ঐখোয়না শক্নাইরবা রাজ কাপুরগী চহি ১০০শুবা থৌরমশিং পাংথোক্কদৌরিবা অসিগীদমক প্রধান মন্ত্রী শ্রী নরেন্দ্র মোদীনা কাপুর ইমুং-মনুংগা ৱারি শানখ্রে। অখন্নবা মীফম অসিদা ভারতকী সেনিমাদা রাজ কাপুরনা পাংথোক্লম্বা লাম্বা লৈতবা থবকশিং অমসুং মহাক্কী থবকশিং ইকায়খূম্নবা উৎখ্রে। প্রধান মন্ত্রীনা কাপুরগী ইমুং-মনুংগা লৌথুপ-লৌকোই লৈতনা ৱারি শানখি।
রাজ কাপুরগী চহি ১০০ মপুংফারকপা থৌরম পাংথোক্নবগীদমক কাপুর ইমুং-মনুং উন্নবা মহাক্কী মমল য়াম্লবা মতম কাইথোকপগীদমক রাজ কাপুরগী মচানুপী রিমা কাপুরনা প্রধান মন্ত্রী থাগৎপা ফোঙদোকখি। রাজ কাপুরগী ফিল্মগী ঈশৈ অমগী পরেং খর রিমানা থিখি অমসুং মখোয় উনবা অদুদা শ্রী মোদীনা কাপুর ইমুং-মনুংদা উৎখিবা নুংশিবা অমসুং ইকায়খুম্নবা অদু উরে। রাজ কাপুরনা পাংথোক্লম্বা থবকশিং থাগৎলদুনা, প্রধান মন্ত্রীনা কাপুর ইমুং-মনুং তরাম্না ওকখি।
প্রধান মন্ত্রীনা হায়খি রাজ কাপুরগী চহি ১০০শুবা থৌরম পাংথোকপা অসি ভারতকী ফিল্ম ইন্দস্ত্রিগী মপাল ফরিঙৈ মতম অদুগী খুদম অমনি। ১৯৪৭ দা নিল কমল ফিল্ম পুথোকখি অমসুং হৌজিক ঐখোয় ২০৪৭ দা চঙশিল্লি অমসুং হায়রিবা চহি ১০০ অসিদা পাংথোকখিবা থবকশিং অসি অচৌবা অমনি। কুতনিতিদা সোফ পৱার হায়বা তার্ম অসি শীজিন্নবগী মতাংদা, প্রধান মন্ত্রীনা হায়খি তার্ম অসিমক শেমদ্রিঙৈ মতম অমদা রাজ কাপুরনা ভারতকী সোফ পৱার শেম্লমখি। মসি ভারতকীদমক রাজ কাপুরনা পাংথোক্লম্বা অচৌবা থবক অমনি।
প্রধান মন্ত্রীনা হায়খি ময়াই থংবা এসিয়ানা পামগদবা ফিল্ম অমা কাপুর ইমুংনা নমগদবনি অমসুং চহি কয়াগী মতুংদা মফম অদুগী মীয়াম্না রাজ কাপুর নিংশিংলি। মখোয়গী পুন্সিদা রাজ কাপুরনা অকনবা ইথিল অমা পীখি। ময়াই থংবা এসিয়াদা ভারতকী ফিল্মগী অচৌবা খুদোংচাবা অমা লৈরি, মসিগী খুদোংচাবা অসি লৌনবা থবক তৌবা দরকার ওই, নৌবা মীরোলশিং ময়াই থংবা এসিয়া য়ৌনবা থবকশিং পায়খৎকদবনি। মরী অমা শেমগৎনবা কাপুর ইমুং-মনুংনা ফিল্ম অমা নমগদবনি।
মালেম শীনবা থুংবদগী ফংখিবা নুংশিবা অমসুং মিংচৎ অদু খঙলদুনা, রিমা কাপুরনা হায়খি রাজ কাপুর কলচরেল এম্বেসেদর কৌবা য়াই অমসুং ভারতকীদমক গ্লোবেল এম্বেসেদর ওইবগীদমক মহাক্না প্রধান মন্ত্রী থাগৎপা ফোঙদোকখি অমসুং কাপুর ইমুং হুপ্না প্রধান মন্ত্রীগীদমক চাউথোকচবা ফাওখি। প্রধান মন্ত্রীনা হায়খি ঙসিদি লৈবাক অসিগী মিংচৎ য়াম্না লৈরে অমসুং মালেম শীনবা থুংনা য়োগগী মরমদা খন্নরে। মহাক্না অতোপ্পা লৈবাকশিংগী লুচিংবশিংগা উনবা মতমদা মহাক্না য়োগ অমসুং মসিগী মরুওইবগী মতাংদা খন্নখি।
প্রধান মন্ত্রীনা হায়খি কনাগুম্বা অমনা লাইরিক তম্বা মতমদা থিজিনবা অসি য়াম্না নুংঙাইবা থবক অমা ওইহনগদবনি। রাজ কাপুরগী মরমদা থিজিল্লবা মতুংদা ফিল্ম অমা পুথোকপগীদমক মহাক্না রাজ কাপুরগী মশু শ্রী অরমান জেন থাগৎপা ফোঙদোকখি অমসুং মহাক্কী মপুবোক্কী পুন্সিগী খোঙচৎ হিংদুনা লৈহন্নবা খুদোংচাবা অমা ফংলে হায়না প্রধান মন্ত্রীনা হায়খি।
সেমিনাগী শক্তি নিংশিংলদুনা, প্রধান মন্ত্রীনা হায়খি মতম অমদা দিল্লিদা জন শঙ্গ পার্তি মীখলশিংদা মাইথিখি। লুচিংবশিংনা রাজ কাপুরগী ফিল্ম ‘ফির সুভাহ হোগি’ হায়বদি অমুক নোংঙাল্লক্কনি হায়বা ফিল্ম অদু য়েংনবা ৱারেপ লৌখি। দল অদু হৌজিক অমুক লাক্লে। চাইনাদা মীয়াম্না তাবা ঈশৈ অমগী রেকোর্দিং রিসি কাপুরদা থাখিবগী থৌদোক অমা প্রধান মন্ত্রীনা নিংশিংখি।
রনবির কাপুরনা প্রধান মন্ত্রীদা পাউদমখি মদুদি দিশেম্বর ১৩,১৪ অমসুং ১৫ ,২০২৪ দা কাপুর ইমুংনা রাজ কাপুরদা ইকায়খুম্নবা উৎকনি। মহাক্না ভারত সরকার, এন.এফ.দি.সি অমসুং এন.এফ.এ.আই থাগৎপা ফোঙদোকখি। মহাক্না হায়খি ইমুং-মনুংনা কাপুরগী ফিল্ম ১০ পীখ্রে অমসুং ভারত শীনবা থুংবগী সহর ৪০ দা থিয়েতর ১৬০ দা উৎকনি। প্রেমিয়র সো দিশেম্বর ১৩,২০২৪ দা মুম্বাইদা পাংথোক্কনি অমসুং ফিল্ম ইন্দস্ত্রিগী মীওইশিং চেবাউ পীগনি।
