প্রধান মন্ত্রী, শ্রী নরেন্দ্র মোদীনা ওক্তোবর 2দা রাজস্থান অমসুং মধ্য প্রদেশতা চৎকনি। প্রধান মন্ত্রীনা নুমিৎ অসিগী অয়ুক্কী চাউরাক্না পুং 10.45 তাবা মতমদা রাজস্থানগী চিত্তোরগরদা লুপা করোর 7000গী চাউখৎ থৌরাংগী প্রোজেক্ত কয়া মীয়ামদা খুৎশিন্নবগা লোয়ননা উরেপ উয়ুংসু তমগনি। মখা তারকপদা, নুংথিলগী চাউরাক্না পুং 3.30 তাবা মতমদা, প্রধান মন্ত্রীনা গ্বালিয়রদা থুংদুনা লুপা করোর 19,260গী চাউখৎ থৌরাংগী প্রোজেক্ত কয়া মীয়ামদা খুৎশিন্নবগা লোয়ননা উরেপ উয়ুংসু তমগনি।
চিত্তোরগরদা পি.এম.না পাংথোক্কদবশিং
গ্যাস্তা য়ুম্ফম ওইবা শেন্মিৎলোন খুমাং চাউশিলহনবগী অতোপ্পা খোঙথাং অমদা, প্রধান মন্ত্রীনা মেহসানা-ভতিন্দা-গুর্দাস্পুর গ্যাস পাইপ্লাইনবু মীয়ামদা খুৎশিন্নগনি। পাইপ্লাইন অসি চাউরাক্না লুপা করোর 4500 চঙনা শাখিবনি। প্রধান মন্ত্রীনা অবু রোদতা লৈবা HPCLগী LPG প্লান্ত অমা মীয়ামদা খুৎশিন্নগনি। প্লান্ত অসিদা বোত্তলিং তৌবগা লোয়ননা চহিদা সিলিন্দর লাখ 86 য়েন্থোকপা ঙমগনি অমসুং সিলিন্দর পুদুনা চৎপা ত্রকশিং চেনবগী চাংদা চহিদা চাউরাক্না মিলিয়ন কিলোমীতর 0.75 হন্থহনবা ঙমগনি, মসিনা মখা তানা CO2 থাদোকপগী চাংবু চহিদা চাউরাক্না মিলিয়ন তন 0.5 হন্থহনবদা তেংবাংগনি। মহাক্না অজমের বোত্তলিং প্লান্ত, IOCLদা পোৎ থম্বগী অহেনবা মফমসু মীয়ামদা খুৎশিন্নগনি।
প্রধান মন্ত্রীনা দরাহ-ঝলাৱর-তীন্ধর সেক্সনগী NH-12 (অনৌবা NH-52)তা লেন মরিগী শোরোকমসু মীয়ামদা খুৎশিন্নগনি, হায়রিবা শোরোক অসি লুপা করোর 1480 হেন্না চঙনা শাখিবনি। প্রোজেক্ত অসিনা কোতা অমসুং ঝলাৱর জিলাগী খোনীশিংদগী পুথোকপা পোত্থোকশিং পুথোক পুশিন তৌবদা হেন্না নুংঙাইহল্লগনি। মখা তারকপদা, মহাক্না সৱাই মাধোপুরগী রেলৱে ওভর ব্রিজ (ROB) শাবা অমসুং লেন অনিদগী লেন মরিদা পাকথোক চাউথোকপগী উরেপ উয়ুং তমগনি। প্রোজেক্ত অসিনা ত্রাফিক জামগী খুদোংচাদবশিং কোকহনগনি।
প্রধান মন্ত্রীনা মীয়ামদা খুৎশিন্নগদৌরিবা রেলৱে প্রোজেক্তশিংগী মনুংদা চিত্তোরগর-নীমুক রেলৱে লাইন অমসুং কোতা-চিত্তোরগর ইলেক্ত্রিফাইদ রেলৱে লাইন দব্লিং তৌবগী থবক য়াওবা প্রোজেক্তশিং য়াওরি। হায়রিবা প্রোজেক্তশিং অসি লুপা করোর 650 হেন্না চঙদুনা লোইশিনখিবনি অমসুং মসিনা লমদম অসিগী রেল ইনফ্রাস্ত্রকচরগী মপাঙ্গল হেনগৎহনবগা লোয়ননা রাজস্থানগী পুৱারী ওইবা মফমশিংগী তুরিজমসু হেনগৎহনগনি।
প্রধান মন্ত্রীনা স্বদেশ দর্শন স্কিমগী মখাদা নাথদ্বারদা শেমগৎখিবা তুরিজম ফেসিলিতীশিংবু মীয়ামদা খুৎশিন্নগনি। নাথদ্বার হায়বসি সন্ত বল্লবচার্য়না হৌদোক্লম্বা পুশ্তিমার্গকী তুং ইনবা মীওই মিলিয়ন কয়াগী মরু ওইবা লাইনীংফম অমনি। মতমগা চুনবা ‘তুরিস্ত ইন্তর্প্রিতেসন অমসুং কলচরেল সেন্তর’ অমসু নাথদ্বারদা শেমগৎলে, মফমসিদা লমকোয়বশিংনা শ্রীনাথজীগী পুন্সিগী ৱাফম কয়া খঙবা অমসুং এক্সপেরিএন্স তৌবা ঙমগনি। মখা তারকপদা, প্রধান মন্ত্রীনা কোতাদা লৈবা ইন্দিয়ন ইন্সতিত্যুত ওফ ইনফোর্মেসন তেক্নোলোজীগী পর্মানেন্ত কেম্পস অমসু মীয়ামদা খুৎশিন্নগনি।
পি.এম.না গ্বালিয়রদা পাংথোক্কদবশিং
প্রধান মন্ত্রীনা চাউরাক্না লুপা করোর 19,260গী চাউখৎ থৌরাংগী তোঙান-তোঙানবা প্রোজেক্ত কয়া মীয়ামদা খুৎশিন্নবগা লোয়ননা উরেপ উয়ুংসু তমগনি।
লৈবাক্কী কন্নেক্তিবিতী চাউখৎহন্নবা পায়খৎপা অতোপ্পা মশক নাইবা খোঙথাং অমা ওইনা, প্রধান মন্ত্রীনা লৈবাক মীয়ামদা দিল্লী-বদোদরা এক্সপ্রেসৱে খুৎশিন্নগনি, হায়রিবা অসি চাউরাক্না লুপা করোর 11,895 চঙনা শেমগৎখিবনি। মহাক্না লুপা করোর 1880 হেনবগী তোঙান-তোঙানবা রোদ প্রোজেক্ত মঙাগী উরেপ উয়ুংসু তমগনি।
মীপুম খুদিংগী মশাগী ময়ুম অমা শোইদনা লৈহনবা হায়বসিগীদমক্তা প্রধান মন্ত্রীনা লেপ্তনা হোৎনদুনা লাক্লি। পান্দম অসিগা মরী লৈননা, PMAY-গ্রামীনগী মখাদা শাখিবা য়ুম লাখ 2.2 হেনবগী গৃহ প্রবেশকী থৌরমসু প্রধান মন্ত্রীনা হৌদোক্কনি। PMAY-অর্বানগী মখাদা চাউরাক্না লুপা করোর 140 চঙনা শাখিবা য়ুমশিং মহাক্না য়ুম্বশিংদা খুৎশিন্নগনি।
সরকারনা অহেনবা মিৎয়েং চঙদুয়া লাকখিবা মরু ওইবা হীরমশিংগী মনুংদা অফবা অমসুং মরাং কায়বা ঈশিং ফংহনবা হায়বসিসু অমনি। পান্দম অসিবু খুমাং চাউশিলহনবা ওইনা, প্রধান মন্ত্রীনা গ্বালিয়র অমসুং শেওপুর জিলাদা লুপা করোর 1530 হেনবগী জল জীবন মিসনগী প্রোজেক্তশিংগী উরেপ উয়ুং তমগনি। প্রোজেক্ত অনি অসিনা পুন্দুনা লমদমসিগী খুঙ্গং 720 হেনবগী মফমদা কান্নবা ফংহনগনি।
হেল্থ ইনফ্রাস্ত্রকচর হেন্না চাউখৎহনবগী অতোপ্পা খোঙথাং অমা ওইনা, প্রধান মন্ত্রীনা অয়ুশমান ভারত হেল্থ ইনফ্রাস্ত্রকচর মিসনগী মখাদা শাগদবা হেল্থ সেন্তর মাপনগী উরেপ উয়ুং তমগনি। হেল্থ সেন্তরশিং অসি লুপা করোর 150 হেন্না চঙদুনা শাগদবনি।
প্রধান মন্ত্রীনা IIT ইন্দোরগী একাদমিক বিলদিংবু মীয়ামদা খুৎশিন্নগনি অমসুং কেম্পস অসিগী মনুংদা লৈগদবা হোস্তেল অমসুং অতোপ্পা বিলদিংশিংগী উরেপ উয়ুংসু তমগনি। প্রধান মন্ত্রীনা মলতি-মোদেল লোজিস্তিক্স পার্ক অমগী উরেপ উয়ুংসু ইন্দোরদা তমগনি। মহাক্না তোঙান-তোঙানবা প্রোজেক্তশিংগী মনুংদগী উজেনগী ইন্তিগ্রেতেদ ইন্দস্ত্রীল তাউনশিপ, IOCL বোত্তলিং প্লান্ত, গ্বালিয়রগী অতল বিহারী বাজপায় দিব্যাং স্পোর্ত ত্রেনিং সেন্তর য়াওনা প্রোজেক্ত কয়াসু মীয়ামদা খুৎশিন্নগনি।
