প্রধান মন্ত্রী শ্রী নরেন্দ্র মোদীনা ঙসি তেলঙ্গনাগী হাইদরাবাদতা ভিদিও কনফরেন্সকী থোংদা ৱিংস ইন্দিয়া ২০২৬ প্রোগ্রামগী মীয়াম তিনবা মীফম অমদা ৱা ঙাংখ্রে। থৌরম অদুদা ৱা ঙাংলদুনা, প্রধান মন্ত্রীনা ইন্দস্ত্রীগী লুচিংবশিং, এক্সপর্তশিং অমসুং ইনভেস্তরশিংবু তরাম্না ওকখি। এভিএসন ইন্দস্ত্রীগী মথংগী মতম অসি এস্পিরেসনশিংনা থনবা অমসুং ভারতনা মরুওইবা প্লেয়র অমা ওইনা থোরক্লি হায়না মহাক্না ফোংদোকখি। মহাক্না এয়রক্রাফ মেন্যুফেকচরিং, পাইলোৎ ত্রেনিং, এদভান্স এয়র মোবিলিতী, অমসুং এয়রক্রাফত লিজিংদা ভারতনা পীরিবা অচৌবা খুদোংচাবশিং অদু পনখি। স্তেকহোল্দর পুম্নমক্কীদমক ৱিংস ইন্দিয়া সম্মিৎকী মরুওইবা অদু মহাক্না ফোংদোকখি।
শ্রী মোদীনা হায়খি মদুদি হৌখিবা চহি তরা অসিদা ভারতকী এভিএসন সেক্তরনা পুৱারী ওইরবা অহোংবা অমা লাক্লে। মহাক্না নৌহৌননা নীংশিংখি মদুদি মতম অমদা এয়র ত্রেভেল অসি অখন্নবা ক্লব অমা খক্তংগী ওইরম্মি অদুবু ঙসিদি ভারত অসি মালেমগী অহুমশুবা খ্বাইদগী চাউবা দোমেস্তিক এভিএসন মার্কেত ওইরে। মহাক্না পনখি মদুদি পেসেঞ্জর ত্রাফিক অসি য়াম্না থুনা হেনগৎলক্লি অমসুং ইন্দিয়ন এয়রলাইন্সশিংনা মখোয়গী এয়রফিল্দশিং পাকথোক চাউথোকহল্লি। হৌখিবা চহিশিংদা এয়রক্রাফ ১৫০০ হেন্না ওর্দর তৌখ্রে।
প্রধান মন্ত্রীনা হায়খি মদুদি সরকারগী অশাংবা মতমগী ওইবা মিৎয়েং অসিনা মরম ওইদুনা অসিগুম্বা চাউখৎপা অসি ওইথোকপা ঙম্লে। মীপুম খুদিংমক্না নোংথক্কী লম্বীদা লায়না চৎপা ঙম্নবা মিসন অসিগা লোয়ননা এয়র ত্রেভেল অসি এক্সক্লুসিব ওইবগী মহুত্তা ইনক্লুসিব ওইহন্নবা হোৎনরি। মহাক্না হায়খি মদুদি তায়র-২ অমসুং তায়র-৩গী শহরশিং অসি এয়রপোর্তশিংগা শম্নহল্লে। মহাক্না হায়খি মদুদি ২০১৪দা ভারত্তা এয়রপোর্ত ৭০ লৈরম্মি, অদুগা ঙসিদি মসিগী মশিং অসি ১৬০ হেনখ্রে। মসিনা তাকপদি লৈবাক অসিনা চহি তরাগী মনুংদা এয়রপোর্ত মশিং অদুগী শরুক অনি হেন্না শাখ্রে। শ্রী মোদীনা মখা তাখি মদুদি এয়রদ্রোম ১০০ হেন্না এক্তিব তৌখ্রে অমসুং মসিগা লোয়ননা সরকারনা য়াম্লবা মমলদা ভারা ফংহন্নবা উদান স্কিম হৌদোকখ্রে। মহাক্না হায়খি মদুদি উরানগী মহৈ ওইনা, পেসেঞ্জর মিলিয়ন ১৫, চাউরাক্না করোর অমা মখাইনা রুতশিং অসিদা চৎখ্রে, মসিগী মনুংদা কয়া অমদি মমাংদা লৈরমদে।
প্রধান মন্ত্রী মোদীনা হায়খি মদুদি ভারতনা চাউখৎলবা লৈবাক অমা ওইবগী পান্দমদা খুমাং চাউশিল্লকপগা লোয়ননা, এয়র কন্নেক্তিবিতী পাকথোক চাউথোকপা অসি মশিং কয়া হেনগৎলক্লি। মহাক্না হায়খি মদুদি ২০৪৭ ফাওবদা, ভারতনা পাক চাউবা নেৎৱার্ক অমা শেমদুনা এয়রপোর্ত ৪০০ হেনবা লৈরগনি হায়না পানরি। শ্রী মোদীনা হায়খি মদুদি সরকারনা লৈবাক অসিগী মফম খুদিংদা কন্নেক্তিবিতী ফগৎহন্নবগী পান্দমগা লোইননা সী-প্লেন ওপরেসনশিং পাকথোক চাউথোকহনবগা লোয়ননা রিজনেল অমসুং অহোংবা মমলদা এয়র কনেক্তিবিতী হেন্না মপাঙ্গল কনখৎহন্নবগীদমক উরান স্কিমগী মথংগী তাঙ্কক্কী থবক পায়খৎলি।
সরকার অসিনা তুরিজম সেক্তর চাউখৎনবা অকনবা মীৎয়েং চংলি হায়না পল্লদুনা শ্রী মোদীনা হায়খি মদুদি লৈবাক শীনবা থুংনা তুরিজমগী মফমশিং অসি অপগ্রেদ তৌরি, অমসুং মীওই কয়া অমনা এয়র ত্রেভেলগী পাম্বৈ শিজিন্নরি। প্রধান মন্ত্রীনা হায়খি মদুদি লাক্কদৌরিবা চহিশিংদা এয়র ত্রেভেলগী দিমান্দ অসি মমাংদা অমুক্তা ওইখিদ্রিবা মওংদা হেনগৎলক্লগনি। মসিনা ইনভেস্তমেন্তকী খুদোংচাবা হেন্না লৈহল্লগনি।
প্রধান মন্ত্রীনা হায়খি মদুদি ভারত অসি মালেমগী মরুওইবা এভিএসন হব অমা ওইরকপগা লোয়ননা, এভিএসনগী মথৌ তাবশিংগীদমক অতোপ্পশিংদা মখা পোনবা হন্থহনবা অমসুং মশা-মরোমদোম লেপচবগী লম্বী অসি মপাঙ্গল কনখৎহনবা অসি তঙাই ফদে। মসিনা ভারত্তা ইনবেস্ত তৌরিবা কম্পেনীশিংদা কান্নবা ফংহল্লগনি। শ্রী মোদীনা হায়খি মদুদি ভারতনা এয়রক্রাফ দিজাইন, মেন্যুফেকচরিং অমসুং এয়রক্রাফ এম.আর.ও. ইকোসিস্তেমদা অকনবা মীৎয়েং থম্লি। ভারত অসি হান্ননা এয়রক্রাফতগী পোৎলম পুথোকপা অমসুং সপ্লাই তৌবদা অচৌবা লৈবাক অমা ওইরে হায়না মহাক্না অকনবা ৱাফম থমখি। প্রধান মন্ত্রীনা মখা তাখি মদুদি ভারতনা মিলিতরী অমসুং ত্রান্সপোর্ত এয়রক্রাফশিং দোমেস্তিক ওইনা পুথোকপা হৌখ্রে অমসুং সিভিল এয়রক্রাফ পুথোকপদসু মাংলোমদা চংশিল্লি। মালেমগী এয়র কোরিদোরশিংদা ভারতকী জিওগ্রাফিক পোজিসন, মান্নদবা দোমেস্তিক ফিদর নেৎৱার্ক, অমসুং তুংগী মতমগী ওইনা শাংদোক্লবা অরাপ্পা খোঙচৎকী ফ্লিতশিং য়াওনা ভারতকী খুদোংচাবশিং মহাক্না পনখি। মখোয়শিং অসি পুন্না লৈমিন্নদুনা অচৌবা শক্তি অমা শেম্মি।
প্রধান মন্ত্রীনা হায়খি মদুদি ভারত্তা দিজাইন অমসুং মেন্যুফেকচর তৌরবা ইলেক্ত্রিক ভর্তিকল তেক-ওফ অমসুং লেন্দিং এয়রক্রাফনা এভিএসন সেক্তরদা অনৌবা মাইকৈ অমা পীদুনা, চৎথোক-চৎশিনগী মতম য়াম্না হন্থহনগদবা নুমিৎ অদু কুইদ্রে। মহাক্না মখা তারদুনা হায়খি মদুদি ভারতনা সস্তেনেবল এভিএসন ফ্যুএলদা পাক-শন্না থবক তৌরি অমসুং লাক্কদৌরিবা চহিশিংদা গ্রীন এভিএসন ফ্যুএল পুথোকপা অমসুং থাদোকপা মরুওইবা লৈবাক অমা ওইগদৌরি।
ভারতনা এভিএসন সেক্তরদা রিফোর্ম কয়া পায়খৎলি হায়না পল্লদুনা শ্রী মোদীনা হায়খি মদুদি মসিগী মহৈ ওইনা লৈবাক অসিনা গ্লোবেল সাউথ অমসুং মালেমগী মরক্তা মরুওইবা এভিএসন গেতৱে অমা ওইরক্লি। মসিনা এভিএসন ইন্দস্ত্রীগা মরী লৈনবা ইনভেস্তরশিং অমসুং মেনুফেকচররশিংগীদমক অচৌবা খুদোংচাবা পীরি হায়না মহাক্না ফোংদোকখি।
শ্রী মোদীনা হায়খি মদুদি ভারতনা তোঙান তোঙানবা লমদমশিং অমসুং কৈথেলশিংগা শম্নহল্লি। শহরশিং অসি ত্রান্সপোর্তকী মখল কয়াগী খুত্থাংদা পোর্তশিংগা শম্নহল্লি। ভারতকী এভিএসনগী মিৎয়েং অসি এয়র কার্গোদা চপ মান্ননা মীৎয়েং থম্লি অমসুং কার্গোগী খোঙজেল য়াঙখৎহন্নবা অমসুং হেন্না মপাঙ্গল কনখৎহন্নবা সরকারনা দরকার ওইবা রেগুলেতরী রিফোর্ম পুম্নমক্তা থবক তৌরি হায়না মহাক্না অকনবা ৱাফম থমখি। দিজিতেল কার্গো প্লেৎফোর্মশিংনা অপুনবা থৌওং অসি লাইথোকহল্লি অমসুং হেন্না ত্রান্সপরেন্ত ওইহল্লি, অদুগা এয়রপোর্তকী মপান্দা প্রোসেসিং তৌবগী থৌরাংশিংনা এয়রপোর্তশিংদা লৈরিবা চৈরাক হন্থহল্লি হায়না মহাক্না ফোংদোকখি। প্রধান মন্ত্রীনা মখা তাখি মদুদি কার্গো হেন্দলিং হেন্না ফগৎহন্নবা অমসুং খোংজেল য়াংশিনহন্নবা মতমগা চুনবা গুদামশিং শেমগৎলি। মসিনা তুংগী মতমদা দেলিভরীগী মতম অমসুং লোজিস্তিক্কী শেনফম হন্থহল্লগনি। ভারত অসি অচৌবা অমসুং কম্পিতিতিব ত্রান্স-শিপমেন্ত হব অমা ওইরক্লগনি হায়না পল্লদুনা শ্রী মোদীনা ইনভেস্তরশিংদা ৱেরহাউজিং, ফ্রেত ফোরৱার্দিং, এক্সপ্রেস লোজিস্তিক্স অমসুং ই-কমর্স সেক্তরশিংদা খুদোংচাবশিং ফংনবা হায়খি।
প্রধান মন্ত্রীনা হায়খি মদুদি ঙসি মালেমগী লৈবাক খরা খক্তনা এভিএসন ইন্দস্ত্রীগীদমক ভারতনা তৌরিবা অসিগুম্না অচৌবা স্কেল, পোলিসী স্তেবিলিতী, অমসুং তেক্নোলোজীগী এম্বিশন লৈরি। মহাক্না লৈবাক খুদিংমক্তা, ইন্দস্ত্রীগী লুচিংবা খুদিংমক্তা, অমসুং ইন্নোবেতর খুদিংমক্তা মসিগী অচৌবা খুদোংচাবা অসি মপুং ফানা শিজিন্ননবা হায়খি। শ্রী মোদীনা মখোয়দা ভারতকী চাউখৎ থৌরাংগী খোঙচৎতা মতম শাংনা শরুক য়াবা অমসুং মালেমগী এভিএসন সেক্তর চাউখৎহনবদা মতেং পাংনবা হায়খি। মহাক্না ৱিংস ইন্দিয়াগী মায় পাক্না পাংথোক্নবা মহাক্কী য়াইফ-পাউজেল পীখি অমসুং কো-পাইলোৎ ওইনা ভারতকী ফ্লাইৎ অসিদা শরুক য়ানবা মালেমগী ইনভেস্তরশিংদা হায়জখি।
