জনুৱারি ৫দা প্রধান মন্ত্রীনা কোচি-মঙ্গালুরু নেচরেল গ্যাস পাইপলাইন মীয়ামদা কৎথোক্কনি

ভিদিও কনফরেন্সকী খুৎথাংদা জনুৱারি ৫, ২০২১গী অয়ুক পুং ১১ তাবদা প্রধান মন্ত্রী শ্রী নরেন্দ্র মোদীনা কোচি-মঙ্গালুরু নেচরেল গ্যাস পাইপলাইন মীয়ামদা কৎথোক্কনি। থৌরম অসি ‘লৈবাক অমা গ্যাস গ্রিদ অমা’ শেম্নবা মাইকৈদা মরুওইবা খুমাঙচাউশিনবা অমগী খুদম অমনি। থৌরম অদুদা কর্নাতাকা অমসুং কেরলাগী রাজ্যপালশিং অমসুং চীফ মিনিস্তরশিংগা লোয়ন্না পেত্রোলিয়ম অমসুং নেচরেল গ্যাসকী য়ুনিয়ন মিনিস্তর শরুক য়াগনি।

পাইপলাইনগী মরমদা

কিলোমিতর ৪৫০ শাংবা পাইপলাইন অসি গেল(ইন্দিয়া)লিমিতেদনা শাবনি। মসিনা নোংমদা মেত্রিক স্তেন্দার্দ কুবিক মিতর মিল্লিয়ন ১২ পুবা ঙমগনি অমসুং ইরনাকুলাম, থ্রিসুর, পালাক্কাদ, মালাপুরম, কোজিকোর, কন্নর অমসুং কাসারাগোদ জিলাশিং ফাওরগা কোচিগী লিকুইদফাইদ নেচরেল গ্যাস রিগ্যাসতিফিকেসন তর্মিনেলদগী মঙ্গালুরু(দক্ষিনা কন্নরা জিলা, কর্নাতাকা)ফাওবা নেচরেল গ্যাস পুগনি। প্রোজেক অসিগী অপুনবা শেনফম লুপা করোর ৩০০০ রোম্নি অমসুং মসি শেমগৎপদা মেন-দেস লাখ ১২ হেন্না থবক পীখি। পাইপলাইন অসিনা ফাওদুনা চৎপা মফম ১০০ হেনবদা ঈশিং লৈবা মফমশিং ওইবদগী পাইপলাইন ফুম্বা অসি ইঞ্জিনিয়ারিংগী অচৌবা শিংনবা অমা ওইখি। হোরাইজোন্তেল দিরেক্সনেল দ্রিলিং মেথোদ হায়না খঙনবা অখন্নবা তেক্নিক অমা শীজিন্নদুনা থবক অসি পাংথোকখি।

পাইপলাইন অসিদা য়ুমথোঙ খুদিংদা অকোয়বগী ফিবম শোকহন্দবা অমসুং মমল হোঙবা পাইপ নেচরেল গ্যাস(পি এন জি) ফংহনগনি অমসুং ত্রান্সপোর্ত সেক্তরদা কমপ্রেস নেচরেল গ্যাস ফংহনগনি। পাইপলাইন অসিদা পরিংদা লৈবা জিলা শীনবা থুংনা ললোন-ইতিক্কী মফমশিং অমসুং ইন্দস্ত্রিয়েল য়ুনিতশিংদা নেচরেল গ্যাস ফংহনগনি। মৈখু চেন্দবা ইনর্জি শীজিন্নবা অসিনা নুংশিৎ মোৎপা হন্থহন্দুনা নুংশিৎ শেংবা হেনগৎহনগনি।