প্রধান মন্ত্রী, শ্রী নরেন্দ্র মোদীনা ভারতকী নাগাপত্তিনম অমসুং শ্রী লঙ্কাগী কঙ্কেসন্থুরাইগী মরক্তা ফেরী সর্ভিস হৌদোকপগী থৌরমদা ভিদিও মেসেজকী খুত্থাংদা মশাগী ৱারোল থমখ্রে।
প্রধান মন্ত্রীনা থৌরমসিদা তিনখিবা মীয়ামদা ৱা ঙাঙবদা, ভারত অমসুং শ্রী লঙ্কানা দিপ্লোমেতিক অমসুং শেন্মিৎলোনগী মরীগী অনৌবা খোঙচৎ অমা খোঙশানমিন্নরি অমসুং নাগাপত্তিনম অমসুং কঙ্কেসন্থুরাইগী মরক্তা ফেরী সর্ভিস হৌদোক্লিবা অসিদি মরী চেৎশিলহনবগী মশক নাইবা থৌওং অমনি হায়খ্রে।
প্রধান মন্ত্রীনা ভারত অমসুং শ্রী লঙ্কাগী চৎনবী, লল্লোন-ইতিক অমসুং চাউখৎপগী মান্নবা পুৱারীদা অহেনবা মিৎয়েং চঙলদুনা নাগাপত্তিনম অমসুং মনাক নকপদা লৈবা শহর মচাশিং অসি শ্রী লঙ্কা য়াওনা অতোপ্পা লৈবাক কয়াগা সমুদ্রগী লল্লোন-ইতিক্কী মরী লৈনবগীদমক্তা মমিং চৎলিবনি অমসুং পুম্পুহারগী পুৱারী ওইরবা হিথাংফম অসিসু তমিলগী অরিবা লিতরেচরদা শিংথানরিবনি হায়না পাউদমখি। মহাক্না লৈবাক অনিগী মরক্তা হি চেনবগী ৱাফম শন্দোক্না তাক্লম্বা পত্তিনাপলাই অমসুং মনিমেকলাইগুম্বা সঙ্গম মতমগী লিতরেচরগী মতাংদসু ফোংদোকখি। ভারত অমসুং শ্রী লঙ্কাবু শম্নবা থোং অমগী মতাংদা শৈথাবা শক্নাইরবা কবি, সুব্রমনিয়া ভারতীগী ঈশৈ, ‘সিন্ধু নাধিয়িন মিসাই’গী মতাংদসু মহাক্না পনখি। ফেরী সর্ভিস অসিনা মদুগুম্বা পুৱারী অমসুং চৎনবীগী মরী খুদিংমক অমুক্কা হন্না হিংগৎহল্লগনি হায়না মহাক্না মখা তাখি।
রাস্ত্রপতি ৱিক্রেমিসিঙ্গেগী হন্দক্কী খোঙচৎ মনুংদা, কন্নেক্তিবিতীনা ময়োল ওইবা হীরমগা লোয়নবা শেন্মিৎলোনগী মতাংদা তেংবাংনবগী ভিজন দোক্যুমেন্ত অমসু য়ানবা পুরকখ্রে হায়না প্রধান মন্ত্রীনা পাউদমখি। “কন্নেক্তিবিতী হায়বসি শহর অনিবু হেন্না নক্ননা শম্নহনবা খক্তা নত্তে। মসিনা ঐখোয়গী লৈবাক, মীয়াম অমসুং থম্মোইবুসু নক্নহল্লি”,শ্রী মোদীনা হায়খি। কন্নেক্তিবিতী লৈবনা ত্রেদ, তুরিজম অমসুং মীয়াম মশেলগী মরী ফগৎহল্লি, লোয়ননা, মসিনা লৈবাক অনিমক্কী নহাশিংগী ওইবা অনৌবা খুদোংচাবা কয়াসু পীগনি হায়না মহাক্না হায়খি।
প্রধান মন্ত্রীনা মহাক্কী ইং 2015গী শ্রী লঙ্কা খোঙচৎ অমসুং মদুদা নই দিল্লী অমসুং কোলোম্বোগী মরক্কী দাইরেক্ত ফ্লাইত হৌদোকখিবা অদুবুসু ঙসি নীংশিংখি। কুশিনগরগী লাইনিংবগী শহর মচাদা শ্রী লঙ্কাদগী লাকপা খ্বাইদগী অহানবা ইন্তর্নেস্নেল ফ্লাইত তাখিবা অদুসু মীয়াম্না য়াম্না হরাওনখিবনি হায়না মহাক্না পাউদমখি। চেন্নৈ অমসুং জাফনাগী মরক্কী দাইরেক্ত ফ্লাইতসু ইং 2019দা হৌদোকখিবনি, অমসুং হৌজিক হৌদোক্লিবা নাগাপত্তিনম অমসুং কঙ্কেসন্থুরাইগী মরক্কী ফেরী সর্ভিস অসিসু মাইকৈ অসিদা থাংজিনবা মরু ওইবা খোঙথাং অমনি হায়না মহাক্না ফোংদোকখি।
“কন্নেক্তিবিতীগীদমক্তা ঐখোয়না য়েংলিবা মিৎয়েং অসিদি ত্রান্সপোর্ত সেক্তরদগীসু হেন্দোক্লিবনি”, প্রধান মন্ত্রীনা হায়খি অমসুং ভারত অমসুং শ্রী লঙ্কানা ফিন্তেক অমসুং ইনর্জীগুম্বা পাক চাউরবা হীরম কয়াদা নক্ননা থবক তৌমিন্নরি হায়না মখা তাখি। UPIনা মরম ওইরগা ভারত্তা দিজিতেল পেমেন্তনা মীয়ামগী ইহৌ অমা অমসুং পুন্সি মহিং অমা ওইরক্লিবা অসিগী মতাংদা পল্লদুনা, শ্রী মোদীনা সরকার অনিমক্না UPI অমসুং লঙ্কাপেগী মরক্তা মরী লৈনহন্দুনা ফিন্তেক সেক্তর কন্নেক্তিবিতীগী হীরমদসু থবক তৌরি হায়না ফোংদোকখি। ইনর্জী সেক্যুরিতী হায়বসিনা ভারত অমসুং শ্রী লঙ্কা অনিমক্কী চাউখৎ থৌরাংদা মরু ওইরিবা অসিন মরম ওইরগা ইনর্জী সেক্যুরিতী অমসুং রিলাইএবিলিতী হেনগৎহন্নবা লৈবাক অনিগী ইনর্জী গ্রিদ শম্নবগী মতাংদসু মহাক্না পনখি।
চাউখৎ থৌরাংগীদমক্তা খোঙলোই ওইমিন্নবা হায়বসিনা ভারত-শ্রী লঙ্কা বাইলেতরেল মরীগী খ্বাইদগী মপাঙ্গল লৈবা য়ুম্বীশিংগী মনুংদা অমনি হায়বসিদা প্রধান মন্ত্রীনা অহেনবা মিৎয়েং চঙখি। “ঐখোয়গী পান্দমদি মীপুম খুদিংবু মনুং চলহনবা, কনা অমত্তা চিত্থহন্দবা হায়বসিনি”, মহাক্না হায়খি। ভারতনা তেংবাংদুনা শ্রী লঙ্কাদা প্রোজেক্ত পায়খৎপনা মীয়ামগী পুক্নিং শুমহৎলি হায়না প্রধান মন্ত্রীনা হায়খি। হাউজিং, ঈশিং-মাইশিং, হকশেল অমসুং পুন্সি মহিংদা তেংবাংবগী মরী লৈনবা প্রোজেক্ত কয়া অমা অৱাংথংবা প্রোভিন্সতা লোইশিনখ্রে অমসুং কঙ্কেসন্থুরাই হিথাংফম অপগ্রেদ তৌবদা মতেং পাংবা ঙমখিবদা নুংঙাইবা ফাওই হায়না মহাক্না পাউদমখি। “অৱাং মাইকৈদগী খা মাইকৈ ফাওবা শম্নবা রেলৱে লাইন শেমজিনবা ওইরো; মশক নাইরবা জাফনা কলচরেল সেন্তর শাগৎপা ওইরো; শ্রী লঙ্কা শিনবা থুংবদা ইমর্জেন্সী এম্ব্যুলেন্স সেবা হৌদোকপা ওইরো; নত্ত্রগা দিক ওয়াদা মলতি স্পিসিএলিতী হোস্পিতাল শাবা ওইরো, ঐখোয়না সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ৱাখল্লোনগা লোয়ননা কন্না হোৎনরিবনি”, শ্রী মোদীনা মখা তাখি।
ভারতনা হন্দক্তা য়ুম্বু ওইদুনা পাংথোকখিবা G20 সম্মিতকী মতাংদা প্রধান মন্ত্রীনা হায়রদুনা মহাক্না ভারতকী বাসুদৈবা কুতুম্বাকমগী ৱাখল্লোনবু অমুক্কা হন্না পনখি, ৱাখল্লোন অসিবু মালেমগী খুন্নাইনা তরাম্না ওক্নখি হায়নসু মহাক্না মখা তাখি। য়ুম্লোন্নবা লৈবাক্কী চাউখৎ থৌরাং অমসুং নুংঙাই য়াইফবগী মতৌ শেয়র তৌমিন্নবা হায়বসিসু পান্দম অসিগী শরুক অমনি হায়না মহাক্না হায়খি। G20 সম্মিত মনুংদা হৌদোকখিবা ভারত-মিদ্দল ইস্ত ইকোনোমিক কোরিদোরগী মতাংদা মহাক্না পল্লদুনা মসিনা অপুনবা লমদম অসিদা শেন্মিৎলোনগী অচৌবা মতেং পাংবগী শাফু অমা পীগনি হায়না ফোংদোকখি। ঐখোয়গী লৈবাক অনিগী মরক্তা লৈনরিবা মলতিমোদেল কন্নেক্তিবিতীসু মপাঙ্গল লৈরক্লিবা অসিনা মরম ওইরগা শ্রী লঙ্কাগী মীয়াম্নসু মসিগুম্বা থৌওং অসিগী কান্নবা ফংগনি হায়না মহাক্না মখা তাখি। প্রধান মন্ত্রীনা শ্রী লঙ্কাগী রাস্ত্রপতি, সরকার অমসুং মীয়াম্বু ঙসি মায় পাক্না হৌদোক্লিবা ফেরী সর্ভিস অসিগীদমক্তা থাগৎপা ফোংদোকখি। মহাক্না রামেস্বরম অমসুং তলাইমনার মরক্কী ফেরী সর্ভিস অমুক হন্না মখা চত্থহনবগী মতাংদসু পনখি। “ঐখোয়গী মীয়াম্না কান্নবা ফংনবগীদমক্তা ভারতনা শ্রী লঙ্কাগা লোয়ননা ঐখোয়গী বাইলেতরেল মরীবু মপাঙ্গল হেন্না কনখৎহন্নবা খোঙফম চেৎলি”, প্রধান মন্ত্রীনা ৱাফম অসি হায়রদুনা মহাক্কী ৱারোল লোইশিনখি।
