জনুৱারি ১৫ দা প্রধান মন্ত্রী শ্রী নরেন্দ্র মোদী মহারাস্ত্রাদা চৎকনি। অয়ুক পুং ১০:৩০ রোম তাবদা, প্রধান মন্ত্রী শ্রী নরেন্দ্র মোদীনা মুম্বাইগী নেভেল দোগয়ার্দতা লালগী জহাজ অহুম আই.এন.এস, আই.এন.এস নিলগিরি অমসুং আই.এন.এস ভাঘসির থবক হৌনবা লৈবাক মীয়ামদা কৎথোক্কনি। তুংদা, নুংথিলগী পুং ৩:৩০ তাবদা প্রধান মন্ত্রীনা নবি মুম্বাইগী খারঘরদা ইস্কোল লাইশঙ শঙ্গাগনি।
লালগী জহাজ অহুম থবক হৌবা অসি ঙাক-শেনগী মেনুফেকচরিং অমসুং সমুদ্রগী ঙাক-শেনগী লমদা মালেমগী লুচিংবা অমা ওইরক্নবা ভারতকী মঙলান মঙফাওনবা ঙম্নবা মাইকৈদা থাংজিনবা মরুওইবা খোঙথাং অমনি। পি১৫বি গাইদেদ মিসাইল দেস্ত্রোয়র প্রোজেক্কী মরিশুবা অমসুং অরোইবা জহাজ আই.এন.এস সুরত অসি মালেমদা খ্বাইদগী চাউবা অমসুং অনৌবা দেস্ত্রোয়রশিংগী মনুংদা অমনি। মসি লৈবাক অসিদা শাজবা মচাক চাদা ৭৫ য়াওবা জহাজ অমনি অমসুং খ্বাইদগী নৌবা ৱিপন-সেন্সর পেকেজশিং অমসুং অৱাংবা থাক্কী নেতৱার্ককী খুদোংচাবশিং য়াওরে। পি১৭এ স্ত্রিল্থ ফ্রিগেদ প্রোজেক্কী অহানবা জহাজ আই.এন.এস নিলগিরি অসি ইন্দিয়ান নেভেগী ৱারশিপ দিজাইন ব্যুরোনা দিজাইন তৌবনি অমসুং মসি তুংগী মীরোলগী লৈবাক অসিদা শাজবা ফ্রিগেদশিংগী মমি তাবা ওইনা সর্ভাইবেল, সিকিপ্পিং অমসুং স্ত্রিল্থগী খুদোংচাবশিং মপুংফানা য়াওরে। প৭৫ স্কোর্পেন প্রোজেক্কী তরুকশুবা অমসুং অরোইবা সবমেরিন আই.এন.এস ভাঘসির অসি সবমেরিন শাবদা ভারতকী হৈথোই-শিংথোইবা উৎলে অমসুং ফ্রান্সকী নেভেল গ্রুপকী মতেংগা লোয়ননা শাখিবনি।
ভারতকী নাৎ অমসুং চৎনবী চাউখৎহন্নবা মহাক্কী পান্দমগী শরুক অমা ওইনা, প্রধান মন্ত্রীনা নবি মুম্বাইগী খারঘরদা শ্রী শ্রী রাধা মদনমোহনজি লাইশঙ শঙ্গাগনি। লম একর ৯ দা শেমগৎলিবা প্রোজেক অসিদা, তোঙান-তোঙানবা ভগবানশিংগী লাইশঙ অমা, বেদিক ইজুকেসন সেন্তর অমা, শানবা পান্দম থম্লিবা ম্যুজিয়মশিং অমসুং ওদিওতোরিয়ম, হিলিং সেন্তর য়াওরি। প্রোজেক অসিনা মালেমগী মচিন-মনাও ওইবগী ৱাখল্লোন, শান্তি অমসুং নুংশিনবা বেদগী খুৎথাংদা পুক্নিং থৌগৎনবা পান্দম থম্লি।
