প্রধানমন্ত্রী শ্রী নরেন্দ্র মোদী নবেম্বর 28 দা করনাতকা অমসুং গোৱাদা চৎকনি। অয়ুক্কী পুং 11:30 মুক তাবদা প্রধানমন্ত্রীনা করনাতকাগী উদুপ্পীদা লৈবা শ্রী কৃষ্ণগী মথতা চৎকনি। মসিগী মতুংদা মহাক গোৱাদা চৎকনি। মফমসিদা নুংথীল পুং 3:15 মুক তাবদা শ্রী সংস্থান গোকর্ন পর্তগালী জীবোতম মথকী 550 শুবা কুমওন্দা পাংথোকপা 'সার্ধ পঞ্চশতামনোতসব' থৌরমদা শরুক য়াগনি
উদুপ্পীদা পি.এম.
প্রধানমন্ত্রী উদুপ্পীদা শ্রী কৃষ্ণ মথতা চৎকনি অমসুং লক্ষ কন্থ গীতা পারায়ন থৌরমদা শরুক য়াগনি। মসিদা মহৈরোইশিং, লম্বোইবশিং, স্কোলরশিং অমসুং তোঙান-তোঙানবা লমশিংগী সিতিজেনশিং য়াওনা মীওই 100,000 রোম্না শরুক য়াগনি অদুগা অমত্তা ওইবা খোজ্ঞেলদা শ্রীমদ ভগৱদ গীতাগী লাইশোন শোনগনি। প্রধানমন্ত্রীনা কৃষ্ণ গর্ভগৃহগী মমাংদা লৈরিবা সুৱর্ন তীর্থগী শঙলেন শঙ্গাগনি অমসুং শেংলবা কনকনা কিন্দীগীদমক্তা কনক কবচ(শনাগী কবচ) কৎকনি। কনক কিন্দী অসি শেংলবা থোংনি। মুনী কনকদাসনা মসিগী থোং অসিদা ভগৱান কৃষ্ণগী তাংলবা দর্শন তৌবা ফংজখি হায়না হায়নৈ। উদুপ্পীদা লৈরিবা শ্রী কৃষ্ণ মথ অসি চহী 800 গী মমাংদা বেদান্তকী দ্বৈতা ফিলোজোফী হৌদোকখিবা শ্রী মাধৱাচার্যনা হৌদোকখিবনি।
গোৱাদা পি.এম.
শ্রী সংস্থান গোকর্ন পর্তগালী জীবোতম মথকী 550 শুবা কুমওনগী থৌরম 'সার্ধ পঞ্চশতামনোতসব' থৌরমদা প্রধানমন্ত্রীনা খা থংবা গোৱাগী কেনাকোনাদা লৈবা মথতা চৎকনি।
প্রধানমন্ত্রীনা সংস্থান গোকর্ন পর্তগালী জীবোতম মথতা লৈবা প্রভু শ্রী রামগী ফুৎ 77 ৱাংবা শেজ্ঞেংগী মীতম মায়খুম হাংদোক্কনি অমসুং মথনা শেমগৎপা 'রামায়ন থীম পার্ক গার্দেন' শঙ্গাগনি। প্রধানমন্ত্রীনা থৌরম অসিদা অখন্নবা পোস্তেল স্তাম্প অমসুং নিংশিং খুদম ওইগদবা শেলয়েকসু চৎনহনগনি অমসুং মফমসিদা তিল্লিবা মীয়ামদা ৱা ঙাংগনি।
শ্রী সংস্থান গোকর্ন পর্তগালী জীবোতম মথ অসি অহানবা গৌর সারস্বত ব্রাহ্মন বৈষ্ণব মথনি। মসি জগদগুরু মাধৱাচার্য়না 13 শুবা চহীচাদা হৌদোকখিবা সিস্তেম অমা ওইরিবা দ্বৈতগী মথং-মনাওগী ফোলোৱরনি। মথ অসিগী ময়ায় লোয়শঙ অসি কুসাৱতী তুরেলগী তোর্বান্দা লৈবা খা থংবা গোৱাগী অপীকপা তাউন অমা ওইরিবা পর্তগালীদা লৈ।
