শ্রীমান অর্নব গোস্বামীজী, লেংশিনবীরিবা খঙ–হৈরবা পুম্নমক, রিপব্লিক তি.ভি. রিপব্লিক ভারতকী অপুনবা তীম, মফম অসিদা তিনবীরিবা শকনাইরবা মীথুংলেনশিং, মরূপশিং।
মমাংদা ঐনা অদোমগী মরক্তা লাকচখিবা মতমদা রিপব্লিক তি.ভি.গী মতাংদতা ঙাংনখি, অদুবু হৌজিক্তি ঐখোয়গী রিপব্লিক ভারতসু শেমগৎলে। হৌজিক অর্নবনা হায়খি মদুদি মতম খরগী মনুংদা অদোমগী রিজনেল্স চেনেলশিং লোঞ্চ তৌনবগী থৌরাং লৈরে অমসুং গ্লেবেল প্রেজেন্সকীসু শেম শারি। মসিগীদমক্তা ঐ অদোম পুম্নমক্কী মফমদা য়াইফ–পাউজেল পীজরি।
মরূপশা, ঙসি ঐখোয়গী সংবিধানগী চহি ৭০ শুরে, অমরেোমদা মসি য়াম্না পুৱারী ওইরবা নুমিৎনি। ঐনা অদোম পুম্নমক অমসুং রিপব্লিক তি.ভি. য়েংবীরিবা পুম্নমক্কী মফমদা থৌরম অসিগী মাইকৈদগী সংবিধানগী নুমিৎকীদমক্তসু হন্না হন্না নুংঙাইবা ফোংদোকচরি।
মরূপশা, অদোমদগী কনানা মসি হেন্না খহবা ঙমগনি মদুদি নেসন্স ৱান্ত তু নো – মফম অসিদগী হৌখিবা খোংচৎ অদু, মফম অসিদগী নেসন ফার্স্তকী খোংচৎ অসি করম্না হৌখি। হৌখিবা চহি মঙাদা লৈবাক অপুনবনা ত্রান্সফোর্মেসন অসি উরে। চহি মঙা তরুক ফাওবা হান্না মীয়ামদা অমসুং মীদিয়াদসু শুপ্নগী ৱাহংগী ৱাহং ঙাক্তা, মসি চৎনরম্মি। অমসুং রিকোর্দ বুলেতিন অমা চৎথরিবগুম খনখি অমসুং মরক মরক্তা ৱাফম অদুমক রিপিৎ তৌদুনতা লৈরম্মি। অনম্বা মতমমদা খন্ন–নৈনৈ – করোর লিশিং লিশিংগী স্কাম, করিগুম্বদা শেঞ্জা–থুমজাগী মরাল, করিগুম্বদা মুম্বাই, করিগুম্বদা দিল্লী, করিগুম্বদা জয়পুর – বোম্ব পোখাইবা, করিগুম্বদা নোর্থ–ইস্ততা ব্লোকেদ, করিগুম্বদা অতিয়া পক্না ৱাংবা পোৎকী মমল – হায়বদি বুলেতিন অমা হেক লোইবগা মথংগী তাংদা বুলেতিন অদুমক অমুকহন্না লাকই অমসুং পাউ অদুমক্কা লোইননা। হৌজিক্তি অদুগুম্বা ফিভম অদু অমসুং মওং অদুদগী লৈবাক অসি য়াম্না চখৎলক্লে। হৌজিক সমস্যাশিং অমসুং শিংনবশিংদগী চখৎতুনা মদুগী পাম্বৈগী মতাংদা ৱারী তোনরি। চহি তরাগী খুজিং কয়া লিরবা সমস্যাশিংগী পাম্বৈ পুথোকপা ঙসি লৈবাক অসি ঐখোয়গী মিৎমাংদা উররি। অমসুং করিগুম্বদা মীয়াম্না হায়সু হায়নরি মদুদি ঐখোয়না মসি হিংলিঙৈদা উবা ফংগনি হায়বা ফাওবা খল্লুদে, অসুম্না মীওই কয়ানা হায়নরি। অমসুং মসিগী মরু ওইবা মরম অনি লৈ – অহানবদা, ভারতকী মীয়াম করোর ১৩০গী থাজবা, হায়নৈ – য়েস, ইৎ ইজ ইন্দিয়াজ মোমেন্ত, অমসুং অনিশুবদা – ভারতকী মীয়াম করোর ১৩গী ৱাখল্লোন, হায়নৈ – নেসন ফার্স্ত, হায়বদি লৈবাক্না খ্বাইদগী হান্না, পুম্নমক্কী মথক্তা লৈবাক্না, পুম্নমক্কী মাংদা লৈবাক্না।
মরূপশা, অদোম নীংশিংবীরমগনি চহি খরগী মমাংদা ঐনা অপীল মচা অমা তৌজখি। অমসুং ঐনা হায়জখি অঙম্বশিং অদুনা মখোয়গী গেস সবসিদী লৌবীগনু। অপীল মচা অমখক্তনি, অদুবু অপীল অসিগী মতুংদগীদি মীওই করোর অদগী হেনবনা মখোয়গী গেস সবসিদী লৌবা তোকখি, মসিবুনি নেসন ফার্স্ত হায়রিবসি। জুলাই ২০১৭কী মতুংদগী লাখ ৬৩, মসিদগী হেনবা সেনিয়র সিতিজেনশিংনা, মখোয়না রেলৱেদা খোংচৎ চৎপদা লবসিদী ফংবশিং অদুনা, সেনিয়র সিতিজেন ওইবা অদুগুম্বা পেসেঞ্জর লাখ ৬৩ রোম্না, মখোয়না ভোলুন্তরী লৌখি, সবসিদি অদু থাদোকখি, মসিবুনি নেসন ফার্স্ত হায়রিবা অসি। অদোম্না নীংশিংবীরমগনি মহাক্কী খুঙ্গংদা অমাংশঙ শানবগীদমক্তা চহি ১০৫ শুরবী ত্রাইবেল ওইরবী অহল অমনা মহাক্না তাঞ্জনবগী অমত্তা ঙাইরবা পাম্বৈ মহাক্কী হামেংশিংদু অদু য়োন্থোকখি। তোইলেৎ শাখি অমসুং তোইলেৎ শাননবগী খোংজং চংশিনখি – মসিবুনি নেসন ফার্স্ত হায়রিবসে। পুনেগী রিতয়ার্দ তিচর্স মখোয়না লুবা নানবগী খোংজংগীদমক্তা মখোয়গী পেন্সনগী য়াম্না চাউবা শরুক কৎথোকখি – মসিবু নেসন ফার্স্ত নত্তবরা? কনানা মসামক্না সমুদ্র তোর্বান্দ শেংদোকখি, কনানা লাইরবা অঙাংশিংগী তুংলমচৎ শেম্ননবগীদমক মখোয়বু তম্বীরি, কনানা লাইরবশিংদা দিজিতেলগী পীথোক–পীশিন তম্বীরি। অ্সিগুম্বা মশিং থিঙমদ্রবা ৱাফমশিং হিন্দুস্তানগী কাচি কোয়া খুদিংমক্তা লৈরি, অমসুং মদুনি, মদুমক্নি নেসন ফার্স্ত। মরূপশা, মসিগী নেসন ফার্স্ত অসি লৈবাক শেমগৎপগী মাইকৈদা ইরৈচা খুদিংমক্কী খৎথোকপনি। ইশাগী লৈবাক্কী মফমদা ইশাগী থৌদাংগী ৱাখল্লোন্নি মসিনা ঙসি ভারতপু অনৌবা ইনর্জী পীরি। অমসুং মরম অসিনা হন্দক্কী সমিৎ অদোম্না থম্বীরিবা থীম – ইন্দিয়াজ মোমেন্ত, নেসন ফার্স্ত – মদু লৈবাক অসিগী ইমোসন অমসুং এস্পিরেসন, হায়বদি অপুনবা ওইনা ঙসি লৈবাক অসিগী মুদ অদু ফোংদোক্লি, রিফ্লেক্ত তৌরি।
মরূপশা, নেসন ফার্স্তকী ৱাখল্লোন অসিদা চৎলদুনা ঐখোয়না তৌরিবা থবকশিং অসিদা মীয়াম্না কয়াদা থাজবীবগে হায়বদু অদোম্না হন্দক্কী লোক সভাগী মীখলদা উবা ফংবীরে। লৈবাক্কী মীয়াম্না খঙই অমসুং লৌই মদুদি ঐখোয়না নেসন ফার্স্তপু ঐখোয়গী থৱাই ওইনা লৌদুনা থবক তৌই। হৌজিক মসিগী মেন্দেৎ অসিদগী ঐখোয়দা য়াথম পীনবীরে মদুদি মীয়ামগী মথৌ তাবশিংগা লোইননা অনীংবা–অপাম্বশিং মপুং ফাহন্নবা লেপ্তনা থবক তৌ। মসি অনীংবা অসিবু করিনো? অপাম্বা অসি – লৈবাক অসিগী চহি তরাগী খুজিং কয়া লিরবা শিংনবশিংদগী নান্থোকপা অদুনি।
মরূপশা, নেসন ফার্স্ত তৌরকপা মতমদা, ঐখোয়গী ৱাশকসু চাউখৎলকই অমসুং মদুবু পাংথোক্নবা হোৎনবদুসু পাক–চাউরকই। ঐনা খুদমগা লোইননা ঐগী ৱাফম ফোংদোকচগে –
মরূপশা, আর্তিকল ৩৭০ অমসুং ৩৫এ – মসিগী মরমদগী ভারতনা মায়োক্নখিবশিং অদুসু অদোম খঙবীরি অমসুং হৌজিক শিংনবা অসিগী পাম্বৈ করম্না পুথোকখিবগে হায়বদুসু অদোম্না উবীরে। আর্তিকল ৩৭০ অসি ঐখোয়গী সংবিধান্না অহানবা নুমিৎতা মতম খরগীনি হায়খি, তেম্পোরেরী হায়খি, অদুবু মীওই খরা অমসুং ইমুং খরগী রাজনীতিগী ওইবা কান্ননবগী মরমদগী মসিবু সাইকোলোজিকেল্লী মতম চুপ্পগী ওইনা লৌনখি। অসুম্না তৌদুনা মখোয়না সংবিধানগী ৱাখল্লোন অদুবু থৌওইখিদে, মসিবু নাথৈদুনা থম্বীখি। আর্তিকল ৩৭০গী মরমদগী ওইহল্লকখিবা চিংননীংঙাই ওইবশিং, মদুনা মফম অদুদা ইরাং শাগৎপশিংগী থৌনাদা মৈ চুখি। ঐখোয়গী সরকারনা আর্তিকল ৩৭০ অমসুং আর্তিকল ৩৫এ – মসিবু লৌথোক্তুনা লৈবাক অসিগী সংবিধানগী অথোইবা শক্তম অদু অমুক হন্না শাগৎখি। হৌজিক জম্মু–কশ্মীর অমসুং লদাখতা চাউখৎপগী অনৌবা লম্বী হাংবা হৌরে।
মরূপশা, লৈবাক্কী মাংদা চহি কয়াদগী চৎথদুনা লাক্লবা অতোপ্পা হিরম অমগা লৈরম্মি, চহি তরাগী খুজিং কয়াদগী তোঙান তোঙানবা কোর্তশিংদা মসিগী মতাংদা ৱায়েল চৎথনরম্মি। মদুগী হিরম অদুদি অয়োধ্যাগীনি। মমাংদা সরকার পাইরম্বা লুপ অদুনা অসিগুম্বা ৱাফম অসিবু লোইশিন্নবগী অপাম্বা লৈরমদে। মখোয়না মসিদা মখোয়গী ভোৎ থিদুনা লৈখি, মরম অসিনা কোর্তশিংদা মসি পন্দুনা লৈখি। মসিগী চয়েৎনবা অসি মমাংদা লোইশিনবা ঙমখিদবগী মরম অমত্তা লৈরমদে। অদুবু রাজনীতিগী দল খরগী অমসুং লুপ খরগী কান্নতনা থল্লবা রাজনীতিনা অয়োধ্যাগী চয়েৎনবা অসি অসুক কুইবা অসি শাংদোকহন্দুনা লাকখি। অসিগুমবা মীওইশিং অসিনা তা়্জাবু ফংলম্লবদি হিরম অসি কৈদৌঙৈদসু লোইশিল্লম্লোই।
মরূপশা, মশাগী রাজনীতি মঙাল নাইহন্নবগীদমক্তা, মরু ওইবা হিরমশিং থৈদোক্তুনা থম্নবগীদমক মীওই খরনা মতম পুম্নমক্তা লৈবাক অসিদা অকিবগী মশক্কী আর্তিফিসিএল লোজিক শেমগৎলি। ভারতনা অদুম্না তৌরগদি, অসুম্না ওইরক্কনি, লৈবাক অসিদা অসিগুম্বা মখলগী ৱারেপ অদু লৌরগদি, অদুম্না ওইরক্কনি, এস্কেলেসন ওইরক্কনি, বেকলেশ ওইরক্কনি, ইন্তর্ফরেন্সকুম্বা লোজিক্না মখোয়গী ৱাফম অদু জস্তিফাই তৌদুনতা লৈখি।
মরূপশা, ঙসি ২৬/১১ মুম্বাই এতেক্কী কুমওন্নি। এতেক্ত অসিগী মতুংদা তেরোরিস্ত শৌগৎপশিংগী মফমদা কয়াদা মোন্না থবক লৌখৎখিবগে হায়বদু ঐখোয় খঙই। হৌজিক লৈবাক অসিনা তেরোরিজমগী মায়োক্তা করম্না থবক চৎথরিবগে হায়বদু ঐনা অমুক তাক্নরুবগী মথৌ তারিব্রা? তেরোরিস্তশিংগী মথক্তা অকনবা থবক পাইখৎপদগী কল্লিবা মখোয়গী লোজিক পুম্নমক পুমচাই চাইখ্রে।
মরূপশা, তরাক অহুমগী হিরম অসিসু চহি তারাগী খুজিং কয়া অসি ইচম চম্না অসুম শাদোকহনখিবা নত্তে। হিরম অসিবুসু শাংদোকহনবা য়াবা মখৈ শাংদোকহন্দুনা লাকখি অমসুং আর্তিফিসিএল লোজিক্কী অকিবা অদুমক উহনখি। মতৌ অসুম্না লাইরবশিংবু রিজর্বেসনগী হিরমদসু মতম চুপ্পা লান্না লমজিংদুনা লাকখি। ভোত বেঙ্ককী রাজনীতি তৌবশিংনা করগুম্বদা কনাগুম্বদা লান্না থাজহন্দুনা কাইহৌখি নত্ত্রগা কিহন্দুনা মখোয়গী অপাম্বা তৌহনখি। অসুম্না কয়া কুইনা চৎথগনি। আর্তিকল ৩৭০বু ওইরো, অয়োধ্যাবু ওইরো, তলাক অহুম্বু ওইরো নত্ত্রগা লাইরবশিংগী রিজর্বেসনবু ওইরো – লৈবাক অসিনা অদুগুম্বা ৱারেপ অদু লৌরে, অরিবা শিংনবশিংগা মায়োক্নখি অমসুং হৌজিক মাংদা চখৎলি, অমসুং লৈবাক্কী মায়োক্তা লৈবা পাঙ্গলশিং অদুনা মীয়াম্বু ইরাং হৌহন্নবা, ইরাং শাগৎনবা হোৎনদে হায়বদু নত্তে। হোৎনবা য়াবা পুম্নমক হোৎনখি, অদুবু মীয়াম অদুমক্না মখোয়বু মাই পাকহনখিদে অমসুং মীয়ামগী অসিগুম্বা ৱাখল্লোন অসিবুনি নেসন ফার্স্ত হায়রিবসি। ঙসিদি মতমগী অহোংবা অসিসু উবা ফংলি মদুদি নেসন ফার্স্ত পাংথোরকপা মতমদা লৈবাক অসিনা অচৌবা ৱারেপসু লৌরকই অমসুং অদুগুম্বা ৱারেপশিং অদু লৌশিঞ্জবগী থৌনা উৎতুনা মাংদসু চখৎলি।
মরূপশা, হোংলক্লিবা ভারতকী ৱাখল অসি ঐখোয়গী, অদোমগী, লৈবাক অসিগী রাজনীতি দল পুম্নমক্কীদমক্তা য়াম্না চাউবা পাউজেল অমনি। লৈবাক অসিগী মীয়াম্না চয়েৎনদুনা লৈবা পামদে। ওইরোইদবদা হিংবা পামদে। মখোয় শুপ্নগী, শুপ্নগী অমসুং শুপ্নগী লৈবাক অসিগী চাউখৎপা অদু উবা পাম্মি।
মরূপশা, ঐখোয়গী সরকারনা শুপ্নগী শিংনবশিং অদু য়াবতা নত্তনা, মখোয়শিং অদু লোইশিন্নবা অচেৎপা মওংদসু হোৎনরি। ঐহাক নীংশিংলি ২০১৪দা সরাকর শেম্লবা মতুংদা মমাংগী সরকারগী মতমদা ওইরম্বা এন.পি.এস. অমসুং লোৎশিন্নবা হোৎনবদা তৌরম্বা অরানবশিং অদু ফোংদোরকপা মতমদা করি ওইখি। ঐখোয়না অদুগুম্বা স্কাম অদু লৈবাক মীয়ামদা পুথোক্তুনা মদুদগী কঞ্জনবা পাম্বৈ শেমখি। হৌজিক ইন্সোলভেন্সী এন্দ বেংক্রপ্সী কোদ (আই.বি.সি.)গী মরমদগী চাউরাক্না লুপা করোর লাখ অহুম হল্লকহনবা ঙমলে। অসুম্না অদোম নীংশিংবীরিবরা এন.পি.এস.কী মতাংদা মীওই খরনা কয়াদা চরাংনহনখিবা। মদু পেতর্ন অমগী শরুক অদুমক্নি। সংসদকী মীফম খুদিংমক্কী মমাংদা মখোয়না অনৌবা অরানবা অমা পুথোরকখি অমসুং মদুবু ময়ামদা তাইনশিনখি। নুমিৎ খরনিগী মমাংদা সরকারনা পুৱারী ওইবা মওংদা কোর্পোরেৎ তেক্স হন্থহনখিবা মতমদা খরা খরা হৌরকখি, অমসুং হৌজিক অসি ইলেক্সন বোর্দ অসি মখোয়গী ফেবরাইৎ ওইরি।
মরূপশা, লৈবাক অসিদা নুং পান উবা থৌরাং শেম্নবগীদমক্তা অরোন–অথুপ লৈতবা মওংদা তৌরিবা পুম্নমক অসি মীওই খরগী মবুক নাবা ওইনা থোক্লি। অদোম ঐঙোন্দা হায়বীয়ু – আধারগী মরমদা ঙাংনখিবশিং অদু অদোম নীংশিংবীরমখিনি। আধারবু কাংলোনগী ওইনা অয়াবা ফংদনবা মীওইশিং অসিনা সুপ্রীম কোর্ত ফাওবা চৎখি। মখোয় অসিনা আধারবু লান্না শন্দোক্নবা য়াম্না কন্না হোৎনখি।
মরূপশা, ঙসি আধার অসি লৈবাক অসিগী মীচম মীয়ামগী হক ফংহন্নবগী য়াম্না চাউবা পাম্বৈ অমা ওইরে, অমসুং মসিদসু নত্ত্না, আধারনা বাইওমেত্রিক–আইদেন্তিফিকেসনগী ঐখোয়দা লৈরিবা দেতা অসি, মালেমনা অঙকপা পোক্নরি। আধার অমসুং আধারগী প্রোসেস, মসিগী প্রদক্ত, মসিগী মতাংদা ঐঙোন্দা ৱারী শারক্তবা মালেম অসিগী লুচীংবা অমত্তা লৈরম্লরোই। ঐখোয়দা লৈরিবা অসুক মরু ওইবা পোৎশক – মসিবু চয়েৎনবা ওইহল্লো।
মরূপশা, মখোয়না পাল্লম্লবদি লৈবাক অসিদা জি.এস.তি. কৈদৌঙৈদসু চৎনহল্লমলোই। জি.এস.তি. রাজনীতিগী অচৌবা রিস্ক অমা ওইনা লৌনরম্মি। মসিসু চৎনহনখিবা লৈবাক অদুদা সরকার কয়া কাইখি। শিংনবা অসিনা ঐখোয়গী খোংথাং অসি থিংবা ঙমখিদে, ঐখোয়না রাজনীতিগী মাংবা তোংবা থিদনা লৈবাক্কী কান্ননবগীদমক্তা মসি চৎনহনখি। ঙসি জি.এস.তি.গী মরমদগী লৈবাক অসিদা পুকচেল শেংবা বিজিনেস কলচর অসি মপাঙ্গল কল্লক্লি অমসুং পোৎ তাংবসু লাকশিনবা ঙম্লক্লি। ঙসি মীচম মীয়ামগা মরী লৈনরিবা, মসি মীদিয়াদা উৎনদবা মাল্লি, খঙদে মখোয়দা করি কাইবা জাৎনো? ঙসি মীচম মীয়ামগা মরী লৈনরিবা ৯৯ পর্সেন্ত, ঐনা দাইত্য য়াম্না লৈনা মসি হায়জরিবনি, ৯৯ পর্সেন্তকী পোৎলমশিংদা, হান্নগা য়েংনরুবদা পোৎলমশিংদা চাংচৎতা তেক্স তঙ্খাইতমক লৌরি। জি.এস.তি.গী মমাংদা লোনরম্বা অদুগী ঙসি তঙ্খাইতমক লৌরে। মতম অমদা রেফ্রিজরেতর, মিক্সর, জুসর, ভেক্যুম ক্লিনর, গীজর, মোবাইল ফোন, ৱাশিং মেচিন, ধরীশিং পুম্নমক অসিদা ৩১ পর্সেন্ততগী হেন্না লৌনরম্মি। ঙসিদি পোৎলমশিং অসিদা ১০দগী ১২ পর্সেন্ত খক্তগী তেক্স লৌরে। হান্না গেহু, চেং, দহী, লস্সী, বত্তরমিল্ক ফাওবা তেক্স লৌরম্মি। ঙসি পুম্নমক অসি জি.এস.তি. লাকপদগী তোক্স ফ্রী ওইখ্রে।
মরূপশা, ঙসি ভারত্তা খোংজেল অসিদা অমসুং স্কেল অসিদা থবক তৌরিবা অসি অমুক্তা ওইখিদ্রিবা মওংদনি। থা ৬০দা চাউরাক্না ভারত মচা করোর ৬০ ফাওবদা তোইলেৎকী খুদোংচাবা ফংহনবা, চহি অহুমদগী তাবা মতমগী মনুংদা য়ুম করোর নিপান্দা লেম্না গেস কনেক্সন ফংহনবা, নুমিৎ লিশিং ১দগী তাবা মতমগী মনুংদা খুঙ্গং লিশিং ১৮দা মৈ ফংহনবা, চহি মঙাদা মীওই লাখ অমা মখাইদগী হেনবা মীয়ামদা মখোয়গী ময়ুম পীবা, লাইরবা মীওই করোর ৩৭ হেনবদা বেঙ্কিং সিস্তেম ফংহনবা, মালেমগী খ্বাইদগী চাউবা হেল্থ ইন্স্যুরেন্স স্কিম আয়ুশ্মান ভারতকী হৌদোকপা, মীওই ক্রোর ৫০বু লুপা লাখ মঙা ফাওবগী লেম্না লায়েংবগী খুদোংচাবা পীবা, চাউরাক্না লৌমী ইমুং করোর ১৫গী একাউন্তা হকথেংননা তেংবাং য়ৌহনবা – অসিগুম্বা মখলগী স্কিমসিং অমসুং প্রোগ্রাম অসি অদোম্না অমসুং অদোমগী তীম অপুনবদা নেসন ফার্স্তকী মন্ত্র অসিনা জীবন মন্ত্র ওইরবতদা, অদোম্না ইসাগী ওইজবা থিবা অদুদগী থোরক্তুনা সবকা সাথ সবকা বিকাস অমসুং সবকা বিশ্বাস অসিবু কাংলোন অমসুং রাজনীতিগী য়ুম্পম ওইহল্লবতদা অদোম্না প্লান অমসুং এগজিক্যুৎ তৌবা য়াগদৌরিবনি।
ইচিল–ইনাওশা, নেসন ফার্স্তকী ৱাখল্লোন অসিনা অৱাং নোংপোক্তা চরাংনবা হন্থহনবা, মসিবু লৈবাক্কী শাহৌগী অনৌবা ইঞ্জিন ওইহন্নবগীদমক ইথিল পীরি। ৱাখল্লোন অসিনা ঐখোয়বু, চাউখৎপগী লমজেলদা খ্বাইদগী মমৈদা লৈহৌরবা, এস্পিরেসন দিস্ত্রিক্ত ১১২দা অনৌবা এপ্রোচকা লোইননা থবক তৌননবা তম্বীখি।
মরূপশা, নেসন ফার্স্তকী অচুম্বা ৱাখল্লোন অসিননি চহি তরাগী খুজিং কয়াদগী চৎথরক্লিবা তিকা থাবগী খোংজংবু রিদিজাইন তৌনবগী ইথিল পীখিবসু। ঐখোয়না পুন্সি পীখম্নহনবা য়াবা লাইনাশিংদগী কন্নবা তিকাগী মশিং হেনগৎহল্লে, মিশন ইন্দ্রধনুশনা অরাপ্পা মনুং হঞ্জিনবা মফমদু ফাওবা তিকা থাবগী খোংজং অসি য়ৌহল্লি।
মরূপশা, নেসন ফার্স্তনা ঐখোয়দা মেতর্নিতী লীব অসি চয়োল ১২দগী হেনগৎহন্দুনা চয়োল ২৬ ওইহন্নবগী লম্বী তাকপীখি মসিনা মমা ওইবীশিংনা মখোয়গী পোকপদা ঙাইরিবা মচাশিংবু শেন্নবগী মতম মতিক চানা ফংহল্লগনি। ৱাখল্লোন অসিনা স্কুল খুদিংমক্তা নুপীমচাশিংগীদমক্তা তোঙানবা অমাংশঙ শানবগী লম্বী তাকপীখি মদুনা নুপীমচাশিংনা মতম চাদনা স্কুল থাদোকপা তৌররোই।
মরূপশা, নেসন ফার্স্তকী ৱাখল্লোন অসিননি লাইরবশিং বেঙ্কিং সিস্তেমগা শম্নহন্নবগীদমক্তা বেঙ্ক একাউন্ত করোর ৩৭ হেন্না হাংদোকহনখিবসু। লৈবাক অসিগী মীচম মীয়ামসু য়াম্না লাইনা দিজিতেলগী ওইবা পীথোক–পীশিন তৌবা ঙম্নবা, ৱাখল্লোন অসিগা লোইননা রুপে কার্দ পীখি, ভিম এপ লোঞ্চ তৌখি। মসি খঙবদা অদোম নুংঙাইবা পোকপীগনি মদুদি হৌজিক ফাওভদা লৈবাক অসিদা রুপে দেবিৎ কার্দ করোর ৫৫দগী হেন্না থাদোকখ্রে অমসুং কার্দ অসিগী মার্কেৎ শেয়র হৌজিক ৩০ পার্সেন্ত ফাওবা য়ৌখ্রে। রুপে কার্দ – মসি তপ্না তপ্না গ্লোবেল ব্রান্দ ওইননবগী মাইকৈদা চংশিল্লি।
ইচিল–ইনাওশা, নেসন ফার্স্তকী ৱাখল্লোন অসিগী মরমদগী জল জীবন মিশন হৌদোকখি। লাক্কদৌরিবা মতম খরা অসিদা মিশন অসিদা চাউরাক্না লুপা করোর লাখ অহুম মখাই চাদিং তৌগনি, মসিনা লৈবাক অসিগী অরাপ্পা মনুং হঞ্জিনবা মফমসিংদা লৈবা মীয়ামদা থক্নবা অশেংবা/অফবা ঈশিং ফংহল্লগনি, য়ুমথোং খুদিংদা ঈশিং য়ৌহল্লগনি।
মরূপশা, হৌজিক মীয়ামগী পুন্সিবু লাইতোকহন্নবগীদমক, মখোয়গী চাগা হেনগৎহন্নবগী ৱাখল্লোনগা লোইননা, লৈবাক অসিগী শেনমিৎলোন অসি দোলর ত্রিলিয়ন ৫ ওইহন্নবগী পান্দম ঙসি লৈবাক অসিনা থম্লি। ঐনা থাজৈ মদুদি নেসন ফার্স্তকী ৱাখল্লোনগা লোইননা থবক তৌরদুনা ঐখোয়না ৱারেপ খুদিংমক্কী মতিক চাবা ফল ফংগনি অমসুং লৈবাক অসিনা পান্দম পুম্নমক ফংগনি।
মরূপশা, ঐনা থাজৈ মদুদি সমিৎ অসিদা ৱাখল্লোন অসিগা লোইননা, অনৌবা ভারতকী অনৌবা ওইথোকপশিং, অনৌবা তাঞ্জাশিংগী মতাংদা পাক–চাউনা খন্ন–নৈনগনি। অমসুং সিংবিধানগী কুমওন অসিদা অমুক্কা হন্না, রিপব্লিক্কী ইমুং–মনুংগা উনজবগী তাঞ্জা ফংজরে। অদোমগী থোংদগী লৈবাক অমসুং মালেম অসিদা শন্দোকখ্রিবা অদোম্বু য়েংলিবা মীওইশিংদা ঐগী ৱাফম য়ৌহন্নবগী তাঞ্জা ফংজরে। মসিগীদমক্তা ঐনা অদোম্বু থাগৎপা ফোংদোকচরি, অমসুং ঐনা অদোম পুম্নমক্তা হন্না হন্না য়াইফ–পাউজেল পীজরি।
মফম অসিদা ৱা ঙাংজনবগী তাঞ্জা পীবীবগীদমক্তা, ঐনা অদোম্বু হায়নীংঙাই লৈতনা থাগৎচরি।
হন্না হন্না থাগৎচরি।
