প্রধান মন্ত্রী নরেন্দ্র মোদীনা হায়রি সৌদী অরাবিয়াগা লোইননা স্ত্রাতেজিক পার্তনরসিপ কাউন্সিল এগ্রিমেন্ত তৌনবনা লৈবাক অনিগী মরক্তা হান্নদগী লৈনরক্লবা মরী ফগৎহল্লগনি।
সৌদী অরাবিয়াদা লৈরিবা প্রধান মন্ত্রীনা অরব ন্যুজদা ৱা ঙাংখি। খোঙচৎ অসি প্রধান মন্ত্রী মোদীনা চহি অহুমদা লৈবাক অসিদা চৎপা অনিশুবনি।
প্রধান মন্ত্রী মোদীনা হায়খি জি ২০গী মনুংদা লৈবাক অনি অসিনা চাউখৎনবা অমসুং লায়রবা কোকহন্নবা পুন্না থবক তৌমিন্নরি। ভারতকী দরকার ওইবা ইনর্জী ফংনবা হোৎনবদা সৌদী অরাবিয়ানা মরুওইবা থৌদাং লৌরি।
মহাক অমসুং সৌদী অরাবিয়াগী ক্রাউন প্রিন্স মোহমদ বিন সলমানগা লৈনবা মরীগী মতাংদা প্রধান মন্ত্রীনা হায়খি ঐনা ক্রাউন প্রিন্স মোহমদ বিন সলমানগা মঙারক উনরে। হন্দক্কী খোঙচৎ অসিদা মহাক্কা অমুক উনবদা তরাম্না ওকখি। মহাক্কী লুচিং মখাদা ভারত অমসুং সৌদী অরাবিয়াগী মরক্তা লৈনরিবা মরী হেন্না ফগৎলক্কনি হায়না ঐনা থাজবা থম্লি।
প্রধান মন্ত্রীনা হায়খি ঐগী লৈবাক্কী মপান লৈবাক্কী থৌশিলদা য়ুম্লোন্নবনা অহানবা হায়বা থৌশিল অসি মখা তানা মিৎয়েং থম্লি। ভারতনা সৌদী অরাবিয়াগা লৈনবা মরী অসি নাকল অনিগী ওইবা য়াম্না মরুওইবা অমনি।
স্ত্রাতেজিক পার্তনরসিপ কাউন্সিল এগ্রিমেন্ত লৈনবগী মতাংদা মহাক্না হায়খি মসিনা হিরম কয়াদা অনৌবা মতেং পাংনবগী অনৌবা মতম অমা হৌরগনি। ললোন–ইতিক, ইনভেস্তমেন্ত, সেক্যুরিতী, দিফেন্স কোওপরেসনকী লমদা মতেং পীনবা হেনগৎহল্লগনি।
প্রধান মন্ত্রীনা হায়খি তেরোরিজম থেংনবা, সেক্যুরিতী অমসুং অরুবা ৱাফমশিংদা মতেং পীনবা হেনগৎলকপা অসিদা ঐ হরাওই। ঐগী সেক্যুরিতী এদভাইজর রিয়াধতা লাক্তুনা মরুওইবা ৱাফম কয়া খন্নখ্রে। লৈবাক অনিগী মরক্তা দিফেন্সকী লমদা মতেং পীন্নবা অপুনবা কমিতী অমা লৈরে অমসুং লৈবাক অনিনা পাম্নবা হিরমশিং খন্ননবা চাংনাইনা মীফমশিং পাংথোক্লে।
নোংচুপ এসিয়াগী মতাংদা প্রধান মন্ত্রীনা হায়খি লৈবাক অমনা অমগী মনুংগী ৱাফমশিংদা খুৎ থিংজিন্দনা মুক্নবশিং লোইশিনবা দরকার ওই। লমদম অসিদা লৈরিবা লৈবাকশিংগা ভারতকা অফবা মরী থম্নরি। লমদম অসিদা ভারত মচা মিল্লিয়ন ৮ হেন্না লৈরি। লমদম অসিদা মরী লৈনবশিং শরুক য়াদুনা ৱারী শানদুনা শান্তি পুরকপা অসি য়াম্না মরুওই।
প্রধান মন্ত্রীনা হায়খি মালেমগী শেন–থুমগী ফিবম অসি ভারতগুম্বা চাউখৎলক্লিবা লৈবাক্না শেম্লিবা লম্বীগী মখা পোল্লি। পুম্নমক চাউখৎনবা পুন্না হোৎনমিন্নবা দরকার ওই হায়না ঐখোয়না থম্মোয় শেংনা থাজবা থম্লি। জি ২০গী মনুংদা লৈবাক অনি অসিনা চাউখৎনবা অমসুং লায়রবা কোকহন্নবা পুন্না থবক তৌমিন্নরি। মথং চহিদা সৌদী অরাবিয়ানা জি ২০ মীফম য়ুম্বু ওইগদবা অসিগী ঐ হরাওই অমসুং ভারতনা ২০২২দা মীফম অসি য়ুম্বু ওইগনি।
প্রধান মন্ত্রীনা হায়খি ললোন–ইতিক নুংঙাইনবা ভারতনা অওনবা কয়া পায়খৎলে। ললোন–ইতিক লাইহন্নবা অমসুং ইনভেস্তরশিং নুংঙাইনবা ঐখোয়না পায়খৎলিবা অওনবশিং অসিনা মরম ওইদুনা ৱার্ল্দ বেঙ্ককী ইজ ওফ দুইং বিজিনেস ইন্দেক্স ২০১৪দা ১৪২ ওইরম্বদগী ২০১৯দা ৬৩দা হাইগৎলে। মেক ইন ইন্দিয়া, দিজিতেল ইন্দিয়া, স্কিল ইন্দিয়া, স্বচ্ছ ভারত, স্মার্ত সিতী অমসুং স্তার্তঅপ ইন্দিয়ানা মপানগী ইনভেস্তরশিংদা খুদোংচাবা কয়া পীরি। মখোয়গী ভিজন ২০৩০গী শরুক অমা ওইনা সৌদী অরাবিয়াসু অওনবা কয়া পুরকপা হৌবদা ঐ হরাওবা ফোংদোক্লি।
মহাক্না হায়খি ভারতনা লৈবাক অসিগী শুংদোক্ত্রিবা থাউগী চাদা ১৮ সৌদী অরাবিয়াদগী লৌরি। তশেংনা লৈব–য়োনবগী মরী অমদগী হৌজিক মরূপ–মপাং ওইবা অচেৎপা মরী অমদা ঐখোয় চংশিল্লি অমসুং ভারতকী থাউ অমসুং গ্যাসকী প্রোজেক্তশিংদা সৌদী অরাবিয়ানা শেন থাদরগনি। মালেমগী শেন–থুমগী ফিবম ফগৎহনবদা থাউগী মমলনা মরুওইবা থৌদাং লৌরি। ভারতকী রিফাইনরী অমসুং পেত্রোকেমিকেলস প্রোজেক্তশিংদা অরামকো শরুক য়ারি। ভারতকী পেত্রোলিয়ম রিজার্বশিংদা অরামকোনা মরুওইবা থৌদাং লৌগনি।
প্রধান মন্ত্রীনা হায়খি ভারতকী ইনফ্রাস্ত্রকচর প্রোজেক্তশিংদা ভারত অমসুং সৌদী অরাবিয়া মতেং পীনরি। মহাক্না ২০১৯গী ফেব্রুৱারীদা ভারত্তা লাক্লম্বা খোঙচৎতা ক্রাউন প্রিন্সনা হিরম কয়াদা ভারত্তা দোল্লর বিল্লিয়ন ১০০ থাদনবা ৱাফম ফোংদোক্লমখি। ভারতকী স্মার্ত সিতী প্রোজেক্তশিংদা সৌদী অরাবিয়ানা শেন থাদরকপা ঐখোয়না তরাম্না ওক্লি।
প্রধান মন্ত্রীনা হায়খি সৌদী অরাবিয়াদা রুপে কার্দ হৌদোকপা অসিনা লৈবাক অসিদা লৈরিবা ভারত মচাশিংনা শেন থারকপদা খুদোংচাবা কয়া ফংলগনি। ই–মাইগ্রেত অমসুং ই–থাওথিক পোরতেলশিং পুনশিনবা অসিনা ভারতকী শিন্মীশিং সৌদী অরাবিয়াদা লাকপদা খুদোংচাহল্লগনি অমসুং দিপ্লোমেতশিং ত্রেনিং পীনবগী য়ানচে অমা খুৎয়েক পীনরে।
মহাক্না হায়খি সৌদীগী নহারোলশিংদা হিরম কয়াদা ত্রেনিং পীনবা থবক পায়খৎলে। স্পেস রিসর্সকী লমদা মতেং পীননবা ৱাফমশু খন্নরি। ভারত মচা মিল্লিয়ন ২.৬ রোম সৌদী অরাবিয়া অসি মখোয়গী অনিশুবা য়ুম ওইরি। ভারত মচা কয়া সৌদী অরাবিয়াদা হাজ অমসুং উমরাহগী অমসুং ললোন–ইতিক্কী চৎলি।
মহাক্না হায়খি লৈবাক অসিদা লৈরিবা ঐগী ইরৈচাশিংদা ঐগী পাউজেল ওইনা নখোয়না লৈবাক অসিদা লৈবা অসিনা চাউথোকচবা পোক্লি অমসুং নখোয়না থবক কন্না শুবা অসিনা লৈবাক অনিগী মরী ফগৎহল্লে। নখোয়না মখা তানা লৈবাক অনিগী মরক্তা অচেৎপা মরী লৈননবা মতেং পাংগনি হায়না ঐনা থাজবা থম্লি।
খোঙচৎ অসিদা প্রধান মন্ত্রীনা অহুমশুবা ফ্যুচর ইনভেস্তমেন্ত ইনিসিয়েতিব ফোরমদা মরুওইবা ৱারোল পীগনি। ফোরম অসি মিদল ইস্ততা য়াম্না মরুওইবা ইকোনোমীগী ফোরম অমনি।
প্রধান মন্ত্রীগী খোঙচৎ অসিদা মরুওইবা হিরমশিং হায়বদি সেক্যুরিতী, দিফেন্স, ইনর্জী সেক্যুরিতী, রেন্যুএবল ইনর্জী, ইনভেস্তমেন্তশিং, ললোন–ইতিক, অপীকপা ইন্তর্প্রাইজশিং, লৌউ–শিংউ, সিবিল এভিয়েসন, ইনফ্রাস্ত্রকচর, হাওসিং, ফাইনান্স, ত্রেনিং অমসুং কেপাসিতী বিল্দিংদা মখা তানা মতেং পীনবা হেনগৎহল্লগনি।
খোঙচৎ অসিগী য়াম্না মরুওইবা অমনা ভারত অমসুং সৌদী অরাবিয়াগী মরক্তা স্ত্রাতেজিক পার্তনরসিপ কাউন্সিল লৈবা অসিনা ওইগনি। য়ু.কে., ফ্রান্স অমসুং চাইনাগী মতুংদা ভারতনা লৈবাক অসিগা স্ত্রাতেজিক পার্তনরসিপ কাউন্সিল লৈবা মরীশুবা লৈবাক ওইরে। মসিনা লৈবাক অনিগী মরক্তা রাজনিতী, সেক্যুরিতী, কলচর অমসুং খুন্নাইগী লমদা লৈবাক অনিগী মরক্তা মতেং পীনগনি।
ভারতনা সৌদী অরাবিয়াগা লৈনবা য়াম্না মরুওইবা হিরমশিংগী মনুংদা ইনর্জী সেক্যুরিতী অসি অমা ওইরি। ভারতনা লৈবাক অসিগী শুংতোক্ত্রিবা থাউগী চাদা ১৮ সৌদী অরাবিয়াদগী লৌরি অমসুং ভারতকী এল পি জি চাদা ৩০ সৌদীদগী লৌরি। লৈবাক অনিগী মরক্তা লৈনরিবা লৈব–য়োনবগী মরী অসি পাকথোক—চাউথোকহন্দুনা মরূপ–মপাং ওইবা অমনা অমা থাজনবা অমসুং মখা পোনবা মরী অমা শেমগৎলগনি।
