প্রধান মন্ত্রীনা ফেব্রুৱারি ২৯,২০২৪ দা নুংথিল পুং ৪ তাবদা ভিদিও কনফরেন্সকী খুৎথাংদা ‘বিকসিত ভারত বিকসিত মধ্য প্রদেস’ থৌরমদা ৱা ঙাংগনি। থৌরম অদুদা, প্রধান মন্ত্রীনা মধ্য প্রদেস শীনবা থুংনা লুপা করোর ১৭,৫০০ হেনবগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি অমসুং লৈবাক মীয়ামদা কৎথোক্কনি। প্রোজেকশিং অদুগী মনুংদা য়াওরিবা মরুওইবা সেক্তরশিংদি ইথৈ-লৌখোঙ, পৱার, রেল, লম্বী, ঈশিং পীবা, কোয়লা অমসুং উদোগনি। প্রধান মন্ত্রীনা মধ্য প্রদেসতা সাইবর তেহসিল প্রোজেক হৌদোক্কনি।
প্রধান মন্ত্রীনা মধ্য প্রদেসতা লুপা করোর ৫৫০০ হেনবগী ইথৈ-লৌখোং পীনবা প্রোজেকশিং উরেপ-উয়ুং তমগনি। হায়রিবা প্রোজেকশিংগী মনুংদা অপ্পর নর্মাদা প্রোজেক, রাঘাবপুর মল্তিপর্পজ প্রোজেক, বসানিয়া মল্তিপর্পজ প্রোজেকনি। হায়রিবা প্রোজেকশিং অসিনা দিন্দোরি, অনুপ্পুর অমসুং মন্দলা জিলাশিংদা লৌবুক হেক্তর ৭৫০০ হেনবদা ঈশিং ফংহনগনি অমসুং লমদম অসিদা মৈ অমসুং থক্নবা ঈশিং ফংবা হেনগৎহনগনি। প্রধান মন্ত্রীনা রাজ্য অসিদা লুপা করোর ৮০০ হেনবগী মাইক্রো ইরিগেসন প্রোজেক অনি লৈবাক মীয়ামদা কৎথোক্কনি। হায়রিবা প্রোজেকশিংগী মনুংদা পারাদোস মাইক্রো ইরিগেসন প্রোজেক অমসুং আউল্লিয়া মাইক্রো ইরিগেসন প্রোজেক য়াওরি। হায়রিবা মাইক্রো ইরিগেসন প্রোজেকশিং অসিনা বেতুল অমসুং খন্দৱা জিলাশিংদা লম হেক্তর ২৬,০০০ হেনবগী দরকার ওইবশিং ফংহনগনি।
প্রধান মন্ত্রীনা মধ্য প্রদেসতা লুপা করোর ২২০০ হেন্না চঙনা শেমগৎপা রেলৱে প্রোজেক অহুম লৈবাক মীয়ামদা কৎথোক্কনি। প্রোজেকশিংগী মনুংদা বিরঙ্গানা লক্সমীবাই ঝান্সি-জাখলাউন অমসুং ধাউরা-অগাসোদ রুত্তা অহুমশুবা লাইন; নিউ সুমাউলি-জোরা অলাপুর রেলৱা লাই গেজ ওনখৎপা; অমসুং পোৱারখেরা-জুঝারপুর রেল লাইন ফ্লাইওর প্রোজেক য়াওরি। হায়রিবা প্রোজেকশিং অসিনা লমদম অসিদা রেলগী চৎথোক-চৎশিন অমসুং খুন্নাইগী শেন-থুমগী ফিবম ফগৎহনগনি।
রাজ্য অসিদা উদোগ চাউখৎপা হেনগৎহন্নবা, প্রধান মন্ত্রীনা মধ্য প্রদেস শীনবা থুংনা লুপা করোর ১০০০ রোমগী তোঙান-তোঙানবা উদোগশিংগী প্রোজেকশিং উরেপ-উয়ুং তমগনি। হায়রিবা প্রোজেকশিংগী মনুংদা মোরেনা জিলাগী সিতাপুরদা মেগা লেদর, ফুদৱিয়ার অমসুং এসেসোরি ক্লস্তর; ইন্দোরদা গার্মেন্ত ইন্দস্ত্রিগী প্লগ এন্দ প্লে পার্ক; ধার জিলাদা ইন্দস্ত্রিএল পার্ক মান্দসৌর(জাগ্গাখেরি ফেজ-২); অমসুং ইন্দস্ত্রিএল পার্ক পীথমপুরা ফগৎহনবা য়াওরি।
প্রধান মন্ত্রীনা লুপা করোর ১০০০ হেনবগী কোয়লা প্রোজেকশিং লৈবাক মীয়ামদা কৎথোক্কনি। হায়রিবা প্রোজেকশিংগী মনুংদা জয়ান্ত ও.সি.পি সি.ঐচ.পি সিলো, এন.সি.এল সিঙ্গ্রাউলি অমসুং দুধিচুয়া ও.সি.পি সি.ঐচ.পি সিলোনি।
মধ্য প্রদেসতা পৱার সেক্তর মপাঙ্গল কনখৎহন্নবা, প্রধান মন্ত্রীনা পান্না, রাইসেন, ছিন্দৱারা অমসুং নর্মাদাপুরম জিলাশিংদা সব-স্তেসন তরুক্কী উরেপ-উয়ুং তমগনি। হায়রিবা সব-স্তেসনশিং অসিনা রাজ্য অসিগী জিলা ১১ হায়বদি ভোপাল, পান্না, রাইসেন, ছিন্দৱারা, নর্মাদাপুরম, বিদিসা, সাগার, দামোস, ছাতারপুর, হারদা অমসুং সোহোরগী মীয়ামদা কান্নবশিং পীরগনি। মান্দিপ ইন্দস্ত্রিএল এরিয়াগী উদোগশিংদা সব-স্তেসনশিং অসিনা কান্নবা পীগনি।
প্রধান মন্ত্রীনা অমরুত ২.০গী মখাদা লুপা করোর ৮৮০ হেনবগী তোঙান-তোঙানবা প্রোজেকশিং অমসুং রাজ্য অসিগী জিলা কয়াদা থক্নবা ঈশিং ফংহন্নবা অতোপ্পা স্কিমশিং ফগৎহন্নবা প্রোজেকশিংগী উরেপ-উয়ুং তমগনি। প্রধান মন্ত্রীনা খারগোনেদা থক্নবা ঈশিং ফংহন্নবা স্কিম ফগৎহনবগী প্রোজেক লৈবাক মীয়ামদা কৎথোক্কনি।
মীয়ামদা সরকারগী থবক-থৌরমশিং ফংহনবা ফগৎহন্নবা মাইকৈদা থাংজিনবা খোঙথাং অমদা, মধ্য প্রদেসতা সাইবর তেহসিল প্রোজেক্না মপুংফাবা খাসরাগী লৈবা-য়োনবগী থবক্তা চে য়াওদবা, মীওইশিং হকথেংননা শরুক য়াদনা অমসুং ওনলাইন্দা মিউতেসন পাংথোকপা অমসুং রেভিনিয়ু রেকোর্দশিং চুমথোকপা য়াহল্লগনি। রাজ্য অসিগী জিলা ৫৫দা প্রোজেক অসি পায়খৎকনি অমসুং মধ্য প্রদেস শীনবা থুংবগী রেভিনিয়ু কোর্ত অমা খক লৈহল্লগনি। এপ্লিকান্তদা ফাইনেল ওর্দরগী সর্তিফাইদ কোপি পীনবা মসিদা ই-মেল/ৱাতসএপ্প শীজিন্নরে।
প্রধান মন্ত্রীনা মধ্য প্রদেসতা তোঙান-তোঙানবা মরুওইবা লম্বীগী প্রোজেকশিংশু উরেপ-উয়ুং তমগনি।
প্রোজেকশিং অসি হৌদোকপনা মধ্য প্রদেসতা ইনফ্রাস্ত্রকচর, খুন্নাইগী শেন-থুম চাউখৎপা অমসুং হিংবদা লাইবা হেনগৎহন্নবা প্রধান মন্ত্রীগী পান্দমগী মরুওইবা থম্লি।
