মরূপ-মপাংশিংবু থুরুমজরি!
মীখলগী মতুং, ঙসি নৌনা শেম্লবা লোক সভাগী অহানবা মীফম পাংথোক্লি। অনৌবা মরূপ কয়া অমা মশক তাক্নবা খুদোংচাবা অমসু ফংলে অমদি অনৌবা মরূপশিং য়াওরকপা অসিদা মখোয়দা অনৌবা লিংজেল, অনৌবা থৱাই য়াওবা অমসুং অনৌবা মঙলানশিংশু য়াওরি। ভারতকী দেমোক্রেসীগী মগুনশিং অদু করিনো? করম্বা থৌনানো? মীখল খুদিংমক্তা ঐখোয়না মদুগী এক্সপিরিয়েন্স লৈরি। নীং তম্লবা মতুং পর্লিয়ামেন্তকী মীখলদা খ্বাইদগী ৱাংনা ভোৎ থাদখিবা, নুপী মীহুৎ খ্বাইদগী য়াম্না খল্লকপা। মমাংগা য়েংনরুবদা নুপী ভোত্তর মশিং য়াম্না ভোৎ থাদখিবা, মগুন কয়া অমনা থল্লবা মীখল ওইখি। চহী তরাগী খুজিং কয়াগী মতুংদা সরকার অমনা অনিরক শুবা ওইনা মপুংফানা মেজোরিতী ওইবগা লোয়ননা মমাংদগী হেনবা সীৎ মশিংগা লোয়ননা মীয়াম্না সেবা তৌনবা খুদোংচাবা পীবীরি। হৌখিবা চহী মঙাগী ঐখোয়গী এক্সপিরিয়েন্সতা হাউস অসি অফবা এনভাইরনমেন্ত অমদা মথৌ তৌবা মতমদা লৈবাক্কী য়াইফনবা অফবা ৱারেপসু লৌখি। ঐখোয়না ঐখোয়গী খোংচৎ অসি সবকা সাথ সবকা বিকাসকা লোয়ননা হৌখি অদুবু লৈবাক অসিগী মীয়াম্না সবকা সাথ সবকা বিকাসকী মনুংদা অঙকপা ফংনা থাজবনা থলহল্লে অমদি থাজবা অদু পুরদুনা ঐখোয়না মীচম মীয়ামগী আশা অদু মপুং ফাহন্নবা ৱাশকপগা লোয়ননা মাংলোমদা চংশিন্নবা হোৎনগনি।
দেমোক্রেসীদা, ওপোজিসন লৈবা, ওপোজিসন্না এক্তিব ওইবা, ওপোজিসনগী চপ চাবা মতিক মগুন লৈবা অসি দেমোক্রেসীগী য়াওদবা য়াদ্রবা মওং মতৌনি অমদি ওপোজিসনগী মীওইশিংনা মশিংগী অৱাবা অদু থম্লোই হায়বা ঐহাক্না থাজবা থম্লি। লৈবাক মীয়াম্না মখোয়দা পীরিবা মশিং অদু ওইরবসু ঐখোয়গীদমক্তদি মখোয়গী ৱাহৈ পুম্নমক মগুন লৈ। অদুগা ঐখোয়না চৌক্রী অদুদা ফম্লিবা অসি এম.পি. ওইনা ফম্লিবনি, মতম অদুদা পক্স অমসুং বিপক্সতগী হেন্না নিশপক্সকী স্পিরিৎ অদু য়াম্না মরু ওই। অমদি ঐহাক্না থাজবা থম্লি মদুদি পক্স অমসুং বিপক্স হায়না খায়দোকপগী মহুৎ নিশপক্সকী ৱাখল্লোন্দা মীয়াম্বু য়াইফহনবদা প্রায়োরিতী পীদুনা ঐখোয়না লাক্কদৌরিবা চহী মঙা অসিদা সদনগী চিং লেম্ববু মথকলোমদা পুখৎনবা হোৎনগনি।
ঐহাক্না ময়াম পুম্নমক্কী মফমদসু হায়জরি মদুদি হাউসতা মেম্বর কয়ানা য়াম্না ফজবা ৱাখল্লোনশিং থম্মি, থৱাই য়াওনা খন্নৈ-নৈনৈ, অদুবু অয়াম্বনা মদু ক্রিয়েতিব ওই অমদি মখোয়না তি.আর.পি.গা চুশিন্নদে। অদুবু করি-করিগুম্বা মতমদা অসিগুম্লবা মীহুৎশিংনা তি.আর.পি.গী মথক্তসু খুদোংচাবা ফংগনি। অসিগুম্লবা লোকতন্ত্র অসিদা থৌনা পীবদা ঐহাক্না ময়ামগী মফমদগী চাউনা থজবা লৈরি। হৌরকপদদি অদোম্না থাজবশিং অসি শোইদনমক্কী ফংগনি, অদুবু চহী ৫গী ওইনা ৱাখল্লোন অসি মপাঙ্গল কনখৎহনবদা অদোম্না পোজিতিব ওইবা থৌদাং অমা লৌবসু য়াই। করিগুম্বা পোজিতিব ওইবা থৌদাং লৌরগদি, পোজিতিব ওইবা ৱাখল্লোন্দা পুক্নীং থৌগৎলদি হাউসতসু ময়াম্না পোজিতিব ওইবা মায়কৈদা চৎনীংবা ফাওগনি। অদুনা ঐহাক্না অদোমগী মফমদা বার্তন তৌজরি মদুদি ১৭শুবা লোক সভাদা ঐখোয়না অদুগুম্লবা অনৌবা ইনর্জী, অনৌবা থাজবা, অনৌবা ৱারেপ, অনৌবা মংলানগা লোয়ননা মাংলোমদা চৎলসি। লৈবাক্কী মীচম প্রজাগী অনীংবা অপাম্বশিং মপুং ফানা পাংথোকপদা অৱাৎপা অমত্তা থম্লগুমসি। থাজবা অসিগা লোয়ননা ময়াম পুম্নমকপু হন্না-হন্না থাগৎচরি।
