Share
 
Comments
আত্মানির্ভর ভারতকী ৱাখল্লোন অসি ঙসিগী নহারোলগী ৱাখলদা য়াওরি: পি.এম
ভারতনা ওস্ত্রেলিয়াদা ক্রিকেৎ থোইখিবা অসিনা নহা ওইরিবা ভারতকী থৌনা লিংজেল উৎখ্রে: পি.এম
এন.ই.পি.না ঐখোয়গী এজুকেসন সিস্তেম অসি দেতা অমসুং দেতা-এনলাইতিক্সকীদমক্তা শেম শাহল্লগনি: পি.এম.

খুরুমজরি,

অসমগী রাজ্যপাল প্রোফঃ জগদীশ মুখীজী, কেন্দ্রগী এজুকেসন মন্ত্রী, শ্রী রমেশ পোখ্রিয়াল ‘নিশঙ্ক’জী, অসমগী মুখ্য মন্ত্রী, শ্রী সর্বনন্দ সোনোৱালজী, তেজপুর য়ুনিভর্সিতীগী ভাইস চান্সেল্লর, প্রোফঃ ভি.কে. জেনজী, অতোপ্পা ফেকলতীগী মীওইশিং অমসুং তেজপুর য়ুনিভর্সিতীগী মচিন-থৌরবা, খঙ-হৈরবা ঐহাক্কী নুংশিরবা মহৈরোয়শিং, ঙসিদি মহৈরোয় ১২০০ হেনবশিংগী পুন্সিগী খ্বাইদগী মরু ওইবা নুমিৎনি। নখোয়গী ওজা, প্রোফেসর, ইমা-ইপাশিংগী ওইনসু ঙসিগী নুমিৎ অসি য়াম্না অখন্নবা নুমিৎনি। অদুগা খ্বাইদগী মরু ওইবা ৱাফম অমদি ঙসিদগী হৌনা নখোয়গী কেরিয়রগা তেজপুর য়ুনিভর্সিতীগী মিংগা মতম চুপ্পগী শাগোন্নরগনি হায়বা অসিনি। ঙসি নখোয়না নুংঙাইরিবা অদুগা চপ মান্ননা ঐহাকসু নুংঙাইজৈ। নখোয়না ঙসি নখোয়গী তুংগী পুন্সিগীদমক্তা থাজবা ফাওবা অদুগা মান্ননা ঐহাক্নসু নখোয়দা থাজবা থম্মি। নখোয়না তেজপুরদা লৈদুনা তেজপুর য়ুনিভর্সিতী অসিদগী তম্লিবশিং অসিনা অসমগী অমসুং লৈবাক্কী চাউখৎপগী মাইকৈদা অনৌবা থাক্তা য়াঙলবা খোঙজেলদা পুবা ঙমগনি হায়বগী ঐহাক্না থাজবা লৈ।

মরুপশিং,

ঐহাক্কী থাজবা অসিগী মরম কয়া অমা লৈ – তেজপুরগী পু ৱারী ওইরবা মফম অমসুং অরিবা পু ৱারী অসিদগী ফংবা য়াবা ইথিলশিং। অনিশুবদা, নখোয়না তেজপুর য়ুনিভর্সিতীদা তৌরিবা থবকশিং অসিনা থৱাই য়াওবগী মমি অমা তাই হায়না ঐঙোন্দা পাউদমলকখি। অদুগা অহুমশুবদা, নোংপোক থংবা ভারতকী মপাঙ্গল ওইরিবা লমদম অসিগী মীওইশিং, নহাশিংনা লৈবাক্তা থাজবা থমদুনা লৈবাক শেমগৎপগী থবক পাংথোকপা অসিনি।

মরুপশিং,

মনা অমসুং মেদল পীদ্রিঙৈগী মমাংদা য়ুনিভর্সিতী অসিগী ঈশৈ হৌজিক থাদোকখিবা অসিদা তেজপুরগী নীংথিরবা পুৱারীগী মতাংদা শৈথাবগী মমি ঐহাক্না উবা ফংজখি। ঐহাক্না মদুগী মতেক অমা থমজনিংই, মসিগী মরু ওইবা মরম অমদি মসিবু অসমগী মমায় ওইরিবা ভারত রত্না ভুপেন হজারিকানা লেংবীরম্বা ওইবা অদুগীসুনি। মহাক্না অসুম্না ইবীরম্মি –“অগ্রিগদর স্থাপত্য কলিয়া ভোমোরার সেতু নির্মান, গ্যান জ্যোতিমর্য়, সেহী স্থান্তে বিরাজিসে তেজপুর বিশ্ববিদ্যলয়া”। মসিগী ৱাহন্থোক্তি অগ্রিগরগুম্বা মফম লৈবা মফমদা, কলিয়া-ভোমোরা থোং লৈবা মফমদা, লৌশিংগী মঙাল লৈ, তেজপুর য়ুনিভর্সিতী অসি অসিগুম্বা মফমদা লৈ হায়বনি। মসিগী ময়েক পরেং অহুম অসিদা ভুপেনদানা ৱাফম কয়া অমা ফোংদোক্লি। অগ্রিগরগী নিংথৌমচানুপা, নীংথৌমচানুপী উশা অমসুং ভগ্বান কৃষ্ণগা মরী লৈনবা পুৱারী, অসমগী থৌনা ফবা কলিয়া ভোমোরা ফুকানগী মঙলান অসিনা তেজপুরগী ইথিলনি। ভুপেন্দাগা লোয়ননা জ্যোতী প্রসাদ অগ্রৱাল, বিষ্ণু প্রসাদ রাভানচিংবা শক্নাইরবা কয়ানা তেজপুরবু শক্তাক্লি। নখোয়না মখোয়গী পোক্নফম অমসুং থবক পাংথোকফমদা লৈরিবনি, মরম অদুনা নখোয়না মসিগীদমক্তা চাউথোকচবা অমসুং নশাদা থাজবা পুন্সি মহিং অমা হিংবা অসি তসেংনা মশানা তাবা ওইফম থোকপনি।

মরুপশিং,

ঐখোয়গী লৈবাক অসিনা হন্দক্কী চহিসিদা নিং-তম্বগী ৭৫শুবা চহিদা চঙশিল্লক্লি। চহি কয়া মীখা পোনবদগী নিং-তম্বা ফংনবা অসমগী মশিং থীঙমদ্রবা মীওই কয়ানা কত্থোকখি। মখোয়গী মতমদুদা নিং-তম্বা ফংনবগীদমক্তা মপুন্সি কত্থোকখি, নহা ওইবগী পুন্সি কত্থোকখিবা অদুগুম্না নখোয়নসু অনৌবা ভারত অমগীদমক্তা, মরোমদোম লেপচবা ঙম্বা ভারত অমগীদমক্তা, মশক থোকপা থবক পাংথোক্তুনা উৎপা তাবনি। হৌজিক্তগী হৌনা নিং-তম্বা ফংবগী চহি ১০০ শুবা ফাওবগী চহি ২৫-২৬ অসি নখোয়গী পুন্সিগী য়াম্না খুদোংচাবা লৌবা য়াবা মতম্নি। ইং ১৯২০-২১গী নহাশিং, নুপীশিংগী চহিশিং অসি নখোয়গী হৌজিক্কী চহিগা মান্নরমগনি অমসুং মতম অসিদা মখোয়গী মরি মঙলান ওইরমগনি হায়বা অমুক্তং খন্থরগা য়েংউ। মখোয়না করিগীদমক্তা মশাগী পুন্সিবু হিংজরমগনি, করি ফংনবা হোৎনজরমগনি। কোইথোক্না হায়রগদি, চহি ১০০গী মমাংদা লৈরম্বা নখোয়গী চহিগী মীওইশিংনা করি করি তৌনরম্মি অমসুং নখোয়না তুংগীদমক্তা করি তৌফম থোকই হায়বা অসি খঙলবা মতুংদা হৌজিক অসি নখোয়গী সনাগী মতমনি হায়বদা য়াম্না ঙকফম থোক্তে। তেজপুরগী মশেক-মঙাল অসি ভারত অমসুং মালেম পুম্বদা শন্দোকপীয়ু। অসম অমসুং অৱাং নোংপোকপু চাউখৎপগী অনৌবা থাক অমদা পুখৎপীয়ু। ঐখোয়গী সরকারনা হৌজিক লমদম অসিবু চাউখৎহন্নবগীদমক্তা খোঙফম চেৎলিবা অসিদা নখোয়গীসু অনৌবা খুদোংচাবা কয়া লৈরক্লগনি। মসিগী খুদোংচাবশিং অসিবু নীংথিনা শিজিন্নবীয়ু। নখোয়গী নতিক-নগুন অসিনা নখোয়না অনৌবা ৱাখল্লোন খনবা ঙম্বা অমসুং অনৌবা থৌওং পাংথোকপা ঙমগনি হায়বসু তাক্লি।

মরুপশিং,

তেজপুর য়ুনিভর্সিতীগী অতোপ্পা শক্তাকপা পোৎশক অমদি মসিগী ইন্নোভেসন সেন্তর অসিনি। নখোয়গী গ্রাসরুৎ ইন্নোভেসন অসিনা ভোকেল ফোর লোকেলবুসু অনৌবা মাইওন অমসুং মপাঙ্গল অমা পীরি। মসিগী ইন্নোভেসন সেন্তর অসিনা শিংনবা কয়াগী ৱারোইশিন পুরকপদা তেংবাংলি অমসুং অনৌবা থোঙ কয়া অমা হাংলি। নখোয়গী কেমিকেল সাইন্সকী বিভাগনা থক্নবা ঈশিংবু হেন্না শেংহন্নবা শেল য়াম্না চঙদবা অরায়বা তেক্নোলোজী অমদা থবক পায়খৎলিয়া হায়না ঐঙোন্দা পাউদম্বীরে। মসিনা অসমগী খুঙ্গং কয়া অমদা কান্নবা পীরি। মসিদা নত্তনা মসিগী অনৌবা তেক্নোলোজী অসি ছতিসগর, ওরিশা, বিহার, করনাতকা অমসুং রাজস্থান্নচিংবা রাজ্য কয়া অমদসু য়ৌরে হায়না ঐঙোন্দা পাউদমলকই। মসিনা হায়বদি নখোয়গী থবক অসি মৈগুম্না মফম কয়াদা শন্দোক্লক্লি হায়বনি। ভারত্তা অসিগুম্বা তেক্নোলোজী চাউখৎলকপা অসিনা জল জীবন মিসনগী পান্দমশিংদসু য়াম্না মপাঙ্গল হাপকনি।

মরুপশিং,

ঈশিংগী হীরম খক্তদা নত্তনা, নখোয়না অমোৎ-অকাইবু ইনর্জীদা ওন্থোক্নবা খোঙথাং অমা পায়খৎলিবা অসিনা অচৌবা চৈথেং অমসু পীবা হৌরে। লৌরোক্কী অরেম-অখাক অসি ঐখোয়গী লৌমী অমসুং অকোয়বগী য়াম্না চাউবা শিংনবা অমা ওইদুনা লাক্লি। নখোয়গী য়ুনিভর্সিতী অসিদা বাইওগ্যাস অমসুং ওর্গানিক ফর্তিলাইজরগা মরী লৈনবা য়াম্না হোঙবা অমসুং নীংথিনা থবক তৌবা তেক্নোলোজীগী মতাংদা থবক পায়খৎলিবা অসিনসু লৈবাক অসিগী খ্বাইদগী চাউবা শিংনবা অমগী ৱারোইশিন পুরকপসু য়াই।

মরুপশিং,

তেজপুর য়ুনিভর্সিতীনা অৱাং-নোংপোক লমদমগী বাইও-দাইভর্সিতী অমসুং ইনাক খুল্লবা হেরিতেজপু ঙাক-শেন্দুনা থম্নবা থবক পায়খৎলি হায়না ঐহাক্কী ইফমদা পাউদম্লকখি। লমদম অসিগী ত্রাইবেলশিংগী মাঙখিগদরা হায়না পাখৎনরিবা অসিগী মতাংদা লোলশিং অসিবু দোক্যুমেন্ত তৌবগী ফরবা থবক অমা পায়খৎলি। মতৌ অসুম্না, লাইনীংবা শ্রীমন্ত শঙ্কর্দেবকী পোক্নফম লমদম ওইরিবা নাগাওগী কুইরবা মতমগী উদা হক্তুনা লৈবা বাতাদ্রব থানগী ঙাক-শেনবা ওইরো, নত্ত্রগা মীখা পোল্লিঙৈ মতমদা ইরম্বা অসমগী লাইরিকশিংগী দিজিতেল কোপী ওন্থোকপা ওইরো, নখোয়না শীংথানিংঙাই ওইরবা থবক কয়া পায়খৎলি। মীওই অমতনা ভারতকী নোংপোক্কী মফমদা লৈবা মফম অমনা অসিগুম্বা থবক কয়া পাংথোক্লি তাবদা চাউথোকচবা পোকচগনি। নখোয়না তসেংনা নীংথিবা থবক কায় পায়খৎলি।

মরুপশিং,

ঐহাক্না ৱাফম কয়া অসি তারবা মতুংদা অসিগুম্বা লোকেলগী ওইবা তঙাই ফদবশিং অসিগী মতাংদা থবক তৌবগী ইথিল অসি কদায়দগী লাকপনো হায়না ইথন্দা খঞ্জরকই। মসিগী পাউখুমসু তেজপুর য়ুনিভর্সিতীগী কেম্পস্তা লৈরে। খুদম ওইনা হায়রবদা নখোয়গী হোস্তেল। চরাইদেব, নীলচল, কঞ্চনজংঘ, পাৎকাই, ধান্সিরী, সুবনসিরী, কোপিলী হায়রিবশিং অসি চিংজাউ অমসুং তুরেলশিংগী মমিংনি। মসি মমিং খক্তসু নত্তে। মসি পুন্সিরোল অমগী অহিংবা ইথিল অমনি। পুন্সি লম্বীদা খুদোংথিবা, চিংজাউ কয়া মায়োক্নবা তাই, তুরেল কয়া অমা লানবা তাই। মসি অমুক্তং পাংথোক্কদবা থবকসু নত্তে। ঐখোয়না চিংজাউ অমা লানবা মতমদা অতোপ্পা চিংজাউ অমগী মাইকৈদা অমুক চৎলি। থেংনরুবা থৌদোক খুদিংদগী লৌশিংসু অদুমক ফংই, খঙ-হৈবসু হেনগৎলকই অমসুং অনৌবা খুদোংচাদবা অমা থেংনবদা করম্না মায়োক্নগদগে হায়বগী ৱাখল্লোনসু লাকই। মতৌ অসুম্না, তুরেলনসু ঐখোয়দা পরা কয়া অমা তম্বী। তুরেল অসি অপিকপা ইচেল কয়াদগী ওইরকই অমসুং অকোনবদা সমুদ্রদা তারগা লোইশিল্লি। ঐখোয়সু পুন্সি অসিদা তোঙান-তোঙানবা মীওইশিংদগী লৌশিং তানগদবনি, তমগদবনি অমসুং মদুগী মতুং ইন্না তুং লমচৎকীদমক্তা চত্তুনা ঐখোয়গী পান্দম ফংনবা হোৎনগদবনি।

মরুপশিং,

করিগুম্বা ঐখোয়না মসিগী ৱাখল্লোন অসিগা লোয়ননা চৎলবদি, অৱাং-নোংপোক লমদম অসিনা লৈবাক চাউখৎপদা মতেং পাংবা ঙমগনি। কোরোনাগী মনুং অসিদা আত্মানির্ভর ভারত হায়বা ৱাহৈ অসি ঐখোয়গী নুংতিগী ঙাংনবা ৱাহৈগী মনুংচল্লকপা অসি নখোয় পুম্নমক্না খঙনরবনি। মসিনা ঐখোয়গী মঙলানশিংগী মরক্তা তিনখ্রবনি। ঐখোয়গী থবক, অনিঙবা অমসুং ঐখোয়গী অকোয়বা খুদিং অসি মসিদা কোয়দুনা লৈরবনি, অদুবু মসিবু তসেংনা করম্বা খোঙথাংনো? অহোংববু করি লাক্লিবগে? মসিগী অহোংবা অসিবু রিসোর্সখক্তদা লৈরবরা? মসিগী অহোংবা অসিবু ফিজিকেল ইনফ্রাস্ত্রকচর খক্তদা লৈরবরা? মসিগী অহোংবা অসি তেক্নোলোজী খক্তদা লৈরবরা? অহোংবা অসি চাউখৎলক্লিবা শেন্মিৎলোন অমসুং থৌরাং য়াৎপা হৈবগী থৌওং অসি খক্তদরা? মসিগী ৱাহংশিং অসি পাউখুম খুদিংমক অসি হোই হায়বনি। অদুবু মখোয়শিং অসিদা খ্বাইদগী হেন্না অহোংবা লাকপা অসিদি ঐখোয়গী ইন্সতিঙ্কতা, ঐখোয়গী থবক অমসুং রিএক্সন্দা য়েংবা মিৎয়েংদা লৈ। খুদোংথিবা অমা থেংননবা ঐখোয়গী লৈবাক্কী, নহাশিংগী ৱাখল্লোন অসি হৌজিক্তি য়াম্না তোঙাল্লে। মসিগী তগৎ-তগৎ তেকপা খুদম অমা ঐখোয়না ক্রিকেৎকী মালেমদা হন্দক্তা উবা ফংখি। নখোয় অয়াম্বনা ভারতনা ওস্ত্রেলিয়া তুর চৎপা অসিগী মতাংদা ফোল্লো তৌরমগনি। মসিগী তুর অসিদা ঐখোয়গী তীম্না করি করম্বা খুদোংচাদবা থেংনখিদগে? ঐখোয়না য়াম্না চাউনা মাইথিবা নঙখি, অদুবু খোঙজেল থুনা ফগৎলক্তুনা মথংগী মেৎচতা ঐখোয়না কাখি। অশোক-অপন নঙলবসু ঐখোয়গী শান্নরোইশিংনা ফিল্দদা অদুমক থৌনা ফনা খাঙদুনা লৈখি। শিংননীংঙাই ওইরবা মতমদা মখোয়না মদুবু মায়োক্নখি, অনৌবা ৱারোইশিন থিখি। শান্নরোই খরদি এক্সপেরিএন্স খরবুদি ৱাৎপা য়াওখি, অদুবু খোঙফম চেৎপা নীংথিবা শক্তম উবা ফংখি। মখোয়না খুদোংচাবা হেকা ফংবগা মদুবু পুৱারী ওইহনখি। অফবা তীম অমদা লৈবা হৈ-শিংবা অমসুং খাঙবা কনবগী মওং লৈবা অদুগুম্বা তীম অদুবু মখোয়না মাইথিবা পীখি।

ঐহাক্কী নহা ওইরিবা মরুপশিং,

ক্রিকেৎকী গ্রাউন্দদা ঐখোয়গী শান্নরোইশিংনা পাংথোকখিবশিং অসি শান্ন-খোৎনবখক্তা মরু ওইবনি হায়না খন্দোকপা য়াদে। মসি পুন্সিগী য়াম্না চাউবা পরা অমনি। অহানবা পরাদি, ঐখোয়না ঐখোয়গী তৌবা-ঙম্বগী ইতিক্তা থাজবা থমগদবনি। অনিশুবা অসিদি ঐখোয়গী ৱাখল্লোনগী মতাংনি। ঐখোয়না অফবা খল্লগদি, মহৈসু অফবা ওইগনি। অহুমশুবা অমসুং খ্বাইদগী মরু ওইবদি, করিগুম্বা নাকল অমদা তেক্ত কায়দনা থোকপা য়াবগী লম্বী অমা লৈরবা অমসুং নাকল অমদনা লুরবসু লুনা মাই পাকপা য়াবগী লম্বী লৈরবদি, ঐখোয়না মাই পাকপা য়াবগী লম্বী খুদিংমক য়েংথোক্কদবনি। করিগুম্বা মাই পাক্না হোৎনবদা ঙমদবা থোক্লবসু, মদুদা য়াম্না থৱাই নুংঙাইরোইদবা নত্তে। হোৎনবা অমসুং রিস্ক লৌবদা কিগদবা নত্তে। ঐখোয়না থৱাই য়াওবা অমসুং কিবা খঙলোইদবনি। ঐখোয়গী নুংদা মাইথিগনি হায়বগী অকিবা লৈরিবা, কান্নদনা থৱাই ৱাবগী মওং লৈরিবা অদুদগী ৱাংমা হেক লানবা ঙম্বদা কিবা খঙদবা ওইদুনা থোক্লক্কদৌরিবনি।

মরুপশিং,

ভারতকী নীংবা চেৎপা অমসুং পান্দম ফংদবা য়াদে খনবা থৌওং অসি ক্রিকেৎকী লম্পাক্তা খক্তা উই হায়বগী ৱাফম নত্তে। নখোয়সু মসিগী মমি অমনি। নখোয়সু নশাদা থাজবগী মগুন্না থন্দুনা লৈরিবনি। নখোয়না তোঙানবা ৱাখল খনবা অমসুং থবক তৌবদা করিসু কিদে। নখোয়গুম্বা নহাশিংগী হোৎনখিবা কয়া অদুনা ভারতকী কোরোনাগী লানফমদসু পাঙ্গল য়াম্না হাপখ্রিবনি। মীশিং য়াম্বা ভারত অসি রিসোর্স ৱাৎপগী মরমসু লৈবনিনা কোরোনানা য়াম্না শোকহল্লগনি হায়না অহানবদা পাখৎনরম্বা অদু নখোয় খুদিংমক্না নীংশিংলমগনি। অদুবু ৱাখল চেৎপা অমসুং নীংহন্নদবগী ৱাখল্লোন লৈরবদি, রিসোর্সশিং শেম-শাবদা মতম য়াম্না চঙগদবা নত্তে হায়বসি ভারতনা খুদম ওইনা তাকখ্রবনি। ভারতনা থৌওং অসিমক পাংথোকখি। ভারতনা লৈখ্রিবা ফিভমশিং অদুগা য়াশিন্নবা পুরকপা অমসুং খুদোংথিবশিংবু ঙাইদুনা লৈবগী মহুত্তা অথুবা মতমদা অচুম্বা ৱারেপ লৌখি। মসিনা মরম অদুনা ভারতনা ভাইরস অসিগী মাইয়োক্তা মশক থোক্না লান্থেংনবা ঙমখি। মেদ ইন ইন্দিয়াগী ৱারোইশিন অসিনা ভাইরস শন্দোকপা থিংবা ঙমখি, ঐখোয়গী হকশেলগী ইনফ্রাস্ত্রকচরবু য়াম্না ফগৎহনবা ঙমখি। ঐখোয়গী ভেক্সিনগী মরী লৈনবা রিসর্চ অমসুং পোত্থোক পুথোকপগী মতিক অসিনা ভারত খক্তা নত্তনা মালেমগী অতোপ্পা লৈবাকশিংদা তেক্ত কায়দনা লৈবা ঙম্লগনি হায়বগী থাজবা পীবা ঙম্লিবনি।

ঐখোয়গী সাইন্তিস্তশিং, রিসর্চ তৌবা মীওইশিং, স্কোলার, ইন্দস্ত্রীশিংগী মতিক অসিদা থাজবা থম্লমদ্রবদি ঙসিগী মাই পাকপা অসি ফংবা ঙমখিদগরা? মরুপশিং, হেলথকী সেক্তর খক্তা নত্তনা, ঐখোয়গী দিজিতেল ইনফ্রাস্ত্রকচরদসু য়েংশি। করিগুম্বা ঐখোয়না ভারত্তা লাইরিক হৈবগী চাং য়াম্না হন্থৈ হায়দুনা দি.বি.তি. অসি ওইথোক্লোই হায়না লৈরম্লবদি, কোরোনাগী মতম অসিদা লায়রবা মীওইশিংদা সরকারনা য়ৌবা ঙম্লিবা অসিগুম্না য়ৌবা ঙম্লমগদরা? ফিন্তেক, দিজিতেল ইনক্লুজনগী লমদা মালেমগী মকোক থোংবা লৈবাকশিংগী মরক্তা য়াওবা ঙম্লি, মসিবু ওইথোকপা ঙম্লমগদরা? ঙসিগী ভারত অসিনা খুদোংচাদবা কয়াগী ৱারোইশিন পুরকপা ঙম্নবা অনৌবা থৌওং পাংথোক্তুনা য়েংথোকপসু কিদে অমসুং অসিগুম্বা থৌওংবু পাক চাউনা পাংথোকপদসু তুং হন্দ্রি। বেঙ্কপু পুন্সিগী মরু ওইবা পোৎলম ওইহন্না খ্বাইদগী চাউরবা খোঙথাং অমা ভারত্তা ঙসি পায়খৎলি, অমাংশঙ শাবগী খ্বাইদগী চাউরবা খোঙথাং ভারত্তা পায়খৎলি, ইমুং খুদিংগী য়ুম শাবিবগী থবক পায়খৎলি, য়ুম্থোং খুদিংদা থক্নবা ঈশিং ফংহনবগী থবক পায়খৎলি। খ্বাইদগী চাউরবা হেল্থ এস্যুরেন্স স্কিম অসি ভারত্তা চলায়রি অমসুং খ্বাইইদগী চাউরবা তিকা থাবগী খোঙজং অমসু ভারত্তা পায়খৎলি। খোঙথাংশিং অসিনা অৱাং-নোংপোক্তা কান্নবা য়াম্না পীরি, অসমগী মীওইশিংদা পীরি। অসিগুম্বা থৌওং অসি খুন্নাই অমসুং লৈবাক্না মশাদা থাজজবা মতমদা পাংথোকপা ঙমগনি। লৈবাক অসিনা হান্না ওইরম্বা ফিভমদগী হোংলক্নবা অমসুং অনৌবা থৌওং পাংথোক্নবা লৈজবা শক্তি থাদুনা হোৎনরি।

মরুপশিং,

ঙসিগী মালেম অসিদা ভারত্তা অনৌবা তেক্নোলোজী শিজিন্নবগী থৌওং অসিনা মরম ওইদুনা সেক্তর খুদিংমক্তা অনৌবা খুদোংচাবা কয়া লৈরক্লে। ঙসিদি ঐখোয়না ব্রাঞ্চ লৈতবা বেঙ্ক, শোরুম লৈতবা দুকান, দাইনিং হোল লৈতবা ক্লাউদকী চাকখুমগুম্বগী থৌওং কয়া নুংতিগী পুন্সি মহিংদা উবা ফংলক্লি। মসিগী ফিভম অসিদা, তুংদা লাক্কদৌবা মতমদা য়ুনিভর্সিতীশিং অসি অপুনবা ভর্চুএল ওইদুনা মালেমগী মফম অমা হেক্তদগী মহৈরোয় অমসুং ফেকলতী অমনা য়ুনিভর্সিতী অমা হেক্তগী শরুক ওইবা য়ারকপগী ওইথোকপসু লৈরি। অসিগুম্বা অনৌবা অহোংবা অসিগীদমক্তা চৎনগদবা কাঙলোন অমগী ফ্রেমৱর্ক অমা লৈবা য়াম্না তঙাই ফরক্লোই। মসিগী ৱারোইশিন ওইনবা অনৌবা এজুকেসন পোলিসী অসিনা কন্না হোৎনরি। মসিগী অনৌবা পোলিসী অসিদা য়ারিবমখৈ তেক্নোলোজী শিজিন্নবা, মলতি দিসিপ্লিনরী এজুকেসন অমসুং ঐখোয়গী এজুকেসনগী পথাপ অসিবু দেতা এনালাইতিক্সকীদমক্তা শেম-শাবদা অহেনবা মিৎয়েং চঙলি। দেতা এনালাইতিক্সকী তেংবাংদগী মিং চনবদগী হৌদুনা, মহৈ তম্বীবা অমসুং য়েংশিনবা ফাওবগী থৌওংশিং অসি হান্নদগী হেন্না ফগৎপা ওইরগনি।

তেজপুর য়ুনিভর্সিতীনা নেস্নেল এজুকেসন পোলিসীগী পান্দমশিং অসি ফংহনবদা অচৌবা থৌদাং লৌগনি হায়বগী ঐহাক্না থাজবা থম্মি। ঐহাক্না য়ুনিভর্সিতী অসিগী ত্রেক রেকোর্দ অমসুং তৌবা ঙম্বা অসিদা মপুং ফানা থাজবা থম্মি। ঐহাক্না ঐহাক্কী নহা ওইরিবা মরুপশিংদা মরু ওইনা হায়নীংবদি ঙসি নখোয়গী ফোর্মেল এজুকেসন লোইরে হায়দুনা নখোয়গী তুংগী পুন্সিগীদমক্তা খনবতা নত্তনা লৈবাক্কী তুংগীদমক্তসু থবক পাংথোক্কদবনি হায়বা অসিনি। নখোয় ৱাফম অমখক্তং মতম খুদিংদা নীংশিংবীয়ু, করিগুম্বা নখোয়গী পান্দম অসিনা ৱাংলবদি নখোয়গী পুন্সিগী খুদোংচাদবশিংনা থোইদোক্না শোকহনবা ঙম্লোই। নখোয়গী পুন্সিগী মথংগী চহি ২৫-২৬ অসি নখোয়গী কেরিয়র খক্তগীদা নত্তনা লৈবাক্কী তুংগী ফিভমসু লেপকদৌরিবনি।

নখোয় পুম্নমক্না লৈবাক অসিবু অৱাংবা থাক অমদা পুখৎকনি হায়বগী ঐহাক্না থাজবা থম্মি। লৈবাক অসিনা নিং তম্বা ফংবগী ১০০শুবা চহি, ইং ২০৪৭, অসিগী হরাওবা ফোংদোকপা মতমদা মসিগী চহি ২৫-৩০ অসি নখোয়গী হোৎনজমন, কত্থোকপশিংনা থল্লগনি। নিং তম্বগী চহি ১০০ শুবা অসিদা নখোয়গী চহি ২৫ অসিনা অচৌবা থৌদাং অমা পাংথোক্কদৌরিবা অসিগী মতাংদা অমুক্তা খন্থদুনা য়েংউ। মরুপশিং, ইশাগী অদুগুম্লবা মঙলান অদুগীদমক্তা শেম-শাদুনা লৈরসি। পুন্সি অসিনা মাই-পাকপগী থাক অমমম লান্দুনা চৎকনি। ঙসিগী নুংঙাইরবা থৌরম অসিদা নখোয়গী ইমুং-মনুংশিংবু, ওজাশিংবু, ফেকলতী খুদিংমকপু, নখোয়গী মঙলানশিংবু ঐহাক্না য়াইফ পাউজেল পীজরি। মাই পাকপা ওইবীয়ু।

হন্না হন্না থাগৎচরি।

Modi Govt's #7YearsOfSeva
Explore More
It is now time to leave the 'Chalta Hai' attitude & think of 'Badal Sakta Hai': PM Modi

Popular Speeches

It is now time to leave the 'Chalta Hai' attitude & think of 'Badal Sakta Hai': PM Modi
PM Modi at UN: India working towards restoring 2.6 crore hectares of degraded land by 2030

Media Coverage

PM Modi at UN: India working towards restoring 2.6 crore hectares of degraded land by 2030
...

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 15 জুন, 2021
June 15, 2021
Share
 
Comments

PM Modi at UN: India working towards restoring 2.6 crore hectares of degraded land by 2030

Modi Govt pursuing reforms to steer India Towards Atmanirbhar Bharat