ইকাই খুম্নজরিবা উপ-রাস্ত্রপতিজী, লোকসভাগী স্পীকর শ্রী ওম বীরলাজী, শ্রী গুলাম নবীজী অমদি ঙসিগী থৌরম অসিগী মিৎয়েং থমফম ওইরিবা শ্রীমান হরিবংশজী, চন্দ্রশেখরজীগী ইমুং মনুংগী মীওই খুদিংমক অমসুং মহাক্কী ৱাখল্লোনবু তুংইল্লিবা মরূপলোই পুম্নমক।
ঙসিগী রাজনীতিগী পুন্সিদা রাজনীতিগী পুন্সিদগী বিদাই লৌরবা মতুং চহী অনি ফাওবা হিংদুনা লৈবা অসি অরুবা অমনি। মীয়াম্নসু কাওনরকই, মরূপশিংনসু কাওথোরকই অমদি পুৱারীগী কাচিন অমদা অসিগুম্লবা মীওইশিং অসি মাংখি।
ঐখোয়না ৱাফম অসি রেকোর্দ তৌগদবনি মদুদি মহাক্কা কাইনখ্রবা চাউরাক্না চহী ১২গী মতুং, ঙসিসু চন্দ্রশেখরজী ঐখোয়গী ইরক্তা মওং মতৌ অদুদা হিংদুনা লৈরি। ঐহাক্না হরিবংশজীবু হন্না-হন্না থাগৎপা ফোংদোকচরি – অহানবদা মহাক্না থবক অসি পাংথোকপীরে, অদুগা অনিশুবদা থবক অসি পাংথোক্নবা থৌনা লৈবীখি। ঙরাং ফাওবা হরিবংশজী জর্নেলিস্ত অমা ওইনা অমদি রাজ্য সভাগী দিপুতী চেয়রমেন অমা ওইনা থবক তৌবা মীওই অমা ওইবীরম্মি, অদুবু লাইরিক অসিগী মতুংদা হরিবংশজীগী করম্বা থাক্তা লৈরগনি হায়বা ঙমদে।
চন্দ্রশেখরজী – মহাক্কা লোইননা থবক তৌবগী খুদোংচাবা অদুদি ঐহাক্না ফংজখিদে, ১৯৭৭তা ঐহাক্না মহাক্কা অহানবা ওইনা উন্নজবগী তাঞ্জা ফংজখি। মফম অসিদা ঐহাক্না থৌদোক খরা পাওদমজগে। নুমিৎ অমা ঐহাক অমসুং ভৈরো সিংহ শেখাৱৎ, ঐখোয় অনি ঐখোয়গী পার্তীগী খোংচৎতা দিল্লী এয়রপোর্ত্তা লৈরম্মি। চন্দ্রশেখরজীসু মশাগী থবক লৈবনা করিগু্বা মফম অমদা চৎনবা এয়রপোর্তা লাকপা অদু লাপ্না উবদা ভৈরো সিংহনা ঐহাকপু নাকল অমদা পুথোকখি অমদি মহাক্কী ফুরিৎখাওদা য়াওরিবা পুম্নমক ঐহাক্কী ফুরিৎখাওদা হাপচিল্লকখি। য়াম্না থুনা হাপচিল্লকখি, মসি পুম্নমক ঐহাক্কী ফুরিৎখাওদা করিগী হাপলক্লিবনো? খল্লিঙৈ তাঞ্জা অদুদা চন্দ্রশেখরজীনা ইহান হানবদা ভৈরো সিংহগী ফুরিৎখাও হুমখি; মতম অদুদা করিগী ফুরিৎখাও হুম্লিবনো হায়বা ঐহাক খঙবা ঙমখি, মরমদি ভৈরো সিংহ পান পরাগ অমসুং হিদাক মনা চাবগী হৈনবী লৈরম্মি মদু চন্দ্রশেখরজীনা য়ানীংলমদে। ভৈরো সিংহগা থেংনবা খুদিং মহাক্না মুন্দুনা ফত্ত-হাওদি মরক্তা হুন্দোক্লম্মি। মদুদগী নান্থোক্নবগীদমক ভৈরো সিংহনা মহাক্কী পোৎলমশিং অদু ঐহাক্কী ফুরিৎখাওদা হাপলকখি।
ভৈরো সিংহগী তুংদা থোক্লগদবা খুদোংথিবা অদুগীদমক চন্দ্রশেখরজীনা ৱাবীরম্মি, মসি মশানা অচৌবা ৱাফম অমনি। চন্দ্রশেখরজীনা অতলজীবু মতম পুম্নমক্তা গুরুজী হায়না কৌরম্মি অমদি মতম পুম্নমক্তা গুরুজীগী ইকাই খুম্নবা অদু পীনবীরম্মি। অদুগা হাউসতসু করিগুম্বা খরা হায়দ্রিঙৈ মাংওইননা গুরুজী অদোম্না ঐহাকপু ঙাকপীগনি ঐহাক অদোম্বু নিন্দা তৌজবা তারে হায়না হায়খি। করিগুম্বা অদোম্না অরিবা রেকোর্দ অদু য়েংলগদি মহাক্কী হৌন-লোনচৎ অমসুং মহাক্কী নোলুকপা মতৌ অদু উবা ফংগনি।
পুৱারীগী য়াম্না মরুওইবা থৌদোক অনিখক মিৎয়েং থম্বীয়ু – জয়প্রকাশ নরায়নজী – বিহার, মহাত্মা গান্ধী – গুজরাত, লৈবাক অসিনা নীংতম্লবা মতুং লৈবাক্কী প্রধান মন্ত্রীগী ৱারেপ অসি গুজরাতী অমনা লৌনবা মতম লাকপদা মহাক্না গুজরাতী নত্তবা অমা খনখি অমদি লোকতন্ত্রগী লানফমদা মায় পাক্লবা মতুং বিহারী অমনা প্রধান মন্ত্রী খনবগী মতম লাকপদা মহাক্না গুজরাতী অমবু প্রধান মন্ত্রী খনখি।
চন্দ্রশেখরজী নাদুনা লৈখি অমদি তাইবংপাল থাদোকখিগদবা থা খরা ৱাৎলিঙৈ ইফমদা মহাক্কী ফোন লাকখি, মতম অদুদা ঐহাক গুজরাতকী মুখ্যমন্ত্রী ওইরি, মদুদা মহাক্না হায়বীরকখি – দিল্লীদা করম কান্দা লাক্কনি? ঐহাক্না খুমখি – করি লৈরবগে তাকপীয়ু? করিসু নত্তেদা, করিগুম্বা লাকপা থোক্লগদি য়ুমদা চংলকউ, ফম্মিন্নদুনা ৱারী শানশি, করিগুম্বা ঐহাক্কী হকচাংগী ফিভম্না ফরগদি ঐহাক ওইনা লাকপসু য়াবনি। অদোম্না ঐহাকপু ফোন তৌদুনা নীংশিংবীরকপা অসি ঐহাক্কীদমক্তদি য়াম্না চাউবা ৱাফম্নি হায়না ঐহাক্না হায়খি। অদুনা ঐহাক মহাক্কী ময়ুমদা চৎখি অদুবু ঐহাক অঙকপনা থনখি, হকচাংগী ফিভম শোক্লবসু মতম শাংনা ঐহাক্কা ৱারী শান্নখি অমদি গুজরাতকী হিরমদা খঙনবা হোৎনখি, সরকারনা করি করি পায়খৎলি হায়বদু খঙনবা হোৎনখি। অদুবু তুংদা লৈবাক্কা মরী লৈননা মহাক্কী ৱাখল্লোন করিনো, করি সমস্যাশিং উবা ফংলি, কনানা তৌগনি, করম্না তৌগনি – নখোয়দি নহা ওইরি করি তৌবা য়াবগে য়েংউ, হায়বদা পুক্নিং য়াম্না নুংশিখি, মদুনা মহাক্কা লোইননা ঐহাক্কী অরোইবা থেংনবা ওইখি।
হরিবংশজীনা ইবা চন্দ্রশেখরজীগী লাইরিক অসিদগী ঐখোয়না চন্দ্রশেখরজীবু মমুৎ তানা খঙবা ঙম্লগনি, অদুবু মতম অদুগী থৌদোকশিং, থৌদোকশিং অদুগা মরী লৈননা হৌজিক ফাওবা ঐখোয়দা হায়বীরকপা অদুদগী মসিদা খেৎনবা খরা য়াওরি। মরম অদুনা লাইরিক অসি কাংলুপ অমনা মওং অদুদসু এনলাইজ তৌরকপা য়াই, মরমদি মতম অদুদা অসুক য়াম্না… অদুগা ঐখোয়গী লৈবাক অসিদা ফেশন ওইরি মদুদি মীওই খরা খক্তমক অধিকার ফংই, মদুদা রিজার্বেসন লৈরি।
ঙসিদি লুচিংবা মচা-মশু খরসু কিলোমীতর ১০-১২ খোংনা চৎতুনা পুং ২৪ তি.ভি. চেনেলদা য়াওদুনা লৈরগনি, মীদিয়াগী অহানবা লমাইদা য়াওরি; চন্দ্রশেখরজীনা মীখলগীদমক খল্লুবা তৌদনা, খুঙ্গংগী লাইরবশিংবু পুক্নিংদা থমদুনা খোংনা চৎখি। লৈবাক অসিনা মফমদা পীফম থোকপা ইকাই খুম্নবা অদু পীখিদে, ঐখোয় শোয়খি। লায়বক থিবনি – ঐহাক্না য়াম্না অৱাবগা লোইননা হায়জনীংলি, লায়বক থিবনি।
মহাক্কী ৱাখল্লোনগা মরী লৈননা খন্ন-নৈনবা য়াই, ঙসিসু কনা অমনা য়েৎলকপা য়াই। মদুমক লোকতন্ত্রগী মগুন্নি। অদুবু য়াম্না খঙলগা, খন্থরবা স্ত্রাতজীগী মখাদা চন্দ্রশেখরগী অদুগুম্লবা খোংচৎ অদু দোনেসন, করপসন, ইনাক খুনবশিংগী পৈশা – মসিগী মনুংদা খন্ন-নৈনখি। অসিগুম্বা চাউখ্রবা মীচং মীখায় নাইবা অসি মীচম-মীয়ামগী পুন্সিদা নুংঙাইতবা অমনি।
ঐখোয়গী লৈবাক্কী ৱাফম অমসু লৈরি। লৈবাক অসিদা প্রধান মন্ত্রী কয়া লৈখ্রে হায়না ঙসিগী জেনরেসন্দা হংলুবা মতমদা – কনা অমত্তনা খঙলমদবা য়াই। কনা ওইখিবগে – মীওই খরা খক্তমক খঙলমগনি, য়াম্না কন্না কাওথোক্নবা হোৎনরমগনি। অসিগুম্বা ফিভম অসিদা হরিবংশজী, অদোম্না য়াম্না চাউবা থৌনা উৎপীরি, অদোম থাগৎনীংঙাই মচাক্নি।
ময়াম পুম্নমক্কী থৌজালদগী ঐহাক্না পাংথোক্কে হায়না লেপখ্রে – দিল্লীদা হান্নগী প্রধান মন্ত্রী পুম্নমক্কী, মখোয়গী অনৌবা থাক্কী ম্যুজিয়ম শারগনি। হান্নগী প্রধান মন্ত্রী পুম্নমক্কী ইমুং-মনুংদা, মরূপশিংদা ঐহাক্না হায়জরি মদুদি লাক্কদৌরিবা জেনরেসন্না চন্দ্রশেখরজী ঐখোয়গী প্রধান মন্ত্রী ওইবীরম্মি অমদি মহাক্কী পুন্সিদা অসুম অসুম্বা থোইদোক হেন্দোকপা লৈখি, মহাক্কী অসিগুম্বা থৌদাং লৈখি, চরন সিংহজীগী অসুম অসুম্বা থোইদোক হেন্দোকপা লৈখি, দেবেগৌরাগী অসুম অসুম্বা থৌদাং লৈখি, আই.কে. গুজরালগী অসুম অসুম্বা থোইদোক হেন্দোকপা লৈখি, দোক্তর মনমোহন সিংহগী অসুম অসুম্বা থৌদাং লৈখি খঙবা ঙমগদবা পোৎলম পুম্নমক খোমজিনবীয়ু, রাজনীতিগী খেৎনবা থমদনা।
লৈবাক অসিনা অনৌবা রাজনীতিগী কলচর অমা দরকার ওইরি, মদু ঐখোয়না মতৌ অসুম্না পুরক্নবা হেৎনরি। চন্দ্রশেখরজী ঙসিসু, করিগুম্বা অচুম্বা প্রোসপেক্তিবতা মীয়ামগী মাংদা পুরকপা তারগদি ঙসিসু অনৌবা জেনরেসন্দা পুক্নিং থৌগৎহনবা য়াই। ঙসিসু মহাক্কী ৱাখল্লোন্না নহাশিংগী অথোইবা খুদমবু দেমোক্রেতিক ভেল্যুগা লোইননা শাফোংলকপা য়াই। দেমোক্রেতিক ওইদবা লম্বী অদু মহাক্না শোক্লুবগী মথৌ তারোই।
ঐহাক্না তশেংনা নীংশিংলি, মহাক্না প্রধান মন্ত্রীগী ফমদগী রিজাইন তৌরমদাইদা, দিল্লী অসিদা আই.বিগী পুলিস অমনা মরম ওইদুনা কাং খোং চাইখি, মালেমদা ইদুনা লৈহৌরগনি মদুদু পুলীসকী মীওই অমনা মরম ওইদুনা সরকার কায়বা য়াই।
নুমিৎ অদু ঐহাক নাগপুরদা লৈখি, মফমদুদা অতলজী, আদবানীজীগী প্রোগ্রাম অমা লৈখি। অদুবু মখোয়গী ফ্লাইত অদু কোন্না লাক্কদবনি, ঐহাক হান্না য়ৌরম্মি। ঐহাক্না লৈরিবা মফম অদুদা চন্দ্রশেখরজীগী ফোন লাকখি। ঐহাক্না ফোন পায়খৎখি, মহাক ফোন্দা লৈরম্মি। মহাক্না হায়রকখি – ভাই, গুরুজী কদায়দা লৈবগে? ঐহাক্না হায়খি সাহব, হৌজিক ফাওবদি মহাক্কী ফ্লাইত য়ৌরক্ত্রি, য়ৌরকপদা পুংমুক চংলবা য়াই। মহাক্না হায়রকখি – ঐহাক ঙায়রি, খুদক্তা ঐহাক্কা ৱারী শান্নহল্লু অদুগা ঐহাক ফম থাদোক্লগে হায়না ৱারেপ লৌরে হায়না মফমদা তম্বীয়ু, অদুবু ঐহাক মহাক্কা ৱারী শান্নবা পামই।
দিল্লীদা থৌদোক থোকপা মতম অদু, নুমিৎ অদুদা অতলজী নাগপুরদা লৈখি, ঐহাক থৌরম অদুগী শিল লাংনবগীদমক মফম অদুদা য়ৌরকখিবনি, অদুবু চন্দ্রশেখরজী মতম অদুদসু, গুরুজী হায়না কৌরিবা মীশক অদুদা, মশাগী অরোইবা ৱারেপ লৌদ্রিঙৈ মাংওইননা মহাক্কা য়াম্না ৱারী শাননীংবা ফাওখি।
অসিগুম্লবা মগুন কয়া অমগা লোইননা, লৈবাক অসিগীদমক মপুন্সি পুম্বা, মখল অমরোমদা লৈবাক অসিগী অতোনবা জাৎ, লাইরবা, নৈহৎপীরবা, তুহৎপীরবশিংগী অৱা অনা অদু মশাদা লোইনদুনা মীওই অমনা চহী ৪০ ফাওবা মহাক্কী নহা ওইরিঙৈ মতম পুম্বা মফম অমদা কত্থোকখি, এম.পি. ওইনা। অদুগুম্লবা মফম অসিদা ঙসি ঐখোয়না ৱাফমশিংগা লোইননা অমুক হন্না নীংশিংজরি, অমুক হন্না হিংগৎহল্লে। মঙোন্দগী থৌনা লৌরদুনা ঐখোয়সু লৈবাক্কী মীচম প্রজাগীদমক করিগুম্বা খরা তৌরসি। মসিনা মফমদা কৎপা অশেংবা ইকাই খুম্নবা ওইগনি।
ঐহাক্না অমুক হন্না হরিবংশজীবু থম্মোই শেংনা হন্না-হন্না নুংঙাইবা ফোংদোকচরদুনা মহাক্কী ইমুং মনুংবুসু নীংশিংলদুনা ঐহাক্কী ৱাফম লোইশিনজরি।
থাগৎচরি।
