ঐহাক্কী য়ু ত্যুবর মরুপশিং, ঐহাকসু য়ু ত্যুবর অমা ওইনা অদোমগা লোয়না পুনবসিদা ঙসিদি য়াম্না নুংঙাইবা ফাওই। ঐহাকসু অদোমগী চপ মান্নৈ, করিসু খেন্নবা লৈতে। চহি 15দগী হৌদুনা, ঐহাকসু লৈবাক অমসুং মালেমগা য়ু ত্যুব চেন্নেলগী খুত্থাংদা মরী লৈনদুনা লাক্লি। ঐহাক্কীসু মশিং য়াম্বা সবস্ক্রাইবর লৈরে।
ঙসি, ক্রিএতর, ক্রিএতর ওইনীংবা মীওই চাউরাক্না 5000গী অচৌবা কম্ম্যুনিতী অমা মফমসিদাশরুক য়ারি হায়না ঐহাক্কী ইফমদা পাউদম্বীরে। কনাগুম্বা খরনা গেমিংদা, তেক্নোলোজীদা, চিঞ্জাক্কী মতাংদা ব্লোগগিং তৌই, অদুগা কনাগুম্বা খরনা ত্রাভেল ব্লোগগর ওইরি, লাইফস্তাইল ইনফ্লুএন্সর ওইরি।
মরুপশিং, অদোমগী কন্তেন্তশিং অসিনা ঐখোয়গী লৈবাক্কী মীয়ামদা মতৌ করম্না শাফু পীরি হায়বসি ঐহাক্না চহি কয়াদগী য়েংদুনা লাক্লি। শাফু অসি হেন্না ইফেক্তিব ওইহনবগী খুদোংচাবা অমা হৌজিক লৈরে। ঐখোয়না অমত্তা ওইনা পুন্দুনা লৈবাক অসিগী য়াম্লবদা মীওইশিংগী পুন্সিদা অওনবা অমা পুরকপা ঙমগনি। ঐখোয়না অমত্তা ওইনা পুন্দুনা মীওই কয়াদা মপাঙ্গল হাপ্পা ঙমগনি। ঐখোয়না অমত্তা ওইনা পুন্দুনা মীওই করোর কয়াদা মরু ওইবা হীরম কয়া তাকপীবা ঙমগনি। ঐখোয়না মখোয়গা শম্নবা ঙমগনি।
মরুপশিং, ঐহাক্কী চেন্নেলদা ভিদিও লিশিংমুক য়াওজরবসু, মখোয়গী মরক্তগী ঐঙোন্দা খ্বাইদগী পেঞ্জবা ভিদিওদি পরিক্ষাগী পোৎলুম, থাজবা থম্ববু শেন্নবা, প্রদক্তিবিতীগুম্বা হীরমগী মতাংদা য়ু ত্যুবকী খুত্থাংদা ঐখোয়গী লৈবাক্কী মহৈরোই লাখ কয়াগা ৱারি শান্নখিবশিংদুনি।
ঐহাক্না লৈবাক্কী অসুক য়াম্না চাউরবা ক্রিএতিব কম্ম্যুনিতীগী মরক্তা লৈজবা অসিদা ঐহাকসু চপ মান্নবা হীরমগী মতাংদা ৱা ঙাংনিংবা পোক্লক্লে। মসিগী হীরমশিং অসিদি মীয়ামগী ইহৌগা মরী লৈনবনি, লৈবাক অসিগী মীয়ামগী মশাগী পাঙ্গলনা অসিনা মখয়গী মায় পাকপগী মরম্নি।
অহানবা হীরমদি লু-নানবগী মতাংদনি। স্বচ্ছ ভারতনা হৌখিবা চহি 9দা অচৌবা কেম্পেন অমা ওইখ্রে। মীওই খুদিংনা মসিদা মশাগী শরুক তম্নখি, অঙাংশিংনা মসিদা ইমোস্নেল ওইবা শক্তি অমা হাপখি। সেলেব্রিতীশিংনা মসিগী থাক ৱাহনখি, লৈবাক্কী কাচিন কোয়া খুদিংগী মীওইশিংনা মসিবু মিসন অমদা ওন্থোকখি অমসুং অদোমগুম্বা য়ু ত্যুবরশিংনা লু-নানবগী থৌওংবু হেন্না ‘কুল’ ওইহনখি।
অদুগা ঐখোয়না হৌজিক লেপকদবা নত্তে। লু-নানবা হায়বসিনা ভারতকী শক্তাক ওইদ্রিবা ফাওবা, ঐখোয়না লেপ্লোই। মরম অদুনা, লু-নানবা হায়বসিনা অদোম খুদিংগী অহানবা মিৎয়েং ওইগদবনি।
অনিশুবা হীরম অসিনা দিজিতেল পেমেন্তকী মতাংদনি। UPIনা মায় পাকখিবদগী ভারতনা ঙসিদি মালেমগী অপুনবা দিজিতেল পেমেন্তকী চাদা 46কী শরুক কল্লে। অদোম্না লৈবাক্কী মীয়াম কয়াদা দিজিতেল পেমেন্ত তৌনবা ইথিল পীগদবনি, দিজিতেল পেমেন্ত মতৌ করম্না তৌগদগে হায়বসি অদোমগী ভিদিওশিংগী খুত্থাংদা অচম্বা লোলদা তাকপীগদবনি।
অতোপ্পা হীরম অমদি ভোকেল ফোর লোকেল হায়বসিনি। ঐখোয়গী লৈবাক অসিদা পোত্থোক কয়া অমদি লোকেলগী থাক্তা শানরি। ঐখোয়গী লোকেল আর্তিসানশিংগী স্কিল অসিদি ঙক্নীংঙাই অইবা ঙাক্তনি। অদোম্না মখোয়বু অদোমগী থবক্কী খুত্থাংদা মমিং চৎহন্দুনা মবুক্নিং থৌগৎপা য়াগনি অমসুং ভারতকী লোকেলবু গ্লোবেলদা ওন্থোকপদা অদোম্না মতেং পাংবা য়াগনি।
ঐহাক্না হায়জনীংবা ৱাফম অমসু লৈরি। ঐখোয়গী লৈহাওগী মনম চেনবা, ঐখোয়গী শিন্মী নত্ত্রগা আর্তিসানগী হুমাং মনম চেনবা পোত্থোক লৈসি হায়বা ৱাফম কয়া অদোম্না থম্মোইনুংদগী ফোংদোক্তুনা অতোপ্পদা ইথিল পীবিয়ু। খাদী, হেন্দিক্রাফ, হেন্দলুম নত্ত্রগা অতোপ্পা অমা হেক্তা ওইরো, অদোম্না মখোয়শিং লৈনবা মীয়ামদা ইথিল পীবিয়ু। লৈবাক অসিবু মীকপ থোকহনবীয়ু, ইহৌ অমা হৌদোকপীয়ু।
অদুগা, ঐহাক্কী মাইকৈদগী ৱাফম অমা হৌদোকচগে। য়ু ত্যুবর অমগী শক্তাক অদুগা লোয়ননা অদোম্না থবক খরা হাপচিনবা য়াগদরা? ইপিসোদ খুদিংগী অরোইবদা ৱাহং হংবা নত্ত্রগা থবক ওইনা পাংথোকপা য়াবা ৱাফম খরা হাপ্পগী মতাংদা অমুক্তা খন্থবীয়ু। মীয়াম্না থবকশিং অদু পাংথোক্লগা অদোমগী নাক্তা শেয়র তৌহনবা য়াই। মসিদগী অদোমগী মিংচৎসু হেনগৎকনি অদুগা মীয়াম্না অদোমগী ৱা তাবখক্তা নত্তনা করিগুম্বা খরা পাংথোকপদসু শরুক য়াগনি।
অদোমগা ৱারি শাবসি ঐহাক্না তসেংনা নুংঙাইবা ফাওই। অদোম্না অদোমগী ভিদিওগী অরোইবদা করি হায়নগে....ঐসু হায়গে। ঐহাক্কী চেন্নেলদা সবস্ক্রাইব তৌবীয়ু অমসুং অপদেত খুদিংমক ফংনবা বেল আইকন্দা নম্বীয়ু।
পুম্নমক্না নুংঙাই য়াইফবা ওইবীয়ু।
