ভারত ইমানা য়াইফরে, ভিলাই স্তিল প্লান্ত ছত্তিসগর অসি মহতারীগী কোরাগী মমল নায়দ্রবা রত্ননি। ছত্তিসগর মহতারীগী থৌনা ফবগী খুদম্নি। ছত্তিসগরগী মীয়াম্না পাম্নরবা মুখ্য মন্ত্রী ঐহাক্কী মরূপ দা. রমন সিংহজী, কেন্দ্রদা ঐহাক্কী মন্ত্রী পরিশদকী ঐহাক্কী মরূপ চৌধরী বিরেন্দ্রজী, মন্ত্রী শ্রী মনোজ সিনহাজী, লৈপাক লৈহাও অসিগী মচা কেন্দ্রদা ঐহাক্কী মরূপ ওইরিবা বিষ্ণু দেব সহায়জী, ছত্তিসগর বিধান সভাগী স্পিকর শ্রীমান গৌরিশঙ্কর অগ্রৱালজী, রাজ্য সরকারগী শক্নাইরবা মন্ত্রীশিং অমসুং ছত্তিসগরগী ঐহাক্কী নুংশিজরবা ইচল-ইচে অমসুং ইচিল-ইনাওশিং।
থা অনিগী মমাংদা ঐহাক্না লাক্লম্বা অদুসু তাং ১৪নি, ঙসিসু তাং ১৪নি। অমুক হন্না ময়ামগী আর্শিবাদ ফংজনবগী তাঞ্জা অদু ঐহাক্না ফংজরে।
ঐহাক্না এপ্রিলগী তাং ১৪দা লাকখিবা অদুদা লমদম অসিগী লৈপাক লৈহাওদগী আয়ুশ্মান ভারত য়োজনাগী অহানবা তাঙ্কক অদু হৌদোকখি। ঙসি থা অনিগী মতুং তাং ১৪ অসিদা ভিলাইদা ময়াম পুম্নমক্কী আর্শিবাদ ফংজনবগী তাঞ্জা অদু ঐহাক্না অমুক হন্না ফংজরে।
ছত্তিসগরগী পুৱারীদা, ছত্তিসগরগীদমক তুংদা হেন্না শক্তি লৈহনগদবা পন্দুপ অমা ঙসি হাপচিল্লে। হৌজিক ঙাইহাক্কী মমাংদা ভিলাইদা নৌনা শেম্দোক শাদোক্তুনা হেন্না পাকথোক চাউথোকহল্লবা স্তিল প্লান্ত, অনিশুবা জগদলপুর এয়ারপোর্ত, ন্যু রাইপুরগী কমান্দ সেন্তর হৌদোকখিবা, মশিং থিঙমদ্রবা দিবেলপমেন্তকী থবকশিং। মসিদসু নত্তনা ভিলাইদা আই.আই.তি কেম্পস শাগৎপা অমদি রাজ্য অসিদা ঙসিদগী ভারত নেৎ ফেজ-২ হৌদোকপনি।
চাউরাক্না লুপা কোতি লিশিং ২২ হেনবা স্কিমশিংগী খুদোল ছত্তিসগরগী নুংশিজরবা ইচিল-ইনাও ইচল-ইচেশিংগী মফমদা ঙসি ঐহাক্না কত্থোকচরি। স্কিমশিং অসিনা মফম অসিদা থবক ফংহন্নবগী অনৌবা খুদোংচাবা লৈরগনি। মহৈ-মশিংগী অনৌবা খুদোংচাবা ফংহল্লগনি। চহি কয়া অসিদা হিন্দুস্থানদা বস্তরগী ৱাফম লাকপা মতমদা নোংমৈ, পিস্তোল অমসুং হিংসাগী ৱাফম লাক্লম্মি। ঙসিদি বস্তরগী ৱা হায়রগদি জগদলপুরগী এয়ারপোর্তকা শম্নহল্লে।
মরূপশিং রাজ্য অসি শেমগৎপগী তুংদা ঐখোয় পুম্নমক্কী নুংশিজরবা অতল বিহারী বাজপায়ীগী মীৎয়েং য়াওরি। ঐহাক্কী ছত্তিসগর মীয়াম্না কন্না হোৎনখিবা অদু য়াওরি। রাজ্য অসি খোংজেল য়াংনা মাংলোমদা চংশিল্লকপা অদু ঐখোয় পুম্নমক্কী নুংঙাইরবা এক্সপরিয়েন্সনি।
অতলজীগী ভিজনবু ঐহাক্কী মরূপ মুখ্য মন্ত্রী রমন সিংহনা কন্না হোৎনদুনা মাংলোমদা পুখৎপীরি। ঐহাক্না মহাক্কা ৱারী শানবা খুদিংগী মহাক্না অনৌবা ৱাখল্লোন অনৌবা স্কিমশিং পুদুনা লাকই। অমদি মদু হৌদোক্তুনা মায় পাকপগী থাজবা অদু মহাক্কী ৱাফম খুদিংমক্তা উবা ফংই।
মরূপশিং, ঐখোয়য় পুম্নমক্না খলে মদুদি চাউখৎপা পুরক্কে হায়রবদি শান্তি, আইন, অমসুং অচম্বা পুন্সি মরু ওই। রমন সিংহনা নাকল অমদা শান্তি, তংদু লৈতাবা, আইন, এদমিনিস্ত্রেসন্দা পুক্নীং থৌগৎলি। নাকল অমরোমদনা দিবেলপমেন্তকী অনৌবা থাক অমা য়ৌনবগীদমক ছত্তিসগরবু মাংলোমদা পুদুনা চৎলি। ঐহাক্না রমনজী অমসুং ছত্তিসগরগী প্রজা কোতি অনি মখায়গী মফমদা তৌবিমল খঙবা উৎচরি। য়াইফা পাউজেল পীজরি।
ইচল-ইচে অমসুং ইচিল ইনাওশিং, লমদম অসি ঐহাক্কী ইফমদা অনৌবা নত্তে। ছত্তিসগর শেমদ্রিঙৈ মতম মধ্য প্রদেশকী শরুক ওইরিঙৈ মতমদা ঐহাক্না লমদম অসিদা তু-হ্বিলরদা লাকখি। সংগথনগী থবক্কীদমক ঐহাক মফম অসিদা লাকখিবনি। মতম অদুদগী হৌরগা ঙসি ফাওবদা ছত্তিসগরদগী লাপথোক্নবা মরম অমত্তা লৈত্রি। ময়াম পুম্নমক্না অসুক য়াম্না নুংশিবীরি। মতম পুম্নমক্তা ময়ামগা শম্নরি। হৌখিবা চহি ২০,২২-২৫দগী ঐহাক্না ছত্তিসগরদা লাক্তবা চহি অমত্তা য়াওরম্লোই। ছত্তিসগরদা ঐহাক্না চৎলুদবা জিলা অমত্তা লৈতে।
ইচল-ইচে অমসুং ইচিল ইনাওশিং, ঙসি ঐহাক্না মফম অসিদা লাক্ত্রিঙৈ মমাংদা ভিলাই স্তিল প্লান্তদা চৎলুই। লুপা কোতি লিশিং ১৮ হেন্না চাদিং তৌদুনা প্লান্ত অসিবু হেন্না মোর্দন ওইবা তেক্নিক অমদি অনৌবা তৌবা ঙম্বশিং হাপচিল্লে। অমদি ঙসি অসিগুম্লবা মোর্দন প্লান্ত অসি শঙ্গাজবগী তাঞ্জা ফংজবা অসি ঐহাক্কী লাইবক ফবনি। তশেংনা হায়রবদা ভিলাইনা স্তিল খক্তা শেম্বদা নত্তনা পুন্সি কয়াবুসু শেম্লি। খুন্নাইবু লৈতেংলি অমসুং লৈবাক অসিবু শেমগৎ-শাগৎলি।
ভিলাইগী অসিগুম্লবা নৌনা শেমদোক শাদোক্লবা স্তিল প্লান্ত অসিনা হৌজিক্তি ন্যু ইন্দিয়াগী ফাউন্দেসনসু স্তিলগুম্না কলহলনবগী থবক তৌরগনি। মরূপশিং ভিলাই অমসুং দুর্গতা স্তিল প্লান্ত লিংখৎলবা মতুং মফম অসিগী শক্তমদা অহোংবা লাক্লিবা অদু ময়াম্না খঙবিরে। মসি উরুবদা ঐহাক্না থাজবা থম্লি মদুদি বস্তরগী নগরদা লিংখৎলিবা স্তিল প্লান্ত অদুনা বস্তরগী মীয়ামগী পুন্সিদা চাউনা অহোংবা পুরক্লগনি।
ইচল-ইচে অমসুং ইচিল ইনাওশিং, দিবেলপমেন্তকী ৱাফম পল্লকপদা, মেক ইন ইন্দিয়াগী ৱাফম পল্লকপদা, স্কিল দিবেলপমেন্ত অসি য়াওদবা য়াদবনি। চহি কয়াদগী ভিলাই অসি মহৈ মশিংগীদমক খঙনৈ। অদুবু মফম অসিদা আই.আই.তিগী অৱাৎপা অদুদি ফাওই।
অদোমগী মুখ্য মন্ত্রী রমন সিংহনা মমাংগী সরকারগী মতমদসু ভিলাইদা আই.আই.তি লিংখৎনবগীদমক লেপ্পা লৈতনা হোৎনরম্মি। অদুবু মখোয়শিং অদু করম্বা মীওইশিংনো হায়বদু ময়াম্না খঙবীরিবা অদুনি। রমন সিংহনা চহি তরা চংনা হোৎনজরকপা অদু অরেম্বা তাখি। অদুবু ঐখোয়গী তাঞ্জা লাকপগা ঐখোয়না খুদক্তা অনৌবা আই.আই.তি মঙা লিংখৎনবা ৱারেপ লৌখি। ঙসি ভিলাইদা লুপা কোতি কয়া চংগদবা মোর্দন আই.আই.তিগী কেম্পস শানবা উরেপ উয়ুং তম্লে।
মরূপশিং, মিনিৎ খরগী মমাংদা ঐহাক্না নহা খরদা লেপতোপ য়েন্থোকপগী তাঞ্জা ফংজখি। ঐহাক নুংঙাইবা ফাওই মদুদি ভারতীয় জনতা পার্তীগী সরকারনা সুচনা ক্রান্তি য়োজনাগী খুত্থাংদা কম্প্যুতর অমসুং তেক্নোলোজী তাকপী তম্বীবদা লেপ্পা লৈতনা পুক্নীং থৌগৎলি। হৌখিবা চহি মরিগী মনুংদা দিজিতেল ইন্দিয়াবু পুক্নীং থৌগৎলি। ছত্তিসগর সরকারনসু স্কিম অসিবু, মদুগী কান্নবা অদু য়ুম-য়ুমদা য়ৌহন্নবগী মায়কৈরোমদা চংশিল্লি।
মমাংদা ঐহাক্না বাবা সাহেব অম্বেদকরগী মপোক কুমওনদা লাকখিবা অদুদা বস্তরবু ইন্তর্নেৎনা কনেক্ত তৌগদবা অদুগুম্লবা প্রোজেক্ত বস্তর নেৎ ফেজ-১ হৌদোক্নবগী খুদোং চাবা ফংখি। ঙসিদগী মফম অসিদা ভারত নেৎ ফেজ-২দা থবক হৌরে। চাউরাক্না লুপা কোতি ২৫০০গী প্রোজেক্ত অসি মথং চহিগী মার্চ থা ফাওবদা লোইশিন্নবা হোৎনগনি। ছত্তিসগরগী পঞ্চায়ৎ লিশিং মরিদা হান্ননা ইন্তর্নেৎ য়ৌহনখ্রে। লেমহৌরিবা লিশিং তরুক ফাওবদি মথং চহিদা য়ৌহল্লগনি।
ইচল-ইচে অমসুং ইচিল ইনাওশিং, ঙসিদি লৈবাক অসি ঈশিং, কংফাল, অতিয়া মখল খুদিংমক্না শম্নহন্নবা কন্না হোৎনরি। মমাংগী সরকারনা লম্বী ফাওবা শেমলমদবা মফমশিং অদু ঙসিদি লম্বী-থোংগা লোয়ননা এয়ারপোর্তসু শেমগৎলে।
হৱাই চপ্পল তোংবা মীওইশিংসু এরোপ্লেন তোংবা ফংবা ঙমহনবা অসি ঐহাক্কী মংলান্নি। ৱাখল্লোন অসিগা লোয়ননা উরান য়োজনা হৌদোক্লে অমদি লৈবাক্কী মফম পুম্নমক্তা অনৌবা এয়ারপোর্তশিং শেমগৎলি। অসিগুম্লবা নীংথিজরবা এয়ারপোর্ত অমা অদোমগী জগদলপুরদা শেমগৎলি। ঙসি জগদলপুরদগী রায়পুর ফাওবগী ফ্লাইতসু হৌদোকখ্রে। হৌজিক্তি জগদলপুরদগী রায়পুর অমদি রায়পুরদগী জগদলপুর ফাওবগী অরাপ্পা অসি পুং তরুক্তগী তরেৎ ফাওবা চংলম্বা অদু সুপ্নগী মিনিৎ ৪০ খক্তা ঙাইরে।
মরূপশিং, হৌজিক্তি ত্রেনগী দব্বাশিংদা চৎথোক চৎশিন তৌরিবা মীওইশিংদগী মশিং হেন্না এরোপ্লেন তোংদুনা চৎলে। মতম অমদা রাইপুরদা নোংমগী ফ্লাইত তরুক খক্তমক লৈরম্মি। হৌজিক্তি রাইপুর এয়ারপোর্ত্তা নোংমদা ফ্লাইত ৫০ পাইথোক পাইশিন তৌরে।
মরূপশিং ঙসিদি ছত্তিসগরনা য়াম্না চাউবা এচিবমেন্ত ফংলে। ন্যু রাইপুর সিতী অসি লৈবাক অসিগী অহানবা গ্রীন ফিল্দ স্মার্ত সিতী ওইরে। মসিগা মরি লৈননা ইন্তিগ্রেতেদ কমান্দ এন্দ কন্ত্রোল সেন্তর শঙ্গাবগী খুদোংচাবা অদু ঐহাক্না ফংজখি।
ঈশিং, মৈ, স্ত্রিৎ লাইৎ, সীৱেজ, ত্রান্সপোর্ত হৌজিক্তি শহর পুম্বা য়েংশিনবগী থবক অসি পীকখ্রবা সেন্তর অমদগী পাংথোক্লি। মোর্দন তেক্নোলোজী অমদি দেতাদা য়ুম্ফম ওইরগা খুদোংচাবশিং অসি ফংলে।
ছত্তিসগরবু চাউখৎতবা, ত্রাইবেলশিংগী জঙ্গলশিংগুম খঙনরম্বা অদু ঙসিদি অদুগুম্লবা ছত্তিসগর অদু লৈবাক অসিদা স্মার্ত সিতীগুম্না খঙনরে। মসিদগী হেন্না চাউথোকচনীংঙাই ৱাফম করি লৈরিবগে।
মরূপশিং ঐখোয়গী স্কিম খুদিংমক্না লৈবাক অসিগী মীপুম খুদিংমকপু ইকায় খুম্নবা, সেক্যুরিতী অমদি সেলফ-রেস্পেক্তকী পুন্সি ফংহন্নবগী মায়কৈদা চংশিল্লি। হৌখিবা চহি মরি অসিদা ছত্তিসগর য়াওনা লৈবাক অসিগী চাউখ্র-চাউখ্রবা মফমশিংদা রেকোর্দ ওইবা মওংদা নহারোলশিংনা মরুওইবা ইচেলদা তিল্লরিবা মসি অচৌবা মরম অমনি।
মখল অমা হেক্তগী হিংসাগী পাউখুম অসি দিবলপমেন্তনি হায়না ঐহাক্না লৌই। দিবেলপমেন্তনা দিবেলপ তৌরবা থাজবনা মখল খুদিংগী হিংসাবু লোইশিলহল্লি। মরম অদুনা কেন্দ্রদা বি.জে.পিনা লুচিংদুনা চৎলিবা এন.দি.এ. সরকার ওইগেরা নত্রগা ছত্তিসগরদা রমন সিংহগী লমজিং মখাদা লৈরিবা ভারতীয় জনতা পার্তীগী সরকার ওইগেরা। ঐখোয়না দিবেলপমেন্তকী খুথাংদা থাজবগী এতমোসফিয়র অমা শেমগৎনবা হোৎনরি।
ইচল-ইচে অমসুং ইচিল ইনাওশিং, মমাংদা ঐহাক্না ছত্তিসগরদা লাকখিবা মতম অদুদা লৈবাক শিনবা থুংনা গ্রাম স্বরাজ কেম্পেন হৌদোকখি। হৌখিবা থা অনি অসিদা কেম্পেন অসিনা য়াম্না কান্নবা ফংলে। কেম্পেন অসি অখন্ননা লৈবাক অসিগী চাউখৎপা ৱাৎলিবা জিলা ১১৫দা চত্থরি। মসিদা ছত্তিসগরগীসু জিলা ১২ য়াওরি। জিলাশিং অসিদা দিবেলপমেন্তকী তোঙান তোঙানবা ৱাফমশিং পুক্নীংদা থমদুনা অনৌবা ইনর্জীগা লোইননা থবক তৌরি। খুঙ্গংদা মীপুম খুদিংমক্কী বেঙ্ক একাউন্ত হাংবা ওইগেরা, গ্যাস কনেক্সন ওইগেরা, য়ুম খুদিংদা মৈগী কনেক্সন ওইগেরা, মীপুম খুদিংবু তিকা থাবা ওইগেরা, মীপুম খুদিংমকপু ইন্সুরেন্স ফংহনবা ওইগেরা, য়ুম খুদিংদা এল.ই.দি. বল্ব ফংহনবা ওইগেরা, মসি পাংথোকপগী থবক চত্থরি।
ছত্তিসগরদা জন-ধন য়োজনাগী মখাদা লাইরবা মীওই কোতি অমগা লাখ কুন্থরাগী বেঙ্ক একাউন্ত হাংদোক্লে। তোইলেৎ লাখ ৩৭ হেন্না শাখ্রে, লাইরবা ইমুং লাখ ২২বু উজ্জ্বলা য়োজনাগী মখাদা লেম্না গ্যাস কনেক্সন পীরি, মুদ্রা য়োজনাগী মখাদা মীওই লাখ ২৬ হেনবদা বেঙ্ক গরেন্তী য়াওদনা লোন পীরে, লৌমী লাখ ১৩না ফসল বিমা য়োজনাগী কান্নবা ফংলে।
ইচল-ইচে অমসুং ইচিল ইনাওশিং, ছত্তিসগরদা মৈ ফংদবা য়ুম লাখ ৭ লৈরি, প্রধান মন্ত্রী সৌভাগ্য য়োজনাগী মখাদা চহি অমা খক্তদা চাউরাক্না য়ুম লাখ ৩.৫দা মৈ ফংহনবগী থবক মপুং ফানা পায়খৎখ্রে।
মরূপশিং, ঐখোয়গী সরকার অসিনা লৈবাক অসিগী ময়ুম লৈজদবা মীপুম খুদিংবু ময়ুম লৈহন্নবা মিশন্দসু থবক তৌরি। হৌখিবা চহি মরি অসিদা লৈবাক অসিগী শহর অমসুং খুঙ্গংগী লমদমশিংদা য়ুম কোতি অমগা লাখ ১৫ হেন্না শেমগৎ-শাগৎলে। প্রধান মন্ত্রী অৱাস য়োজনাগা লোয়ননা মমাংগী সরকারগী মতমদা লোইশিনখিদবা য়ুমশিংসু মপুং ফানা লোইশিন্নবগী থবক পায়খৎলি। ছত্তিসগরদসু চাউরাক্না য়ুম লাখ তরুক শাহনখ্রে।
ঙসি মফম অসিদা কেন্দ্র অমসুং রাজ্য সরকারগী তোঙান তোঙানবা য়োজনা, মমিং পল্লবদা প্রধান মন্ত্রী মাত্রিত্ব বন্দনা য়োজনা, উজ্জ্বলা, মুদ্রা অমদি স্তেন্দ অপ, বিমা য়োজনাগী কান্নবা ফংলবা মীওইশিংদা সর্তিফিকেৎ অমসুং চেক শিন্নবগী তাঞ্জা অদু ঐহাক্না ফংজখি। কান্নবা ফংলবা মীওই পুম্নমকপু ঐহাক্না য়াইফা পাউজেল পীজরি অমসুং তুংগী য়াইফনবগীদমক থৌনীজরি।
মরূপশিং, ঐখোয়গী সরকার অসিনা ত্রাইবেল অমসুং শোত্থরবা মফমশিংদা লৈরিবা মীয়ামগী শেন্থোক হেঙ্গৎহন্নবা অখন্নবা থবক পাংথোক্লি। থা অনিগী মমাংদা ঐহাক্না বিজাপুরদগী বন-ধন য়োজনা হৌদোকখি। মসিগীদমক বন-ধন বিকাস কেন্দ্র হাংদোক্লি। জঙ্গলগী পোত্থোকশিংগী মতিক চাবা মমল কৈথেলদা ফংহন্নবা ৱারেপ লৌরে।
চহি অসিগী বজেৎতা সরকারনা খুঙ্গংগী কৈথেল লিশিং ২২ শেমগৎনবসু লাওথোকখি। অহৌবা ওইনা চহি অসিদা ঐখোয়না কৈথেল লিশিং ৫ শেমগৎলি।
সরকারনা ৱাগা মরি লৈনবা অরীবা আইনদসু অহোংবা পুরক্লে। হৌজিক্তি লৌবুক্তা থারিবা ৱা অদু য়াম্না লাইনা য়োনবা য়াহল্লে। ৱারেপ অসিনা জঙ্গলশিংদা লৈরিবা ইচল-ইচে অমসুং ইচিল ইনাওশিংবু অহেনবা শেন্থোক লৈহন্নবা উপায় অমা পীরে।
ইচল-ইচে অমসুং ইচিল-ইনাওশিং, সরকারনা ত্রাইবেলশিংগী এজুকেসন, সেল্ফ-রেস্পেক্ত অমসুং ইকায় খুম্নবা অদু পুক্নীংদা থমদুনা থবক তৌরি। ত্রাইবেল অঙাংশিংদা এজুকেসনগী থাক ৱাংখৎহন্নবগীদমক লৈবাক পুম্বদা একলব্য বিদ্যালয় হাংদোক্লি।
ইচল-ইচে অমসুং ইচিল-ইনাওশিং, অনৌবা ছত্তিসগরনা ২০২২দা ন্যু ইন্দিয়াগী লম্বী হেন্না পাকথোক-চাউথোকহল্লগনি। ঐহাক্না থাজবা থম্লি মদুদি অদোমগী আর্শিবাদতগী, অদোমগা লোয়ননা চৎমিন্নবনা ন্যু ইন্দিয়াগী ৱাশক অদু শোয়দনমক্কী মপুং ফাগনি। অপাম্বা অসিগা লোয়ননা ঐহাক্না ময়ামবু থম্মোয় শেংনা থাগৎপগা লোয়ননা, ছত্তিসগর সরকারবু থাগৎপগী খোল্লাওগা লোয়ননা মতাং অসিৱাইদা ঐহাক লোইশিনজরে।
হন্না হন্না থাগৎচরি।
