জি.৭ সম্মিৎকী আউৎরীচ সেসনশিংগী অনিশুবা নুমিৎতা প্রধান মন্ত্রী শ্রী নরেন্দ্র মোদীনা ‘বিল্দিং বেক তুগেদর – ওপন সোসাইতীজ এন্দ ইকনোমজ’ অমসুং ‘ইল্দিং বেক গ্রীনর: ক্লাইমেৎ এন্দ নেচর’ হায়না মিংথোনবা সেসন অনিদা শরুক য়াখ্রে।
ওপন সোসাইতীজকী সেসন্দা মরু ওইবা ৱাঙাংলোই অমা ওইনা ৱা ঙাংনবা বর্তন তৌরকখিবা অদুদা পি.এম.না প্রজাতন্ত্রা অমসুং নীংখা তম্বা হায়বা অসি ভারতকী সভ্যতাগী চৎনবীগী শরুক অমনি হায়না নৌহৌনা নীংশিংখ্রে। মহাক্না ওপন সোসাইতীশিংগী মতাংদা তোঙান-তোঙানবা লুচিংবশিংনা মসিনা মরু ওইনা অরানবা পাউ শন্দোকপা অমসুং সাইবর-এতেকশিংগী চৈথেং ফংহল্লি হায়না ফোঙদোকখিবা অদুগী মতাংদা মহাক্কী ৱাখল্লোন ফোঙদোকখ্রে অমসুং সাইবরস্পেস অসি দেমোক্রেতিক ভেল্যুশিংগী মগুন হন্থহন্নবগী মহুৎ হেনগৎহন্নবা ফম্পাক অমা ওইনা অদুমক লৈহনবা মথৌ তাই হায়না অকনবা ৱাফম থমখ্রে। মালেমদা লৈরিবা গভর্নান্স ইন্সতিত্যুসনশিংগী দেমোক্রেতিক ওইদবা অমসুং খেৎনবা লৈবগী মওং-মতৌ অসি পুথোক্লদুনা পি.এম.না মল্তিলেতরেল সিস্তেমদা অওনবা পুরকপ্না ওপন সোসাইতীশিং য়াইফনবা খ্বাইদগী অফবা খোঙথাং ওইগনি হায়না ফোঙদোকখ্রে। লুচিংবশিংনা মীফম অসি লোইশিল্লকপদা ‘ওপন সোসাইতীজ স্তেৎমেন্ত’ গী মতাংদা য়ান্নখ্রে।
অইং-অশাগী খল কাইরকপগী মতাংদা পাঙথোকপা সেসন্দা পি.এম.না গ্রহ অসিগী ঈশিং-নুংশিৎ, বাইদাইভর্সিতী অমসুং মহাসগরশিং অসি পুন্না চৎমিন্নরিবা লৈবাকশিংতনা ঙাক শেনবা ঙম্লোই অমদি অইং-অশাগী খল কাইরকপা অসি থেংননবা পুন্না খোঙথাং লৌখৎনবা অপাম্বা ফোঙদোকখ্রে। ক্লাইমেৎ এক্সনদা ভারতনা হনবা লৈতনা হোৎনরিবা অসিগী মতাংদা মহাক্না ইন্দিয়ন রেলৱেজনা ২০৩০ ফাওবদা নেৎ জিরো ইমিসন ফংবা ঙম্নবা পান্দম থমদুনা হোৎনরিবা অসিগী মতাংদা পনখি। মহাক্না ভারত অসি পেরিসতা ৱাশকখিবশিং অদু থুংহন্নবা লম্বীদা চংশিল্লিবা জি-২০ লৈবাকশিংগী মনুংদা অমত্তা ঙাইরবা লৈবাক ওইরি হায়না ফোঙদোকখ্রে। মহাক্না ভারতনা লৌখৎলিবা মালেমগী ওইবা অচৌবা থৌরাং অনি মদুদি সি.দি.আর.আই. অমসুং ইন্তরনেস্নেল সোলর এলাইন্স হায়রিবা অসিগী কান্নবশিং হেনগৎলক্লিবা সিগী মতাংদসু পাউদমখ্রে। প্রধান মন্ত্রীনা চাউখৎকপা ৱাৎলিবা লৈবাকশিংনা ক্লাইমেৎ ফাইনান্স ফংবা হেন্না হেনগৎহনবা মথৌ তাই হায়না অকনবা ৱাফম থমখ্রে অমসুং মিতিগেসন, এদাপ্তেসন, তেক্নোলোজী ত্রান্সফর, ক্লাইমেৎ ফাইনান্সিং, ইক্বিতী, ক্লাইমেৎ জস্তিস অমসুং লাইফস্তাইলগী অহোংবা - অসিগুম্বা সমস্যাগী লম পুম্নমক কোনশিল্লবা অইং-অশাগী খল কাইরকপা অসি থেংননবা হোলিস্তিক ওইবা এপ্রোচ অমা লৌখৎনবসু ফোঙদোকখ্রে।
প্রধান মন্ত্রীনা মালেমনা থেংনরিবা হেল্থ, অইং-অশাগী খল কাইরকপা অমসুং ইকনোমিক রিকভরী লাকশিন্নবা মরু ওইনা ওপন অমসুং দেমোক্রেতিক সোসাইতীজ অমসুং ইকনোমীজকী মরক্তা অমত্তা ওইনা পুন্না লেপমিন্নবগী পাউজেল অদু সম্মিৎ অসিদা লুচিংবশিংনা তরাম্না ওকখ্রে।
