মিস্তর মাইকেল ব্লুমবর্গ, থোৎ লুচিংবশিং, ইন্দস্ত্রীগী মকোকশিং, ব্লুমবর্গ নিউ ইকনমিক ফোরমবু শরুক য়াবিরিবা ইকায়খুম্নরবশিং
মাইকেল অমদি ব্লুমবর্গ ফিলানথ্রোপিজতা লৈরিবা মহাক্কী কাঙবুনা তৌরিবা অচৌবা থবকশিংগীদমক অহানবা ওইনা ঐনা তৌবিমল খঙবা উৎচরি। কাঙবু অসিনা ভারতকী স্মার্ত সিতিজ মিসন শেম শাবদা পীরিবা ঙাক্লৌ অসি য়াম্না ফৈ।
মরূপশিং,
ঐখোয় ঐখোয়গী পুৱারীগী য়াম্না মরুওইবা তাঙ্কক অমদা লৈরি। মালেমগী মীশিংগী তঙ্খায় হেনবদি ময়োল্লমশিংদা লৈরি। লাক্কদৌরিবা চহী কুনলোমসিদা ভারত অমসুং অফ্রিকান লৈবাকশিংনা খ্বাইদগী চাউবা অর্বানাইজেসনগী ইথক অমা থেংনগদৌরি। অদুবু কোবিদ-১৯ লাইচৎ অসিনা মালেমসিদা অচৌবা শিংনবা অমা পীরি। মসিনা ঐখোয়গী চাউখৎপগী ইঞ্জিন ওইরিবা ময়োল্লমশিংসু খুদোংথিনিংঙাই ওইবা মফম্নি হায়বা উৎলি। মালেমগী মফম কয়াদা লৈরিবা ময়োল্লমশিংনা গ্রেত দিপ্রেসনগী মতুংদা খ্বাইদগী চাউবা শেন্মিৎলোন শোত্থবা ফীভম মায়োক্নগদৌরি হায়না লাউথোক্নখ্রে। ময়োল্লমশিংদা লৈবগী মশক ওইরিবা ৱাফমশিং অচৌবা ৱাহং অমা ওইরি। ময়াম পুনবা, শান্ন-খোৎনবগী থৌওংশিং, মহৈ মশিং অমদি পোত্থাবগী থৌওংশিং হান্নগা মান্নদ্রে। মালেম পুম্বনা হংনরিবা খ্বাইদগী চাউবা ৱাহংদি কমদৌনা অমুক হৌগদগে হায়বসিনি। অমুক হৌদোকপা অসি রিসেত তৌদনদি ওইথোক্লোই। পুক্নিং রিসেত তৌবা। থৌওংশিং রিসেত তৌবা; অমদি তৌরিবশিং রিসেত তৌবনি।
মরূপশিং,
মালেমগী লাঞ্জাও অনিগী মতুংদা নৌনা অমুক হৌগৎলকপগী পুৱারী ওইরবা ৱাফমশিংনা ঐখোয়দা পারা কয়া তম্বিবা ঙমগনি হায়না ঐনা খল্লি। অনৌবা চৎন-কাঙলোন কয়া শেমগৎখি অমদি মালেম অসি মশা মথন্তা হোংদোকখি। কোবিদ-১৯না হীরম খুদিংমক্তা অনৌবা চৎন-কাঙলোন শেমগৎনবগী অদুগুমবা তাঞ্জা অমা পীরি। করিগুম্বা ঐখোয়না তুংগীদমক খাঙবা কনবা সিস্তেম অমা শেমগৎপা পাম্লবদি তাঞ্জা অসি মালেম অসিনা লৌহৌগদবনি। ঐখোয়না কোবিদ মতুংদা মালেম অসিনা মথৌ তারক্কদবশিংগী মতাঙদা খনগদবনি। অহৌবা ওইনা তৌবা য়াবা অফবা ৱাফম অমদি ঐখোয়গী ময়োল্লমগী মফমশিংবু নৌথোকহনবনি।
মরূপশিং,
মতাঙসিদা ঐনা ভারতকী ময়োল্লমশিংগী অফবা মায়কৈ অমা তমবা পাম্মি। ওইরিবা অৱাবা মতমসিদা ভারতকী ময়োল্লমশিংনা তোপ তোপ্পা খুদম অমা উৎলি। মালেম পুম্বদা লোকদাউন থৌরাংশিংগী মায়োক্তা য়ানিংদবা কয়া থোরকখি। অদুম ওইনমক ভারতকী ময়োল্লমশিংনা হায়রিবা থৌরাং অসিবু নীংথিনা ইনখি। মসি ঐখোয়গী ময়োল্লমশিং শেমগৎলকপগা খ্বাইদগী চাউবা মচাক্তি কংক্রিৎ নত্তে খুন্নাই অসিনা ওইবননি। লাইচৎ অসিনা খুন্নাই অমা ওইনা বিজিনেস অমা ওইনা ঐখোয়গী খ্বাইদগী চাউবা মচাক্তি ঐখোয়গী মীয়াম্নি হায়বসি অমুক্কা হেন্না ময়েক শেংহল্লে। কোবিদ মতুংগী মালেম অসি হায়রিবা মরুওইবা চঙদ্রবা য়াদ্রবা মচাক অসি নীংথিনা য়োকখত্তুনা শেমগৎপা মথৌ তাই। ময়োল্লমশিং অসি চাউখৎপগী মচু থোক্লবা ইঞ্জিনশিংনি। হায়রিবা তঙাই ফদ্রবা অহোংবা অসি পুরক্নবগী পাঙ্গল অদু মখোয়না লৈ।
মীয়াম্না অয়াম্বা মতমদা ময়োল্লমশিংদা ময়ুম হোংই মরমদি ময়োল্লমশিংনা মখোয়দা থবক পী। হৌজিক ময়োল্লমশিংবু মীয়ামগীদমক থবক তৌহনবা মতম ওইদ্রিবরা হায়বসিনি। কোবিদ-১৯না ময়োল্লমশিংবু মীয়াম্না হিংবা য়াবা মফম ওইহন্নবগী থৌওংশিং খোঙজেল য়াঙখৎহন্নবা খুদোংচাবা অমা পীরি। মসিদা হেন্না ফবা য়ুম-কৈ, হেন্না ফবা থবক শুফম, অতেনবা অমদি মতিক চানা চত্থোক চৎশিনগী পাম্বৈশিং য়াওরি। লোকদাউন মনুংদা ময়োল্লম কয়াদা হেন্না তরু তরুবা পাৎ অমদি তুরেলশিং লোয়ননা হেন্না শেংবা নুংশিৎ উবা ফংখি। ঐখোয় কয়ানা হান্না থৌওইনা তারুদবা উচেক্না খোঙবা তাখি। অসিগুম্বা ফীভমশিং অসি তোপ তোপ্পা অমা নত্তবা মহৌশা ওইবা তুং কোইগদবা ময়োল্লমশিং ঐখোয়না শেমগৎপা য়ারোইদ্রা? ময়োল্লমশিংগী খুদোংচাবশিং ফংবা অদুবু খুঙ্গঙগী মশক মওংদি লৈবা ময়োল্লমগী মফমশিং শেমগৎনবা থৌরাং ঐখোয়না ভারত্তা লৌখৎলি।
মরূপশিং,
লাইচৎ মনুংদা তেক্নোলোজীনা ঐখোয়গী থবক মখা চত্থবদা মতেং পাংখি। ভিদিও কন্ফরেন্সিংগুমবা ইচম চমবা খুৎলায়না মরম ওইরগা ঐনা মীফম কয়া পাঙথোকপা ঙমখি। মসিনা অরাপ্পা মফমশিং শমজিন্নদুনা অদোমগসু ৱারী শানবদা মতেং পাংলি। অদুবু মসিনা কোবিদ মতুংগী মালেমদা নুংঙাইরবা ৱাহং অমসু হংলি। ঐখোয়না ভিদিও কন্ফরেন্সিংগুম্বা কোবিদগী মতমগী ৱাফমশিং মখা তানা তমথখিগদরা? নৎত্রগা কনফরেন্স অমা শরুক য়ানবগীদমক ঐখোয়না মহাদেশ কয়া লান্না চৎকদৌরিবরা? অর্বান সিস্তেমশিংদা পোৎলম হন্থহনবা হায়বসি ঐখোয়না লৌবা ফিরেপকী মখা পোল্লি।
হায়রিবা ফিরেপশিং অসিনা হেন্না ফবা থবক-পুন্সিগী খল পুরকপা ঙমহনগনি। ঙসিগী মতমসিদা মীয়ামবু মফম অমা হেক্তদগী থবক তৌবা য়াহনবা, মফম অমদা হেক্তা লৈবা ঙমহনবা, মফম অমা হেক্তদগী মালেমগী সপ্লাই চেনগা শমজিন্নবা য়াহনবা অসি তঙাইমক ফদ্রবা অমা ওইহল্লে। ঐখোয়না তেক্নোলোজীগী লাইথোকহল্লবা চৎন-পথাপ অমদি নোলেগ-ইনেবল সর্ভিস সেক্তরগী ৱাফম লাউথোকখিবসি মসিননি। মসিনা ‘য়ুমদগী থবক তৌবা’ অমদি ‘মফম অমদগী হেক্তা থবক তৌবা’ ঙমহনগনি।
মরূপশিং,
ঐখোয়গী ময়োল্লমশিং পু-থাংবা ঙমগদবা য়ুম-কৈ য়াওদনা নুংঙাই য়াইফনা লৈবা ঙম্লোই। মসি খঙদুনা ঐখোয়না ২০১৫দা হাউজিং ফোর ওল থৌরাং হৌদোকখিবনি। ঐখোয়না লমবীসিদা নীংথিনা চঙশিল্লি হায়বা খঙবদা ঐ নুংঙাই। ঐখোয়না পান্দম থম্লিবা মতম ২০২২ ফাওবগী মমাঙদা ময়োল্লমগী মফমশিংদা লৈবা ইমুংশিংদা য়ুম করোর ১ নৎত্রগা মিলিয়ন তরা পীগনি। লাইচৎ অসিনা ওইহল্লিবা ফীভমসি য়েংলগা ঐখোয়না পু-থাংবা ঙমগদবা ভরাগী য়ুমগী থৌরাং অমসু হৌদোক্লে। ঐখোয়না রিএল এস্তেত রিগুলেসন্স এক্ত শেম্লে। মসিনা রিএল এস্তেত সেক্তরগী মশক মওং হোংদোক্লে। অদুগা মসিনা কস্তমরগা হেন্না চুনবা অমদি মনুং মপান ফাওনা উবা ফীভমসু পুরক্লে।
মরূপশিং,
তুং কোইগদবা চত্থোক চৎশিনগী পাম্বৈ অসি খাংবা কনবা ময়োল্লমশিং শেমগৎপগী মরুওইবা ৱাফম্নি। মেত্রো রেলগী থবক ময়োল্লম ২৭তা চঙশিল্লি। ঐখোয়না লৈবাকসিদা ২০২২ ফাওবদা মেত্রো রেল সিস্তেমগী কি:মি: ১০০০গী ময়াদা পীননবা লম্বীদা চঙশিল্লি। ঐখোয়গী মেক ইন ইন্দিয়া পায়খৎপনা চত্থোক চৎশিনগী সিস্তেম পুথোক্নবগী লমদমসিগী চাউরবা মঙম শেমগৎপা ঙমহল্লে। মসিনা ঐখোয়গী তুং কোইগদবা চত্থোক চৎশিনগী পান্দম ফংবদা চাউনা মতেং ওইরগনি।
মরূপশিং,
স্মার্ত ওইবা, নুংঙাই য়াইফবা অমদি খাংবা কনবা ময়োল্লমশিংগী খোঙচত্তা তেক্নোলোজীনা মরুওইবা মতিং হাপ্লি। তেক্নোলোজীনা ময়োল্লম অমবু মতিং থোক্না লৈহনবদা অমদি মীয়াম শম্নহনবদা মতেং পাংলি। মহৈ মশিং, হকশেল, সোপ্পিং, চীঞ্জাক্কী মওং মতৌশিংগী অচৌবা শরুক অমা ওনলাইন্দা তৌবা য়াবা ফীভম অমা ঐখোয়না উরি। ঐখোয়গী ময়োল্লমশিং ফিজিকেল অমদি দিজিতেল মালেমগী থাক্তা ওনখৎলকপদা শেম শাদুনা লৈবা ফীভমদা থমবা মথৌ তাই। ঐখোয়গী থৌরম – দিজিতেল ইন্দিয়া অমদি স্তার্ত-অপ ইন্দিয়া মিসননা হীরমসিদা মতিং শেমগৎপদা মতেং ওইরি। ঐখোয়না তাঙ্ক অনি থোকপা থৌওংগী খুত্থাঙদা স্মার্ত সিতি ১০০ খনগৎলে। মসি মতেং পাংনবা অমদি হিদান্নবা ফেদরেলিজমগী ৱাখল্লোন য়াওবা লৈবাক পুম্বগী ওইবা অথোই অহেন তান্নবগী থৌওংনি।
হায়রিবা ময়োল্লমশিং অসিনা লুপা করোর লাখ ২ নৎত্রগা দোলর বিলিয়ন ৩০রোমগী ওইবা প্রোজেক্তশিং শেমখ্রে। অদুগা লুপা করোর লাখ অমা লিশিং নিফু নৎত্রগা দোলর বিলিয়ন ২০লোমগী ওইগদবা প্রোজেক্তশিং লোইশিল্লক্লে নৎত্রগা লোইশিল্লক্কদৌরে। তেক্নোলোজীগী মতিং মপুং ফানা শীজিন্ননবগীদমক ময়োল্লম কয়াদা ইন্তিগ্রেতেদ কম্মান্দ অমদি কন্ত্রোল সেন্তরশিং লিংখৎলে। হায়রিবা সেন্তরশিং অসি তোঙান তোঙানবা ময়োল্লমশিংদা কোবিদগী ফীভম লাকশিন্নবগী ৱার-রুম ওইনা মথৌ তৌরি।
অরোইবা ওইনা ঐনা অদোম পুম্নমক্তা ৱাফম অমখক নীংশিংবা পাম্মি। করিগুম্বা অদোম্না অর্বানাইজেসন্দা শেন থাদবা পাম্লবদি, ভারত্তা অদোমগীদমক্তা অফবা তাঞ্জা কয়া লৈ। করিগুম্বা অদোম্না চত্থোক চৎশিনগী পাম্বৈদা শেম থাদবা পাম্লবদি, ভারত্তা অদোমগীদমক্তা অফবা তাঞ্জা কয়া লৈ। করিগুম্বা অদোম্না ইনোভেসনদা শেন থাদবা পাম্লবদি, ভারত্তা অদোমগীদমক্তা অফবা তাঞ্জা কয়া লৈ। করিগুম্বা অদোম্না তুং কোইগদবা পাম্বৈদা শেন থাদবা পাম্লবদি, ভারত্তা অদোমগীদমক্তা অফবা তাঞ্জা কয়া লৈ। হায়রিবা তাঞ্জাশিং অসি মশক মচু থোকপা দিমোক্রেসী, লল্লোন ইতিক্কা চুনবা ফীভম, অচৌবা কৈথেল অমদি ভারতপু মালেমগী পাম্নবা শেন থাদফম ওইহন্নবগীদমক লৌখৎপা য়াববা থৌরাং অমত্তা লেম্না থারোইদবা লৈঙাক অমগা লোয়ননা লাকপনি।
মরূপশিং,
ভারত ময়োল্লমশিংদা অহোংবা পুরক্নবগী মশাগী লম্বীদা চঙশিল্লি। স্তেতহোল্দর পুম্নমক, সিভিল সোসাইতী, একাদমিক ইন্সতিত্যুসনশিং, ইন্দস্ত্রী অমদি খ্বাইদগী মরুওইনা মীয়াম অমদি কম্ম্যুনিতীশিংগী মতেংগা লোয়ননা ঐখোয়না তুং কোইগদবা অমদি নুংঙাই য়াইফবা মালেমগী ময়োল্লমশিংগী মঙলান মঙফাওনবা ঙমগনি হায়বা ৱাফমসিদা ঐঙোন্দা চিংনবা লৈতে।
ময়ামবু থাগৎচরি।
