি। লৈবাক্কী রাজ্য কয়ানা হীরম অসিগী মতাংদা অহোংবা কয়া লাকপসিদা ঐহাক্না য়াম্না নুংঙাইবা ফাওই। কেন্দ্র সরকারনা হৌদোকখিবা চৎনবীগী মখা পোনবা লৌউ-শিংউ চাউখৎপগী থৌওংনা মখোয়শিংদা য়াম্না কান্নহল্লে। মসিগী মখাদা, লৌমীশিংদা ত্রেনিংসু পীরে অমসুং তঙাই ফদবা তেংবাং খুদিংসু পীরে।
মরুপশিং,
হৌজিক্কী অমৃতগী মতমসিদা ফুদ সেক্যুরিতী অমসুং মহৌশাগা নীংথিজনা লৈমিন্নবগী ৱারোইশিন অসি ভারতনা মালেমদা পীগদবনি। ঐহাক্না ক্লাইমেত চেঞ্জ সম্মিত্তা মালেম পুম্বদা “লাইফস্তাইল ফোর ইনভাইরনমেন্ত” ,হায়বদি এল.আই.এফ.ই., অসিবু মালেমগী মিসন অমা ওইহনসি হায়না ফোংদোকখি। ভারত অমসুং মসিগী লৌমীশিংনা হীরম অসিগী মতাংদা ২১শুবা চহি-চাগী মালেম্বু লুচিংগনি। নিংতম্বগী অমৃত মহোৎসবকী মতম অসিদা ঐখোয়গী ইমা ভারতকী লৈবাক-লৈহাওশিংবু কেমিকেল য়াওবা হার অমসুং তিলহাৎ হিদাকশিংদগী মনিং তমহন্নবা ঐখোয় পুন্না ৱাশকমিন্নরসি। অফবা লৈহাও, হকশেল ফবা পুন্সিগী লম্বী মালেমদা তাক্লসি। ঙসিদি, লৈবাক অসিনা মরোমদোম লেপ্পা ঙম্বা ভারতকী মঙলান মঙলি। লৌউ-শিংউবনা মরোমদোম লেপ্পা ঙম্লবা মতমদা ঐখোয়না আত্মানির্ভর ওইবা ঙমগনি। খুৎশেমগী হার অমসুং হিদাক শিজিন্নবগী মহুত্তা ইমা ভারতকী লৈহাওগী কান্নবা, শন্থী-শনয়ুংগী কান্নবা লৌবা মতমদসু মঙলান অসি মঙফাওনগনি। লৈবাক মীয়াম্না মীয়াম পুম্নমক্কী কান্নবগীদমক, জিব পুম্নমক্কী কান্নবগীদমক, নেচরেল ফার্মিংবু লৌশিন্দুনা মীয়ামগী ইহৌ ওইহল্লসি। মসিগী থাজবা অসিগা লোয়ননা, গুজরাত সরকারগী মুখ্য মন্ত্রীজী অমসুং মহাক্কী তীমগী অসিগুম্বা খোঙথাং অসিবু গুজরাত পুম্বদা মীয়ামগী ইহৌ ওইহনবা অমসুং লৈবাক্কী লৌমী খুদিংবু থৌওং অসিগা মরী লৈনহনবগীদমক্তা ঐহাক্না ইকায় খুম্নবা উৎচরি। পুম্নমকপু থাগৎচরি।
