এক্সেল্লেন্সীস,
ঐহাক্কী মরুপ বোরিস, এদাপ্তেসনগী মরুওইবা ইসুদা ঐহাক্কী মিৎয়েংশিং ফোংদোচনবগী খুদোংচাবা ফংজবা অসিগীদমক থাগৎচবা ফোংদোকচরি!
এদাপ্তেসন অসি মালেমগী ওইবা অইং অশাগী দিবেৎতা মিতিগেসনগুম্না অদুক মরু ওইনা লৌদে। মসি চাউখৎলবা লৈবাকশিংদা হায়বদি অইং অশানা চৈথেং ফংহনদবা মফমশিংগীদমক ৱায়েল লৈতবনি।
ক্লাইমেৎ অসি ভারত য়াওনা চাউখৎলবা লৈবাকশিংগী লৌমীশিংদা থেংনবা অৱাবা অমনি – মহৈ-মরোং থাবগী মতম ওল্লকই, মহৈ-মরোং অসি মতম চাদনা চুবা নোং অমসুং ঈচাওনা নত্ত্রগা তোইনা থোকপা নোংলৈ নুংশিৎনা মাং তাকহল্লি। থক্ননবা ঈশিংদগী হৌদুনা লৈননবা য়ুমশিং পুম্নমক অইং-অশাগা মায়োক্নবা ঙম্নবা য়াম্না লিংনা শাবা মথৌ তাই।
এক্সেল্লেন্সীস,
ঐহাক্না হিরম অসিদা মিৎয়েং অহুম খক লৈজৈ। অহানবদা, ঐখোয়না ঐখোয়গী চাউখৎ থৌরাংগী পোলিসীশিং অমসুং প্রোজেক্তশিংদা এদাপ্তেসন অসি মরুওইবা শরুক অমা ওইনা হাপ্পা তাই। ‘নল সে জল’গুম্বা প্রোজেক্ত – মীপুম খুদিংগী তোতি ঈশিং, ‘স্বাচ্ছ ভারত’ ক্লিন ইন্দিয়া মিসন অমসুং ‘উজ্বালা’ – ভারত পুম্বগী ওইনা অনানবা ফুইল, অসিনা ঐখোয়গী লৈজদ্রবা নাগরীকশিংদা এদাপ্তেসনগী কান্নবা পীবতা নত্তনা মখোয়গী পুন্সি মহিংসু ফগৎহল্লি। অনিশুবদা, থায়নগী চৎনবীশিংদা হিংবা কালুপ কয়া অমনা মহৌশাগা লোয়ননা হিংনবগী মতিক চাবা গ্যান লৈজৈ।
মসিগী থায়নগী চৎনবী অসি ঐখোয়গী এদাপ্তেসন পোলিসীশিংদা মরুওইনা লৌগদবনি। মসিগী গ্যান অসি স্কুলগী সেল্লেবস্তা য়াওহন্দুনা তুংদা লাক্কদবা মীরোলদা য়ৌহনগদবনি। লোকেলগী ওইবা ফিভমদা পুন্সি মহিং অসিবু ঙাক-শেন্দুনা থম্বনা এদাপ্তেসনগী মরুওইবা য়ুম্বী অমা ওইবা য়াই। অহুমশুবদা, এদাপ্তেসনগী মওং অসি লোকেল ওইবা য়াই, অদুবু চাউখৎত্রিবা লৈবাকশিংনা মখোয়বু মতেং পাংগদবনি।
লোকেল এদাপ্তেসন্দা মালেমগী মতেং পীনবগী ৱাখল্লোলদা, ভারতনা দিজাস্তর রিজিলেন্স ইনফ্রাস্ত্রকচর সি.দি.আর.আই.গী কোএলিএসনগী খোঙথাং লৌখৎলে। ঐহাক্না লৈবাক পুম্ববু খোঙথাং অসিদা শরুক য়ানবা হায়জরি।
অদোম্বু থাগৎচরি।
