প্রধান মন্ত্রী শ্রী নরেন্দ্র মোদীনা ঙসি ঙল্লিঙৈদা ওপরেসন গঙ্গাদা য়াওখিবা স্তেকহোল্দর পুম্নমক্কা লোয়ননা ৱারী শাখ্রে। ওপরেসন গঙ্গানা ভারতমচা ২৩০০০ লোয়ননা লৈবাক ১৮দগী মীরৈবাকমচা ১৪৭ য়ুক্রেন্দগী মাইপাক্না হোন্দোরকপা ঙমখি।
ৱারী-ৱাতায় শানবা অদুদা য়ুক্রেন, পোলেন্দ, স্লোভাকিয়া, রোমানিয়া অমসুং হঙ্গেরীদা লৈবা ইন্দিয়ন কম্ম্যুনিতী অমসুং প্রাইবেৎ সেক্তরগী মীহুৎশিংনা ওপরেসন গঙ্গাগী শরুক অমা ওইনা মখোয়না থেংনখিবা অৱা-নুংঙাইশিং, মখোয়না মায়োক্নখিবা শীংনবশিং পাউদমখি অমসুং অসিগুম্বা কম্প্লেক্স হ্যুমেনিতরিয়ন ওপরেসন অমদা শরুক য়াবা ফংখিবদা মখোয়দা ফাওবা অপেনবা অমসুং চাউথোকচপা অদুসু ফোঙদোকখি।
প্রধান মন্ত্রীনা ইন্দিয়ন কম্ম্যুনিতীগী লুচিংবশিং, ভোল্যুন্তীয়র গ্রুপশিং, কম্পনীশিং, লনাই মীওইশিং অমসুং সরকারগী ওফিসিএলশিংনা ওপরেসন অসি মাইপাক্নবা চোকথবা লৈতনা হোৎনবীখিবগীদমক থাগৎপা ফোঙদোকখি। মহাক্না লৈবাক নুংশিবগী ৱাখল্লোন পোকপা, মীয়ামগী শেবা তৌবগী ৱাখল্লোন পোকপা অমসুং তীম-স্পিরিৎ উৎখিবা অসিগীদমক ওপরেসন গঙ্গাদা য়াওখিবা স্তেকহোল্দর পুম্নমকপু থাগৎখি। প্রধান মন্ত্রীনা মরু ওইনা তোঙান-তোঙানবা কম্ম্যুনিতী ওর্গনাইজেসনশিংবু মখোয়না মীরৈবাক্তা ভারতকী সিবিলাইজেস্নেল ভেল্যুশিং অদু উৎতুনা মশাগী ওইজবা থাদোক্লগা সর্ভিস পীখিবা অদু পুত্থোক্লদুনা থাগৎখি।
সরকারনা ভারত মচাশিং লান মনুংদা অশোই-অঙাম য়াওদনবা হোৎনখিবশিং অদুগী মতাংদা প্রধান মন্ত্রীনা মহাক্না য়ুক্রেন অমসুং য়ুম্লোন্নরিবা লৈবাকশিংগী লুচিংবশিংগা লোয়ননা হকথেংননা ৱারী শাবা অদু নীংশিংখি অমসুং মীরৈবাক্কী সরকার পুম্নমক্না মতেং পীবীখিবগীদমক তৌবীমল খঙবা উৎখ্রে।
মপালদা লৈরিবা ভারত মচাশিং অশোই-অঙাম য়াওদনবা সরকার অসিনা খ্বাইদগী মরু ওইবা মীৎয়েং থমখিবা অদুবু নৌহৌননা ফোঙদোক্লদুনা প্রধান মন্ত্রীনা ভারতনা মালেমগী ওইবা খুদোংথিবা অমা হেক্তা থোক্লকপা মতমদা মাগী প্রজাশিং মতেং পাংনবা মতম চুপ্পদা শেল-শাদুনা লৈ হায়খ্রে। ভারতকী অরিবা ফিলোসোফী ভসুদৈ কুতুম্বকম অসিনা লমজিংদুনা ভারতনা ইমর্জেন্সীশিং থোকপা মতমদা অতোপ্পা লৈবাকশিংগী প্রজাশিংদা হ্যুমেনিতরিয়ন সপ্পোর্তসু পীখি।
