ঐগী মন্ত্রী মন্দলগী মরূপ দোক্তর হর্ষ বর্ধন; প্রিন্সিপাল সাইন্তিফিক এদভাইজর বিজয় রাঘবন; সি.এস.আই.আর.গী মকোক দোক্তর শেখর সি. মন্দে; সাইন্তিফিক কম্ম্যুনিতীগী অতৈ মীওইশিং; চিং-লেম্লবা নুপা নুপী পুম্নমক!
অদোম পুম্নমক্কী মফমদা নেসনেল ফিজিক্স লেবোরেতরীগী প্লাতিনম জিবিলি পাঙথোকপা অসিদা নুংঙাইবা ফোঙদোকচরি।
ঙসি ঐখোয়গী সাইন্তিস্তশিংনা নেসনেল এতোমিক তাইম-স্কেল অমসুং ভার্তিয়া নিরদেশক দ্রাব্য প্রনালি লৈবাক মীয়ামদা কত্থোক্লি অমদি লৈবাকসিগী অহানবা নেসনেল এনভাইরনমেন্তেল স্তেন্দর্দ লেবোরেতরীগী উরেপ উয়ুংসু তম্লি। অনৌবা দিকেদ অসিদা হৌদোক্লিবশিং অসিনা লৈবাকসিগী থাক ৱাংখৎহল্লগনি।
মরূপশিং,
অনৌবা চহীসিনা অতোপ্পা মায় পাকপা অমসু পুরক্লে। ভারতকী সাইন্তিস্তশিংনা অমখক্তা নত্তনা ভেরত্তা শাবা কোবিদ-১৯গী তিকা অনি পুথোকপদা মায় পাক্লে। মালেমগী খ্বাইদগী চাউবা কোবিদকী তিকা থাবগী থৌরাংসু ভারত্তা হৌগদৌরি। মসিগীদমক্তা লৈবাক অসিনা মহাক্কী তেক্নিক্সিয়নশিং অমসুং সাইন্তিস্তশিংগী থৌদাংগীদমক চাউথোকচরি; লৈবাক মচা পুম্নমক্না অদোমগী লমন তোনশিল্লবনি।
মরূপশিং,
ঙসি অসি ঐখোয়গী সাইন্তিফিক ইন্সতিত্যুসনশিংনা ভেক্সিন শেমবা হৌদুনা কোরোনাভাইরসবু শিংননবা অহিং নুংথিল নাইদনা থবক তৌখিবা অদু নীংশিংবা নুমিৎনি। সি.এস.আই.আর. য়াওনা ইন্সতিত্যুসন খুদিংমক্না শিংনবা খুদিংমক থেংননবা অমদি থেংনরিবা অনৌবা ফীভমদুগী পাম্বৈ পুথোক্নবা পুন্না চঙশিনমিন্নখি। অদোমগী অসিগুম্লবা কত্থোকপা অসিগা লোয়ননা ঙসিদি লৈবাকসিদা লৈরিবা সাইন্তিফিক ইন্সতিত্যুসনশিংগী অনৌবা ইকায়খুম্নবগী ৱাখল্লোন অমা থোরক্লি। ঙসি ঐখোয়গী নহাশিংনা সি.এস.আই.আর.গুম্বা ইন্সতিত্যুসনশিং অসিবু খঙবা পাম্লক্লি। মরম অসিনা ঐনা পাম্বদি সি.এস.আই.আর.না লৈবাকসিগী মহৈরোয় অমদি মহৈ তম্ফমশঙ কয়াগা পাউ ফাওনদুনা অনৌবা মীরোলসিদা অদোম্না কোরোনাগী মতমদা থেংনখিবা কয়াদু তাথোক তাশিন তৌহন্নিংই। মসিনা লাক্কদৌরিবা হয়েংগীদমক অনৌবা মীরোলগী নহা ওইরিবা সাইন্তিস্তশিং শেমগৎপদা মতেং ওইগনি অমদি মখোয়বু পুক্নিং থৌগৎকনি।
মরূপশিং,
ঙাইহাক্কী মমাঙদা হৌখিবা চহী ৭৫ হেনবসিদা অদোমগী মায় পাকপশিং শিংথানখি। চহীশিংসিদা ইন্সতিত্যুৎ অসিদগী মমীং লৈরবা মীওই কয়ানা লৈবাকসিগী থৌগল তৌখি। মফমসিদগী থোরকখিবা পাম্বৈশিংনা লৈবাকসিগী লম্বী য়াৎখি। সি.এস.আই.আর. এন.পি.এল.না সাইন্তিফিক ইভোলুসন অমসুং লৈবাকসিগী চাউখৎপগী চাং ওনবদা অচৌবা থৌদাং লৌখি। ঙসি মফমসিদা লৈবাকসিগী হৌখিবা চহীশিংদা পুরকখিবা মায় পাকপশিং অমদি তুংগী শিংনবশিং খন্ন-নৈননবা কনক্লেব অমা পাঙথোক্লি।
মরূপশিং,
ঐখোয়না হঙ্গৎনা য়েংবা মতমদা মসি লোইলম লৈঙাক্তগী নান্থোরক্লিবা ভারতপু নৌনা শেমগৎনবা থৌরাং ওইনা হৌরকখি। মতমগী মতুং ইন্না অদোমগী থৌদাং পাকথোক চাউথোরকখি; হৌজিক্তি অনৌবা পান্দম অমদি অনৌবা পন্থুংশিং লৈবাকসিগী মাঙদা তাদুনা লৈরে। লৈবাকসিনা ২০২২দা নীং তম্বগী চহী ৭৫ মপুং ফারগনি অমদি ২০৪৭দা নীং তম্বগী চহী ১০০ মপুং ফারগনি। মতম অসিদা ঐখোয়না মরোমদোম লেপচবা ভারত অমগী অনৌবা ফিরেপ্পু ৱাখলদা থমদুনা অনৌবা স্তেন্দর্দ, অনৌবা পাদমশিং থমগদবনি।
মরূপশিং,
সি.এস.আই.আর.-এন.পি.এল. অসি লৈবাকসিগী মতম পানরিবনি হায়বদি ভারতকী মতম পাবগী সিস্তেমবু য়েংশিল্লিবনি। মতমগী থৌদাং অদোমগী মফমদা লৈবা মরম্না অদোমগী মতমসু হোংদোকপা মথৌ তারে। অনৌবা মতম অমদি অনৌবা তুংগী ফীভমগী অহৌবা অদোমগী মফমদগী হৌরক্কদবনি।
মরূপশিং,
ঐখোয়গী লৈবাক্না হৌখিবা চহীশিংদা ক্বালিতী অমসুং মিজরমেন্তকী লমদা মপানগী স্তেন্দর্দশিংদা তাংদুনা লাক্লি। অদুবু দিকেদ অসিদদি ভারতনা মশাগী ওইবা স্তেন্দর্দ ফংননবা হোৎনগদবনি। দিকেদ অসিদা ভারতকী খোঙজেল, ভারতকী চাউখৎ খোঙজেল, ভারতনা হৌগৎলকপা, ভারতকী মমি, ভারতকী থৌনা অমদি ঐখোয়গী মতিং শেমগৎপগী ফীভম ঐখোয়গী স্তেন্দর্দনা লেপকদৌরিবনি। লৈঙাক্কী অমদি লনাইগী সেক্তর অনিমক্তা সর্ভিস অমসুং পোত্থোক্কী মতিক ঐখোয়গী ক্বালিতী স্তেন্দর্দনা খঙহনবা মথৌ তাই। মসিখক্তনা ভারত অমসুং ভারতকী পোত্থোকশিং কয়া য়াম্না মপাঙ্গল কনবগে হায়বদু মালেমগী মফমদা লেপকদৌরিবনি।
মরূপশিং,
মেত্রোলোজী, মীচম অমগী লোনদা হায়রগনা মিজরমেন্তকী কাংলোন হায়বনি। মসি সাইন্তিফিক ওইবা মায় পাকপা অমগী য়ুম্ফমসু ওইরি। থিজিন হুমজিনবগী থবক অমত্তাএ মিজরমেন্ত য়াওদনা চঙশিনবা য়ারোই। ঐখোয়গী মায় পাকপসিফাওবা পথাপ অমদা ওনগদৌরিবনি। মরম অদুনা মেত্রোলোজী হায়বসি অনৌবা মতমগী খোঙলৈগী য়ুম্বী ওইরি। অদোমগী থৌওং হেক ফরিবমখৈ মেত্রোলোজীসু ফগদৌরিবনি। অদুগা লৈবাক অমগী মেত্রোলোজীদা থাজনিংঙাই ওইবা হেল্লিবমখৈ মালেমসিদা লৈবাক অমগী থাজনিংঙাইগী চাংসু ৱাংগদৌরিবনি। মেত্রোলোজী হায়বসি ঐখোয়গী মিংশেলগুম্বনি। মেত্রোলোজীনা মালেমসিদা ঐখোয়গী পোত্থোকশিং কদায়ৱাইদা লৈরিবগে নৎত্রগা করম্বা মওংদা ফীভম ফগৎহনবা মথৌ তাবগে হায়বদু খঙবা ঙমহনগদৌরিবনি। অসুম্না ইশানা য়েংশিনজবসি মেত্রোলোজীখক্তনা ঙমগদৌরিবনি।
মরম অসিনা,
ঙসি লৈবাকসিনা আত্ম নিরভর ভারত অভিয়ানগী ফিরেপকা লোয়ননা মাঙদা চঙশিনবা মতমদা মসিগী পান্দম অসিদা মশিং অমসুং মতিক অনিমক য়াওই হায়বসি ঐখোয়না নীংশিংগদবনি হায়বদি স্কেল অমসুং স্তেন্দর্দ অনিমক থোং মান্ননা হেনগৎহনগদবনি। ঐখোয়না মালেমসিদা ভারতকী পোত্থোকশিংনা থলহনবখক নত্তনা ভারতকী পোত্থোকশিং লৈরিবা মীপুম খুদিংমক্কী থম্মোয়বুসু খুদুম চনগদবনি। ভারত্তা শাবা পোত্থোকশিং মালেমগী ওইনা দিমান্দ লৈহনবতা নত্তনা মালেমনা য়াবা পোত্থোকসু ওইহন্নবা ঐখোয়না হোৎনগদবনি। ঐখোয়না ব্রান্দ ইন্দিয়াবু বশিং অমসুং থাজনিংঙাই ওইবা মওংদা মপাঙ্গল কনখৎহনগদবনি।
মরূপশিং,
হৌজিক ভারতনা মায়কৈ অসিদা য়াঙনা চঙশিল্লিবসিদা ঐ হরাওই। ঙসি ভারত অসি মশাগী নেভিগেসন সিস্তেম লৈজবা লৈবাকশিংগী মরক্তা অমা ওইরে। ভারতনা ফীভমসি নাভিক্কা লোয়ননা উৎলে। ঙসি মায়কৈ অসিদা অচৌবা খোঙথাঙ অমসু লৌখৎলি। ভার্তিয়া নিরদেশক দ্রাব্য (নেসনেল এতোমিক তাইমস্কেল) ঙসি ফোঙদোক্লিবা অসিনা ঐখোয়গী ইন্দস্ত্রীশিংবু মতিক লৈবা পোত্থোকশিং পুথোকপদা পুক্নিং থৌগৎলগনি।
চীঞ্জাক, অচাথাউ, মিনরেল, হেভী মেতেল, তিল্হাৎ হিদাক, হিদাক লাংথক অমদি ফিরোলনচিংবা তোঙান তোঙানবা সেক্তরশিং মখ,য়গী ‘সর্তিফাইদ রিফরেন্স মেতরিএল সিস্তেম’ মপাঙ্গল কনখৎহন্নবা য়াঙনা চঙশিল্লি। হৌজিক ঐখোয় ইন্দস্ত্রীশিংনা রিগুলেসনদা য়ুম্ফম ওইবা মওংগী মহুত্তা পোত্থোক শীজিন্নরিবশিংদা য়ুম্ফম ওইবা মওং অমদা চঙশিনবগী ফীভম অমদা চঙশিল্লক্লি। অনৌবা স্তেন্দর্দশিং অসিগা লোয়ননা লৈবাক শিনবা থুংনা দিস্ত্রিক্তশিংগী লমদমদুগী পোত্থোকশিং মালেমগী ওইবা মশক হেনগৎহন্নবা কেম্পেন অসিনা অনৌবা ইনোৎ অমা হাপ্লগনি। মসি অখন্ননা ঐখোয়গী এম.এস.এম.ই. সেক্তরশিংদা চাউনা খুদোংচাবা পীরগনি। মপান লৈবাকশিংদগী ভারত্তা লাক্লিবা অচৌবা মেনুফেকচরিং কম্পেনীশিংনা ভারত মনুংদা মালেমগী স্তেন্দর্দকী লোকেল সপ্লাই চেন অমা ফংলগনি। মসিগী মথক্তা থাদোকখিবা অমদি পুশিল্লকপা অনিমক্কী অনৌবা ক্বালিতী স্তেন্দর্দসু লৈহল্লগনি। মসিনা ভারতকী পোত্থোক শীজিন্নরিবা মীওইশিংদা অফবা ক্বালিতীগী পোত্থোকশিং ফংহল্লগনি অমদি এক্সপোর্তরশিংদসু খুদোং চাদবা থেংনররোই। মসিনা তাকপদি ঐখোয়গী পোত্থোকশিং অমদি পুথোকপগী মতিং হেন্না ফরিবমখৈ ভারতকী শেন্মিৎলোনসু মপাঙ্গল কনখৎলক্কনি হায়বনি।
মরূপশিং,
করিগুম্বা অদোম্না হৌখিবা মতমদগী হৌজিক ফাওবগী লৈরিবা লৈবাক অবগী খোঙচৎ য়েংলগদি সাইন্স অমসুং তেক্নোলোজিগী খুমাঙ চাওশিল্লিবা লৈবাকশিংনা খোঙজেল য়াঙনা চাউখৎ লমজেলদা মাঙ থারি। মসি সাইন্স, তেক্নোলোজী অমদি ইন্দস্ত্রীগী ‘ভেলু ক্রিএসন সাইকল’নি। সাইন্সনা অনৌবা পুথোক্তুনা তেক্নোলোজী ওইনা শেমগৎলকই। তেক্নোলোজীনা ইন্দস্ত্রী শেমগৎলি। ইন্দস্ত্রীনা অমুক অনৌবা থিজিন হুমজিনবগীদমক সাইন্সতা শেল থাদৈ অমদি খোঙলৈ অসিনা অনৌবা ওইথোকপা য়াবশিংগী মায়কৈদা পুদুনা চৎলি। সি.এস.আই.আর. এন.পি.এল.না ভারতকী ভেলু সাইকল অসিবু পাকথোক চাউথোকহনবদা মরুওইবা থৌদাং লৌই। ঙসি লৈবাকসিনা মরোমদোম লেপচবা ভারতকী পান্দমগী মায়কৈদা চঙশিল্লিবা মতমসিদা সাইন্সতগী মাস মেনুফেকচরিং ফাওবগী ভেলু ক্রিএসন সাইকল অসিগী মরুওইবা হেনগৎলক্লি। মরম অদুনা মসিদা সি.এস.আই.আর.না হেন্না চাউবা থৌদাং লৌবা মথৌ তাগনি।
মরূপশিং,
সি.এস.আই.আর. এন.পি.এল.না ঙসি ভারতপু নেনো সেকেন্দ ১ ওনবা ঙমহনগদৌরিবা হায়বদি সেকেন্দ অমগী শরুক বিলিয়ন থোকপগী অমা ওনবদা ভারতপু মরোমদোম লেপচবা ঙমহল্লিবা নেসনেল এতোমিক তাইমস্কেল লৈবাক্কী মফমদা কত্থোক্লি। নেনো-সেকেন্দ ২.৮কী চাংদা চুম্না ওনবা ঙম্বগী মায় পাকপা অসিমক অচৌবা মতিং অমনি। হৌজিক্তি ঐখোয়গী ইন্দিয়ন স্তেন্দর্দ তাইম অসি ইন্তরনেসনেল স্তেন্দর্দ তাইমবু নেনোসেকেন্দ ৩গী মখাদা চুম্না ওনবা ঙম্লে। মসিগা লোয়ননা আই.এস.আর.ও. য়াওনা খ্বাইদগী মায়জিল থাবা তেক্নোলোজীগী লমদা থবক তৌরিবা ঐখোয়গী ইন্সতিত্যুসন পুম্নমক্না মসিদগী চাউনা কান্নবা ফংলগনি। বেঙ্কিং, রেলৱে, ঙাকশেল, হকশেল, তেলিকোম, ৱেদর ফোর-কাস্ত, অমসুং দিজাস্তর মেনেজমেন্তনচিংবা তোঙান তোঙানবা সেক্তরশিংগী অনৌবা তেক্নোলোজীশিং মসিদগী কান্নবা ফংলগনি। মসিগী মথক্তা মসিনা ইন্দস্ত্রী ৪.০গীদমক ভারতকী থৌদাং মপাঙ্গল কনখৎহল্লগনি।
মরূপশিং,
ঙসিগী ভারতনা মালেম অসিবু অকোয়বগী ফীভমগী মতাঙদা লমজিংদুনা চৎলি। অদুবু ঐখোয়না নুংশিৎকী ক্বালিতী অমসুং মৈখু থাদোকপগী চাং ওন্ননবা তেক্নোলোজী অমসুং খুৎশু-খুৎলায়শিংগী লমদা অতোপ্পদা তাংদুনা লৈরি। ঙসি ঐখোয়না হীরমসিগী মতাঙদসু ইরোমদোম লেপচবা ঙম্ননবা অচৌবা খোঙথাঙ অমা লৌখৎলে। মসিগা লোয়ননা ভারত্তা পোলুসন থেংননবা হেন্না হোঙবা অমদি হেন্না কান্নবা সিস্তেম অমা শেমগৎলগনি। অদুগা মসিনা নুংশিৎকী ক্বালিতী অমসুং মৈখু থাদোকপগী চাং ওন্ননবা তেক্নোলোজীগী লমদা মালেমগী কৈথেলদা ভারতকী শরুক হেনগৎহনবদা মতেং ওইহল্লগনি। ঐখোয়গী সাইন্তিস্তশিংনা চোকথবা নাইদনা হোৎনরিবা অসিনা ঙসি ভারতনা ফীভম অসি ফংবা ঙম্লিবনি।
মরূপশিং,
খুমাঙ চাওশিল্লিবা খুন্নাই খুদিংমক্তা থিজিন হুমজিনবগী পুন্সি অসি অচমবা মওং অমদি অপনবা লৈতবা থৌওং ওইরি। থিজিন হুমজিনবগী শাফুনা লল্লোন ইতিক অমদি খুন্নাইদসু ইনোৎ পীরি। থিজিন হুমজিনবা হায়বসি ঐখোয়গী ৱাখল লৌশিং অমদি খঙজিনবগী মতাঙদসু কান্নরি। থিজিন হুমজিনবগী থবক অমা পায়খৎপদা মদুনা করমবা মায়কৈদা চৎকদগে নৎত্রগা মদুবু তুংদা করমবা মতাঙদ শীজিন্নগদগে হায়বসিগী মথক্তা থিজিন হুমজিনবা অমদি অনৌবা ৱাখল লৌশিং অসি কৈদৌঙৈদসু লেম্না মাঙদে হায়বা ঐখোয়না তত্তনা থেংনৈ। পুৱারীদা মসিগুম্বা খুদম কয়া লৈখ্রে, জিনেতিক্সকী মপা মেন্দেলগী থবক মহাক্না লৈখিদ্রবা মতুংদা মীয়াম্না শিংথানরকখি। মালেম অসিনা নিকোলা তেস্লাগী থবক্কী মতিং কাইনথংদা খঙনরকখি। থিজিন হুমজিনবগী থবক কয়া অমা পাম্লিবা পান্দমদুদা নৎত্রগা ঐখোয়না চৎলিবা মায়কৈদুদা মপুং ফাবা ওইদে। অদুবু হায়রিবা থিজিন হুমজিনবগী থবক অদুনা অতোপ্পা সেক্তর খরদা পুম্নৌ নৌবা লম্বী অমা পীবা নৎত্রগা অনৌবা মওং অমা পুথোরকপসু য়াই। খুদম ওইনা জগদিশ চন্দ্র বোসনা প্রেসিদেন্সী কলেজ, কোলকতাদা মাইক্রোৱেবকী থিওরী পুথোকখি। সার বোসনা মদুবু লল্লোন ইতিক্কী মায়কৈদা চঙশিনখিদে অদুবু ঙসিদি রেদিও কম্ম্যুনিকেসন সিস্তেম অসি মদুগা চপ মান্নবা ৱাখল্লোন্দা য়ুম্ফম ওইদুনা শীজিন্নরি। মালেমগী লাঞ্জাওগী মতমদা লান্মীশিংগী মপুন্সি কন্নবা থিজিন হুমজিনখিবা অদুনা তুংদা তোঙান তোঙানবা সেক্তর কয়াদা য়াওল পুরকখি। দ্রোনশিং অসি লানগীদমক পুথোকখিবনি। অদুবু ঙসিদি দ্রোনশিং অসি ফোতো কাপ্পা অমদি ফোতোগ্রাফীদসু শীজিন্নরি।
অসুম্না ঙসিদি ঐখোয়গী সাইন্তিস্তশিং, মরুওইনা নহা ওইরিবা সাইন্তিস্তশিংনা থুজিন হুমজিনবগী মহৈশিং অতোপ্পা হীরমশিংদা শীজিন্নবা য়াবগী মতাঙদা চঙশিনবা মরু ওইরি। মখোয়না মতম পুম্নমক্তা মখোয়না থিজিল্লিবা অদুনা মখোয়গী সেক্তরগী ৱাংমদা কমদৌনা শীজিন্নবা য়াগদগে হায়বসি খনগদবনি।
মরূপশিং,
অপিকপা থিজিন হুমজিনবগী থবক অমনা মালেমগী তুংগী পুন্সিদা কমদৌনা অহোংবা পুরকখিবগে হায়বগী হকথেংনবা খুদম অমা হায়রগদি ইলেক্ত্রিসিতীনি। ঙসিদি চত্থোক চৎশিন, ঈ-পাউ ফাওনবা, ইন্দস্ত্রী নৎত্রগা ঐখোয়গী নুংতিগী পুন্সি পুম্নমক ইলেক্ত্রিসিতীদা তাংদুনা লৈরি। সেমি-কন্দক্তর অমা পুথোরকপনা মালেম অসিদা অহোংবা কয়া পুরক্লি। দিজিতেলগী য়াওল অমনা ঐখোয়গী পুন্সিবু মশক থোকহল্লি। অসিগুম্লবা অনৌবা তুংগী ফীভমসিদা ঐখোয়গী নহা ওইরিবা রিসর্চরশিংগী মাঙদা ওইথোকপা য়াবা কয়া অমা তাদুনা লৈরি। তুংগী ফীভম ঙসি ওইরিবসিদগী পুমতোপ তোপ্পা অমা ওইগদৌরিবনি। অমদি মায়কৈ অসিদা অদোম্না থিজিন হুমজিনবগী থবক অমা নৎত্রগা অনৌবা পোৎশক অমা পুথোকপা মথৌ তাগনি।
হৌখিবা চহী তরুকসিদা মায়কৈ অসিদা লৈবাকসিনা তুংগী ফীভমগা চুনবা ইকো-সিস্তেম অমা শেমগৎনবা থবক পায়খৎখি। ঙসিদি ভারত অসি মালেমগী ইনোভেসন রেঙ্কিংদা মকোক থোংবা লৈবাক ৫০গী মনুং চল্লে। ঙসি লৈবাকসিদা বেসিক ওইবা থিজিন হুমজিনবগী থবক্তসু মায় ওনশিল্লি ভারতনা মালেমসিদা পির-রিভিউদ সাইন্স অমসুং ইঞ্জিনিয়রিং পব্লিকেসন মশিং খ্বাইদগী য়ামবা অহুমশুবা লৈবাক ওইরি। ঙসি ভারত্তা ইন্দস্ত্রী অমসুং ইন্সতিত্যুসন খুৎশম্ননা চৎমিন্নবগী চাংসু হেনগৎহল্লি। মালেমগী অচৌবা কম্পেনী কয়ানা ভারত্তা মখোয়গী রিছর্স সেন্তর অমসুং ফেসিলিতীশিং লিংখৎলক্লি। হৌখিবা চহীশিংদা হায়রিবা ফেসিলিতীশিং অসিগী মশিংসু হেনগৎলক্লি।
মরূপশিং,
ঙসি ভারতকী নহাশিংগীদমক থিজিন হুমজিনবা অমদি ইনোভেসনগী লমদা পাক চাউরবা ওইথোকপা য়াবা কয়া লৈরি অদুবু ইনোভেসনশিং অসি ইন্সতিত্যুসনেলাইজ তৌবসু চপ মান্ননা মরু ওইরি। ঐখোয়গী নহাশিংনা হায়রিবা অসিবু কমদৌনা ফংগদগে অমদি ইন্তেলেকচুএল প্রোপর্তী ঙাক্তুনা থম্ননবা লম্বীশিং খঙজিনগদবনি। ঐখোয়না নীংশিংগদবা ৱাফমদি ঐখোয়গী পেতেন্ত য়াম্লিবমখৈ পেতেন্তকী কান্নবা হেনগদৌরিবনি, তোঙান তোঙানবা লমশিংদা ঐখোয়না পাক শন্না থিজিন হুমজিনবগী থবক পায়খৎলিবমখৈ ঐখোয়গী শক্তম কনখৎহনগদৌরিবনি; অমদি ব্রান্দ ইন্দিয়াসু চপ মান্ননা মপাঙ্গল কনগদৌরিবনি। 'कर्मण्ये-वाधिकारस्ते मा फलेषु कदाचन', হায়বা লাইৱাসিদগী ইনোৎ অমদি থৌনা লৌদুনা ঐখোয়গী ঐখোয়গী ইথৌদাং লেপ্তনা পাঙথোক্কদবনি। অদুগা সাইন্তিস্তশিংনা হায়রিবা লাইৱা অসিবু মখোয়গী পুন্সিদা নীংথিনা ইন্দুনা চৎলি হায়না ঐনা থাজৈ। মখোয়না হিরি কোনবগী মওংদা লেপোরেতরীদা মখোয়গী থবক্তা পুক্নিং চঙনা লৈ। 'कर्मण्ये-वाधिकारस्ते मा फलेषु कदाचन', হায়রিবা লাইৱা অসিগুম মখোয়না মহৈদা অহেনবা মীৎয়েঙ থমদনা মখোয়গী থবক লেপ্তনা পাঙথোকই। অদোম ভারতকী সাইন্স অমসুং তেক্নোলোজীগী থবক তৌরিবা অমা ওইবখক নত্তনা ভারত মচা করোর ১৩০গী ৱাখল অমসুং নীংজবশিং থুংহন্নবা হোৎনরিবা মীওইশিংনি।
অদোম মায় পাকপা ওইসনু হায়না ঐনা খল্লি।
হায়রিবা থাজবা অসিগা লোয়ননা ঐনা অদোমগী মফমদা অমুক্কা হন্না অনৌবা চহীগী য়াইফ-পাউজেল পীজরি।
অদোমবু থাগৎচরি!
দিসক্লেমর: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখিবনি।
