হান্নগী প্রধান মন্ত্রী, শ্রী অতল বিহারি বাজপায়ীগী ১০০শুবা মপোক কুমওনগী থৌরমদা, প্রধান মন্ত্রী, শ্রী নরেন্দ্র মোদীনা দিসেম্বর ২৫দা মধ্য প্রদেশতা চৎকনি। নুমিৎ য়ুংবা মতুং পুং ১২.৩০ তাবা মতমদা, মহাক্না খাজুরাহোদা চাওখৎ থৌরাংগী প্রোজেক্ত কয়া অমা শঙ্গারগনি অমসুং উরেপ-উয়ুং তম্লগনি।
প্রধান মন্ত্রীনা কেন-কেত্বা তুরল শম্নহনবা নেস্নেল প্রোজেক্তকী উরেপ-উয়ুং তম্লগনি, মসি নেস্নেল পর্সপেক্তিব প্লানগী মখাদা তুরলশিংবু শম্নহনবা লৈবাক অসিগী অহানবা প্রোজেক্তনি। প্রোজেক্ত অসিনা মধ্য প্রদেশ অমসুং উত্তর প্রদেশতা জিলা কয়া অমগী ঈথৈ-লৌখোংশিংদা ঈশিং পীরগনি, মসিনা লৌমীশিংগী ইমুং লাখ কয়া অমদা কান্নহল্লগনি। প্রোজেক্ত অসিনা লমদম অসিগী মীশিংদা থক্নবা ঈশিংগী খুদোংচাবশিংশু ফংহল্লগনি। মসিগা লোইননা, হাইদ্রোপাৱর প্রোজেক্তশিংনা গ্রীন ইনর্জীদা মেগাৱাত ১০০ হেন্না পুথোক্লগনি। প্রোজেক্ত অসিনা থবক কয়া অমশু পীরগনি লোইন-লোইননা খুঙ্গংগী শেনমিৎলোনশু চাউখৎহল্লগনি।
প্রধান মন্ত্রীনা হান্নগী প্রধান মন্ত্রী, শ্রী অতল বিহারি বাজপায়ীগী ১০০শুবা মপোক কুমওন থৌরমবু নিংশিংলদুনা নিংশিং খুদম ওইবা স্তামপ অমসুং শেলয়েক ফোলগনি। মহাক্না অতল গ্রাম সুশাসন বিলদিং ১১৫৩গী উরেপ-উয়ুংশু তম্লগনি। বিলদিংশিং অসিনা লোকেলগী থাক্তা অফবা গোবর্নেন্সন লৈহন্নবা গ্রাম পঞ্চায়তশিংগী থবক থবক-থৌরমশিং অমসুং মখোয়গী মথৌদাংশিং অদুগী থৌসিল-থৌরাংশিং অদুবু নিংথিনা পাংথোকপদা য়াম্না মরু ওইবা থৌদাং অমা লৌরগনি।
ইনর্জী মতিক চানা ৱাত্ত-পাদনা লৈহনবা অমসুং গ্রীন ইনর্জীবু প্রোমোত তৌনবা লেপ্লিবা মহাক্কী ফিরেপ অদুগা মরি লৈননা, প্রধান মন্ত্রীনা মধ্য প্রদেশকী খান্দৱা জিলাগী ওমকারেস্বরদা লিংখৎপা ওমকারেস্বর ফ্লোতিং সোলর প্রোজেক্ত শঙ্গারগনি। প্রোজেক্ত অসিনা কার্বোন এমিসন তৌবা হন্থহল্লগনি অমসুং ২০৭০ ফাওবদা নেত জিরো কার্বোন এমিসনগী পাইখৎলিবা সরকারগী মিসনদা শরুক য়ারগনি। ঈশিংনা মনিল ওনবা হন্থহন্দুনা ঈশিংগী কঞ্জার্বেশন তৌবদশু মতেং পাংলগনি।
