প্রধান মন্ত্রী শ্রী নরেন্দ্র মোদীনা ঙসি য়ুরোপিয়ন কমিসনগী প্রসিদেন্ত শ্রীমতী উর্সুলা ভোন দের লেয়েনগা লোয়ননা তেলিফোন্দা ৱারী শানখ্রে।
প্রধান মন্ত্রীনা শ্রীমতী উর্সুলা ভোন দের লেয়েনবু য়ুরোপিয়ন কমিসনগী প্রসিদেন্ত ওইনা থবক পায়রকপদা নুংঙাইবা ফোংদোকখি অমদি মহাক্না থবক পায়বা হেক হৌরকপগা পাউ ফাওনবা ফংবদা হরাওবা ফোংদোকখি। প্রধান মন্ত্রীনা মখা তাখি মদুদি মহাক্না কমিসনবু লুচিংলিবা অসি অখন্নবা অমনি মরমদি মহাক মসিগী অহানবা নুপী প্রসিদেন্তনি।
ইন্দিয়া-য়ুরোপিয়ন য়ুনিয়নগী পার্তনরশিপ অসি দেমোক্রেসী, আইনগী চৎন-কাংলোনবু ইকায় খুম্নবা, মল্তিলেতরেলিজম, চৎন-কাংলোন্দা য়ুমফম ওইবা ললোন ইতিক অমসুং চৎন-কাংলোন্দা য়ুমফম ওইবা ইন্তর্নেস্নেল ওর্দর অসিনচিংবা সেয়র ভেল্যুশিংদা য়ুমফম ওই হায়না প্রধান মন্ত্রীনা পুক্নিং চিংশিনখি। ক্লাইমেৎ চেঞ্জ, কনেক্তিবিতী, রিন্যুয়েবল ইনর্জী, মেরিতাইম সেক্যুরিতী, রেদিকেলাইজেসন অমসুং তেরোরিজম থেংনবা অসিনচিংবা লমশিংদা মহাক্না মরুওইবা মীৎয়েং থম্লিবা অদুদা প্রধান মন্ত্রীনা অপেনবা ফোংদোকখি। প্রধান মন্ত্রীনা ইন্দিয়া-য়ুরোপিয়ন য়ুনিয়ন পার্তনরশিপ্পু হেন্না মপাঙ্গল কনখৎহন্নবগীদমক পুন্না থবক তৌমিন্ননীংবগী অপাম্বা ফোংদোকখি।
মথংগী ইন্দিয়া-য়ুরোপিয়ন য়ুনিয়ন সম্মিৎকীদমক ব্রুসেলদা লাক্নবা শ্রীমতী উর্সুলা ভোন দের লেয়েন্না প্রধান মন্ত্রীবু বার্তন তৌরকখি। প্রধান মন্ত্রী শ্রী মোদীনা বার্তন অদু তরাম্না লৌখি।
