নোংচুপ বঙ্গালগী রাজ্যপাল শ্রী জগদীপ ধনখড়জী, কেন্দ্রগী মন্ত্রী মন্দলদা লৈবিরিবা ঐহাক্কী খোংবুরোই শ্রী পীয়ুশ গোয়লজী, কাউন্সিল ওফ মিনিস্তরগী ঐহাক্কী মরূপ শ্রী বাবুল সুপ্রিয়ৌজী, মফমসিদা লেংশিনবিরিবা খং-হৈরবা কয়া, ইকাইখুম্নজরিবী-খুম্নজরিবশিং পুম্নমক্কী মফমদা , নোংচুপ বঙ্গালদা রেল অমসুং মেত্রো মেত্রো কনেক্তিবিতী অসি পাকথোক-চাউথোকহনবগীদমক্তা নুংঙাইবা ফোংদোকচরি।!! ঙসি মায়খুম হাংদোক্লিবা অমদি শঙ্গারিবা প্রোজেক্তশিং অসিনা হুগলী য়াওনা অতৈ জীলাশিংগী মীওই কয়াগী পুন্সি মহিং লাইথোকহল্লগনি।
মরূপশা,
ঐখোয়গী লৈবাক ত্রান্সপোর্তকী পাম্বৈ অসি অদুক্কী মতিক ফহল্লবদি মীপাল তাংদবা অমদি ইশাগী থাজবগী ৱাশক অদুগী মতিক-ময়াই অসি অদু্ক্কী মতিক হেনগৎল্লক্কনি। কোলকতাদা নত্তনা হুগলী, হাৱড়া অমসুং নোংপোকথংবা পরগনাগী জিলা ২৪গী মরূপশিংনসু হৌজিক মেত্রো সর্ভিসকী খুদোংচাবা ফংলগনি হায়বসিদা ঐহাক্না নুংঙাইবা ফাওই। ঙসি নাওপাড়াদগী দক্ষিনেশ্বর ফাওবগী শঙ্গারিবা সেক্সন অসিনা পুং অমগা মখাই চংবা লম্বি অসি শুপ্নতগী মিনিত ২৫-৩৫দমক চংহল্লগনি। দক্ষিনেশ্বরদগী কোলকতাগী "কবি সুভাশ" নত্রগা "ন্যু গড়িয়া " ফাওবা অসি হৌজিক মেত্রোনা পুং অমদা য়ৌহনবা ঙমহল্লগনি, তৌবগীদি মসি পুং অনি মখাইফাওবা চংবা মফম্নি। মসিগী পেসিলিতী অসিনা স্কুল-কোলেজ চৎলিবা নহাশিং, ওফিসশিং-ফেক্তরীশিংদা থবক তৌরিবা থৌমীশিংদা, শিন্মীশিংদা য়াম্না কান্নহল্লগনি। মরুওইনা ইন্দিয়ন স্তেতিস্তিকেল ইন্সতিত্যুৎ, বারানগর কেম্পস, রবীন্দ্র ভারতী য়ুনিভর্সিতী অমসুং কলকত্তা য়ুনিভর্সিতীগী ইকোনোমিক্স দিপার্তমেন্তফাওবা য়ৌবা লায়হল্লগনি। মসিদা নত্তনা কালীঘাত অমসুং দক্ষিনেশ্বরদা ইমা কালীগী মন্দিরশিংফাওবা য়ৌবদসু হৌজিক্তি লাই নিংবা পামজবশিংগী ওইনা য়াম্না লায়হল্লে।
মরূপশা,
কোলকতা মেত্রো অসিবুদি চহি তরা-তরাগী মমাংদগী লৈবাক অসিগী অহানবা মেত্রো ওইবগী চাউথোকচবা ফংখি। অদুবু মসিগী মেত্রোগী অনৌবা শক্লোন অমদি পাকথোক-চাউথোকপা অসি হৌখিবা চহি কয়াদগী থবক চত্থবা হৌখি। অদুগা ঐহাক নুংঙাই মদুদি মেত্রো ওইরো নত্রগা রেলৱে সিস্তেম ওইরো ঙসি ভারত্তা শারিবশিং অসিদা মেদ ইন্দিয়া হায়না নপ্পা ময়েক শেংনা উরি। ত্রেক হাপ্পদগী হৌরগা রেলগাড়ীশিংগী অনৌবা ইঞ্জিন অমসুং অনৌবা দিব্বাশিংফাওবদা মশিং য়াম্না শিজিন্নরিবা পোৎলম কয়া অমা অমসুং তেক্নোলোজী অসি হৌজিক ভারতকীনি। মসিনা ঐখোয়গী থবক্কী খোংজোল অসিসু য়াংশিলহল্লি, ফবসু হেনগৎহল্লি, অচংবা শেলসু হন্থহল্লি অমদি ত্রেনশিংগী খোংজেলসু য়াংখৎহল্লি।
মরূপশা,
নোংচুপ বঙ্গাল, লৈবাক অসিগী মীপাল তাংদনা হিংবগী অতোইবা সেন্তর অমা ওইরি অমসুং মফমসিদগী অৱাং-নোংপোক লমশিংদগী হৌরগা অতৈ ঐখোয়গা য়ুম্লোন্নবা লৈবাকশিংগা লল্লোন-ইতিক তৌমিন্নবা য়াবা কয়া অমা লৈরি। মসিগী য়েংদুনা হৌখিবা চহিশিংদা মফম অসিগী রেল নেতৱর্ক অসি ফগৎহন্নবা হকচিন্না হোৎনরি। হৌজিক সিৱোক-রেঙ্গপোগুম্বা অনৌবা লাইন অসিনা সিক্কিম অসি রেল নেতৱর্ককী মতেংনা অহানবা ওইনা নোংচুপ বঙ্গালগা শম্নরগনি। কোলকতাদগী বাঙ্গলাদেশকী ওইনা গাড়ীশিং চেল্লি। হন্দক্তা হল্দীবাড়ীদগী ভারত-বাঙ্গলাদেশকী ঙমখৈফাওবগী লাইন লৈখ্রে। হৌখিবা চহি ৬কী মতমদা নোংচুপ বঙ্গালওভর-ব্রিজ অমসুং অন্দর ব্রিজ কয়া শাবগী থবক হৌখ্রে।
মরূপশা,
ঙসি শঙ্গারিবা অমদি মায়খুম হাংদোক্লিবা প্রোজেক্ত ৪ অসিনা মফমসিগী রেল নেতৱর্ক অসি হেন্না ফগৎহল্লগনি। মসিগী অহুমশুবা লাইন অসি হৌদোকপনা খড়গপুর-আদিত্যপুরগী শরুক্তা রেলনা পোৎ হোন্দোক-হোঞ্জিন তৌবা য়াম্না ফগৎহল্লগনি অমসুং অমসুং হাৱড়া-মুম্বাই রুত্তা ত্রেনশিং থেংথহল্লিবা অসি হন্থরগনি। হাৱড়া আজিমগঞ্জদগী খাগড়াঘাত রোদকী মরক্তা দুএল লাইনগী খুদোংচাবা ফংবদগী মুর্শিদাবাদ জিলাগী রেল নেতৱর্ক চিনবা অদু কোকহল্লগনি। মসিগী রুৎ অসিদগী কোলকতা-ন্যু জলপাঈগুড়ী-গুৱাহতীগী ওইনা খনবা য়াবা লম্বিসু লৈরগনি অমসুং নোর্থ ইস্তফাওবগী কনেক্তিবিতী হেনগৎহল্লগনি। দানকুনি-বারুইপাড়াগী মরক্তা মরীশুবা লাইনগী প্রোজেক্ত অসিবুদি মরুওইবা অদুম্মক ওইরি। মসি শাবা লোইরগদি হুগলীগী চিল্লবা নেতৱর্ক অসি হন্থরগনি। মতৌ অসিগুম্না রসুলপুর অমসুং মগরাগী সেক্সন অসি কোলকতাগী ওইনদি গেৎৱে মখল অমনি অদুগা মীসু য়াম্না চিল্লি। অনৌবা লাইন অসি হৌবদগী মসিগী অৱাবা অসি ফন য়াম্নদি কোকহল্লগনি।
মরূপশা,
প্রোজেক্তশিং অসিনা নোংচুপ বঙ্গাল অসি কোল ইন্দস্ত্রী লৈরিবা, স্তীলগী ফেক্তরী লৈরিবা, হারশিং শারিবা, চেং-হৱাই পুথোক্লিবা মফমশিংগা শম্নরগনি। হায়বদি অনৌবা রেল লাইনশিং অসিনা হিংবদা লায়হল্লগনি অদুগা ইন্তর্প্রাইজগী ওইনসু অনৌবা ওপ্সন কয়া ফংহল্লগনি অমদি মসি অফবা ইনফ্রাস্ত্রকচরগী পান্দম্নি। মসিনি সবকা সাথ সবকা, বিকাস, সবকা বিশ্বাস। মসিনি আত্মনির্ভর ভারতকী ওইনসু অরোইবা পান্দম্নি। পান্দম অসিগীদমক্তা ঐখোয় খুদিংমক্না থবক অদুম্মক তৌগদবনি হায়বগী থাজবা অসিগা লোয়ননা ঐহাক্না পীয়ুশজীগী মফমদা, মহাক্কী তীম পুম্বগী মফমদা থাগৎপা ফোংদোকচরি। অমসুং নোংচুপ বঙ্গালগী রেল সেক্তরদা, রেল ইন্ফ্রাস্ত্রকচরগী সেক্তরদা হৌখিবা চহিশিংদা করিগুম্বা চিত্থহৌবা লৈরগসু লৈহন্দনবগীদমক্তা পাংথোক্কনি হায়না ৱাশকখিবশিং অদু শোইদনা মপুং ফাহনগনি অমসুং বঙ্গালগী মংলানশিংসু মপুং ফাহনগনি।
থাজবা অসিগা লোয়ননা অদোম পুম্নমকপু হন্না-হন্না থাগৎচরি!!
